رواية هذيانٌ بين جمرٍ وجليد ..(ارملة اخي المجنونة) الفصل الخامس وخمسون 55 - بقلم نورا ناصر

السلام عليكم
رواية هذيان بين جمر وجليد
الفصل واحد وخمسين
نورا ناصر

****

ما اعجزني شيء الا انتِ ، ما ادمى قلبي الا بعدك ، ما اماتَ روحي الا بعد عينيكِ ، لحظات تلج فيها روحي جسدي ، هي لحظات سماع صوتك يدغدغ فيها اسماعي ، رسمك يضيء عيني ، أرأيتي الى اي مدى بلغ سقمي بكِ ؟ اجيبيني و ارحمي روحاً مخمورةً بكِ عشقاً ..
بقلمي......لريلام ومهيب 💔

****

هدى ..

دخل لهيب كتله ...الله يساعدك ...
رد بملل...هلاو ...

رديت بكلبي ...وسسسسسسم مو صوجك صوج المطية الحمارة الي شابعة كتل واذية منك وترجع تسلم عليك ..

كال بدلي وامشي وياي للقصر يله ..
كمت كتله ماروح انوب يشوفني عمي ويرزلني لو يطردني .. كافي عليه رزايلك واهاناتك ..

كال بنتر ابوي ماكو رايح يم فرح امشي ولا تعطليني يله داشوف حل للمصيبة مالتي ..

كتله ياا لعد هيه فرح وين ؟ هم طردها من القصر عمي ؟ خطية وين تروح عاد هيه هم يتيمة مثلي خافوا الله بيها ..

كال بعصبية ولج شنوو هاللغوة واللواكة هايه قابل شمسويلها هو ديله امشي بدلي لديما ولتلغين زايد يله ...

كتله شووف لا تحجي وياي بهالاسلوب تره ماحبه
ركعني على راسي بكف ايده الضخم وكال دووولي وطلعيلي ملابس وياج طاب للحمام ..

وطلع من الغرفة شكد مكرووه اكرها اكرهاااااا المتعجرف ..

رحت بدلت لديما واني هم بدلت ، لبست تنورة ماروني وبدي وفوكه سترة كابوي .....

هذا هو يجيبلي الملابس وكله على ذوقه عشتو ولا شايفه السوك شلونه اني حتى بنتي هم هو يجيبلها ..

بنتي طلعت الها يلك كابوي وبلوز ابيض وبنطلون كابوي ..

بدلت الها وخلصتها ورحت طلعتله ملابس
هم نفسنا سترة كابوي ..

خليتهم اله على السرير ورحت للصالة خليتها بالكرسي مالتها واني خلصت مكياجي وكعدت بالصالة العب بنتي علما هو يخلص اني سريعة بالتبديل بسرعة اخلص .. واخلي مكياج خفيف ...

شفته طلع من الغرفة واجه للصالة ظل يباوع لملابسي وملابسه وملابس ديم

كال الله يطيح حظج اي والله شنوو مطلعتنا فريق!!!

كتله اي شكو بيها اللبس مثلنه ؟؟

كال انجبي تدرين هسه اذا نروح هيجي وهناك شرار وحسان ومهيب يسوونه تصنيف لو لا؟؟

مااكدر اعتمد عليج بشغلة وحدة تظلين زعطوطة امداج ...

ظليت تأفاف اي ليش تعتمد على ذووقي روح طلعلك انت ملابس وبعد لا تكلي طلعيلي .. عندك ادين انته

مو معتبرج ادمية ليش تصيرين حمارة ؟؟

وبعدين هاي الطفلة مو خطية ملبستها كابوي ماتحسين بيها ترة بارد عليها

اووو ساعة السودة ترة ملبستها كولون جوة شبيك

اسمه كالون يااابيئة ...

كمت على حيلي واهززز ببنتي كتله اكولك رووح وحدك احنه مانرووح ... شجابرك تطلع ويه ناس بيئة على كولتك

كال دكعدي كعدي تروحين وغصبا ما عليج .. وبنتي مووو بيئة

هو منو الي جابلها البنطرون الكابوي هذا غيرك ؟ قابل اني جبته هو انته اشتريته

كال لاتظلين تثردين بصف الماعون ...
وراح رجع للغرفة وبدل ملابسه لبس قميص زيتي وسترة سودة وبنطلون اسود وطلعنه ...

بالسيارة كتله شوكت تسوي للطفلة جنسية ترة صار كومة مرايحة للسماوة اشوف ابويه حرام عليك ترة هو مريض وحالته كلش هم نروح نجيب البيان مال الولادة وهم اشوف ابويه

باوعلي غير انتي مطية وحمارة بيان بنتج ماتدرين بي وين ؟؟

هه وليش اعتب ع البيان اني اذا انتي الطفلة جنتي متيهتها ومخلية البزازين ياكلون بيها انوب احاسبج على البيان االي مدري وين شمرتي يا مهملة..

صكيت سنوني حيييل ودرت وجهي عنه اله حق يحاسبني اني هم غلطانة بس ماحب اسلوبه هذا كلش ..

كال هاا شو سكتتي ؟ ماتحجين ؟ لسانج بلعتي موو ؟

ظليت بس اتأفأف واباوع ع جامة ..

