رواية هذيانٌ بين جمرٍ وجليد ..(ارملة اخي المجنونة) الفصل السابع عشر 17 - بقلم نورا ناصر

السلام عليكم
هذيان بين جمر وجليد
الفصل ١٢
نورا ناصر

******

علقت احلامي ع كتفك .. فخذلتني..
وهدمت لي كياني..
اسقيتني كأسات مر علقمك..
انت الذي أقسمت أن تحفظ عهداً ..
ولكنك لم تصن وداً ..
لقنتني اقوى دروس الغدر ..
سلبت مني الأمان ..
جردتني أجمل لحظات • ؏ـٰمـري ..
غصة تنحصر في حنجرتي ..
صغيرة اتجرع مرارة غدرك ..
في قلبي مقابر حية ..
أنا من خذلت نفسي اولاً عندما رأهنت ع وفاءك...
بقلم smsma89

*****

الحجية خلت اديها على راسها وكالت بعصبية
-- يبوووو دخلت المخبلة علينا شدوا رووسكم يا كرعان ولج خلينه نفتهم من البت شبيج انتي ماتنطين درب .

باوعتلها ببرود وبعدين وجهت نظراتي لعلي الدر
اني من اعصب بس اگله علي انسى نفسي ، رغم حتى امه ماتكوله علي .

غمض عيونه ثواني بنفاذ صبر وشفايفه تحركت يمكن ظل يستغفر ، رجع باوع عليه ومن عيونه تنبثق نظرات القوة والتصلب بالرأي .

كال بحزم : فرح لو تكعدين بهدوء وتسمعين مناقشتنه وشراح نحجي لو تحترمين نفسج و تطلعين بره وخلينا احنه نتفاهم .

صحت : شتتفاهمون نسيت ذيج المرة من جتي وجانت شون تريد بس تشوه سمعتي وتحجي حجي جذب ماله صحة من الاساس .

سحر كامت : ليش جذب تردين ننفرد اني وياج ونسولف على انفراد واحجيلج شجان يحجي عنج حمدان حجي محد يعرفه بس انتي وهو .

كام الشيخ على حيله بعصبية وجبروت
اشر لسحر بسبابته : سكتي شنو هالحجي مشاكل بهذا البيت ماريد كتلج من قبل احتفظي بهذا الكلام لنفسج وبس واذا سمعته يتكرر تندمين ترى .

هي السعلوة دنكت وكالت اسفة ..

اجه الشيخ يمي لاتخليني اقلل من قيمتج كدامهم لاتجبريني على هالشي فرح انضجي شويه بطلي هذيان وجنون وخلينا نتعامل ويه الامور بعقل .

جاوبته بنفاذ صبر : هايه جذاابة وهايه مو بنت حمدان شوف منين جابتها اصلا هاي طماعة جايه ع طمع والله وخلي يكون بعلمكم اذا بقت هيه هنانه اني ماابقى هنا رضيتوا ولما رضيتوا .

الحجية كالت : الله اكبر عليج ولج حمدان ميت ماعايش حتى لو انتي لوو هيه ولج هاي بته ماتشوفينها تشبه ابنج وبيها من دمه .

بعصبية ونبرة سريعة : شجابهه شجااابهه على ابني
ابني يشبهني مايشبه ابووه اصلا ..

ماحسيت غير بيده تطوق معصمي وانجريت من الاستقبال لحد غرفة المكتب المقابيلها ، ودفعني بيها

وكفت اباوعله بغضب من تصرفه ..
وهو نظراته تطوقني بحدة وعصبية ..
وبنبرة اشد حدة وغضب : - انتِ ماينفع وياج غير الحبس يله تسكتين وتخليني احل الامور بعدل ابقي هنانه .

عطت مو من حقك ..

هو عاط سككككتي ..

توجه للباب سحب المفتاح منه وطلع وسد الباب ركضت على الباب سمعت صوت المفتاح يدور بالقفل .

ظليت انزل بالمسكة واصعدها واجر بي واصيح
افتحلي الباب افتحه موو من حققكم تحبسووني موو بكيفكم .

تذكرت باب المكتب الي يطل على الحديقة ركضت اريد اوصله شفته انسحب انسد وانقفل .

ضربت بقبضة ايدي عليه بعصبية ..

من صدك سواهه و حبسني هذا شوون يربي لو كاعدة يمهم واسمع لكلامهم موو احسن من هالحبس هذا .

رحت للباب خليت اذني يمه واريد اسمع كلامهم
بس يوصلني بعيد ..

الشيخ يكللها احنه مانقصر وياج ان شاءالله بأي شي تحتاجيه ، بس الي اعرفه انت اخذتي حقج وزايد وحتى عندج بيت بأسمج ترى اني تحريت وعرفت كل شي .

هيه جاوبته : شيخ اني مرية وحيدة وماعندي بس امي وحتى ابني وديته لعمامه لان ماضامنه حياتي اريدكم الي سند وماريد شي بعد من عدكم .

-- احنه سند الج ان شاءالله ومانقصر وياج بس جيتج وبقاءج هنا تسوي مشاكل انه رايدج مرة لاخوي حسان اذا تقبلين ويقبل هو وتتفقون .

سمعت الحجية كالت باقناع : يمه شيخ خليها تبقى هنانه هم بنيتنه عدها وكدام عيونه ماعليك من المسودنة فرح هي هم مرته للمرحوم حالها من حال فرح .

