رواية هذيانٌ بين جمرٍ وجليد ..(ارملة اخي المجنونة) الفصل الحادي والعشرون 21 - بقلم نورا ناصر

السلام عليكم
رواية هذيان بين جمر وجليد
بارت 16
نورا ناصر

البارت اهداء الى المتابعة شروق الشمس لان فازت بالمسابقة بكروب الفيس ...

هـي لاتبـالي بـمـا يقـول وتفعـل كـل ما يحـلو لهـا
هـو عنيـد متصلـب الرأي يريد فـرض سيطرتهُ عليهـا
يستشيـط غضباً من تصـرفاتها التـي تدق علـى أوتارهِ
فـَتعزفُ تحـركـاتها علـى نبضـات قلبهِ ألحـان تنخـر بقايا
قلبهُ المتسلط . فيناجـي ربهُ إللهـي كـمـا تسلل عشـقـها لأعـمـاقي
أدركـنـي لأستطيع السيطـرة على البراكين التـي تثـور بسببهـا
شعـرها الفاحـم كَـسَوادِ الليل طـويل يمـر على روحـي المفتـته
نـوبة غضـب تجتاح وتعصف مشـاعري _ أشحُ بناظـري عليـها
فـأرى فـي عينيـها لمعـان كإنهُ مأخوذ من جليـد أبيضُ لا يبـالي مثلـها
صـرت خليطُ من غضبٍ وبـرود إيهمـا أكـون جمـرٍ أم جليـد
هـذيـان بين قلـبي الهائـم بهـا وبيـن عقـلي الحـاقد عليها.... بقلم الكاتبة hoha17

*****

موج ...

اجاني مسج ع الفيس من شرار تفاجئت اديه ظلت ترتعش من شفت اسمه بالاشعارات مالتي .
ورسالته الي مو كاملة بس طالع منها
_موت معجبوج اصدقائي اني موجود شنو رأيج ..

شمرت الموبايل ع الميز وكلبته ع الشاشة مالته ..
وظليت اتنفس سريع ..

فركت وجهي ، احس قلبي تخلخل بنبضه لدرجة احس بي راح ينتقل ليمين صدري ..

معقولة يشاقه ؟ شوون وترني !! اخخخ يربي ظليت الوب المفروض اتجاهله اني بس احس ايدي وحدها اخذت الفون فتحت القفل طلعت محادثة شرار وصارت
تكتب ..

تستضرف حضرتك ؟ وبعدين الي اعرفه انت متلفظ حرف الجيم مو متعرف تكتبه .

عضيت شفتي واباوع لكلماته .. صار نشط بسرعة وطلع يكتب .. طلعت من محادثته ومن البرنامج كله ..

وبعد ثواني وصلت رسالته .. واني احس قلبي صار ببلعومي وصرت اتنفس بصعووبة ، شهالمشاعر هاي يربي ..

فتحت رسالته كاتب : والله تعودت اكلج موت راحت عليج بعد وانت صدك موت ممكذب .

هههه ترة اني دكتور ثلاثيني جاد شبيج مدا ااشاقة من صدك احجي اني اخطبج واحميج من اوس واطيح حظه اذا لمحج بنظرة افكس عيونه والله .

احس قلبي يريد شي وعقلي شي .. قلبي فرحان ويكولي اي وافقي وعقلي يكولي شنو نسيتي متزوج وعنده ولد !

كتبتله : ههه على كيفك لا تحمى هواي وبعدين انته شوكت صرت دكتور اشو ما ادري الي اعرفه انته اصلا ممكمل دراستك الطبية !

رد : اكمل اكمل ان شاءالله هنانه بالعراق يمج بعد ماافاركج ..

ضحكت : نسيت شغلة دكتور شرار ؟ انته مو متزوج وعندك ولد لو اني متوهمة مدري يصورلي !

رد .. علاقتي بزوجتي شبه منتهية .

.. شبه منتهية !! يعني مو منتهية وحتى لو تره بينكم ولد يعني مستحيل تنتهي .

_ من الاخير شنو جوابج لاتضلين تلفين وتدورين

_ رفض طبعا اني مستحيل اتزوج شخص متزوج مستحيل وحتى لو مطلق عنده او ما عنده اطفال اني بطبعي انانية بهذا الموضوع اريد الشخص بس الي ومحد يشاركني بي حتى اطفاله .

