رواية هذيانٌ بين جمرٍ وجليد ..(ارملة اخي المجنونة) الفصل الثامن عشر 18 - بقلم نورا ناصر

السلام عليكم
رواية هذيان بين جمر وجليد
الفصل ١٣
نورا ناصر

******

اكتسيت بمعاطف الصبر ..
ورسمت القوة ما بين اضلعي ..
أتزجرني لانتفاضتي لنيل حقي
وتغدوا في الافق معترضا علـّۓ قوتي الزائفه
نسجت م̷ـــِْن بين ارحام الوحوش انثةٌ ..
تنبض بفؤادٍ م̷ـــِْن جمرٍ ..
تستنشق القوة م̷ـــِْن عطر الظلم ِ
وتغدوا م̷ـــِْن بين براثن الحقدِ
شامخةٌ مرفوعةَ الرأسِ
ولازلتَ معترضاً علـّۓ جمرة فؤادي الملتهبُ..
بقلم HafsaHafsa710

******

هي اول ماكعدت على السرير شمرت الشال الي جان مغطي زنودهه ومن حجت الكلام المسموم متحملت وزندهه اغراني حتى انبت القلم بي !! نبتته وسحبته وهي عاطت .

ولزمت ايدها ظلت تصرخ تباوعلي وتباوع لزندها النازف وتباوعلي وتصرخ : يااا مخبلة شسويتي بيه شسووويتي حقيييرة الله ياخذج .

ابتعدت اباوعلها ببرود غمضت عيوني ثواني احس تسرعت هواي بس هي والله كلامها مثل البانزين الي يخلوا ع النار ويخليها تشب واني من افوت لهذا البيت مية جني يفوت براسي .

كامت على حيلها لازمة زندها وتتألم ، راحت للباب تريد تطلع ، جريتها من شعرها ورجعت كعدتها على السرير وشمرت شالها عليها
واضربها على اكتافها بحقد ..

بصوت مصرور : تعاي وين موليه خلي شالج على راسج لاتنسين نفسج بيت شيوخ هذا المن تردين تسوين اغراءات بعد . حمدان وكرطتي عمره .

دفعتني وصرخت مخبلة مخبلة اخذت شالها وخلته ع راسها وغطت زنودها وبيدها اللخ لازمة زندها الي ينزف .

انتبهت على دانيال يبجي اخذته انفتحت الباب جان مهيب يم الباب جايب الجنط مالتي وهاي طلعت عود تشكيله : الله يخليك وديني للمستشفى خاف اتسمم هاي المخبلة ضربتني بالقلم .

باوعلي مهيب متفاجئ : صدك تحجي فررح لوو شنو ؟

خليت ايدي على اطار الباب واسكت بدانيال
وحجيت ببرود : كولشي مابيها عرج ميطكها هسه شويه وتصير زينة وتنظم لفريق السم .

ظلت تصيح متوجعة : لالا عفية انتوا شون متحمليها هاي والله من صدووك مخبلة والله اله اشتكي عليج واشمرج بالسجن اني اعلمج .

وراحت تركض ومهيب بقى واكف متفاجئ ودانيال يبجي انطيته اله هاك اخذ ابن عمك وسكته خلي انزل وراهه خاف تألف قصة .

ضحك وهو ياخذ دانيال : هو شتألف بعد اذا انت منبته القلم بأيدها فرح ترى عمي حمدان مات الله يرحمه مالها داعي تغارين بعد .

ابتسمت بسخرية : ههه هو اني من جان عايش ما اغار عليه بعد من مات بس هاي جايه تشوه سمعتي هايه مدفوعة من حسان عمك .

مهيب بمزح : والله انت تضحكين فرح سينما والله .

عفته يسكت بدانيال وهو مايريده يستغرب منه لان تواجده قليل بالبيت وصلت لغرفة ريلام دا اتبع سحر طلعت ريلام من غرفتها مبتسمة
_ فرح شوكت جيتي ولج مشتاقين .

بستها بخدها بسرعة وكتلها روحي اخذي دانيال من مهيب ونزلت اركض ..

نزلت شفتها دتشكي وتبجي وتولول يم الحجية
وكفت على الدرج واتسمع الها تحلف
والله خالة ماسويت الها شي والله رحت اصالحها نسولف احنه بيننا شي مشترك اخ واخته محلوة العداوة .

