رواية هذيانٌ بين جمرٍ وجليد ..(ارملة اخي المجنونة) الفصل الخامس وستون 65 - بقلم نورا ناصر

السلام عليكم
هذيان بين جمر وجليد
الفصل ستون
نورا ناصر

كنت أعرف منذ البداية أنني وجدتك لأضيعك، وأحببتُك لأفقدك ، فقد التقينا مصادفة وكنا سهمين متعاكسي الاتجاه وكان لا مفر من الوداع كما اللقاء لكنني احببتك

فرح : بس متاخذ مني دانيال اخذه ويايه ..

رد بجدية : وليدج اخذي خو ما احرمج منه ... تردين بعد شي انه حاضر

بحزن : ماريد شي سلامتك ..

تحسر وهز راسه واني تذكرت تليفوني عنده ... بي ذكرياتي وصوري ..

كتله ... تليفوني اخذته مني انته اذا بعده عندك رجعليا اريده..

_ هم يرجع الج وكل شيء يخصج تاخذيه وكل حقوقج همين

بحزن .. ما اريد منك شيء بس موبايلي ...

ببرود رد .وميباوعلي .... ان شاءالله .. صار

رده عصبني .. ضحكت باستهزاء ودرت وجهي ..
يا يابه شون سهلة عندك هسه خلصت حاجتك مني موو ؟

ودرت وجهي عليه خليت عيني بعينه ورجفة بكل جسمي ..

باوعلي مصدوم تحولت نظرات الجليد الي جانت بعيونه لنظرات من جمر وغضب ..

كملت بنبرة بكاء : بنتك ماتت و تشووه وجهي وحصلت على عقابك مني لمن احتركت وهسه حتتركني لحال سبيلي واني مدمرة موو ؟

كام على حيله معصب .. ولج انتِ شنوو شنوو ؟؟ ماتعرفين تحجيلج حجايتين بيهن خير ؟ والله احتاريت وياج حيرة مايعلمها بس ربج

تحيرين الي مايتحيير انتِ .. عمري ماشفت مثلج ، هسه موو هاي اختج حسها ماينسمع بالبيت انت شبيج ماتكليلي ؟

انتن موو ربيتن نفس البيت جااا شبييج انتي شبييج لو هذا هم حظي

جاوبته بعصبية وانفاس لاهثة : لا تقارني باحد علي اني لا اشبه اختي ولا اشبه مرتك
المرحوومة ترى اني اختلف ..

_ اي والله تختلفين انتٍ مصيبة مصيبة وطاحت على راسي ، قنبلة وتفجرت بووجهي .....

خلصتي كلبي والله بسوالفج وطكت مرارتي من وراج ولج انت بهذا حالج وماتكعدين ولا تضبين لسانج جااا شسويلج بعد ..

تنهد بتعب ولزم جبينه ... واني اباوع له بخوف من ثورة غضبه المفاجأة ...

ورى ماخلصت تنهيدته .. فتح عيوونه وباوعلي
.. ووجهلي كلامه وهو يحاول يسيطر على اعصابه
_ والي تردينه هسه شنوو ؟ تردين تجين وياي ؟ اخليج على راسي واعوضج عن الفات وعد اكابلج واكعد حتى شغلي اعوفه

ترحين ويه اخوج روحي براحتج وهم ماراح اتخلى عنج .. وابقى ساندج

_ اروح ويه اخوويه .. حجيت بلعثمة وعيوني انترست دمووع ..

نفض عباته من طرفها بعصبية وطلع من الغرفة
وهو يستغفر..

"كنت أوصيه دائما؛ إذا ارتخت يدي؛ لاتفلتها؛ إنهُ ارتخاء تعب؛ لا استغناء.!"

وراه طبت موج تباوعلي وتهز براسها بعدم رضى ..
باوعت عليها ودرت وجهي ..

