رواية هذيانٌ بين جمرٍ وجليد ..(ارملة اخي المجنونة) الفصل السبعون 70 - بقلم نورا ناصر

هذيان بين جمر وجليد.......
..........الفصل قبل الاخير
..نورا ناصر....

..................
هدى & لهيب...
أشعلت في قلبي نيران العشق والغرام
من قبلها لم اكن اعلم كيف يكون الهيام
أمراة مستحيلا كلما أردت حوارها
أصير اخرس يهرب من فمي كلّ الكلام
حينما اتحدث معها انسي نفسي ومابي من الام
اشعر وكان روحي تهيم عشقا واليها تذهب دون استاذان
كلما رأيتها
أشعلت نار الحب في قلبي الهيب فاتمتم
يا نار لهيبي كوني على قلبي برداً وسلامه إليهااااااا ....
#بقلم_هيام_الدليميه...
.......................

. لهيب

صحيت علئ صوت الممرضه وهي تحجي ويه الدكتور الخفر ودكوله عن حالتي...

عدلت كعدتي واباوع للمغذي بيدي شفته يريد يخلص هي باوعتلي كالت...الحمد لله على سلامتك ان شاء الله ما بيك شئ مجرد انهيار عصبي..

نزلت راسي بحيره عرفت اني بالمستشفئ وكلام الدكتور عن هدئ اذاني معقوله هدئ تكون ميته سريريا معناها اكيد هذا هو المووت...

لا مستحيل مستحيل هدئ تموت وتضيع من اديه شلون هييج شلوون منو الضربها...

هدئ ما شافت شئ حلو والله حرام هيج تموت ربي ان شاء الله يشافيها واعوضها عن الي صار ..

طلبت من الممرضه تسحب الاسرنجه ما اريد اكمل باقي،المغذي ما قبلت بس اني اصريت...

خليت ورحت الها شفتها بعدها علئ نفس حالتها وهذا ثالث يوم الها وهي بالخدج واني لا ليلي ليل ولا نهاري نهار اجت فرح شافتها والكل ما مقصر يرحون وبجون...

واني رغم مأساة هدئ بس بالي عند ديمه وكذلك اخوها جابه مهيب خطيه بس يبجي علئ اخته ولا يرضئ ياكل ولا يقبل يروح حيرني فوك حيرتي

اتذكرت موقف وياها من مات ابوها وهي ضلت هناك ومن بعدها جبتها هنا...

جنت اطيب بخاطرها وهي تبجي علئ ابوها من شفت استجابه منها تقربت الها اكثر واقتحمت شفايفها ببوسه عميقه

هي دفعتني بارتباك كالت...عزااا لك لهيب شدتسوي اني حزينه علئ ابويه وانت تفكر بغير شي ولك انه بيا حال والدفان يغمزلي

ضحكت علئ كلامها ومن شافت حالتي مستعصيه خلت وشردت وكعدت يم اخوها حتئ ما اتحارش بيها...

تنهدت بقهر والم علئ حالها شوكت ترجع وتنور بيتي

دخلت عليها حجيت وياها بستها توسلت بيها تكعد وترجع الي ولاخوها وبنتها بس مجان اكو استجابه...

وهذا حالها كل يوم ماكو اي استجابه منها...

وبيوم من الايام جنت واكف بباب غرفتها وصارت ضجه يم الباب حسيت كلبي انخطف من مكانه اشوف الدكتورات والممرضات والدكتور كلهم اجو الغرفتها وناس طابه وناس طالعه...

اني جنت اسالهم بخوف ولهفه بس جانوا ما يجاوبوني

منا لمن طلع الدكتور لزمته بخوف وقلق وارتباك...دكتور فدوه احجي هدئ بيها شئ صار عليها شئ؟

رد عليه بهدوء...لا لتخاف ان شاء الله ما بيها شئ هي كعدت من الغيبوبه بس لازم تضل تحت المراقبه ومحد يدخل عليها بالعناية المركزه..

تخللت الفرحه بداخل اعضامي فتحت عيوني مصدوم وفرحان من الخبر الي كاله ومن دون سابق انذار مني حضنته واني اتشكر منه...

دخلت عليها اركض شفتها بعدها تعبانه وحالتها صعبه وتتوجع وحتئ ما حست بيه

لزمت ايدها واني ابوس بيها ...هدئ حبيبي هداوي اني لهيب تشوفيني؟

باوعتلي بطرف عينها والدموع ماخذه مسار علئ خدها الترف ودارت وجهها ما تكدر تحجي اببد

ضليت ابوس بيدها واطمنها واريد اعرف منو الضربها منو الي سووه بيها هيج منو ياذي روحي وكياني ...

بس ما كدرت اسألها لان هي حالته تعبانه حييل ولا تكدر تنطق وبس تتوجع وتبجي

هدئ ...

صحيت علئ اوجاع قاتله بداخل بطني احسها تنهش بروحي وجع لا يطاااق قوي حييل

واني تعبانه ومهدود حيلي وحتئ الكلمه ما اكدر انطقها...

باوعت بطرف عيني شفت لهيب كاعد يمي ويبوس بيدي حزني موقفه حييل والدموع انهمرت علئ خدي

رجفه بگلبي بس ما اكدر احجي بنتي بنتي ديمه بس لا ذبحها بس لا ماتت حبيبتي ديمه يمه والله اموت وراها...

رجف كل جسمي من اتذكرت القاتل والرعب الي سببه اليه اعتلتني رعشه قويه

اتذكرته من دك الباب واني كلت..منووو ؟ رد عليه اني اني هذا ثواب نوزع افتحي الباب واخذي

فتحت الباب ويه ما فتحت الباب ارتطمت بالحايط لان دفع الباب بكل قوه منه حسيت اعضامي تكسرت

وكفت دا اصرخ وهو قفل الباب وطلع سجين صغيره وحاطه وفتحهه بطريقه تخووف ومال واحد متمرس ..

من شفته دب الرعب بجسمي ركضت مهزومه منه لغرفتي بس هو سحبني واحتضن خصري بطريقه مقرفه

صرخت برعب وخمشت وجهه من شفته عرفته ضليت اضرب بي واصرخ...

