رواية هذيانٌ بين جمرٍ وجليد ..(ارملة اخي المجنونة) الفصل الحادي وثلاثون 31 - بقلم نورا ناصر

السلام عليكم
رواية هذيان بين جمر وجليد
الفصل خمسة وعشرين
نورا ناصر ..

**********

ماذا حصل وماذا ؟
ها انت من كنت سجاني
اصبحت لا اعرفك من شدة حنانك ما الذي جعلك تستسلم لي بكل قواك وتفتح اغلالي هل هو عشق ام هذياني
لقد كنت معك بعالم فارغ من كل الاجناس
اسمع صوتك فقط ارى ضلك واحتمي بضهرك واسكن بين اضلااعك وفؤادك
نبضات قلبي تتواطىء وعقلي يصبح مشتت بك
هل اصبحت سندي ومعشوقي؟
لم افكر فيك يوما !
اعترف انني مجنونه وجنوني قادني الى احضانك
لاحتمي بك من وحوش جردتني وانهشتني وحطمت امالي كنت مسيرا وراء هذياني
لكن ذهب جنوني وتعبي وأهاتي وألمي
عندما اخذتني بين احضانك ولاامست يدك جبيني
وانفاسك لاافحت انفاسي وشفتك طبعت قبله ساخنه
على شفتي كانما تيار كهربائي استحل اعضائي
كل شي اصبح ملكك يا سجاني ...........
بقلم الكاتبة haneenali422

******

فززني عمي بصوته المتذمر ها شو صفنتي ؟ ان شاءالله ماتردين ترحين ، سمعي زين هداوي لاتفشلينه وياهم عيب منهم شيكلولج كليلهم حاضر!

رمشت بعيوني بيأس جاوبته هو ما كلك رجع لهيب لو لا ؟

ظل يفر بيده باستهزاء : هاك استلم مرة ماتدري برجلها رجع لولا ولج عمي انت ماتخابرين رجلج ماتسألين عنه مايسالج عليج ؟

دنكت بحزن وهزيت راسي واحس بجفاف بحلكي
جاوبته : لا عمو مو نسيت تليفوني ببيتهم وابويه تليفونه عاطل بعد شون اتواصل وياهم .

سأل : مرة ابوج ماعدهه تليفون ؟

هزيت راسي واعصر بأصابعي
_ أي أي عدهه عمو بس اني راح من بالي .

_ والله يابت اخوي انتي مدري شلونج ..
طلع تليفونه وظل يدوس بالدكم ..
وكال هاج خابرت على الشيخ احجي ويه عمج وخليني اروح اشوف ابوج .

اخذت التليفون منه وخليته على إذني وهو فات للغرفة يم ابوي ..

اجاني صوت عمو الشيخ وهو يكول الوو .
بلعمت وجاوبته بخجل وهدوء : هلو عمو شلونك شلون صحتك اني هدى .

جاوب : هلا بنيتي هداوي شلونج ولو زعلان منج هيج تسوين بينه بنتي ؟ تطلعين ويه اهلج بدون ما تتركين خبر ماكلتي اكو ناس وراي شون اطلع هيج !

العفو عمو اعذرني صارت بسرعة بسرعة بس والله اني كتله للهيب وهو كال روحي .

رد : اي بلغني هو بعد ما رحت لبيت اهلج وشفتهم ماكو وكالو شايلين ، اتصل على ابوج ماكو وبعدين الحمدلله من حصلت رقم عمج ، بس يابنتي جان المفروض تكليلي انه همين مو انه وديتج شون تسوين بيه هيج ؟ تخليني قلق عليج انه مسؤؤل عنج وبحسبة ابوج.

جاوبت برجاء : اعتذر منك عمو والله اسفة .. بس كتلك الشغلة بسرعة صارت واني تليفوني ظل ببيتكم وابوي تعبان حيل ولهيب مسافر كلت ابقى يمه اني وحيدته واداري .

رد : لا تبررين بنتي ميحتاج هالمرة تكررت مرة الثانية لاتعيديها وانه اخذت عنوانكم ان شاءالله هالاسبوع انه يمكم تردين ترجعين وياي هلا بيج تردين تبقين براحتج .

سألته بقلق وتردد : عمو هو لهيب رجع لو بعده ؟

كال لا بنيتي بعده مارجع عنده محاضرات تخص الماجستير هناك وان شاءالله يرجع عن قريب يعني فد كم شهر.

تنفست بارتياح جاوبته : لعد اني ابقى يم ابويه الى ان يرجع لهيب ميخالف ؟

جاوب : اي ميخالف براحتج واذا تردين انه اروح اجر من ذانه واجيبه لحد عندج تدللين .

ضحكت بقلق : لا عمو خلي يدرس خطية مستقبله هذا
واني كلش اسفة علي سويته .

لا تعتذرين بويه هذا هو خلص الاسبوع الجاي احنه يمج ان شاءالله .

