رواية هذيانٌ بين جمرٍ وجليد ..(ارملة اخي المجنونة) الفصل الرابع وخمسون 54 - بقلم نورا ناصر

السلام عليكم
رواية هذيان بين جمر وجليد
الفصل خمسين ...
نورا ناصر

****

وقبل أن أفقد عينيّ ...أحبك ، وبعد ان فقدتُ صبري...
أحبك ، وحين أمزق أملي ... أظلّ أحبك

لكن الحب وحده لايكفي لنبقى معا ، لان الحياة عقد يكمل بعضه بعضا ، فأذا سقط من العقد شيء ... انفرطَ

وانا فرطت في حياتي كي احتفظ بك لكنك ستفرط بي كي تحيا حياتك

ليس من المعقول ان انتظرك وحدي وليس من الجنون ان تنتظرني قليلا ، لكن قليلا من المعقول وقليلا من الجنون يصنعان حياة ، اما كثيرا من الامل فيصنع موتاً وهذا ما افعله بنفسي !

فأذا رضيت موتي ... فأنني لا أرضى لكَ بعضه واذا ارتأيت بعدي .. فأنني لا أبيع من أحب .. لكنني لا أساومُ على الكرامة والسلام .

****

شرار باوعلي وكال بعصبية : لحظة لحظة شنو هالحجي موج ؟؟ تلعبين عليه اشايفتني جاهل كدامج اني ؟ لو استغليتيني!!! مو حجيتلج ظروفي ؟؟

كتله شرار افهمني ؟؟

عاط ماااكو افهمج احنه اتفقنا وخلاااص مو لعب هيه ...

لزمه احمد من كتفه على كيفك ليش تصيح شنو هيه كوة كل واحد يروح لطريقه لا اول اثنين يفسخون ولا اخر

شرار خله ايده على صدر احمد ودفعه
انت معليك لا تتدخل احنه متفقين بس هيه الظاهر تحب اللعب ...

عاط احمد بعصبية لك اني اخوهااا مااتدخل شنوو ؟ ومااسمح الك تحجي عليها بهذا الاسلوب افتهمت لو لا خليني محترمك انته ابيتي

عرفت حتصير معركة بيناتهم رحت صرت بنصهم
واهدأ بيهم واباوع لشرار كتله اني مو رافضة الزواج بس اني همينه مانطيتك كلمة وفهمتك كتلك ماتزوج بدون عقد محكمة

نط احمد شنووو ناقصها تتزوج بدون عقد محكمة فصلية هيه ؟ لو شفتوا محد يطلع وراهن لا عم بي خير ولا خال حووك صرتوا تستغلوهم ابشع استغلال بس لهنا واني اكولك كااافي

مد ايده لزمني من ايدي وكال بعصبية
تعاااي نحجي على انفراد احسن

احمد كاله ماكو على انفراد مدام اني موجود اني ولي امرها الحجي يصير كدامي ماكو شي وراي مو تريد تنفرد بيها

صاح شرار لك ولي امرها شنووو لك اني رجلها مرتي هيه مرررتي عاقدين على ذمتي تره ومن حقي احجي وياهه ع انفراد بدون تدخل من احد لان مو جهال احنه
اثنينا كبار ونفتهم

رد احمد وليش تحجي هيج عبالك ملكتها ترة مو غصب الزواج كل شي غصب اله الزواج وانت واعي وبالغ وتفتهم المفروض هالشي ما يخفى عنك

بلعت ريك وحاولت اهدي الموقف كتله خلص احمد اني راح احجي ويا ع انفراد بس دقيقة

لزمني شرار من ايدي بقووة وكال باقتضاب تعالي وياي
وتوجه بيه للغرفة عبالك شقته ولا مستغرب الوضع ، ولا عبالك اول مرة يفوتلها ، فات ع الغرفة وسد الباب وتركلي ايدي

التاف عليه وكال : موج اكو وجه ثاني ماحب اظهره الج ، الا اذا جنتي انتي تردين تشوفيه

لاتهدد شرار هيج اكرهك والله واصلا ابقى مصرة على رأي هماتين ...

لج انتي شنووو موو اتفقنا هناك ليش تخليني اندم جبتج لهنا!!!

مااتفقنا هناك لا مانطيتك كلمة ماتزوج بدون عقد محكمة يظمن حقوقي وبعدين اني اول وتالي اجي يم اهلي خو ما ابقى العمر كله بعيدة عنهم

لج منو كلج مراح اضمن حقوقج او اظلمج اصلا اني مقرر اسجل عقار باسمج حتى تتطمنين وحاخذج ويايه لروسيا تكملين ماستر وراح تصيرين مسؤؤليتي ليش ماخذة عني نظرة سيئة او ممكن اذيج

شرار ميهمني هذا ميهمنيييي واني ما اكدر اخطو وياك خطوة مابيها غير الامل ..

اني واقعية اكثر مما اني عاطفية ولا اني مثل اي بنية تنصاع لتوافه الحب !

ميخالف مستعدة ابجي يوم يومين شهر شهرين حتى سنة ولا ابجي العمر كله الزمن كفيل بأن يشفي جراحي

ضرب ايده ع الحايط بقوووة ...