_ افهم من كلامج تردين واحد جديد بلاد ومامستعمل مو ؟

_ اي من حقي اختار شريك حياتي بالمواصفات الي تعجبني .. واوس انت َ غصبا عليك تخلصني منه لان انتَ ورطتني وياه ....

_ اكولج بالله لاتظلين تسقلين وتعيدين بالموضوع ويوميه جايه وكايلتلي على اوس منتبهة على نفسج تلحين هواي بت الحلو ؟

اني جاي اخطبج اني مو جاي حتى اتوسل بيج قبلتي خير على خير ما قبلتي تره مو اخر وحدة بالعالم انتي!

لا من صدك هسه اني الي راح احظره مو هوو ومن صدك حظرته .. بس احس كلبي ماراضي عليه ابد ..
ومقهورة احس بداخلي اكو فد شي يخصه بس كلشي ضدنه هو متزوج عنده طفل ومتعجرف همين ..

ماكو مجال لاي علاقة بيننا ابد الفرق شاسع واني اذا احب احب بتملك وانانية واريد الشخص بس الي ويمكن حتى من اطفاله اغار عليه

شرار ...

رفضتني ام عطووب الي استولت على تفكيري وعقلي عجبتني حيل كلشي عجبني بيها و صارلي اشهر ازحف الها بصورة غير مباشرة .

وجنت منتظر هالحظة وتارك ابني مريض بس والله مو صوجها صوجي اني بس صدمتني طلعت مو هينه .

جنت كاعد يم بلقيس بالصالة والشيخ استوى طلع للنجف علمود قبر حمدان ..

كالت : فرح من البارحة يم اهلها وحتى من طلعت لا حجت ولا كالت رايحة .

_ شعليكم بيها خليها تروح يم اهلها شعدهه هنا اني ماراضي ع الشيخ من مبقيها هنا خليها تطلع تشوف حياتها وكتله هالحجي بس هو الله يسلمه كال الطفل هنانه أحسن اله وخلي يربى بيننا .

_ على طاري فرح صدك شرار شعندك ويه موج ؟ انتوا بيناتكم علاقة ؟ هيام شافتكم انته وياها قبل عرس لهيب اثنينكم بغرفة فرح وفرح جانت جوه تسبح يعني جنتوا بس وحدكم وهالشي عيب ترة عيب عليك وعليها .

انصدمت وضغطت على اسناني : هو شنوه العيب صدك تحجين!! قابل شافتني نايم فوكاها . استغفر الله كووة تحجون الواحد ..

وكمت على حيلي متعصب وبعدين وينها هاي بتج هيامو ماتبطل تنقل حجي وتسوي بلبلات انوب دارت على موج تريد تشوه سمعتها ؟

كامت هيه همين : نصي صوتك شرار ولا تعصب ولا تعلي صوتك عليه اني اختك اكبر .

_ يابه اختي على عيني وراسي ، بس هاي بنتج ربيها مايصير هيج ترة والله اني حالف اكص شعرها وينها هيه ووينها مالكت غير مرج تحجي عليها مو كافي الي جاي تسوي بفرح .

_ ها هنا الحجي معناه كلامها صحيح انته رايدها لموج شنو نسيت نفسك متزوج ؟

_ لا مانسيت ومامحتاج انتي تذكريني واذا ردتها موج وشنو يعني الشرع حلل اربعة ..

_ وماناقصنه غير موج بعد مكافي اختها المخروعة الخبلة .

اجت امي .. يمه شرار شبيك صوتك عالي عيب احترم هيج ربيتك تعلي صوتك على اختك ..

صيحت بغضب : لعد خلي تربي بتها لو عليمن اصلا مية مرة كتلها هالحجي وماتاخذه وينها خلو اني اربيها احسن ..

لطمت امي خدها : عزاا بعينك تخبلت ..

كالت بلقيس وصلتله عدوة الخبال من فرح واختها

صارت تستفزني صعدت لفوك اصيح على هيام
وبلقيس وامي يصيحون عليه تجاهلتهم ومهتميت ..

صعدت لغرفة البنات باوعت لريلام بعصبية
ريلام طلعي بره وانتي هيام ابقي هنانه ..