ودعته ونهيت المكالمة واحس طالعة من جوه المي ع كد ماحبست انفاسي ، مديت ايدي البطني ، حسيت حركة بأحشائي وبطني دتكبر شويه شويه بس ضايعة واحسها عريضة واني جنت بس ملابس عريضة كلش تضيعها ، سألت نفسي لشوكت راح اضم هذا الشي ياربي وشوكت ينعرف!

رحت وديت لتليفون العمي شفته كاعد يم ابويه
كال ها عمي خلصتي ؟
هزيت راسي وكتله اي عمو وانطيته التليفون اخذه سلم على ابويه وطلع .

اجت مرة ابوي من السوك هيه وعلاوي
رحت تلكيتهم اخذت منها المسواك خليته بالمطبخ
واخذت علاوي غسلتله .

شلته وطلعته من الحمام ورحت بي للصالة
نزلته واني الهث وتعبانة ، كامت مرة ابوي تباوعلي من فوك ليجوة .

باوعتلها هزيت راسي بتساؤؤل
كالت اشو وضعج ماعاجبني وصايرة سمينة ولج هديه خاف انتي حامل!

ومدت ايدها تريد تلزم بطني .. وخرت بسرعة
كتلها مااعتقد حامل وبعدين ماعليج بيه انتي .

ظلت تفر بيدهه ونظراتها تكصني كص اخذت علاوي ورحت يم ابويه شفته صافن ، كعدت بصفه واني محتارة بوضعي شسوي!

تندمت مااعترفت للهيب من اول جان هسه مو هذا حالي ، شسوي يربي والطفل يكبر ببطني !

لالا يمكن جان انكتلت لهيب يكرهني وعباله اني مو زينة وجنت احب عمار ، عهود حشت راسه عليه .

كمت على حيلي مرعووبة عزااا بس لا ينكره ويكول موو ابني واني كايلتله مامتقربلي .

طلعت من غرفة ابوي ورحت للترك والطم على خدودي ..

فرح ...

مرت الايام طبيعية خلصت شغلي ونزلت جوة
سمعت صوت العرندس بغرفة المكتب ، اخذتني خطواتي إله .

جانت الباب مفتوحة ، وهو منطي ظهر للباب ويخابر ويحجي بالتليفون ، طبيت بخطوات هادئة بدون ما اسوي صوت .

سمعته كال اي انه ان شاءالله الاسبوع الجاي يمج
ديري بالج على نفسج بويه .

ختم المكالمة وبقى داير وجهه ع المكتب
سألته : هااا جنت تخابر منو ؟

التفت عليه متفاجئ مني ومعصب ، خفت من نظراته!
واستغربت شبي! وهاي منو الي يحجي وياهه ؟

كال وهو مخنزر عيونه : انت ماتبطلين سوالف المزعطة ! ماتعرفين تدكين الباب قبل لا تدخلين ؟

ابتسمت بسخرية : هو اني قبل جنت مو مرتك واجي وافوت بدون ما ادكه بعد هسه!

باوعلي باستنكار وعصبية تفاجئت شبي ..
كال بجفاف : شنو هذا فرح ؟ اعتراف بعدم الاحترام لو شنو ؟

_ يعني عادي اني وياك زوج وزوجة مابيننا هالرسميات .

و التفتت نصف التافتة وكتفت اديه
جاوبته شدعوة هيج معصب مني! هو سؤال سألتك لو ماتريد تجاوب عليه براحتك اصلا خاف انته هم مثل اخوك الخيانة تجري بدمكم عادي تعودت .

عاااط بكل قوة اوتاره الصوتية .فررررررح .
وطبك الباب حيييل .

جفلت اني وهو ثبت اطراف اصابعه على عكسي ودارني عليه بعصبية .

باوعتله بعصبية ومتعجبة!
لزمني من عكسي وقربني عليه صاك على اسنانه
لزمت ايده اريد يرخي قبضته توجعت حيييل! بس هو غركان بقسوته .
بصوت مصرور كال : على منو هالحجي؟ انتي شوكت تتعلمين الاحترام ؟ عقلج الفارغ هذا شوكت تملينه؟ ولج املي املي حتى لوتحطين طابوكة هم تفيد لا يبقى فارغ هيج!

اريد اوخر ايده مني ماكدر متوجعة حيل وخايفة نظراته اشوف الجحيم بيهم ، هو مادري شبي معصب .

كتله اذا اني عقلي فارغ ليش خبصت روحك وتزوجتني ؟ شنو الي جبرك بالله . وانت تعرفني كلش زين!

همس بفحيح : حتى اربيج من اول وجديد

بنبر اقرب للبكاء عطت : تركني علي اتررركني مامحتاجة تربيتك متربية متربية ، وبعدين اني مكلت شي ؟؟ بس انته مدري شبيك معصب مدري شبيها الخاتونة معصبتك وجاي تطلع حركتك بيه .

