رواية هذيانٌ بين جمرٍ وجليد ..(ارملة اخي المجنونة) الفصل التاسع وأربعون 49 - بقلم نورا ناصر

السلام عليكم
رواية هذيان بين جمر وجليد
الفصل خمسة وأربعين
نورا ناصر ...

''''''''''''''''''''''''''''''''
‏الأمر بات أكبر من أن أراك غريبا، أصبحت لا أعرفك ...

''''''''''''''''''''''''''''''''

وغدآ أسافر من حياتك...
مثلما قد جئت يوماً كالغريب !

''''''''''''''''''''''''''''''''

بعد ما سمع كلامي باوع لبطني لااراديا وجان يتقاذفني بنظرات من نار .....

اني جنت لابسة صاية سودة عريضة وبطني مو كلش تبين منها ..

واصلا ضعفت وذبلت حيل ، رغم بطني شويه بارزة بس صغيرة ..

باوعلي بغضب وزفر وكأنه مايدري منين يبدي ...
واني الخوف سيطر عليه وصارت كل اطرافي ترجف بانفعال ... والالم يطحن قلبي ......

انفجر غضبه فجأة وظل يهتف بوحشية .. ويشدد على احرف كلماته دلالة على مرحلة الغضب الي وصل الها ...
ولجججج انتي شنوووو عذر اقبح من فعل ؟؟

الخوووف قلصني وقلبي بين اضلاعي صار يرتجف
خوفتني نظراته الي برقت بعنف وشر وجبروت
ودنكت .. راسي

هو اقترب مني لزم شعري بقوة سببتلي الالم ورفع وجهي باوعتله متألمة والدموع تجوي قلبي وخدي ..

واسمعه يكول بنبرة صوت مصرور ..
رفعي راسج وباوووعلي لاتدنكييين ولج جنتي تريدين تشردين وانت حامل ؟؟؟؟ وتخليني وراج ؟ ها ولج احجي احجيي ليش ساكتة وعاااط احجي......

هزيت راسي من الخوف الالم اختفى فجأة جسمي ماحسيت بي بعد ، فقدت الوعي .. واني بحضرة جبروته وبين ادين ظلمه الي مقيدني ..

لمن وعيت فتحت عيوني ، شفت نفسي متمددة على الدوشك الي ع الكاع ، تمططت لان احس عظامي مطحونة ..

واني دا اتمطط التفتت واشوفه كبالي كاعد على الكرسي ..
بهيئته المعتادة دشداشته النيلية وبدون شماغ وبيده العصا مخليها كباله ولازمها بادينه الاثنين ..

بقيت اباوعله مبهورة ومصدومة وهو ظل يراقب الدهشة بعيوني ثواني ..

قلصت نفسي وحضنت جسمي باوعتله بذهول واعصابي متوترة .. كل قوة ماعندي ومنتهية ..

بصوت مرتج وجهتله كلامي : علي لاتسوي بيه هيج حرام عليك ارحم ضعفي وارحم بذرتك الي ببطني .. اذا تأذيني راح تأذيهه ..

وياك جنت بقلق دائم وجنت اترقب نهاية العلاقة بآي لحظة .. وبهاي اللحظة راح تاخذ ابني وانت سويتها من قبل واني ما اعيش بدون ابني .....

اعترف زواجنا غلط واني تسرعت لمن قبلت بيك
وجنت اعرف راح يفشل ومو شجاعة ندخل بمعركة ونعرف مسبقا انها خاسرة ...بس صارت وخسرنا ..

كال بلهجة استبدادية : انت رسمتي بدماغج الصغير هاي الفكرة واقتنعتي بيها .. وماحاولتي تجرين عدل ابد ولا مرة كل مرة توكعين بغلط اكبر من القبله ..

صرخت بنحيب ...
علي اني ماردتك تهديني الشمس لو تحط بايدي القمر ، ولا تماديت وياك بالاحلام والامنيات ..

ردتك امان وسند بعد مافقدت الامان ، ردتك واضح مثل الكتاب المفتوح بس انته متعود ع الغموض ..

_ وتصرفاتج هاي شتسمينهاااا ولج ؟؟ أسافر يجيني اتصال مرتك طالعة من البيت وليلة كاملة محد يدري بيها وين ؟ اكووو مرة عاقلة تسويها هاااا

صرخت اهلك السبب اهلك وووومنين اجيب العقل انتوا سلبتوني كل شي واولهم العقل ..

اجه كرفص كدامي تراجعت للخلف مرعوووبة
صرخت علي لاااتضربني لا تعاملني على اني رجال مثلك لاتعاملني هيج لاااء ..

لزمني من كفى ركبتي بعنف عطت بدون وعي متألمة..
وبفحيح وجه كلامه : المرة الي ماتحترمني وتطلع عن طوعي ماريدها مرة الي ولا اتشرف بيها .

باوعت لعيونه بقهر ومتووجعة من قبضته...