عضيت اصبعي : اخخخ يا عجوز النار شكد تكرهيني انتيى شكد والله اتمنى علي يختارها لهاي المسحورة سحر واطلع اني من يمهم وارتاح منهم شفايتني .

سمعتهم يضحكون ويسولفون ، بعدما سحر طلبت منهم تبقى عدهم الليلة ..

الشيخ كاللها احنه مانطردج ابقي شكد ماتردين بس ابتعدي عن المشاكل بطلي تغثين فرح او تكليلها كلام يضوجها .

كالت والله اني مو قصدي اسوي مشاكل واني عشت ويه حمدان بالظلمة سنين وتحملت هواي هي لازم تفهم هالشي وهو هسه ميت الله يرحمه يعني ماراح انافسها عليه .

عوجت حلكي وفريته عبالهم من صدك مخبلة ومااعرف هيه جايه عمود حسان دزهه وحتى ينتقم مني ..

تعبت رجليه من الوكفة باوعت على ارجاء المكتب لاحظت الكرسي الي يصير ورى المكتب ، رحت و كعدت عليه وافتر بي .

واني على هذا الحال سمعت المفتاح يدور بالقفل
كمت وتالي كعدت ع نفس المكان ، خليني كاعدة بمكانه شكو بيها والظاهر هو اجه .

فتح الباب ودخل دارت نظراته بارجاء الغرفة
يدور عليه واني انتظر اللحظة الي يلكاني كاعدة ورى مكتبه وعلى كرسيه واشوف ردة فعله . هو مكتبه ضخم واني طامسه بي .

واخيرا شافني قلص اجفانه وهو يباوعلي بنظرات
مامستغرب من تصرفي . احسه يكولي بنظراته
مخبلة ماعليج عتب!

راح للجرارة صايرة بجوانب المكتب وطلع منها اوراق
وباوعلي كال كومي شوفي هاي الاوراق تفيدج .

كمت من مكاني او بالاحرى مكانه ورحت اخذتها من ايده وسألته هاي شنو ؟

فات من يمي لشويه يطخ بيه اخذها مني وراح كعد على كرسيه باريحيه وهو يرجع ظهره على الكرسي .

كال : هذا تحليل DNA سويته لدانيال و لفاطمة
واثنينهم نتيجة العينات مالتهم مطابقة هم اخوان الي كدامج مو غشيم وبعد ماريد اسمعج تكولين بعد ع البنية مو بت حمدان .

وكفت بشموخ ورفعت راسي : اني ما اعترف بهذا التحليل اكيد حسان هو الي مسوي الك .

بعصبية كال : مو زوج اني حتى اسلم حسان هيج شي واني بنفسي ما واثق منه فررح كافي تألفين قصص وافلام ريحي عقلج شويه وفكري بشغلات تفيدج وتفيد ابنج .

بغصة حجيت : يعني هايه راح تبقى هنانه بالبيت ؟؟

-- مو شغلج تبقى او تطلع انه اقرر ...

حجيت واني أأشر بسبابتي على الارض : يوم الي تبقى هاي هنا اني راح اخذ ابني واطلع منانه سواء قبلت انته او لا اني بس داانطيك علم .

-- هي اذا تريد تبقى احنه مانطردها عيب نطرد ضيوفنه ، بس انتي هم اطمئني راح اخلي حسان يتزوجها وهذا احسن حل لكل هالمشاكل .

-- اي والله خل يتزوجها اثنينهم صنف وجهين لعملة وحدة خلي يبتلي بيها مدري تبتلي بيه المهم ما تبقى بنفس المكان الي اني بي اني كافي عليه "هيام ".

اخذ اوراق من المكتب وخلطهن واني بقيت واكفة
باوعلي بنظرة رجل وبعدها صد نظراتي منه ..

كال : عندج شي بعد ؟ ، هزيت راسي بمعنى لا وطلعت من يمه فتت ع الاستقبال شفتها هاي بعدها كاعدة يمهم ودك سوالف وضحك ، اي اي تتلوك مدري اني ماعرف اتلوك مدري هم يكرهوني .

فريت ايدي بعدم اهتمام وصعدت لغرفتي سمعت صوت تليفوني يررن بس ملحكت بي رأسا انطفى .
وخلصت مدة المكالمة .

رحت جريته من الميز ، دااشوف منو ديتصل
رن بيدي ورقم المتصل حسان !

تفاجئت شعنده هذا الحثالة يتصل بيه !
ضغطت ع اسناني بحدة وجاوبته فضول لا اكثر .
وهم رغبة بداخلي ارزله واطيح حظه ولو ادري مايفيد . بس اريد اطفي النار الي بداخلي .

اجاني صوته المغيث بسخرية واستهزاء ..
-- الوو هلو فرح شلونج .

جاوبته بسرعة : لا هلا ولا مرحبا شرايد ؟

ضحك بصووت عالي وكال جاي اكلج خلص هذا هو وحدة بوحدة انتقمت لنفسي منج من خليت حمدان يتزوج عليج . ولج والله ما تتصورين شكد فرحت واني اقرا القهر والصدنة بعيونج .

حثالة زبالة حقييير الله ياخذك ...

استمر يضحك ..

لك انته شنو من ملة ؟

ديله عاد المهم هسه اخذتي انتقامي وراح اعوفج بحالج ..

