رواية هذيانٌ بين جمرٍ وجليد ..(ارملة اخي المجنونة) الفصل الخامس عشر 15 - بقلم نورا ناصر

السلام عليكم
رواية هذيان بين جمر وجليد
تكملة الفصل العاشر
نورا ناصر

هو اسرابٌ من شرار
وهي موجٌ من جليد ...

يتمنى لو يدفن عشقها في اعماقه السحيقة ..
يواري حباً تسرب الى نبضاته توا .. بات يسكن في ركن قصي من قلبه ..
يود لو يرمي ذلك القلب فوق كومة من الحطب المشتعل ويراقبه ببرودٍ وهو يلتهب ليحترق ويصير رمادا .. و يتطاير الى الجو ليبقى بلا قلب وبلا مشاعر خاويا وباهتا ..
لا يجدها الا مغرورة انانية وقحة .. يشد ازره في كل مرة عندما ينظر اليها ليتأمل حسنها وفتنتها لاجزاء من ثواني ..
رغم شعوره بتخلخل نبضاته وهيجان خافقه بين الاضلع ، الا انه يواجهها برجاحة رجولية و لا ينصهر ابدا اذا رمقته بنظرة او تواجدت بالقرب منه .
فاحيانا يراها امراة بطعم الجحيم واحيانا بلذة السكر ، انثى تجبره على اللحاق بها فوق ارض ملغمة ..
احتلت في قلبه مكانا كان شاغرا لدهرٍ مضى ..
هو دائم البحث عمن ينتشله من تلك الدوامة ..
فهل يحيد عن المقاومة ويعلن بانهزامية عن استسلامه؟
((بقلمي))

ظليت اباوع من بعيد ومترددة ، جان الطنطل شرار ياكل ويسولف وممنتبه عليه ، تقربت كم خطوة
شافني بقيت اتناطح ويا بالنظرات .

اخخ شكد اكرهه نظراته تزعجني عود هو عصبي وكذا
انتبهت عليه لزم السجينة حيل ومصوب نظراته عليه ونظراته تستفسر عن وجودي بهالمكان .

حجيت بداخلي شنو يمه مخليها بوضع الاستعداد
تريد تدججني بيها لو شتريد ؟ كوون اخذها من ايده
ادججه بيها واقطعه اسوي جبن وابيعه كيلوات

اي هو ابيض بلون الجبن مايفرق عنه بس اوووي
ماينبلع ابد .

مشيت بخطوات مترددة باتجاهم وكارهة نفسي والدنيا كلها شون تلاثة اموت منهم ، اوس مكشر ومبتسم
وعبالك منتصر وحسان كاسر ركبته عليه ويباوعلي وهو ظهره صاير باتجاهي بس عرف بوجودي لان صار حديث بينهم .

تمنيت المسافة هاي تطول وماروح يمهم ، هواي امنيات تولدت عندي بهاللحظة ، تمنيت احمد يخابرني هسه وحتى اكله يجيني بس ماصار هالشي .

ومن تذكرت احمد فكرت لاخر مرة اخابره بلكي احصله
درتلهم ظهري ومشيت باتجاه الدرج ، اكيد هسه حسوا بضعفي من مواجهتهم بس شسوي اني بنية وصعبة اروح اتعارك وياهم .

خابرت على احمد هم ماكو اجابة ورجعت خابرت لانو وحتى ظل بالها عليه ..
طمأنتها ووصيتها ما تكول لبابا وماتبين اله شي ومن ارجع اسولف عن الي ديصيرلي .

ختمت الاتصال ورحت باتجاهم بقوة وعزيمة اكبر وناويه اطيح حظهم لان صدك عصبت بشكل مااتحمل ماانفجر بعد اصلا غصبا عني راح انفجر ، بأي حق
هو يخلي سيارته هيج ، اصلا حتى الكراج ممقبط
بس هو مبين متعمد .

وصلت يمهم وجهت كلامي لاوس وحجيت بنتر
_ كوم وخر سيارتك عن سيارتي داطلعها يله .