لهيب ...

ابوي رفض يساعدني يكول اعتمد على روحك ..
سمعت بي خارج بغداد وعرفت بعمامي ومهيب متجمعين اخذت المصكوعة مالتي وبنتي ورحت ..

دخلنا للقصر عمامي حسان وشرار ومهيب وياهم مسويلهم كعدة بالحديقة نركيلة وكذا مستحلينها ومستغلين غياب ابوي خوش استغلال ..

دخلنه سلمنا وهدى سلمت كتلها فوتي جوة روحي يم حبوبتي هسه اجي وراج ...هزت راسها بموافقة
و راحت دخلت ....

كتلهم خوش كعدة صدك لو كالوا لو غاب القط العب يافار ..

مهيب كال امداك سويتنا فيران وابوي قط ..

شرار كال والله ماينلام يوم الي طردك تف عليك...

مهيب كال لعد تدري فرح شتسمي ابوي ؟ تسمي العرندس .... احد اسماء الاسد ..

حسان كال بعد المخبلة شنترجى منها ..

كتله هاا راح تبدي بيها مدام هيج اروح اسلم على حبوبتي .. بين ماتخلص ..
عفتهم دخلت سلمت على حبوبتي وجانت هدى كاعدة يمها ..

حضنتها كالت هلا بالكطعي هلا بالكاطع ...ولك اسال على حبوبتك وتعال مر عليها وشوفها ..

كتلها مشتاقلج بس شسوي غير حكم ابنج هذا ...
حرمني منج ..

كالت والله جاي اتوسل بي يرجعكم صدك ام حسام مامقصرة بس يا حبوبة البيت وحشة وهاي عمتك وبنياتها هم طلعن ع الاقل هداوي يمي ترد عليه الوحشة ..

كتلها لا تعبين روحج ويا هو من يقفل يقفل ..

هو بس انته طردك بس عمتك بلقيس بس بنات عمه هم دز على زواجهن وكطعن رجلهن من البيت

اي ليش هن الي سوونه شوويه مو هدن على مرته بالسجاجين شتردين يسوي خو مايسكت ...

كلها من السوسة فريحة هم ياريت هسه هيه هنانه شو حتى هيه بكبرها مو هنا ليش طردهم مادري

حبوبة ترة الي سوو قلة احترام وهو الي سواه رد اعتبار مو بس لفرح لا حتى اله هو ...

ظلت تتنهد وتفر براسها الله يرحمه حمدان هو الورطنا بيها وجابهه علينه ..

همست الله يرحمه ...

كالت وهم هاي سحر تلوب وتخابرني تبجي تريد بنيتهه اخذهه ووداهه لفريحة ..

حبوبة ترة هاي ساقطة وسمعتها مو زينة وهاي بنتها محسوبة علينه احنه من لحمنا ودمنا مايصير تبقى وياهه ...

اي كتله جيبها هنانه خليها كبال عينك مو تاخذ الفرخة منها

اي شيكولون علينا ملفين ساقطة ابيتنا ...

يا يمه هاي ام ودعوتها مستجابة مايصير هسه تدعي علينا ليل نهار ...

ألله لا يستجيبلهه دعوة ، اني اترخص اروح يمهم بره ..

كالت تظلون ع العشه ؟
كتلها اي باقين ....

طلعت برة .. اخذت كرسي خليته وكعدت ..
كتلهم شوفولي حل لمشكلتي ترة مو حالة هاي كلكم تتخلون عني ...

حسان سحب نفس اركيلة و كال شون كراوي تعبانة
لك انته يمته تصير زلمة وتعتمد على نفسك !!!

رديت ... منو كالك اني مو زلمة اني زلمة وغصبا على عمامي ..

رد حسان : شوف اني جان والله ساعدتك ببطن عيني بس اجتى اوامر من فوك من الجهات العليا مانتدخل ولا نساعدك ..

_ تقصد ابوي ؟

_ اي و احنه منكدر نطلع عن شوره ...

مهيب كال هسه انته مارحت الا على هذا السكران ؟ دعوفه بحاله ترة مايأذي ، هذا كدامك عمك حسان نهار كله سكران وشحلاته ....

كال وهو يباوع لمهيب اني نهار كله سكران !! صدك لو كال ابو المثل تجيك التهايم من البهايم ..

مهيب : اسمع لهيب هذا المثل الي نسيت اكوله الك البارحة ..

رديت : منين اكو هيج مثل عمك حسان مأثر الشرب على راسه ..

شرار جان ضاربها صفنة سمعت بموج ضاربته ببوري ابو النفط ...
كال وهو صافن ابو المثل ماخلى شي ماكاله ..

حسان كال شبيهم السكارى ترة احسن خلق الله كلبهم نظيف ومايشيلون حقد ابد ..

شرار كاله ايباااخ ومنو الي شايل حقد ع المكرودة فرح ونهار كله تحجي عليها ...وانت اكبر سكير ..

كاله انجب اني اشرب ع المزاج وماوصل لمرحلة السكر
واني اشرب بالحلال ومن جهات مضمونة ...

بس ها على طاري فرح اسمع ولك لهيب وانته مهيب ترة فرح راح تجيبلكم اخت ومن هسه اكللكم شدو روسكم يا كرعان ...

