رواية هذيانٌ بين جمرٍ وجليد ..(ارملة اخي المجنونة) الفصل الخمسون 50 - بقلم نورا ناصر

االسلام عليكم
رواية هذيان بين جمر وجليد
الفصل ٤٦
نورا ناصر ...

ما هذا العنفوان
ليس له ترجمان
بين جمرات قلبي وهفوات لساني
وبين سطوات حكمك بين احضاني

..........
تسألين وانا المتسائل
تعبثين وكأني انا العائل
احترت في متاهاتك
هناك شوق تارة
وغضب و قلب اشعلت ناره
وحيرة تارة
بين الصفح... او الفراق
بين الجمح... او العناق
بين الصلح... او الشقاق

وكأني ارميك من بين اضلاعي
و من ثم اعيدك برمة لترمم اوجاعي
فاستبيح لك الاحضان
فاعاقبك بالحنين والاشجان
من انت...؟!
لم أعد اعرف الحلول معك
وانت بمحضري اتوه بك
فساعة تجعلني كالسادي الممتعض
وساعة كالعاشق المرهف واخرآ متعظ...
بقلم AtyafAtoofa

"""""""""""""""""""""""""""""""""

جانت واكفة كباله ، لابسة صاية سودة أنيقة رداناتها بف وضيقة من يم المعصم .. وحذاء كعب اسود ..

وهو جان واكف يباوعلها بعيون حادة مثل عيون الصقر ...

ويوجه كلامه الها بغضب مسيطر عليه ..

وهي تعصر بأصابعها وتنقل وكفتها من الرجل للثانية من كد التوتر ..

_ منو سمح لج تتلاعبين بأعصاب مرتي ؟ وتوهمينها انو بيناتنا علاقة سرية ؟

هيه هاي اخلاقج ختام ؟ ماتوقعتها منج حرامات صدمتيني بيج ؟ جنت متوقعج احسن من هيج ..

ظلت تحرك اصبع الشهادة بوجهه بالهوى وتشير اله بالانكار الشديد ..
_ لا لا علي متوهم اني مو هيج وانته تعرفني كولش زين ..

رد برفض قاطع ومخيف : لاء الظاهر انتِ هيج وهاي حقيقتج وبينت هسه ، ولا تنكرين لان الاعيبج انكشفت كدامي وفوكاهه طلعتي جذابة!!!!

تجذبين ختام ؟؟ هذا الي تعلمتي من شهادتج لو منين تعلمتي بالله ؟

اشرت لنفسها بيدها وبارتباك : اني اني كذابة علي ؟؟ اني؟؟ منو الي كالك هالحجي فرح ؟

رد بجبروت : انه اسمي الشيييخ علي الدر ومرتي هم لاتنطقين اسمها على لسانج هذا الي يكول الكذب ويزيف الحقائق ..

وهيه تتظاهر بالقوة كالت : اني مادري ((مرررتك)) شكالتك عني بس انته المفروض ماتصدك وحدة مثل
ف ... مثلها .. انهزمت منك وانته على فراش المرض ..

اجاهه جوابه بعصبية ارعبتها ...
_ مثلها شنووو مااسمحلج خووش ؟ وانه مرتي مصدكها وانتِ ياختام تعرفيني كلش زين مايعبر عليه شي ولا يكدر يخدعني الجذاب ولا الخاين ولا البي دغش وفرح اعرفهاااا

وبعدين منووو الكالج فرح انهزمت مني!!!! هااا الجذاب الكالج منوو؟ فرح ما انهزمت ولاا تكدر تنهزم مني جانت مأمنة حياتها بعيد عن القصر لان حياتها جانت مهددة من بعدي ..

هزت راسها : مادري سمعت بيها انهزمت بس اني والله ماجذبت عليها كل الموضوع

بتر كلامها باستبدادية وهو يضرب على الارض بعصاته بقوووة : ما اريد اسمع منج شي سمعت كل الموضوع من فرح وهذا الشي يكفيني ...

انت مامرحب بيج بعد منا وجاي بهذا البيت ...