صك على اسنانه اكثر : انت تعرفين ويه منو جاي احجي حتى تمسلتين بكيفج ؟؟

هزيت راسي : لاااااللللاء ماعرف

نتر بيه : لعد ليييش تمسلتين بكيفج ها .

_ واضحة وضوح الشمس
زاد من قبضة ايده انتحبت : اااخ ايدي راح تكسرها عليي اخخخ ..

كال واكسر راااسج همين ؟ خبالاتج مووو عليه اكسر ايدج وراسج واطيح حظج والله ولج ويا من تلعبين انتي وياي ؟؟؟

عضيت شفتي ساكتة واباوعله بعصبية وعيوني مليانة دموع ...
تركني بعنف اجيت اوووكع ، لزمت بالحايط .
داطلع اجه سد عليه الطريق وكف كبالي .
باوعتله بانفعال ونترت : شكو بعد ماكملت رزالة!
وخر عني دااطلع يله .

باوعلي وعيونه تشع من الشرر
كال بثورة من العصبية : ولج كل هالكلام مادخل لعقلج مافهمتي شي وبعدج تتجاوزين وتنترين ؟ شون اسوي وياج ؟

واني بغمرة يأسي رديت
_ اذبحني بعد اذبحني واني مدا اتجاوز انته عصبي ومدري شبيك ويايه.

تقرب مني واني لزكت روحي بالباب المسدود
والخوف فتت خلايا جسمي ..
كال هالمرة راح اعديها الج بس والله مرة ثانية راح اشوفج منو انه من صدك! عرفي شلون تحجين وياي لا اندمج .

كتله بلا اهتمام ونتر واني ارجف واعصر باصابعي
اي يله هسه وخر.

حسيته ماراح يسيطر على اعصابه بعد شفت بعيونه نظرات شرسة ..
مد ايده وخنكني من بلعومي .
ثواني اختنكت ظليت اكح ووخر ايده .. وهو يدفعني
وخر وسوالي مجال فتحت الباب وصرت اركض .

تلكتني الحجية معصبة : شبيج ويا ولج احجي ليش مخليته يعصب هاا ؟

مجاوبتها ظليت بس اهز راسي باستنكار واني اصعد فوك يله سمحت لدموعي تنزل .
وين الغلط بالموضوع ليش عصب عليه ! اني مجرد سألته سؤال!

انوب قهرني اكوله ليش تزوجتني يكولي حتى اربيج يعني صدك يريد يسيطر عليه وتزوجني عمود ابن اخو وكل حميميته وياي ، هاي مجرد رغبة .

دخلت لغرفتي القديمة وميتة قهر ونبضات قلبي بثورة عنيفة ... القلق يأسر تفكيري .. اليوم احسه كوة لازم نفسه وماضربني مو بعيدة مرة ثانية يسويهه ويضربني والله .

ظليت حابسة نفسي طول اليوم بالغرفة القديمة مالتي
وجبت دانيال يمي ظل يلعب واني ميتة قهر احس عيوني راح تطلع من مكانها احس انخذلت وظليت افكر خاف صدك ديحجي ويه ختام خاف عدهم علاقة ! وهيه مختفية صار فترة ماتجي لهنا يمكن استاقلها وراح يروح الها اي والله مو بعيدة .
لعد شكو تزوجني ! واني الغبية بسرعة قبلت بي شفت بي سند وحزام ظهر وامان وحل لكل مشاكلي .

صار الظهر واني حابسة نفسي بالغرفة حتى دانيال ظل يبجي يريد يطلع من الغرفة عصبت عليه بجى ونام
تندمت وانقهرت عليه .

بقيت كاعدة بالغرفة ، مثنيه رجليه وحاضنتهم لصدري وضايجة طاكة روح روحي ، انفتحت الباب وفاتت
هيام تفر بيدها ابتلينا بيج احنه!! كومي يله يكولولج تعاي تغدي ..

كمت من السرير وتوجهت الها ، لزمت ملابسها من يم كتفها وداطلعها بره كتلها مناقصني غير انتي امشي ماريد اشوف وجهج هنا بعد .

دااطرد بيها اجه علي الدر وشافني ..
خزرني بنظرات شرسة كتله ماعندك غير هاي تدزها الي!

هي خلت كف على الثاني ووكفت ببراءة وتصنعت نبرة البكاء وكالت : خالو والله ماحاجيتها شي بس كتلها تعاي تغدي يصيحولج نترت بيه وتطرد .

كتلها بانفعال يمه يمه منج ام البهارات ماحجت شي هيه خطية بريييئة مسكييينة .

هو ظل يباوعلي بتكاسل وعيونه مقلصهن .
كتله اي اي خو انته ماتصدك بيه ولا مرة صدكتني!