كتلها شبيج شبيج بعد انتي شنو هالنظرة ..
ردت .. تعاركتوا ؟

رجف لساني واني دجاوبها .
كتلها : مكتله شي هو عصب ..

ياعمري يافرح انتي هسه مريضة مو زين عليج التوتر والعصبية على كيفج الرجال ممقصر وياج مكابل المستشفى وكاعد وهمين هو مريض ترى كل شوي ضغطه يرتفع ، شوفي رغم مر على الحادث شكد بس هو بعده تعبان وميقبل حتى يتعالج وشكد يلحون عليه ولده هو ميقبل ديعاقب نفسه وهو ماله ذنب بلي صار ..

اي اي موج هو ماله ذنب الذنب ذنبي اني اني الي افتعلت الحريق ..

لا لا هو منو كال هيج ياعمري قدر وصار والحمدلله

قدر وصار ، شوه وجهي وجسمي وحرك شعري وموت بنتي موو ...

وهسه لمن تشوهت هو بعد ميريدني !

شهالحجي هذا فرح منو كال ميريدج! لج متخبل عليج واحد غيره مايخاف الله جان حملج مسؤؤلية

واحد ثاني بمركزه جان تركج وراح على اشغاله ورجع لبيته ونام رغد لان انت كتيله مارجع وياك وطلكني ..

_ اي طبعا حماج وتدافعين عنه ست موج وهسه هو قبل شويه هم يمدح بيج يكول اختج ماينسمع صوتهة بس اني المكروهة والهبلة وام صوت العالي

ضحكت : ههههه ولج والله مو عن ادافع اله بس اريدج تهدأين مو كل ما تشوفينه تنفجرين ولج رغم كلامج الجارح بحقه هو مدايكدر يعوفج لحظة وكل شوي يطل عليج ويريد يبقى يمج

ولج انتي مريضة والكلية مالتج تعبانة وميصير هلكد تتوترين كافي فدوة كااافي ..

بنحيب .. اني تعبانة موج وهو سبب تعبني شمرني بعيد عنكم واني محتاجة الكم مريضة وحامل وتعبانة واخر يوم قبل لااحترك تركني بحالة يرثى لها ومارف له جفن

اجت يمي باستني على راسي .. وتهدأ بيه وتكولي كلام يطمئني ..

باليوم الي طلعوني من المستشفى شفته جان يدخن!!! اول مرة اشوفه يدخن ..

انقهرت حيل .. عليه مدري على حالي ..

شسويت بيك علي مدري انته شسويت بيه ، منو بينا المظلوم ومنو بينا الظالم .. والضحية ...

بعدها كالوا يودونه ببيت المزرعة ارتاح كم يوم يله نسافر لكركوك بس اني رفضت رفض قاطع لو اموت بعد ما افوت لذاك البيت المشؤؤم .. الي شفت بي موتي وموت اطفالي ..

اجه تقرب مني ، يباوعلي بقهر وحسرة ، شمر الجكارة بالكاع وعيونه بعيوني

نزلت دموعي على خدي وشهكت .. علي وين دفنت بنتي حتى اروح ازورها ، ماشفتها علي ماشفتها .

تنهد يياوعلي وبنظراته انكسار ، اني لسه الشاش على وجهي بس عيوني طالعة وواكفة بصف السيارة وموج لازمتني واحمد يمي ..

كال دفنتها بمقبرة اطفال ببغداد ، ارتاحي وانه اخذج الهه تزوريها ..

رديت عليه لالا اني احمد يوديني موو هيج احمد .. والتفتت لاحمد ..
هو ظل يباوعلي وبنبرة اطمئنان اكدلي على كلامي ..

ورجعت باوعت لعلي كتله هم بعدك متخلي يفوت بغداد بعد كل الي صار ...

كال لا بويه خلي يفوت محد اله شغلة ويا بعد الفات مات ..

هزيت راسي وفتت على السيارة ... ودوني لفندق ولهناك جابولي دانيال حضنته صار ايام مشايفته .