وبالشركة همين وراح اثمن جهودج وانطيج حقوقج المالية واي شي تردين توصلينه الي يا اما تكولينه لأبوج يا اما لمصطفى المحامي بالشركة ورقمي لا تحاولين تتصلين عليه بعد ..

بلعت غصتها وتباوعله ووجهه احمر محتقن ..
عل ... شيخ علي اني ما استاهل منك كل هالمعاملة ليش تهون عليك العشرة ....

هو منو الي هانت عليه العشرة ؟ ليش تستغلين علاقتي بيج وتسيئين الي وتتلاعبين باعصاب مرتي ؟ وتوهمينها باوهام صنعتيها انتِ ونفذتيها انتِ

رفعت راسها بشمووخ وجاوبته : مرتك الكل يعرفهاا شنووووو ...

جاوبها بقسوووة: فرح مثل الورقة البيضة وواضحة مثل عين الشمس ولا بيها غدر ولا بيها دغش وانا اعرفها ولذلك اختاريتها وتزوجتها .....

المهم لهنا وعلاقتي بيج تنتهي ، وراح تستمر علاقتي الطيبة ويه ابوج واخوتج اما انتِ ماريد اشوفج لا بالشركة ولا بالبيت ..

هزت راسها بكبرياء وتريد تروح
كاللها شغلة ثانية .. الغترة الي اخذتيها من ايد فرح بذيج الليلة باجر اريد اشوفها على مكتبي بالشركة لمن ترحين تاخذين مستحقاتج تمام ..

يمكن بهاي اللحظة جانت تريد تستخدم سلاحها الاخير
كالتله مااخذتها منها شفتها اخذتها من ايد ابنها وهيه تريد تشمرها بالحاوية مال الزبل واني احبها هالغترة وكايلتك من قبل ......

قاطعها بحدة كاااأافي جذب كااافي اكتفيت منج ...

باوعتله بحزن وأسف ، هزت راسها وطلعت من البيت ..

ريلام : ظل يباوعلي خالو واني خجلت كلش
اشرلي اروح يمه ورحت وكفت مقابيله
كتله شلونك خالوو؟

رد هلا بيج بوويه شلونج انتِ؟
_ الحمدلله اني اسفة جنت اريد افوت بس خفت اقطع حديثكم ..

هز راسه ولا يهمج تعاي انت هم عندي حجي وياج
احتضني من اكتافي واخذني لغرفة المكتب مالته ...

فتنا جوه هو كعد ورة مكتبه واني كعدت على الكرسي الي بجوانب المكتب ..

باوعلي كال خابريلي على مهيب خلي يجي هنانه ..
بلعت ريك وطلعت تليفوني ودكيت رقمه
اجاني صوته بسرعة
ها عمري ...

باوعت لخالو بلا وعي هو مدنك ع اوراق مقابيله
من كل عقلي خفت لا وصل صوت مهيب اله ..

جاوبته بتوتر : مهيب تعال لمكتب خالو يريدك ..
رد : ثواني هسه جاي ..

غلقت الخط ودقايق انفتحت الباب طل مهيب اجت عيني بعينه غمزلي ...

اتسعت نظرات عيوني بصدمة وبلعت ريك وباوعت لخالو همزين ممنتبه ..

فات جان بملابسه العسكرية
كال سلام عليكم ..
ردينا اني وخالو بعدها هو وجه كلامه لابو
وكال كول يابه أمرني ..

اشرله خالو لحتى يكعد وهو كعد على الكرسي مقابيلي .. باوعلي شوية مبتسم ونظراته تترجم احاسيس قلبه تجاهي ..

خالو كاله هاا خفارة اليوم ؟
رد اي والله يابه ..
كال لعد خوش ندخل بصلب الموضوع مانريد نأخرك ..

_ ولا يهمك يابه اصلا انه طالع وكت ..
_ اي عفية حافظ على مواعيدك .. المهم نبدي
ريلام بنتي اريدج تحجيلي شصار بالليلة الي طلعت بيها فرح من البيت ..

ارتبكت حيل شون افتن على أُمي!!!

باوعت على مهيب بحيرة وهو اختفت ابتسامته وظل يباوعلي بترقب ..

