رواية هذيانٌ بين جمرٍ وجليد ..(ارملة اخي المجنونة) الفصل الثلاثون 30 - بقلم نورا ناصر

السلام عليكم
رواية هذيان بين جمر وجليد
بارت ٢٤
نورا ناصر ..

*****

شفت شرار طلع من بيتهم واجه باتجاه السيارة ..
اريد اسيطر على رجفة جسمي ما اكدر ، جان شرار بطريقه النا ، احس هاللحظة جنت اتمناهه ومااريدها تصير احس بشوك وحنين للحظاتنا لمن جنه نتعارك لمن جان يستفزني ويضوجني ولأنها ماضي جنت اشتاق الها دائما الانسان يحن لكل شي بالماضي حتى لو جان مؤلم او مزعج .

بهاللحظة التفتت لأوس وسألته
_ ممكن أعرف شديصير! على شنو ناوي انته ؟ لوين تريد توصل.

رفع تك حاجبه ياشر على شرار ويحجي : انتي مو تكولين مابينكم شي شدعوة هيج راح تموتين روحج نزلي منا وروحي كعدي بالورة اني عازمكم اليوم اثنينكم ع العشه .

سكتت بس جنت اتمنى بيدي جاكوج افلش راسه بي

فتحت الباب ونزلت بعصبية وصار كبالي شرار يبعد عني بخطوات قليلة ، اجت عيني بعيونه باوعتله بقهر وحقد واني اشوف بعيونه نظرات احتقار باردة ..

تفاديت نظراته ودرت وجهي وكأني معلقة بين الحياة والموت ، دمي يغلي والعذاب ينهش بيه وبروحي وبقلبي ، فتحت باب السيارة بأيد ترجف واسمعه يحجي ويه اوس ببرود قاتل .

_ شكووو ؟
اوس جاوبه اصعد مو عازمك شكو بعد نسيت .
جاوبه هو يطل عليه من جامة السيارة .
_ انت وو .. خطيبتك اني شكو عازمني ؟
ضحك اوس : هه اريد اعرفكم على بعض شبيك ؟
_ ع الاساس ما اعرفها اني يعني ؟

درت وجهي من سمعت هيج كال ورفعت شعري ليفوك بعصبية ..

ظل اوس يتوسل بيه وهو صعد وكعد كدام ..
ويتمتم بصوت عالي : ديلله اطلع دنشوف تاليتها شنو ..

ضحك اوس وحرك السيارة واني احس اختنكت والسيارة مليانه ريحة عطر لا ادري معطر خاص بالسيارة لو عطر شرار لو اوس بس ريحة هالعطر احس راح تكتلني ، جام السيارة مغلق والتبريد مشتغل
لان الجو حار .

اريد بس افتح الجامة مالة السيارة ماتنفتح . وايدي ترجف ..
مديت ايدي وضربت اوس على زنده ، بحيت من قوة الضربة ارتدت واجت بزند شرار هماتين .

التفت عليه شرار واني بلا وعي باوعتله شفته يباوعلي مصدوم ومستغرب .

صكيت اسناني وكلت لأوس اوس اوس افتح الجامة هاي الي يمي لأن اختنكت .

شرار دار وجهه وهو اوس جاوبني صار حبيبتي صار بس شبيج معصبة اهدي على كيفج وليش اختنكتي ترة الجو حار برة واني مشغل تبريد .

جاوبته بعناد ميخالف افتحه ومعليك .

صار يابه صاررر تدلل سمراوتي .. جاوب هيج انقرفت منه درت وجهي ع الجامة وهو فتحها جريت نفس .

وصلنا للمطعم ونزلنا ، اني نزلت من جهة الكاعد بيها شرار ، لمن نزلت بلا وعي باوعت عليه ، هو حس بنظراتي ، باوعلي بحقد وركع الباب بشوية عنف .

تمنيت اخلي اصابعي بعيوني وافكسهن هالعيون الي تباوع اله .

دخلنه للمطعم وكعدنا جنه ساكتين احنه الثلاثة
ونظرات اوس تتوزع علينه وتخترقنا بترقب .

حاولت قدر الامكان ماااباوع لشرار ابد .. وعيني ركزت بيها ع الطاولة الكدامي وبس .

اوس سأل شرار عن صحة ابنه ..
جاوبه بأختصار انو زين ع العلاج .

سأله اذا باقي هنا لو يروح
رد : مامطول وراجع بعد فترة ..

حسيت اصابع من جليد قاسي تمتمد لقلبي وتعصره حاولت احارب مشاعري بس ماكدرت.

نزلوا الاكل اوس ظل يبلع وشرار بس يحرك بالاكل بالخاشوكة ...
واني نفسيتي مسدودة وحتى حلكي مابيه افتحه .

ميل روحه اوس وسألني بصوت حرص يوصله لمسامع شرار : حبيبتي ليش ماتاكلين ؟ معجبج الاكل انزلج غيره .