كتلها من مكاني : اي وبعدين كملي شصار..

هي التفتت عليه والحجية ظلت تصيح وتعض بأصبعها
_ اخخخ منج المخبلة العرمة اخخخ ولج فشلتينه خطار عدنه خطااار انتي ماتحترمين مايوكف بعينج احد .

اجه الشيخ على صياح امه والحجية تلكته تصيح
تعال شيخ تعال شوف البلوى الي مخليها عدنه شسوت بالبت .. ودوها للشماعية واخذوا الولد منها مو صاحية هاي مو صاحية ..

بقيت واكفة بمكاني ومتكتفة واتفرج على المنظر وهاي سحر راحت يم علي وكفت كباله وتتموع عود هيه دلوعة وكذا وكيوت

وبنحيب : شيخ فرح ضربتني فررح
بالقلم نبتته بيدي والله يوجعني والله احس صخنت عفية ودوني للمستشفى يمكن تسممت هذا رصاص..

الشيخ بصرامة : وين جنتي وضربتج وليش ؟

نزلت كم بايه ورحت يمها وحجيت بتهكم
_ اي كوليله وين جنتي احجي ليش ساكتة ؟

طوقتني نظراته الشبيهة بجمر شهر يناير
شحيت منه نظراتي بفزع ..

وهي تلكأت بالكلام ءء شيخ اني والله والله ردت اصالحها احجي وياها نبدي من جديد كلت ابنها اخو بنتي وميصير الحقد ....

عطت بنص وعي : جذااابة يممه منج ام الجذب يييمه ولج كلتي .. باوعت للشيخ واستحيت احجي ..

كلت: شييخ هاي ثاني مرة تطعن بشرفي ثاااني مرة اني بعد ما اسكت ترى اخذ حقي بنفسي وما انتظر احد ..

الشيخ عاط عليها وانتي شتسووين يمها بالغرفة هاا انه شنوو كتلج شنووو ؟؟ مو كتلج ماريد مشاكل ليش تخليني اطلع من طوري واتخلى عن شهامتي واطردج وماخليج توصلين هنا بعد..

الحجية كالت : خوو اطرد هايه ام لسان ليش امبقيها هنانه يومية هوسه ترى سحورة جايه خطار عيب نطردها ماينطرد الخطار من بيت الشيوخ ..

الشيخ كال حجية انه منبه عليها ماتوصل يم فرح وتتجنبها ليش تلح شعدها ليش تخليني اشك بيها

هيه كالت بنحيب : ااه والله محجيت شي اااخ شيخ رحموني وودوني للمستشفى والله متوجعة ..

الشيخ صاح على شرار تعااال شرار وينك سويلك شي بي فايدة وشوف جرح ايدها خو ما خطر عليها تحتاج مستشفى ؟

اجه شرار كال صار شيخي ادلل .. وكف يمها هيه وخرت شالها وكلبيتها دلع وباقي الصدر كيبور
باوعتلي رفعت تك حاجب العين اليمنى وقلصت اجفان العين الثانية ..

هيه عود سترت نفسها تستشرف ام زواج المتع***

الشيخ كال اذا مابيها شي ماتحتاج مستشفى حتى تودونها لبيتهم .. ..

هي انتفضت : لا شيخ والله ماما راحت للزيارة والله وبيتنا محد بي ترضى اكعد اني وبنتي وحدنا بالبيت والدنيا ما تتأمن ..

بفتور جاوبها ونيران غضبه بدت تخمد
: خلي تروح وياج بلقيس تبات بين متجي الوالدة ..

الحجية كالت لا والله منو يكوملي نص الليل منو يدير باله عليه وبلقيس تروح وانه متعودة عليها تناوشني كلاص الماي دواي تعرفله .

الشيخ رد : ماعندج اقارب خالات عمات ..

هي ردت والله كلهم كطعيين ومحد يدري بحالنا ..

الشيخ وجه كلامه لشرار : ها بشر شرار ..

كال شيخ مابي شي هسه انظفه الها واعقمه وشويه تسخن عليه وباجر تكوم مثل الحصان هههه

الحجية صاحت عليها تعاي يمه سحورة مسحيها بوجهي بعد شسوين ..
راحت كعدت يمها تتمسكن ..