لعد شكو دازها هاي الطركاعة النا للبيت ؟

لا دازههه ولا دزتني بعد معليه بيها كتلج لهنا وبس بعد ماعندي شي وياج . بس اذا انثولتي ومخليتيني اشوف ابن حمدان مااضمنلج اسكت .

هه ترى الشيخ كال حيزوجها الك هاي الي اسمها سحر بصراحة حيل فرحت الكم لان انتوا صنف اثنينكم عارات .

فرحي روحج بهذا الحجي ماريدها اذا يريد علي الدر هو خلي يتزوجها اني ونرجس رجعنا علاقتنا وقريبا راح نتزوج .

هه هذا اذا قبل بيك الدكتور ابراهيم

بس طلعي منها انتي ولا تحطين روحج اني وياهه نتزوج ...

معليه لا بيك ولا بيها اصلا علاقتي مقطوعة بيها من اكثر من سنة بس انت تاليك تتزوج سحر لان حثالة تشبهون بعض .

هه لا ماريدها سحر بس اذا انتي اي اقبل هههههاي انت ماتتفوتين فرح .

اموتك غير بس تفكر هيج تفكير والله اكتلك ..

ضحك بصوت عالي : تموتيني ايباه هههه ولج اني ادري بمرضج خاف انتي خافيته عن الكل الي بالبيت اني ادري بي وخاف حمدان صبر عليج سنة يله تزوج عليج اني ورى شهر اضربج مية نعال .

كلت عاااار..

هو كال المهم فرررح منا وهيج ديري بالج تندكين بيه بعد وابتعدي عن اي شي يخصني مفهوم ترى والله ماارحمج ..

قبل ليكمل سديته بوجهه ..

بقت سحر تتردد على البيت مرات تبات وياهم وتتلوك للحجية ولبلقيس وتجيبلهم هدايا ويطلعون سوى للسوك او يروحون لبيت رحاب بنت بلقيس الكبيرة .
وبفترة ايام قليلة عمقت علاقتها وياهم .

واني بس اتفرج وكفيت نفسي منهم وموج ماقصرت بالنصائح وياي .. كالت اتركيهم خو ماتظلين تعاركين وياهم وتدوخين نفسج هو خذلج خانج وغدرج بس هو وينه هسه؟ جووه التراب .

حاجيتها على مكالمة حسان كالت ابد لا تهتميله
وجنج ماسمعتي كلامه هو يريد يأذيج بآي طريقة
اتركي وحظري او بدلي رقمج ولتنطين اله للمقربين منج .

حظرت حسان بس ماغيرت رقمي بقيته مثل ما هو ..

موج ..

طلعت من الجم الجو شويه بارد ، لابسة سترة رياضية اخذت الكبوس خليته على راسي وسديت السحاب مالتها وافرج بديه وانفخ بيهم .

وصلت للكراج واشوف اوس متجي على الباب مال السيارة باوعتله ووكفت بمكاني ومعصبة حيل منه واكرهه .

هو من شافني ابتسم ابتسامته الكريهة وعدل وكفته
كال يااحلوو ممكن نحجي ؟

كتله لاء مو ممكن ووخر من سيارتي يله ..
كلت هيج بنتر واشرله بالسويج .

تقرب كم خطوة ويتنهد ..
- - هنه حجايتين واروح شدعوة عليج ؟

رفعت نظراتي منه وتنهدت بقلة صبر ورجعت باوعتله
-- لا حجاية ولا نص حجاية ترى والله اشتكي عليك والله هواي زودتها .

- - اني جاد وياج والله ومادور لعب واريد اتقدم واخطبج ..

- - ومنو كلك اني اقبل بيك ؟

- - ليش شناقصني بالله ؟

- - ناقصك هواي وانت مو من ضمن المواصفات الي اريدها رجاءً ابتعد عن طريقي ترى والله اشتكي عليك كافي لا تلح .

هز راسه بمكر : هذا اخر كلام عندج ؟

حجيت واني اتقرب من باب السيارة وهو وخر ، فتحت باب السيارة وفتت وسديته هو ضرب قبضة ايده ع البنيد اني متت من الخوف طلعتها على السريع من الكراج وتوجهت للبيت وبالطريق حشدت كل حواسي حتى خاف يلحكني انوب للبيت وايدي على قلبي .

ورى ايام اتصلت بيه صديقتي ايمان جاوبتها
سألتها عن حالها كالت راح تنتقل تسكن بكركوك لان راح تتزوج ابن عمتها هناك ..

كلتلها راح اشتاقلج ..

ردت بمرح مدام راح تشتاقيلي خلي نقلص المسافة تزوجي اخو خطيبي هو جاي يدور له على زوجة ...

ضحكت هالايام صاير عليه طلب هواي ...

ليش منو الي تقدملج بعد ..

واحد هتلي هههه متعرفي

من زملائنا بالجامعة لو منين ؟

لالا شجابه عليهم اقارب عيال اختي فرح

وشكتيلهم موافقة انتي ؟

لج هتلي هتلي داكولج هتلي اتزوج واحد هتلي اني ؟

ضحكت لعد اقبلي بحمايه خوش ولد والله وحالته المادية زينة .

عوفي حالته المادية وكوليلي شمخلص دراسة ..

هو مخلص متوسطة بس والله حباب وخوش ولد .

لا يمعودة متوسطة ماريده يعني اني مقدمة على الماجستير وطلع اسمي اتزوج خريج متوسطة والله اني اريد واحد من مستواي .