مهيب خله ايده على راسه كال الحمدلله عندي شعر ...
واجاه اتصل اخذ تليفونه وكام من يمنه .. وشرار جان ضاربها صفنة معدلة ...

باوعت لحسان كتله اني صدك اريد حل لهالمشكلة
وهم ناس عفطيه وما يحلها غير العفطي ...

حسان ...ونعم من تربيتك روح شوفلك عفطي اني مو عطفي واحل مشاكلك ..

بتوسل رديت على كلامه : لا اعتذر عمي غير انت الهيبه مالتنه انت ذيب ومراوغ وتعادل الف عفطي
اني اريد احلها بسلميه وبعيد عن ابوي وعن اهلي ..

نفث دخان الاركيلة وكال بملل : بله لواگه وانطيني الخطه انفذها وتعلم مبدأ بالحياة نفذ وبعدها ناقش .

كتله ....غير اناقش انوب ابدي بالتنفيذ ...

رد بخبث : لا بووويه التنفيذ اهم من المناقشه مدام عقلك براسك سوي التريده ومن تسوي التريده ويجون يكولك يا لهيب ليش هيج سويت عود ناقش وطكاهه ضحكة ..نبدي بالخطه ونفذهاا ..

كتله .... اريدك تجيبلي كم عفطي لان اني كاسر سن وهالسن عليه فصل ، اني ما عندي فلوس للفصل تعرف بيه حفاضات وحليب وهاي الكلبه بنت الكلب التزوجتها حطتني بالطين ومن وراها ابوي طردني ...

خله ايده على كتفي كال سهلة سهلة تنحل
كتله اي والله سلمتك لحيتي دير بالك عليه ....

ريلام ...

واجهت ماما وكتلها بإصرار اي احبه وهو يحبني واحنا مراح نصير غير لبعض وسالفة اخوج واخوج هاي انسوها لأن هو موووو اخويه ..

فتحت عيونها متفاجأة ومعصبة ..
بصوت مصرور ومكتوم وللج ادبسسسز من شوووكت تطولين لسانج عليه ترة اكصه الج والله طايحة الحظ لج مهيب اخوج بالرضاعة علاقتكم حرام ترة اذبحج والله اسلمج لعمامج يكتلوووج واخلص من عارج ياااعار ...

رديت الها بغصة انتي عمرج ما حبيتيني دوم مخليتني ع الهامش انت تحبين بس هيام ، رحاب بيبي ام بابا ربتها واني ماما احلام انتي تكرهينه لان احنه بنات

اجت يمي وكالت ولج اني وين احجي وانتي وووين تحجين ثوولة لج مهيب اخوج هذا حب محرم

انطيتها ظهري ارجف واعصر بأصابعي
كتلها مووو اخويه خالو يكوول مووو اخويه وهو بس انت انطيتيني لماما احلام اول يوم دترضع بيه هو نهاهه عن هالشي ومرضعتني بعد

لزمتني من طرف ملابسي ودارتني عليها بقوة
ولج تصدكين بخالج الظالم هوو لو حقاني مجان طردنا من البيت عمود مرته الخبلة .....

كتلها لا خالو مو ظالم خالو احتوانا طول هذيج الفترة بس انتي غلطتي وياه طردتي مرته وخليتيها تشرد من بغداد وهماتين وين متكعدين تكولين عليها مخبلة واذا وصل كلام اله والله مراح يرحمج

فرت ايدها كالت واني مجذبة هيه صدك مخبلة ...

كتلها لأ فرح مو مخبلة فرح صح مريضة بس مو مخبلة واذا صدك وتخبلت فأنتوا الي خبلتوهه ...

كالت الظاهر امج احلام منطتج تربية خليني اربيج اني سحبت الجفجير وصخ من السنك وظلت تضرب بيه

واني احمي نفسي بادية واحجي جنت منفعلة حيييل
عوفيني لتضربيني انتي مووو امي موو امي اني صوجي صووجي اجيت وياج المفروض ابقى ببيت خالو

وهيه مستمرة تضربني دخلت بيبي سحبت منها الجفجير وعاطت بيها
ليش تضربيها اليتيمة يا ظالمة النفس
همزين طردج اخوج من بيته حتى تجين هنا ونشوفج شون تعاملين البنات وتأذينهن

تنهدت ماما وكلتها تولي عمة تولي انتي ماتدرين شمسوية ولسانها شطووله

كالتلها بيبي بنتر وعصبية
ولج شمسويه يعني شمسوي ولو شماتسوي وبعدين شو اني اعرفها اكثر منج بنية هادية وحبابة ومايطلع منها االعيب بس انتي الله يسامحج
امشي وياي بيبي شحدة لي يمد ايده عليج اكسرها وعلكها بركبته لو موو امج هسه واطيح حظه ليطلع وراهه .. كالت هالحجي وعينها بعين امي ..

ماما ظلت صافنة وطلعتني بيبي من المطبخ وهيه حاضنتني ..

كعدت بالهول ابجي وبيبي تهدي بيه وتسكتني وتحاول تعرف ليش جانت ماما تضربني

حضنتها وكتلها ماما متحبني تحب بس هيام هيه تفرق بيناتنا وهيه هيام حرضتها عليه

بيبي : هيام ولت مدري وين راحت كالت رايحة لصديقتها خل تجي واطيح حظهه ..

