رواية هذيانٌ بين جمرٍ وجليد ..(ارملة اخي المجنونة) الفصل الثامن وأربعون 48 - بقلم نورا ناصر

السلام عليكم
رواية هذيان بين جمر وجليد
الفصل ٤٣
نورا ناصر ..

‏مازلت أختار أن أحبّك . .
رغم تعب هذه الأيام ؛ رغم رغبتي في الصمت
والإنعزال عن كل شيء ؛ رغم أن الحياة لم يعد فيها
ما يدهشني . . ورغم كل الأشياء التي فقدت بريقها
في عيني . . مازلت أختارك دون #تردد !!

هدى ...

لاااايربي بعدني ماتهنيت بيها ، ولا شبعت منها ومن سوالفها ، جابتها ويايه ضيم بضيم حالها من حالي ، ضاكت المر والعذاب وهيه صغيرة ، لا يربي لاتحرمني منها ...

اسمع صوتها يوصلني بعيد كلش بعيد بس اني فقدت كل شي ، لا اكدر امشي لا اكدر احرك نفسي منهارة بمكاني ويتخيلي اسمع صوتها ...

خشمي طك دم وزاد رجيف جسمي ..

سمعت صوت الباب اندكت بعنف ، لزمت قلبي بيدي ، حاولت استجمع شجاعتي وقوتي وأكوم بس مابيه .

صووت ناس برة يمكن الجيران ، لزمت بالحايط دااكوم وكعت وماحسيت بشي بعد ..

بس صحيت على عطر يتخلى بأنفاسي وراشديات تضرب بوجهي ..

اجاني صوت لهيب ، قبل لا افتح عيوني ببطئ
باوعتله شفته كبالي بس صورته مغوووشة جانت ..

زادت وتيرة انفاسي ، وقلبي يضرب على اضلاعي بعنف
اتضحت صورته كدامي ، شفته شايل الطفلة ..

شهكت ونشغت وبجيت ، باوعتله بتوسل
بس كولي خو ماماتت لهيب عفية ..

بلع ريك بصعووبة ، ورد عليه بشتات
_ اسم الله اسم الله مابيها شي بس شفتها سكرانة من البجي وينج انتي عنها ؟؟

بجيت اكثر وانتحبت واني اجاوبه
هنا اني والله هنانه بس ماكدرت اكووم ..

رد : ليش عايفتها وحدها ؟
_ رحت للحمام بس ..

كال جان انتظرتيني بين ما اجيت يله رحتي
لزمني من ذراعي وكومني من الكاع ، اديه ترجف وعيني على بنتي الي جانت بعدها تناشغ ..

ودانه للصالة خلاهه بحضني جمعت قوتي حضنتها حيل وبجييييييت هوايه وهو مدري شيسووي محتار يروح ويجي .

ديطلع من الصالة صرخت عليه
لاتتركنا لهيييب لا تتركنااااا ..

اخذها مني ورجع رفعني من الكاع
كال كومي بغرفة النوم وهسه شويه ونطلع المكان هنا مو أمن النا بس ارتاحوا شوي ونطلع ..

دخلني للغرفة رجليه كووه امشي عليهن احس مفتتات تفتت ، كعدني ع السرير وخلاهه بحضني
كال رضعيهه بلكي تسكت ..

حاولت ارضعها ماتريد صدري تدور وجههه وتبجي اخترعت خطية من صوت الطلقات ..

كتله منو الي سوا هيج ؟ منو رمه على البيت ؟

كال عمي حسان عنده هوايه عداوات واني غلطت من جبتكم هنا .

سألته والعبرة خانكتني : لعد وين نروح هسه ؟ نرجع للقصر ..

رد بأصرار : لاء ابوي مايريدنا بعد ...

بنحيب : كوله على وضعنا عفية بلكي يقبل واني مستعدة ابوس رجله واعترف بكل شي ؟

كال اششش ولا صوت اسمعلج لا تخليني ابلش بيج هسه ... سكتي شتعترفين والله يا هدى اذا جبتي طاري للموضوع كدام احد اطيح حظج من صدك هلمرة ابتلي بيج ولا تكولين ماكلت ..