لج داكلج خوش ولد وحالته المادية زينة ومتمكن عمره بالثلاثين عنده بيت وسيارة ومحلات .

خية مخلص متوسطة وانا مخلصة جامعة راح تصير بيناتنا فجوة كلش كبيرة وبعدين نتعارك بالنعل .

ضحكت بصوت عالي : مو شرطيا ما ناس دارسين وهم همج ..

بس اني مو همجية تدرين بيه شكد احب الكتب والثقافة ..

اي اعرف اقصد البعض البعض يعني بربج لمن راح تتزوجين تردينه يقرا وياج كتب هو اول وتالي راح يركض على العيشة .

اي بس ماعرف ممتقبلة الفكرة اتزوج شخص خريج متوسطة مع احترامي اله مو انتقاص بس اريد من مستواي وان شاءالله يلكي الي تسعده وتناسبه .

ختمت المكالمة وياهه بس لو ادري بلي راح يصير وياي جان وافقت على حماهه وخلصانة ولا!!!!

هدى ..

رجعت للبيت معصبة كل همي اروح اسحل عهود من شعرها واكسر راسها واطيح حظ حظها .

رجعت للبيت شفت مرة ابويه متخصرة وواكفة
وتحجي بتعجرف : اي وين رحتوا وين وداج شسويتوا ماسويتوا ؟

ركضت للغرفة نزعت الحذاء واني امشي بسرعة باتجاه الغرفة واصيح وينها وينها هاي الكلبة الحقيرة ؟

شمرت الاغراض كلهن بالغرفة وادور على عهيدة الحقيرة .

مرة ابوي جاوبت : عهووود ، ام التليفونات ؟ ولت راحت صرعتني ومارتاحيت الها كتلها بس ساعديني بالطبخ ماقبلت ورجعت مدري منو اجه عليها واخذها وولت .

ااااخخخخ فتت للغرفة ادردم هسه هذا الغضب لو مشتريلي تليفون بدل هالخراجين موو احسن ع الاقل اخابر بي عهيدة واسحلهه .

دخلت وراي مرة ابوي تحجي ببرود ولج وينه البطل خطيبج اشو ممبين شنو مراح يفوت يتغدى ؟

التفتت عليها : رااااااح تغدى بالمطعم ..

شمرت الجفجير عليه ابتعدت واجه بزندي
: شنو شنووو واني من فجر الله اطبخ تاليها تتغدون بالمطعم تاكلون سم وزقنبوت كوون .

صيحت شعليه اني هو كال ءءءءء لزمت بريييك وماكملت مو كل شي ينحجي ..

ماتحجين من اكل لسانج لهيب ؟

كتلها كال مستعجل يريد يرجع للبيت ..

غمتني وراحت ..

اخذت تليفون ابويه ورزلت عهود رزالة غسل ولبس طيحت حظها : ووولج ع يا اساس تخابرين لهيب وتدكين وياا فج وانوب كايلتله الملابس مو ملابسي منج لج وين الثقة ليش هيج نعالة ليييش ؟؟

كالت انجبي فوكاهه انوب اريد يهتم بيج ويشتريلج ملابس ماتردينه انطي الي .

اخذي ياريت اثنينكم صنف طاحظكم بلكي يقبل بيج حتى تتوبين من علاقاتج المتعددة يالتكسي يالكيه يالباص طاح حظج والله اذا بعد سمعتج مخابرته لو محاجيته اله اكول لامج على علاقاتج .

هاا ادبسز هديوه تهدديني طايحة الحظ بسيطة اله اكول للهيب انتي جنتي تحبين عمار اخويه وبينكم علاقة بس ابوج انطاج هدية اله وانت مكيفة وماصدكتي بس تتعيقلين عليه ..

شهكت طاح حظج حقيرة ولج منيلج هالحجي مو عمار مرة وحدة كالي احبج واني طيحت حظه بعد وينها العلاقة منيلج دليل عليه ولهيب صدك مغرور ومتعجرف بس مستحيل يصدكج .

سديته بوجهه انقرفت منها الحقيرة انوب لهيب يكول عنها مثقفة هاي رب الخباثة والهمجية .

طلعت للبستان ميتة قهر ميييتة شفت جيرانه
بنية اسمها امل سلمت عليها اجت يمي وظلينه نسولف
هي طالبة مرحلة اولى كلية ، هواي حاربت لحتى قبلوا اهلها تكمل وهي حيل مثقفة .

ارتاحيت الها وجنت ضايجة وفضفضت الها والي صار
كتلها هو اشترالي ملابس من محل كولش جبير وبي هواي طوابق بس اني ماريد البس من الي جابهم على ذوقه .

ضحكت كالت هذا الي رحتوله يسموه مول ..

ارتبكت وفشلت ءءء مادري اني سامعة بالمول من صديقاتي بس معبالي هيج .

ميخالف ولا يهمج لعد فلوس بياضج وين اخذي منهم وامشي نطلع للسوك اني وياج وماما اشتريلج ملابس تخبل حتى تخبلينه هذا خطيبج انفة ومغرور ومن تتزوجين اصري على دراستج مدام بعدج صغيرة لايفوتج العمر وتتندمين وتالي يكول اريد اتزوج وحدة من مستواي ومن هالحجي عاد خصميها من هسه .