باوعت عليه لزمت الشوكة وجيت انبتها بوجهه الاملط المكروه ، وتماسكت بأخر لحظة ونبتتها بالاكل وتظاهرت بانو دا ااكل .

بعد ما خلصنا اكل اوس ترخص وكام ، حسيته جان متعمد يكوم يمكن يريد يراقبنا من بعيد او مخلي احد يراقبنا .

بس اني حسيت مخنوووكة وزادت غصتي لمن بقينا اني وشرار لوحدنا ، اجيت دا اكووم لزمني من ايدي وكال ويين رايحة كُعدي عندي حجي وياج .

صدمني نفضت ايده مني باوعتله وخزرته
ونترت : شكوو تلزمني ؟

رفع تك حاجبه يباوعلي عيونه تشع خبث واستهزاء ..
كال بنبرة رغم باستهزاء بس حسيتها بمرارة
_ مبروووك ؟

رديت بسخرية وبشبح ابتسامة : شكراً ..

كال مو ع الاساس متردين واحد مطلق وتردين واحد بلاد ومن هالكلاوت الي جنتي صارعتني بيها .

جاوبته بغصة وانته شلك علاقة اني بكيفي ..

قرب مني وخل اديه على الطاولة اني ابتعدت وانتجيت هو كمل كلامه كال شوفي اذا انتي ميهمج مرة اني ميهمني الف احنه لابيناتنا علاقة ولا حب ولا بيننا وعد مجرد خطبتج ورفضتيني .

رديت واريد اضيع نبرة اليأس والضعف بصوتي صكيت على اسناني
_ انته متزوج .

كال خليني اكمل موو كتلج ميهمني! بس هيج الخاطر المشاعر هه .

باوعتله بقهر جانت نظراته تشع الم عرفتها دارستها عيونه واعرف .

هو كمل : بس ترا اوس ماعرف شون وافقتي عليه وشنو هي الظروف الي جبرتج او ماعرف بس ترة هو من النوع يحب يتزوج ويطلك هو مهووس بهالسالفة .

عضيت شفتي اباوعله نار مشتعلة بيه وهو ابتسم بدون ميهتم لاعصابي المشتعلة
ارتجى على الكرسي وكال بسخرية
_ اعبري النهر من هسه مدامه ضيك هاي اإإذا ممتورطة بشي يجبرج تبقين ويا .

باوعتله صاكة اسناني مستفز نذل وهو يباوعلي بكسل ونذالة .
كتله احترم نفسك وثمن كلامك ولا تتدخل بخصوصياتي ماااسمح الك تمام .

هه خصوصياتج ويطبج طوب فوك طوب كال خصوصيات كال .

رجع قرب نفسه واجاني رده الاستفزازي وبقوة وحزم
.. كل هالثقافة والهدوء والكلام الغالي المثمن باغلى سعر وتكولين ثمن كلامك!!! بس يالله هو صاحب الفضل دائما مذموم احس نفسي مثل السمجه ماكولة مذمومة خطية ...

ظليت افر بيدي وعوجت حلكي وحجيت
بقهر : انتَ سمجه؟؟ انتَ قرش دولفيين اخطبوط
تنتمي للاسماك المتوحشه التاكل ما تنوكل.

_ هه .. بالله استجني واستقري ياسمكة التونا العنيفة

ضحكت ونسيت كل همومي ونسيت حتى اوس ومشتاقة للمناكر ويا شرار ..
حركت شعري بغرور وحجيت باستهزاء
_ اني من اسماك الزينة الجميلة مو مثلك يالقرش...

باوعلي يتأملني بعذاب لمدة ثواني بعدها دار وجهه عني بقهر
وجر نفس : يالله هذا الحجي ميوكل خبز شوفيلج حل لمصيبتج واني من احجي مجرد نصيحه لا تعتبريني استفزازي ونذل ترى اني ارقى من هييج ..

وكمل بغصة : بس بعد انتي عندج غرور وانانية بكد شط العرب وصماخج يابس مثل صخور جبال زاكروس
واني حاليا متحملج وصابر مو حبا بيج وحق الله
لا بس لان شموخي وشهامتي متسمحلي .

رديت بغرور : هه لا والله ماتشوف نفسك هواي شايف حالك ترة من حمد نفسه ذمها .

رد بضحكه مستهزئة ونظراته عليه مو ثابتة
- : تؤ تؤ تؤ مو غرور مجرد ثقه بالنفس مو احمد نفسي وانما افتخر بيها من حقي طبعا .

ارتجيت على الكرسي وبعدت نظراتي منه بتردد وعذاب : ثقتك مالها محل من الاعراب .

رد : ثقتي فعل ماضي مبني على الشهامة وانت شوفيلج حل لمصيبتج علمودج اني ترة .

