رواية هذيانٌ بين جمرٍ وجليد ..(ارملة اخي المجنونة) الفصل الرابع وستون 64 - بقلم نورا ناصر

السلام عليكم
هذيان بين جمر وجليد
الفصل ٥٩
نورا ناصر

بعد عگبيش ..
بعد ما مرمرت روحي
وبعد ما كثرن جروحي
وبعد ما مات الگرنفل
وبعد ما خضّر العاگول من نوحّي
بعد عگبيش ...... !

فرح ..

ياريت السعاده تتقرب مني ويصير هالشي ممكن وهالشي من نصيبي اي اريد الفرح من نصيبي ..

ياريت الحزن ما عانق جروحي ولا لحظة لمس عيوووني ليش اني من زمااان واني عايشه بهالجو الحزين ..

ليش من اول ايام شبابي اترمل ومن بعدها الكه زوجي خايني ومتزوج عليه...

ليش اتزوج الثاني واني مجروحه ويهيني ويحتقرني ويقودني لجحود الزمن ..

خلصت وياه ايامي بكدر وليل بسهر..وعشت بانين...

مانصفني الزمان ولا رحمني واني عليلة ..

من بعد هذا كله اني احترق لحد هاي الحظه اني مرتعبه وخايفه واني اشوف اللسانات النار وهي تتقرب مني وتريد تاكل جسمي...

خوف على روحي وخوف على ابني وخوف على جنين بداخلي عشت برعب برررررعب مستحيييل انسى ذيج الليلة مستحيل هالشي ميطلع من راسي والمشهد يرعبني...وينعاد كدامي كل شوية

من شفته دخل وهو مهموم واجه بتجاهي ملهوووف عليه ...فرحه فرحة كلبي

من كال هييج احس روحي طلعت من مكانها وشبت النار بيها كارهته كااااارهته هو السبب هووو ما اريده ...

صرخت بي وعطت وانهاريت و رغم كل الي سويته وبين هذياني والجمر الي بداخلي بس هو ما تركني ...

جان فاقد الوسيله جان محتار شلون يحضني شلون يواسيني بدون ما يلمس جروحي...

رجعت راسي على السديه واني ابجي والدمع ينزل على المخده واديه مرفوعه والشاش ملفوف عليها ...

احس شفايفي صارت جمر احس عطشانه ارييد مي اريد ارووي روحي وخفف عن النار الشابه بداخلي...

باوعلي بحيره وضياع ومسح على شعري وتنهد كال...فرح بووويه بس اصبري شويه والله اعالجج والله ما اخليج هييج وهذا الوجع كله يروح بس اصبري واذكري ربج ...

باوعتله بعيون دامعه وتوسل ...فدوووه فدوووه كلهم خلي ينطوني اي شئ وانت عوووفني اطلع ما اريييدك انت السبب

رد عليه بقهر...اي اني السبب اني المذنب ميخالف بويه شتحجين احجي المهم تصيرين زينه

همست بضعف ...اكررررهك حييل انت الي حركتني

بلع ريكه بصعوبه...بويه فرح لا تعذبيني وتعذبين نفسج انتي قطعه من روحي انتي بت روحي ..

درت وجهي منه زعلانه حييل ومهضمومه تعبانه بكد السما جسمي يوجعني وگلبي يتمزق وجع وألم...

وهذا الحرگ ينهش باحشائي احس راح يغمى عليه بسبب الوجع

اجت الممرضه وخلت الي العلاج وهو ضل يحجي وياها احس سكنت شويه

سمعته يحجي وياها ونبرة القلق واضحه على صوته ومن بعدها اختفى صوته وما عرفت شنو الدار بينهم...

حسيت بي رجع عليه وابعد شعري من وجهي وهو يدقق بملامحي ويشبع عيونه بعيوني

شهكت ببكاء و وخوف...ع عل علي

رد عليه بحسره وعيون دامعه...ياروح علي وگلبه

بلعت ريكي برجفه ...ال المم الموت يفتر على راسي

رد عليه بصوت مفجووع وحضن راسي ...لا بووويه لا لدكولين هييج اضييع والله اضييع انه الشفت روحي بييج

رجفت بخووف...لا تخوووفني يعني اني حموووت

رد عليه بقهر...لا بويه شلون تموتين والله اطلعج من حلك السبع وما اخليج تتدهورين اسم الله عليج عمرج طويل يافرحتي..