هزيت راسي وكتلها ان شاءالله ، وقبل موعد عقد المحكمة رحت ويه امل وامها للسوك واشتريت ملابس مكياج اكسسوارات نازكة ومهتميت لحجي مرة ابوي
شكد حجت مهتميت صح هاي شغلات مو مهمة ظاهرية بس ترفع معنوياتي ..

لبست كوت تركوازي والدكم مالته بيجي والبنطرون هم بيجي وشال بيجي وحذاء فلات وجنطة تركوازي ، حيل كعد عليه وطلعت كلش نازكة .

امل علمتني اخلي مكياج خفيف ومرتب ، طبقت الي كالته الي واني ملامحي ناعمة بس عندي خدود وشفايف مليانه .

طلعت هم شفته بالطرمة واكف ، العمود ، لابس قمصلة جلد جوزية وجواهه بدي ابيض وكلادة فضية مخليها جوة البدي .

من طلعت باوعلي من فوك ليجوة درت وجهي منه ورحت وكفت يمه .

تقرب مني ودنك شويه حتى يصير من مستواي
وهمس ترة العالم تسلم ؟ تصبح ؟

بلعت ريك وجاوبته : مااسلم على الي مايردون السلام .

استقام بوكفته وكال احم هاا امشي يله ابوج ينتظرنه يم السيارة . هزيت راسي وتبعته ، دنطلع من الباب رجع كال : اشو مالبستي من الملابس الي اشتريتها الج ؟

كلت بشموخ : معجبني ..

بحدة وضاغط على اسنانه : لعد هاي منين هاي ؟
لاتكوليلي من عهود اشككهن عليج والله .

باوعتله بعصبية : لااء مالاتي مو من عهود .

عدل قمصلته : ها عبالي يله امشي كدامي ، دااريد اطلع كال لا اني اطلع قبلج وطلع قبلي ظليت افر بيدي .

مهيب ..

بعد فترة رحت اراضي الحجية لان ماحب تزعل عليه ..
فتت للبيت واصيح يا اهل البيت يالربع وينكم ؟

محد مجاوبني رحت كعدت على القنفة ومددت اديه
ليفوك .. سمعت صوت خطوات ع الدرج كلبي ظل يلعب بالنبض مرة ينبض حيل ومرة يسكن وانفاسي ثكلت .

اتمنى ماتكون هيه ، رغم مشتاقلها ، بس اذا اشوفها هسه ابد ماارتوي منها ومن اطلع واروح تظل مطبوعة صورتها على جفوني وكل شوي اتأمل تفاصيلها .

وصدك وطلعت هيه باوعتلها ثواني وصديت نظراتها
لابسه تراك شتوي ومخليه الكبوس مالته على راسها ونازلة خصلات من شعرها الناعم على جوانب وجهه .

وصل صوتها لاسماعي وهي تكول بصوت مرتجف
هلو مهيب شلونك ؟

واني داير وجهي جاوبت ببرود : هلا .

هي جاوبت : محد موجود كلهم راحوا لبيت رحاب اختي حتى بيبي وماما وبس اني وهيام هنا عدنه امتحان باجر .

غمضت عيوني وفتحتها جانت دوم تشرح كلشي يخصها ومن فترة بطلت هالسولة وهسه دترجع شوي شوي بس اني ما اعرف اذا راح ارجع نفسي مهيب الاولاني او لا .

اجت وكعدت بصفي ، اني وخرت اديه من القنفة لان صارن وراها ، كمت وكفت عدلت نطاقي وتنهدت .

هي رفعت راسها تباوعلي باوعت لعمق عيوونها
جنت تايه ببريق عيونها
واحس بغصة من اعماقي الهشة ..

كالت بحيرة : اكعد مهيب اريد احجي وياك ..

كلت بتكبر وابعد نظراتي عنها : متأخر عندي شغل اريد اروح .
واردفت بنبرة أمر : من تجي حبوبتي كوليلها اني اجيت دا اشوفهه .

هميت روحي اريد اروح ، هي كامت ولزمت زندي
باوعت لايدها وانتقلت بنظراتي لوجهه
حست على نفسها بسرعة ووخرت ايدها .. متعودة تلزمني هيه .

دارت وجهه وتعصر بأصابعها ندمانة .
ورجعت وباوعتلي بتوسل : والله الموضوع مهم مهيب بس اسمعني ؟

خليت اديه على خصري تنهدت : شكو احجي بسرعة ماعنظي وقت الج ااريد اروح .

همست : مهيب انته لازم تعرف شغلة ترى سبب تصرفات هيام هيه تحبك والله على كيفك وياهه قسوتك حتخليها تتصرف تصرفات مو موزونة .

جاوبتها باستهزاء : ومن شوكت اختج البرعة الوكحة تصرفت تصرفات موزونة حتى هسه متصرف لج اختج رعنة رعنة وشغلة ثانية شهلتناقض لخاطر ربج
يعني اني اصير اخوج انتي بس مو اخوها وجايه دتنسقين الها يمي ؟

-- لا لا مهيب اسمعني هيام مو اختك مارضعتها امك بس اني ..

-- ماتسكتين لاتخليني هسه احجي حجي مايعجبج وبعد اذا فتحتي هذا الموضوع اطيح حظج وحظ هيام وياج .

درت اريد اروح شفت هيام نزلت من الدرج
خزرتها وباوعتلها بكره وطلعت من البيت واسمعها تصيح على ريلام ..