بطلي غباء وفتحي عقلج زين ..

عضيت شفتي بقسووة واني احاول اسكت ديما بس متسكت ..

تسكت شويه وترجع تجرها بجية ..

يريد يطلع صرخت عليه مرة ثانية لهييييب لا تطلع لاتتركنا الله يخليييييك .

كال اششش سكتي رايح اجيب قرآن اقرأ عليها متشوفينها راح تموت من البجي ..

رمشت بعيوني المبللة بفعل الدموع وهو باوعلي مخنزر وطلع ..

رجع بعد ثواني بيده قرآن ونازع سترته
ومشكل ردانات قميصه ووجهه وايده مبللات مبين متوضي .

وكعد يمنه ظل يقرا قرأن بصوت مسموع ، صوته مبحوح لأن هو مريض اصلا وانفلونزا ..

ظل يقرا سورة " يس " وايده على راس ديما ..

ظليت اشهك ومخارج انفاسي انسدت على كد مابجيت .. خله ايده على كتفي وعصره شويه يريدني اسكت ..
باوعتله بقهر وعيوني على خدي مثل المطر الغزير ..

هيه هم هدأت شوية وظلت تدور وينه صوته
بعده توقف عند اية وكال رضعيها يله بلكي ترضع..

اني اخجل منه ومالابسه لا شال ولا شي اخلي على صدري واغطي ..

بقيت اباوعله هو خزرني شبييج شكوو ؟ ماسمعتيني ؟

اكو كوشايه صغيرة ع السرير اخذتها وخليتها على صدري هو باوعلي رافع تك حاجبه باستهزاء ودار وجهه

ظليت احاول ارضعها ماتريد تدور وجهه وبس تبجي وتشهك..

رجع ظل يقرا بالسورة على راسها وكملها للأخير
وهيه سبلت اجفانها وغمضت عيونها وهدأت انفاسها ..

باوعتله كتله نامت جوعانة سودة عليه ..
سد القران وبقاه بأيده وكال من شوكت مارجعت ؟

مادري بس هيه جانت نايمة
كام على حيله وكال تجوع وترضع هسه عوفيها اهم شي سكتت ..

راح خله القرآن على الدولاب الي بصف السرير ..
كتله شراح نسوي هسه ؟

حضري نفسج نطلع بعد مانبقى هنا اني راح اروح اخابر عمي حسان ومهيب ونشوف شنسووي ..

سكتت ماحجيت بعد وهو طلع من الغرفة .. واني تمددت بصف بنتي واباوعلها كلساع تفز وترجع تنام ..

صفنت عليها واني ابجي الى نمت ، كعدت هو يكعد بيه
كمت فازة مخرووعة ميتة من الخوف ..
هو ظل يهدأ بيه ..

كال مو كتلج حضري نفسج اشوو نمتي ؟؟ دكومي كوومي خلي نولي منانه لايصير غير شي يله ...

كمت احس مكسر جسمي والخوف بعده نايم بضلوعي
اني كمت وهو كعد على السرير يباوع لديما ..
كتله انته ابقى يمها لتعوفهه وحدها راح اجمع الاغراض واجي ..

بس باوعلي ودار وجهه تمدد يمها وظل يمرر اصبعه على خدها ..
وباسها على راسها ومغمض عيونه ..

وكفت اباوعلهم ثواني ، فرحت لأن يحبها كل هذا الحب .. رغم اني محرومة من االحب ..

رحت جمعت الاغراض كلها ولبست وفتت عليه للغرفة جان لازم موبايله بيده ويراسل مدري منو ..

شافني كام على حيله وغلق موبايله وباوع على ساعته
كال خلصتي ؟
هزيت راسي بأي ..

اشرلي على ديما كال لفيها عدل عن البرد وامشي يله ..
تحسرت اخذتها مشيت وراه وسألته وين حنروح هسه ؟

باوعلي بنظرة مقتضبة بس ماجاوب تجاهلني ومشى
كززت على اسناني ولحكته ..

صعدنا بالسيارة .. هو طول الطريق يخابر وكلساع يخابره وكلساع يعصب ويصيح وينتبه لديما تبجي
يسكت ..