بجيت بجي مصاير .. موووتتت روحي من البجي واني اشوفه شلون ذبلان يربي شون حظ عليه اجيت افقده . المرض متعبه وبس يكح

وانوب الم العملية من صفحة وحروق جسمي وبنتي الي فقدتها وياريت على هذا الالم والعذاب هيه عايشة جان بس شوفة وجهه ينسيني المي

سألتهم على حالته وشنو كال اله الطبيب !!
كالت احتمال يصير بي التهاب رؤي محتاج عناية ومراجعة طبيب على طول . وبس تسيء حالته كبل للطبيب او المستشفى وجهاز تنفس يحتاج اله بالبيت .

كتلهم عفية اني ماريد شي من علي فلس واحد ماريد منه ...

احمد كعد يمي ، جر راسي باسه واخذ ايد دانيال بوسهه وكال اني المن موجود لعد!

لتخافين مراح اخليج محتاجة شي ..

أنين ..

جنت بالمستشفى ويه دانيال ، كاعدة على سرير المشفى ومخليته بحظني وجهاز التنفس على وجهه..

موج ويه فرح بمستشفى الولادة واني كاعدة ولافة راسي بشال اسود ومخليته على راسي ..

دخل بطوله الفارع لابس قميص اسود وبنطلون اسود وسترة بيج ..

بس دخل اخذ ابن اخوه من حظنه وظل يبوس بي بوجهه وبأديه وسط ذهول كل حواسي ، واني صافنة عليه ونسيت حتى روحي ..

وبعدها انتبه عليه ظل يباوعلي ، صفن ثواني بوجهي وبعدها تصنع الصدمة وكال هاي انتِ هنا متغيرة ماعرفتج

هزيت راسي ودنكت .. كل مرة يشوفني يتصنع الصدمة لو يسوي نفسه مايعرفني .. سكتت وماحجيت ..

بعدها هو دار وراه يشوف منو اكو . .. مشاف احد ..
ابتسم بوجهي وكال لتباوعين هيج ..

استحيت ودنكت .. فعلا اني نظراتي فاضحتني ..
... وبعدين كال ليش ماخابرتي اني ردت احجي وياج بموضوع ماردت اطوخ وياج او اذيج ..

التزمت الصمت اني لان وعدت اخواتي وبعد الي صار بفرح صرت فعلا خايفة من هاي العائلة . ..

واجاني كلامه الي صعقني : اني يا انين ما اكدر اعلقج بأمل مفقوود اني انسان احتمال اليوم موجود باجر ماكوو انتي تستاهلين الاحسن مني انتي طفله هشه واخاف اذا تقربتي مني تنكسرين

بلعت ريك وباوعتله بقهر .. بعدها جمعت شجاعتي ورديت ... لا انته غلطان اني مافكر هيج بس اني هيج اباوع للكل مو بس الك ..

ضحك وكال وهو مبتسم فدوة ... جان واضح انو يتسلى بأعصابي المضطربة ..

موج ..

طلعت فرح لكركوك ويه احمد وانو واحنه رجعنا لبغداد .. دخلنا للبيت جانت الحجية بالصالة سلمنه عليها بوست راسها وره ماشرار بوسها داروح للغرفة لزمني كعدني يمه ..

كللها شرار ها يمه اشو شاعلة الصوبة ..
ردت عليه اي والله يمه باردة عبالنا خلص الشتى اشو رجع علينه البرد ..

ورى شويه فات الشيخ ووياه مهيب وجان الشيخ تعبان وضايج ..

امه بس شافته ظلت تبجي وتنعي يايمه يا علي الدر ماعندك حظ هاي ثاني بنية تروح منك يايمة ..

هو قرب منها بوس امه وكاللها قضاء وقدر والحمدلله رب العالمين مابيدنا شي العوض على الله ..

هيه مسحت دموعها و كلتله تعال يمه اكعد يم النار .. تدنى وتدفى ..