اردف بقهر...انه ما شكرت ربي على نعمته انه الضيعتج ما اسامح نفسي على تقصيري وياج ان شاء الله تطيبين وكل شي ينحل يافرح المهم تطيبين

همست ببكاء...ما اريد بس تطلكني علي عوووفني

نمت من تحت تاثير العلاج وبعدها ما حسيت على شي رغم كل شويه افز مرعوبه ..

موج ...

صعقني الخبر ورجف كل جسمي ، لطمت خدودي بقوة
عزااا شرار صدك تحجي والله كلبي علمني وجنت خايفة عليها خااايفة شون احتركت شووون عفية شرار عفية وديني الهه وديني ..

ظليت بس ابجي وانحب واسال بشرار وهو مايدري عن شي بس كلوله احتركت وبالمستشفى وداني بالعناية

والشيخ راح من الفجر بس سمع الخبر طلع هو ومهيب ..

زين ليش ماجوا دكوا الباب علينا واخذونا وياهم ..

شرار كال هسه وكتج وكته هالحجي بدلي يله خلي نرووح ..

واني ابدل واللبس وابجي وادردم هو الشيخ كولها منه لو مخليها هنا يمنه .. وداهه لاخر الدنيا وهيه سودة عليه وحدها هناك

غير علمودها يبعدهه عن التوتر ياا عيني قابل يكرهه هو لو هو حركهه قدر وصار

شرار افهمني فرح تحتاح واحد يوجهه دائما هيه تتصرف بدون وعي ، حتى بابا جان مقابل يزوجها بس هيه تخبلت اله تتزوج والله لو ممتزوجة احشن الهه جان هسه احمد وانين يداروهه احسن ولا هالوحدة يم الغربة

سوودة عليه سوودة بوجهه يا يمه اختي شصار بيها وششافت من ليلة سودة اخخخ يمه يا ريتني يمها يمه اكيد خافت اكيد احتركت لو صار بيها شي وهيه حامل عفية شرار بسرعة وديني الهه عفية ..

رد : بس خلصي وكافي كركة هسه اوديج الهه طيارة لو تشتغلين بكد ماتلغين جان هسه احنه بخير بس شيشغله عقلج ديله عاد

باوعتله واني دااسد بشريط حذائي اني غبية شرار ؟

رد : هو انتوا النسوان كلما زاد جمالكم زاد ويا الغباء منكدر ننكر ..

لا والله اني موو غبية اني ميتة خوف على اختي اختي محرووكة اختي ومادري شحالهه هسه بعد روحي فرح بعد رووحي ودانيال وطفلتهه ببطنهه ياربي كون اطير هسه واروح الهه ..

بسرعة بدلت ملابسي وهو اخذ فطومة ونزلها جوة وقبلها خابر على ام حسام حتى تجي يم الحجية وفطومة

نزلنا جوة والحجية جانت تحجي ويه شرار تكوله
شبيهه فريحة حركت نفسهه لوو شنو سوت بس كلولي شسووت هااا ؟؟ ولكم الولد الولد ابنها خوو ما مات ولك يمه شرير احجي ..

راح لزمها من اديها يممه على كيفج ان شاءالله ماكو شي هسه علي الدر ومهيب يمها ، كبل شويه خابرني مهيب كال دانيال بالعناية مستنشق دخان ومأذي وفرح محروك وجهه واديهه وصدرها باللهب مال النار بس ماكو تماس مباشر ويه النار ماعدا اديها ..

ظل تدك على صدرها واني زدت بالبجي ..
وكالت ووفرختهه ببطنهه بت اخوك شحالهه ييمه ؟

فرك جبينه وتنهد : مادري يمممه ماادري هسه رايحين الهه احنه ..