كال هو يباوعلي : روحي بويه هيام نزلي جوة
هزت راسها وراحت كتلة الخباثة ..

وهو اجه يريد يدخل بس نظراته تاكل بيه اكل واحسها ملتهبة من الغضب ..
لزمت الباب اريد اسده فتحه بقووة ودفعني .
ودخل وسد الباب .

كال وهو خازرني شبييييج؟
نترت ليش تدزلي هيام ؟ ماتدري بيها تحبني وتموت عليه ؟
رد : وليش ادزلج هيام بالله بكيفج تخمنين !

انطيته ظهري وخليت ايدي بحلكي ياا شكد فشلة !!

اجه دارني عليه شسووين بهاي الغرفة !

جاوبت بانزعاج غرفتي هاي واذا معصب من شي لاتعصب عليه اني ..

كال بعد ما الج دخلة لهاي الغرفة تردين تزعلين مني زعلي بغرفتنا وكدامي خوش .

رديت بزعل : انت ماتملكني ولا حتى تحبني شعلييك وين مااروح اروح ..

رد بغموض وتعجرف : ماشي بنظرج هاي مااحبج ولا امتلكج بالمعنى الحقيقي للكلمة لكن عندي حق شرعي عليج وواجب عليج تطيعيني .

ولزمني من رسغي حيل وكال تعالي هناك اذا ماتفهمين على الكلام خليني اقنعج بطريقة افضل من الجدال .

دااسحب رسغي منه واحجي وياه تريد تضربني مووو والله اذا .

سد حلكي واخذني لغرفتنا دخلني بيها وسد الباب .
ظليت ابجي وخليت اديه على عيوني .
حسيته تقرب مني بطوله الفارع .
وكال باصرار وحزم وخري اديج وباوعيلي .

هزيت راسي برفض وبعدهم اديه على عيوني ..
لزمني من رسغي ووخرهم غصب وسحبني اله طخيت بصدره .

دنكت وابجي كال رفعي عيونج باوعيلي
هزيت راسي برفض وبعدني مدنكة .

كال تعاندين موووو ؟ دفعني على السرير
صار ظهري ع الدوشك وهو اعتلاني .
ثبت اديه بيد وحده على صدري وبيده اللخ رفع حنجي وصارت نظراتي مباشرة باتجاهه .

كال بصوت مصرور : جنتي تعرفين ويه منو جنت احجي ؟ قبل لا تتكهنين من كيفج ؟
مجاوبته بقيت اباوعله ودموعي تصب تمنيت دموعي تشفعلي من قساوته .. رمقني بنظرة مهددة واكثر شراسة .

عطت لاااء بس عوووفني لاااء ..

كال بنبرة جدية وبعدنه على هذا الحال
_ فرح من تشوفيني معصب لا تستفزيني ابتعدي عني قدر الامكان من اهدى يله تجين يمي ترة انه مرة جمر مرة جليد وانه هم بشر ترة وطاقة تحملي هم الهه حد .

حجيت بنبرة بكاء : واني شمدريني بيك شوكت تعصب وشوكت تهداأ ..

كال وهو يترك اديه : من عيوني تعرفين انه مو اعرفج من عيونج اذا حزينة اذا فرحانة انت همين صيري مثلج .

كام عني واني كعدت كتله انته جنت داير وجهك ماشفت عيونك .

كال شوفي انت اجيتي وجفتي غير تدكين الباب انتبه اباوع مو مسويتلي اقتحام سوات انتي ؟

اني مرتك ماله داعي ادك الباب مابيننا هالشي هاي اذا انته تريد علاقتنه رسمية .

ولج بويه هذا مكان شغلي ماطابة عليه لغرفة النوم طابة للمكتب مالتي .

اي افتهمت افتهمت عود مرة ثانية ادك الباب صار تدلل اوامر ثانية ؟

رفع تك حاجبة جنج ماعاجبتج الاوامر ام جاسم ؟

كمت ونفضت روحي وملابسي دشداشتي وصلت لركباتي وشعري انكسرت القراصة بي وظليت الفه
وحجيت بدلع والله اني مو اسمي ام جاسم هم مثل ماتحط عليه اوامر اني هم احط عليك ولا تنابزوا الالقاب ماسامع بيها لا تصيحلي ام جاسم .

سحبني من خصري ونظراته تحولت من الجمر للشغف والهيام ، ابتسمت خليت ايدي على صدره .
واباوعله ..
كال تدللين بس هالامر هذا ؟

هزيت راسي ورديت اي يعني بعد منا وجاي ماتكولي ام جاسم ؟

عض شفته يباوع لشفايفي ..
تحسر كال نشوف بالله نسبة تنفيذج لاوامري وبعديها ننفذ هذا الامر مالتج .

عوجت حلكي وايدي تداعب شعري ..
كتله اي صدك منو جنت تخابرها وراح تروح الها االاسبوع الجاي ؟

باوعلي بتهكم وسألني : تغارين ؟

تركته بميوعة ورحت على الميز وكفت اطلعلي قراصة
واحجي بدلع لا بس فضول .