رجعت باوعت لخالو بارتباك وتوسل
_ خالو والله اني اني مادري شنو احجي عفية اعفيني اني منها بس اريد اكولك شغلة فرح انظلمت حيل وتأذت حباب لا تعاقبها ...

كال هااا ريلام ماتردين تصيرين شاهدة حق ؟ شفتي الظلم بعينج وتردين تبقين ساكتة ؟ مو الساكت عن الحق شيطان اخرس!!!

كتله بتوسل لا خالو اني والله بس

عدل كعدته على الكرسي ورجع ظهره عليه ومدد ايده ع المكتب ..

مهيب كال من رخصتك بويه لا ترة هيه ريلام حبابة وهسه تحجي كل شي شافته مو صح ريلام؟

باوعتله بتوسل ورمشت بعيوني محتارررة ..

خالو كال اي ادري بيها وانه احبها واعزها ..

المهم انه كل شي صار واضح گدامي
بس راح اسألج اسئلة وانتِ جاوبيني عنها بصراحة واذا ماجاوبتي اعاقبج انتِ همين ...

لمن كال هيج باوع لمهيب ....

ومهيب باوعله ابتسم ورجع باوعلي رافع تك حاجب

مادري شنو يقصدون الاب وابنه سووها ظلمة عليه ..

بس يمكن يقصد مايزوجنا اني ومهيب اذا ماحجيت الحقيقة!!! عزااا حتى خالو يعرف هو يحبني!! عزاا مجرد الخجل احس وجهي اشتعل شعل بالخجل ..

باوعتله لمهيب مقلصة عيوني
بعدها ..
دنكت وهزيت راسي بايجاب وبلعت ريك ..

خالو كال انه ادري بيج ماتردين تجيبين سيرة امج وماتردين تصيرين شاهدة عليها ....

و انه هم راح اعذرج خاف تحجين وبعدين ضميرج يأنبج وحقج بويه مالومج مهما يكون هاي الام ....

جاوبيني بويه منو من النسوان الي جانن هنا وهدن على فرح واختها...

يله بويه جاوبيني انتِ مو تعزين فرح وتحبينها اجه وكت توفين الها وتنصفينها وتوضحيلي مظلوميتها والي صار وياها .....

هزيت راسي اي خالو الي هدن عليها بنات جدو ياسين عمك وعم ماما وجناين خالة عليه ..

هز راسه وظل يسحب بخرزات سبحته ويشد عليها وكأنه معصب ...

خفت وباوعت لمهيب جان يطمني بنظراته ويهز براسه ..

بعدها سألني كال اريدج تكليلي على ذهب فرح انت شفتي احد بليلة الطلعت بيها اخذه ؟

فرح تكول اخذوه مني وهسه انه شفته بغرفتها كلامها صح موو؟

جاوبت بنبرة تأكيد ووجهي احسه احتقن واحس اختنكت والندم بدأ ينهش بيه ..
_اي خالو اخذوه ورجعوا لمن انته صحيت من الغيبوبة ..

هز راسه وكال خوش حجي هيام بعدها ما اجت من الكلية مو ؟ وامج يم رحاب؟

باوعتله خالو فدوة لا تعاقب ماما هيه سوت هيج بدون وعي جانت معصبة وخايفة عليك ..... كالولها وگف گلبك ..

ظل يفر بسبحته ثواني ويباوع كدامه ع المكتب ..
كال هسه جاوبيني!!

كتله اي خالو ابن رحاب مريض ونايمين بي مستشفى صاير عنده اللتهاب بالامعاء .. وماما راحت يمهم .. وهيام هماتين راح تتبعها ...

هز راسه وبعدين باوع لمهيب وكال بويه اريدك تروح انت وريلام تجيبون البنية بنت اخوك الي مايتسمى خلي اشوفها ..

ضحك مهيب وباوعلي وبعدها باوع لابوه
ورد : صار يابه تدلل شوكت تريد اروح اجيبها ؟

كال باجر من ترجع من خفارتك لان البعده ورانا حساب جبير نريد نعاقب الجماعة ..