هو باوع لمستواي واني واكفة بصفه وبلع اللكمة
- : سيارتي ؟ سيارتج شنو السالفة ؟ بس فهميني ؟

_ ايبااه تسوي نفسك ماتدري كلش مدري منو مخلي سيارته ورى سيلرتي بحيث مااكدر افوت جدي طلع من الكبر ، كوم وخر سيارتك يله لا اشتكي عليك .

رفع حاجبه ويمه كلاص سفري جعصه بيده وهو يباوعلي .

هي باوعتله باستهزاء : اووويلي خفتت لا خطيه دمرت الكلاص بابا بطل سوالف الاكشن وكوم وخر السيارة عيب عليك هالسوالف .

شرار بس يباوع ومبين كاعد على نار وذاك جسان التافه بس يتمضحك ..

اوس كال بتعجرف خل اخلص اكل يله اكووم جووعان .

كزيت على اسناني واباوعله بحقد وبقلبي احجي
تاكل سم وزقنبوت ..
هو انتبه عليه .. كال بمكر وابتسامة : شبيج تباوعين لشواربي

_ ليش هو انت عندك شوارب ...همزين نبهتني اكيد شارب زيت الخروع يالله طلعلك كم شعرايه ومتونس بيهم عبالك الكل يباوع عليهم.

سمعت صوت شرار بضحكه ثكيله يكول
_ شنو يريد يجيب وشارب زيت الخروع
وضرب اووس على كتفه...ترى زيت الخروع يسهل الولاده ما يطلع شعر بلحيتك فاهم غلط.وهسه جيت السويج .

ببرود جاوبه: شسوي بي ؟

اووخر السيارة شسوي بي يعني ..

كتلك اخلص اكل واني اروح اوخرها .
يريد شرار يحجي ررن تليفون اوس
شمر الخاشوكة كال اوووو ..

حسان كاله شكو شبيك ..

كاله هذا ابوي المطي ..

همست اذا ابوك مطي انت شنوووو ...

هو كام يريدها حجة حتى يهد عليه ..

ابتعد كم خطوووة للورا واحس الناس تباوع علينه
غصت بنص هدومي شكد كرهت الوضع الي اني بي .

هو يقترب مني كال بعصبية احترمي نفسج ابوك مطي شنو ؟

كام شرار بغضب ودفعه ع الكرسي
_ دكل نعل قابل جذبت اشو انت معترف بابوك مطي وهو صدك لو ما مطي ما خلف حمار مثلك .

ظل يخزر بيه اوس وشرار اخذ السويج غصب من بنطرونه وكال شرفي ست موت ..

خزرته وبقلبي كلت مووت ياخذك ..
ودرت له ظهري ومشيت قبله توه مخليه رجلي ع اول بايه من الدرج .. حسيته لزمني من ايدي وصعدني ليفوك .

التفتت عليه بعصبية ولازمة ايدي الي توه سحبني منها
خزرته ومعصبة عليه : شكوو منو سمحلك تلزمني ؟ عيدها مرة ثانية وشووف شيصيرلك ؟

عاط : شبييج اجيتي توكعين لوو ما اني رجعتج ..

بعصبية : اوكع شبيه اوكع بالله طفلة اول مرة اتعلم المشي لو اول مرة اصعد درج حتى اووكع .

صار قبلي ومشى كدامي ، الحقير عرفته يريد يسبقني
مطبق مقولة مشي المراة وراء الرجل براسي ، هذا مدري شلون جانت متحملته مرته الروسية ، مو بعيدة طردته من موسكو بالجلاليق واجه هنا .

******

هدى ..

كاعدة على السرير وبصفه شباك واني صافنة على برى
بس متشوف شي مجرد سارحة بخيالي والي صار بيوم الحفلة مالة المهر شاغل بالي ومستحوذ على تفكيري طول اليومين الي فاتوا.

ضجت لمن فشلني على البدلة حيل ضجت ردت بس افشله واكسر راسه ، كالوا يله وكلي كيكة بالشوكة
لزمتها قووي وامتنى انبتها بحلكه بلثته ولسانه
بس هو الخبيث لزم ايدي حيل وكبل لا توصل لحلكه
وخرها .