باوعتله ودرت نظراتي منه ، قرب مني
كال موت بعيدا عن التفاهة والاستهزاء انتي مجبورة ؟ شسوالج أوس ؟

باوعتله وضحكت بقهر : هاي بعيدا عن الاستهزاء وتكولي موت ؟

_ اي انتي موت وراح تبقين مووووت الي ، بس كليلي يمكن اكدر اساعدج .

سكتت ودايرة وجهي منه افكر وبس اتحسر ..
هو استمر يحجي .
_ لج موووت وسسم وزقنبوت مو دااحاجيج ؟

باوعت عليه بيأس وضعف ..
ولأول مرة عاجزة عن الرد على اساءته .
خايفة اشكيله وتصير مشاكل وخاصة اوس مهددني بأهلي وموقعني على تعهد .

_ باوعي اني مستغرب حييل لمن سافرت قررت ما اتواصل وياج ولا اراسلج كلت اخليج على راحتج بس يشهد الله جنتي على بالي دوم وما اللتهيت عنج ولا لحظة .

حسيت راح تخوني دموعي وتنزل
حاجيته بتوسل : شرار الله يخليك كافي ..

رد بعنف : اسمعي خل احجي خليني اكمل ..
ولج أوس مريض نفسي لا تورطين روحج ويا موج تتعذبين وتتأذين والله اخذيها مني مو انانية مني واريد امتلكج لاء بس لمصلحتج صدكيني لو واحد غيره اكول الله يوفقج ويسعدج بس اوس لا يأذيج واني ماريدج تتأذين.

حسيت راح اشهك ، صرخة بداخلي شكبرها ليييش ليشش درت وجهي منه وعضيت شفتي حيل بس اريد دموعي ماتنزل ..

هو كمل كال والله استغربت اوس لمن كلي خطبت موج بعد علاقة حب استغربت حيل جنتي تكرهي شلون وكعتي بشباكه ؟

هزيت راسي باستنكار واريد اكوم هو خله ايده على كفي سحبتها بسرعة ..
كال اكعدي اني راح اكوم ولتنسين شغلة اذا حابة اساعدج تواصلي وياي .

كام هو واني نزلت دموعي ، خليت اديه على وجهي خايفة شهكاتي تطلع مني وتوصل لأسماع كل الي بالمطعم .

التفتت شفتهم واكفين اثنينهم يحجون درت وجهي مسحت دموعي بسرعة .. والتفتت مرة ثانية شفت شرار يودع اوس وطلع من المطعم .

ثواني واجه يمي اوس وبقى واكف
ويتأمل عيوني ، خزرته ودرت وجهي ..
وسألته : أشوو تأخرت ؟
كال باقتضاب جنت اخابر اجاني اتصال .
مجاوبته .. كال يله امشي نروح .
كمت واخذت جنطتي ..
سألني ترحين تغسلين ولووانتي هم مااكلتي شي .
جاوبته بس اعدل مكياج ..
ضحك بسخرية واردف : اي الظاهر عيونج مدمعة يمكن جنتي تثرمين بصل ..

عضيت شفتي قوة ومن بين اسناني كلت تاافه .

رحت للحمام احس منهارة ومااكدر اكمل بعد احس بخيبة وخذلان كلساع اعيد كلام شرار وكأني اسمعه مرة ومرتين وعشرة .. لمن يكلي مو حبا بيج ومابيننا شي هو صح كلامه بس المشاعر الي بداخلي قوية .

طلعت شفت الغول ينتظرني احسه جان معصب مدري شبي .. طلعت وراه وهو راح للسيارة فتحها وصعد
واني كعدت كدام .

حرك السيارة ومشى بيها وهو ديسوق وعينه ع الطريق
سألني : شنو حجيتوا انتي وشرار !

بانزعاج جاوبته : نعم!

شدد قبضته ع الستيرن بعصبية وكال اي من حقي احرف شنو جنتوا تحجون ؟

عطت بي اذا ما الك ثقة بيه شكوو تركتني يمه وكمت هااا ... شكوو؟

عاط بعصبية وصار يسوق برعونة وخبال وهورنات علكت بالشارع من السيارات .

متت من الخوف وجلبت اكثر بباب السيارة
وحجيت كوة مسيطرة على انفعالي ..
شجاك اووس شجاااك راح تسووي حادث لللك راح نموووت هيج .

عاط بعصبية احجييي شنووو شنووو كلتي لشرار ؟

حجيت بتوسل وميتة خوف ؛ مااكتله شي والله حتى على الاحتيال السويته بيه ماحجيت بي انته ليش معصب هلكد .

كال سهلة موج مو والله اكله واذا طلع كلامج عكس كلامه تندمين .

صرخت نزلني هنااا نزللللني مخبل مخببببل اكرهك اكررررهك .