وخرت من حضن بيبي كتلها بيبي اترخص اني اروح للغرفة
كالت روحي حبيبة وشحدهه تمد ايدهه عليج بعد اطيح حظها والله
بستها على راسها وهيه باستني بخدي

طلعت من الصالة داروح اصعد فوك لغرفتي شفت ماما داروح بسرعة من يمها واختفي ، لزمتني من ايدي وكفتني

كالت الفكرة الي ابالج شيليها افتهمتي لوو لا انت ماتصيرين لمهيب لو تموووتين والله ياريلام اطيح حظج ولا عبالج ماسويها اله ازوجج لواحد من اولاد عمامج

فلتت ايدي منها كتلها مراح تكدرين تسويهه والله خالو مراح يخليج اصلا خالو يدري بمهيب يريدني ويدري اني اريده همين

تريد تلزمني من شعري دااصيح لبيبي هيه سدت حلكي ودفعتني بغرفتها قريبة ع الدرج

كالت والله اخلي واحد من اولاد عمج ينهي عليج وساعتها خل نشوف خالج شراح يسوووي ....

خليت ايدي على حلكي وابجي وركضت طلعت من الغرفة وصعدت فوك ... كملت بجي وحدي بالغرفة
شفت الغرفة مهووسة والمكياج مخربط ع الميز وريحة العطر تفح لان هيام طالعة حتى ماعرف وين رايحة

انتظرت اهدأ والشهكات تروح واخابر مهيب وانهي وياه كل شي ماريد تصير مشاكل ويتأجج الوضع

دكيت رقمه انفتحت المكالمة وجاوبتي بدل كلمة الو
كال احبج

غمضت عيوني ونزلت دموع محبوسة وضعفت ولا كدرت افتح حلكي بكلمة واجرحه واذي ميستاهل ابد حبه الي عظيم وماله حدود بس الكل ضدنا وكل شي
الماضي الحاضر والمستقبل والقدر والي حوالينا ..

حاجيته وسلمت عليه بس هو انتبه على صوتي بي شي كتله ضايجة

كال اجي عليج اخذج اطلعج تتونسين ؟
كتله لا خاف ماما متقبل
رد : وليش متقبل! اكو احرص مني عليج ؟

تحسرت كال احجي شبيج ؟ وشصايرلج لا اجيج هسه ....والله

كلت خاف يسويها ويجي ومنا ماما معصبه حيل
كتله تعاركت ويه هيام
ظل يحقق وياي ...

كتله عمود شغل البيت ...

كال جذابة ريلام جذااابة اكو شي ضامته عني ماصدك انتي النادرة وتحبين شغل البيت تردين تقنعيني متعاركة عمود الشغل كولي غيرها واحجي شبيج ولج

ماكو شي لا تلح مهيب شغلة بيناتنا ..

كال اوكي خلي اجي عليج هسه كلنا مجتمعين هنانه عمامي وهمين لهيب وجايب هدى وبنته المفعوصة وبالليل ارجعج

تنهدت فدوة مشتاقتلهم كلهم والله بس ماكدر مهيب اصلا عيوني من البجي ورمت ماريد احد يشوفني هيج اريد اروح محتاجة انام

كال روحي وباجر اني يمج بالكلية تمام ... لازم اعرف شكو ...
كتله باي مهيب وختمت المكالمة ..

فرح ...

ختم المكالمة ويه لهيب واجه يمي ظل يلح عليه اروح للمستشفى واني ارفض ..
اخرر شي عصب وعاط ... شبيييج تخبلتي؟؟صعدت السوادين عندج فد نوووب!!!

لاءءء اني مو مخبلة اني مذبووحة منك انته ...

جر نفس واستغفر لازم راسه ...
وكال بهدوء
ولج كومي ياعيني ليش تعاندين ..

ماريد علي ماريد اروح باردة وتوه سابحة اني اطلع بهالبرد اتمرض

وبعدين اذا بقيت هنانه مراح اموت وحتى لو اموت هم امنيتي هاي ..

كافي اعيش اكتفيت والله اذا هو العمر عمري شلعان قلب شسوي مكملته شسوي!!! اتمنى اموت واخلص ماعندي شغف بالحياة بعد ابد ...

اصلا خايفة اعيش اكثر ، خايفة من الحياة اكثر من الموت ..

واذا عمري راح يستمر بنفس الايام السودة ماريده خل يخلص ويخلصني

ولج انتي ماتكبرين تبقين طفلة شنو هالتفكير هذا .. انتي متأكدة مشلعة سنونج اللبنية كلهن لو بعدج ؟

ها علي هسه صرت طفلة لعد من تتقرب مني متكول طفلة ؟

كال قصدي انثى بالغة ...

كتله هسه صرت انثى بالغة وانته شنو لعد شايب مراهق ..

رد ببرود ... الشايب يصير شاب وياج فرح ...

يعني عادي اكول شايب وشعرك مشيب ....

رفع اكتافه بعدم مبالاة .. عادي الشيب وقار لا تعيريني بي ام جاسم وترى الشيب مايجي عن كبر يجي عن قهر او وراثة والحمدلله احنه ماعدنا وراثة ..