جاا خوش اروحن وياكم انه ..

لا يمه ابقي هنا انتِ وخلي يمج فطومة وخابرت ام حسام على جية مالهه داعي روحتج والطريق طويل شفتي شلون لمن رحتي لفاتحة ابو هدى شصار بيج بس رجعتي تمرضتي ..

هيه كوة اقتنعت بكلامه .. بس تدردم وتحجي وخاف فرح حركت روحها اعرفنها مخبلة ..

اني بقيت مثل بلاع الموس ما اكدر اجاوب بس اجاوب انفجر بوجهه والوضع ممستاهل ..

رد عليها شرار ... يمه هذا الحجي لاتكولينه كدام احد واحنه لحد الان مانعرف شصار بيها فرح وع الاكثر حادث ..

حجيت واني ارجف وامسح بدمووعي .. اي اي حادث لا لا اختي ماتسويها لا فرح بس لسان والله بس لسااان ماتحرك روحهها وجهالها عفية خالة الله يخليج لاتكولين هالحجي حرام والله حرااام ....

اجه شرار سكتني ويهدأ بيه .. كتله شرار اني انتظرك بالسيارة بعد مااتحمل ..

رد رووحي بس توصل ام حسان ننطلق ..
رحت للسيارة واني اشهك وابجي ..

شفت الحارس فتح باب البيت ودخلت سيارة ونزلت منها ام حسام .. وفاتت تركض للبيت حتى ماشافتني .. واني كاعدة بالسيارة

وراها طلع شرار وويا ام حسام وشايلة فطومة خطية منعسة

اجت وكفت يم السيارة .. وتحاجيني بقلق وخوف ..
كالت عذريني يمه ماشفتج بعد روحي الله يشافيها ويكومها بالسلامة ماعليها شر ان شاءالله ..

رديت عليها بنحيب .. ماتقصرين خالة مشكورة ادعيلها فدوة اروحلج اني .. ظلت تدعيلها ..

راح شرار وصعد وساق السيارة .. واني ظليت على هالحال ابجي وادعي .. حسيت انو داامشي على الجمر واني اباوع من الجامة واترجى الطريق يوصلني بسرعة الها واتوسل بالمسافة تختصر نفسها ..

خابرت على احمد بلغته واني مفرفحة ، وانطيته عنوان المستشفى الي بيها اختنا ..

وهو خطية انصدم صدمة عمره وبسرعة طلب العنوان حتى يجي ..

وصلنا للمستشفى ولردهة الحروق ، شفت الشيخ ومهيب واكفين اثنينهم ..

ركضت للشيخ ، جان كوة واكف على حيله ومبين تعبان لأقصى حد

وكفت يمه باوعتله بعيون دامعة وبنبرة مجروحة .... شييخ اختي شش شلونهه ووين وينها !!

رد بعد ما رمقني بنظرة مو ثابتة وهو ياشرلي ع الغرفة الي مقابيله : يمها دكتور ودكتورة جاي يشوفون حالتها ..

جان يحجي بتعب والم وأذية .. عيونه حمرة وحزينة وغاضبة بنفس الوقت .. ايده ترجف ووكفته مو متزنة ..

كله مهيب يابه امشي نقيس الك الضغط شكلك ماراح تكدر توكف على رجليك تعبان انته .. لازم الك علاج ..

جاوبه هو بغضب مكتوم : لا تلح مهيب كتلك ماريد هيج انه مرتاح ..

بعدها بقينا واكفين ننتظر الاطباء يطلعون من يمها .. طلعت الطبيبة والطبيب من يمها .. والطبيبة وكفت والدكتور راح وسألناهم عن وضعها ..

الدكتورة ردت : بشرتها مجانت بتماس مباشر ويه النار بس اللهب والدخان الساخن حركها بس اديها واكتافها لامست النار ونسبة الحرق بيها اقوى ...