وكلوله روح لخوالك بس هو ماقبل
اخذنه لفندق ومهيب اجه بالليل انطاه فلوس
ووعده يشوفله شقة بمكان زين هاي الايام ..

تبهذلنا يربي من مكان لمكان واكلت خرعة انضافت لايامي السودة والقلقة وبعمري مراح انساهم ..

شرار ..

وصلنا لكركوك واحنه بالفندق اجانه خبر بيت احسان انضرب ، رحت لزمته ولك هذا منو الي ضرب بيتك ؟ ليكون اوس ؟

شكل رداناته ع السريع وباوعلي يضحك
لا ولك اوس ينطبق عليه المثل
ضم راسه الجان يعوعي ومحتار وين يختل ايامه معدودة ..

خليت ايدي على كتفه لعد منو هذوول ولك ؟؟ ليكون بعدك تتاجر بالمخدرات ؟ وهذول عدهم وياك طلابة ؟

باوعلي ورجع ابتسم لا مجرد تصفية ماضي ..

تصفية ماضي مووو ؟؟ هالماضي راح يظل يلاحكك طول عمرك تره ..

كال شكد تحب تاكل تبن اسكت وانطم ..

_ مااكلك ... وبعدين هذا الزمال لهيب مالكى غير بيتك ؟ يروح بي يكعد ..

_ شسوي هو بيتي بيت الزعلانين والمطرودين والمسحولة كرامتهم ذهابا وأيابا ..

وبعدين ليش هو بس لهيب زمال هاي انته وياي اشو مخايف على نفسك ..

_ اني بطرك روحي مو هو شايل كوم لحم وياه بنته ومرته خطية شنو ذنبهم ذول ..

راح كعد ع سرير يلبس جواريبه ..
كال هو اني مثل السمج ماكول مذموم صوجي اسوي خير والله صوووجي ..

فريت ايدي هيج خير هم مينراد ..
وخابرت لهيب رزلته شويه ، و ممرتاحله ابد اعرفه ضام شي جبير ، تركته مالحيت عليه مو فارغ له ..

وصلنه لكركوك وبدأت تحرياتنا ويانه ضابط ، وانطينا مواصفات احمد ..

عرفنه مسوين مستمسكات تزوير بس نريد نتأكد من المكان الي هم بي ..

سألنه بالمنطقة نفسها الي راحوا الها جماعة حسان عرفنه عنوان شخص اسمه ابو حسين ..

ظلينه ندور بالمنطقة نريد نعرف هم وين بالضبط ونريد نتأكد ..

توجهنا للعمارة راقبناهه ايام يطلع منها شخص عرفنا احمد رغم جان يطلع متنكر كاسكيتة نظارات وهيج

بقى بس نريد نتأكد اذا البنات وياه بهالشقة او بغير مكان لأن ماشفناهن طلعن ابد طول فترة المراقبة

دزيناله واحد كناله روح استطلع الوضع واسأله عن حي الله شخص ..

راح ورجع كال ماشفت بنات بس حاجاني رجال من وره الباب وسمعت صوت طفل يبجي جوه الشقة ..

هنا تأكدنا انو هنه موجودات وياه ، خابرت على الشيخ
كتله شيخ تأكدنا من وجودهم نطب عليهم نكبسهم ؟؟

كال لاااا دير بالك تطب عليهم للشقة اريد نلزمهم وهم شاردين احسن ..

بس كلي شوكت يطلعون همه ؟؟

جاوبته متفقين ويه سايق يوديهم لأربيل باجر الفجر ...

كال تمام باجر كبل الفجر انه بكركوك ..

فرح ...

جنت اريد ارجع لعلي من صدك .. بس لمن اندكت الباب واحمد ردة فعله وشون خوفتني تراجعت ..

وظليت خايفة من ردة فعل علي اذا ارجعله اعتقد فات الاوان وترطت هسه ، الحيرة تاكل برووحي شون ارجع ابقى شلووون !!

اجه احمد فتح الباب مخنزر ونتر ماتعرفين تسكتين ابنج شوية؟؟

كمت ع حيلي بسرعة وكفت بمواجهته
ليش منوو اجه موو هذا

هز راسه وكعد جوة بالكاع مادري مادري مافتحت الباب من وره الباب جاوبته سألني على شخص ما اعرفه ...