جفلت بس تماسكت ..
كتله ... شرار انته متزوج اني مستحيل اقبل بالقليل ابد متهمني فلوس ولا املاك العالم كلها االي يهمني كرامتي وبس دتفهم عليه اني مستحيل ارضى بالذل

لجججج ياذل لجججج اني احبج مستحيل اذلج

اوكي ممكن اكون اني همين احبك واموت عليك واتمناك هوايه وتعلقت بيك بس ماكدر ارتبط بيك بعدين حنكره بعض خلينا محتفظين بمشاعرنا ع الاقل ... الحب وحده مايكفييييي

للللج لاتكفررررريني موووج لاتكفريني شنو هالحجي هذا الي دتحجيييه ؟؟

تقرب مني خله ايده ع الحايط الي ورايه
كال انتي مخادعة ؟؟ متعودة هيج لو طبعج الغدر ؟؟كوليلي قبل لا اتورط وياج احسن

وخرت منه وظليت اهزز براسي برفض واكول شرار هذا حقي ترضاها اي وحدة من اهلك تتزوج بلا عقد محكمة!!

مو كتلج ع ظروفي على ابني !! لج والله وروووح ابويه اني ما حبيت ولا حسيت بانجذاب تجاه وحدة نفس احساسي بهالشي وياج هسه

ومرتك ش .. خله اصبعه على شفافي ...
ابتعدت خطوات للخلف

هو راح لباب الغرفة فتحها وطلع منها ، طلعت وراه شفته باوع لاحمد بنظرة اجهل تفسيرها وطلع من الشقة .....

تصارعت اعماقي بجنون ، خليت ايدي على حلكي ودنكت راسي ..ماادري اذا تنفست براحه لو لفظت روووحي ويه طلعته ...

رحت كعدت ع القنفة طلعت مني تنهيدة صَرّحت عن كل ما يثقل صدري ويتعِب عقلي ..

معقولة شرار بهالسهولة راح وتخلى عني!! لو طلع لان ماكدر يلزم اعصابه أكثر!!! وخاف تصير مشكلة ...

والله زواجنا مجازفة بكل المقاييس وفوكاهه بدون عقد محكمة اني شسوي ياربي والله مشتتة .. وماجاي اكدر اصفى على رأي وخايفة حيل ومحتارة

ماكدر انصف عقلي كدام قلبي والعكس همين ضايعة بكل معنى الكلمة ..

اجه احمد كعد يمي كال عووفي يولي لاتهتمين وميستاهلج كوليلي فرح شخبارها ابنها شلونه تصدكين بس افكر بيها والله اكول خاف خطات بحقها ماجان لازم اسوي هيج بيها وخاف بسببي الشيخ اذاها

لا اطمئن مايكدر يأذيها وهيه حامل بس بعده زعلان عليها وهاجرها ، بس يجي يطمأن عليها ويروح وكل شي تحتاجه ديسوي الها حتى مرات تعاند متروح طبيبة يجيبلها طبيبة للبيت وتشوف وضعها

_ تدرين شكد شايف متعجرفين بس مثله مشايف وهذا شيخنا الفاهي ابو حلك طيح حظنا والله دزيته عود يروحله ، خالي يكول مقبل يطلع اله بخمسين الف انطاه خالي ولمن صار موعد الروحه دز الي جوه ايده وماراح هو بنفسه ..

وبعد فترة خالي ماكدر يفضها هم دزيت رجل عمتي ابو منال من سلمان باك تعناله وجنت متأمل بي هوايه لان تدرين بي هو سبع ويعرف يحجي بس الشيخ الله يسلمه قافل

تنهدت بقلة حيلة ويأس واحس دخلت بمعركة ضاربة ويه أحاسيسي ..
جاوبت احمد هو هذا غير حظك يا اخويه هذا الي ماعنده سند بالدنيا بس كول هسه شراح تسوي

كال احنه استقرينا هنانه واذا فرح مرتاحة ويه رجلها اني شريد منها بس مايصير هيج مانشوفها ولا حتى نتخابر وهاي صار اشهر

كتله صدك يعني هاي هيه ايست وحتبقى هنا!!!

كال والله هنا اشو احسن احس كعد حظي بالشغل والله رزقني وها قبل لا انسى عمي دز سالم جاب حصتنا من البيت واني دزيت حصة خالتي وانطيت انين وبعد انتي وفرح حصصجن موجودة ..

رديت عليه : اني حصتي متنازلة عنها الك اتزوج بيها

_ يمعودة يا زواج ، احط بركبتي علة كافي عليه انتن

_ ها ها يعني احنه عللل ؟

ضحك لا ابد بس عليتن كلبي والله

انين كالت بغصة يعني شنوو احنه حتبقى هنا زين بعد ماشوف فرح ودانيال وخالة ماشوفهه ؟ بابا قبره مازوره ..

رد عليها احمد خالتي راح اجيبها هنانه يمنه هاي امنا مو بس خالتنا ربتنه وتعبت علينا ونشيلها بعيونه طول العمر

كتله شلونها هيه مرتاحة بيت خالو ؟

رد اي الحمد لله دوم اسال عليها

انين سالتني يعني شنو انتي ماشفتيها ؟؟

هزيت راسي لا اصلا هم اخذونا لغير محافظة مو لبغداد هو الشيخ ديحاول بكل قوة يبعد فرح عن اهله

رد احمد بتنهيدة وعنه احنه همين مو بس اهله اعرفه كلش زين مادري هذا نوع من عقاب لو حرص وخوف خاف نكرر تجربة الهروب .