وهو يحجي كلام سخيف ويكول...هنيال لهيب عليج خصرج چنه هيلة يجنن

شم شعري وهو يحاول يبوسني بس اني ما خليته

دفعته وقاومت بكل ما املك ضربته ضربه قويه وشردت ويه ما شردت دخلت الغرفتي ردت اسد الباب بس هو دفعه واني ادفع بالباب وهو يدفع من شافني قاومت

ضربني بالسجين اجت ببطني حسيت بوجع مباغت شل كل جسمي

واديه ارتخت من الباب بعد ما كدرت اسده وكعت من طولي هو من شاف الدم ضل يتنفس بصعوبة

وصوت ديمه الصارخ عذبني باوعتله بتوسل وبكاء واني ما اريده يكتلني

بس تقرب مني وطعني مرتين غير الطعنه الاولئ وكل ما يدخل السجين ويطلعها من جسمي احس الروح تصعد الباريها وتستغيث عنده

بعدها حسيت اللساني ثكل وجمد الدم بجسمي ومن بعدها اغمئ عليه وروحي وكلبي عند ديمه وهي تبجي

انتهيت علئ صوت لهيب وهو يهمس الي...هدئ منو ضربج كليلي والله اندمه والله اخلي ميشووف طريقه..

باوعتله بعيون دامعه وقلب مجروح اريد احجي واريد اشكي اريد اكوله منو الي ضربني منو الي اذاني

بس اللساني جان جاااف وثكييل ويابس حتئ ما اكدر انطق ولا حرف

موج ...

حسيت الصبح طلع ، بقيت مغمضۃ
عيوني ماࢪيد اكعد لان اعࢪف ينتظࢪني واقع مجبوࢪة عليه ، حࢪب اعصاب وحࢪب نفسيۃ
وجسديۃ بانتظاࢪي ..
حسيت مو وحدي على هذا السࢪيࢪ ماعࢪف شوكت اجه وشوكت حضني ونام يمي ..

خله ايده عليه وشدّّّ كل عصب من اعصابي .. حاولت اتملص منه واني اأهمس ووخࢪ شࢪارࢪ وخࢪر لتجي وتشوفك ..

وخࢪ شعࢪي بإيده الدافيۃ
من على ࢪقبتي وحسيت بشفافه تجول وتصول على بشࢪتي ..
غمضت عيوني واࢪتجف جسمي ثواني بس الي بداخلي ثورة غضب ضده اقوى ..

ظل يهمس يم إذني ... احبج مشتاقلج بعدج زعلانة مني ؟؟

وخرر عني ماا احبك .... اكرهك ...

لف ايده على خصري وقربني اله اكثر .. ودارني عليه صرت بمواجهته .. وجهي بوجهه اباوعله بنظرات غاضبة وادفع بي وهو يقيد مقاومتي ..

احتضني حيل واندفن وجهي بصدره غصب عني .. وظل يهمس وهو يجر بشحمة اذني
جذابة تحبيني ..

ظليت اضربه ببطنه واكوله انته جذاب والله جذاب كتلي زواجكم عمود ابنك مستمر وهذا التمطك كدامي شنوو لعد

ظل يحلف بتوسل والله ما لازمها والله ومشتاقلج مفوول عليج ... وحتى لو الزمها ما ارتوي بس منج

لزم اديه من معاصمي حتى لا اضربه وسحبني عليه
صكيت اسناني واني اكووله تحلم تلزمني والقرآن تحلم ... اصلا اني منقرفة منك منقررررفة وخررر

حاول يتقرب مني غصب واني ادفع بي لحد ما وكعته جوه السرير وهو السرير ابو النفر واحد بسرعة وكع ..

جرح قلبي عباله انصاع لرغباته الحقير ..

كمت على حيلي الجو حيل بارد عدهم واني لابسة بلوز وجواريب وبجامتين ونايمة بيهم ، ظليت اباوعله بحقد وهو كاعد ع الكاع ضرب الارض بايده بعصبية .. ويكول بفحيح هامس خل يكثر عنادج وين تروحين مني تاليتج ترجعيلي ..

ضحكت باستهزاء .. ههه شكد واثق انته ..

عدلت شعري وصاكة سنوني ومعصبة .. لبست روب بسرعة وطلعت من الغرفة

صارت نيفرا كبالي تباوعلي بنظرات شك .. باوعتلها بتوتر واني اشد بحزام الروب على بطني بقوة ووجهت نظراتي للارض ..
كالت صباح الخير
رديت عليها صباح النور ..بدون ما اباوع الها
وركضت فتت للحمام .. ابجي حبي الموؤد ، ابجي كࢪامتي المهدوࢪة ..

بعد دقايق مسحت دموعي غسلت وجهي وطلعت .. وࢪحت للغࢪفۃ هو ماكو جان .. غيࢪت ملابسي وطلعت

صاࢪ بوجهي ، هو هماتين مغيࢪ ملابسه وهو عنده وكالۃ سياحيۃ هو يملكها بس هالسنۃ رجع يكمل دراسۃ

شحيت وجهي عن نظࢪاته ، خله ايده على وجهي ودارني عليه وصرت بمرمىٰ نظࢪاته ..

كال وهو صاك سنونه امشي تࢪيگي ..

جاوبته بغل .. ماࢪيد شبعانة من همك وقهࢪك ..

لعد انتظࢪي نطلع سوىٰ ..

اࢪوح بالمتࢪو ميحتاج اطلع وياك ديࢪ بالك علىٰ عائلتك احسن ..

لزمني من عكسي خزࢪني : ولچ شنو هالحچي؟؟ مقصࢪ وياچ أني ..

ماࢪيد اهتمامك كولشي ماࢪيد منك فكني ..

لا انتي زودتيها عرفي منو كدامج وهاي سوالفج كلها مالها مالها داعي خوش انتي تعرفين ظروفي واني حاجيلج ترى بعد عليمن هالعيارة ؟

اني عيارة يله عاد اتركني بحالي ..

قرب مني يحجي بتهديد .. راح تجين تتريكين ونطلع سوى للجامعة وحجاية زايدة ماريد ..