والمشكلة حاليا بما انو هيه حامل صار عدهه نزيف وضروري تنقلوها لمستشفى الولادة احتمال الطفل الي ابطنها ميت لان دمها متشبع بغاز ثنائي اوكسيد الكاربون والطفل متضرر

وبعد شغلة ثانية وحدة من كلياتها هم متضررة وواكفة بسبب الغاز الي استنشقته ..

خليت اديه على حلكي اكتم شهكاتي وشرار لزمني من كتفي يهدأ بيه ..

والشيخ ظل يردد لا حول ولا قوة الا بالله ، استغفر الله العظيم واتوب اليه .. وجهه احتقن بالزايد وخله ايده على الحايط يسند جسمه ويتنفس بلهاث وشكله تعب كلش ..

واحنه واكفين سمعت صوت ورايه وعرفته لمنوو .. التافيت شفته احمد ووياه انين ، ركضت عليهم وحضنا بعض تلاثتنا وظلينه نبجي

سالوني عنها هزيت راسي الهم بمعنى موو زينة واحمد عيونه حمرة دم وانين تشهك ..

هز راسه وكال كله مني اني السبب صووجي اني والله صووجي ماطلعت بيكم بسرعة اني ماحافظت عليكم ماحافظت على وصيةةابوي وأمانته ..

وراح صوب االشيخ وكف مقابيله ويباوعلي بقهر وعتب وغضب .. ليش ماحافظت عليها يااشييخ ليش مو هيه امانة عندك لييش خليتهه تحتتررك ليييش

مهيب .. رد عليه احمد ترى هذا قدر وصار شبييك وقابل شبيدنا احنه !!

الشيخ اشر لمهيب حتى يسكت ، وولأول مرة اشوف الشيخ علي الدر عاجز حتى عن الكلام ...

طلبت منهم ادخل اشوفهه بس كالوا منطينها مهدئ ونايمة وممنوع ندخل ، طلبت من شرار ع الاقل اشوف دانيال ..

اخذني ورحنا للعناية المركزة .. شفته حبيبي نايم على السرير مال مستشفى وفاقد ومخلين الاوكسجين على وجهه وبطنه تصعد وتنزل بسرعة

وكفت عاجزة اديه على وجهي ، ظهري منحني وبس ابجي واشهك .. وانين واحمد نفس الشي واحمد ضرب ايده بالحايط بقوووة ..

لزمه شرار بس هو بعده وكال انتوا دمرتوا اخواتي والله بعد ماتطلع فرح منا سلامات مستحيل اخليهن عدكم

شرار عصب .. بس حاول يقدر وضعه الي هو بي
وظل يهدئه .. كول يا الله احمد قدر وصار ترى
قابل متعمدين احنه لوو راضين بلي صار وبعدين محد يعرف شنو صار وشون احتركت بيها الغرفة

رد عليه .. لا انتوا مهملين هامليها والله زوجها مبعدها عن الكل وحابسها بمكان بعيد بس والله مو صوجكم صوج الي يسكت على ظلمكم اختي بعد مالها مكان يمكم .....

بعدها قبلوا افوت عليها وجانوا ديحضروها حتى ينقلوهه بالاسعاف للمستشفى الولادة ..

ركضت ملهوفة عليها واشوف شادين وجهه بالشاش واديها ملفووفة واوكسجين على خشمها

ارتعش قلبي المرعوب عليها بأثر شوفتي الهه وهيه على هذا الحال ...

هيه شافتني وخرت الاوكسجين من على وجهه بيدها السليمة وصاحت بصوت مخنوك كووة يطلع مووج
مووج شفتت الموت بعيووني مووج داني جان ديمووت بين اديه موووج

الكلام الي كالته طعني مثل الوتد بقلبي .. وماكدرت اسيطر على دموعي ولا على شهكاتي .. تقربت منها بستها على راسها واطمن بيها اسم الله عليج من المووت عمري عدت سلامات الحمدلله حبيبتي ارتاحي

ورجعت الاوكسجين خليته على خشمها .. وهيه رجعت وخرته وظلت تكح وتحجي وانفاسها سريعة وتلهث ..