حيل ضجت منه وغضبي تضاعف كلساع يسوي شغلة
ينتقص بيها مني ويفشلني ، كمت شمرت الشوكة
على رجله وبنطرونه انتلف كريمة مالة كيك .

باوعلي خزرني ونظراته ملتهبة لهيب من جحيم النار تخوف نزلت عيني بسرعة .

وصار وقت يشربني العصير ، رشفت رشفة وبعدت وجهي ، هو مكزز على اسنانه وكأل شربي بعد .

عود ديشربني وجان يفرغه كله بصكري عود ميدري الحقير وظل يضحك ..

شهكت و كمت على حيلي ، هو سحبني ورجع كعدني ويضحك بسخرية كال : اكعدي اني امسحه الج
واخذ كلينكس من الطاولة وقربني اله ، طوق خصري
بيد والايد الثانية يمسح صدري بالكلينكس .

اصابعه منبتهم بصفحتي حسيت بوجعي وخوف وقرف
وهو يمهس بأذني بصوت خشن وفحيح متوعد
_ هاي حتى تعرفين شون تتعاملين ويه اسيادج وماتغلطين ولاتندكين .

اجيت ابجي والله متت قهر على حالي هذاشحيسوي بيه موووخوش قسمة والله .

بوقتها احس جمدت بمكاني وهو قرب مني يشاورني ويمكن حس بخوفي وتلذذ بي .
همس وانفاسه چوتني : اي عفية صيري ادمية وكعدي عاقلة .

باوعتله ؛ اصير ادمية لعد اني حيوانه واكعد عاقلة شنو احنه بمدرسة .

_ والله ما ادري انتِ أدرى بنفسج اذا حيوانة لو ادمية .

بقهر : انت ليش هيج حقير ليش .

جاوبني يضحك : بعدج مشفتي شي ..

ارتعد كل جسمي على اثر تهديده وباوعتله بنظرة ارتياب ثواني ودرت وجهي منه اباوع للناس الي كدامنه ولا يدرون ولاهين يصفكون ويهلهلون ويركصون واني الحزن والحيرة ومشاعر الخوف
أسرت روحي ..

لهيب ..

هيج صلافة مشايف اني ، شون وكعت الشوكة ع البنطرون ، هذا شرار جايبلي القاط مو من نفس راضية عينه على فلوسه الفكر ..

اول ماطلعت من الحفلة تلكوني مهيب وشرار
واحد يكلي بقية بحياتك وواحد يكول عظم الله اجرك .

رخيت ربطة العنق واني مفوول عصبية
كتلهم اكلووا تبن مالي خلككم اثنينكم ..

رجعنه للبيت كعدت بالحديقة واني ضايج واحس الدنيا كلها طالعة من عيوني ، كاره حياتي ونصيبي ..
من اتذكرها لابسة القميص الي اجت بي النه
قبل فترة وطالعة جنها معلمة من الثمانيات
اتعصب واظل انفخ .

لو من اتذكرها لابسة حمالة مو نفس لون البدلة او شفافة اتمنى اركع راسي بالحايط لا والله ليش اركع راسي اركعها هيه خو احسن واعلمها الذوق شلونه .

صعدت لغرفتي بدلت ملابسي ونزلت ادور ابوي اريد احجي ويا .

شفته بالديوان ويمه زلم ، جنت مخنوك ومالي خلك
سلمت وطلعت تمشيت شويه بالبستان ورجعت شفتهم
ديطلعون انتظرتهم راحوا كلش ورحت يم ابوي
ظليت اباوعله ثواني واني ساكت ..

كال ها احجي شرايد ليش ساكت ؟
_ احم يابه اريد مستمسكاتي والجواز مالتي انت وعدتني من اعقد على هايه تنطيهم الي .

_ هايه ؟ هايه مالها اسم ؟ من هسه ماتحترمها ولك لهيب ؟ والله اذا سمعتك تقلل من قدرها لو تعيرها
مايحصلك خير والله هالحجي خلي مثل ترجية بأذنك .
وشغلة ثانية تزوج تمم زواجك ووين تروح رووح .

انتفضت : لا يابه لاااا احنه مااتفقنا هيج ابد عقد اي وكافي بس زواج ابد لاتفكر اتزوجها .