ابتسم : اي صدكتج والله ...

باوعت لانعكاس صورته بالمراية وحجيت بنبرة يغمرها اليأس : اذا ماتريد تكول براحتك ما اضغط عليك اني .
ودنكت بحزن اخذت القراصة وظليت الف بيها شعري .

هو تحسر كال هاي هداوي مرة لهيب صارلي فوك الاسبوع ادور على اهلها وبالموت يله حصلت رقم عمها بالسماوة طلعت رايحة ويه اهلها وما منطيتني خبر .

تفاجأت وضجت واني عبالي ختام ..
كتله يا يله هي طفلة ماتفتهم الصح من الغلط لاتضوج نفسك .

كعد على السرير كال ولج بويه مو اضوج نفسي البنية مسؤؤليتي انه وديتها لأهلها ورجلها مسافر شكد خابرت على رقمها يطلع مغلق وعلى كولتج طفلة شريد احاسبها .

تنهدت وحجيت اي واني تحاسبت بدالها عصبيتك كلها اجت بيه .

باوعلي وحرك طرف شفته بابتسامة متلاشية وخله ايده على لحيته : خلي يصيرلج درس لا والله درسين مو واحد ، اول شي تدكين الباب يله تدخلين والثاني لاتتسرعين والثالث من تشوفيني عصبي بعدي عني
ولو ادري بيج ماتخافين انتي بس نكول عسى ولعل يفيد .

قوست شفايفي ورحت كعدت يمه سالته
يعني راح تروح لهداوي بالسماوة تجيبها وتجي ؟

كال لا البت تكول ابقى يم ابوي على ما يجي لهيب وانه خليتها على راحتها ابوها مريض وهيه هالوحدة عنده .

حركت رجليه على السرير وحجيت باحتجاج
اروح وياك اني والله احب السفر والطرق الخارجية اموت على هيج شي .

خله اديه على كتفي وجذبني اله
كال ميخالف نروح للسماوة ومناك نروح للنجف نزور شنو رايج .

انتفضت وخرت منه ووكفت على حيلي
_ لاالالالا لو اموت ماروح وياك للنجف خاف الك نية تحبسني بالسرداب انوب صارت بيه خوفة والله .

ضحك ومد ايده لزمني وسحبني عليه ....

مهيب ...

اجتني رسالة من حساب باسم جوجو فتحتها
كاتبتلي شلونك مهيب شخبارك !

تفاجئت رديت عليها منو انتي ومنين تعرفيني وجايه تراسليني!

ردت يا شبيك مهيب نسيتني ؟

رديت شبيج ابويه حلمانة انتي ؟ هو اني اعرفج حتى انساج!

شويه وصلتني صورة منها فتحتها جانت بنية لابسة بدي وردي رافعة شعرها ليفوك .

دزيت الها مسج : لج بابا شنو هالسوالف التعبانة هاي ؟ مو عيب عليج الج هاي الصورة لو وحدة غيرج تردين تسيئين الها .

ظلت تخابر فتحت خط اجاني صوتها الانثوي الساحر
رديت بنتر عليها شوفي ولج ملاعيبج موو عليه اني ضابط تحقيق اطيح حظج اذا تلعبين عليه افتهمتي احجي منو انتي ومنين تعرفيني ؟

كالت اني جمانة الي بلغت على صديقك مرتضى نسيتني صديقة ميسلون .

عضيت شفتي بقووة ناسيها هالبنت اني من اشوف ريلام انسى عمري كله وانسى كل بنية اجت عليها عيني مهما بلغت درجة جمالها .

تذكرت قبل فترة راجع للبيت بللثمانية الصبح
شفت ريلام و هيام واكفات يم الباب ينتظرن .
نزلت الجامة باوعت لريلام بدون مانزع نظاراتي
هي شحت نظراتها مني ودارت وجهه بعصبية وانطتني ظهرها .

باوعت لهيام جانت مبتسمة تباوعلي
كتلها شعندج واكفة هنا ولج هيام ..

هي جاوبت السايق تأخر علينا اليوم اخر يوم بالامتحانات الوزارية وراح نتأخر .

رديت : صعدي اوصلكم ..
هي صعدت يمي بالصدر وريلام بقت واكفة ماتقبل تصعد .

نزعت النظارات وباوعتلها بتهديد
دارت وجهه مرة ثانية
حجيت بحزم واشدد على احرف كلامي .
_ هيام كليلها خلي تصعد لا اعرف اني شون اصعدها .

باوعتلي بغضب مكتوم مدت ايدها فتحت باب السيارة الورا وصصعدت وركعت الباب حييل .

التفتت عليها معصب بعد بعد فد نوب خلعي وركعي براسي .