هو تحسر وكاللها النار البيه مكفية وموفية مايحتاج يمه ..

هيه ظلت تتلفت جاا وين فريحة ؟ ماجت وياكم ؟

جاوبها وهو يرجع ظهره على القنفة .. راحت ويه اخوها يمه البنية تعبانة محتاجة راحة

ردت عليه وهيه تضرب عوجيتها على الكاع ..
جاا فووگ حگه دگه .. جا مو هي الحركت البيت وموتت البت ابطنها .. وجان يروح الفرخ ابن حمدان همينه لو ما الله فكاه

رد عليها : حجية ماله لزوم هالكلام هسه الي صار صار وفرح مالها ايد بالحريكه واالقصور مو بس منها منه احنه همين لان تركناهه وحدها

ردت عليه : اي يمه من ايدها لسانها طويل وماتتقارش ماخذه الوادم بالصيحة والهوسة

جاوبها يمه الله يخليج هالكلام لايقدم ولا يأخر رحمة لموتاج انه الي بيه مكفي وزايد وماريد حجاية بهالبيت تنحجي على فرح بالموزين
كال كلامه الاخير بعصبية وتوجه لغرفته ..

هو مبين جان ميتحمل شي ومعصب .. وخاصة فرح محملته كل الصار ..

شرار بقى يحجي ويه امه واني صعدت لغرفتي ..

وراها بكم يوم اخذني شرار ورحنا لكركوك شفت فرح واخذت وياي فلوس الورث الي انطاهم الي احمد

فرح محتاجة علاجات ومراجعة طبيب الها ولابنها واحمد هم على كد حاله وعزة نفسه منعته ياخذ من الشيخ رغم هو انطاه بس رفض ياخذهم واصر

وصلنا الهم .. جانت فرح شايلين عن وجهه الشاش واثار الحروق جانت على حنجهه وجوانب وجهه بلون وردي فاتح ..

دانيال حبيبي صاير احسن بس هواي يكح وتنفسه مو طبيعي ..

تغدينه ورى الغده .. انفردت باحمد وانطيته الفلوس هو مقبل ياخذهم ..

كتله ادري بفرح محتاجة هواي مصاريف هالفترة وهيه مو بس اختك هماتين اختي وصدكني هالفلوس فلوسي مو من شرار والله حصتي من بيتنا شنو نسيتها

خله اديه بجيبه .. وكال : ميخالف ممحتاج والله شبيج موج ليش تحسسيني بأن أني عاجز شجاج صدك جذب!

رديت لاء مو عاجز مكلت هيج بس احنه من دم واحد ولازم نتساعد ليش يبقن الفلوس واني ممحتاجتهن وشرار ميقبل اصرف منهن ..

رد .. ميخالف هيه حتى فلوسها رجعتهم الها مقبلت اصرف منهن وهيه حتى مقبلت تروج جلسات تعالج اثار الحروق الخبلة تكول خليني هيج حتى علي يصرف النظر عني يشمئز مني وبعد ميريدني

ضحكت على عقلها يربي مدري شون تفكر ..

وكال اي تريد تفتح مشروع تسوي كيك وتبيع وهيه اديهه خطية بعدها مطايبات كلش وانين تساعدها بكل شي ..

جاوبت .. اي ميخالف بس خلي تطيب ويمر كم شهر ..هيه والله ذكية تتذكر شكد طلعت معدل بالسادس علمي اعلى من معدلاتنا كلها الي طلعناهه

بس هيه بهالزواجتين تأذت وطاح حظها ..

رد احمد واذا رادت تتزوج مرة ثالثة اني الي راح اطيح حظها واتبرى منها هم ..

ابشرك يا احمد هيه بعد الصار مستحيل تفكر تتزوج ..

اي هو هم هيج ولج اكلت راسي والله موج خابر علي خلي يطلكني وخابره هاي باليوم عشر اسمعها منها ..