رحت كعدت يمه لزمت بركبه وعطت عزااا لعد هذول همه

باوع بوجهي وفاتح عيونه بصدمة منوو همه منووو ؟؟؟

منو بعد منووو لو اوس لو علي دز علينا جماعة وديأكد احنه هنا ..

كال مابقى شي ونطلع مستمسكاتج وخلصانة وكلشي جاهز والاغراض كلهم بعتهن وباجر نطلع لأربيل ومناك لتركيا ونخلص ..

غمضت عيوني بخوف وقلق والحيرة تنهش بيه
احمد .. ميجاوبني مخلي اديه على راسه وجبينه على ركبه ..

لزمته من كتفه اهز بي احمد احمد رد عليه جاووبني

كال بتذمر هاااااه......

كتله مابيها مجال

رد بعصبية وخازرني شنوو مجال بعد فرررح شنوو؟

جاوبتي ببكاء : نرجع لبغداد

كالت موج حنيتي حنيييتي لايام الذل والاهانات متعيشين بدونها ..

رحت يمها لازمة بطني الي بلشت تبرز
حسي بيه عندي اطفال شون ابقى العمر كله مهزومة من رجلي ؟؟

كالت دخيلج فرح اصلا الاطفال راح يتمرمرون وياج والله .. الطلعة احسن النا

لطمت على رجلي وشكول لجهالي اذا كبروا وين اهلهم وووين ؟؟

الكل سكت واني بقيت محتارة حتى دانيال يبجي مو بحاله اني ، راسي احس راح ينفجر ، انين تكفلت بي وظلت تسكت بي بس شبعت راشديات منه ..

يوم ثاني صار عدنا مثل الانذار مانمنا الليل واني دموعي مابطلت ومابيدي شي على روحي محتارة اصلا محتااارة بين اروح وياهم وبين ارجع واصلا مصيري مرتبط ويا مصير اختي لان هيه هم على ذمة شرار بعدها ..

قبلها اجونه بيت عمو ابو حسين ودعونا هو وزوجته والبنات ..

وهو عمو رغم خطية امكانيته مو كلش تمام بس هم خله بيد احمد فلوس واحمد رفض ياخذها بس هو اصر ..

احمد هواي صرف علينا خطية فلوس سيارته كلها صرفهه بين ايجار واغراض وطبيب وتزوير المستمسكات وهماتين التكسي الي جابنه لهنا وفندق اول ايام ووو كوومة ..

وموج هم اخذت من مهرها وساعدته ...

اما اني اجيت بطرك روحي وابني حتى ذهب ما ويايه بس حلقتي مالة علي الي بأصبعي وبقيت محتفظة بيها ولا يهون عليه انزعها .

طلعنا الفجر من الشقة وصعدنا بسيارة تكسي ..
حسينه اكو سيارات تمشي ورانا لمسافة

قلقنا ومتنا خوووف والصبح شويه ديطلع ..

الى ان صارت سيارتين سود عاليات وظلن يدكن هوورنات قوووية يردون السايق يووكف ..

ظلينا نباوع من الجامات مصدوومين وخايفين عبالنا سلابة

ماتوقعناهم هم ابد ، لزمنه بادين بعض اني واخواتي كاعدين ورا

واحمد يتلتفت محتار وكلساع يباوع النا وعيوووونه تحجي الخوف والقلق علينا .

الى ان السايق قلل السرعة وصار يمشي بطيء ..

ووكفت سيارتين وحدة كدامنه ووحدة بصفنه ..

ونزلوا منها شرار وحسان ووجوهم تقبض الانفاس ..

هجموا على السيارة فتحوا باب الصدر وطلعوا احمد بعنف ووقسوووة ..

نزلنا احنا نتصارخ نفارغ بينهم واجاني ذاااااك الصوووت الي خلاني انعزل عن العالم كله ..

_ حسااان شرار تركووووا بووويه لحد يلزمه ولا احد يمد ايده عليه ..

تركوا وشرار جان لازمه من ياخة القمصلة تركه وهو يدفعه دفع ..