ولج شكتيله وخليتي يغلط عليه حقيرة ريلام حقييرة اكرهج مو اخت انتي عدوووة .

ردت ارجع وادافع لريلام واوضح كلشي بس خليها تستاهل گلبي بعده حاقد عليها .

*****

فرح ..

لمن شفت رجل سحر خفت حيل ع البيت وظلت كل شهر هنا وتبقى يوم يومين مرتاحيت قررت اروح لبيت اهلي وبنفس الوقت قررت اتصرف بعقل وانطي لعلي الدر علم .

رحت له المغرب شفته بالحديقة كاعد بيده كتاب يقرا ويمه لهيب طاكهه صفنة مدري بشنو يفكر يمكن بخطيبته الي ماشفتها لهسه اني .

ومناك شرار واكف يحجي بالتليفون بلغة ما افهمها يمكن يحجي ويه مرته الروسية .

سويت احم احم باوعولي اثنينهم ..
لهيب كال هلو فرح شونج .
كتله هلو زينة الحمدلله ..

الشيخ جان يباوعلي باستفسار خطية عباله مصيبة جديدة ..

اني ماطولتها عليه باوعت للارض وحجيت
... من رخصتك ابو مهيب اني لمن تجي سحر هنانه اريد اروح لأهلي .

هو تحرك من مكانه خله الكتاب ع الطاولة الي كدامه
كال ليش صاير شي سمعتج كلام مرة ثانية كولي .

ابتسمت نصف ابتسامة هازئة : لا اني ماجايتلك حتى اشكي بس دانطيك علم اختي تجي عليه وتاخذني
اني بطلت اشكي من زمان من لم شفت ماكو اذان صاغية الي .

لهيب كال بضحك احسلج كلنا هيج هه ..

باوعتله ضحكت كتله يعني حالك من حالي ..

كال الحال من بعضو والله فرح ..

الشيخ ولا اهتم النه ولا عبالك سمعنه توقعته راح يضربنا راس براس بس وكانه سكوته يكول غصبا عليك تتحملون مدري شجابرنه .

نزع نظاراته كال ترى هي تجي خطار وتروح مو مقيمة هنا .

لا والله اني الي دااشوفه هي مقيمة هنانه ع العموم اني باجر رايحة لاهلي .

تمام روحي وديري بالج على الولد ..

لا توصي شيخ ترى اني امه .

ادري بيج امه ولو ما اعرفج ما اوصيج .

ضغطت على اسناني شيقصد شيقصد اني مخبلة ...
اخخخ كون اشككك كتابك هذا واشمره بالنافورة ..

درتله ظهري بعصبية ومشيت لغرفتي .. يوم ثاني اجتي عليه موج خابرتني كالت نزليلي انتي ..

كتلها مابيه انزل وياي دانيال والجنط بيهم ملابسي شايلة و محملة صعديلي انتي ساعديني .

موج ..

وكفت انتظر فرح بقيت بالسيارة دقايق مانزلت هيه
خابرت واني بالسيارة حجيت وياها
ونزلت وداحاجيها بعدني كالت صعديلي .
كتلها لاء خلي اي احد يساعدج وينزلهم وياج اي احد اي احد اله الطنطل شرار .

دا اسد الباب واسمعه وراي يكول اذا اني طنطل انتي شنو ؟

تصلبت بمكاني من الصدمة لا والله مو صدمة اصلا تعودت على ختلاته واجاني صوته بحدة
اذا اني طنطل لعد انتي ابليسة مرة ابليس .

بقيت منطيته ظهري وكززت ع اساني وكلت فررح نزلي يله .. ورجعت للسيارة صعدت ..
اكيد شافني بالكاميرات لو اكيد فرح خاتون ممبقية احد مكايلتله اني راح اجي عليها وهو سامع ولازملي الدرب .

واجت فرح تتسرسح على كيفها مايعة وبيدها ابنها
وشرار اخذ منها الجنط واني فتحت الصندوك من يمي وهو خلاهم ورى ، اجت هي فتحت الباب الي يمي وانطتني داني بعصبية كالتلي ماتنزلين تشيلين عني .
كاللها شرار تخاف تنزل من الطنطل ..

كالت اسم الله منين اكو طنطل هنا

هو كال اكو اكو بس اختج تعرفه .

شمرت عليه داني اخذته منها بس احس اديه ترجف جريت نفس واباوعله بالجامة يدخن لابس تراك شتوي زيتوني طوخ كاعد على جسمه الرياضي الضخم شعره مكفش مبين حتى ماممشط وطالع ينتظرني من صبح الله عتوي ماعنده شغل وعمل .

اجت فرح كعدت يمي وداحرك السيارة هو اجه يم الجامة الي بصفي وظل يضرب عليها باصابعه .

باوعت لكدامي تأفأفت بضجر ..

اجاني صوت فرح متفاجأة : يا شبيج فتحيله الجامة خلي نشوفه شيريد

كززت اسناني يعني شيريد مني شيريد خل يجي يم جامتج يحاجيج .

ولج عيب افتحيها خو ما اكوله دور منا شبيج افتحي ولج .

اووي صرعتوني فتحتها وبلا وعي مني باوعتله جانت عيونه بيها حمار ومنعسة وخصلة من شعره على عيونه نازلة .

حسيت جف حلكي درت وجهي على فرح ودابلع ريك ماكدر رمشت عدة رمشات واني دايرة على فرح
هي تباوعلي وتباوعله متفاجأة .