طمنيني على دانيال بس كليلي يعيش!! حبابة ترة ماعيش من دووونه اني والله مااعيش فدووة طمنيني عليه الله يخليج

بجيت اكثر واني احاجيها .. عايش والله عايش لتخافين هسه جنت يمه ..

الله عليج خليهم يودوني اله ..

ميصير عمري ميصير مو زين هسه لازم نحافظ عليج من التلوث

صوري الي لعد اشووفه والله طاك كلبي عليه والله راح اموت من وجع قلبي عليه

مووج لج مات بين اديه والله بقدرة قادر معجزة رجعه للحياة

موج .. اني ماعرف ... اتصرف اني .. اني .. خبلة مثل ميكولون ... اني مو صاحية وماافتهم . ... بس اني نقذت ابني موج والله نقذته بس كون يعيش ماريد شي

خلي اتشوه خلي يوكع وجهي جلدي بس خلي داني يعيش ماريد شي ماااريد ......

عفية فرح اهدي موزين عليج تعبين نفسج اهدي فدوة اروح الج ولتخافين

موج ماريده ماريده علي بعد ماريده لايفوت عليه ولا يرووح وياي ماريد اشوفه هو السبب هوو السبب

استغربت وانصدمت ..مسحت دموعي ليش فرح هو شصار ليش دتكولين هيج هو شعليه الشيخ ؟

رادت تحجي مدري شنو وسكتت وكالت ماريده اريد احمد هابري احمد خل يجيني حبابة

كتلها اطمأني احمد موجود هو وانين اجوي من شويه بس الاطباء ميقبلون يدخل عليج احد يخافون عليج ..

ظلت تردد الحمدلله كوليله ليروح ليرووح فدوة ..

اني حبقى يمج هسه اهدي ونامي وارتاحي ...

ماكدر اهدا وجع وجع بطني صفحتي دموتني احس داانزف موج بنتي يمكن ماتت ..

موج اني مادري مادري نمت والله نمت عيوني طبكن وحدهن ماسيطرت على نفسي لمن نمت

سألتهه شنو صار بعد ؟ اجتج نوبة صرع وبعدها تعبتي هيج ونمتي وما حسيتي ؟ زين شون شعلت النار ؟

داني جان يبجي ع فطومة واحتاريت شون اسكته والله وجنت مطايقة شي النسوان خوفني كالن ميت بالشط

اي والله كالن هيجي بذيج الساعات جنت اشوف الموت يحوم عليه يريد ياخذ عمري و عمر اطفالي

انصرعت وعلي يدري والله يدري وعافني واخذ بنت اخوه وتركني

ماريده موج ماريده اكرهه والله اكرهه اني تزوجته حتى يصير الي سند بس اني دااتأذه بي مدا اتعافى ..

والله موج والله اباوع للشموع اريد اطفيها بس ماكدرت وتركتهم مفتوحة غصب والله جنت تعبانة حيل ..

القهر عليها عصر قلبي عصر .. ظليت اهديها ، اطمئني حبابة ميخالف معذورة قابل متعمدة شبيدج قابل ميخالف الله يعوضج عن هذا اليوم ايام مليانة سعادة وعدت سلامات ان شاءالله ..

بنتي ماتحوس موج ماكالت الطبيبة شي ! اشو متتحرك البارحة جانت تسبح سبح ابطني وتدافر ليكون ماتت ها كليلي ماتت

غمضت عيوني وتنهدت بحسرة .. هيه كالت بتحيب موجع ومؤلم .. ماتت موو ؟ اي ماتت ماكو غيرها اني قتلتها باهمالي

لالا فروحة لتكولين هيج عفية اهمال شنو قابل شنو ذنبج انتي لتلومين روحج والله يعوضج

ما ما ما اريد منه جهال بعد ما اريد موج بس ادعي الله يخليلي داني يعيش واني اعيش عموده وبس ..

بعدها طلعوها من المستشفى واخذوها بالاسعاف لمستشفى الولادة ...

اني وعلي رحنا وياها بالاسعاف ، جان كاعد يم راسها ويهمس بأذنها وهيه دايرة وجهه عنه ماتريد تسمعه بس جانت هادئة بفعل الدواء الي انطوه الها ..