اريد اࢪد بس العبࢪة تاࢪسۃ صدࢪي واذا حچيت ࢪاح ابچي ، عضيت شفتي وفضلت السكوت ، علىٰ أمل انفجࢪ بي بالسياࢪة ..
تبعته واني احس باشواك تنغرز بقلبي ..توجعني ..

تريكنا وطلعنا ، نيفرا تروح ع شغلها وتاخذ محمد للمدرسة ..

واني وشرار ع الجامعة .. بالسيارة هو جان يسوق ويدخن بشراهة وطاكة روحه ...

باوعتله شرار ما اتحمل هاي العيشة رجعني للعراق احنه ما اتفقنا على هيج

باوعلي بعصبية وضرب ع الستيرن بقووة ..
كال ترجعين للعراق شنوو مخبلة اني خليت كووم فلوس على دراستج تردين ترجعين للعراق؟ اسكتي بالله موووج اسكتي ..

ضربت اديه على الكتب الي بحضني ..
لعد شووفلي حل يله خليتي اروح للسكن اكعد بي لو اجرلي شقة لو اكعد ويه بنات مأجرات شقة وكاعدات

فرك وجهه .. كال ببرود ما ائمن عليج .. عفية لخاطر الله تحملي شجاج النسوان بالعراق كلشي يتحملن شبيييج انتي شبييج؟؟

رفعت اصبع ايدي بتهديد.... اسمعني بس تنسد الجامعة اني ارجع للعراق ماابقى هنا ..

باوعلي باستسلام وزفر وهز راسه بموافقة ..

فرح ...

انفجعت بخبر هدى .. متتت من القهر من كالتلي موج ، وخابرتني ريلام تبجي على حالها .... مادري منو الي سوالها هيج .. خطية
.
بقيت ࢪايحۃ رادة ومقهورة واكل باصابعي ..

خابࢪت علىٰ علي .. اجاني صوته مكسور وحزين ..
سألته عنها .. رد .. والله يا فرح شلونها بعد! الدكتور كال احتمال بالايام الجاية تكون ميتة سريريا ..

شهكت اني ووكعت دموعي .... والله ماتستاهل هدى منو سوى بيها هيج ماعرفتوا ؟

وهو كمل كلامه بقهر : ينكض وين يولي ؟ ولچ فرح هسه ماصار اشهر من انكسرت بأمي وگبلها بنيتي وانتِ گلبچ مايرضىٰ يطيب الخاطر و يحن عليه وراسج معاند

وانه والمصايب صلح هيه تحبني وتتلگاني وين ما چان واحس الدنيا واكفتلي بالبلعوم ...

چا شسوي بعد والله حتىٰ حيلي تفرهد ومابقالي حيل ..

وهسه انفجعت بهالبت اليتيمة هاي وزوجها حالته تصعب ع الكافر ولج لهيب راح يتخبل عليها

ارتبكت وتلكئت بالكلام ومتت قهر عليها مو سهلة اشوفه هيج مكسور ومقهور واكول بكلبي سودة عليه

كتله : . يله ميخالف إن مع العسر يسرى ان شاءالله تمر هالايام وتصير سوالف شنسوي هذا حال الدنيا ... ان شاءالله هداوي مابيها شي وتكوم سالمة

علي اذا محتاج مني شي بس كول تحب اجي لبغداد ابقى يم بنتها !! اني حاضرة تددلل بعيوني

ماتقصرين ام گلب الطيب ..

والله علي بس گول اخلي احمد يجيبني ...

چا انه اگولن لا؟ علواه تعاي شوفتج لتصبرني على بلواي وتغسل جروحي ..

علي اني اجي ادير بالي على ديمة ...

تعاي بويه تعااي ...زين والمشتاكلج ماله شوية بعيونج ..

خوش اخلي احمد يجيبني اني ، وانت داري روحك ولا تدخن هواي وچيك ضغطك واني راح ادعيلها هداوي ماعدهه غير العافية ..

موج ..

يوم ثاني كعدت الصبح على وقت ، شفته نايم بالصالة ونيفرا يمه نايمة ..

هيه نيفرا طولها تقريبا ١٧٠ ووزنها بالخمسين ، ضعيفة وطويلة ، بقيت اباوع عليهم واديه بجيب الروب ، شفته فتح عيونه بسرعة وخررت

ورحت طبيت للحمام .. وطلعت رحت للغرفة حتى ماباوعت على الصالة ..

كعدت بالغرفة مالي نفس حتى اروح للجامعة ، بس اسمعها تحاجي تكوله ودي مودي بطريقك اني تأخرت ..

هيه تحجي روسي وهو يجاوبها بالعربي بملل خووش ..

اني بقيت كاعدة بالغرفة واشم ريحة البيض والكهوة ..

وراها هو اجه ووكف اباب الغرفة .. جان الباب مفتوح ..

كال صباح الخير .. باوعتله بنظرة سريعة ودنكت جاوبته واني مدنكة صباح النور

وهو من مكانه كال شبيج اشو ممبدلة لسه ؟

ماريد اروح اليوم مالي نفس

وشبيج مطنكرة هيج !!

مابيه شي اطلع وعوفني شرار ..

هو عصب وظل يصيح وكسر الاغراض الي جانت على الدولاب .. شبيييج ادري بيج لان شفتيها نايمة يمي ولج شسووي احتاريت غصب تأخرت برى البيت بقيت بالوكالة لوقت متأخر حتى اتحجج وماا انام يمها بالغرفة حتى لا اجرح مشاعرج ومادري بيها شوكت اجت يمي ...

ركضت عليه خليت ايدي على حلكه كتله اشش اسكت ابنك ليسمع صوووتك اسكت ...

تنهد بقووة وحوط خصري واحتضني بقوووة وباسني
على حلكي ..

دفعته سمعت صوت يم الباب ، جان حمودي واكف يباوع علينا لابس كبوس صوف على راسه نازل على وجهه ومغطي تك عينه ولفاف على عنقه وقمصلة وصافن ..

خليت ايدي على حلكي وصفنت بوجهه
وهو كال بتلكأ : دوبري اوترا

يعني صباح الخير باللغة الروسية ...