كل تصرفاتج غلط ومااعتقد راح تتعلمين من اغلاطج السابقة .. وراح تبقين هيج طول عمرج وانه ماريد ابقيج على ذمتي بعد لان اغلاطج و تصرفاتج راح تنحسب عليه .

وانت ماخليتيني كدام عينج من تصرفتي هاي التصرفات وانا شيخ جبير اهلي وناسي وعشيرتي ومرتي هيج لا ماترهم .

فلت ايده مني وكام كعد على الكرسي ..
اني عدلت شعري الي وكع على وجهي وكتله بنبرة استهزاء واضحة
_ ماعجبتك تصرفاتي ليش جاي ترجعني ومكلف نفسك .. وانته بهالوضع هذا ومبين تعبان ؟؟

وفجاة طل من عيونه وعيد رهيب خلاني اندم على الكلام الي كلته وكال بيننا حساب بعده ما انتهى ..

ضربت أديه بالكاع وصرخت آي حساااب بعد آييييي حسااااااب!!!! مكفاك الي سووويته باخوويه مكفاااك ؟

اجه يمي وسد حلكي بعنف وقسوة ويهز براسي
ولج مافكرتي لمن تديرين وجهج وتولين ماافكرتي بيه شراح اكول لاهلي وعشيرتي ؟؟؟ هااااا مافكرتي وفوكاهه حامل ؟؟

الناس لمن تسألني عنج شكللهم ؟؟ لمن تسألني عن ابن اخوي المرحوم حسه الوحيد بالدنيا شجاوبهم هااا شحجي ؟؟

اكعد من المووت والكاج مو كبالي وشاردة اكو بنت اصول تسويها تعوف رجلها وهو ممدد على فراش المووت ؟

ولج اذبحج ع الجبلة هسه احد يكلي ليش لووو احد يلومني لا والله اله انعل والديه الي يفك حلكه والله ..

ولج انه مادري شنو الي مصبرني ومادفنتج الهاللحظة ماااادري ......

ودفعني حيل طخيت بالحايط ..

بجيت متألمة علي انته كتلي تطلكني وتاخذ ابني لو هاي نسيتها ..

ولج انه بعدتج عني بعد ماطلعتي من السجن حتى لااذيج ولج يارجال يسكت مرته هيج تسوي بس كليلي ؟؟ تطلعين حاى ماتنطين خبر لاي احد؟؟ لا اهلج يدرون لا الي بالبيت يدرون فعلتج هاي شون تبررينها ؟

جان يدور بالغرفة مثل الاسد الجريح وبلهاث متواصل يوجهلي كلامه عرفته حيل تعبان ...

كتله اهلك كادولي المكائد واني مطعونة ومخذولة من قبل وانته ماخليت هالشي بعين الاعتبار .

كال بعصبية ونفاذ صبر ..
مية مرة كتلج الماضي انسي واصابعج موو كلها سوا . بس عقلج الصغير مايكدر يستوعب هذا الشي . او غرورج مايصدكه والي براسج تسوينه ..

انتحبت : علي ليش تعذب نفسك وتعذبني كل هذا العذاب!!

رد بسرعة : اثنينه نستحق العذاب انت مو عاقلة وانه مااقسى عليج بوقت تستاهلين القسوة .

بنشيج جاوبته واديه على وجهي : قسوتك مالها حدود
انت بس تريدني غلطانة حتى تشفي غليلك مني ..

وخرت اديه من وجهي وباوعتله بعيون تقطر الم واحباط من فيض قسوته ..

كتله ليش اني الوحيدة الي انال من قسوتك وعقابك الكل غلطان بحقي وانته ساكت!!!

كال الكل يتعاقب انه مو ظالم الهالدرجة وراح تشوفين ..

كتله بقهر وانته منووو يعاقبك لمن تكون مصر تأذيني ؟؟

كال ولج لو ما أنتي طايشة وعقل ماعندج والي براسج تسوينه ؟ غير عملتج الاخيرة العار الي تردين تسوينه وتنهزمين ؟

كمت على حيلي شوي شوي واتظاهر بالقوة ..
لعد ممكن تكول لنفسك ؟ لمن مرة رجلها يسافر ومن يرجع ملابسها يخليهن يم وحدة ثانية ؟ شنو موقفها بهاي اللحظة ؟

ظل يتقدم عليه واني اتراجع للوره لحد ما طخيت بالحايط .. بين اللهفة العتب والغضب ..
تجسد احساسي ومرت لحظات من عمري واني مخليه عيني بعينه نظراته تترجم حنين وغضب ...

كال شنوو تقصدين ولج ؟ شنوو هذا الحجي بعد ؟

ابتسمت بطرف شفتي بوقت كل شي بيه يبجي
وحاجيته بغصة سيطرت على بلعومي ..
_ اجتي ختام للبيت وبيدها علاكة بيها ملابسك بشت الك وجنطتك طلعت مسافر وياها وتكول عندك شغل ؟

برقت عيونه بعنف مكتوم وغرس اصابعه باكتافي بوحشية عطت متألمة ...