هزيت راسي بعدم معرفة والله ما ادري شنو غايته

انين كالت لعد ومدرستي احمد ؟

كال انقلج السنة الجاية هنا

كالت بغصة بس اني اريد ارجع لمدرستي

كال انسي انو وفكري بذيج السالفة همين
هي دنكت وهزت راسها بمعنى لا

كلتلهم شنوو يا سالفة بعد
كال احمد : عمر خطبها واني اشوفهه خوش قسمة احسن من عدجن ..

باوعت لأنين وكلت هيه شنوو رأيها ؟

باوعتله وعلى عيونها نظرات توسل وتفرك بأصابعها
طالت نظراتي الها ظلت تهز راسها برفض

باوعت لأحمد هذا هو أحمد لتجبرها خطية وبعدين ترة هيه صغيرة مو مال زواج خلي تكمل دراستها احسن هاي فرح تزوجت شنو استفادت!!

رفع ايده بملل وكال فرح قسمتها سودة مصخمة من ارتبطت بهاي العائلة عائلة المتعجرفين بينما عمر شاب بسيط وبنفس الوقت سبع وزلمة وشاغول ووعدني تكمل دراستها واول شي فترة خطوبة تتعرف عليه وبعدين العرس الله كريم

كامت انين على حيلها كالت بقهر
موج انت تعبانة جاية من طريق طويل كومي ارتاحي اصبلج كيك وجاي خاف جوعانة؟

رديت عليها صح مشتاقة للكيك الطيب الي تسوينه بس والله مااشتهي اكلنا بالطريق نزلنا بمطعم خلي ارتاح انام شويه وبعدين ...

هزت راسها سألتها عن تليفوني انطته الي
كالت يومية اشحنه ومداريته الج ههه

تذكرت شرار يشمر عليه تليفونه يكولي اخذي خلي يرضع عود خلي يشحن ...

ابتسمت الها حبيبتي حضنتها وبستها على راسها
داوخرها مني هيه تمسكت بيه وظلت تبجي

سألتها واني حاضنتها شبيج ؟
كالت عبالي مراح اشوفج مرة ثانية

وخرتها وابتسمت الها مسحت دموعها لا عمري الله لا يفرقنا

كالت ان شاءالله تكتمل لمتنه ويه فرح وخالة
همست ان شاءالله ومشتاقة لبابا همين بلله فرح وخالة اشوفهم ومصير الحي يتلاكى بس بابا ..

غمضت عيوني واحس كلامها هز كل دواخلي ونفخ برماد الالم والحزن ، واني هم حيل مشتاقتله .... فراكه الم بروحي ماينتهي

كتلها ببتسامة واني امسح دمعة الم وكعت على خدي
نروح نزور قبره ان شاءالله بعد شنسوي الله يجمعنا وياه بالجنة

كام احمد واجه يمنه كال صدك شنو موضوع الحجاب

ابتسمت ها اي تحجبت

كال احد ضغط عليج ؟

جاوبته لا ... اني مقتنعة ..

ابتسم كال والله تخبلين طالعة كلش حلو عليج ..

ضحكت صدك والله الحمدلله ..

رحت اخذت تليفوني وظليت اكلب بي وافكر بشرار ، فكرت اخابر عليه بس ترددت ..

رحت طليت من البالكون مشفت سيارته جوه العمارة
نمت للعصر وكعدت وبقيت انتظره للمغرب وهو ماكو وولا أجه .. معقولة استسلم!!!!

ريلام ..

هيام كالت لماما على كل شي صار بيني وبين مهيب
ودزتها ماما

وكفت مقابيل الباب وكالت الي ماما تريدج جوة روحي شوفي شتريد منج وكالت اذا متنزلين تصعد الج

وكفت كتلها شنو كلتي لماما ولج ؟ انتي ليش تحاربيني ؟؟ شكد حقيرة لج اختج اني اختج مو عدوتج

كالت شنو نسيتي سوالفج وياي؟ لمن توكفين ويه فرح وتصيرين ضدي لمن انطيتي المكص لشرار وكص شعري لخاطر موج وبعد وبعد تردين اعددلج؟

كتلها بحزن انتي شكد حاقدة وحقيرة

راحت كعدت ع السرير وخلت رجل على رجل
وتأشر بيدها روحي روحي لماما لاتظلين هنانه خاتلة روحي واجهي مصيبتج صيري شجاعة ااول وتالي حتشوفج ماما وتطيح حظج .. هههههاي

هزيت راسي واباوعلها بقهر وحقد اي والله اول وتالي
رب ضارةٍ نافعة بلكي احاجي ماما وتتفهم الموضوع واني لازم اواجه هذا الموضوع الي مأرقني ومتعبني

كالت باستهزاء هه فرحي روحج بهذا الكلام روحي شووفي ماما شنو محضرتلج .من سبراااايز .

خزرتها وفتحت الباب وطلعت طبكته وراي حييل ونار تمشي بعروكي موو دم ..

خوف وقلق وخايفة من الكلام الي راح اسمعه من ماما خاف هم تكولي اخوج ومحرمج ومن هالكلام وشلون راح اقنعها ..