هو وكف السيارة فجاة واني زدت بالبجي وهو عود يسكتني .. اسف حبيبتي عصبت والله بس يكولون بينكم علاقة وشفتكم من بعيد تسولفون غرت عليج مو بيدي والله احبج .

جان يريد يلزمني صرخت والله اذا لزمتني وووووالله انزل بالشارع واصرخ والم عليك الدنيا .

كال اوكي اووك ..

لك انته مررريض مرررريض والله مررريض .

بس اهدي حياتي بس اهدي ..

وديني للبيت يله ودييني ..

كال مو كلت لامي راح اجيبج يمها شويه تشوفج ...

هزيت راسي برفض انته خليت بيه عقل اوووس انت جيت تكتلني اليوم بيا حال اروح لامك اني!

اني ماريد منج شي بس تحبيني ...

احبك بهواي سوالفك انته عاقل مخبل !

سكت وخله قبضة ايده على حلكه واني هم سكتتت
واريد انفجر اختنكت وميتة قهر ... منا كلام شرار يطرب أذني كل ساعة واحس يشنقني ومنا هذا المخبل المتورطة ويا اني !

راد يحرك السيارة عطت بي شدتسوووي لا تحرك لااا تحرك راح انزل اخذ تكسي واروح للبيت ماروح ووياك بعد .

كال شلوونج انتي زينة ؟ اخليج ترووحين تكسي عصبت شويه وهدات هسه لا تكبرين الموضوع اني اوصلج هسه .

غمضت عيوني بيأس واني اصلا هم اخاف من التكسيات والشين الي اعرفه احسن من الزين الي ماعرفه .

سكتت عنه طول الطريق يتعذر ويتأسف واني ساكتة عنه اتمنى اشمره من الجامة واخلص منه .

فرح ..

لفيت روحي بشرشف لان اكلني اكل بنظراته واني خجلت كلش . ودااكوم ، هو لزمني سحب الشرشف مني وشمره بعيد وكع جوة الجرباية .

عطت عزااا ودفنت راسي بالمخدة ، هو سحبني من زندي وخلاني على صدره ، خليت كصتي عليه وضغطتها حيييل .

كتله : لا عفية والله استحي عفية عليك الله لا تباوعلي هيج .

كال : بويه حلالي حلااالي سمعتيني حلاالي بيش طالبتني انتي ؟
جان يحجي ومخلي ايده على ظهري يتحسس بشرتي ويتلمسها .

مديت ايدي اجر البطانية اريد اتغطى بيها واحاجي
لاع عفية قابل مو من اول يوم هيج والله استحي خليني اخذ عليك ع الاقل!

اخذ االبطانية وشمرها وكال اي من اول يوم واخذي وتعلمي عليه شكوو بيها !

بعدني نايمه على بطني وراسي على صدره دافنه وجهي بيه وخجلانة وارجف .
كتله والله بردت خليني اتغطى!

كال لاء لا تتغطين انت حرارتج مرتفعة لاتزيد عليج الصخونة ...
كتله والله بردانه ..

كال تعاي بويه انه ادفيج واخذني كلي خلاني على صدره ..

عزاا بعدني خجلانة والله وارجف .. خلاني على صدره ولفني باديه وراسي جوه حنجه وصفحة وجهي على صدره ، احتضني قوي حسيت بدفئ ناعم يلفح جسمي ويثير مشاعري . ارتجفت برغبة وخجل .

ايدي مجلبه بأكتافه ، اخذ رسغي وباسه
واصابعه جانت تنغرس بخصلات شعري بكل ثانية .

كال سمعي بويه ام جاسم عندي حجي وياج ..

كتله اولا لاتكول ام جاسم والله احس روحي مرة عجوز ضفايرهه وهي ، رجل بالدنيه ورجل بالكبر .

ضحك واني كملت كلامي : اي ولا تكلي بويه والله احسك جدي واكبر مني بتسعين سنة مو بأربعة وعشرين .

كال انه جدج ابوج وكل شي

جاوبته اي بس ميخالف بس لا تكلي بوويه ..

رفع راسي وصارت عيوني بعيونه
جان مبتسم ونظراته مليانه رغبة
كال اكلج فرحتي!

رمشت بعيوني عدة رمشات وهمست فرحتك!

خله ايده وره راسي وظل يباوع على شفايفي بشغف وتركيز ، قرب وجهي من وجهه
وتلامست شفايفنه برغبة وقوة كبيرة ..
حرارة جسمه جانت تخترقني وللحظة تساءلت
هو منو الي مسخن اني لو هو!

جان يشدني اله بقووة وحتى صرت احس راح اصير جزء منه ، كلما احاول ابتعد عنه يطوقني بقووة اكبر
وينتصر على اعتراضي بتصميمه المتغطرس القوي .

نزلني من صدره ومددني واقترب مني وجان يطبع شفايفه على كل جسمي ، خليت اديه على وجهي
وحجيت بنبرة رجاء طفوليه : عليك الله كافي والله مريضة ومابيه بعد .