فتحته مرة ثانية وركعته بقوووووة اكبر وكأنها تتحداني .

أنين ..

داسفط كتبي ووكعت وردة يابسة من واحد من الكتب
جانت وردة طبيعية لونها احمر ، خليتها براحة ايدي
وفجأة طغى شعور الخوف عليه .

رجفت وكمت على حيلي شمرتها بسلة الزبل
توة شمرتها فاتت موج ع الغرفة .
باوعت ع السلة وشافت الوردة بيها وظلت تباوعلي باستغراب!

طلعتها من السلة وظلت تباوعلها منين هاي الوردة ؟ وليش شمرتيها .

هزيت راسي بتوتر وبلعت ريكي بخوف
ماكو شي لكيتها بالكتاب مالتي مدري منو مخليها .

اكو واحد يشمر هيج وردة حلوة طبيعية ؟

رحت كعدت على السرير جاوبته ومنطتها ظهر
يمكن صديقتي مخليتها الي واني مزاعلتها ماحجي وياها .

اجتي كعدت يمي لزمتني من اكتافي ودارتني عليها
تباوعلي بشك وريبة وسألتي بقلق : انت ماضامة عليه شي انو صحيح ؟

هزيت راسي وارتميت بحضنها حضنتها .. ماكو شي موج لا يظل بالج بس اني لهسه خايفة من ذيج الليلة لمن تهجم علينه حمه فرح .

عمري لاتخافين مايكدر يسويلج شي .

موج ..

كالعادة اجه اوس واني ماكعدت يمه خليت خالتي يمه
طلع وخابرني مرة مرتين عشرة يله جاوبت
كال ولج انتي شون تخلين يمي خالتج هاي المخبلة .

نترت بي احترم نفسك اذا هيه مخبلة لعد انته شنووو ماتكوولي ؟؟

احبج موج ااااحببج كولي احبك بالجذب يمعودة .

رديت عليه احبك بالجذب ..

كال الله ياخذج طلع الجاي من خشمي

وما متتت ؟ غيرك يموت رأسا .

كال موج انت وين هسه ؟

كتله واكفة ع الطباخ

كال كون اجي اطبك عليج هسه اشم شعرج .

رديت ليش تحسسني اني سيارة وطابكة بسريع محمد القاسم .

كال الله ياخذج طيرتي ام الرومانسية .

لاتدور رومانسية وياي نصيحة الك هاي .

كال والله موج والله اذا استمريتي تعامليني هيج اشمر روحي من جسر الصرافية وانتحر واخلص منج .

ديالله اشمر عليييك الله اشمر وريحني منك .

كال تمام وذنبي بركبتج ...

طكيتها ضحكة هو سده واني رحت التهيت
ورة شويه تذكرته كلت بلكي صدك سواها وانتحر واخلص منه .

رحت اتصلت بي طلع مشغول ..

وراها خابرني جاوبت
كال هلا ..

جاوبته لا هل عليك الصبح ان شاءالله

كال شنو ؟

كتله اتصلت بيك مشغول توقعت ماكدرت تنتحر من جسر الصرافية ماتملك الشجاعة الكافية شنو جنت تخابر على ملك الموت يجي ياخذ روحك مو ؟

كال لا والله تخسين ان جانت اختج خلت حمدان ينتحر اني لا تتوقعين اصير مثله وانتحر علمود مرة .

تفاجئت وانصدمت : حمداااان انتحر صدددك تحجي انته .

كال هاا نسيت الشيخ ضام عليكم هالموضوع .

سديته منه متفاجئة بقيت رايحة راجعة
اخذت التليفون خابرت فرح
كالت اني رايحة للسماوة ويه الشيخ اشوف هدى ...
جيت اكوللها ع الموضوع بس كلت مو وكته هسه ترجع واكوللها .

يوم ثاني جانت عندي دورة محاضرات مالة ماجستير ورحت للجماعة ، جنت واكفة دااحجي ويه زميل الي من ايام الكلية .

مااشوف اله اوس يجي بنصنه ويسلم على الولد
واخذ ايدي وخلاها جوة الليلك مالته تحسست شي بارد عرفته مسدس .

متت من الخوف يااللهي هذا مريييض مررريض ..
اخذني وطلعنه من الجامعة صعدني بالسيارة كوووة .

كتله صخااام بوجهك صخام انته مرييييض مريضض
ليش هيج دتسوي وشون دخلت للجماعة بالمسدس شلوووون .

كال محد يوووكف بوجهي انيييي محدددد افتهمتي ولج تخونيني منوووو هذا صاحبج ؟

رديت بصياح صاحبي شنوو ؟ زميلي زميلي ماتعرف شنو يعني زمالة

شعدج ويه زميلج بنص الجامعة تسولفين

دااسلم عليه شبيج لا عبالك كلها مثل افكارك المريضة القذرة واني مستحيل مستحيل استمر وياك والله من باجر اروح للشيخ علي يروح لاهلك يخلصني منك .