بعصبية : شنوو لعد هيه لعبة ؟ تعقد عليها و ماتتزوجها منيلك هالحجي ولك ؟

بارتباك جاوبته : اني ممستعد للزواج هسه .

جاوب : وانه اكلك استعد بآي لحظة تتزوج ومرتك احترمها عيب عليك ولاتظل تباوع للعالي ترى تنكسر ركبتك هي هم بت ناس وادوادم من جايبينها الك من الشارع وعقدنالك عليها .

اذا تريدها تتعلم تكمل دراستها
مابيها شي بعدها صغيرة وتتعلم على كل شي وانت لا تشيل خشمك زايد ترى ينكسر ...

هزيت راسي وطلعت من يم ابوي بخيبة امل ...

*******

مهيب ..

طلعت من حفلة لهيب ورحت لبيت عمي حسان ، ماعندي دوام ، لفيت راسي من المغرب ونمت .
كعدت على صوت المسنجر صرعني بالمسجات .

اني مأيس من ريلام ماتراسل ولا تسأل ابد
واني هم تركتها وقررت اريح راسي ومافكر بيها بعد واشغل نفسي بهواي شغلات رياضة سفر ويه اصدقائي اركز بشغلي واحاول اعيش حياتي خو مابقى اركض وراها .

عبالك كل هالكلام تبخر قبل شويه ولمن لزمت الفون رف كلبي مثل جناح عصفور عسى ولعل ، مراسلتني تسأل عني .

الله يطيح حظج ريلام والله ذليتيني اني ونجمتي وشواربي ..

فتحتهم لكيتها هاي وحدة صارلها كم يوم تزحف يمكن تزلغت ركباتهه من الزحف ، بس اني شاك بيها هاي هيام واتمنى شكي يطلع بمحله حتى افنيها من الوجود طايحة الحظ .

اعرفها هي دوم تراسلني من حسابها الاصلي ومن ترسل مسج تكتب كل كلمة برسالة بحيث اتمنى اكسر التليفون وارتاح ..

شونك
مهيب
شخبارك
شوكت
ترجع
للبيت
مشتاقيلك ..
هاي هيج تكتب .. وتجلطني وهاي نفس الشي فتحت مسجاتها اسمها اميرة بأخلاقي ...

كاتبتلي نفس طريقة هيام بالضبط ..
هلو
شفتك
اليوم
طالع
تجنن
بالقاط
النيلي
لايك
عليك
هنيالها
الي تحبها ...

بقيت صافن ثواني على المسجات مالتها والله هاي هيام العوبة ماكو غيرها نفس طريقة الكلام ، جنت مارد عليها هسه قررت اتحايل عليها واكشفها وباجر من الصبح اروح اطيح حظها ..

كتلها هلو شونج اميرة ؟ صعدي اتصال خلي نسولف ضوجة ودنيا ليل ..

هي جنها ماصدكت بسرعة اتصلت
نفخت بعصبية وجاوبت
هي عود مغيرة صوتها ومنعمته عبالها ماادري كاشفها لو
مدري شسوي ..

بسرعة كتلها هياام ..

هي عاطت شنوووو .. بس من صدمتها عاطت بصوتها الحقيقي مو المزيف ..

سدته بوجهي بسرعة الكلبة دزيتلها مسج
انتظريني باجر اجي اطيح حظج ادبسزززز ..

دزتلي لا عفية مهيب والله دااشاقة وياج

دزيلتها : ولج كلبة تنصبين عليه بكدج اني حقيرة
مشاقيج حتى تتشاقين وياي وتسوين حسابات وهمية بسيطة اني اعلمج اله اطيح حظج وهذا الحساب هسه تحذفينه لو اني اعرف اطلع سوالفج منه كلها هسه .

_ لالا حباب ماعندي شي بي وانت متجاوبني على رسايلي من حسابي الاصلي شدعوة عليك لو ريلام هسه جان بسرعة جاوبتها وهي اصلا متقلدلك .

احسها اخترقت جروحي بكلامها حظرتها ونويت من الصبح اروح للبيت اطيح حظها ..