و الشيخ راح لمكتبه وشرار فات من يمي
همس : هههه منبته قلم بيدها لو كايلتلي انطيج سجينة تدججيها بيها عدل .

باوعتله بضحك : الظاهر انت اول منظم لفريقي حلوو ..

كال اخت موت منكدر منصير وياج ..

كتله باستغراب اخت موت شنو بعد

ضحك كال غلسي وصعد فووك ..

تبعت الشيخ لغرفة مكتبه .. لمن دخلت جان منطي ظهر
واكف بصف المكتب مالته ..

كلت اعذرني ع الكلام الي راح اكوله ..

ثواني والتفتتلي وبنظرة فاحصة طوقني ..
اشرلي بوجهه حتى اكمل كلامي ..

شبكت اصابعي وطقطقتهن وحجيت بنبرة محتارة بس متحدية : انته مسؤؤل عن الي صار قبل شويه اني كتلك اني اذا هايه تجي هنا اني اروح ومن خمسة ايام رحت لاهلي ورجعت وهيه بعدها ؟

بنبرة اصرار : ليش ماتلومين نفسج على تصرفاتج اللامسؤؤلة والمتسرعة ..
كال هيج وانطاني ظهره ..

بصياح وحركة كلب جاوبته : هاي تطعن بشرفي بسمعتي شوون بعد اتصرف ..

التفت عليه بقوة وجبروت : صوووتج لا تصيحين !
مو هيج تنحل الامووور انت شوكت راح تتعلمين تتصرفين بحكمة تظلين هيج طايشة .

_ اني مو طايشة بس احب اخذ حقي بيدي ..

_ ولج بويه مو هيج ينوخذ الحگ انت مفتهمة غلط ولج مو بالخبال والطيش والتسررع ، حققي وياها اخذي وانطي وياهه بالكلام خليها تكلج منو ورى هالحجي الي جاي تكوله منو يقررهه ويترس راسها ليش ضيعتي حقج بهالطريقة حتى لو اريد اسندج واصير وياج بطرقتج هاي ضاع حقج بعد ..

بغضب مسيطر عليه رديت
: هي جانت تستفزني واني متحملت ضربتها بصراحة عصبتني حيل جانت تحجي حجي ..
باوعت لعيونه وسكتت استحيت ..

هو جان يباوع لحلكي يريدني اكمل درت وجهي منه ..
كال كملي شكالت ..
باوعتله وبلعت ريك وكملت بارتباك .. وجوده منطي قووة ورهبة .. : كالت حجي سخيف وميحتاج اعرف منو ترس راسها بي ، ماكو غير حسان وهيام يبثون هالاشاعات ويطلعون حجي عليه ..

باوعلي ثواني مقلص عيونه : هسه ماراح تكولين شكالتلج ؟
سكتت اني هو اردف : كولي حتى اعرف اتصرف ..

كلت بهدوء من رخصتك .. طلعت من الغرفة مخطوفة الانفاس ومعصبة حيل ، لاكاني شرار بالصالة والمصيوبة كاعدة يم الحجية بعد شويه تطفر تكعد بحضنها .ع كد ماتتلوك ..

شرار بضحك : هاج فرح نظفي اثار جريمتج ..

باوعت بيده كاسة بيها كطن وبي دم .. اخذته منه ورحت شمرته بحضن سحر ونترت بيها : كومي شمري وصاختج بالزبالة لو هاي هم ماتعرفيها بس بيج تطعنين بالشرف ماكو اسهل منها هاي عندج . ماعبالج الدنيا كما تدين تدان .

هي رمقتني بنظرة متوعدة واخذته مني .. والحجية
كالت الله يطيح حظج المخبلة بعد المخبل ماعليه عتب شنسويله بس كون اخلي علي يوديج للشماعيه يكوونج .

اجيت انطيها بوسه بالهوا اصعد ضغطها اكثر بس كافي لهنا وبس واني هالايام مدري شعجب منطتها إذن الطرشة .. جني ما اسمعها .

يوم ثاني نزلت وبعدني ع الدرج واسمع الحجية تكول لعلي الدر بحذر
_ صدك هالحجي انته عندك وياهه شي يمه ترى ماكو دخان بدون نار ادري بيك ماتحب الغلط بس خاف عاقد على فريحة الخبلة من ورانا وانه شفت الغترة مالتك عدهه بس جذبت روحي وحتى هيه جانت ضامته بزياگها بس وكعت منها وشفتها .