دخلت للمطبخ جانت بيبي يمها كاعدة بالكاع رحت كعدت يم بيبي ، التافت عليه ماما وباوعتلي بخزرة ..

وكالت لبيبي عمة عوفي اني اكشر البتيتة روحي انتي ارتاحي ظهرج مابيج ..

كالت الها بيبي لا خليني احرك روحي شويه يمه ..
هيه دنكت واخذت البتيتة من بيبي وكالت لا خلي ريلام تكشرها اخذتها وظليت اكشر بيها وبعد شويه اجرح ايدي بسبب التوتر ..

ماما قنعتها واخذتها وطلعت من المطبخ ورة دقايق رجعت واني جنت واكفة اغسل ايدي ع السنك
باوعتلي وسدت الباب ورجعت وكفت كبالي وخزرتني
بلعت ريك من الخوف ..

كالت الي سمعته من هيام صحيح ؟
هنا اني قويت نفسي لحتى اواجهه ولازم اكون قوية وادافع عن حبي

فرح ...

ما دا اكدر اتأقلم بهذا المكان أبد ، ملل وروتين مو طبيعي ..

وأهلي ما اعرف عنهم شي مرت هوايه ايام من لمن طلعت موج من البستان هذا وماعرف عنها اي شي ..

والجهال خبلوني بس يتعاركووون ، وعلي هذا الاسبوع ما اجه ، عود يوم الجمعة يجي ، واليوم أحد وما إجه ..

رحت للخرسة كتلها انطيني التليفون خلي اخابر الشيخ علي الدر عندي حجي ضروري وياه ..

كلت بلكي تنطيني الفون واكدر اتواصل ويه اخواتي ..

بس هيه بقت تباوعلي صافنة بوجهي ومنزلة حاجبها متفهم عليه ، ظليت اشر الها بحركات عشوائية واخلي ايدي على إذني

هيه اشرتلي برفض وملامحها محتدة عود متقبل تنطيني الفون ..

زمجرت بغضب وضربت رجلي على الكاع عدة مرات وحجيت بصوووت عالي والله اسوي روحي مريضة واقلقه عليه والله

لزمت بطني وانحنيت ليكدام واسوي نفسي عود
دا أتألم ..

بس بعدين تراجعت وعدلت روحي وكفت باستقامة وايدي على بطني وكلت لا خاف يحسن دا امثل عليهن خلي يمر وقت واسوي نفسي مريضة

هنه ظلن وحدة تباوع للثانية مدري شبيهن واني طلعت من المطبخ ....

دانيال يباوع تلفزيون وفطومة تلعب بالمكعبات ..
رحت اني كعدت على الكاع وانتظر يمر وقت واسوي تمثيليتي ، واله اقلقك عليه واجيبك من بغداد لهنايه بسيطة ..

شكد جاحد ومتعجرف ولا يفك كافي والله تعبت احسه حياتي عبارة عن سجن كبير .. وهو سجاني المتسلط القاسي

زين ليش حارمني من اهلي حتى تليفون ميخليني احاجيهم والله طكت روحي هسه هم شمسووين!!!

مدري اشرد مرة ثانية بس وين اروح ووين اولي!!!

وحدي لو موج ويايه! انوب هالطفلة مسؤؤليتي ما اكدر اتركهه هنا ولا اكدر اخذها ويايه

مرت الساعات وصار العصر ، ظليت اسوي نفسي متألمة كدامهن حتى ينطني التليفون اخابره

ظلن يباوعلي بنظرات عدم رضى وحدة تباوع للثانية
اخر شي جابن التليفون اخذته شفت مكالمة مفتوحة ويه علي

خليت التليفون على إذني وكتله شنو انته نسيتني هنانه ترة مريضة اني مريضة محتاجة مستشفى شبيك ماتحس

كال ولج شنوو هالصوت العالي اكو مريضة هيج تصيح

صيحت اكثر شبيييك شبيييك رااااح اموت تعال طلعني منا لااا ترة والله ذنبي بركبتك والله ..

كال بعصبية اي مووتي للجير ولجهنم ان شاءالله .... وغلق المكالمة

توة دااكلب بالدكم وانخمط مني الفون اخذته وراحت
ظليت اصيح بوجهه جيبي التليفوون جيبييي

هيه راحت تركض طلعت من البيت مدري وين تروح تضمه

ظليت ادردم عليها ، وعلى علي والله لصبري نهاية ومستحيل اتحمل الكعدة هنانه شنو اقامة جبرية لو سجن هو!!!!! لو منفى ...

لا والله مو بكيفه هيج يعاملني شنوو اني ابتليت على عمري صرت مرته امداها من قسمة انوب ولا يهتم اكوله مريضة راح اموت يكولي لجهنم شكد خبيث

اي والله استاهل من ايدي مو خلصت منهم لمن مات المحروك بكبره شرجعني عليهم وتزوجت اخوه!!!

هذا المايعرف تدابيره حنطته تاكل شعيره .. وهاي اني هيج .. امداني امدااااني

رحت افتر بالبستان واباوع اذا اكو مكان اكدر اطلع منه بس ماكو السياج بلوك وعالي واكو سيارتين بالباب مال حراس ومستحيل اكدر اطلع من الباب مراح يخلوني
بالاضافة الى هذا الكاميرات داير مداير المزرعة ...