ظلن وحدة تباوع للثانية باستغراب ..
حجت هيام وهي تفرك اصابعها : ليش خالو شمسويه اني ؟

طبكت الباب حيل وباوعت لريلام واني خازرها
_ ريلام انطيني المكص ..

حجت بتوسل : لا حباب خالو شتريد تسوي ؟

صيحت بصوت عالي وهنه فزززن من مكانهن ..
_ طلعييي المكص كتلج ..

راحت ريلام تدور بالجرارات وسمعت صوت بلقيس يم الباب رحت قفلتها ..

هيام واكفة خايفة وريلام دتدور وترجف ..
هيام تصيح وتتوسل : حبابة ريلام لاتنطينه ، خالو الله يخليك والله ماسويت شي ..

وصوت بلقيس من ورى الباب تصيح
_ شرار والله لساني مايجي على لسانك العمر كله اذا لزمت شعره من راسها .

اخذت المكص من ريلام واباوع على هيام واني بقمة غضبي .. تقربت منها لزمتها من رسغها ..
وقربتها عليه وهيه تبجي وخايفة .
لزمتها من كفاهه وقربت من اذنها همست
_ شنوو حجيتي على موج كدام امج ولج ؟

هزت راسها خايفة وريلام تتوسل بيه
خالو حباب اهدى ..

هزيت راسها احجيي ولج شكتيلها ؟؟ طعنتي بعرض موج مووو ؟

هزت راسها لالالا ...

رأسا سويتي ابيننا علاقة ؟؟ شفتيني يمها مافكرتي بغير شي ؟ مو يمكن سمعت صوت دانيال يبجي ورحت اشوفه ؟ وهي يمه ومادري بيها ، وباب غرفتج مفتوح وشفتي فرح نزلت للحمام !

ظلت بس تهز براسها بخوف وماتخلي عيني بعينها ..
كملت واني اريد نار مشتعلة بيه .. ومتجاهل صياح بلقيس ع الباب ولا كأنو اسمعها!

بفحيح ارعبها : يعني هيج عندج الشرف عادي تطعنين بي ياهو الجاي وطاعنته بشرفه انوب ويه موج ؟ شمسويتلج البنية .

حجت بتلعثم : ممسويتلي مجرد دا احجي لماما وربي ..

_ ولج مو انتي هم بنيه وباجر يطعنوج بشرفج مثل متطعنين الناس مافكرتي الدنيا كما تدين تدان ولج كد البغل صرتي وسنة التجي كلية هم تجينه يومية مصيبة .

اجتي ريلام لزمتني من زندي ومبينه تبجي وتحجي
خالوو حباب اتركها خالووو .

خليت المكص على ضفيرتها وبديته اكص وهي تصرخ وتبجي وتحووس .

واني اجر بيها واريدها تثبت ، كصيبتها ثخينه ظلت ع النص مكصوصة وخرت المكص ودفعتها ..

ياربي اني شجاي اسوي ، الله يطيح حظج موووج شسويتي بيه هذا كله علمودج هم ياريت ما رافضتني اشو ضربتيني بوري ، طيح الله حظج .

وكعت بالكاع تبجي وراحت ريلام تسكتي وهي تدفع بيها وبعدها تباوعلي بخوف ممزوج بحقد ..

رحت كرفصت كدامها ، لزمتها من فكها وباوعتلها بحدة وغضب ، بلعت ريك وحجيت وياهه بعنف ووحشية ..
اني وعدتج اكص شعرج ع زيرو هالمرة احمدي ربج على هذا شعرج مرة لخ اخليج تحسبين شعرايات شعرج بيدج هلكد متبقين كرعة .

شهكت ورجفت ودنكت وكملت اني بنفس النبرة المرعبة : ومو بس هاي لا والله اخذج اشمرج على عمامج وتحلمين ترجعين لهذا البيت بعد تحلمين!!!!

كمت على حيلي فتحت الباب وطلعت من الغرفة
شفت بلقيس لزمتني من ملابسي وظلت تصيح بوجهي
ولك شرار شسويت ببنتي شسوويت ؟

وخرت اديها مني وحجيت ببرود ربيتها الج شويه الظاهر ماتعرفين تربين ...

عفتها وتوجهت لغرفتي واسمع صوت هيام تصرخ وتبجي ، كرهت حالي والي سويته ..
بهالبنية اليتيمة ، الظاهر طلعت حرگة گلبي بيها ..