بس اكيد مقهور ومن ورى مصايبج ام جاسم طكت رواحتهن الشيبات وطلعن

ثارن ضدج وخطيتهن بركبتج ، شفتيني كبل لا ازوجج بيه هلكد شيب اشوو من تزوجتج طلعن

درت وجهي عليه التفتتله لا اصلا ماكو شيب هواي بس كم وحدة بالله خلي احسبهن ... مديت ايدي واني ناطيته ظهري بس وجهي عليه وقريب على وجهه واباوعله... لزم ايدي وظل يبوس بيها ..

مرات احس نفسي متزوجة رجلين بجسد واحد ....
واحد منهم يعاملني بحنية وحب ... والثاني قاسي ومتعجرف ..

كتله ... اني ليش اهون على كلبك علي ليييش ، اظل عايشة على هامش حياتك اني!!!

كال بتنهيدة انه رجل عشيرة وقراري واحد
وعيونج تثنيني عن اصراري وقربج يتدخل بقراراتي ...
كلج على بعضج نقطة ضعفي .. وانت بمرحلة عقاب هسه

بقيت اباوعله ببلاهة .. كتله اي ولازم اتعود اكون طفلة وياك بس تبتسملي انسى كل اذيتك واسامحك مو ؟

ابتسم .باوعلي هواي وبعدها كرصني من حنجي .. كال شكد حلوة انتي جنج غبشة الله ... وهذا الوكت بالذات كلش احبه ..

يعني تحبني علي !!

اخذني لحضنه حيييل حضني يمكن هذا جان جوابه ..
بحظنه اني اتبعثر وحيلي ينهد انفاسي تلهث وقلبي تزيد دكاته ...

بس رغم هذا اعتبره رد بارد اريد اسمعها من شفافه والرد البارد كسر شغف المحاولة وتكرار السؤال...

حسيت فشلت بس محتاجة احجي وياه
سألته : انته تسهر وتكعد من الصبح كلش قليل تنام ...

اي متعود هيج ..
بس ليش تحب غبشة الله ماكتلي ؟

كال بضحكة لأن تذكرني بوجهج الحلو ، اكعد من الصبح واباوعلج واصفن بجمال وجهج الصبوح ..

كتله لعد ليش هلكد مبعدني عنك ؟؟

كال هنا احس الج فرح احسن من بغداد بهواي هناك احتاريتي شلعبتي وشسويتي .. شنو نسيتي سوالفج ترة اذا انتي نسيتي انه ما انسى ..

واني راح ابقى هنانه منفية ؟؟ وانت تعطف عليه تجيني بالاسبوع مرة لو ماتجي ..

كال جيبي والله كريم كل شي يتغير ..

واهلي شلون ابقى بعيدة عنهم ...

اي تبقين بعيدة فرح تبقين ، شمدريني مايهربوج مرة ثانية ؟؟ انه ماخايف لا يهربوج لان ادري مراح يكدرون بعد انه الهم بالمرصاد بس لا خايف على ردة فعلي ذيج الساعة يمكن اذيج

باوعت لعيونه بعمق وقهر .. كتله علي هيه صارت مرة وحدة وبعد متصير والظروف حكمت .. ..

خله اصبعه على شفتي
كال اششش كافي يله ارتاحي ولا تسولفين هواي مالها داعي تحجين ..
ترة عيوني تفهم شكوووو برووحج وشنو الي تردين تكولينه ... ويصير خير ان شاءالله ..... وكومي يله للمستشفى .. كال هيج وكام على حيله ..

دفنت روحي بالفراش كتله ماما علي ماروح ...

رجع كعد يمي اخذ راسي خلاه على رجله ويبعد شعري عن وجهي ..
كال بعدج متوجعة كومي شوفي نفسج بعدج تنزفين ؟؟

كتله مادري مابيه اكوم من الفراش متعاجزة كلش ..
راح جابلي ملابسي من الكنتور وبدلت ..

ورجعت للفراش تغطيت بس وجهي طالع ..
كال راح اخابر على الدكتورة واكللها على حالتج ..

وخرت البطانية وعدلت كعدتي ، كلامه يرادله كعدة
باوعت للساعة هسه ساعة ٩ ونص ...

كتله لحظة لحظة ؟ شنو تخابر الدكتورة بهالوقت ؟ صدك تحجي انته مو عيب ؟

كال هيه دكتورة جااا اذا مااخابرها بحالات الطوارئ شوكت اخابرها وانت حالتج محتاجة..

تخصرت وكتله وشنو حتكوللها بالله ؟؟

كال بخبث وابتسامة اكللها على الي صار قبل شوية

لطمت خدي عزاااا علي مووو عيب اني استحي اكوللها هيج ..

رد وهو يطكطك بموبايله : لا حياء في العلم ...

لالا مو هيج شيخ مووو هيييج كول انته ميانة زايدة وياها ....

خله التليفون على اذنه وكال : مساء الخير دكتورة وسناء شلونج ..

ظليت افر بيدي وانوب مبين اكلته اكل من السلام ماكدر حتى يفك روحه منها

اني اخلص من ختام تطلعلي وسناء ...