وهناك دخلوهه لصالة العمليات وسط دموعها والمها ونحيبها على بنتها الي ما ابصرت النور بعد وماتت وهيه برحمها

مهيب ، احمد وانين بقوا يم دانيال بالمستشفى ..

واكفين اني وشرار واني بس ابجي وهو يهدي بيه والشيخ مخلي اديه وره ظهره ورايح جاي كدام صالة العمليات ..

اجه شرار همس يم اذني .. ماعرفتي شنو الي صار هناك وشون اشتعلت النار واحتركت !

صكيت اسناني بس احس طحنتهم طحن ..
كتله اخوك عايفها العصر وهيه مصروعة وتاركهه يم ناس جهلة متعرف لحالتهه مخوفيها بالزايد على ابنها

كال اخوك شنوو لا تقللين احترام

رديت .. لعد هو مو اخوك لو شيصير منك ..

شنو هاللهجة الجديدة هاي بعد ؟ قدر وصار والحمدلله الله قدر ولطف والله يعوضها

كتفت اديه كتله لاء مو بس قدر اختي مريضة وتحتاج شخص يعرف لحالتها ، هيه من تجيها نوبة الصرع تتعب

وهيه من غير شي الدواء متعبها ومتعب اعصابها والحمل والنفي وبعدها عنه وكل شي

وهيه نومها ثكيل اخذتها نومة وباقية الشموع معلوكة واحتركت الغرفة

_ موج هذا يسمو اهمال اخوي شدخله ...

_ اخوك شدخله مشافهه حالتها .. هيه تحمله مسؤؤلية ليش مابقى يمها لمن شافهه تعبانة ..

رد .. متعاركين اكيد ..عصب منها وعافها .. والا هو ميتركهه بهيج حالة مستحيل مو الهالدرجة قاسي وبعدين شي ويريد يصير

لا تخلين هالموضوع يأثر علينا .. وبلا هالحجي هذا وانتبهي على نفسج من تحجين وياي

_ مسيتك اني بكلمة ! مدا احجي عنك اني .. !

_ متشوفين روحج شون جاي تنترين نتر ما حب هاللهجة هاي ..

باوعتله ثواني .. وتنهدت ممنتبهة على نفسي انتر بي هو شنو ذنبه واكيد ميقبل على اخوه

ابتعدت عنه ياربي اني مدااسيطر على نفسي اني خايفة ومقهورة على اختي وخايفة ..

ريلام ...

خالو طلب من ماما تسوي فحص وتقرير طبي لهيام ..

بس هيه رفضت وكالتله هو بس تحرش سطحي فرتها فر على مهيب الحقيرة ..

وخالو طردهن وطيح حظهن ..

رحت عليها اني هددتها والله يا هيام اذا ماصرتي ادمية وماتركتي مهيب بحاله واذا ماصرفتي النظر عن هاي التهمة الي شمرتيها براس مهيب

الا اطلع سكرينات محادثتج ويه صديقتج واشوفهم لخوالي وعمامي همينه ..

هيه اخذت موبايلي تريد تكسره ..

اني ببرود حاجيتهه وممهتمة للموبايل بيدها الي تحاول تكسره

كتلها الحساب الي دزيتله السكرينات حافظة الباسورد مالته واكدر افتحه باي جهاز ثاني ..

عاد هيه شمرت التليفون عليه اجه براسي وراحت حجت لماما وماما هم مقصرت طيحت حظي

واذا جانت اكو فجوة بيني وبين مهيب حتصير فجوات اكثر وجبال وحواجز تمنع حبنا من ان يستمر او نرتبط ..

وهالهواجس هاي موتتني لا والله تموتني الف مرة وكل مااخابره ابجي ، احجي ويا شوية واسده واكمل بالرسايل ، لان هو يعرف نبرة صوتي ..

خابرني وكلي فرح احتركت تخبلت على هالخبر المفجع وكعدت ابجي وبيبي تسكت بيه ..
وتدعيلها ..