مهيب ..

حاولت بس اهدء ابوي ما اكدر صار مثل النار طول الطريق مايتحاجه ..

حاولت احجي ويا انطي واخذ بالحديث حتى اعرف شنو الي يجوول برأسه .
ماكدرت ظل الغمووض يحوم حووله طول الطريق الى ان وصلنا لبغداد .

وهو حتى الاتصالات الي تجي لتليفونه ماظل يرد عليها كضاهه بس يستغفر ويتأفأف
عرفت ابوي بقمة غضبه والله يستر من هذا الغضب .

وصلنا لبغداد هو اشر لابو محمد السايق وكاله
توجه لمنطقة ****... ....

عرفتها منطقة أهل فرح ناوي عليها اليوم الله يعلم شراح يسوي بيها ..

هو يكدر يخلي الدفان يدليه وين قبر عمي حمدان بس مادري على شنو ناوي وليش رجعنه لبغداد بدون مايعرف وين القبر احس راسي افتر .

رحنه لبيت اهل فرح دكينه االباب طلعت النه اختها الصغيرة .

نزل ابوي من السيارة وهي سلمت عليه ..
رد عليها وسألها وينها اختج فرح بابا اذا بالبيت صيحي عليها .

كالت مموجودة عمو اجت اخذت ابنها وطلعت ..

فر سبحته وهو لازمها بشدة ..
سألها مرة ثانية : ابوج وينه اخوج اختج الكبيرة هم مموجودين ؟

جاوبت والله عمو محد موجود بس اني وخالة احمد وبابا راحوا للطبيب وموج اختي بشغلها هسه تفضل ادخل اخابرهم يجون .

جاوبها بغموض : لا بنيتي مستعجلين عدنه شغل ، بس اختج فرح ماتدرين بيها وين راحت ؟

جاوبت : لا والله عمو اتوقع رجعت لبيتكم هيه ..

هزز راسه بتفهم .. وطلعنه من يمهم ..
كال خلي نروح لبيت عمها عندي شغل وياهم ..

سألته تتوقع موجودة ابيت عمها يابه ؟

هز راسه بمعنى لا وجاوب وهو يضغط على اسنانه
_ بس احتمال ابن عمها يعرف وين مكانها .

ماافتهمت ليش ابن عمها بالذات يعرف وين مكانها بس ابوي اكيد عنده شي وما كال هالشي عن عبث ..

وصلنا لبيت عمها وهم نزلنا اثنينه اشرلي ابوي
بأن ادك الباب ، دكيته واجانه صوت سالم الولد اعرفه يجي بفواتحنا وبالمناسبات ..

ظل يصيح من ورة الباب جايين جايين على كيفكم فد مرة كسروا بعد ..

فتح الباب بس شافنه اجه يشرد ، ابوي صاح عليه
مهييييب لززززمه لايشرد .

ركضت وراه لنص الطرمة مالتهم سحبته من ياخته وسحلته وهو يعيط عوفني اتركني .
طلعت المسدس خليته براسه هو رفع اديه وسكن عن الحركة ..

سحبته طلعته بره وصفيته ع الحايط والمسدس براسه ..

ابوي كال مهيييب نزل المسدس هسه هو يحجي ميحتاج ..

ظل مصفوف ع الحايط واني اخذت حجي الوالد وخليت المسدس بالبنطرون .

ابوي فر بسبحته مثل المسيطر على الوضع وعلامات وجهه ماتبشر بخير .

وجهه مثل الجليد وعيونه متلألئة مثل الجمر ..
بنبرة شديدة الصرامة وبتساؤل ونبرة امررر
_ احجي ولك وينها فرح لاتنكر وتكلي مادري ، ادفنك بأرضك وحق هو الله ، شايف هذا التراب الي جوه رجليك هنا ادفنك .

ترة ادري بيها دهنت زردومك بجم فلس واخذتك للنجف وحفرتوا كبر اخوي وانتهكتوا حرمته وتجاوزتوا عليه ، السكوت مو بصالحك احجي احسلك .

هو وجهه انخطف وانسحب منه اللون ، ابتسم ابتسامة مهزومة ومتلاشية وكال بنبرة يسيطر عليها الخوف والتوتر ..
_ بسلمان باك يم بيت عمتي ... ...