بعدها اشفق عليه وارخى اديه فجاة .
لزمت مكان الي اذاني بي همست بانهزامية وألم
علي اذيتني ..

كال بغضب ولج انتي جاي تحسبين حساب الي جاي تحجينه لوو لاء؟؟؟؟ لو بس همج تحجين وخلص ؟
ولج شسوي بختام ماخذهه وياي أسافر بيها ؟ شسوووي ..

عطت بغضب وثورة عارمة
_ لعد ملابسها شيسوووون يمك ؟؟ اذا ما جنت وياها سوى بذاك اليوم هااا شيسووون ؟

خله ايده على راسه مثل الي يراجع ذكرياته ..

وبعدها تقرب مني ... اني من التعب كعدت بالكاع
هو اجه يمي مثني ركبه وخله ايده وره ظهري وسحبني عليه طخيت بصدره ..

قاومت لحتى ما اغمض عيوني مستمتعه بقربه وعطره
شون قدر هذا الي خلاني اوكع بحب رجل يملك كل هاي القسوة ..

اخخخ ياقلبي شون تحب هذا المتحجر المستبد المتعجرف التايه بانتقامه يا ترى منو اكثر استبداد هو لو قلبي المتمرد عليه ؟

وامي منه بهالقرب عبالك راح اشرد منه مره ثانية
بهاي حركته وايده محوطه جسمي حسسني اني ملكه ..

كال انت شنو تفسيرج لوجود ملابسي وجنطتي ويا ختام ؟ بذاك اليوم .. احجي خليني اضحط على حجيج الصغير ؟

كتله واني ارجف بين ايده : مسافر وياهه وعندك علاقة بيها ماكو غير هالتفسير ؟

غرس اصابعه بشعري بدون مايسحب شعري ويأذيني بس داحسه مثل الي جاي يتفقد املاكه ..

كال علاقة مثل شنو فرحة ؟

واني اباوعله ببلاهة كتله يمكن متزوجها بالسر مو بعيدة اخوك سواها قبلك وتزوج سحر ...

سحب ايده من شعري وخلاها على ظهري ورجع قربني اله .. طخيت بي وخليت ايدي على صدره ..
وهو مقيدني عبالك راح افلت منه ..

كال وتقارنيني ويا حمدان وسحر تقارنيها بختام مو هيجي ؟

هزيت راسي بعفوية ..

تركني وتمنيته مايتركني ، دار وجهه مني ثواني وايده على لحيته يفرك بيها ..

كام على حيله وكف يحجي واني ع الكاع .. اجاني صوته رفعت راسي اباوعله ..

كال زين اذا اكلج على سبب منطقي يخلي جنطتي و ملابسي يم ختام بذاك اليوم ، هسه راح تندمين على كل لحظة شك ؟

بعدت نظراتي منه وبعدها دنكت واسمعه يكمل كلامه
لو غرورج وكبريائج راح يظل مصر على انو انه متزوج ختام او عندي علاقة وياها ؟

بقيت ساكتة وهو كمل كلامه ويمكن هم حتى اريحج واريح نفسي اكلج على علاقتي بختام قبل لا اتزوجج وقبل حتى لا اعرفج لمن جنتي غريبة بالنسبة الي ..

كمت على حيلي ورحت يمه خليت اديه على صدره ونظراتي تترجى ونبرتي تتوسل..

_ اي علي عفية الله يخليك مو والله تعبت والجمر سكن روحي وأحشائي واحس حرارته بضلوعي تجويني ذوّب جليدك وطفي هالنار الكَايدة بجوفي ..

وخر اديه من صدره بس لمن يلزمني يشد عليه وعلى جسمي ويحاول يتلمس بيه بس يرجع ويبتعد عني بتردد وعذاب ..

عيونه بعيوني يباوعلي ويتنفس بحركَه احس هالحركات تترجم اشتياقه ..

احسه مشتاقلي ويكابر نظرات رغبة بعيونه لاحتضاني حضنه ابدية لا يفكها اعصار ولا عاصفة بس يمنعه غروره وكبريائه..

قرب مني ويحاول يوصل لمستواي ولازمني من زندي ..
كال فكري شويه لمن رحت لدبي بشغلة جم يوم كتلج مقررة سفرتي ؟

غمضت عيوني اتذكر وبعدها فتحت باوعتله
كتله بارتباك مادري شكد ..

شدد قبضته على ايدي وكال لااء تذكري يله مو تردين تعرفين ؟؟

رمشت بعيوني وسويت مممم يمكن اربع ايام مدري خمسة ..