اخلص من محامية تطلعلي دكتورة ...

ع كولة عادل امام اخاف من كلب يطلعلي اسد اني اخاف من حية كوبرا تطلعلي حية اناكوندا ...

واخيرا كللها زوجتي وياج تشرحلج على وضعها ..
اخذت الفون منه ..
جاوبتها اجاني صوتها مرحبا ام دانيال شونج عزيزتي وسلامات شبيج من شنو تعانين ؟

كتلها عندي تقلصات مسببتلي الم ونزفت نزف خفيف وانقطع ..

كالت بسيطة ان شاءالله لتخافين هاي احتمال المشيمة هابطة انتي بس ارتاحي بالفراش الليلة ولا تكومين الا للضرورة وباجر سوي سونر ..

ختمت المكالمة وياها وباوعت للمكالمات شفت رقم موج اي اعرف نهايته اني .. شفته بالمكالمات لم يرد عليها ..

تخبلت ظليت اباوع بتليفوونه هااي ليش هيج علي والله حرام عليك والله

اخذ مني التليفون بسرعة ونتر كال شبيج على حجيج هذا وكل شوية تكولين حرام عليك وحرام عليك راح اطب لجهنم ...

كتله لعد انته ضامن الجنة وانته ظالمني ...
خزرني وكال من بين اسنانه كافي ثبرتييييني كافي

لعد الله يرضاها اختي متصلة عليك لابسها وممجاوبها مو خطية عاد مو الهالدرجة رد عليها اكيد بالها يمي ... لو صارلهم شي

ظل يباوع بالتليفون ويكلب بي
كال وينه رقم اختج وووينه بالله ؟ ولج انه مشغوول بويه شبيج مو كل رقم ارد عليه ..

مشغوول بس من جانبي انته اصلا الفون مايوكع من ايدك .. انطينياها اخابرها اطمنها عليه ترة هيه مراح تخطفني واني هنا وهيه هناك
صدك هيه وينها موج ؟

كال بكركوك يم اختج واخوج .

صدك تحجي علي ؟؟ لعد ليش لهسه يمهم شعجب مو كالت تجيب انين عمود زواجهم اشو تأخروا شصار ؟

كال صار بينهم خلاف هيه وشرار هو رجع لبغداد وهيه ظلت بكركوك ...

كتله يااا صدك والله على شنوو ؟
كال مادري بيناتهم خو مااحط روحي انه و هسه اخليج تخابريها

دك الرقم اريد اخذه منه بس هو كال صبري خاف تطلع مو هيه وانتي متوهمة ..

كتله والله هيه واعرف رقمها كلش زين ..

وعيني عليه وهو لازم موبايله وواكف ومخلي على أذنه وبعدها ظل يحجي بالتليفون وتأكدت من كلامه انو ديحجي ويه موج .

يطمأنها عليه ، رحت خليت اذني على التليفون اسمع شتحجي ويا ..

لزمني من ايدي ورجعني للسرير وفتح الميكرفون
سمعتها كلتله لعد شوكت نكدر نشوف فرح

سكت شويه وكاللها تشوفينها بعرسج ان شاءالله..

ردت عمو شلون اتزوج واخوك مايقبل يعقد محكمة ..

رد عليها يسربت ماعليج بي مو بكيفه بوية يعقد وغصبا ما عليه احنه الي مانرضاه لبناتنا مانرضاه لبنات الناس ..

بس هو يكول ميكدر يعقد محكمة ميصير عمود زوجته وعمود ابنه ..

كاللها لا بووية يصير انه ادبرها الكم شسالفة مو كتلج يمسلت خليها عليه وهاي اختج وياج

انطاني التليفون اخذته منه وحجيت ويه موج بلهفة وحماس وهو طلع برة ..

كالت فرررح ولج ممصدكة دااحجي وياج والله شكد اتصلت على الشيخ ميجاوبني اجيت اخابر شرار واوافق اتزوجه حتى لو بدون عقد محكمة بس ارجع يمج بالي مشغول عليج فرح

موج حياتي اني اشوووق علي ميعرف رقمج والله هو هسه كلي ولج شوونه احمد شونهه انوو ولج ميتة على شوفتكم والله ..

طمانتني عليهم وسألتها شبيها ويه شرار وهيه حجت االي كل شي وبعدين حاجيت احمد
وكلي انو هو كلما يتصل بعلي يكوله ماكو شي ينحجي ولا الكلام راح يتغير
فرح كليلي خو ما مأذيج الله عليج ولج خاف غلطت بحقج اني وهو مدينطيني فرصة اكوله انتي مجنتي قابلة تطلعين بس احنه جبرناج ..

جاوبته لا اااا لاتكوله احمد اني داقنعه يعفي عنك ويرجعك لبغداد حباب لا تكوله عوفه

مااشوف اله علي واكف يم الباب ويباوعلي ونظراته ماتتفسر .. المشكلة هو سمع صوت احمد لان الميكرفون مفتوح ..

ارتبكت وطلبت احجي ويه انين بسرعة وحجينا وهو علي رجع طلع من الغرفة ..