هو كاللها : حجية شلج بهالحجي هذا ؟ اشاعة وداعتج وانه لازم اعرف منو وراها ..واحاسبه حساب عسير وهاي سحر خلي تقلل جياتها هنا لو تكطعها واذا تردون انتوا روحولها ماريدها تجي هنانه وتظل تلغي .

_ يمه الله يخليك كلشي ولا فريحة تاخذها لا تخلي احد يأثر عليك يمه فريحة ماتلوكلك وانته شيخ العشيرة والناس تحسبلك الف حساب تاخذ هاي الشاخطة حتى الله مايرضاهه يعني صام صام وفطر على زبيبة انته وين وهيه وين .

اسمع بس صوت سبحته يفر بيها وهيه كملت
_ ليش ما اخطبلك سحر يمه شحلاهه جنها نسمة هوا باردة بعز الحر واحسن من فريحة راكزة وعاقلة .

اني صفنت بعدهم يطعنون بيه ووصل الحجي للحجية يعني هاي سحيرة هم كالت الها وانوب هاي مصدكة يعني معقولة تشك بينا اني وعلي مستتحيل
وصارلهم شكد يطعنون بشرفي ويحجون بسمعتي !!
ويمكن علي يعرف وساكت ، يا الله راح اتخبل .

كعدت على الدرج صافنة ولازمة بالحديد مالته
واختفى صوتهم عن اسماعي ، شي مايستوعبه عقلي يعني هيج عدهم الطعن بالشرف سهل ؟ راح امووت والله .

صار هدووء وسمعت الحجية تكول بلقيس وديني لغرفتي تعبت .. نزلت من الدرج دخلت للصالة ماشفته .
وبس بلقيس والحجية رايحين صوب غرفتها .

انتظرت ثواني طلعت بلقيس من الغرفة لزمتها من ايدها وشديت عليها وبنبرة رجاء وغصة
سألتها : ام رحاب الغترة مالة علي الدر شجابهه لغرفتي ؟ موج تكول من الفاتحة هي جانت يمي انت ماتدرين شجابهه ؟

جاوبت : شمدريني اني بالفاتحة حتى عيوني ما اشووف بيهن من البجي وضغطي جان صاعد ليش ماتسألين نفسج ؟

كالت اخر كلامها بشك تريد تروح لزمتها ورجعتها عليه : يعني انت هم عبالج اني وعلي مثل ميكولون ؟ ومثل متكول سحر .

كالت : مادري بس اصراره على بقائج هنا والغترة يمج ماكو دخان من غير نار ..

لزمت ايدها قوي وبعصبية : هاي ماكو غير سوالف بنتج هيام ربيها ربيها .

فلتت ايدها مني : لا كل شي تخلينه براس بنتي بالله وخري ...

غمضت عيوني بقووة عصرت عقلي عصر
وكدام عيوني ذكريات احسها بعيدة احس راسي مفتر بيوم الفاتحة جنت بلا حجاب وفاقدة ووكعت عليه غترة علي او هو شمرها اي اي هو شمرها وكعت على راسي وانفتحت وغطت شعري ...

اي والله جنت ناسية ومنهارة هسه من كد ما لحوا بالموضوع تذكرت ...

رحت لغرفة المكتب مالته جانت مفتوحة دخلت ارجف واحجي : بسببك انفضحنه شوفلنه حل كص لسان كل واحد يطعن بشرفي..

ببرود وكسل وهو يشح نظراته مني : اكعد اكص لسانات..؟

جاوبته بحدة : شنو تستهزء بيه اذا مهامك الشرف ترى اني هامني كافي سمعتي صارت على كل لسان انت ليش ماتكدر تخلي حد لاخوك وبنت اختك ليش ماكو غيرهم طلعوا هاي الاشاعة.

سكتي صوتج لا يعلى ..

جريت نفس بعصبية...

ظل يتافئف...ترى مصختيها مدام نعرف نفسنه ممسوين شي كلام الناس احنه ارقى منه وحتى ما يليق بيه ارد عليه

_ ماترد شنو ماترد وليش ، انت عاجز عن الرد مثلا؟

بغرور رد :..لا مو عاجز بس متجاهل وماعاجبني ارد .