ظل يكفر وشغل السيارة وحركها وانطلق بيها بخبااال
ويصيح اني الج تهدديني لا والله ماجابته امه الي يهددني ولج مووو انتي الي تهدديني .

موتني خوف حسيت باي لحظة راح تنكلب بينا السيارة
ونموت وياريت اموت واخلص منه ...

الى وصل بيه لعمارة خفت متت من الخوف
كال نزلي بلا فضايح لا اخلي حمايتي هسه يخدروج ويصعدوج للشقة بلا وجع راس يله .

انته على شنو ناووي ها ع شنووو شبيك انته شبييك اووس مووو هيج الله يخليك رجعني مووو هيج .

ظل يأشر للحماية مالته ورانه بسيارة ، شفتهم نزلوا
بسرعة نزلت وكتله خلص راح اروووح وياك خليهم يرجعوون .

اشرلهم وراحوا ، صعدت ويا للشقة مالته
دخلنه جوه ظل يتنفس ويلهث .
كال جيبي موبايلج .
فتحت الجنطة وانطيته اله واباوع لعيونه اريد اقرا افكاره ، فكرت اسايره اسايسه هو مريض نفسي بلكي يفهم ع الكلام .

بس هو صدمني لمن رفع الطبلة الكزاز وكسرها
ويباوعلي بنظرة متوعدة قلبي احسه صار بحنجرتي . من الخوف ابتعدت عن الكزاز
وهو اجه وتهجم عليه وسحلني لغرفة النوم .

ظليت اضرب بي بحركاتي المتعلمتهن وحدة اجت جوة حنجة واني لسه لابسة حذائي هو احتار بروحه وبالدم الي نزل من حلكه .

طلعت اركض للصالة وكعت على ايدي وانشكت وصار الدم يصب .. منها ..

كعدت ابجي واسمعه يخابر بالتليفون ويصيح
جاي جاي ..
ويكفر ويغلط ويفشر ...

اريد اكوم اطلع اجه اخذني من شعري وشمرني بغرفة النوم وقفلها ، ركضت للباب وايدي تنزف اضرب بيها اريد يفتحها بس الظاهر راح .

بقيت لازمة ايدي وابجي ، رحت للشباك اريد اصرخ احد ينقذني ماكو الشقة الظاهر باعلى طابق .

سمعت صوت تليفون يرن على السرير
ركضت اخذته شفته موبايله الظاهر عنده اثنين موبايلات لان من طلع شفته يخلي بجيب بنطرونه
وهذا وكع منه .

انتظرته يتوقف عن الرنين وودست مكالمات طوارئ
وبسرعة دست رقم شرار الرقم الوحيد الي حافظته من بعد رقمي .

اجاني صوته بتذمر نعم !

ارجف وابجي واشهك حجيت شرار الله يخليك تعال طلعني منا فدوووة .

هو كال موووج ؟

اسمي بلسانه منشار تذبح قلبي .....

حجيتله كل شي واني اعرف المناطق وهو كال سهلة جاي دقايق اندل هاي الشقة اني بس اهدي .

كتله اني محبوسة بغرفة النوم انت لمن تجي دير بالك لان الصالة كلها كزاز .

كال لتخافين وغلق الاتصال ، ظليت ادعي كون مايجي أوس وكون يوصل شرار قبله ..

دقايق مرت او نص ساعة وسمعت صوت ضرب ع الباب كأنو تنكسر وبعدها سمعت صوته
يصيحني بخووف رجولي موووج مووووج ..

جاوبته من وره الباب بغصة .. شرار اني هناااا .

سمعت صوته قريب ع الباب يحاجيني ويصيح ابتعدي عن الباب راح اكسرها .

وخرت بدون مااجاوبه ..

سألني ولج وخرتي لو بعدج ؟؟

جاوبته وخرررت ..

ظل يكسر بيها االى ان انكسرت فات وعيونه تدورني
من شافني اجاني يركض ظل يباوعلي بقلق ويباوع على جسمي وعلى السرير عرفته يريد استفسار .

كعدت بالكاع وظليت اشهك وابجي اجه كرفص كدامي .. يباوعلي بتفحص وحزن .

اخذ ايدي الي مجروحة كال هاي شنو جرحج عميق كلش ابقي هنا عندي حجي وياج من ارجع .

كمت على حيلي وين ترووح عفية اخذني لايجي اووس يأذيني .

لزمني وكعدني كال مشغول خابرت المقربين اله وعرفته مشغول اجيب شغلات من الصيدلية اعقم جرحج واجي وهياتها الصيدليه هنا مو بعيدة يعني من اشوفه اجيج ركض .

اطمئنيت لكلامه .. رحت تمددت على القنفة الجلدية بالصالة .....و احس برودة الجلد تحفر بعظمي رغم صيف بس التبريد شغال واني انزف وميتة من الوجع ..