هو كال بفرح اخذي الولد منها لاتتعرضون لحادث .

اني هم نسيته دانيال عندي ثولني الطنطل خلاني ما اندل دربي .

هيه كالت اي هي مجلبة بي مدري شجاهه اليوم .. وضحكت

كال هو انوب خليله كرسي بالوره أأمن اله ..

هي كالت بضحك هاي عدكم بروسيا مرتك تشد ابنك بكرسي وتخلي ورى هو صح أأمن اله بس احنه مانطمئن اله بحضنه .

بلحظة الي درت وجهي عليه داسد الجامة
هو نحنى بنفسه يم الجامة وخلى عينه بعيني
وكال اي انتوا همج شفهمكم .

عصبت عليه كتله عبالي عندك شي ترى احنه نفتهم ..

خزرني كال انطيها ابن اخويه يله ..

خزرته وصرنه نتناطح بالنظرات قابل راح اخطفه ابن اخوك دهاج هاج ابن اخوه .
وحركت السيارة .

مشينه من يمه التفتت على فرح بعصبية
منو يدري اني اليوم راح اجي عليج ؟

كالت ها اني البارحة كلت لعلي ..

منو جان يمه من كتيله ؟

يمه لهيب بس ..

وبعد ؟

شبيج موج ليش تنترين نتر ؟

هذا ابو راس المصفح هم يدري ؟

واذا عرف شنو يعني ؟

انت تظلين غبية .. بعد لاتكولين راح اجي عليج اني

غير استأذن من اطلع من البيت ..

اي استأذني بس لا تكولين اني اجي عليج كولي احمد ..

شبيج ولج ترجفين ها شرار سوالج شي ؟ لو صرتي تضوجين تجين عليه ؟

حاولت اهدي نفسي باوعتلها و ابتسمت احاول اخفي مشاعري المنهارة فجأة وبدون سابق انذار ..
حكيت راسي وعدلت شعري هزيت راسي وبلعت ريك
لا عمري مو هيج بس هذا يضوج شرار .

لا هو هيج ترى حباب شرار صح مرات يصير عصبي ومخبل بس نملة مايأذي .

هزيت راسي واريد تكمل تحجي عنه بس هي العوبة سكتت ولج احجي بعد يله احجي ياا امداني الرجال متزوج وعنده طفل يااا صدك احجي اني شون افكر بي هيج يربي لج شبيج مووج ثوول حتى ثوول شلون تفكير هذا .

اني ابو شهادة متوسطة رفضته انوب افكر بشخص متزوج وعنده طفل لاااا يااا الله لااا مستحيل لو اموووت ما اسويها .

....

فرح .. وصلت لبيت اهلي حسيت نفسي بلا قيود بلا حزن تذكرت ايامي قبل لا اتزوج شلون جنت عايشة حتى نوبات الصرع مجانت تجيني هوايه لان مرتاحة
اصلا جنت ناسيتها بس لمن تزوجت زادت بسبب المشاكل والخوف من حمدان .

بقيت يمهم تقريبا اربعة ايام ، احمد اخذنه كلنه وودانه للمطعم تعشينا وبعدها افترينا حسيت نفسي حرة طليقة مليت من اجواء الحزن والقهر والعذاب .

باليوم الخامس موج جابتلي ملابس رياضية سوده وكالت امشي وياي للجم اليوم غيري جو .

باوعتلها ببرود هي كالت لاتكولين لا كافي اطلعي من جوج هذا ترى هو الحزن بالگلب واحنه نحاول نطلع نفسنه من ولو لساعات الروح الها علينه حق .

ابتسمت بسخرية : الگلب كولشي بي حزن هم قهر خذلان كولشي .

لعد هذا هو بدلي وامشي ويايه .. رحبت بفكرتها فعلا محتاجة ارتاح شويه رحت وياهه تدربنا ضحكت وسولفت ويه البنات ورجعنه المغرب للبيت ..
واشوف سيارة علي يم الباب .

باوعت لموج وهيه هم باوعتلي هزت راسها بتساؤل
قوست شفايفي وحركت اكتافي بمعنى ما ادري ..

دخلت قبلها بخطوات خجولة ، رأسا دخلت للاستقبال شفت الشيخ كاعد ويمه دانيال وهو ايده على لحيته
وبابا كاعد مقابيله جانوا دا يسولفون .

كلت السلام عليكم ، هو بسرعة انتبه لصوتي وباوعلي حتى قبل ما اكمل السلام ..

رد السلام بفتور ونظراته تأملتني لثواني معدودة ودار وجهه واخذ دانيال حطه بحضنه ..

وبابا كالي بنبرة حنية
- - بنتي الشيخ جاي عليج حضري ملابسج وروحي ويا لا تأخرينه خاف عنده شغل .

- - بس أني .

بعدني ممكملة باوعلي بنظرة وحدة من عيونه كفيلة بأن تنسيني الي جنت افكر بي او الجنت افكر اكوله .

سكتت وفتت جوه ، غيرت ملابسي وجمعت اغراضي
اجت خالتي تصيح ولج يلاااااا لا تخلين رجلج ينتظرج عيب عليج عيييييب فشلتينه بت الاوادم .

ظليت الطم على خذي اكيد هسه سمعها واافشلتاااااه .
خليت ايدي على حلكي واكوللها اشش خالة اشش الله يخليج سكتي عيب فشلة منه .