بصدمه..ومخليني الوحدي احارب وارد وادافع عن نفسي انت وين دورك وين ؟

ببرود جاوب : .صيري مثلي وتجاهلي علاج الجاهل التجاهل...
كام من كرسيه وتقرب مني وغمزلي وهمس..ترى اني وياج اسد ولبوه ماكو داعي نرد على كلام الكلاب

بغضب جاوبته ...يااا اسود يا وحوش دا اكولك شرفي شرفي تعرف يعني شنو شرفي الكل ديحجي واني مادري ، انت ليش ساكت سكوتك ميطمن ...لو انت رجال ما عليك شي واني بس الي رايحة بيها ..

_ اذا تردين تكصين السانات تكدرين بطريقتين بس!! ورفع ايده واشر باصبعه السبابة والوسطى

باستغراب رديت : ...شنوو طريقتيش؟

_ اذا تردين اتزوجج ما عندي مانع اذا عندج غيري مبروك ازفكم بسيارتي الي يعجبج طبعا

سيطرت الصدمة عليه اريد احجي اشرلي بيده
و سكتني ..

كمل : يعني نستخدم هذا الزواج مثل درع واقي لسمعتج . نطش خبر انو احنه عاقدين من فترة بس مااعلنه عن الموضوع .

سألته بقهر : سمعتي ليش هي بس سمعتي !! والغترة يمي من الفاتحة ترى وورى الاربعين شافتها هيام وشافتها امك وحسان وظنوا ظن السوء ...

تجاهلني انه هذا كله مايهمني ..
وكمل واذا ابالج احد الف مبروك بس راح اجمد كلشي يخص دانيال لان ما اريد زوجج المستقبلي يتنعم بورث اخوويي

يعني دانيال طفل وكلشي باسمه وراح يكون قسام شرعي واصلا كلشي اجمده بالقاصرين وشكو يخصه يم حسان هم اخذه منه

من يكبر انه بيدي اسلمه اله ، عاد مو انطي الج تخلصينه حمر واحذيه ، هذا يتيم محد اله لازم نضمن حقه .

يا اما تردين تزوجيني وانتي اكثر انسانه تعرفيني مستحيل اضلم حقج وحق ابنج وهذا الشي لمصلحتج انتي وطفلج.

واذا رفضت ؟

راح كعد واردف بتكبر وهو يرجع ظهره ع الكرسي
انه جاي اقدملج عرض نادر ويمكن ماتتلقينه مني مرة ثانية .

_ يمكن ؟

_ اكيد مو بس يمكن ..

سكتت اباوعله بنظرات صدمة مسيطرة عليه لسه ومن اول بداية عرض الزواج..

كال : ليش ساكتة ترى انتِ مجنونة انه الي طالب منج الزواج مو رجل عادي وترفضينه .

جاوبته بحقد : مو مجنونة بقدر ما انت مغرور ومتسلط ، ومتأكدة تريد تسيطر عليه بس اني اكولك شغلة حياتي وحريتي مهمة بالنسبة الي واني الي راح اقرر مسارها ، وهسه من رخصتك ابني محتاجني ..

دا اطلع .. جمدت بمكاني على صوته النافذ والقوي
: _ فرح احسن شي فكري وانطي لنفسج فرصة ، اخذي حسنات هذا الزواج بنظر الاعتبار .

حاولت اجمع شتات ذهني وافكر بمنطقية بس لا احس دايخة سطرني بعرضه هذا وما املك اي قررار .

هدى ...

سمعت ابويه ومرته يسولفوون الي عرفته منهم راح ينتقلون يسكنون بغير محافظة وتحديدا للسماوة ..

متتت قهر يربي لااااا مستحيل مستحيل حضنت علاوي اخويه بقهر وبجيت بجي مصاير ورحت اتوسل بابويه : واني شون تتركني هنانه مافكرت بيه اني وحيدتك يابه ليش هيج تسوي ويايه ..

كال ولج انه كبرت ومابيه حيل على شغل البستان هناك بالسماوة عمامج راح يقسمون علينه الورث وانه حصتي بيت صغير احسن من هنانه ما املك شبر من هالكاع بس تعب وفلاحة ومامحصل شي كلت ابيع الحيوانات وافتحلي محل من البيت ونعيش منه .

بنحيب توسلت بي : اخذني وياك لاتبقيني هنانه الله يخليك .