لزمت قلبي بيدي واباوعله بتوسل شحيسوي بماما زين هو كال الجماعة ميقصد بس ماما يقصد منوو بعد ؟

طلعنا من المكتب اني ومهيب . ..هو ديطلع من باب الاستقبال .. رحت صرت كدامه
كتله بتوتر شنو شنو يقصد خالو هو يعرف انته تحبني ؟

دنك عليه صارت حواجبه تصعد وتنزل ويحاجيني
كال : ومن فترة عرف انتي تحبيني همين بس كلي خل تهدأ الاوضاع واخطبها الك ..

لطمت على صدري عزااا مهيب مووو عيب هيج تكوله شون اباوع بوجهه بعد!!!

لزمني من معصمي سحب ايدي من صدري ..
كال مااضم عن ابويه شي اني وخاصة علاقتنا
وغمزلي ..

ظليت صافنة عليه تقرب مني همس بذوبان ترة اذا تظلين تباوعيلي هيج انسى اني منو وين اصلا وشصاير وليش ووو ...

عضيت شفتي وفتحت عيوني ع اوسعها وخليت وفتت جوة .. رحت يم بيبي جانت متمددة ع الجرباية وتسبح بسبحتها ، رحت بستها على راسها وكعدت يمها

سألتني على ماما شوكت تجي ..
كتلها لمن يطلع ابن رحاب من االمستشفى ..

كالت ام حسام ممقصرة وياي خطية بس انه متعودة على امج قايمة بواجبي ..

ميخالف بيبي ان شاءالله ترجع يمج ...
كلت هيج بغصة ، ياربي خاف خالو يطردها من البيت
وخطية بيبي ...

مهيب كولشي يعرف نسيت اسأله جان كالي خالو شراح يسوي...وعلى شنو ناوي.!!!!

هدى ..

رحت للمطبخ احضر الغده ، واني على هذا الحال فات لهيب يصيح ، التفتت عليه بيدي الچفچير ..

_ شون مهملة لج انت شنووو لخاطر الله دشوفي راسها شلون عنجر بسببج ..

عصبني حيل يريدله بس حجة حتى يصيح ويشفي غليله مني عبالك عدوته ..

شمرت الچفچير على الكاع بعصبية ..
وصيحت لان طكت روحي ..
ليش هوو منوو لي ركض ورايه يريد يضربني !!! لو بس اني مسؤؤلة واني مهملة واني واني ..

باوعلي والغضب يتطاير مثل الشرر من عيونه
كال بنبرة تهديد : انتِ جلدج يحكج ، صبريلي دقيقة اوديهه بفراشها واجي انفذلج رغبتج ..

باوعتله بعصبية
لا والله تريد تهيني وتطلعني غلطانة وتتشفى بيه وبالمقابل تريدني اسكت خليها ابالك ترة ما أرضى بعيشة الذل أني!!

خزرني ودار وجهه وطلع من المطبخ ، يربي هسه يرجع يطبطبني هو كوة متحمل وجودي !! شسووي هسه وين اختل؟؟

واني داافكر فاات هو ، باوعتله اتظاهر بالقوة
وهو يتقرب مني معصب عيونه براسه ...
اول ما اجه يمي كال انتي شنوو؟؟ ماتحمدين الله وشكرينه اني معيشج احسن عيشة وانتِ!!!!

وسكت واني اباوعله بقهر : اي كمل شنوو ؟؟ اني شنووو ؟؟ ترة اذا اني بنظرك مو شريفة .. بنظر نفسي اني اشرف من الشرف واطهر من الطهارة افتهمت لوو لا ؟

ومستعدة احلف ع القران وبراس بنتي اني محد لامسني غيرك ..

كال بغضب : اطيح حظج اذا تحلفين براس بنتي ...

صرخت : اي احلف احلف صدك اني ممجذبة لمن احلف ومو مشكلتي انته متصدكني ولا تكعد تذكرني كل ساعة انتي شنو وانتي شنو ....

معاجبك الكعدة ويايه ارجع لبيت اهلك وكللهم كل شي كللهم انته ممسؤؤل عن كلشي بري نفسك كدام ابوك وخليني اروح بدربي اني وبنتي ... ولا تظل تتشفى بيه ..