ابوي كال بنبرة مشددة و مسيطرة : مهيييب مشينه لسلمان باك وليدي ..

_ صار يابه .. داافوته الحمار سالم بالسيارة هو انتفض وكال خلي ابدلي البسلي جاكيته قمصلة مايصير هيج دخيلكم راح اموت من البرد بالطريق ..

ضربته على مؤخرة راسه : بسسس طافي جنك مرة بس تتشكى فوت وانته ساكت لاتلغي ..

جاوبني بعصبية ظاهرة : ترة اني مو شرطي جوه ايدك حتى هيج تعاملني والله اشتكي عليكم لو افصلكم مو عبالكم اني قليل شر وماكدرلكم ..

ضربه ابوي على كتفه بالسبحة : شنو ولك تعلمنه القانون انته تعلمنه اصول العشاير ؟ هو من الي تعدى علينا وتصرف بكيفه وراح حفر كبر اخوي وطلعه من كبره هااا احجي ..

بلعثمة وخوف جاوب وعيونه مايخليهن بعيون ابوي من شدة الخوف : --- ءءء رحت ويه بت عمي هي نختني وساعدتها خو ماتخلي الكبر يروح ويه الشارع هيه هم من حقها .

ابوي جاوبه برد قاسي : واحنه من شوكت نمشي بشور مرة المرحوم واحنه اخوته عدليين وراسنه يشم الهوا ؟ لك انته معتدي وحسابك بعدين .

دخلته كووة للسيارة وهو نتر على كيفك ولك ..
كورت قبضة ايدي اريد الكمه على وجهه وهم اله عين ويحجي .

بس ابوي وكفني وكال مهيييب لا مو هيج بويه مدام متعاون ويانه وراح يدلينه خلي نعاقبه بعدين بغير طريقة ..

دخل بالسيارة وكال هو شنو تعاقبوني شيخ ترة اني راح ادليكم على مكانها وشي ثاني مو بس اني رحت وياها حتى اخوها احمد همينه ..

حركت السيارة وابوي سكت عنه وتجاهله ..
وهو ظل يتوسل وبعد شويه يبجي .. واني كلساع اخزره مرتاحيتله ..

وصلنه لسلمان باك وحسب اوصافه هو نزلنا يم بيت
كال هذا بيت عمتي ، دكينه الباب طلعت لنا مرة جبيرة شويه من شافتنه انصدمت وخلت ايدها على صدرها من الصدمة والظاهر عرفت ابوي وظلت متسمرة بمكانها .

ابوي سلم عليها : السلام عليكم حجية الله بالخير عليج سمعنه بمرة اخوي المرحوم يمج ممكن تصيحين الها ؟

هيه ارتبكت وتباوع لسالم .. جاوبته بلعثمة
هاا مو سالم كال لاتكولين على مكانها ..

سالم جاوبها لاعمة كولي غيرت رأيّ كولي لا تخلينه ننعلس .

هي جاوبت بسرعة : والله مموجودة راحت ويه بناتي لطاك كسرى خطية ضايجة ودمعتها بعينها كلت للبنات ياخذنها يونسنها وهو هم مو بعيد هياته قريب هنانه .

تمتم ابوي بعد ماجر نفسه بغضب ..
نروح لطاك كسرى ليش لا تطيرين فرح هم اطير وراج والوحج .

وصلنا لطاك كسرى ونزلنه يمه ، نزل ابوي وظل يباوع للمكان الواسع وبعدها رمقني بنظرة
يله ملازم مهيب شوف شغلك روح جيب فرح وتعال ..

هزيت راسي بايجاب وسالم يريد يطلع من السيارة
ابوي لزمه من كتفه بقسوة ورجعه لداخل السيارة
وبأمر تكلم وياه : انته ابقى هنا الى ان يجي مهيب وشرط فرح وياه .

فرح ...

وصلنا لبغداد واني احس جسمي صار ثلج وطفت النار الشاعلة بقلبي بس دايخة ووجع براسي يمووتني ..

وبعدني اتذكر خصلات شعري الي وكعت مني بسبب سحر وامها الحقيرة ..

رحنه لبيت اهلي اخذت دانيال وبعدها رجعت للسيارة حتى اروح لسلمان باك لبيت عمتي جليلة ..