رديت عليه .. هم بالروسي .. وشرار راح اخذه وشاله عدل الكبوس مالته يبوس بي بس هو بعده صافن عليه ..

اخذ ابنه وديطلع ابتسم بوجهي كال يله ماريد كسل غيري ملابسج وتعالي تريكي اني سويت الريوك بس تعاي واكلي ..

هزيت راسي بابتسامة متوترة واباوع لابنه شلون طوق عنق ابوه باديه ويباوعلي وكان يثبت ملكيته عليه

يربي ليكون ينتكس ويصير بي شي!! ليروح يكول لامه وتصير مشاكل ..

حكيت راسي والتفكير اكل عقلي ، غيرت ملابسي ورحت تريكت وياهم .. وبعدها طلعنا ..

ريلام ...

من بعد وفاة بيبي بأسبوع وبعد الصار مهيب ابد ماحجه ويايه وبقى زعلان عليه ..

لمن صارت الحادثة مالة هدى جانت ماما وهيام طالعين للسوگ .. خابرني مهيب متخبل وكالي على الصار وياهه متت بجي وكال حيجي ياخذني عمود ابقى ويه بنتها ..

اني بس بلغت بيبي وماما اتصل عليها ماترد ابد .. مشغولة بالسوگ او متسمع الفون لمن يرن بجنطتها ..

بيبي خطية مكالت شي وترخصت من جدو واجه عليه مهيب ..

طلعتله بالباب وهو اجه عليه بالسيارة ، صعدت وياه سلمت عليه ، جان متوتر حيل وضايج ومقهور ..

ويكول لهيب راح يتخبل عليها البنية منتهية ....

شهكت وظليت ابجي ماعرف شسوي صدددمة موو طبيعية وشي ابد ممتوقع ..

كال ابوي ياكل برووحه يكول انه طلعتهم من القصر جان ماصار هيج

منوو سوى بيهه هيجي منو ضربها ..

مادري ماادري ...

خاف اووس ؟

لا موو هو مااعتقد اوس مثل الفار خاتل صار كومة خايف لا يطلع راسه نهفه بنعال نطير خشمه لان ماعنده شوارب

لهيب ماعنده احد متورط ويا شي ..

غمض عيونه بتفكير ما ادري مادري قبل فترة صارت كعدة ويه واحد وشاكين بي هو واحنه هسه ماساكتين بس خبي البنية تتحسن شويه والله كلوبنا خلصت ..

وداني للبيت جانت هناك ام حسام ووياهه ديمه واخو هدى علاوي بقيت يمهم ..

خابرتني ماما بالليل تسألني عن هدى .. هيه ماما تحبها هواي وهيه همينه ماعدهه اذية على احد خطية ..

كتلها يكولون بغيبوبة ... ظلت تدعيلها ..

كالت شوكت ترجعين ؟؟

ماادري ماما والله خطية الاطفال وحدهم ..

ودوامج شلوون ؟

كتلها مادري ام حسام يمهم الصبح واني ادوام ..

كالت ديري بالج من مهيب افتهمتي ؟؟ ماريد اعيد كلامي

يعني شنوو يريد يسوويلي مهيب!!! هاا شيسووي ؟ وبعدين ترى مراح يجي كلهم ملتمين بالمستشفى يم هدى ماما دخيلج ...

اي اي زيين ولي يله .. كاللت هيج وسدت المكالمة ..

فرح ...

خطية احمد ماكال شي وحيل انقهر عليهم ، بسرعة كال حضري نفسج باجر من الصبح نطلع لبغداد ..

حضرا ملابس للجهال واكل الهم للطريق يجوعون لان اثنينهم كطعتهم من الممة خبلوني بس يتعاركون

فطومة مماتها ورديات ودانيال خضر ومرات دانيال يخبث ياخذذ الممة مالتها وهيه تكوله انته نيه انته
يعني انته بنية ؟ وهو يظل يبجي ..

ويتعاركون عاد ادبتهم وحرمتهم من الممة ..هو دانيال مرت فترة فطمته من الممة بس من يشوف فطومة يريد عاد رجعته عليها .. جانت نفسيتي تعبانة ومالي خلكه يفتح حلكه ..

بس لمن ارتاحيت شويه .. لا كدرت اسيطر عليه وعليها
فطومة مااشوفها بنت ضرتي او بنت زوجي الحقير الخاين لا ابد

اباوعلها على انها يتيمة نفسي .. والنبي وصى باليتيم
وكال انا وكافل اليتيم بالجنة ..

وهيه هم سوالفها تجنن تخليني اخرب ضحك وهماتين حنينه كولش تبووس بيه ومرات تريد تخليلي مكياج تسويني عبالك كراس رسم دتشخبط عليها ومرات تفتح شعري وعود تمشطلي تعلقت بيها وهيه هماتين ..

يكولون اذا تربين بنية تربية صالحة الج بيها حسنة يمكن فطومة تصير حسنتي لان حرام تعيش ويه امها وتسلك طريقها

خابرت ريلام كتلها اني راح اجي يم الجهال ..
كالت ياريت .. لان باجر دوام وام حسام تريد تطلع ..

كتلها خل تبقى بس بين ما اجي الصبح او الظهر احنه يمكم خل تطلع العصر ..

ردت اوكي راح اكوللها ..

يوم ثاني رحنا لبغداد .. وزرت هدى بالمستشفى خطية جانت لا ايد ولا رجل .. علي مشفته بالمستشفى بس لهيب وحسان ومرة ابوها ومرة عمها وعمها خطية جايين ..

طمنت لهيب وصبرت عليه شكله جان يقهر ، عيونه حمر وصوته مبحوح .. ومبين حيل خايف عليها .. دعيت هواي الهم ربي يكومها اله ولبنتها واخوها بالسلامة ..

وانطلقنا للقصر .. وجان وقت ظهرية .. نزل احمد الاغراض وياية وراح

طلعتلي ام حسام بالكراج سلمت عليها .. وفتت جوة مجان اكو احد ، ريلام مداومة وباقية بس ام حسام يم الجهال ..