كمت من الفراش حتى النوم طار من عيوني سويت اكل
وكعدت اكل ، عمي حسان ماكو رغم الساعة هسه تعدت الوحدة مدري وين يروح هو عود عنده صيدلية بس مخلي بيها صيدلاني ونادرا ما اشوفه يكعد بيها .

اكلت وخلصت اكل ، والظاهر هو ماراح يجي الليلة واني باجر دوام عندي خابرته مارد عليه ، قفلت البوب
زين ورجعت نمت ..

الصبح كعدت وكت بدلت ملابسي وتوجهت لبيتنا
خابرت هيام ردت ومبين بصوتها الخوف ..
كالت الو ، مهيب !!
طلعيلي بالحديقة بسرعة عندج دقيقة وحدة بس اذا ماطلعتي اسحلج من راسج سحل واطلع سوالفج مالة البارحة كدام الكل .

_ مهيب حباب شتريد تسويلي .

مجاوبتها وكعدت بالحديقة انتظرها ، دقايق ونزلت بملابس المدرسة صدرية نيلية وقميص ابيض بس مبين بعدها ممكملة لبس حجابها ، لان اني جاي على وكت الساعة ستة ونص .

اجت تمشي وتتلفت ليوره ولازمة طرف صدريتها
باوعت لحنجها بي شامة بس اشو مارف گلبي عليها
تقربت مني ودارت وجهه وكالت : شتريد من هيام .

ابتسمت بسخرية تريد تبيعهن عليه هالملاعيب مال الجهال .. اصلا ريلام من يوم الي عرفت بيه احبها حتى حجاب ظلت تلبس وتغطي شعرها .

لزمتها من زندها درتها عليه بقوووة وصفكتها راشدي قووي على وجهه عاطت ، لزمت خدودها بيد وحدة وصفيتها على الحايط ..

وظليت اباوع بعيونها وخازرها قوووي ، وهي لازمة ايدي وتتوسل ، باوعت لوجهه والله حرامات توأمها انتي حرامات .

حجيت بحدة : ولج شنو هالسوالف هاي الي جاي تسوينها لج عبريها على غيري مو عليه .

حسيت بأيدها انحطت على ايدي ووياها صوتها
اجاني بخوووف : مهيب هاي شبيك تخبلت شدتسوي بهيام عووووفها .

عفت هيام وباوعتلها هم لابسة صدرية وقميص ابيض وحجاب ابيض تأملتها ثواني وبعدت نظراتي منها
عقلي يكولي ها مهيب شكلنه احنه مو كلنه نتركها
مو من نصيبنا وكالعادة تصير حرب بين عقلي وقلبي بكل مرة اشوفها .

استجابيت لعقلي تجاهلتها وحكمت على توسلات مشاعري بالاعدام والتفتت لهيام الي جانت تكح لان خنكتها حييل عصبتني وضوجتني بتصرفاتها .
رحت يمها وبحدة حاجيتها : سمعي ولج ادبسز اذا محد مربيج اني اربيج وخليت ايدي على صدري .

ريلام كالت غير نفتهم شكوو شبيكم شصايرلكم مهيب شكو .

ماجاوبتها ولا التفتت الها ، دست على قلبي بالقندرة
وعيوني جبرتها ماتباوع الها ومشيت طلعت من البيت .

*****

فرح .. واني ع الدرج دا انزل سمعت الحجية ام علي تكول خطية ام سامر الله يساعد كلبها شلون طلعوا جثة ابنها كدامها من الكاع شون تحملت ..

واسمع صوت حسان يكول اي والله الله يرحمه خطية جماعته كتلوا لان هو مهددهم يكشفهم هم يزورون فلوس ويتاجرون بالمخدرات .

الشيخ كاله : بيت مؤيد معروفة سوالفهم ودارت عليهم الدنيا سبحان الله وانلزموا بس كلي انته حسان جانت عندك علاقة بيهم وعلاقة قويه خو ما متورط وياهم ولك ؟ بسوالفهم الوصخة ترى والله اذا سمعتك متورط وياهم بيدي اسلمك للقضاء.

حسيت بصوته وهو يجاوب متلعثم ومرتبك : لا والله شيخ شعندي قابل وياهم اصلا تركتهم من زمان اني وداعتك وروح العزيز حمدان .