قرب مني اكثر صك اسنانه وكال لسانج هذا يرادله بتر من العرك ولج والله لو ما اخاف الله جان كسرت سنونج بلحكج هسه ... فوكاهه مراضية ..

هيه منو لي تجاوزت قبل شويه وخلتني افقد
اجه لزم شعري حييييل غمضت عيوني بألم وقلة حيلة

بفحيح وجه كلامه باعي لا تظلين تشمرين حجي احمدي الله واشكري اني ساكت عنج تحترمين وتنجبين افتهمتي لووولا ؟

دفعني حيل طخ راسي بالكاونتر وطلع من المطبخ
عدلت شعري ورحت ادور على بنتي شفتها بكاروكهه مخليها وهو مبين بالحمام لان صوت المي جاي مناك .

رحت صبيت الغدة وخليته بالصينية ووديته للصالة
رجعت للغرفة شفته متمدد على السرير ومخلي بأذن هيدفوون ومغض عيونه ..

وكفت اباوعله وتنفست بصعوبة بحيث صوت انفاسي مسموعة .. رحت خليت ايدي على كتفه العاري ونبتت اصابعي بجسمه

فتح عيونه وباوعلي معصب ..
كتله صبيت اكل كوم اكل يله ..

انطاني ظهره وكال ماريد منج سم وزقنبوت ..

بقيت كاعدة يمه همست أسفة ......

الظاهر هو ماسمعني ، مديت ايدي وخرت الهيدفون من إذنه باوعلي خازرني
رمشت وزفرت بتنهيدة فرج أسفة لهيب بعد ماتجاوز عليك ولا تتكرر بس يقهرني انته عادم وجودي كافي احنه عايشين سوى ميصير تسوي نفسك كأنك مو شايفني وتحاجي ديما والكلام موجه الي هالشي يضوجني ...

دفعني وكام فتح الكنتور طلعله قميص وبنطلون شمر البنطلون ع السرير وراح يكوي بالقميص رغم القميص كاويته اني بس هو يريدله الحجة عليه ...

طلعت من الغرفة ابجي ورحت للصالة شلت الاكل مثل ماهو رجعته للجدورة ..

فات من يم المطبخ مبدل ملابسه وطلع من الشقة ..
وكفت بمكاني اباوعله وهو ديطلع يعني هو جاي تعبان من شغله اكيد واني سويتلي هوسة ع الخالي بلاش!!!

بس اضوج لمن يعاملني اني والماكو سوى اضووج كلش ..

ظليت طول اليوم افكر خاف لا انوب يعوفني ويروح لسوريه مدري روسيه مدري شسمها هايه وموبعيدة ياخذ بنتي اني راح اطيح حظي بيدي والله ..

رحت للغرفة كعدت ع السرير وافكر بي !!
زين هسه هو وين يروح!! هو حتى اصدقاء ماعنده
واخوه مشغول بسالفة فرح وكعدة العشاير مالة الي ضربهم ووو شغله ..

بحيث لهيب ابد ماعنده اختلاط ويه احد غير عمامه واخوه ، يروح للشغل الصبح بالسبعة يطلع ويرجع بتلاثة ينام شوية ويكعد يكضي اليوم كله ويه بنته ..

يا منزلها جوة يا ملعبها ويا مضحكها .. اني ليش هيج اسوي ويا مفروض اكسبه بس شلون والله ماادري !!

واني على هذا الحال رن موبايلي ، هو من فترة اشترالي موبايل خاف احتاج شي لمن يطلع واني وحدي ..

بس الموبايل مابي نت بس سيم كارد
واخابره ع الرصيد ...

رن الموبايل باوعت بي عبالي هو طلعت ريلام
رديت عليها بسرعة وظلينه نحجي ونسولف
الى ان كالت خالو طلب منه نجي الكم اني ومهيب وناخذ اله ديما حتى يشوفهه..

تفاجئت يعني هو كاللكم هيج؟؟
_ اي حضريها باجر ..
ختمت وياها المكالمة وصفنت ، ممصدكة هو مبين عمو حنين بس مايرضى بالغلط واحنه اثنينه غلطانين ...