دخلت جوة وظلينه نحجي عن هدى ونبجي عليها تموت قهر ، بنتها مستغربة وبس تبجي كوة ساكتة اكثر شي تريد خالها

بس لمن شافت الجهال شويه سكتت وتباوعلهم وعيونها مدمعة وحمرة وبيها شهكة بجي وشعرها منكوش خطية تكول ام حسام متخليني امشط الها ..

كتلها ميخالف هسه اقنعها وامشطها بس خلي تسكت وتلهى ...

هيه كالت والله هاي بنتي مريضة صار كم يوم مامريت عليها بس اروح اشوفها وبالليل اجي ..

كتلها ماشي روحي ولا تهتمين ..

كالت شوكت ترجعين للشيخ ؟

كتلها احنه متفقين على الطلاق نهائي ما ارجع ..

ليش يمه ترى هو والله يحبج

بس احنه مانرهم سوى خالة احنه ممتفاهمين هو مينطيني فرصة اني هسه مرتاحة يم اخوية ودااشتغل وجبت كتب دااقرا وهماتين ناوية ارجع للدراسة واحس هاي الاشهر الي عشتها بعيد عنه حياتي طبيعية وحسيت انو اني فعلا انسانة طبيعية هماتين ..

الله يسعدج فرووحة انت طيبة وحبابة والله والشيخ خوش انسان والله وردة شكد وكف وياي وويه بناتي ورجالهن والله ميستاهل الي يصير بي والله كل يوم مصيبة شكل واني كله ادعيله بصلاتي

واني مدنكة واعصر بأصابعي ومتوترة هالموضوع يوترني حييل بس اني والله مرتاحة بكركوك .. هدوء حيل وشغلي بالكيك ينطيني طاقة ايجابية

طلعت ام حسام وبقيت وحدي بالقصر .. غمضت عيوني تذكرت لمن جنت هنا بس مو وحدي وهوسة وقيل وقال على طول اليوم

واني جنت بس اهومش واعارك بس مرات جانت لمة حلووة تصير ساعة صفاء ضحك سوالف

مابقى احد بهالبيت الكل طلعوا وبقت بس الذكريات ..

بنت هداوي صفنت ع الجهال وتضحك عليهم ، غافلتها ومديت ايدي لشعرها ومشطته ، شعرها حلو اسود ومي وهيه حلوة ودنفوشة ..

وراها خليت الهم غدا ، ام حسام طابخة وتغديت وياهم .. صح تعبانة من طول الطريق بس تحملت لخاطرهم

اخذتهم للحديقة الجو حلو وافترينا كلنا سوية وديمه شلتها على خصري وافتر بيها هيه عمرها سنة وكم شهر ، تمشي بس انه شلتهه خطية واريدها تتعود عليه وتطمئن الي

من بعيد شفت حسان جاي شافني ضحك بسخرية
وشاف الجهال كلهم داير مدايري كال صايرة ماما انيسة

ضحكت كتله شعجب جيت .. كال اصلا اني هنا على طول بما انو انتي مموجودة هنا فأني موجود ..

درت وجهي واني اضحك وتذكرت قبل لاتخرب علاقته بنرجس بسببي طبعا بسبب اللساني الي ما ياخذ حذر قبل ليحجي

جان هو زين وياي لان اني مرة اخوه الوحيد الشقيق اله وجان بوقت الخطوبة يعزمنا ونطلع سوى

وجان يكولي اتلوكلج لان انت صديقة حبيبتي ... وللاسف بدون قصد مني خربتها والله مجان عبالي هو كايل للدكتور هيجي عبالي الدكتور متوهم واني دا اصحح اله معلوماته

كتله حسان اني اعتذر لان خربت علاقتك بنرجس بس والله اني عبالي الدكتور متوهم معبالي انت كايله هيج جنت داصحح اله معلوماته

هو خله اديه بجيوبه وكال عادي عادي اصلا نسيت وكل شي بالقسمة ..

هزيت راسي ودنكت .... كال بصوت حسيته بي حزن شويه .. شخبارها اختج انين ان شاءالله مرتاحة !

رديت عليه اي الحمدلله عيالها خوش ناس والله ..

كال اي عيالها خوش ناس واحنه شنوو كو***د

باوعتله باستغراب .. انته ماكلت تريدها حسان انته كلت اخطبها بعناد الحياية مو هيج هذا كلامك ..

هز راسه بحزن وكال هم نكول كل شي قسمة ونصيب ... واختج الله يسعدها تستاهل .....

كتله الله يعوضك بلي تسعدك ان شاءالله

كال بسرعة ... لا اني ماريد اتزوج اكو ابالي شي اريد اسوي ..

باستغراب سألته شنووو ؟؟

كال غلسي وكرفص كدام دانيال خله اديه على اكتافه ويباوع عليه بفخر .. ديري بالج على هذا البطل وظل يبوس بي وفطومة هم قربت منه وباسها بخدها
وكال ديري بالج عليهم اثنينهم ...

اكيد لاتوصيني على جهالي ..

كال خطية ترى فاطمة يتيمة ..

جاوبته .. وانت دتشوفها شووفة يتيمة ؟ ترى اني مو الهالدرجة سيئة

هز راسه بدون ميباوعلي ادري داشوف مهتمة بيها امها ادبسز متستاهلها ...

وكف على حيله وعدل قميصه كال انت شنو رجعتي لعلي الي اعرفه تطلكتوا ؟

كتله لا مارجعت ، جيت عمود ديما اني حتى ابقى يمها ريلام عدها جامعة وام حسام هماتين ماتلحك ..

باوع لديما كرصها من خدها هيه ضحكت مبينة تعرفه ع طول تشوفه .. سلم عليه وراح

دخلنا جوة الجهال تعبوا فرشت الهم بالغرفة الفوك كلهم وناموا ...

ريلام خابرتني كالت امي مقبلت ابقى بالقصر كالت مدام فرح جتي رجعي للبيت وهددتني بجدي واني راح ارجع ..
كتلها ميخالف رجعي اني باقية

لمن ناموا الجهال اني مكدرت انام رغم تعبي ظليت افتر بالقصر ...