رجعت للبيت تمددت شويه ولا بيه اشتغل ولا بيه انظف من القهر والتعب حتى فطومة مامشطت شعفتها

والله مابيه ومنا هيه بس الزم شعرها تبجي ، بالموت يله امشط الها بقيتها هيج ، مقهورة وتعبانة

غفيت شويه يمهم بالغرفة وكعدت على صوتهم
يتعاركون دانيال وفاطمة كعدت منعسة كوه افتهمت عركتهم ع الالعاب ياخذهم منها وهيه تبجي

اخذتها سكتتها ورحت بيها للمطبخ صعدتها على الكاونتر ...

احجي وياها واسولف .. كتلها شنوو رأيج هسه نسوي معجنات اني وياج

هيه بس تباوع وتضحك وتدردم بلكنتها الطفولية الي مافهم شتكول ..

طلعت طحين وبلشت نسوي اني وياهه نعجنه حتى نسوي مني بيتزا يحبوهه همه

اني خلال فترة بقائي هنانه تعلمت هوايه معجنات من التلفزيون اتابع قناة طبخ واكتب احتياجاتي بورقة وهم يجيبوها اليه ..

كملت العجينة وغطيتها وداسوي بالحشوة مالتها ، وفطومة اديها كولها عجين وتفتر بالمطبخ وتزعبل تطلع الاغراض من الجرارات وتسطرهن ع الكاع وتلعب بيهم

واني كل شويه اطل على دانيال يلعب بالغرفة ويمه جبس والتلفزيون مفتوح ، هم زين ما حط روحه ويانه وهم عيني على فطومة

سمعنا صوت هورن مال سيارة والوقت جان المغرب
طلعت فطومة تركض هيه بس تسمع صوت هورن تطلع

اني تفاجئت معقوولة اجه ؟ فزيت من صفنتي وطلعت
اركض وراها

شفتها راحت اله تركض وهو جاي باتجاه البيت
تريد تلزمه من ملابسه الي ترفرف وتلمع من النظافة وريحة العطر الفايحة ، هيه اديها كلها عجين واصل لكفشتها

باوعلي بنظرة عدم رضى واني واكفة بالباب مال الاستقبال ...

كنبص ولزمها من معاصم اديها حتى لا تلزمه وتتلفه وهو يتخبل من هيج شي ، يتخبل من طفل وصخ يلزمه

بقى لازمها ويبوس بيها ويحجي وياها
بابا ليش حافية هسه رجليج تتعور لا تطلعين هيج بعد .... يحجي وياهه لازم اديها بيد والايد الثانية يعدل بكفشتها .. ويبعد شعرها من ع وجهه

ياااااا بس لا عباله اني هاملتها وبس من يجي اعدلها وارتبها ، بس اني والله مو هيج يومية ارتبها بس اليوم طاكة روووح روحي هرمونات الحمل ماتتركني بحالي

رحت اخذتها وشلتها واباوعله هو يباوعلي مقلص عيونه
كال مو كلتي مريضة اشوو مابيج شي هسه ؟

درت وجهي وكلت ببلاهة هااااا مو الالم يروح ويرجع

باوعتله هز راسه كال يله روحي نومي الجهال وامشي اخذج للدكتورة

رفعت فطومة على خصري كتله يادكتورة هسه صار الليل

كال بحدية ونتر اخذج للمستشفى للطوارئ يله فضيها عاد

وشينيمهم الجهال هسه ؟؟؟

كال استغفر الله .....فرح ربع ساعة تنومين الجهال وتبدلين وتحضرين نفسج واخذج للمستشفى يله

مابيه شي صرت زييينة ارجع منين مااجيت ماريد منك شي اني ...

كال اسمي بنبرة تحذيرية ، وكال انتظرج بالملحق خوووش بدلي وتعاي ودار وجهه وراح

طبيت جوه غسلت لفطومة وعيوني الدمع ظل يهل على خدودي فوكاهه هو ابو الراهي والله طكت روحي احس كلبي يريد ينفجر من القهر اني شون متحملة ما ادري

رحت سويت لفطومة ممة واخذتها ع الغرفة ، شفت دانيال حبيبي نايم اخذته وديته لفراشه ، وفطومة بيدها الممة وتشرب واني رحت بدلت ملابسي ولبست عبايتي باوعت لفطم نايمة ، غطيتها ورحتله للملحق

خلي بلكي الدكتورة تكول مابيج شي كدامه حتى اخلي يعصب ويتنرفز ويضوج واضحك عليه مدام يأذيني كلت هالكلام بس مادري هو لوتي وراح يمرضني غصبا عليه ..

دكيت الباب ودخلت شفته كاعد على كرسي بصف الشباك .. ويخابر
يعتذر من شخص ويكوله طلعت خارج بغداد عندي شغلة باجر يمكم ان شاءالله واجيكم احلها مايصير خاطركم اله طيب ...

اني بقيت واكفة يم باب الغرفة ، هو خلص مكالمته
واجه يمي ، يباوعلي بنظرات مكر وابتسامة خبيثة ..

مد ايده طبك الباب ورايه وقفلها ، استغربت وفتحت عيوني على أوسعها .. متفاجأة ..