لج ماتنجبين مو احسلج بدل هالخريط وانه توني جاي من بيت عيالج وكتلهم يعجلون العرس لان بس اضبط وضعي اشيل .

يحجي وبكل ببرود ومامهتم ابد اجت مرة ابوي كملت السبحة كالت شبيج ولج راح تتزوجين بقصر انتي لا حكتنه على هالبيت الصغير غرفة وحدة بس اسمه ملك وهم نعم الله شكد عينج فارغة .

مسحت دموعي بطرف ملابسي الكلام وياهم ماينفع قافلين ، ورحت لعلاوي حضنته وابوس بي واحجي وياه : لا تنساني علاوي فدوة ادري
اذا راحوا اهلي راح انسي وبعد حتى مايسألون عليه
انت لاتنسى اختك ..

صارت عيونه تلالي بالدمع ومد اديه الصغيرة والضعيفة وطوق رقبتي ويشدني اله حيل وظل يشهك .. واني ابوس بي ..

ايام وحددو عرسي بهالفترة شبعت بجي وجنت حيل خايفة من لهيب خايفة يأذيني وتمنيت شكوكي مو بمحلها.

طلبت من امل جيرانه تروح ويايه للصالون وخطية مكالت شي بس ابوها شرط امها تروح وياهه ..

طلعت حيل حلوة بس دموعي مابطلت بجي
عبالك كلولي موعد وفاتي مو رايحة اتزوج .

واخذوني لبيتنه وكعدوني بالاستقبال ..
هم كالوا ماكو عرس رأسا للفندق يزفونه لان عمه بعدها مطلعت السنوية مالته
بس بصباحية العرس راح يسوون عزيمة كبيرة ...
هيج سمعت من ابويه .

وظلينه ننتظرهم اكثر من ساعتين يلا اجو اني جرشت من البرد ، البدلة صلوخ والاستقبال مالنه بارد وصادف مطر وهو مسكوف جينكو ظل ينزل مطر علينه ونص الجيران راحوا بقوا قليل .

اجت كعدت يمي مرة ابوي كالت تأخروا بس لا غيروا رأيهم لو العريس عاند هو جنه ماهاويج ابد .

امل جانت كاعدة بصفي من اليمين كالت لا خالة اكيد تأخروا لان ازدحامات ومطر ومنطقتهم بعيدة
هسه يوصلون ان شاءالله

هي ردت : لا عيني اصلا بالمطر الشوارع تفرغ بالعكس .

سكتت امل بس لزمت ايدي وابتسمت بوجهي
حجيت بغصة : عادي امل ياريت مايجون
وكملت كلامي بالبجي .. بس انذليت هواي هم هدية وهم بيوم العرس يشتلوني .

عصرت ايدي حيل ومبتسمة ونظراتها دافية
لتكولين هيج هداوي هسه يجون .

هزيت راسي ودنكت .. دقايق وسمعنه صوت هورنات
كالوا اجوا اهل العريس والاستقبال جان فارغ من الناس . بس امل وامها ومرة خالي ومرة ابويه .

ودخلوا النسوان كم وحدة بيبيتهم والبنات ريلام وهيام واختهم المتزوجة و امهم ..

الحجية دخلت تمشي على عصى كالت عذرونه حزنانين حتى مانكدر نهلهل ..

جاوبتها مرة ابوي احنه نهلهل حجية وظلت تهلهل وام امل ظلت تكول هوسات وتصفك وتهلهل
كالت خطية هم لازم نفرحها شويه ..

ورى شويه فات لهيب دنك من الباب يله فات واجه كعد يمي ، رجف كل جسمي خوف وبرد ..

كعد شويه يمي وهم يهوسون وتالي كال يله
بعدها لبست البرنص ولفيت روحي عدل وامل تساعدني واخذني وكفنه بالطارمة جانت كلها زلم
كال سلمي على ابوي .

سلمت على ابو الشيخ وهو باركلي واخذني للسيارة
بس غركنة المطر وبسرعة صعدنا بالسيارة .

سيارة اخو الضابط مهيب هو يسوق وعمه شرار كاعد بالصدر ، شغلوا اغاني وسوالفهم تموت ضحك بس اني غصة بنص روحي ماتنبلع .