فتحت باب غرفتي القديمة وطليت بيها ، بعدها على حطتها الاخشاب مال زواجي الاول

ظليت افتح بالكناتير فارغة ، اتذكر هنا خانات الي جان حمدان يحط هدومه بيهن عطوراته اغراضه وخاناني سرير دانيال وكوووومة ذكريات هنا الي

رحت على غرفة البنات غرفة ريلام وهيام .. الذكريات السيئة تكون بالمقدمة ويه هيام عركاتنا هووستنا والملاسن

وبالمقابل الضحك والسوالف والتقشيب ويه ريلام هم جانت ايام حلوة

نزلت الدرج .. غرفة الحجية ظلمة وقبل جانت على طول ضاويه الحجية ماتحب الظلام ابد حتى بالليل من تنام

وكفت وفتحت الضوء شكد صاحت عليه هنانه ورزلتني وكفت اباوع ، يكولون تصير سوالف وصارت مو بس سوالف صارت ذكريات والحجية ماتت الله يرحمها وماترجع بعد واني باريتها الذمة

وكفت بالصالة هنا جنه نتجمع نضحك نسوولف ومرات تصير مناقشات حادة واختلاف بالرأي وكلها صارت ذكريات هماتين ويمكن ترجع ويمكن لا ..

رحت كعدت بالصالة صافنة ويتخايلي اصواتهم بعدهم بالبيت هيام وريلام فووك يتعاركن ومرات يشاقن وصوت الحجية وبلقيس يسولفون ..

وشويه واني كاعدة بمكاني شفته فات من باب الاستقبال ، وكفت على حيلي اباوع عليه متوترة مرتبكة وخايفة مدري شبيه

للحظة تندمت هسه اني هم خبلة يله شردت منه شجابني شرجعني الهم صدك البزون يحب خناكه

واجه باتجاهي ظل يباوعلي بنظرات كلها شووك ولهفة لدرجة خلتني اضعف كدامه

كال ها الحمدلله على السلامة ..

جان قريب عليه كولش واني ورايه القنفة وماكو مفر ..

جاوبته الله يسلمك .. سأل ع الجهال جاوبته نايمين ..

كال ليش مانمتي انتي وارتاحيتي !

جاوبته بلعثمة من غير ما اباوعله ونظراتي بكل مكان اله عليه
مجايني نوم .. جوعان انته اصبلك غدا تاكل؟

رد بحماس وابتسامة .. وانتِ تاكلين وياي ؟

جاوبته ها لا اني اكلت ويه الجهال ..

تحسر ووخر عني راح كعد على القنفة كال ماريد

غيرت مكاني احس متوترة وجسمي يرجف ..
كتله ... انت متغدي من شوكت اكلت ..

رد .. من الصبح تريكت وطلعت

معناهه جوعان هسه .. عفته ورحت للمطبخ ، سخنت الاكل وصبيته واخذته للصالة جان نازع الغترة مالته وباقي بس بالدشداشة حتى البشت ماكو

خليت الصينية مالة الاكل على الطبلة كدامه .. هو يباوعلي كال اشو تباوعين لراسي شبيج

ضحكت كتله مووو تكول بسببج طكت رواحتهن الشيبات وطلعن وقبل مجان يطلعلك شيب ...

اشو هسه اني ابتعدت عنك وخلصتك من ضيمي وهو الشيب زاد براسك

ضحك وهو ياخذ الخواشيك ينطيني وحدة وياخذ وحدة ...

اخذتها من ايده .. وهو كمل كلامه كال تجبرين الواحد يحجي هو شطلعهن غير بعدج عني ...

لو محاجية احسن الي ، اكلت وياه ، صح مجوعانة بس ردته ياكل وهو يباوعلي بنظرات حنين وحب ...

أنين ...

مرت أشهر على زواجنا .. بس خطية عمر بطلوا من الشغل وصار ضايج وروحه بخشمه ..

طلعت من الغرفة داروح للمطبخ اسمع امه تكوله اي مرتك رجلها خضرة عليك حتى رزقك هم راح منك ...

انقهرت حيل ورجعت للغرفة كعدت شوية افكر ومقهورة ..

بعدها كمت وطلعت الذهب مالتي وجمعته ، اني حتى احمد انطاني فلوس حصتي من بيتنا اشتريت بيهم ذهب وصار عندي هوايه ..

واني اصلا جان مهري قليل لان احنه ماطلبنا عليهم مهر هواي لان هو عمر على كد حاله واحنه قدرنا هذا الشي ، جنه مشترين رجال مايهمنا الفلوس ..

ولمن دخل للغرفة جان ضايج رحت كعدت يمه وانطيته الذهب خليته بايده باوعله وباوعلي كال هاي شنو ؟

كتله ذهبي مو معندك شغل اخذه افتح بي مشروع الك ..

ضحك وراح وكف يم الميز وطلع باكيت جكاير وظل يدخن ويضحك باستهزاء ..

اني كولش انقهرت .. وهو كال شنو تقشمريني ؟
ترى اني ادري بيج ماتحبيني وتزوجتيني مجبورة عبالك

جاوبته لا ما اقشمرك شسالفة ترى بس اني سمعت عمتي تكول رجلي خضرة مدري شنو

عصب وكال بغضب انتي متستحييييين تسمعين علينه ..

جاوبته بقهر ودموعي تجري ماتسمعت عليك اني صدفة سمعتها من جنت جاية للمطبخ

هو طلع و سد الباب حيييل ...

اني والله ممقصرة وياه بشي لمن يجي اني مخلصة شغلي وحتى دراستي اخلصهه قبل ليجي

لان مرة مرتين اشوفه يطنكر من يشوفني اقرا ظليت اسد الكتاب واروح يمه

وهو نفس كلامه انتي باردة قالب ثلج احبك الي تطلع منج احسها جذب ماحس بيها

ماعرف احتاريت شون اتصرف وياه ..

كم مرة حذرني ماروح هواي يم اختي واحسه يسمع كلام امه هواي .. اكوله رايحة يم اختي يكول ترخصي من امي يله ترحين ..