اي وخابرته شنو كلك ؟

كال كللها اي خوش ...

يعني مايطلك ؟

ما اعتقد والله موج ...

وشنو كلت لفرح ؟

كتلها يكول عندي شغل راح اسافر فترة ومن ارجع تدلل ..

كمل كلامه .. اني كتلها هيج لو هيه تخبلت خبال ..

تكول اي اني هنا مطبوخة طبخ وهو مرتاح ويسافر ولا هامه شي

كتلها اخذج اني اسفرج نروح لتركيا لاربيل لأي مكان يعجبج مقبلت تكول اروح بهذا شكلي ..

بقهر حجيت ..... اوووف سوودة عليه وين جانت مضمومة الها هاي ..

هز راسه وكال الحمدلله على كل حال شسووي بعد الله كريم ان شاءالله تتعالج وترجع احلى من كبل اني مراح اخليها هيج مستحيل حتى لو اذب دم گلبي عليها وارجعلها ثقتها بنفسها

فدوة الگلبك .. والله ماكو مثلك انته الله ينطيك على گد نيتك .. حجيت هيج وخليت راسي على كتفه وهو باس راسي ..

بالليل بقيت يم فرح وانين بالغرفة ، فرح مخلية راسها بحظني والعب بشعرها واحس بنظراتها سؤال عرفت تريد تسألني عنه

واحنه بالغرفة اجاني صوت شرار من الصالة يصيحني ..
مووج موووج تعالي ..

رحت يمه جان متمدد على الفراش بالصالة ..
كال تعالي نوميني يله ..

شنومك صغيرون انته اني الليلة انساني اخويه هو معزبك اني انام يم اخواتي واخويه ينام يمك

سحبني عليه ومددني كال واخوج بيش الكيلو شيسويلي اخوج ابوسه اشبكه ولج اني بليلج ما ادفى ولا اغفى

كتله اووي شرار وبعدين عيب هسه يطلع احمد من الحمام ويشوفنه

رد بايگلي بوگه قابل مرتي على سنة الله ورسوله يريد يعترض احمد افندي

هسه هو حجه فك حلكه اني بس هالليلة اريد اشبع من خواتي يله حبيبي تصبح على خير

بسته بخدة واتلفت وهو سحبني حيل اله وبووسني بشفتي بووسة مال انتقام وحقد

بهذلت تاريخي الماضي والمضارع ...

يوم ثاني كعدت على وكت هو شرار نايم واحمد بالمطبخ خطية ديسوي ريوك يريد يروح لشغله
صبحت عليه واني كملت الريوك وهو راح يسبح ويبدل

رحت يم شرار كعدته كال والله متتت برد البارحة وانتي مو يمي ..

واني صار هواي متعود ع دفو صدك السمرة جمرة ...

ضحكت كتله كووم ابو الجمر نتريك مو كلت اليوم نطلع لبغداد ..

كال اي والله دقيقة ماابقى هنانه ..

تخصرت ايبااه وشون حتروح روسيا وتخليني ؟

لو اكو من يسد مكاني ...!

تحسر وكام نكت الفراش وراح غسل ..

تريكنا ولبسنا ، رحت وصيت فرح على نفسها
لزمتها من وجهه حبيبي ان شاءالله تطيبين وتصيرين زينة لتضوجين انتي تبقين احلى وحدة بالدنيا بروحج وطيبة قلبج لتضوجين ابد بس التزمي بالعلاج فدوة ولا تعبين احمد خطية ..

هزت راسها كوولي ككوولي لعلي خلي يطلكني عفية كلما اباوع لوجهي دا اكرها .. اني ماريده بعد ما اريد ابقى على ذمته ..

تنفست ... ان شاءالله حبيبي تدللين ...

طلعنا للصالة شرار باوع لفرح كاللها ها فرح ماتغيرين رأيج وترجعين ويانا ؟

كلتله ليش حتى تحرگوني مرة ثانية ؟

رفع حواجبه باستغراب كال انوب صرنا احنا الي حركناج ؟

طخيته بايده لان ادري راح يستفزها ..