وماما كالت اي هاي حبوتنه وحوبة هيام لعد شوون الحوبة تسحك وتلحك وتاخذ ثلثين من الحك ..

باوعت لماما بقهر وعتب وعيوني مدمعة ...

وبيبي كالت الها ليش ولج اني ماشايفة وحدة مثلج
مو اخوج هذا سنين انتي تعلفين من خيره مثل الهايشة بس انت شجابج ع الهايشة والله حتى الهايشة احسن منج ماتنكر فضل راعيهه

ماما خلت صينية التمن بالكاع بيها تمن جانت تلكطه
جاوبت بيبي معترضة على كلامها ..
اني شعليه هيه مرته مو صاحية شاخطة ومخبلة واني وامي شكد نصحناه شكد حجينه وياه لتاخذهه تولي ماوراها غير المشاكل

وكل مصيبة تسويها اكبر من الثانية بس هو مايفيد وياه عشكها عشكهاااا المخبلة مدري شسوت اله سحر يمكن وهو سنين بقى ماتزوج من لمن ما ماتت مرته لحد ماتوفى حمدان الله يرحمه

كلت بقلبي اي مو هيه هيام حتى تسوي سحورة ...وباوعت لهيام

هيه باوعتلي جانت تعلج .. صدك لو كالو عين ** ماتنكسر

وكملت ماما اكيد حركت روحها لان عرمة والعرمة يطلع منها كل شي ..

والله يعلم شنو من فاينة مسوية حتى تحرك روحها ...
استغفر الله اعراض عالم واني عندي بنات ماريد احجي وهيه من غير شي الناس راح تحجي ..

فرح ..

بعد ماصحيت من العملية ، شفت نفسي نايمة على سرير المستشفى اتذكر اني وين وشصارلي ، مر وقت يله استوعبت وتذكرت

مديت ايدي لبطني فارغة ، باوعت على يميني ، شفت علي كاعد على كرسي ويباوعلي بقهر وظهور الحزن المرير على نظراته ..

ركزت بي .. وشفته كانيولا بيده ..

كتله دفنتها مووو ؟

تنهد تحسر غمض عيونه ثواني وكام ع حيله وتقرب مني .. باس راسي كال الله يعوضنه ..

اني انهاريييت مااريدك مااريدك اطلع اطلع من حياتي ااااطلع ..

ظل هو وموج يهدوؤن بيه .. بعدها طلب من موج تتركنا وحدنا وهيه دتطلع اصيح عليها ، تباوعلي تبجي ومقهورة ..

وهو اجه يمي .. يهدأ بيه .. فرررح فررح اهدي ولج شسوويتي برووحج شسووويتي ؟ كاافي كااافي كل شي يتعوض اهم شي انتي بخير هسه ...

اطلع واني اصير بخييير اطلع ماريد اشووفك ماريدك ...

تنهد وطلع وظليت ابجي ..

ووراه بثواني دخلت موج بقت يمي سألتها على دانيال كالت زين لتخافين اصريت اله اشوفه ، راسلت احمد صوره ودزلها شفته الحمدلله عايش وجان يبجي والاوكسجين بخشمه رغم متتت قهر عليه بس ارتاحيت هو عايش ...

بقيت بالمستشفى .. علاجات وعناية ..

دخل عليه علي الدر .. درت وجهي منه ..

اجه يمي ظل يحجي وياي واني قافلة منه ...
اخر شي سألني .. شنو صار اريد اسمع منج
حركتي روحج لوو شنوو احجي ؟

انتِ دووم تهددين بالانتحار هسه سويتيها صدك ؟ ليش وولج لييش!

هو جان مدنك عليه ولازمني من زنودي ...حركت نفسي من قبضته ، ممهتمة اذا راح تنلجم الحروق مالتي او اتوجع كل الي يهمني ماريده يلزمني وهماتين هم انطوني مسكنات

هزيت راسي برفض قاطع وعنيف : لاء لاء لاء اني مستحيل انتحر متستاهل انتحر من ورااااك اني ، بس انت السبب ااااي انته اذيتني بعدتني نفيتني والله كله انته بسببببك ..