اروح اترخص منها تكول غسلي المواعين يله ترحين غسلي دشداشة عمج ، عزلي الهول ، فهمت من هالشي انو هم ميردون اروح يم اختي

ظليت ماروح وهيه خطية فرح حست وهيه عدهه عزة نفس كولش كبيرة ظلت متكولي تعالي ابد تعتمد على نفسها بهواي شغلات رغم هيه مريضة خطية وموج دوم توصيني عليها بس اني موبيدي

ظليت اخابرها كلساع اطمئن عليها اذا ماترد نايمة اتخبل ترد عليه يله ارتاح ومرات ابوك روحي شويه لمن ارجع من المدرسة اروح يمها شويه وانزل

ومرة لكفني سوالي مشكلة عاد بطلت .. كل هذا اني متحملته بس هيه يراد الها حظوظ ...

ابو الخط يريد الفلوس مالته وعمر ماعنده واستحيت اكوله ، اخذت من فلوس صباحيتي ظاله عندي خمسين الف انطيته ...

وهو لمن عرف هماتين سوالي مشكلة وعركة ، سكتت وبس ابجي ..

احسه يريد الحجة عليه ، موبيدي ماجاي اكدر احبه او حتى امثل الحب وياه

كل الي اكدر اسوي هو الطاعة والاستجابة بس الحب ماكدرت فشلت وشغلة هاي مو بيدي ويه كل الظروف هايه ...

هو ابتعد عني وحسيته عنده علاقة ويه وحدة .. تطورت مخابرات وكدامي بالغرفة ..

جنت بس اࢪيد اخلص من المشاكل ماريد يحجي عليه ولا اريد دووخة راس ..

قررت انطي اذن الطرشة ولمن اضوج منه حيل جنت اطلع اروح يم اخواته ومرات اشوفهن يضوجن مني

او يحجن عليه ويلومني على علاقتي المتوترة ويه اخوهن ، الشقة صغيرة اني وين ارووح .. ولا يقبلون اروح على طول يم اختي حاولت اتمسك بهاي العلاقة قدر الامكان ..

وبليلة جان ديخابرها .. وتطور بيناتهم الغزل بس مكدرت حسيت بالذل والاهانة كلماته احسها مثل خنجر مسموم يمزق قلبي الشعور بالذل يقتلني ..

شمرت الكتاب عليه وكع فووك راسه وصيحت بعالي صوتي اطلللللع برررررى ياااقذر اطللللع برى حاجيها ال***ك**ة مالتك اطللللع

هو تخبل شمر الكتاب والفون واجه ضربني .. بكل مايمتلك من قووووته وجان عبالك دينتقم مني بحقد وقسووة جان يضربني حتى تدخل ابوه وامه وفكوني منه ....

موج ...

اخذني شرار من الكلية وداني لمطعم تغدينا ورجعنا للبيت .. جان ديحاول يرضيني .. واني امثل انو اني راضية

بالبيت مجان اكو احد ، هو خابر على نيفرا كالتله حتتأخر بالعيادة مالتها ومحمد يم بيبيته الي هيه امها وصته يروح يجيبه ..

هو مراح جاب ابنه بقى يمي بالغرفة للعصر ، نمت على صدره وغفينا ونسينا نفسنا ..

كعدت على صوت بالبيت ، كعدته بسرعة هو حضني ورجع نام ...

كعدته ظليت اضرب بي كوووم كووم لك كووم اجت والله لعبت نفسي والقران حتى داااكرهك

هو كعد يفرك بعيونه شبيييج لخاااطر الله شبيييج حسرة اتقرب منج طلعيها سم وزقوووم عليه وتعاركين
خاااب اني الي كرهتج موووو انتي .. وراح طلع من الغرفة ..

لميت روحي وكعدت ضايجة حيييل احس دااموت ..

بعدها رجعت نمت لليل يله كعدت مالي خلك ابد .. طبيت للحمام سبحت ولمن طلعت شفت نيفرا وصابغة شعرها بلون قريب للون شعري

تذكرت شرار يلعب بشعري كدامها او هيه تجي صدفة هزيت راسي سويتلها هااي ووياهه ابتساامة وهيه ابتسمت ابتسامة مجاملة واني رحت للغرفة

بعدها سمعتها تتعارك وي شرار وهو يلبكها تلبك متكدر اله يمكن لان ماراح جاب ابنه مدري حست بينا جنه سوى ما اعرف ..

وبيوم جان عطلة بقيت نايمة بالغرفة وصايࢪة انام هوايه وماطلعت من الغرفة للفجر

اخذت تليفوني شفت مكالمات هواي من شرار واني ممجاوبة ما اعرف شنو صاير ..

طلعت من الغرفة ، شفت نيفرا يمها بطل وبيدها كاس ودتشرب ، عيونها حمر مادري من الشرب مادري باجية

بس لمن شافتني جانت نظراتها قووية حيل وتخوف وكأنها حاقدة ..

وكفت يمها واديه على قلبي البيت فارغ وشرار شكله ماكو .. غرفۃ ابنهم بابها مفتوح وهو مو بفراشه ...

بلعت ريك بخوف وسألتها صاير شي ؟ كولشي بخير ؟

مجاوبتني بس تباوعني بحقد .. رددت كلامي بالروسية خفت مافهمتني ..

هيه صرخت بصوت عالي ويه صراخها شمرت الكاس ع الكاع وتناثر زجاجه ..

صرخت بالروسيۃ : نييييت ... نيفسف برادكييي ...
لاااااا .... ليس بخير ..

خليت ايدي على قلبي من الخووووف وخفت على نفسي منها اكثر شكلها مو طبيعي ..

فرح ..

جنت بالحديقة الصبح وحدي والكل جوى .. شفت ختام جاية ، هيه وكعبها ولابسة اصفر طالعة جنها ماعون زردة ..

اجت يمي كالت صباح الخير فرح وتباوع لاديه ووجهي .. بتفحص .. اي صلوات صايرة احسن وجهج راجع مثل قبل بس اديج تحتاجين تجميل تردين انطيج عنوان طبيب تجميل تروحين اله يطلعج بلاد

كتلها لاء شكرا خليت التجميل الج اني واثقة من نفسي روحي انتي سوي ..اني هالشغلات التافهة متهمني

كالت ليش ترجعلج ثقتج بنفسج

جاوبتها لا اني واثقة من نفسي وشوكت ميعجبني عود اروح اسوي ما احتاج نصيحتج .. اني ادري بيها جاية تنتقص مني وتحجي هالحجي ..لذلك ما انطيتها مجال ..