زين وشوكت رجعت ؟
دنكت راسي بأسف وجاوبته لمن سمعت بيه ماكو ..
_ حلوو فرحه بديتي تفكرين وانه جنت حاجز ذهاب واياب جا شلون رجعت ؟؟

ظل يهز بيه باووعيلي احاجيج شلووون رجعت!!!

باوعتله مجبورة واحس خسرت كل دفاعاتي وراح يغلبني .
كتله بوقتها مهيب كال يمكن رجعت بطائرة خاصة ..

تركني وراح يمشي واديه وره ظهره ويحاوطني بمشيته
كال زين وتدرين يافرح منو الي دبرلي الطائرة الخاصة بوقت قياسي ؟؟

دنكت وهزيت راسي .. واسمعه يكول
ابن عمي اللواء ابوها لختام ..
باوعتله وملابسك شتسوي عند بنته ..

هز راسه بتفهم جايج بالحجي ..
السايق مالتي جان مشغول يدور على حضرة جنابج رايح لمنطقة بعيدة يدورج عند اقاربج وتأخر بالطريق ..

ومهيب جان هم مبتلي وياج اذن منو استقبلني بالمطار ؟ وصلني ؟ الج لحد المركز الي جنتي بي !!
ابوها واخوها لختام رافد وانه بهذا الوضع بحال جنطة وبشت ؟

باوعتله مقهوورة وندمانة وهو اجه وتقرب مني
كال بقن بسيارتهم ومنو يرجعهم للبيت ويدخلهم غير ختام ؟ والزلم جانت مشغولة بيه ... لو هاي ماتشغلين عقلج وتفكرين بيها ؟

لالاا علي موو هيج اني عقلي مشغول وياك ..

ابتسم باستهزاء لو صدك مشغول وياي ماتركتيني ومشيتي ..

ختام ختام حقيرة ونذلة والله علي لعبت باعصابي اجت للبيت بيدها الجنطة اسألها تكوولي موو شغلج وماعندي حجي وياج ...

بجيت لعبت باعصابي علي والله لعبت باعصابي ..
كتلها بس اني مرته تكولي من يكعد يكولج ..

فتح عيونه مستغرب ... وكملت أني ...
لا والغترة علي الغترة الي تكولي ريحتج بيها
بلعت ريك وهو يباوعلي بترقب واهتمام ..

وكملت بحزن اني : تكول هدية منها الك وهيه طبعت اسمك عليها صدك هالحجي علي صدددك ..

عكد حواجبه وهز راسه بعدم رضى ..
وهمس سهلة ختام ..

لزمته من دشداشته كتله بعياط صدك هالكلام هدية منها .. علي كلي ..

ابتعد عني وكام ودار وجهه مني كال لااء مو منها جذذذب ..

لعد شوون عرفت الغترة مطبوع عليها اسمك شلوون ؟

انتي تدرين بيها مقربة من شغلي مرة شافتها ورادتها وانه رفضت انطيها الها الغترة هدية من صديق اماراتي

لطمت خدودي عزااا علي عزاااا هسه تسويلك بيها سحر ..

كال شنووووو

اخذتهاااا مني علي اخذتها منيييي...

كال سكتي تتحملين عدم ثقتج بيه كله انتي تتحملينه ..

علي اني .....

عاط ولج سنين هيه كدامي ماتزوجتها من تزوجتج تشكين بيه ؟؟

ولج انه رجل عملي صمت عن النسوان سنييين جان ميهمني غير شغلي شفت اشكال والوان ماهزتني ماوحدة ولج تجين تشككين بيه وتطلعين ابو و نسوان وتقارنيني بالمرحوم ؟

الي جانن بحياته خير من الله ؟ علك رنا وتزوجج واخذ سحر متعة ؟؟

شفتيني لو سمعتي عني عندي علاقة ويا هاي لو متزوج ذيج ومطلك مدري منووو ؟

علي اني انخذلت من حمدان وخاني وهالش

وانه مااتقارن ويه حمدان افتهمتي لووو لاء ؟

علي لا تلوومني علي اختك وبنات عمها هدوا عليه بسجاجين واخذوا دانيال وذهبي وطردوني من القصر
واسأل لهيب جان حاضر وموجود ..

عاط لاتجيبيلي سيرة لهيب وبلقيس شبه مطرودة من القصر وراح تخسرني العمر كله بس جاي انتظر شغلة تثبت واطردهم نهائي ...

كمت على حيلي انته غامض كلش غامض وختام تكولي بيناتكم ظروف منعتكم من الزواج ..

لزمني من ايدي وكعدني ع دوشك وكال تعاي احجيلج على هاي الظروف الي تكول عنها ختام!!!

ظليت اباوعله بترقب وكل حواسي متحشدة حتى اعرف شنو عنده وياهه ؟

كال باعي فرح كبل سنين جانت ختام تدرس ماجستير وابوهه يجيبها الي اساعدها بالمصادر واي شي تحتاجه هيه ..