الحجية كالت : شدعوة لا تمر لا تجي اله بالشهر مرة !!

_ شسوي حجية هو الشيخ منطيني مواعيد للجية لهذا البيت سألي هو حاجي خلي يخليني ارجع اشوفكم يمته مااريد وخاصة ابن حمدان والله اشتاقله وينه هو خل اشووفه ؟

سمعته حجه بأبني اخذته وصعدت فوك مارحت لغرفتي صعدت للسطح كبل وكعدت هناك رغم برودة الجو شهر ١١ ومرت تقريبا اربعة اشهر على وفاة حمدان .

بقيت كاعدة بمكاني الى ان سمعت صوت سيارة حركت طليت من السياج مال السطح شفت سيارته طلعت ، ارتاحيت ونزلت جوه .

شفت الشيخ لابس دشداشة نيلي ومخلي غترة بيضة على راسه متوجه لغرفته واني ع الدرج الي يودي للسطح .

من شفته ارتبكت ظليت واكفة بمكاني وهو اجه باتجاهي ووكف يم الباية الاخيرة ..
كال بحدية : يمته تبطلين سوالفج وتصرفاتج تصرفات الابطال .

جاوبته : ليش سويت شي اني ؟ ماسويت شي كافية خيري شري وحابسة نفسي بالغرفة حتى لا ازعجكم بعد ويني وين تصرفات ااالاطفال .

باستهزاء جاوب : عبالج تعبر عليه سوالفج ؟ اخذتي الطفل فوك حتى لا يشوفه عمه واحنه ندور عليج ؟
وكمل بحزم : هو عمه من حقه يشوفه وماراح ياكله لمن يشوفه لا تخلين الحقد يسيطر عليج الحقد يولد العداوة ويزيد الكره وكلها هاي تسوي مشاكل بطليها مفهوم .

كال هيج يريد يروح نزلت كم بايه ورحت يمه
اله كولي شيخ ليش برأت اخوك المجرم من قتل صديقه سامر مو حرام عليك ؟

التفتت عليه بعصبية نظراته نافذة مثل السياط
وتبث وعيد رهيب ومرعب للحظة تندمت على سؤالي .

كال بنبرة اشد رعب وقسوة من نظراته ..
_ انت شنو هالحجي هذا منين تجيبين هالكلام وشكد تألفين افلام عقلج هواي يصرف سيناريوهات قللي منها ترى راسج ينفجر .

اريد احجي سكتني بكلامه الي اردفه بقسوة
_ ولج المجرمين طلعوا كشف دلالة واعترفوا هم كاتلينه لان مهددهم يفضحهم وبالتالي الله فضحهم بعد انت ليش متعبة نفسج .

جاوبته باندفاع : بس حسان وحمدان جانوا يتمالخون على موضوع سامر ماكلفت نفسك وسألت عن السبب زين ليش لهسه ماعرفنه منو كتل اخوك حمدان منو كتله ؟ هااا منو كتله ؟

كال وهو خازرني : انت الحجي وياج ضايع اصلا حرامات احجي وياج اتجاهلج افضل لان من صدك انت جاهلة .

كال هالكلام واحس فشلني راح لغرفته العرندس واني رحت لغرفتي ..

هدى ...

اجتنا بنت خالي هي وامها ، كعدنه اني وياهه بالغرفة
نسولف ..
كالت مبهورة : ولج شنوو هاي هديوى هذا خطيبج والله تحفة منين حصلتي منين جبتي يبوووو يلمع يلمع وينكط كارزما والله محظوظة انت هنيالج .

شبكت اصابعي وحجيت بسخرية
_ اي هه طلعلي بسحبة اليانصيب ..

ضربتني على كتفي بخفة : ههه نزول عليج اكيد الليل كله سهرانين انت ويا وتسولفون وتترومنسون واحم احم هههه اعترفي ولج هديوى اعترفي .

ظليت افر بيدي ولج من شهر واحنه مخطوبين واني ماعرف عنه شي اصلا حتى ماشفت ركعة وجهه بعد .

عضت شفتها اخخخ لج هذا ينكال عنه ركعة امداج رافسة نعمتج بيدج مطية انت بادري وخابري ليش تنتظرينه يخابر .