حسيته يهمس يم اذني : شنو صار للبوة الشرسة؟ وبعدين انتي شراح تسوين ؟
جان يحجي وياخذ شحمة إذني بين شفايفه
يخليني اتدغدغ وأميل على جهه .

اخذ اديه ووخرهن من وجهي واني باوعتله اجت عيني بعينه ، شفت نظراته تنصب عليه برغبة وحنية .
غمضت عيوني حيل وعضيت شفتي .

تمدد يمي واخذني لحضنه وباس راسي ...
وظل يحجي : سمعيني فرح وكلامي هذا خلي ترجية بأذنج .
انتي بعد صرتي هسه مرة الشيخ اريدج تتغيرين وماتبقين على حالج .

سألته : ليش شبيه اني ؟

خله اصبعه الابهام على شفتي وكال ها وهاي اول شي تعلمي تسمعين مني كل شي بدون ما تقاطعيني .

رمشت بعيوني وظليت اباوعله ..
كال اول شي اريد اوصيج بأمي هاي امي هاي صوتج مايعلى عليها تحاجيج كله حاضر وصار هاي مرة جبيرة هاي ام الشيخ وهيه الشيخة هنا .

سألته ببراءة : واني لعد مو شيخة ؟ مو صرت مرتك ؟

ضحك وجاوب : ماتصيرلج جارة
كمل : هي الشيخة الجبيرة وانت الصغيرة بويه ولا يهمج .

هزيت راسي وصافنة ..
كمل كال امي تحترمينها تبوسين ايدها تبوسين راسها النسوان الكبار يحبون الاحترام وهالاشياء مقدسة عدهم انت مايوم بايسة راس امي ؟ بالعيد بمناسبة ؟

همست امك ماتحبني تكرهني لذلك من بعيد اعيدها وهيه لو ترد لو ما ترد ..

امي ماتكره بدون سبب انت لازم غاثتها شوفي شلون تحب هداوي ..

اي هداوي مرة لهيب ولهيب ابنك وانته ابنها اني جنت مرة حمد

سكتني بيده انسي الماضي هسه انتي مرتي وبس خوش حجي ؟

هزيت راسي وكلت ببلاهة اي خوش حجي ....

كمل كال بلقيس هم اشوفج مرات ماتحترمينها ، ترة بلقيس مو صغيرة جبيرة وام وبناتها عرايس وهم باعتبار من عمرج يعني بلقيس باعتبار امج واحترامها واجب عليج .

كمت من صدره واغطي نفسي باديه ورديت بانفعال
بس اني ماقللت احترامها ولا مرة هي مرات تعصب عليه وتصدك بنتها هيام وجذبها ....

لزمني من خصري ورجعني على صدره ارتطمت بي بقوة وبقيت ساكتة وساكنة وهو امتدت اصابعه تداعب خدي وشفايفي .

كال : هاي الانفعالات كلها تبطليها وتنتبهين على تصرفاتج منا وجاي .

جاوبت يعني شنو بس اني الي اتغير! هم ماراح يتغيرون ويعاملوني عدل ؟

رد اي بحكم انتي هسه صرتي مرتي اكيد هم راح يتغيرون ، انفعالاتج هاي بطليها وديري بالج تسوين شي بدون ماترجعيلي اصير كلش مووو زين وياج وتندمين .

حركت راسي على صدره وتثائبت وتمتمت ..
_ اووو من اول ليلة تهديدات استلمنه .

هو كال شكلتي!
سويت نفسي نايمة ..

ظل يكعد بيه كتله والله نعسانة واريد انام بس شويه حس بيه اني مريضة والله .

كال جنج العافية طبتي وكلشي مابيج ومايصير تنامين وانتي هيج

رفعني واني طوقت ركبته باديه واحجي بتوسل
عفية والله نعسانة

كال بعد وكت ع النوم واصلا بعدها سهرتنا بأولهه .

رديت بنبرة اشبه بالبكاء : انته متعود تسهر اني ممتعودة من العشرة اطفي .

شنو بويه تلفزيون انتي وتطفين .

اخذني للحمام .. سبحت وطلعت اجيت داانام اني والبرنص ..
كال شنو شبيج معوزة نوم كومي نشفي شعرج لا تتمرضين ..

عضيت شفتي من جوه هذا بعد شويه يكولي لا تتنفسين اله بأذني لا عفية والله ممتعودة هيج يربي .

كمت على المراية وظليت امشط شعري هو طب سبح وطلع واني بعدني شعري طويل كوة يتمشط

تمدد وسند راسه بعكسه و يباوعلي
ارتبكت كلش .. هسه كون ينام ويخليني انام ماكو كاعد مثل النسر والله احس مقيدني! اولها هيج شون تاليها!

خلصت تمشيط ورحت للباب داا اطلع هو صاح وين وين بويه رايحة .