الظاهر البنية تعلقت بيه خلال سنتين وصار مايفوت يوم اذا ماتجي او تخابر وتحجي وياي بالساعات ..

فد يوم اجتني عدها كتاب كعدت بمكتبي ورة ماطلعت الحجية من يمنا هيه ظلت تباوعلي وتنصي ..

حسيت عدها شي وانا اعرف نظراتها وهيه رادتني اسألها شبيج بس ما سألتها ..

الى ان خلت اديها على وجهه وظلت تبجي ..
كتلها شبيج ليش تبجين .. ؟

انطتني الكتاب وكالت بي ورقة اقراها من اطلع
ماكدر احجيها بوجهك ..
وخلت وطلعت ..

يشهد الله الكتاب بقى يومين بمكانه لان جنت اعرف شنو بيها الورقة الكالت عليها الكتاب مبين من عنوانه ...

كلما تسألني فتحت الورقة اكللها لا مشغول واعتذر
ماردت انطيها امل ..

قللت روحاتي عليهم وقللت استقبالي الها بمكتبي حتى تكطع الامل مني ..

مالي بالنسوان ولا محتاج الهن وخاصة ختام ابد مو ابالي هيه ..

صدفة شفت الورقة واكعة من الكتاب قريتها
كاتبتلي ماشوف احد يستاهلني غيرك احبك علي حس بيه دا اتعذب وانجبرت اعترف الك مو بيدي ..

مرت ايام قاطعتها بس فكرت لازم اخلي النقاط على الحروف ..

دزيت عليها واجت خجلانة وفرحانة حسيتها ..

كتلها سمعي بوية انت وحدة يتمناج الف واحد كافي سمعة اهلج ومركزهم ومكانتهم بين الناس ..

قاطعتني كلتلي اني مااتمنى غير واحد من هالالف الي هو انته ..

بويه لا تقاطعيني وخليني اكمل كلامي ..
هزت راسها ودنكت ..
كملت انه كتلها يابه انه رجال مشغول ما افيدج انه احب شغلي واحب اتفرغ اله اكثر من اي شي خاف اتزوجج واظلمج وياي ..

كالت ها اني اتحمل كل شي ومن هالحجي ...

لا بويه ماكو هيج حجي بعدين تتندمين انه اخذت نصيبي من الزواج وراح ابقى على ذكرى زوجتي المرحومة ام مهيب ..

المهم طلعت هيه وخيبتها سديتها بوجهه كلش ....

اجت ايام وراحت ايام البنية مختفية لا تجي لا تخابر توقعتها زعلانة المهم انه العندي كلته الها تزعل وبعدين تجي قسمتها والله يوفقها .....

مااشوف اله امها دخلت للبيت وانفردت وياهه بالكلام وكلتلي على بنتها مريضة كطعت الاكل ونايمة بالمستشفى .. وحاجيه لامها كل شي ...

والام اجت تتوسل بيه اروح ازورها لان حالتها النفسية تعبانة وصاير عدها انهيار عصبي ...

رحت زرتها ووعدتها بس تصير زينة ان شاءالله ننظر بالموضوع ...

كالت يعني تخطبني ؟

كتلها ان شاءالله الله كريم ..
ماردت حالتها تتأزم وهيه هم صدك ماناقصها شي رغم انه مامحتاج زوجة وولدي بطولي صاروا بس كل شي بالقسمة ..

هيه فرحت واستبشرت ..

كتلها بس شرط انه ماريد مرتي تطب وتطلع وتشتغل هذا شرطي اريدج بالبيت ...

كالت زين بس اخذ الماجستير ...

كتلها عندج كل الوقت .. شرط هالايام لا تجين ولا تخابرين ماريد قال وقيل وقلت ... ابوج علاقتي ويا زينة ماريد تخرب

الله ماقاسمها الي يا فرح .. لمن حمدان اصرر يتزوجج هيه اجت وطلبت مني امنعه وياخذ اختها ..

كتلها مو يمي هذا الموضوع وماكدر اجبر رجال وزلمه مشورب ومسؤؤل عن نفسه ..

جان جوابها لعد انسى موضوعنه اني وياك اذا انته من هسه ماتسوي شي لخاطري ..

كتلها براحتج ولاتجيني ندمانة ...

كالت هذا اخر كلام عندك ..

كتلها الله وياج ومحمد وعلي .........

فرح : باوعتله ماعرف انقهر لو افرح!!! اصدكه لو اكذبه!! بس حقدت على ختام اكثر طلعت كذابة!!!
طلعت تحبه تحبه؟؟

اتمنى اعرف موقفها شنو لمن تزوجني بس هو جان يحجي واني ماريده يسكت لاول مرة اشوف علي مثل الكتاب المفتوح ...

كال تكدرين تكولين انه جان بحياتي تلث نسوان ...

وماعرفته غير مرة وحدة بس ..