لمن اجه لهيب تلكيته من الباب بس هو ضايج جان ومو طايقني يباوعلي ويخوزر بيه

وكفت كباله وقطعت عليه طريقه وبيدي ديما
هيه بس شافته ضحكت وهو مكدر ميضحكلها ياخذها ويبوسها . رغم معصب عليه وكارهني كره بكل ماتحمل الكلمة من معنى ..

اخذها يمشي بيها واني وراه كتله لهيب خابرتني ريلام وتكول عمو يريد يشوف ديما ...

التفتلي متعجب ومستبشر ونسى كل شي قبل شوية صار باوعلي كال والله ؟؟

هزيت راسي وبلعت ريك اسرتني ابتسامته ...
كتله يي والله بس هو كايل لمهيب والها يجون ياخذوها يعني مو احنه نوديها ..

لمعت عيونه بخيبة أمل ودنك راسه وراح كعد على القنفة وخلاهه على رجله ولازمها من جوه ابطها .

كال ميخالف المهم حن عليها ويريد يشوفها العافية بالتداريج بلكي بعدين يحن علينا احنه همين ...

بعدها باوعلي مستغرب اشو مهيب ولا خابر ولا كال شعجب !!

كتله يمكن نسى او كلف ريلام هيه تكول النه ..
هز راسه وكال يجوز ...

ريلام ..

طلعنا اني ومهيب لشقة هدى اخذنا الطفلة منهم وامها بس توصي عليها بعد شوية وتبجي طمأنتها كتلها لتخافين عليها ..

ملبستها بدلة مارونيه قماشها شمواه بياخة مدورة ولا ردانات وجواهه بلوز ابيض ، وكولون ابيض وقبعة بنفس لون وقماش البدلة ، والحذاء هم نفس الشي ...
طالعة لعابة ..

اخذناهه ووديناهه لخالو اخذها بين اديه جان فرحان بيها وهيه متستغرب تضحك للهوا ..

جان جايبلها ذهب تراجي واتميمه وحجل ، طلب مني انزعها التراجي الي ملبستها الها امها والبسها الي هو جايبهم ..

كال خليها تلبس على ذوق جدها .. باوعتله وضحكت
ولبستها الها بس خايفة لا أذيها لان اول مرة البس لطفلة وهيه بحضن بيبي لبستهم الها ..

بيبي باوعتله ودموع القهر تلمع بعينها
كالتله يمته تسامحه وتخلي يرجع النه يعيشون يمنه هو ومريته وهالطفلة هاي؟

كاللها حجية خلي يتأدب ويسمع حجايتي خلي يحس بخطأه هو مو صغير ويغلط هالغلطه هاي ..

يمه والله هالبنية هاي كلما الها تكبر وتحلى وتونسنا ...
هم جاسم مو بالبيت البيت وحشة صاير الجهال يردون الوحشة عنه .. من يلعب كدامي انسى الضوجة ...

خله ايده على راسها لاتضوجين يمه ان شاءالله الجمعة
اجيبه يمج جاسم وشبعي منه ....

هيه وينها امه المصيوبة وصدك حامل بوليدك يمه ؟ لو تشاقة وياي؟

ضحك لا حجية حامل ببنيتي ...

كالت اي بنية وليد كون اشوفه ولا يخطف روحي الموت صدك انه ماحبها فريحة لسانها طويل وماتنجرع ومخبلة بس احب خلفتها .....

ادري يمه انت ماتكرهينها تكرهين لسانها بس اوعدج راح تتعدل ان شاءالله ...

لمن ما ينعدل ذيل الجلب يله فريحة تنعدل ....

ظلينه نضحك بس خالو يفرك بلحيته وكأنه يفكر
وكلساع سألني عن امي وهيام ومثل الكاعد ع الجمر ...

ودينه ديما لأمها وانطيتها التراجي الي جانت لابستهم كتلها خالو كلي انزعها الها ..

رجعنا للبيت خابرت ماما جاوبتني
كتلها خالو يسأل عنج وعن هيام ...