سحب عبايتي مني وشمرها ع الكع واني اباوعله متعجبة كتله شكووو شبيييك!!! مو ع اساس توديني للمستشفى

كال بنبرة مخدرة بعد مابلع ريك
_ مريضة مووو ؟

تلكئت كتله ااءءاي مو ع اساس توديني للطبيبة ليش نزعتني العباية ..

كال تعاي انه اليوم طبيبج ...

فتح الشال مالتي بسرعة واني ولا اتوب الف شال شون مجان ..

خليت ايدي على صدري مدري ليش احسه غريب عليه واستحيت منه ..

باوعلي كال ترة انه يا حبيبة اعرف سواليف النسوان هاي ماتعبر عليه .. وادري بيج مو مريضة

كتله شمدريك ؟

كال رافع تك حاجبه ومركز بنظره عليه
_ ها يعني تعترفين انتِ مو مريضة موو ؟

حاولت اغير الموضوع لان انكشفت كتله
اقصد شمدريك بسوالف النسوان لازم خبرة بيهن ...

كال غير منج تعلمت انتي عن عشيرة كاملة مال نسوان ... وتنطين دروس مجانية ..

_ لا والله انته خبرة مبين عليك وعرفتك خبرة والظاهر حياتك كلها نسوان ...

_ وانتي شون تعرفين الخبرة من المو خبرة بالله ؟؟؟

اريد اجاوبه بس تسارعت انفاسي لمن تفاجئت بي يحظن خصري بقوة باثنين اديه ، ويبوس بركبتي بانفاس محمومة ...

جاهدت لحتى اقاومه ، ارتخت اديه شويه ، وظل يباوعلي اريد احجي ويا واكوله مجان هيج قصدي ولا هذا الي اريده .. هو فاهمني غلط

توه فتحت حلكي دااحجي ، فاجئني بقبلته الملتهبة الي رجعتني بالزمن ليورا ولأشهر بالتحديد .. وذابت مقاومتي بسبب رغبته المجنونة .. الي حاوطني بيها وسيطر عليه

عانيت جواه !! جان عنيف ، بترجمة شوقه وحبه .. صوت ريكه لمن يبتلعه وعبالك يريد يختنك بي خلاني انتفض مفزوعة ...

ضغط اديه عليه لمن يضمني اله وجعني ويخليني اتلوى ، بشرتي الي كاد يدممها بقبلاته ويحرقها بأنفاسه ...

خلاني بالاخير استكين بحظنه مثل الذبيحة .. تعب والم ورغبة بالخلاص ..

ماعرف اذا جان مشتاقلي ومو كادر يروي ويقاوم شوقه مني لو يريد ينتقم مني على تصرفاتي وخاصة اليوم لمن تظاهرت بالمرض ...

وجبته مناك لهنا والظاهر هو جان كلش مشغووول مبين من اتصالاته وتليفونه الي ماسكت ..

بس هو شون عرف اني مو مريضة معقولة النسوان هذن مو خرسات ؟ وسمعن كلامي بالمطبخ لمن حجيت وصلنه إله!!! حيرة!!!

لمن كام مني خله شفافه على جبيني ومحتضني بقووة لصدره ، ظل هيج دقايق حتى نعست واجيت انام ..

رررن موبايله فززني وهو كام واني لفيت روحي بجرجف وارجف الملحق هذا شويه بارد وهمينه ع الكاع ماكو سرير تأذيت كلش ..

وكرهته لان حسيت نفسي بيده مثل اللعابة ..

كتله بنبرة متوجعة ... : اخخخ علي ترة والله أذيتني ... شنو هالقسوة هاي ؟؟ انته تحبني تنتقم مني ؟ لو شنو بالضبط !!

كام من يمي ورأساً توجه لتليفونه ورجع باوعلي
مبتسم كال مو هستوة جنه حلوين ؟ اله تخربين اللحظة بلسانج الي يرادله كص هذا
وبعدين مو هذا الي ترديه ؟

كتله بنتر وعصبية لاااء غلطان موو هذا .. انت قاسي علي وبقسوتك هاي دتخليني اكرهك وبعد حتى ماباوع بوجهك

خزرني : يااقسوة هاي التحجين عنها ؟؟ ولج انه اكتل نفسي كل دقيقة حتى لا اذيج لان الي سويتي تستحقين االقتل عليه ..

اني عصبت حيل كتله باع علي ترة اني مخنووووكة هنا دتحس بيه لوو لا؟؟ و اذا اتهور واتخبل واسوي شغلات انته لا تجي تلومني وتعاقبني ترة اني طكت روحي هنانه ولا اهلي الي احاجيهم ولا اشوفهم ماتكلي شنوو هالحكم هذا ؟ تحرمني من اهلي ليش بس كولي

رفع نظره عليه كال اهلج الي يردون يهربوج ويخطفون بنتي وابن اخوي مو ؟؟ انسيهم خوش

كمت لفيت جسمي المرتعد بالجرجف ورحت عليه بهمة والهث كتله شنوو انساهم علي تحجي صدك انته اني هم اكوولك انسى اهلك لمن اذوني وطردوني ؟ وانوب شامرني بأخر الدنيا الله ماتخافه انته ؟

لزمني من كتفي بقسوووة كلمة وحدة منج وبعدها ماراح تلحكين تكولين الكلمة الوراها لسانج اكصه والله .. كااافي