بالسيارة خليت دانيال بحضني .. وابوسه مشتاقتله
من الصبح ماشفته وهسه حيصير الليل ، رحنه واجينه حتى مازرنه ابد..

واخذت ابني من الباب خاف يلحكني علي الدر ، وحلفت سالم واحمد وكل الي بالبيت ميحجون اني وين ..

بس بابا خطية منكوله ع اي شي يصير لان صحته تعبانه واصلا مادخلت يمه حتى لايشوف وجهي واثار الضرب ويسال وينقهر ..

اصلا حتى ظهور زوجة حمدان هم ماكتله عليها ماريده يواجه الالم والقهر ويايه وهو مريض ..

بالسيارة ظليت احجي ويه دانيال حبيبي خو ماتضوج من تصرف امك ؟ اني ماسويت شي بس ردت اعاتب ابوك وردت انطي لعمك درس بأن اني مووسهلة بحيث حتى اخوه طلعته من كبره حاجيته ورجعت دفنته .

وصلنا بالليل لبيت عمتي .. استقبلتنا هي وبناتها ومشتاقتلهم كلش هم اجوي بالفاتحة وخابروني بعدها .

دخلت للبيت وهم محضرين العشه ، رحت غسلت ودانيال كلب الدنيه بالبجي لايريد خاله ولايريد البنات يستغرب ..

سالم واحمد تعشوا وديؤوحون رحت داودع احمد
حمودي حبيبي عفية لتضوج مني عمود الصبح صيحت عليك بس ونبي جان عقلي مو براسي يعني اكعد من الصبح انكتل .

اخذني بحضنه ومال اششش ادري ادري اني متعود على خبالاتجن الله يعيني عليجن انتن الثلاثة .. هه موج تنك وتلح وانين فاااهية وانت مخبلة ههههه .. بس شعندي غيرجن انتن .

جريت كم شعره من لحيته وكتله فديتك .. وطول مااني حاضنته دانيال يدفع بي مايريده ..

هو باسه وكاله هاا كلب لك خالك اني لو انته هم مثل امك مخبل ..

هو برطم وحضني .. ضحك احمد وباوعلي بقلق
والله فرح خايف عليج حييل ومن هالسوايه الي سويتيها هذا الشيخ اذا لكاج شحيسوي بيج .

لا تخاف عليه ميسوي شي ...
جاوب بقلق ان شاءالله .. باس راسي وطلع ..

بقيت الليل يم بيت عمتي سهرانه وبس افكر .. بردة فعل علي اذا شاف القبر منقول لغير مكان ..

نمت ويوم ثاني الصبح كعدت الساعة ب ١١ دخلت للمطبخ جانت منال كاعدة بالكاع ومكابلة صينية بيها ماعون وبي تشريب وثاردة خبز كومة بي وعليه لحم وبتيتة وبصل ونومي بصرة وتاكل دووسة ونص .

تفاجئت بقيت صافنة عليها ، هي وبحلكها اللكمة
كالت تفضلي اكلي وياي فرووحة خوش تشريب يفوتج .

لا عمري الف عافية بس ترة هسه وكت ريوك شبسرعة دتتغدين ..

يمعودة ميتة جوع ميتة وصارلي اسبوع على الرجيم مليت طكت رووحي صح خسرت تلث كيلوات بس خيه الروح هم تشتهي ..

ههههه وهسه كلهن رجعتيهم التلث كيلوات كون تشوفج موج اله تلعب بيج لعب ..

ضحكت والله خية اتواصل وياها وكومة تنطي نصائح البنية ممقصرة بس اني احب الاكل ..

لعد لتظلين تسوين رجيم وتكسرينه تضعفين وتسمنين جسمج يخطط ويخرب لو تستمرين لو تعوفي .

خلت اللكمة بحلكها كالت اي خوش نصيحة .. اني غسلت ممة دانيال وسلكت بيض وهي كملت الماعون كله اكلته وكامت ..

سمعتها تحجي بالفون واني اخذت البيض ورحت للصالة يم عمتي اوكل دانيال واسولف ويه عمتي وبناتها ..

خلصت الريوك ورحت غسلت المواعين وطبيت بغرفة البنات فتحت تليفوني شفت كومة مكالمات من رقم علي الدر وموج وحتى ريلام .