هيه سكتت ودارت وجهه وهو رفع دانيال من الكاع وظل يبوس بي وكاله وانته يا بطل متروح ويانه ؟

رد دانيال اريد فتومة ...

بوسه شرار بخده .. تدلل نجيبلك فطومة ادزها بيد بابا علي شتكول ؟

رد .. اريد بابا اريد بابا ..
حضنه قوي وبوسه ان شاءالله حبيبي باجر يجي يشوفك ..

فرح كالت لشرار صدك باجر يجي شيسوي عود ؟

رد عليها شرار هو طفل وداقشمره انتي صدكتي شبيج لو انت هم طفلة ..

هيه حست بالفشلة لزمت بطنها كالت يله عيني موج اني تعبت من الوكفة اروح انام شويه

بوستهه وحضنتها .. وشرار خله فلوس بيد دانيال ..
ونزله على الكاع

واخذني من كتفي سحبني عليه وكال يله امشي خلي نحركج احنه نحرك بشر ..

طخيته ببطنه .. كتله اسكت لاتسمعك مناقصة هيه .. ودعت اخواتي وطلعنا لبغداد ..

ريلام ..

دخلت هيام للغرفة تغني وتركص وتدبج .. خير ياستاررر مدري شبيها ..

فتحت تليفونها على أغنية وظلت تركص واني اباوع الها وهيه تكول واخيرا جبته للدرب جبته جريته من شواربه والله

كمت من مكاني مصدومة .. انتي تقصدين منو ولج ..

طلت بووجهي وكالت محمد حمادة راح يجي يخطبني الجمعة ...

خليت اديه على قلبي . أهدأ من روعه . كل ظني مهيب ..

كتلها لعد المسرحية الي سويتيها وتهمتي مهيب تهمة طايح حظها هاي شكوو ها ؟ ولو ما خالو التهى ويه فرح جان طيح حظج

تخصرت وتهز روحها ... شبيج عمري تغارين لان حبيبي الي احبه راح يخطبني وانتي الي تحبي يصير محرمج ؟ وتحلمين تصيرين اله تحلمين؟

انصدمت صدمة شكبرها هاي شبيج وبعدين انتي منين تعرفين الحب والله الي مثلج ميعرفون الحب ابد

كالت اني احبه محمد ولو ما احبه مااصر الا اتزوجه ..
واخاف لتاخذه وحدة مني وحدة جربوعة حقيرة غوارة نفسج مثل ما انتي اخذتي مهيب مني

فريت ايدي وراسي وتركتها تحجي وتكرك
اخر شي كالت والله بعمري مشفت مثلج اخت تضوج لان شفت اختهه فرحانة

خليت ايدي على نفسي اشر على روحي ، معقولة اني هيج ؟

رحت لزمتها بوستها الف مبروك بس اني والله مو هيج بس يا اختي الي تسوينه الله مايرضاه ابد السحر حرام ويجي يوم ينقلب عليج ويدمر حياتج ويكرهج محمد ويأذيج وتتأذين هواي انتي يله عمرج ١٩ سنة لا حكة ع الخطوبة والزواج ...وبعدج صغيرة وتمشين بهيج دروب

دفعتني وخررري وخررري حتى تبريكتج هاي ماريدها منج ولي عني . اني اخذت الدرس كافي حبيت مهيب واخذتي مني وتدرين احبه مراح اخلي وحدة ثانية تاخذ محمد مني ..

الله يهديج ياا اختي والله يكتبلج الي بي صالح الج شريد منج اني والله اتمنالج كل خير ..

جذب لا تجذبين وكومي من يمي لا اهفج بطراك يعدل خشمج ..

اي هو هم هيج اني عايفتلج الغرفة ورايحة احسن كل كلمة مني ماتعجبج واني اريد مصلحتج عود عابت ....