جاوبته بانفعال وجسمي كله يرجف
_ هو هذا الي الله قدرك عليه موو ؟؟ دومك تسكتني تمحي وجودي بس يبقى الغلط مني المفروض ما أعيش بأنتظار ، أحد انـي اللي مايحط إعتبار لوجودي
ما أشوف غيابـه خسارة

باوعلي بنظرات عصبية وشراسة عود يريدني اسكت ..
وكال جااا شعندج جايبتني مناك لهناك ومسوية روحج مريضة هااا حيالة ؟

اني مسجل وانفتح وبعد مايسكت
_ والله علي والله اشوف نهايتنا قريبة إني أكثر إنسانة ممكن تشوفها بحياتك تسامح وتنطي فرص
بس بنفس الوقت أنت مراح تكدر تخمن اي فرصة منهم حتكون الأخيرة

واوعدك وعد راح تتمنى وكفتي هاي كبالك بيوم من الايام بس مراح تلكاني ... تحرم عليك حتى شووفتي ..

كال بأمر : خلصتي حجيج ؟؟ لبسي هدومج وروحي يم الجهال يله .. اذا تبقين تلغين اسكتج بطريقتي شون طيبتج قبل شوي ؟ بشرفج ماطبتي ؟؟؟

زفرت بضيييق ... وتجاهلته ماريد اكرر التجربة من صدك بدت عندي آلام بكل مكان بجسمي ..

فجأة اجاني ألم كوولش قووي ببطني ، عضيت شفتي حييل باوعت عليه لازم موبايله وعيونه بي وملتهي

بلعت ريك اريد اتحمل الالم وارجع للبيت وماريد شفقته حتى لووو اموت من الوجع ..

رحت دااخذ ملابسي حتى اللبسهم واطلع بس بعد ماكدرت اتحمل وحسيت بين رجليه رطوبة ، عبالي شي طبيعي

بس لمن دنجت شفت الدم وصل لرجليه عطت متألمة ومصدومة وكعدت على الكاع ومددت رجليه وابجي بنحيب وصدمة ..

اجاني صووته هااا ماخلصت تمثيليتج!!! كتلج كاااافي ...

مجاوبته بس بقيت احاول اللبس ملابسي وبس اشهك

هو ترك الفون واجه عليه بهمة ولهفة ...
....... يحاجيني بخووف وقلق
فرح فرحه فرحتي شبيييج جاي تجذبين لوو صدك هالمرة .. ؟؟

اني مجاوبته بس ابجي شويه وعاااط شنوووو هذا الدم ؟؟؟؟

كام يساعدني اللبس ملابسي ويمسح رجليه واخر شي لفلفني بالبطانية وطلعني من الملحق ووداني للبيت الجبير شمر البطانية بالصالة واخذني للحمام ..

كعدت على السيراميك بارد حيل وحظنت رجليه لصدري ....

هو نزعني ملابسي وفتح المي عليه وظل يسبح بيه واني يوكع عليه المي وادردم عليه
كنبص يمي باوعتله المي بلل شعره ووجهه يطالعني بعيونه الواسعة السودة ، الصارمة والقاسية

مد ايده سد حلكي بيده كال هذا حلكج مايبطل كافي كافي بعدج عمرج بالعشرين وهلكد تلغين لو صرتي عجوز شلوون الله لا يراوينياج من تعجزين .... الله لايكتبلي عمر ....

كلها من ايدج فاولتي على روحج مريضة ومريضة وهسه صدك تمرضتي

اي اي من وراك تمرضت والله انت اذيتني ترة بس ماتحس ..
كال اي انه الشيطان وانتي ملاك ونازلة من السمه مووو ...ولج اصلا انتي ماصدكتي
وغمزلي ..

برطمت شفايفي وصحت اكررررهك دتأذيييني اكررررهك ..

اخذني لصدره العاري المبلل وخلى حنجه على راسي
ويضغط عليه ومي الدوش يوكع علينا بي حرورة...

وهو ظل يهمس بعصبية
ولج ثقي اي الم اسببه الج يصيبني انه اضعافه ...

انتفضت واني بصدره وانت مصر مصر تأذيني لحد هاي اللحظة حابسني وخانكني .... تتلاعب باعصابي وتحطمني

رجع اخذني اله حضني من وره ويهمس اشششش يله حتى اوديج للمستشفى ولج كافي شسويتي بروحج !
اهدي ماتلوكلج الحدة والعصبية انتي ارق من هيج

رديت بنبرة رفض طفولية واني ابعده اديه عني
ما ..... ما ..... ماروح يطبني طوووب شمايصير بيه خلي يصير ماروح للمستشفى ...

هو اخذ شفايفي بيده وطبكهم باصبعه السبابة والابهام ويهمس بأذني .... لاء ترحين مو بكيفج مو بس علمودج علمود بنيتي الي ابطنج ..

ورجعني على صدره ، غصيت بحسرتي ، هالوضع يذكرني بحمامي الي هناك بالقصر ، اشتاقيت حتى للبانيو الي سوا الي هو هنا حيل ضووجة احس نفسي ماانتمي لهالمكان ابد

همست بصوت بي ببحة وتوسل
_ علي اريد ارجع لغرفتي هناك عفية ..

كال بحنية هنا احسلج حبيبتي ....

اتسعت عيوني يتخيلي كال حبيبتي!!! لو متوهمة لو هو صح كالها بس ليش مدا استوعبها اني!!