ردت اكيد شاف فريحة وحجتله كل شي ويريد يرزلني بس ليش يسأل عن هيام ؟؟

والله مادري ماما اني اريد اعترف الج بشي سامحيني بس

ردت بانزعاج وعصبية خيير؟؟

ماما خالو سألني عن الي هدوا على فرح وكتله منو هم وسالني عن الذهب اذا صدك طلع من غرفتها وجاوبته بدون مااجيب سيرتج بس خفت وحجيت ...

اي والله هنيالي بيج ولج انتي شنوو طايحة الحظ مو بنتي انتي وتصيرين ضدي!!!

لا ماما مووو هيج ..

طيح الله حظج عساج ماتتوفقين ولي يله ولي ولييييي....

فرح ...

مر الاسبوع والاسبوعين وعلي ماشفته ابد ...

ظليت احوم واحووص وميته قهر ..

موج وشرار كون بانزين وجداحة واحركهم اثنينهم ..

نومت دانيال وطلعت بره وگلبي مقبوض ، صرت اتمشى كبالي اكو بحيرة صغيرة مسيجة وبيها بط يسبحون بيض واكو ركبتهم طويلة اطول من ركبة البطة وشكلهم كلش حلو ..

بقيت دقايق اباوع عليهم وبعدها اخذت طريق الشط وطلعت واجاني صوت شرار و موج ..

مشيت وشفتهم كاعدين على الشط هو جاي يصيد سمج وهيه كاعدة بصفه ومايفصلهم انش واحد
كلش مدحوسين ببعض ..

هيه مدري شكاللها ابتعدت عنه شويه ، كام مد ايده طوق ظهرها وسحبها اله مرة ثانية طخت بي ..

كامت وكفت سحبها من ايدها كعدها ومدري شنو شاورها ظلت تضحك .. .

اي تضحك تضحك الخبيثة نهار كله لازكة بي ولازك بيها ...

وهيه شكد توسلت بيها نرجع لعلي ومانشرد وجانت تكلي تحبين الاهاين هسه اشو منو يحب الاهاين ...

كون اخرب عليهم هسه وادزلهم دانيال يكرههم بروحهم اي والله اروح اكعده ادزه عليهم ...

بس والله هو من يكعد مطنكر خاف شرار يعصب ويشمره بالشط ..

رحت كعدت بالغرفة احسه تخنك ، كعدت وحدي غفيت من القهر والبجي ..

لمن كعدت شفت مرة مدري منو هيه كاعدة يمي لمن شافتني ابتسمت ..

كتلها ياا هاي منوو انتي؟ شجابج ؟

بس تباوع عليه ماتحجي يمكن خرسة خوفتني اكثر ..

طبت موج وهيه طلعت المرية ، جانت موج باديها علاليك هوايه ..

خلتهن ع الكاع واني اباوعلها بعصبية
ظلت تطلع وتنطيني كالت هاي توه طلعنا اني وشرار للسوك وجبت ملابس ..

اخذتهن وشمرتهن عليها اي عشتوو ست موج هاي منو ليريد يشرد ويخلي شرار وخابصتني ماريده وماريده اشوو هسه لازكة بي لزكة ..

كالت بهمس اوو سكتي لايسمعج ويتخبل عليه اني اريد اتقرب منه اخذه بالسياسة بلكي يأجل الزواج ويرجعون احمد ويخلونه يدخل لبغداد ..

كتلها تحلمين ترة الموضوع مو يم شرار لالا يم علي كل الموضوع يم علي لا عبالج ..

بس شرار هم اله تأثير عليه اكيد ..

لا انتي كولي حلتلج الكعدة يمه كلساع صلخج ببوسة ... وانتي متونسة ..

ضحكت بصوت عالي لج دنجبي مو هيج بس والله دااقنعه يرجعني يم احمد وانو مشتاقة الهم موت واني متأكدة انو متكدر بدوني ..

اي وشنو صار اشو صارلنا اسبوعين منعرف عنهم شي ؟؟

وعدني احجي وياهم والله دااحاول ويا ماكو غير هاي الطريقة اذا اتمرد هو هم يتمرد خليها ابالج .

. وبعدين اني والله مااكدرله هذا حماج مدري شنو من بشر ..