منيلي تليفون صدك جذب منج انتي يمعودة وبعدين ترى اني ماكاتلة روحي عليه بس غير ابوي انطاني الهم وفرضني عليهم واذا عليه والله مااقبل بي مغرور حيل وشايف نفسه ومؤذي .

_ دنجبي اصلا مبين رومانسي شلون حضنج وظل يمسح العصير الي وكع على صدرج .

_ هو منو وكعه غيره اصلا حضنته تموت عنيف حيل نبت اصابعه بخصري وجعني يومين متوجعة من وراه .

_ غير انت تتعيقلين ودايرة وجهج هو يريد يشربج وبدون قصد وكعه عليج وهم مقصر بيده مسح الج يابه شكد حسدناج بوقته اصلا هو يمسح العصير وعينه على صدرج .

خليت ايدي على صدري شهكت : عزااا صدك تحجين شكد سخيف ومسوي نفسه فد نوب براسي ثكيل وميتحاجه .
كملت بقلبي واني اكول شون انتبه للحمالة اثاري مركز الساقط ..

مدتلي تليفونها : دهاج هاج خابري هسه واحجي ويا سألي عنه شبيج يحظي .

_ لج عيب شكو اخابره واحجي ويا صدك تحجين اني ماعندي علاقة بي .

_ امداج يالعوبة وتكول ماعدها علاقة لعد غير انت مرته يالحمارة .

جاوبته بقهر : اي بس بالاسم لا هو معترف بيه ولا اني معترفة .

_ كل هالطول والشخصية والابها والشمووخ وممعترفة بي امداج مانتبادل اني وياج شنو رايج .

_ شبيج عهود ثكلي شويه شوتين عيب عليج .

ضربتني على ظهري : دااشقة شكد نفسية انتي نزوول عليج كبر طمج يالعوووبة . اخذي الفون وخابري هسه واني اعلمج شنو تحجين ويا وشتكوليله بلكي تتعودين ويتعود وتعيشين عيشة سعيدة هههه..

باوعتلها بعدم رضى وبملل رديت
_ ماعندي رقمه ولا اعرفه ولا اريد اعرفه ولا اريد اتعود عليه خليني هيج احسن وانتي لا تتعبين نفسج .

_ اكيد ابوج عنده رقمه هذا النسيب هذا ..

طلعت من الغرفة واني ظليت افر بيدي حقها ماتعرف
اني ويا صايرة حرب البسوس.

رجعت ورى دقايق فرحانة عبالك منتصرة
بأم المعارك ...
كالت اخذته اخذته من ابوج يكول اخذه هو من ابوه .
واجت كعدت يمي واني صافنة وساكتة وباردة مثل الجليد ..

اتصلت وخلته على اذنها ومبتسمة ومنترته يرد
باوعتلي تضحك كالت بهمس جاي يرن ..

عوجت حلكي ودرت وجهي بدون اهتمام ..
لشويه عاطت كالت ولج جاااوب .
فزيت وهي خلت ايدها على حلكها تكتم ضحكها .

خلته على اذني كالت احجي ولج احجي ..

اباوعلها بنظرات باردة وهو طرش اذني يصيح
الوو منوو احجوو ترى راح اسده .

وهاي عهود خبلتني بس تكرص بيه ردي ماردي ..
انجبرت اكول بغصة الو .

اجاني صوته الخشن : منو انتي احجي ؟

ارتبكت وخجلت جاوبته : اني هدى ..

جاوب ومبين جذاب عرفني بس يتصنع .
هدى منو ؟

حسيت قلبي راح يووكف من القهر : هدى خطيبتك ..

رد بتكبر وملل : اي وشتردين هسه ..

همست بغصة عذاب : ما اريد شي سلامتك .
سداه بوجهي .

غمضت عيوني فشلانه كوة ابلع ريك طلعت من الغرفة اركض مالي عين حتى اباوع بعين عهود .
ليش ينتقص مني ليش هيج يعاملني ، بالله اني بنية وانجبرت هو رجال شكبره شكده ليش مايرفض .