المرحومة جانت مثال للاحترام ، الطيبة و الحنان
اعزها هواي اعزها ، كل يومية ابوس ايدها وراسها هواي ساندتني بحياتي وافتخر بيها واشتاق الها ..

ختام جانت طموحة وقوية وذكية كسبت الشركة قضايا بذكائها وبدهائها يمكن جنت معجب بشخصيتها بس مالكيت بيها الحب ...

بس مو مثل الحب الي يشعل جوف الانسان بالنار
يخلي هاي النار تسري بالشرايين ، التنهيدة تسكن الضلوع ، القلب دكاته تتخربط ، العقل ينشغل ...

فرح انتي مثل الاعصار الي دخل حياتي .. حياتي جانت هادئة قبلج ، قلبي سكنه الجليد ، والعشك منسي وموموجود بقااموسي ..

انت بالنسبة الي مو مجرد نزوة عابرة ، ولا مجرد رغبة بمرة ما ان اشبعها حتى اتحرر من سطوتها . ولا انه من نوع افرغ مشاعري ورجولتي بآي أُنثى تعجبني ..

تقربت منه حيل لمن سكت وباوعت بوجهه اختلطت انفاسنا وسألته بنبرة مرتجفة لعد أني شنوو بالنسبة الك؟

لزمني من زنودي وبعدني عنه .. ورجع الغضب لعيونه القاسية ..

كال انت خربتي على نفسج فرح وجنيتي على روحج بتصرفاتج ..

كتله يعني شنووو تحبني جنت وهسه كرهتني ؟؟

عكد حواجبه هو سؤال واحد لمن جنتي دتنهزمين ببنتي ؟ مااجه على بالج سؤال ؟ لمن تولدينها وتكبر وتسألج عن ابوها شراح تجاوبينها ؟؟

سكتت مجاوبته بس اتأمله بوجع ..

كال هم راح تتزوجين واحد وتكلين لبنتي هذا أبوج ؟؟

هزيت راسي لالالا والله مستحيل علي ...

كال بالله انسي وكفاتي وياج انسي لمن وكفت ضد اخوتي علمودج ، طردت اخوي من بيت ابوه حتى لا تنغثين ......

اي طردت حسان من بيت ابو .. وانت كلش زين تعرفين امي مربيته ويعزها وتعزه ...

زين ماوكفت بعينج وكفاتي ويه اختج ، مرض ابوج وعزاه هاي مشيناهه ...

وجودي بالمستشفى بين الحياة والموت ماوكف بعينج حاقدة عليه اذيتج مو مهم .....

بس بنتي بنتي هاي شون انطاج كلبج تحرميني منها ؟؟

واني حاجيلج على لوعتي على بنتي الماتت ومشوفج صورها وحاجيلج عنها .وشون تأذيت من ماتت.

وكايلج اريد بنيه اعوض بيها عن بنتي والبنية حنينة وحبيبة ابوها .وتداري كبرته .. هذا كله ما اجه على بالج ولو لحظة ..

غمضت عيوني بقهر ونزلت دوعي والغصة تكونت بحلكي ..

حقك والله حقك علي اني اسفة بس والله مجبووورة ... انجبرت جنت بين نارين ومحتارررة والله ..

كام على حيله ركضت حضنته وخليت راسي على صدره .. وبقيت ابجي حسيته حضني قوي ..

حسيته يريد يثبتلي من هذا العناق انو اني اله مو لحتى يحسسني بالحب .......

بعدني عنه وظل يباوعلي بوحشية
باوعتله بوجهه كتله وهسه شراح تسوي بيه ؟ علي اني ما استاهل ظلمك ولا تتوقع مني اخضع اله اني حجيتلك على كل الظروف المريت بيها واعتقد لازم تصفح عني .....

ماكو اصفح عنج تتعاقبين حالج حال الغلطوا ....

علي ما اتحمل تعاقبني اريد حياة طبيعية أني كافي الي شفته وصار بيه .. اذا انته حاقد عليه طلكني وخليني ابعد عنكم وارتاح وترتاحون ..
ماريد شي بس ابعد عنكم وارتاح ..

هذا الشي تحلمين بي انصحج تكعدين من النوم وتنهين هذا الحلم احسن وتغسلين وجهج همين حتى تصحصحين اكثر.

يريد يطلع رجع التفت عليه وكال ....
_ دخلتي لسجني بارادتج ماراح تطلعين منه الا بارادتي انه .

موج ....

جنت لابسة كيمونه سودة جوه الجاكيت .. كام خرطها من فوك ومن جوه خله ابهامه فوك واصابعه الاربعة جوة وخرطهه ....

كتله لا عليك الله شرار اتركني ميخالفك يابه ميخالف نتزوج بس لا سوي بيه هيج . ....

كال غصبا عليج تتزوجيني ....

حسيت نفسي واني بقربه بعذاب مرير ..
ماكدرت اتخطى مشاعري وعيونه بعيوني شحيت وجهي منه اتفادى نظراته واحاجي نفسي تجنبي الاتصال البصري المباشر ويه عيونه ، يفضحني ..