باوعت ع الغرفة وابتسمت اباوعله
هاا مو نسيت! اريد ارجع لذيج الغرفة مو متعودة على هناك .

كال انسيها ذيج بعد هاي غرفتج شفتي الحمام شلونه ؟ حتى بعد لا تتحججين بي .

ابتسمت اي الحمام جبير عبالك غرفة بس افرش ونام بس انته شلون جبتني هنا اني رحت لذيج غرفتي القديمة .

غمزلي انتي جنتي ذايبة وبسرعة شلتج وجبتج هنا .

يا عزا خو ما احد شافك ترة فشلة والله
خليت اديه على خدودي شون راح اطلع هسه والله استحي!

كال ولج بوووويه شبيج رجلج انه وانتي حلالي من شنو تستحين ويله فضيها وتعاي نامي .

قطبت حواجبي وسألته لعد ودانيال والله ما متعودة انام وهو مو يمي .

رد : لاتخافين عليه يم ريلام هسه نايم وانه يمج تعودي عليه .

همست اي غصبا عليه اتعود عليك ...

كال ولج ليش ماتحجينهه طك بطك شبيج من شنو خايفة بس تحجين ويه روحج ؟

لالا ماكو شي ..

عاط لعد تعاي يمي بسرعة هسه ..

رحت يمه بتردد وخجل ياربي احس هاي اطول ليلة بحياتي ، تمددت وهو سحبني اله وحضني من وره
جريت حسره سألته هاي احنه هسه بغرفتك مو ؟

كال لا مو غرفتي هاي الغرفة الجبيرة لا غرفتج ولا غرفتي غرفة غيرها بداية جديدة النه وان شاءالله خير .

هزيت راسي .. سألته لان اني هم ابد مافايته على غرفته الي ينام بيها ..
غمضت عيوني حسيت انفاسه هدأت عرفته نام واخيرا خلي اكوم اروح اشوف دانيال اشتاقيت له .

دااكوم وجان يلزمني قووي وكال وهو منعس نااامي كتلج .

تنهدت واني مبتسمة ونمت واني احس بطمأنينة مثل الجنين الي ببطن امه .

يوم ثاني كعدت الصبح على لمساته .. باوعتله مستغربة للحظات يله حسيت بي صار زوجي من البارحة .

كمت وتمططت واكوله صباح الخير ..
رد صباح الخير .. ولج شنو هالنوم الثكيل هذا .
اشرت على روحي بتساؤؤل اني نومي ثكيل!

رد وهو ينزل من السرير اي والله صار ساعة اكعد بيج ماتكعدين عبالك طابووكة ولج انت شون يكعدوج ؟

ضحكت اي يحطون قنبلة جوة راسي يفجروها وكعد ..

ضحك كال تكعدين صايرة ثريد بوية ..

باوعتله كال اسم الله ...
اخذ الخاوليه وراح للحمام ..

واني لبست بسرعة وركضت لغرفة ريلام فتحتها بقوة وفتت كعدت هيام من النوم مخرووعة وريلام فزت
ركضت على دانيال اخذته هو نايم وحضنته حيل وبوسته . كعد يباوعلي مستغرب ومطنكر ويبجي .
كرصته من خده ولك مشتاقتلك ووولك .

كامت ريلام من النوم بوستني وباركتلي
كالت بضحك الف مبروك بعد شتردين صرتي انتي الشيخة هسه ادعي لخالو حسان لان تمم زواجكم .

فاتت هيام من يمي تتثاوب وكالت لي شيخة شاخطة
وظلت تفر بيدها .

سحبتها من ملابسها وسحلتها احترمي نفسج ولج ادبسز هاي بدال ما تباركيلي؟

مدت ايدها ريلام وخرت ايدي المجلبة بملابسها
وكالت ياا عوفيها اعصابج انت اليوم عروس مايصير تعصبين .

ظلت هيام تفر بيدها وطلعت واني اخذت دانيال ورحت فتت لغرفتي القديمة وهو بعده يبجي .
حضنته حيل وبعدني مشبعانة منه .
اجت ريلام وراي مسويتله ممه
كالت خالو يدور عليج وانتي هنا ؟؟
اخذت منها الممة جاوبتها : اي ولج متعودة على هاي غرفتي هسه انطي ممته وارجعه على نومته واروح لخالج .

ضحكت بخجل وطلعت بره .. نومت دانيال ورجعت لغرفتنا اني وعلي الدر ، شفته واكف ع المراية يعدل بالشماغ مالته ، وكفت اتأمل اناقته الجذابة ورجولته الصارخة وعبالك اشوفه اول مرة .

مد ايده اخذ العطر وباوعلي وعيونه تحتويني بتكاسل
ابتسمت سأل بجمود وين جنتي!
رديت واني افوت للغرفة واسد الباب ..
رحت اشوف دانيال ..
رد : رحتي تشوفينه لو تكعدينه ؟ الطفل نايم هسه جان خليتي ينام اله تكعدينه وتخلينه يبجي .