رجعت قفلته وصفيته على الميز ، بدلت دانيال وخليته بحضني العبه ..

دخلت منال لازمة بطنها جنهه حامل تكول اخخ بطني يمه اخخخ ..

على كيفج يمعودة كافي اكل هيج حتنفجرين والله ..

كوة تحجي جاوبتني ولج انتي مو هاي خابرني ميسر ..

كتلها مكسر منو هذا بعد ؟

ولج مو مكسر ميسر خطيبي شبييج ..

ها انت مخطوبة نسييت اي شبيه ..

كال حبببي تريكتي لو بعدج ؟

اني عود كيوت وكذا جاوبته لا حبيبي بعدني .. ولا كتله هسة اكلت كرصة ونص خبز ثريد .

انوب هو كال لا حبيبي لا لساج بلا ريووك هسه تفتحين كاميرا وتتريكين كدامي ..

عزاا بعينج وانتي شسويتي ؟

ظل يلح وماكدر على زعله و فتحت كاميرا واكلت جبن وبيض وخبزة كاملة .كلما اكوله كافي ميقبل اصر اله اخلص الكرصة كاملة ...

طكيتها ضحكة بصوت عالي والي يسمعني يكول هاي ماعدهه هموم ..

كتلها الف عافية خلي يفيدج التفيك عوود ....
راحت تمددت وايدها على بطنها صايرة كرش شكده

بعد الغدة عمه كالت للبنات فرح ضايجة خطية اخذوها لطاك كسرى تتونس تشوف العالم ..

واني كيفت من صدك صار هواي مرايحة لطاك كسرى جنت من اجيهم اروح وياهم وحيل نتونس ..

رحنه وافترينه ودانيال حبيبي مكيف يشوف المكان كبير وواسع يظل يركض كدامي ..

رحنه للمراجيح تمرجحنا ومنال وكعت من المرجوحة واحنه خربنا ضحك عليها وهي عصبت علينا ..

دانمشي ودانيال يمشي كدامنا ، واشوف واحد يشبه مهيب انصعقت ووكفت بمكاني ، اجه بسرعة واخذ دانيال من الكااااع .. ....

*********

على ارض مقبرة النجف الوقت قريب المغرب ..

قابلت نظراته المخيفة بتحدي ظاهر رافضة الشعور بآي ذنب او خطيئة ..

يباوعلها على انها لبوة تمتلك روح عنيدة وقوية ومتمردة .. بحاجة لرجل قوي من نوع خاص رجل مثل الاسد .

تعذبه ويزيد عشقها ، تحرقه يصير ... مهووس بيها .. يحكم قبضته عليها ، يزيد تمردها .

جان يتجنب النظر لعيونها الواسعة مثل الليل مغرية للسهر . حتى لايتراجع عن انتقامه .

سحبها من ايدها بقوووة وقسوة وشراسه ، كادت اصابع اديها الترفة والناعمة تتكسر تحت ضغط اصابعه .

طول مسافة مشتها برفقته على ارض المقبرة الرملية
وكفها مرغمة ومجبورة بقرب احد سراديب الموتى .

حدقت بي يائسة من اختراق ملامح وجهه الجامدة وعيونه الملتهبة ..

بقت تباوع لعيونه وكانو تريد تخترقها حتى توصل لعقله ولافكاره .

بصوت مرعب : تتمردين عليه فرح ؟ تكسرين حجايتي وتتعدين على مسؤؤلياتي ؟

تقرب منها رفع ايده وفتح باب السرداب الي وراها ، التفتت بخوووف وتباوع على السرداب .. الي مدفونين بي موتى اكيد . ورجعت التفتت عليه بخووف وتريد تتأكد انو مراح يحبسها هنا مثل كل مرة لاا الا هذا المكان المرعب .

لكن نظراتها المليانه بخوف والي زادتها سحر انثوي ماجانت تشفعلها هالمرة ، الاسد اليوم بقمة غضبه
ولبوته المتمردة جابت اخرتها بأيدها .

دفعها بيده القوووية لداخل السرداب وهو يكول بصوت قاسي وعنيف ..

انت مايفيد وياج غير الحبس والليلة راح تبقين هنا حتى تعرفين ويامن اندكيتي ..

دفعها بالسرداب وسرك الباب من بره ..... !

يتبع ..

الفديو من ابداع smsma89