هزيت راسي وبلعت ريك ، ترك الكيمونه وكام عني
وتمدد بصفي وسحبني اله ، قيدني وحضني ....

شعري مسويته كبايه مد اصابعه وحله واخذ خصلة من شعري يشمها ......

فتح عيونه باوعلي ابتسم واني تعابير ملامحي جامدة
كال بالله اكو واحد هيج يعاقب خطيبته الي شردت منه ؟

بشرفج بشرفج شايفتلج هيج واحد!!!!

كتله لاء بس انته لان انت صايم مصلي تخاف الله ..
وبعدين كافي تسحل رووحك سحل عليه ..

رد : مو هو الواحد لو يسحل روحه على شخص يسوى لو يكعد ويسكت وينجب ..

وكمل : احم بس الحقيقة والواقع انت مو مال واحد يضربج حرامات اشوه جمالج بالضرب انت تستاهلين عقاب بوس وبس ...

شايله جمال الله كله ابوج لو مخلف فد مية وحده مثلج جان هسه الدول تعوف النفط وتتعارك ع النسوان ...

ضحكت ضحكة بصوت عالي لاتضل تصبغ كافي عود اتزوجك اتزووجك ..

سحبني اله حيل واديه مثبت بيها خصري .....
وكال ولج غصبا عليج تتزوجيني هو انت تحلمين تلكين مثلي ؟ اكو واحد يعامل خطيبته المتمردة هيج ..

كتله تره انت مالك سلطة عليه ومو من حقك تعاقبني ..

كال سولفيها للدبة ..
كتله اتركني شرار ..
كال ماكوو نامي يله واني هم انام لان تعبان طريق طويل ...والعصر اكمل عقابج هسه نعسان مابيه حيل ..

ظليت احووس بين اديه وهو مخلي راسه المصفح
على صدري ...

كلما احوس يثبتني قوي ويكول نامي
كتله ماريد انام يمك هيه كوووة ..
كال اي كووة ولاتستفزيني ..
يحجي ومغمض ...

سكتتت عنه واني هم تعبانة ونعسانة مابيه حيل اجادله كلت بس يغفى اتملص منه واكوم ..

ايدي مخليها على كتفي باوعتلها وخليت ايدي يمها ...
بييييضة وايدي سمرة ....

يمكن هو مكاسر ويه لتر حليب واني ويه نص كيلوو كهوة ..

وعدت نفسي بس يغفى اكوم بس شفت نفسي صافنة عليه ، اي هو هذا الي يريده كلبي ويرفضه عقلي ..

نمت يمه وغفيت مطمئنة .. حسيت بي قريب مني
كعدت وفتحت عيوني شفت صافن عليه ..

كمت بسرعة عدلت ملابسي وشكلت السحاب مال الجاكيت ونزلت التنورة .. ورفعت شعري ..

سألته بتلعثم ووين فرح ؟
كال شمدريني من مساع يمج اني ..

كلت بسرعة واني اوكف على حيلي ...
اريد اروح اشووفها ..

قرب مني واخذني من خصري اله وباس شفايفي حييييل ..

دفعته وامسح بشفايفي انته شنوو متشبع من مساع لهسه جاعصني جعص ....

كال لاء ما اشبع ....

كتله ممكن ننزل ؟ اشووف اختي ..

ظل يتمطط ودنك ع الكاع اخذ البلوز مالته لبسها ..
ودنطلع اني ويا سحب الكلاو مالة الجاكيت وخلاه على راسي ..

وكال منا وجاي شعرج ميطلع كدام اخوتي ..

كتله بس كدام اخوتك ؟

كال كدام الكل ميطلع تتحجبين ..

كتله والروسية انته محجبها لوو شنوو ؟

كال معليج بيها ذيج ثقافتها وحد انت مسلمة وبعدين ماتوقعتج هيج ضعيفة تقارنين نفسج ويه غيرج ست موت ..

رفعت راسي بشموخ مو مقارنة بس مو عليه تصير رجل شرقي ؟ اني هم هاي ثقافتي ....

تقرب مني كال دينج يفرض عليج الحجاب ومنا وجاي تتحجبين تمام ؟

كال هيج ويعدل بالكلاو ويفوت شعري وخصلاته الطافرة منا ومنا ..

نزلت وياه ورحت يم فرح شفتها نايمة ودانيال نايم يمها ..

يوم ثاني الصبح كعدنا من النوم ماكو دانيال يمنه
وباب الغرفة الي نمنا بيها مفتوح والظاهر هو فاتحه وطالع لان يلوح الباب صاير .

طلعنا اثنينه شفنا حسان بالصالة
فرح كالت اهووو راح يبقى هذا يغوغي علينا مثل الذبان ؟؟

باوعلها كال يله شيخة فرح حضري روحج حتى تروحين تحلبين الحمارة برة ...