لهيب...

دخلت للشقه شمرت سويج السياره على الطاوله بقهر وانزعاج فتحت الضوه جانت الشقه ضلمه...

كعدت على القنفه بتعب احس البيت موحش كئيب ومظلم ما بي روح لا من هداوه ولا من ديمه المصركعات...

صح مصركعات بس مسويات جوو كلش حلو...

دخلت للغرفه شفتها هادئه وبارده تنهدت شمرت نفسي على فراشها وحضنت مخدتها استنشقت عطرها وعبيرها...

هدى شكد مرت عليه نسوان وبنات بحكم سفري بس بحياتي ما حسيت بإحساس مثل ما حسيته ويه هدى ورغم عجرفتي وتكبري عليها...

بس ما اعرف احس ما ارهم بلاها ولا اكدر اعيش بدونها احس حياتي استقرت وكملت بيهن فعلا هن عائلتي واني مسؤؤل عليهن...

اني شفت كسرتها مات ابوها وضلت يتيمه وهي اصلا يتيمه من زمان...عاشت عمرها من دون ام...

قررت ابني وياها حياة جديده واعوضها عن الي صار وننسى الماضي ولو لحد الان اني ببالي تخيلات شغلات ما راضيه تطلع من عقلي...

فتحت موبايلي على صورة ديمه الله شكد حلوه هل طفله برائتها تأسر عذبه الى درجه...

بستها حيييل وضمت الموبايل الصدري ومن بعدها فتحت السجل ودخلت على رقم هدى اتصلت عليها مره مرتين تلاثه مجاوبت..

رجعت عاودت الاتصال وأجاني صوتها الحزين...الووو هااا لهيب

جريت نفس متتغير هل بنيه ابببد صار شكد من مفاركتني وهذا ردها اليه جاوبتها...هلو هداوي شلونج ديمه شلونها ؟

ردت عليه ببرود قاتل...الحمد لله زينين

استغربت من ردة فعلها هي بالعاده لغويه وتحجي هوواي وتسأل وتستفسر هسه اجابتها مختصره ...

بس احتمال تكون لان ابوها مات وهل شي اثر على نفسيتها...

همست بهدوء وتساؤل يثير فضولي...شبيج هدى اشو مو على بعضج صاير شئ انتي مو طبيعيه واني ما اريد اضوجج بس احجي صاير شئ؟

ردت عليه بتنهيده طووويله...ليش تناقض نفسك لهيب قابل ما تعرف البيه والبيه انت السبب بي ؟

رفعت حاجب باستغراب وتساءلت ...شلون اني السبب هدى لا تسكتين احجي السكوت عمره ما جاب حل يجوز تكونين ضالمتني ؟

لحظة صمت منها ومن بعدها اطلقت الكلمات بنحيب جارح...انت يا لهيب انت ما تصير الك جاره دووم انت ما بيوم حسستني اني زوجتك دومك جنت واكف عثره كدام حياتنا لييش لييش

بس اريد اعرف ليش اني شنو البيه ليش هيج تنكرني شسويتلك ابوي هداني الكم واني لا حول ولا قوه هسه ميخالف ابويه غلط انتم ليش هيج تسوون

هيج الواحد من يقدركم ويهديلكم شي تطيحون حظه تحملت استحقارك وعجرفتك وكوولشي،وتالي تتركني وتسافر والله شنو ما عاجبتك

على غلطه طيحت حظي وانت اصلا المذنب وصاحب الذنب .. انت الي اغتصبتني وسكران مو مثل العالم وكلت ميخالف..

وانوب هيج تسوي بيه وتسافر وتترك طفله ببطني واني اصلا ما اعرف وين انطي وجهي

تنهدت من كلامها...كافي هداوي ان شاء الله اجي ونتفاهم على كل شئ ..