كالت وينه علي اريد احجي وياه عندي موضوع ؟

موضوع شنوو ؟ اذا عندج موضوع عن الشغل احجي وياه بالشركة احسن ...

كالت وانتي شعليج بالله واصلا انتي شسوين هنا ؟ مو سمعت متطلكين انتوا شرجعج ..

كتلها اني ملكة هذا البيت ، خوووش انت معليج مطلكين متزوجين حياتنا واحنه احرار بيها ليش تصيرين حشرية ...

خلت دارت وجهه ووراحت ..

الايام الي بعدها انخبصوا بحادثة حسان ، سمعت علي يخابر ومتوتر ويصيح ....

ولك احسين ادفنك والله لا تتهور عووفه احنه نعرف شوون ناخذ ثارنه منه مانريد انته تاخذه ..

خلص مكالمته وصاح على مهيب اجاه

كله خير بويه شكوو

رد .. ولك هذا حسان خابرني يكول عرفت مكان اووس وينه ورايح عليه هسه يكول راح اخذ ثارك وثار مهيب منه

جاوب مهيب بصدمة وماكالك ووين هسه نلحكه

فرك علي وجهه وجاوبه ولك مو ببغداد بغير محافظة

وبعد شكال ؟

كال هو صارله هواي يحفرلي وحاول يقتلني اكثر من مرة وهسه عرفت مكانه هذا مخبل حسان ومتهور ولا يكعد

ظلوا ايام مخبوصين بسالفة حسان واوس والظاهر اوس جان يهدد بحسان وهو طكت روحه منه وحتى معتدي على بيته ويوكفه بنص الطريق وحسان ابو سبع ارواح دوم يطلع منها مثل الشعرة من العجين ..

اني مشفت من علي شي بهاي جيتي ابد .. جان ملتهي وراح لغير محافظة لان حسان انلزم واوس جان مضروب حسان ضاربه ومكسرة وكايل الهم اخذت منه ثاري وثاركم مربع

اجه علي بعدها جان تعبان كلش سألته عن حسان اول شي ... كال بالسجن وعليه قضايا متاجرة بالسلاح

يعني ماتكدر تطلعه انته ، فرك وجهه كال ماكدر غير اخفف الحكم عنه وبس التهمة لابسته واجو فتشوا بيته نبشوا نبش صح مالكوا بس التهمة لابسته

زين واوس ؟
رد .. اوس بالمستشفى وعليه حراسۃ مشددة وبس يصير زين ياخذوا للسجن هم عليه دعوة ...

دعيت لحسان دعوة زينۃ
لأول مرة بلكي يطلع خطية هو هم ماشاف من حياته شي وانظلم هواية ..

واني بعدها .. قررت ارجع لكركوك ، انتهت مدة اقامتي هنا ولازم ارجع هداوي صارت احسن ورحت زرتها بالمستشفى ..

من الصبح حضرت نفسي واحمد خابر كال جاي عليه ..

رحت لعلي للمكتب كتله اني لازم ارجع ..

هو كام مقهور اجه حضني حييل بدون كلام ...

بعدته عني كتله وخرر شجاك مو مطلكني انته لايصير علينه ذنب ...

كال احلى ذنب وبي خير همينه .. ولج مشتاكلج من جدمي لمتوني

يصير ابوكج من الدنيا كلها واضمج بين ضلوعي حتى اسلم عليج ؟؟ ها فرح مايصير ؟ خليني اخذج بگلبيّّّ ولج وعلي احبج ...ليش تعوفيني ، تعبان وانتي علاج الي ....

درت وجهي عنه ... بعدني مقهورة منك ...

رد ... قهرج انه اشيلنه على متني ... واخليج تنسين .. ثقي بيه فرح ..

خليت راسي على ذراعه واحس انو بعد ماكو داعي لكل شي ...

يكلي حبج جاس كلبي وانعكدتي ويه شراييني وانعجنتي بدمي مشتاكلج فرح ...

صحيت على نفسي وابتعدت عنه ومسحت دموعي ..
لا علي ما ابقى لازم اروح اتركني فدوة اني مرتاحة هناك والله حتى صحتي وحالتي تحسنت ..

واذا رجعتيلي ماراح تتحسن اكثر ..

لا علي لااا تسيء اني متأكدة ..

هز راسه وكال براحتج ...

بعد فترة .. خابرني علي .. كال راح اجي على الجهال خليهم يحضرون خطوبة عمهم ..

كتله عزاااا يا خطوبة هااي ؟

رد بعصبية شبييج تعزعزين جاي اعزمج على خطووووبة موو عزاء ..

كتله خطوبة منو منهم عمهم ! شرار متزوج خير من الله وإحسان بالسجن

صخااام لايكون خطوبتك انته ؟؟

كال وشبيه مااخطب يعني شبيه ليش مصدوومة ترى صح عشت سنين بدون مرة بس انتي فتحتي عيني ع النسوان ...

و شكوو بيها اذا اخطب ؟؟ مو بعينج؟ رجال عزوبي انه ترى ومن حقي اخطب واتزوج حاالي حال الخلك ..

يتبع ..

حبايبي هذا البارت قبل الاخير لكن!!! اكو بارت يخص موج فقط راح انزله باجر لان حياتها بروسيا بيها هواي احداث ماتكفي انزلها ببارت الاخير لذلك قررت انزل تحديث يخصها بس هيه ...

ونهايتها راح تكون بالبارت الاخير لكن بارت باجر بي تفاصيل واحداث ..

البارت الاخير يخص كل الابطال بما فيهم موج بأذن الله يكمل وانزله مباشرة .. يعني ماكو موعد محدد

صووتوا للبارت حتى اتحمس وانزله بأسرع ووقت
احبكم 😘

توقعاتكم للنهاية ...

في حدا بدنياااه 😪😪💔👆