عاطت فرح احلبها ؟؟ وليش بالله احلبها ؟؟

عاط تتريكون بالحليب مالتها لعد شنووو اريككم بالله ..

كالت عوووع لو امووت ماظل اله حليب الحمير وبعدين انته مو شيخ حتى تتأمر علينا علي وينه علي ..

رفع اديه كال اني الشيخ هناا اي شيرادلها اصير شيخ وراح يدور بالبوفيه ويدردم وينه هذا المدري شنووه

طلع شماغ ولبسها وهو لابس برمودا كابوي وتيشيرت صار شكله يضحك ..

بهالاثناء دخل شرار وبيده علاليك وبالايد الثانية لازم دانيال ...

اجه دانيال لامه حضنها ودنكت باسته ...

بس دخل خزرني استغربت اجه قرب مني صاك سنونه ظليت اباوعله باستغراب كال امشي للمطبخ نسوي ريوك ..

واخذني من ايدي وباوع لحسان كاله كوم شيخ البرمودا كوم فول السيارة بانزين ..

ودخل بيه للمطبخ سحبت ايدي منه وعطت شبييك ..
رفع تك حاجبه شكتلللج ؟

عكدت حواجبي شكتلييي؟؟

لاتستفزيني موج؟ ترة لهسه معاقبتج ع الشردة مالتج والي اكوله الج سوي ..

غير افتهم شكوو ؟؟

مو كتلج تلبسين حجاب !!!

خليت اديه على راسي كتله ترة ممتعودة البس وبعدين ماعندي حجابات ..

كال التراك هذا الي لابسته مو كلاو!!! واذا كلش اخذي من فرح ميرادلها شي شغلي دماغج ..

خليت الكلاو على راسي بعصبية ، اجه رجعني ع الحايط وباسني حيييييل ...

عزااا بدخلة فرح ودانيال فد استحييييت ...

وفرح تباوعلي متفاجأة عبالها اني قابلة متدري بي هو وكح ومباغت وغدارررررر ...

كعدت فرح جوة تلوب خطية الوحام يتعبها الصبح وشرار جايب علاكة بيها ملاعيب وحلويات لدانيال
كعد بيها والتهى ..

واني واكفة يم الكاونتر هو اجه ديلوح الملح وجان يبوسني على خدي ...

دفعته وهمست عزااا عيب اختي هنا وابنها شويه خجل ..

كال بصوت عالي شبيج ترة نسيت وجودهم ووين بايسج اني بالشارع هو مطبخ وترة هم فرح ما انتبهت مو صح فرح مانتبهتي ؟

باوعتله فرح مزعوجة ومعوجة ملامحها نفسها لعبانة من الوحام كلتله شنوووو؟

كاللها مو ماشفتيني بستها ؟؟

عكدت حواجبها تباوعله وتباوعلي ..

اجه شاورني كال اختج تسوي نفسها بريئة عود هيه ماتعرف البوسة ..

فرح كالتله بتعب وين راح علي ؟؟

رجع باوعلي كال باعي غارت من عدنا وتريد رجلها هسه .......

عضيت شفتي وباوعتله همست شرار واحمد ؟

باوعلي بعدين ننظر بأمره ..

بس هو

لاتلحين موج كتلج بعدين ..

لعد احنه شنو مصيرنا واحمد صدك راح تحرمونه من دخول بغداد الى متى ؟؟

اي هو هيج راح يصير شكو يشرد بنسوانه بالله ؟؟

بس هو اخونه ترة وجان خايف علينه ؟

منين خايف عليكم بلا زحمة ؟؟ شنو الي سوينا وياكم احنه شو صرنا وياكم ضد اختنه ؟ والي هددكم اوس المفروض تلجأوون النه ..

وكافي كركة لو تساعديني نسوي ريوك لو توكفين وسكتين ..

بقيت واكفة بمكاني هذا من صدكه استسلمله!!!!

كال سوي كهوة اريد اضوك الكهوة من ايدج .. وغمزلي .. وهو راح يطك البيض بالطاووة .

ريلام ....

عطت كامت هيه سدت حلكي سكتي سكتي لايسمعوووج تصير فضيحة هو كال بعد مايعيدها ...

دفعتها انجبي بالله شنوو مايعيدهااااا ؟؟ اله انزل افضحه فضيحه واطيح حظه

كلت هيج وبعدين باوعتلها جذااابة مستحيل مهيب يسويها امداج حتى امداج ريلام موو انت اكثر وحدة تعرفي لمهيب اكثر وحدة شون تصدكينها ...

يوم ثاني واني راجعة من الكلية داافوت للبيت وشفت خالو علي الدر ويمه ختام بالممر الي يم مكتبه

وكفت وجان اسمعه يكوللها !!!

يتبع ...

الي يعرف لايقصر فدوة ❤😘