جاوبتني باعتزاز...لا ماكو تفاهم لهيب هذا هو مدام انت هيج هذا هو طلكني وتتهنى بكل النسوان اني سمعت كلامك ويه بنت عمي عهود وتطلب رقمها...

انصدمت من كلامها قاطعتها...اوكفي اوكفي يمعوده شنو هالجذب لا طالب رقم ولا شي هو اني مجرد ردت وحده منكم تجي علمود الطبخ رادو تغسلون المخضر ودخلت وهي لاكتني وكلتلها بعد لا حجيت وياها ولا طلبت رقم ...

والله جذب هدى انتي ليش تصدكين ...وداعة ديمة جذب خلي تولي هو انتي شايفه وجها جنها قرد نايلون وبعدين عندي رقم التفاحه شسوي برقم القرده

اول مره ما اقتنعت بس اني فهمتها و وضحت الها واقتنعت بالكوه عاد هديوه قافله كوه تقتنع كلتلها ان شاء الله اجي اخذها باجر من السماوه...

صدك ثاني يوم رحت الها للسماوه لكيتها محضره نفسها من شفتها انعصر صدري عليها بصراحه جانت لابسه اسود وشال اسود و وجهها شاحب ...

سلمت عليها وبستها بخدها شفتها خجلت اوووويلي من تخجل خدود تنكلب تفاح لبناني...

شويه ودخلت جايبه وياها اخوها كالت برجاء...لهيب عفيه ما اكدر اخلي اخويه الوحده هنا اني اريده يعيش ويايه وان شاء الله راتب ابويه موجود وهو يعيشه بس المهم يكون ويايه...

ابتسمت وبسته ...اي اهلا وسهلا بي عين غطا وعين فراش يدلل اخو هدى

هي فرحت حييل وباست اخوها احنه جاي نطلع وما نشوف اله زوجة ابوها هجمت علينه...ما تاخذووونه والله ما تاخذوونه شنو بيت ابوو موجود انتم شنو وتاخذونه

هو رد عليها بخوف...اني اريد اروح ويه هدى

صرخت بوجهه...شنو تروح ويه هديوه لا تروح منو يضل هنا بالبيت منو يشتغل منو يروح يجيب النه صمون شي انت ابو البيت من بعد ابوك اكعد واسكت...

هو ختل وره هدى ما يريد يضل وعيونه دمعن...

جاوبتها بقهر...خاله هسه بس خلي يمنه كم يوم وان شاء الله احنه نحلها هسه خلي الولد عند اخته محد اله غيرها

جاوبتني بعصبية...عيب يكعد عندكم اصلا انتم شنو ويكعد عندكم وبعدين شنو ولد كاعد ويه اخته ورجلها مو عيب تردون تحاببون وتحاضنون هو شيسوي كاعد بنصكم...

جريت نفس من كلامها ...لا عمي ما نتحابب وبعدين احنه ناس شيوخ والناس تحتمي عدنا شكو بيها اذا كعد يمنه ما بيها شي واني اخذه اخذه...

اخذته غصب عنها لان هو الولد يريد يروح ويه اخته وهي اصلا زوجة ابو شعنده عندها وان شاء الله نشوف حل ويه هاي الازمه ونحلها بعد...

ركبنه بالسياره وهدى تتاكد من جنطتها كالت...اي هذا البيان الحمد لله

رفعت ورقه بيدها باستغراب كالت...بس هاااي شنوووو ؟

فرح ...

ماصدك بكلام احمد احسه يجذب عليه لو اكو فد ملعوب بينهم ..

هو علي انطاني التليفون مالتي وعندي بي رقمه ..
خابرته ..

اجاني صوته ملهوف .. هلا بويه ام جاسم شلونج شلون صحتج ؟

رديت عليه اني شلوني بعد عاييشة بس مراح ارتاح اله لمن تطلكني ..

كال بسرعة ؛ ترى طلكتج غيابي ليش احمد مكالج هالحجي ؟؟

يتبع ...