قرب مني لهيب كال شبيج ترجفين بردانة ؟

هزيت راسي بنفي ودرت وجهي منه ماريد يشوف دموعي ..

عمو شرار كال ولك لهيب مطي متشوف مرتك بردانه انزع سترتك ولبسها الها اظل اعلمك بيك اني ؟

هو دينزع السترة مالته جاوبه : شرار دخيلك اليوم عرسي اجلها سالفة المطايه وبعدين شعندك شامر اذاناتك يمنا .

كال مهيب غير مقهور ع البنية الله يساعدها عليك ..

همس يمي اني الله يساعدني ..

ونزع السترة وخلاها على اكتافي وتقرب مني ولحفني بيها واني بعدني ارجف وشفايفي ترتعش واسناني تصطك ..

سألني تلبسيها ؟

هزيت راسي بنفي ..

وصلنه للفندق وصعدنا للغرفة الي حاجزيها
من فوتونه على الغرفة احس قلبي انقمت واختنكت
زدت بالبجي .. هو شافني هيج طلع من الغرفة واني بقيت وحدي بس شبعت بجي .

خليت راسي على الجرباية وغفيت ماحسيت بنفسي ..
سمعت صوت الباب انفتحت فزيت جانت دموعي متمركزة جوة عيوني ومبللة رموشي مسحتها واني اباوع عليه وبدون وعي مني شهكة فلتت من حنجرتي .

هو اجه كعد يمي كمت اني ، لزمني من رسغي وكعدني
كال بتعجرف كتلج كُعدي .

همست بشهكة : اريد اروح للحمام ..

كال باصرار : ماكو روحة قبل ماتسمعيني ..

هزيت راسي ..

مسحي دموعج وشربي مي وسمعي الي راح اكوله ..

جاوبته : ماكو بوجهي دموع مسحتهم وماريد اشرب مي عطشانة ..

ضرب ايده على فخذه كال اوو بدينا بالعناد
لج بابا اني جاي اريد اعقد وياج هدنة ..

ضحكت وهزيت راسي ..

كال اي هيج تمام ..

ضحكت بأمل : تمام ..

كال : ان شاء الله راح اكون صديق الج والي ما ارضاه على نفسي ما ارضاه عليج وان شاء الله اصدقاء اوفياء مو هتليه

سكتت شويه لملمت شتات روحي بلعت ريك
وافكر بكلامه وارتاحيت بنفس الوقت
سألته والبجي بعده مسيطر على مخارج حروفي
_ شنو انوب اصدقاء هتليه ؟

ضحك وكال : يعني مو تكعدين تتدلعين عليه وتلبسين المشلتح والمزكرش .. تصير صديق سوء بهل حاله ..

باوعتله وجهه يضحك ضحكت
_ وانت شكو تباوع من واجب الصديق ينصح صديقه مو يصير ملطلط نسوان

لزمني من فكي وجعني حييل
كال بحدة : شنو ولج ملطلط نسوان خلصتها بالغرب كلهن معرينات كدامي محد اثارت غريزتي

وخرت ايده مني متوجعة : اخخخ ترى وجعتني
اني هماتين ما ردتك لان انت بصراحه بصراحه متعجرف وتتعيقل بس من صرت صديقي غيرت نضرتي عنك .

دنك عليه وباس خدي كال : مو متعجرف بس ما احب واحد يفرض شي عليه اصلا هو مو غلطج الخطأ من الكبار الي عليهم العتب

ضربته على ايده : رجاءا لا تكعد تبوس ما احب هيج اصدقاء فاسدين ..

ضحك : ولج فساديش عادي اني ثقافتي اوربيه وهناك الاصدقاء كوولشي يصير بيهم ..
غمزلي : ومرات يحبلن ..

خليت ايدي على صدري بصدمة
_ يمممه عزا العزاني مزاعلتك مزاعلتك ارجع العرجفتك ارجع ابن الرافدين الاعرفه

ضحك : اووو شيفهمها هسه هاي ..

كتله : زين عوفنه من صداقتك المنحرفه خلي نكون اخوات افضل اني اكولك خويه لهيب وانت دكولي بعد اخوج وگلبه.

ضحك : لا ام اللسان ما اريد اخوة اصلا كل يوم اعاتب ابوي لان خلف مهيب وصار اخوي .

ابتسمت لا عاد اخوك مبين حباب عكسك ههههه ...