باوعتله مصدومة واحجي بداخلي هذا شنو راح يظل يحاسبني على الصغيرة والجبيرة !
ترة هيج احس مخنوكة والله .

همست بقهر : مشتاقتله غير ابني هو واذا يبجي اني اسكته .

التفتتلي يباوعلي بعنف مكتوم ، درت وجهي منه
رحت للحمام غسلت وجهي وطلعت لبست ثوب اسود
ولفيت الشال وهو دخل للغرفة ..
اخذني من ايدي ودننزل كال هسه ترحين لأمي
تبوسيها على راسها احتراما الها حتى تكبرين بعينها .

جاوبته : غير هيه تباركلي!
رد بنفاذ صبر : تباركلج هي تباركلج بس غير هيه مرة جبيرة تباركلج وهيه كاعدة انت طيحي على راسها وبوسي ماتخسرين شي ترة بس تكبرين بعينها اكثر .

هزيت راسي بس ممقتنعة هو حس بيه وكف لزمني من زنودي ودارني عليه كال احتاج اكرر الكلام لو فهمتيه ؟

حركت اكتافي اتملص من قبضته وهزيت راسي بموافقة ..

نزلنا جوة بلقيس باركت للشيخ وهو باسها على راسها وهيه باست ايده .

واجتني باركتلي بوستها ورحنه للصالة الحجية كاعدة كامت اله باركتله وعيونها مدمعة ..
حسيتها ضايجة لأن اني مرته يمكن جانت تتمناله وحدة غيري .

هو دنك باس اديها وراسها واشرلي جنت واكفة
رحت بوست راسها ووجهه وهيه كالت مبروك ديري على رجلج .

هزيت راسي وكعدت يمها . واجوا مهيب وشرار باركولنه ..

هو راح للمضيف واني بقيت كاعدة يم الحجية وبلقيس
كالت الحجية شعندج لابسة اسود! تردين تكرطين راس وليدي مثل حمدان لو ماعندج هدوم ؟

انصدمت وانقهرت حيل ...
جاوبتهة يعني لو هسه لابسة الوان مجان كلتي بعده حمدان مادارت سنته وليش لابسة الوان موو صح؟

هيه ظلت تتأفأف وتستغفر
وبلقيس ردت لا مو هيج فرح بس انتي هذا لبسج كله اسود على حياة حمدان وهو اسود وهاللون ترة فال مو حلو غيري .

جاوبتهن بس علي الدر شافني بهذا لبسي وماحجه شي .

نترت الحجية : هاي سوالف نسوان هو شدخله بيهن الشيخ مايدخل روحه ترة

كمت من يمهن مقهورة من كلامهن ورحت صعدت للغرفة ابجي ..
دقايق ودخل علي الدر واني كاعدة على السرير

جنت ابجي بغرفتي القديمة واباوع لدانيال
اجه يمي كومني من اديه باوع لعيوني
مسح دموعي بأبهامه .
كال شبيج ؟ ليش هالبجي من اول يوم .

جاوبته يعني هسه انته ماتدري بيهن وتكولي غيري تصرفاتج من اول يوم غثوني .

قطب حواجبه على شنوو ؟

جاوبته بانزعاج وملل : لان لابسه اسود ..

كال بسيطة هاي ولا يهمج انتي لو تلبسين كونية هم حلوة عليج .

ابتسمت هو قرب وجهه مني وباسني على شفايفي
وبعدها اخذني خلاني على صدره وحضني .

أنين ..

أخر يوم بالامتحانات دوامنا ظهري ، رجعت بالثنتين الظهر للبيت وفرحانة واخطط راح اكضيها نوم بالعطلة
ودعت صديقتي فاتت لبيتهم واني مشيت لبيتنا
المدرسة قريبة نروح مشي ونرجع .

حسيت بسيارة تمشي ورايه على كيف ، من فترة مرات احس سيارة تراقبني وعبالي اتوهم ، بس اليوم صارت كلش قريبة ، فتت بالفرع مال بيتنا واحس بعدهه تمشي ورايه .

حسيت بيها وكفت التفتت شفت واحد نزل من سيارة سودة عاليه ، خليت ايدي على قلبي والتفتت بسرعة ع الطريق وسرعت خطواتي .

قلبي احسه صار بحنجرتي! واسمع خطوات ورايه
احس رجليه ماتكدر تحملني بعد .. حسيته اقترب مني اكثر وجان يصيحلي برجاء "اوكفي بس احجي وياج شوية ؟"

صارت الدموع تتجمع بعيني وشهكات تطلع مني
صرت كتلة من الخوف ، اول مرة اتعرض لهيج موقف .
شخص يتبعني ومادري شناوي .