التفتت عليه باوعتله بهيئته المعتادة ، البشت الشماغ نضارات السودة مشتاقه لهالهيئة هاي ، باوعت وبيده
عودة لازم بيده ووياهه سبحة .

عيونه ماتفارقني وبنظراته عشرات الاسئلة واني اشوف الاتهام الصريح بعيونه جان اقوى من كل دفاعاتي

ماجنت رايدة هذا اللقاء بيننا ، جنت اتمنى يطلع من المستشفى او لمن كعد من الغيبوبة اتلكاه احضنه واتحمد له بالسلامة .

مو اتوسله يترك اخويه وماياذيني ..

تقرب من احمد ونزع المناضر وظل يباوعله بنظرات غضب
روووح احنه ما نريد نتقاوه عليك حتى لا يكولون الشيخ و واخوته تقاوو على ولد وحييد بس انته لازم تتعاقب ..

رد عليه احمد ليش اتعاقب شيخ شمسوي اني ؟ خواتي واريد اطلعهن واحافظ عليهن ..

رد عليه بقسوة وجبروت والشرر يتطاير من عيونه
_ هذن النسوان ملك يمينه انت مو من حقك تاخذهن بدون علم منه .

مدام طلعت من بيتك وصارت بعصمة رجال رجلها صار مسؤؤل عنها مو اخوها

ظل احمد يصيح : شيخ اني تهددت وخواتي هم تهددن شون تريد ابقى واشوفهن يرحن من ايدي كدام عيني وهنه خواتي عرضي من لحمي ودمي وامانة ابوي ..

كاله بصياح : تهددت تجي تحجي ودكول وشوفنه شنسوي مو مثل الحرمه تاخذ اخواتك وتنهزم ...

شيخ ترة اني طلغت لان انتوا ماكدرتوا تحمووونه

رد بغضب ويضرب بعصاته ع الكاع
ولك شون مانكدر نحميك ازلامي وووين راحوا اولاد عمومتي وووين مايكدرون يحمون مرة الشيخ وعايلتها شجاي تحجي انته ؟؟ الانهزام عمره ما جان حلال انهزام هزيمه

كال شيخ ترررة اخوك بعظمة لسانه كالي اطلع من بغداد .. اساله اخوك حسان ..

الشيخ باوع لحسان وكله ولك انت شلون هيج تكله وانه اكول عليك سبع رغم نذل؟؟

حسان جاوبه : ما كتله اخذ نسوانه هو مطيي كتله اخذ اختك الصغيرة وروووح ..

وبعدين شيخ قبل لا تحاسبني حاسب فرح هي الي طلعت من دون علمك ....

باوعلي وعاكد حواجبه والرحمة اختفت من عيووونه
هو انتوا كلكم راح تتحاسبون محد راح ينترك بدون عقاب ويله النسوان تحولوا للسيارة ...

احمد ظل يصيح خواتي مايرحن وووياكم خواتي تهددن بنص بيتكم وبنص بيتكم انطعن بشرفهن

رد عليه احنه نرجع حكهن وانت عقوووبة الك بغداد ماتوصلها بعد ..

صاح ليييش ليييش بعد تحرمووني من ديرتي ...

جاوبه كووول لنفسك ليش ولك انت ماتشوف نفسك على شنوو ناوي مزور مستمسكات ماخذ مرتي ومنهزم انت عتب بغداد واله اشمرك بالسجن بتهمة تزوير واختطاف وتهريب همين

صرخت اني لااا عفيةةة لاااا علي الله يخليييك

ورحت يمه وكفت كباله جان يباوعلي
بطريقة مرعبة كتله بتوسل وبكاء
الله يخليك لا تسووي هيج باخويه حرام عليك حاسبني الي .. اني الغلط مني عووفه هو ..

خزرني ولزم ايدي حيييل حتى سبحته نبتت بلحم ايدي
وتوجعت وكز على اسنانه بعدج ماشفتي شي كدامي للسيارة يله ..

يتبع ...

هذا مو بارت هذا بارتوت عنون 😢😢😢😢😢🥺🥺🥺اعرف اعذاري كثرت بس والله لو تدرون شون كتبته كووووة كتبته
ان شاءالله انزله تكمله ..