سويت نفسي ماسمعته ولا اثرت بيه كلمته عكس الي صار بداخلي ... وازدادت الالام ببطني .

بسرعة سد المي و نشفني ولفلفني وطلعني من الحمام ، النسوان جانن اثنينهن ماكو ، هن من يشوفونه نفوت للبيت يطبن بالغرفة الثانية ويسدن الباب ..

طلعني للغرفة وهو لازمني من ايدي وتوجه بيه للسرير وكعدت عليه ، باوعت للجهال نايمين بعدهم ، ناموا المغرب على وكت اكيد حيكعدون نص الليل

هو طلع من الغرفة واني تمددت على السرير اني والبرنص ودخلت بالبطانية تغطيت ولازمة بطني الوجع كتلني

هو شويه وفات بيده موبايله ويخابر سمعته بالصالة والظاهر جان يحجي ويه واحد من ولده والاكثر جان يحجي ويه لهيب ..

****

احبك ايها المتوحش ، فأنت متوحش وحبك مثلك ..
تلتهمني ، تسقمني ، تحيطني بغمامة من الهذيان ، تقتلني لأقع شهيدةً في هواك .... ثم تستعيدني من جديد لابقى عالقة بين آهات الموت والحياة ... وييقى حبك بطعم الموت ولأبقى انا اجاهد خلال معركة النفس الاخير معك ولا أعلم متى تنتهي ..

****

لهيب ..

هذا واحد جاري نهار وليل كله سكران واني صراحة اخاف على عائلتي منه .. لان اطلع للشغل ويبقون وحدهم ..

رحت كلت لصاحب العمارة عليه يابه ترة هذا يشرب ويجيب نسوان مو حلوة بحقنا احنه الي ساكنين بالعمارة ..

والظاهر هو راح كايله واجه هذا عليه هداد بوقت اني مو هنا .. رحت تعاركت ويا بشقته ضربني وضربته كسرت سنه ..

وراها اجوني زلم معكله وكالولي حضر عمامك انته معتدي على ابن عمنا ومكسر سنونه وهاي عليها فصل
وهمينه طاعن بشرفه واخلاقه وتكول عليه يشرب ويجيب ساقطات للشقة ..

بقيت محتار خابرت على مهيب يحاجي ابويه بالموضوع لعد وين اروح والمن الجئ غيره

خابرني مهيب يردلي الخبر كالي ابوي يكول حلها لوحدك صير زلمة لا تصير مطي ..

عطت بي لك شنوو هالحجي احلها لوحدي شنوو غير هو ابوي وشيخ عشيرة هو يحضر وياي بالكعدة

كال والله مادري مايقبل يوكفلك شسويله ....

دروووح اصلا كله منك ورطتني بهاي الشقة

هسه اني صرت الي ورطتك لو انته مطي وماتعرف تتصرف ولك لمن جبتك الها مكلت هالحجي اصلا متت عليها وعجبتك صدك لو كال ابو المثل

اي شكال

مدري غلس ...

سديت التليفون بوجه مهيب وخابرت ابوي ..
سلمت عليه وبعدها كتله
_ شنو الحجي هذا الي سمعته من مهيب يابه

كال يا حجي ولك ادخل بالموضوع ترة مافارغلك

اي دومك مافارغلي ومخليني بالاخير ادري يابه اني بالعشيرة وياكم لو هم طلعتني مثل ماطلعتني من لقصر

ولك انته هم الك عين وتحجي ؟؟

اي بس يابه اني ابنك والدم ميصير مي ولا الظفر يطلع من اللحم واني بشدة ولازم تساعدني وتوكف وياي ..

كال ولك بلا لغوة زايدة وروح انتَ حلها ما اشفعلك مصايبك من قبل
وبعدين تعال جاي انت شدخلك بي سكير يجيب كح*** قابل جاي تسكر وياه لو جاي تنام ويه كح*ه

تنهدت بضيق وكتله : شكرا يابه شكرا ما قصرت ضل حل مشاكل الوادم وخلي وولدك بضيم ...

جاوب : و ولدي شبيهم غمان ما يعرفون يحلون مشاكلهم فرضا متت هم تجوني للكبور تطلبون حل

جاوبته : اسم الله عليك يابه عمرك طويل
بس اني ابن شريجة امي ؟ اموت واعرف ليش تكرهني
وتفضل الكل عليه

رد : سوالف المايعات لا تمشيهن براسي وبالله اريد اشوف روحي شمخلف تحلها لو لا اذا حليتها اكول خلفت زلمه يله شوفني سباعيتك وشطارتك وخلي نشوف من دزيتك لروسيا شتعلمت ؟؟؟

يتبع ....

خاطرة احبك ايها المتوحش بقلمي 🙊

وهذا التصميم الحلو بأنامل smsma89

وطلب متابعة لرواية الكاتبة فاطمة رعد بلا زحمة
وهذا حسابها FatimeRaad

وكل الي يخص كروب الفيس كروب فراشات وورود ومنشورات القصة راح تلكونه بحساب شيمو الوردة .. للي ماعدهم فيس وحابين يتابعون المنشورات والتحليلات على القصة shimoshimo1998

باجر ان شاءالله اكو بارت 🙊بس خاف تملون ومتتفاعلون 🙂