دااحاول اخترق شخصيته اعرف نقاط ضعفه وقوته وشوفي شلون حخلي يرجع احمد وهو الممنون ..

فريت بوز شفايفي كتلها دنشوف بالله زين
مكالج علي شوكت يجي ؟؟

هزت راسها لا مكال بس هو يتواصل ويا على طول ..

ثنيت رجليه وسحبت ثوبي وكلت اي اهم شي حسان ابو الذبان مختفي هالايام مانشوف ركعة وجهه الغثيثة شرار يهووون ..

بس والله انتي حقيرة ونذلة وكلبة عايفتني نهار كله ولازكة بي عاجبج البوس والتمطك هاي عود انتي الثكيلة امداج وامده شكلج ..

دخل شرار وكف يم الباب كال ليش تحجين على مرتي ترة والله اخذها واحرمج منها ..

ظليت افر بيدي متاخذها شمستفادة منها اني بالله اصلا هيه السبب بكل شي وانته هم سبب كون اكتلكم واخلص منكم ..

هو دنك ولزم موج من ايدها وكاللها كومي كومي هاي اختج ضاربة عدهه فيوووز ..

كوة اخذهه سحل من الغرفة واني فريت ايدي وغميتهم ماتحملت ...

كعد دانيال اخذته للمطبخ انطيته موزة واني دورت بالثلاجة باقي اخر راس جزر ..

غسلته ونظفته ودااكله ، هالايام صايرة شحة بالجزر مدري اني اكله كله مدري هو الموسم مالته راح يخلص مدري راح ينقرض الحزر من وراي واظل بالضيم ..

هو شاف الجزراية عندي شمر الموزة واجه ياخذها
من ايدي ..

كتله لا حبيبي الجزر الي والموز الك ميصير هيج مو عدل هذا ...

ماقبل وظل يبجي كتله امري لألله راح اكسمها بالنص بيني وبينك ...

اني كتله هيج وظل يعيط بالزايد ..

ظليت اضرب برجلي على الكاع مايصير هيج والله ظلم منين اتلكاهه ياربي منك من هاي الي ابطني من عمك من خالتك منيين بس كلي منين وظليت ابجي

عضيت منها شويه وانطيته الها هو اخذها من ايدي ..

شفت شمر الجزرة وراح يركض صوب الباب ...

التفتت شفته علي واكف ويمكن شاف المشهد هذا كله ...

باوعتله بين اللهفة والغضب والعتاب ..

فتحت حلكي ببلاهة علي!!!

هو باوعلي بنظرة عدم رضى ودنك على دانيال شاله وباسه ..

كتله بنبرة جدية انته باقي هنا ؟ عندي موضوع وياك اريد احجي

قبل لا اكمل اخذ دانيال وراح ولا كأنه سمعني ..

اخذت الجزر من الكاع ورحت غسلته
وكعدت على الكاع ابجي واكرط جزر ، اكرط جزر وابجي بحرگه ..

يتبع ...

متابعة لحساب الكاتبة AtyafAtoofa
لطفاً 😘 ..

النشر بين يوم ويوم ❤ارجوكم قدروا وضعي
وبلا مقارنات وكلمن وظروفه يا عيني ليش ماتقدرون ؟

يعني لمن طولت الجزء الاول وماوقفت القصة هوايه هاي نسيتوها ولمن جنت انشر يومية هم تنسوها ..

ولمن بس اتعرض لظرف طارئ تسوون هجمة متردة عليه !! يعني تعوفون الاحداث وتحجون ع النشر ؟؟

وفلانه تنشر ومدري منو تنشر شعليه انا يا عيني شوكت تبطلون هالمقارنات ؟ انا ظروفي تختلف ..

قسما بالله اليوم محتارة بالنشر لان نت ماعندي
وأسأل بالبنات وعلموني اشترك ع الميكات

لان راوتر ونانو عاطل صارله اشهر وزوجي ميقبل يصلحه لان راح ننتقل لمكان ثاني عن قريب ويكول ع الجديد اسوي غيره

((والبعض)) بس يتهجمون لا يقدرون ولا يعذرون ابد ... معبالك احنه بشر ونتعرض لكل شي ..