صار كدامي قطع طريقي ورعبني اكثر!
باوعتله شفته نفسه حمى فرح الي تهجم علينا
بذيج الليلة!

لزكت بالحايط الي جنت امشي بصفه حبست انفاسي
واريد بس اسيطر على نفسي ماكدر وكعن كتبي والجنطة جنت لازمتها بيدي ممعلكتها بكتفي وظليت متسمرة بس اباوعله يائسة .

هو ابتسم وكال لتخافين لتخافين مراح اذيج
ودنك على جنطتي وكتابي اخذهم من الكاع
ومد ايده ينطينيا .
واني بقيت على وكفتي اباوعله ارجف .

كال بحنية وعيونه تراقبني وتتفحصني واني اباوعله برعب : اخذيهم لتخافين مني الج الامان وماذيج .

بتوسل حاجيته وملامحي تنتحب وانفاسي مخطوفة
: عفية الله يخليك خليني اروح .

ابتسم هو كال اي والله قابل شراح اسويلج بس اني جيت اعتذرلج على الي سويته قبل كم يوم والله مجنت بوعيي اختج حيل اذتني وفرقتني عن حبيبتي
ترضيهه انتي!

همست بضعف وعيوني تتجول وراه خاف احد يشوفنه : عفية احنه بالشارع خليني اروح تاخرت اهلي يخافون عليه .

تقرب مني خطوات فتحت عيوني برعب وهو يحاول يهدأني ، لزكت بالحايط حتى اظافري نبتتهم بي .

هو كال بابتسامة : على كيفج لا تخافين اني ماجاي اخوفج بس جيت اعتذرلج واريد تنسين ذيج الليلة اني غلطت بحقج وماعرف شنو حجيت اصلا جنت بنصف وعي .

هزيت راسي وبلعت ريك من الخوف ...
كال انتي شنو اسمج ؟
سكتت رجع سألني نفس السؤال ..
همست ان ان .. و

ابتسم : الله اسمج غريب وحلو .
عضيت شفتي من جوة بخوف ..

مد ايده انطاني وردة ، ظليت اتنفس سريع واباوعله بتوسل اريد اشلع روحي من الحايط ماكدر وهو نظراته تخترقني كلي .

شافني مااخذت الوردة فتح الكتاب وخلاهه بنص الكتاب وانطاه الي ، بعدني بس اباوعله بخوف وتوسل.

اخذ ايدي وسحبني عليه ، رجفت ايدي اكثر بين ايده ، خله الكتاب بيدي والجنطة وكال يله روحي .

كوة مشبت وبعدت عنه امشي واتلفت وهو يباوعلي ومتكتف ومبتسم .

وصلت البيتنا بالشافعات طبيت سمعت صوت موج تخابر وتصيح بالاستقبال خفت منها هالايام صايرة عصبية حيل .

فتت بالصالة شفت احمد ركضت حضنته
هو هم حضني كال الله شبيج ؟

وخرت منه كتله ها خلصت امتحانات واخيرا

خلصتي امتحانات ليش ترجفين ؟ صاير شي متعرضلج احد ؟

شفت بابا طلع من المطبخ خفت احجيلهم خاف بابا يتعب ..
كتله لا بس سمعت صوت جلب ينبح وخفت شويه .

خله ايده على كتفي كال بتساؤؤل : يله ان شاءالله ناجحة انونه .
همست : ان شاءالله .

هدى ....

وصلنه للسماوة ويم عمامي قريبين علينا ، البيت صغير وبي محل على الفرع ، المنطقة بيها بيوت بس متباعدة عن بعضها وكلها بيوتها تعبانة شويه .

مر شهر تقريبا اني نفسيتي تعبانة ومريضة بس ابد مااشكي ولا احجي مرات تصير عندي لعبان نفس ومرات اتقيء .

مرة ابويه وعلاوي كله بالمحل واني ادير بالي على ابويه تعبان خطية .

مرة كاعدة شافتني مرة ابوي وهي عينها على كلادتي من فترة اخذتها وباعتها كالت راح اجيب بيها علاج لابوج فشلة من عمامج كله عليهم

واني ماكلت شي نزعتها وخليتها بيدها ..

اندكت الباب شفت عمي اخو ابويه فتحته اله وفات جوه ..

كال بويه والله فشلتينه مو عيب عليج زحمة من بيت رجلج جايه بدون علمهم هنانه .

تمتمت عمو اني كتله لرجلي وهو كال روحي .

جاوب ترة عمج ابو رجلج صارله بالاسبوعين يخابر من واحد لواحد ورايح لمنطقتكم القديمة يسأل عليج . وسألني على تليفون ابوج ليش مغلق ... كتله مادري ..

جاوبته عمو تليفون بابا عاطل وواكف ..

كال المهم انه انطيته العنوان وكال راح يجي عليج يريد ياخذج .

فتحت عيوني مصدومة معقولة رجع لهيب!!

يتبع ...