سمعت باب الشقة انفتحت ، رفعت راسي بوهن باوعت
شفته اجه شايل بيده علاكة مال صيدلية بيها ادوية

خفت كلش ، اجه يمي شمر العلاكة ع القنفة
كال كومي للغرفة اعالج جرحج ، مارديت عليه احس صوته بعيد يوصل مدري هبط ضغطي من الخوف مدري سكري مدري فقدت دم هوايه .

هو شافني ما استجبت اله مد اديه اليه ، ايد جوه اكتافي ، واللخ جوا ركبي ، ورفعني عن القنفة ، جلبت بي بقوة خفت على جرحي لدرجة نبتت اظفرين بصدره ، لان مفتوحة دكم قميصه .

خليت راسي على كتفه خفت من ردة فعله لان خرمشته خفت منه واختميت بي ، بس الظاهر هذا العنيد ابو صدر الواسع والجسم الرياضي الجذاب ماتأثر .

وداني للغرفة ومددني ع السرير ، معبالك شايل ٥٥كيلو
لا عبالك شايل كيلو واحد.. هلكد مجنت خفيفة بيده .

راح للصالة جاب العلاكة الطبية واجه للغرفة لزمني من ايدي رفعت راسي وعطت وظليت ابعد نفسي منه

لا لا لا حباب شدتسوي اخاف والله اخاف ..

من بين اسنانه نطق : خلي اخيط جرحج ميرهم يبقى مفتوح

لالا ماريد اخاف والله اخاف اتركني حباب ماريد ماريد مولازم

اجه يمي طل بوجهي كال اشششش سدي حلكج ولتفتحي اله بشي مهم شكد تحجين

رجعت اتوسل بي ميلزمني ، مد ايده لفكي وشدد قبضته عليه حيل ..
فتحت عيوني مرعوبة منه وخر مني ظليت بعيوني اتوسله واشهگ...

كعد بصفي ضغط باصابعه على كصتي ونومني على المخدة كال اريدج تحجيلي شي باقي ومترسخ بذاكرتج وعوفي جرحج هسه يولي ولتفكرين بي .

رفعت راسي شنو تريد احجيلك ؟

رجع راسي ع المخدة : لا ترفعين راسج باوعي للسكف وبس احجيلي اسمعج احجي اي شي مستحيل تنسينه فد شي حلو باقي ابالج من سنين حتى يروح الخوف منج.

رمشت بعيوني ووكع الدمع منها غمضت شويه فتحت
سمعته كال اي عفيه غمضي عيونج وتذكري فد شي تردين تحجيلي عنه .

همست واني مغمضة انت متأكد من الي دتسوي؟ تعرف يعني ؟

اي لج اني دارس طب نسيتي دكتور ثلاثيني جاد. وبعدني جاد .

بلشت احجي بنفس اللحظة حسيته لزم ايدي المجروحة .

استرسلت بالكلام ..
جنت بالاول ابتدائي بوقتها مناسبة عيد الطالب
ماما حامل وبشهرها دتكوي بدلتي ، فجأة اجاهه
وجع كولش قوي
بسببه تركت الاوتي على البدلة واحتركت

لمن راح الالم رجعت للبدلة شافتها محروكة ظلت تباوعلي ومبتسمة ابتسامة تبث كل وجعها وآلامها

ضجت اني وظليت ابجي لمن شفت بدلتي محروكة
ماما شون حروح باجر للاحتفال ..

بنتي باجر دوامج عصري اني من الصبح اروح لبيت جدج واجيبلج بدلة من غصون بنت خالتج

غصون عدهه هوايه بدلات حلوة اكيد حتطلع حلوة عليج .
هزيت راسي ومسحت دموعي ..

ماما ماكدرت تنام الليل ولا احنه كدرنا ننام ...
بسبب الوجع الي ظل يداهمها بكل ساعة

للفجر يله بابا قرر ياخذهه للمستشفى ....
راح على بيت جيرانه واجه ويا امهم وبنتهم كبيرة
الام حتى تروح ويه ماما لحتى تولد والبنت لحتى تبقى يمنه اني وفرح واحمد اخويه جنه صغار

بس بيومها بقيت انتظر ماما ترجع من المستشفى قبل دوامي وعدتني تجيبلي بدلة من غصون

بس بيومها ماما ماجتي للبيت لا قبل دوامي ولا بعده ..
رجعت بس طفلة صغيرة للبيت بدون امي ..

ظليت انحب وابجي وصوت شهكاتي مسموعة بالارجاء
وهو يباوعلي متأثر ومقهور ويتحسر ..
كمل خياط ايدي وعقمها .. واجه كعد يمي .. ع السرير
كال هسه تحجيلي كللللشي ترة اني مو مثل اوس لا اني الاضرررب منه ..

يتبع .