كال بمزح : ها نرجع للعدواة وللعركات والبوكسات مو احسن جنه الاتفاق ماعاجبج ؟

ضحكت واني الوحله بيدي برفض لالالا
و بهدوء : الله حيو ابن الرافدين قبلت بصداقتك..

موج ..

اوس تعبني حييل اروح للجم الكاه كبالي اطلع الكاه كبالي متت مليت وانقرفت منه .. حتى بسببه اجيت اسوي حادث لان ارتبكت لمن شفته وراي لاحكني بسيارته .

من ارجع للبيت اريد احاجي الطنطل واكله خلي يوكفه عند حده ، بس هو دواه ، الكاه حاظرني العتوي الخبيث وخاف اخذ رقمه من فرح وتفتحلي تحقيق ...
ومالي خلك سين وجيم ..

يربي ادري وين اولي وين اروح اني اروح بدربي وارجع بدربي ومالي علاقة بأحد ابد بس هذا مدري منين طلعلي .. وصار حجر عثرة بطريقي ..

انوب احمد مو مال عركات ويكدر يتصادم ويا ويوكفه عند حده وبابا رجال مريض وعمي حجته كعدي بالبيت شعندج طالعة ويذب الصوج بيه ..

اذن ماكو غير الدب الروسي شرار ، يله خلي ندلعه ننطي خوش لقب بلكي يساعدني ويخلصني من اوس .

خابرتني فرح قبل عرس كالت اخذت الاذن من "العرندس" تقصد الشيخ حتى تجي يمنه هالفترة ..

كيفت كلت بلكي الكاه واحجي وياه حتى لو حجايتين
تندمت لان كلت لفرح لاتطشين خبر جياتي الكم
وهي سوت مثل مكلت .. وماكدر اكوللها بلغي الكل بجيتي خاف هم تظل تسأل مالي خلك.

رحت لبيتهم وكفت برا انتظرت شويه بلكي يشوفني بالكاميرات ويطلع مثل العتوي حتى احجي وياه بس هو ماكو ماطلع .

تدعبلت وفتت جووه دكيت الباب فتحتلي ريلام مدري هيام ، سلمت على الحجية بالصالة واستأذنت منها اصعد لفرح كالت تفضلي .

امشي واتلفت بلكي اشوفه .. بس هو ماكو ، هاي لو مارايدة شوفة جهرته جان كابلني ووكف لو اجي واشوفه كدامي .

صعدت لغرفة فرح فتحت الباب هيه جان بيدها خاولي وملابس شافتني تفاجئت كالت اشو جايه وكت بعدني ممحضرة جان خابرتي ع الا..

سكتتها : ديله يله خو ماترديني ارجع ست فرح خلصي وفضيني .

قوست شفايفها ورفعت حواجبها ، اخذت اغراضها
كالت دانيال نايم ديري بالج عليه راح انزل أسبح بالحمام الجوه هذا هم متفق وياهم بالحرب ضدي مايوصله مي حار .

هزيت راسي واحس متوترة .. هيه طلعت واني فتحت الباب واباوعلها دتمشي على كيف بكل انوثة ولا عبالك من تعصب لسانها وصوتها يلعلع .

وصلت للدرج وبنفس الوقت صعد شرار ظليت اباوعله مثل الي يطارد فريسه اجه باتجاهي واني ختلت ورى الباب انتظره يفوت من يم الغرفة واصيحله .

من وصل صحتله شرار شرار .. باوع لمصدر صوتي فتح عيونه مصدوم دفعني بغرفة فرح وسد الباب .

ابتعدت كم خطوة وخليت اديه على حلكي ..

هو واكف كال تعاي اغتصبيني فد مرة واكفة بنص البيت وتصيحين تردين تفضحيني لو شتردين بالضبط

تفاجئت من كلامه شبي هذا شبييي
جاوبته : ماواكفة بنص البيت هاي فوك بممر ويم غرفة اختي

اي وشتردين من نعال تصيحيله؟

رحم الله امراءا عرف قدر نفسه

شون تريد اطفي عيونها هسه كال ببرود وهو كاعد ع السرير ...

كتله اريد احجي وياك بس مو هنانه ورحت للباب فتحته صارت كدامي هيام تباوعلي وطلت على شرار تباوعله .

يتبع ....