ختمت المكالمة وظليت اكلب بتليفونه وحفظت رقم موج هماتين خاف تخابره ، بعدها بدقايق رجع

كال ليش تكومين من السرير والدكتورة نبهتج ماتكومين اله للضرورة ؟

جاوبته ردت اعرف موج شنو تحجي وياك ..
اجه كعد يمي واخذني لحضنه
كال يعني انتي ماجنتي تردين تعوفيني وترحين مو؟ هم ضغطوا عليج وجبرووج ؟

هزيت راسي برفض هو خله اصبعه على شفايفي
كال لاتنكرين سمعت كل شي .. مو بعيدة هم يكررون الحالة وياخذوج

لالا ميسوووها والله علي صدكني
كال اشش سدي الموضوع ...
تمدد بصفي وقربني منه دفنت راسي بي ، انفرش شعري على صدره وهو ياخذ بخصلات شعري المبللة يشمها ويتلمسها ..

كتله علي خلي اكوم امشط شعري فد اضوج انام وهو مبلل وممشط ...
ضحك وكام جاب المشط وهو ظل يمشطه ..

كتله ترة مسوية عجينة بيتزا اني هسه خربت
كال عوفيها ماتكومين من السرير ..

وهو ديمشطلي كعدوا الجهال فطومة كعدت تبجي ودانيال سمعها وهم كعد

كلت اووو كعدوا هسه شينيمهم بعد من هيج اضوج انومهم المغرب ..
كال لا تكولين هيج حرام شتردين منهم .. انطاني المشط اخذته منه اكمل تمشيط وهو راح للجهال يسكت بيهم وطلع من الغرفة ..

بعدها المرية سوت عشى واجو يمي تعشوا وهو يسويلي لفات واني كاعدة بمكاني واكل ..

بس انقهرت لمن سمع كلام احمد لو سادة الميكرفون شكد غبية اني هسه هم راح يزيد قلقه عليه وهم حيخليني ابقى هنانه وهم احمد بعد ميرجع ..

خلصنا عشى ، وهو كاعد جوة نزلت من الفراش ورحت كعدت يمه .. باوعلي ماراضي على كومتي من الفراش
مديت ايدي لايده حوطت ذراعه
كتله صدك سمعت تحجي ويه لهيب خطية ميصير هيج هو واكع بمشكلة ليش تتخلى عنه

كال منو كالج متخلي عنه ؟ ولج اريد اختبره واذا وصلت كلش اساعده طبعا ..

..........

موج ..

كعدنا اني وانو وهيه ظلت تحاجيني بتوسل
: حبابة مووج لا تخلين احمد يجبرني على احمد
فدوه ...

حبيبي محد يجبرج بس انتي ليش ماتردينه يعني لازم اكو سبب صحيح!!! لو أني غلطانة ..

ارتبكت ودارت لي ظهرهه مممم بدون سبب هيج

لزمتها من زندها ودرتها عليه .. لاء ماكو بدون سبب لأن عمر حباب وخوش ولد واهله همينه

ظلت تعصر بأصابعها انتي همينه رفضتي اوس اول مرة لمن خطبج

اوس تجيبيه ويه عمر ؟؟ صدك تحجين انتي خبلة ؟؟ ولج ميوصل لأظفره شفتي شسوة بيه ؟؟ وهذا كله الي احنه بي بسببه ...

وكملت بتلعثم وحماس ؛ وشرار شرار هماتين رفضتي لمن خطبج اول مرة مو كتيلي هيج مرة ؟؟

رمشت وتنهدت هالحقير هذا مدري شصار وياه ناسيني هالفترة ولمن جابت سيرته كلبي ظل يضرب على اظلاعي بعنف ..

كتلها شرار متزوج تمام واني ماريد اشارك مرته بي ..

بس هو وياهه عمود ابنهم وهو يحبج الج وحتى زواجه من الروسية جان عمود جنسية مو حب وحتى مرته تعرف بهذا الشي ، اني مرة سمعتج تكولين هذا الكلام لفرح .. مدري هيه كالتلج هالكلام نسيت ..

عدلت شعري وخليته ورة اذني وكلت بثقة مهتزة
_ ميخالف وان يكن ...

انووو ؟

هاا؟

انت تحبين شخص ؟ احد ابالج عندج علاقة بأحد كولي لا تظمين عليه ...

بقت تعصر باصابعها وهيه مخليتهم بحظنها ومتجاوب ..

اخذت اديها عصرتهم بحنية بين جفوف اديه وهيه باوعت بوجهي
برجاء ..

حاجيتها بنبرة جادة وصارمة
انوو احجي الصراحة انتي معجبة بشخص موو ؟

تهز راسها برفض ونظراتها تكول اي وتتوسل

حسان صح ؟

كالت بتوسل موج حبااابة .. عوفيني فدوة

كتلها هسه لازم نحجي بهالموضوع ونحسمه ونخلي النقاط على الحروف

باعي لا تفكرين بحسان انصحج صح هو نقذج وانت تعتبرينه بطل بالنسبة الج هو سوا شي بأصله ومقصر ومشكور لهنانه وبس

بس اني مدا اكدر اشيله من بالي ؟ واحتمال هو هم يفكر بيه مو صح ؟

حتى لو يفكر بيج حتى لو يخطبج انتوا ماترهمون سوا وعلاقتكم مستحيلة

بس بس ليش

ولج شنو ليش اول شي فارق العمر الي بينكم هوايه

انتي وشرار همينه فرق هوايه ..