رد ملهووف : جاا شون احتركتي وشوداج للملحق احجيلي شصار وهسه الشرطة راح تدخل تحقق وياج احجيلي ... منو حركج شون صارت الحريكة شلوون ؟

شهكت بالبجي .. كل الي صار بيه انته سببه واني مراح اسامحك .. سامحتك هواي بس هالمرة الصار تجاوز السماح ...

خليت ايدي على طفلتي ببطني واباوع اله واكوله بقهر ونحيب وألم : بنتي همزين ماتت همزين لان انته ماتستحق تكون أب لطفلتي .. يمكن راح تظلمها نفس ما ظلمتني ..

بقى واكف مكانه ظهرت على عيونه لمحة الندم ، وعيونه مسودة بقلق واهتمام ...ووجهه مكدر

بقى يرمقني بنظرات ثائرة رافضة الى أقصى حد ...

كملت : طلكني علي .. ماعندك عذر بعد ... انت هسه بمرمى اتهاماتي وشكوكي غضبي المي وعذابي كلها سببه انته ابتعد عني ... احسن الك وإلي ..

دنك عليه مخلي وجهه بوجهي : دوم اكول لولدي الدنيا من تدير ظهرها الك تجاهلها ولا تحاول تتملگ الها ...

خليها هيه تنصفك دائما لاتهتم وتجاهل بس انتِ الي اكثر من الدنيا شون اتجاهلج وشلون ما اهتم الج وانه اشوفج دايرة ظهرج الي

كتله ماريدك علي ماررريدك رووح مني روووح ..

فرررح غير افتهم شصار ؟ وشوون احتركتي ؟ وليش محملتني المسؤؤلية قابل انه حركتج ؟ انه بس ردتج ترتاحين ردت راحتج ابعدتج عن مكان توترين بي وتضوجين وتتكدرين

شفتي لمن رحتي بعرس شرار شصار بيج لو ما شفتي ؟ من اول يوم لاخر يوم كله مشاكل وانت الله يسلمج ماتكعدين ولا تضبين لسانج ماخذة الدنيا بصياحج عبالج بهذا الصياح راح تنحل كل المشاكل

ماريد اكون مصدر خيبة الج كل الي سويته علمودج وثقي بالله ماراح اتركج بيوم ، فرح انه ماتركج لا تكولينها هاي ..

بس اني ماررريدك واكرررهك ماااريدك واذا عندك كرامة اتركني بحال سبيلي ... اتررركني .. حياتي وياك ميؤؤس منها ..

زم شفايفه وتنفس بغضب .. ماراح تكليلي شلوون احتركتي ؟ وشنوو صار ؟

مااكلك ، اكوول للشرطة ومااكلك انته السبب انتتتته ..
اطلللع وعووفني اطلللع ..

اريد اخوويه اريد اهلي اريد اخووواتي ويينكم ابني جيبوولي داااني دااااني مااما وووينك دااااني ...

ماعرف شيصير بيه لمن يدخل عليه ، اتذكر اخر مرة لمن ضربني وتركني وحدي توة جايتني نوبة الصرع وشكد جنت تعبانة اكرهها بالزايد ..

بقوا اخواتي يمي ، دانيال طلع من المستشفى بس ماعرف حالته شنو وشنو راح يصير بي محد كال كدامي ..

هو جان يجي يمي اسوي نفسي نايمة واسمع صوته مرات يقرا قرآن يم راسي ومرات اسمعه يحاجيني بس اغلس منه ..

اجاني سؤاله مرة من المرات فرح انتِ شنو تردين ؟ وكأنه يعرف اني كاعدة ومتجاهلته ..

فتحت عيوني .. رديت اريدك تطلكني تطلق سراحي ..

هز راسه .. هذا هو مدام بيها راحتج هاي يجرالج انت حرة

جاوبت اروح لكركوك ويه أحمد .. مابقى ابغداد ..

رد بيأس : روحي اذا هاي الروحة بيها راحتج روحي الله ومحمد وعلي وياج ..

يتبع ...