كالت هم بصوت عالي اووي خلي يطلكج شعليه اني عساج تطلكتي ولا تزوجتي بعد يومية جايتنه زعلانه فشلتينا .

خالة صارله ٧ اشهر من مات حمدان هاي اول مرة اجيكم شوكت يومية اجي .

انين كالت شبيج فرح كوليلها اي وهيه تسكت ..

انوب دارت على انين وراحتلها وظلت تعدظ الكسلانة ام التليفونات ام الولد نهار كله تخابرين اني اكتل ابوج يكتل ولا يفيد بيج .

هي ظلينا نضحك فدوة خالة صار هواي ماضاحكة من قلبي رحت بستها بخدها وهي باستني وحضنتني وظلت تبجي مدري شغيرها بسرعة ..

تبجي وتبوس بيه الله يرحمه جان خوش رجال يكفخ بيج ومربيج ومأدبج بعد هسه من راح منو يكتلج منو يلزملج لسانج .

وخرت منها وطكيتها ضحكه تالي تذكرت الشيخ هنانه ممنوع ممنوع اضحك هيجي اذا اظل هنانه امووت من الضحك خلي اروح .

رحت للاستقبال وبدخولي اعلن نفسي جاهزة للعودة الى منزل القهر والعذاب ..

هو كام سلم على بابا وطلع قبلي وبيده داني وموجايه اخذت الجنط للسيارة سفطتهن ، تفاجئت جاي لوحده شعجب لا شرار لا مهيب لا لهيب ، مدري شعنده ..

كعدت بالورة وانطاني دانيال ودار يسوق السيارة
باوعلي بالمراية بس شكله معصب مني ...

سألته : راحت جنتكم ؟
هز راسه بمعنى اي..

تالي كال انت لمن تطلعين لاي مكان انطي خبر ليش تطلعين بدون ما احنه نعرف صارلج شي لا سمح الله غير احنه مسؤؤلين عنج ..

تفاجئت هذا شنو فد نوب سويلي اقامة جبرية وهو شعليه بيه شعليه .. سكتت عنه . شويه بس مانطاني قلبيي اسكت بعد ..

كتله اني طلعت ويه اختي ..

كال اي ميخالف انتن بنات شابات والدنيا ما تتأمن انطي خبر انوب ادزلكم واحد من الولد يوصلكم .

اي بس ترى اختي تسوق وتستخدم سيارة بابا ميحتاج ..

هي براحتها بس انتي لا!!! كتلج احنه مسؤؤلين عنج .

باوعلي بالمراية بنظرات إصرار ودار وجهه يباوع للطريق ..

كملنه طول الطريق واحنه ساكتين من وصلت للبيت احس رجعتلي الخنكة مرة ثانية .. من نزلت تحسرت هو ظل يباوعلي بعيوني مقلص عيونه . حس بيه ضجت ..

كال ها جنتي تردين تظلين اكثر عند اهلج ؟

جاوبته اي طبعا اريد ابقى على طول عدهم هنا ماعندي شي تبقى علموده بس انته لزمتني من ايدي الي توجعني .

كال احسلج تبقين هنا فرح وبعدين راح تعرفين ليش .

قبل لايدخل كال اخذي ابنج وصعدي والجنط هسه واحد من الولد يجيبها الج .

هزيت راسي وفتت جوه .. صارت سحر كبالي تباوعلي مبتسمة .. خزرتها وصعدت معصبة على علي شكو يجيبني اذا هيه هنا اني شنو كتله .

انوب القبيحة اجت ودخلت عليه مثل الحية مبتسمة الي .عابت هالبسمة

ردت اتعامل وياهه بذوق وماطردتها وسمحت الها تدخل واجت كعدت على السرير ..

كالت ... ميكدر على فراكج راح وجابج واجه ..

التفتت عليها بعصبية شتقصدين ولج ؟

بعدهه مبتسمة ابتسامة خبيثة ..

- على كيفج ريلاكس ريلاكس بس خلي نسولف شبيج تدرين اني مقهورة عليج هوايه .

- ميحتاح تنقهرين امشي طلعي برة .

تدرين شغلة حمدان اخذ مؤخرج و قسط جامعتج وخلاها بحسابي بالبنك .

صارت اسناني تضرب ببعضها بس مابينت الها هالشي
كتلها مال حلال رجعلي الشيخ سدد فلوس بابا وانطاني مؤخري فلس فلس ممهتمة اني ..

هيه ضحكت كالت يااا اي انتي ممقصرة ويا بعده حمدان اربعينيته ما فاتت والشي هههه اله صدوووك هو بعد يجي يمج ؟

عطت بيها ولج منو تقصدين ؟؟؟

لا تغشمين نفسج انت تعرفين منو و ؟

رحت يم الميز جانت اكو اقلام ع الميز ضربتهن بيدي وبعثرتهن واخذت قلم وقربته من وجهه .
كتلها احجي شتقصدين لا انبته بعينج هسه احجييي ..

هي خافت مني كالت كلهم يكولون عندج علاقة بالشيخ وهو ناسي الغترة مالته يمج .

اني تخبلت تخبلت رفعت القلم وتبتته بيها ..!!!
وهي ظلت تصرخ من الالم ..

يتبع ..

اذا اشوف تفاعل ع البارت انزل باجر 🤭😁

متابعة لحساب الكاتبة الگميلة ssarahh_333