للمغرب يله رجعت للبيت يائسة مثل الي ينتظر حكم اعدام ، شفت عهود وامها رايحين ، شافني ابوي
كال ها خابرتي لهوبي شحجيتوا شكال شكتيله .

رحت كعدت يمه : يابه الولد مايريدني سده بوجهي حرام والله حرام طلكني منه ماريده انتوا حرجتوهم انته وعمامي وفرضتوني عليهم يابه وهو مارايدني ترى والله بعد كم يوم اجيك مطلكة عاد فضها من هسه احسن .

هو تخبل وعاط بيه : انجبي تردين من هسه غزل وطيحان حظ ولج شيكولون عليه ادبسز .

حجيت بمرارة : لا ماكلت هيج يابه ماريد غزل بس ع الاقل خل يحترمني ميصير هيج ينتقص مني ومايقدرني .. وكملت بقهر : ليش رخصتني بويه ؟

مرة ابوي كالت باندفاع وعصبية : رخصج شنو اشو تكومين وتكعدين تكولين رخصني لو ما منطيج لناس اوادم ابوهم شيخ والعالم تحترمهم وبس اسمهم يهز الكاع .

عدلت كعدتي اباوعلها وبعدها نبرة القهر مسيطرة عليه
_ يابه خل ينطيني لواحد يشتغل بالبلدية بس كون يقدرني ويحترمني ويحبني شالفايدة اذا اني كرامتي مسحولة .

ابوي باوع لمرته وكال بتشجيع : والله كلامج درر ام علاوي صدك اسمهم يهز الكاع وظل يباوع بحالمية صوب التلفزيون .

وهي هم ابتسمت ورفعت اكتافها بفخر عود مستلمة جائزة الاوسكار هيه اي والله تستلم جائزة باللواكة والسم .

فرح .. خلصت العدة مرت الايام بسرعة ماجنت متوقعة بيوم راح اطوي صفحة من حياتي اعيش ارملة ويبقى حسان بس ذكرى .

تنفست بقهر وطلعت صور الخطوبة والعرس واحس بألم بصدري يوجعني حييل ، الم فقدانه لو الم خذلانه .

خابرتني موج كعدنه نسولف وكالت اجه الشيخ قبل كم يوم وانطه لبابا فلوس القسط الي اخذهن منه حمدان .

ماتفاجئت صراحة ابد هو الشيخ مايحب الظلم بس ماعرف شنو ضام عني وخاصة بخصوص حادثة قتل حمدان .

سديته منها ونزلت جوة ادور عليه وين صار
شفته بالصالة بيده استكان الجاي وكاعد يم امه .

وكفت كباله كتله جان ماله داعي تسدد دين حمدان انت مامسؤؤل عنه وخاصة انو الورث مالته وحصته كلها اخذها جان خليت حسان يسددهم هو مديون الي ولدانيال ابني .

تنفس بضيق وامه ظلت تفر بيدها ودارت وجهه ..

عيونه كتلي انتي راح تبقين هيج ؟
بس يمكن ماراد يقلل من قيمتي كدام امه ..

حاولت للحظات انسى انه عدوي واكون ممتنه اله
بس مدا اكدر ..

خله الاستكان ع طبلة كدامه وبعد صمت دقايق طويلة
نطق كال واجبي هذا ثم هالموضوع بيني وبين ابوج انت لا تتدخلين ..

بهالاثناء دخلت بلقيس ووياهه نسوان اثنين
وحدة مبينة خمسينية والثانية بمنتصف العشرينات ..
العشرينية بيدها طفلة مبين عمرها بالاشهر ستة او سبعة بهالحدود ، ملامحها مألوفة بالنسبة الي .

بلقيس جانت صافنة وجهه ينطي الوان ومصدومة
المراه الخمسينية سلمت ، الشيخ وامه ردوا عليها ..

اخذت البنية من العشرينية وقربتها للشيخ
وكالت تفضل شيخ هاي بنتكم .

يتبع ...

اشكر كل الي تفاعلوا ع البارت التاسع فديتكم شكد احبكم 😍😍😍

وخاصة هالبنوتة 2005_Helen

SaraAl_Rubaie متابعة لحساب الكاتبة