هم كالت شرار يربي شون تشتتني وتخليني انسى شنو اريد احجي !! حجيت بقلبي هالكلام ..

تنهدت اني وشرار مو هوايه يا دوب سبع سنوات بس انتي وحسان فرق شاسع بالخمطعش سنة ..

كالت لعد فرح وعمو علي همينه فرق اربعة وعشرين سنة

عزااا انووون انت ترتدين تقتدين بفرح وعلي صدك تحجين ولج علاقتهم من الشعافي صايرة

فتحت حلكها كالت هاا ؟؟

ءءءء هزيت راسي جفصت ..
كتلها ولج علي وفرح مو علاقة مثالية حتى تقتدين بيها هو معتبرها طفلة خطأت تتعاقب وتتعلم من اخطاءها بدون ما هو يوجهها

وهيه تريده يغمرها بالحنان الابوي وهو رجال مشغول نهاره كله وحتى بالليل ، وغير مشاكلهم الي لاتعد ولاتحصى والماضي الي مو جاي تكدر تنساه

حبي انين شوفيلج غير سالفة وابد لتركزين ويانا اني وفرح متشوفين طايح حظنا وشيلي حسان من راسج ترة تتعبين لج مدتشوفينه ؟؟ شوووفة عينج وشصاير بينا ؟

موج ماكو علاقة ارتباط مثالية مستحيل لازم تصير مشاكل ...

اكولها ثور تكولي حلبه لج انتي ناويه تطيحين حظج بيدج شجااااج ؟ ولج لاتنسين حسان حاقد ويكره فرح لان خربت بينه وبين حبيبته ..

لاء مو حاقد لو حاقد مانقذني من ابن خاله اوس ..

عجيب ولج انتي واصلة مرحلة شنوو هالاصرار على حسان ...

وبعدين تعالي اكولج خو ماعندج علاقة بي كومي جيبيلي تليفونه اشوفه ..

انين ...

كمت جبت تليفوني وارجف خاف هو داز رسالة ع المسنجر...

بس اني متأكدة هو اصلا ينسى حسابي وميدز بدون ما ادز اله ابد بس خايفة لا الحظ يعكس وياي واترزل ..

ظلت تدور شافته بالمضافين باوعتلي مخنزرة وهزت راسها وحظرته ..

كتلها ترة هو ميراسل والله ليش حظرتي عيب ترة ...
كالت اششش كل هذا المصلحتج
_ اني مو طفلة اعرف مصلحتي
_ لاء متعرفيهه ..
وانطتني الفون ..

موج ..

استغربت كولش لمن الشيخ كال يصير اعقد وهو يدبرهه لعد شرار ليش يكول العكس شنوو غايته !!
عصبت حيل اخذت الفون دكيت رقمه وخابرته

اجاني صوته كال ها النصابة الحيالة شكوو مخابرة ؟

كتله اني نصابة وانته جذاب شرار جذااب

كال عليمن جذبت على خالتج ؟

عوف خالتي بحالها ، ليش تكول ميصيرر نعقد محكمة والشيخ علي يكول يصير نعقد انته شنوو غايتك من هالشي ؟

وشنوو لي تغير هسه ست موت انتي وحدة مخادعة اني يمكن جنت مفتهم خطأ بس انت نصابة .. وجذابة لان انطيتي كلمة وتراجعتي بيها ..

كتله اني جنت اسيرة عندك ومتشتتة وماعرف اتخذ قرار ومن شفت اخويه بظهري غيرت كلامي لمصلحتي واي بنية تخاف على مستقبلها تسوي هيج

كال اوكي حقج وحجينه هذا يرادله كعدة اني وياج وافهمج على كل
شي واذا علي كالج يصير نعقد هذا هو نعقد وطز بكل شي بس كليلي انتي ترديني لو لا ء ؟ اريد جواب منج لان كافي تأخرت هنا ولازم اروح .... يله جاوبي موت ..

مهيب ...

يوم ثاني طلعت من دوامي توجهت لكلية ريلام اريد احجي وياعا بالي مشغول بيها احس اكو شي بس هيه متقبل تحجي ، سألت عليها بالحامعة كالو ممداومة ..

رجعت للبيت واني بطريقي هواي اتصلت عليها تليفونها مغلق .. فكرت اروح لبيت جدها بس بعدها تراجعت خاف عدها مشاكل ويه عمتي وخاف اني ازيدها عليها وخاصة علاقتي بعمتي متوترة هالايام
لان اني الي كشفت بنتها ..

رجعت لبيتنا نمت ووعيت الغرفة ظلمة والي كعدني صوت موبايلي يرن واني مشغول بريلام حتى بنومي حلمت بيها ...

كلت خاف هيه خابرت وبيها شي لان جانت تعبانة البارحة ... كمت اخذت التليفون وجاوبت بسرعة حتى بدون ما اباوع بشاشة الموبايل ..

اجاني صوت عمتي بنحيب وعصبية
ووولك مهيب وينها ريلام وين وديتها ؟؟؟ رجعها لا والله اكلب الدنيا عليكم ..

يتبع ...

الصميم بأنامل alraawih