رواية هذيانٌ بين جمرٍ وجليد ..(ارملة اخي المجنونة) الفصل التاسع وستون 69 - بقلم نورا ناصر

السلام عليكم
هذيان بين جمر وجليد
الفصل اربعة وستون
نورا ناصر

***

هل انطفأت .؟ ..
ام انا من بهتت الوان هيامهُ السرمدي ..؟
هل بتَ من العاشقين النادمين .؟
أم اسرتكَ قيود الرحيل ...؟
بقلم HafsaHafsa710

***

فرح ...

كال بصوت مبين استنزف كل قدراته على الصبر والتحمل :- ولج شجاااج ولج تخبلتي راح تبقين هيج انتي ماراح يجي يوم ماتسرعين ماتنفعلين عقلي ولج عقلي .. مو گربت اتخبل من وراج ..

انتبهت لعيونه الي كوتني بنظرات جحيمية زادت هواجسي ومخاوفي .. جان بقمة غضبه من تصرفي ..

بلحظة بعد هاي ثورته واني اطلب منه يرجعني ببكاء ونحيب .. حسيت الهواء ينكتم داخل صدري من شدة ضغط ايده على حلكي ..

يمكن هاي اسهل طريقة يكتم بيها صوتي وهذياني المتواصل ..

_ سكتي ولج سكتي خل افهمج فضحتينه طيح الله حظج .. احنه بالشارع مو بالبيت .. حتى تصرخين .. لو انتي شيهمج شارع بيت صخام يهمج تصرخين وبس نعلة على شيطانج

وخر ايده من حلكي .. التقطت انفاسي .. وظليت اللهث واسعل .. واباوعله بعيون رافضة ..

اتنفس سريع اكح واحجي : لا تحاول علي والله ماكو شي راح يثنيني عن اصراري هالمرة ...

كل مرة تخليني على الرف وتروح ومن ترجع تكون واثق من بقائي وياك بس هسه لا ااا بعد لاااا ...

وهو يلف الستيرن ويتلفت وكانه يدور على مكان يركن بي ، يحاجيني ، عين ع الطريق وعين عليه ...
_اي بس ماحرمتج من شي مو صحيح ... ليش تنكرين

_ بلي حرمتني من حريتي جنت سااجني خانكني خننك

ركن السيارة بمكان والتفت عليه .. مسح العرك من جبينه التقط انفاسه بسرعة وكال بهدوء ويحاول يسيطر على انفاسه ..
وين اريد اوديج مثلا ووين ؟ ماتكليلي ، انتي مو باجر رايحة ؟ ردت اشبع منج شويه ولج موو واألله تعبان ..

باوعت عليه بعيون دامعة .. اني ابد ممستعدة ارجع اله وماريد همين مرتاحة هسه يم احمد وانين ..

هو كمل كلامه .. ماجاي تشوفيني شكد متحملج متحمل تقلبات مزاجج انفعالج تسرعج وخبالج وحتى وانتي باسوء حالاتج متحملج وما أذيج .. وهذا يدل على انو انه احبج حب مال خبال ليش ماتحسين ولج انه بس اسمي يرجف زلم وكدام ضعيف

باوعتله بعيون مدمعة .ونبرة مبحوحة بسبب البجي
_ بس الي سويته بيه اخر مرة جريمة ، شون هان عليك تتركني واني مصروعة

ظل يباوع كدامه بتفكير وتنهد وايده على لحيته يعبث بيها .

واني كملت كلامي .. وانته تدري بيه من انصرع شكد اتعب .. وشكد.احتاج اخذ علاج وانام وماركز وادووخ وماشوف شي كدامي

انت لوو باقي يمي جان ماصار الي صار ، جان ما ماتت بنتنا جان ما تمرض دانيال وصار عنده ربو واللتهاب جان ماتشووه جسمي اني ووجهي اثار الحرق لهسه بي

ع الاقل لو مخلي يمي شخص يفهمني مو مخلي خرسات انوب طلعن جذب مو خرسات انته مسكتهن ..

الحياة وياكم صعبة حييل علي صعبة اني والله مرتاحة بعيشتي ويه اخويه واختي ..

خله ايده على كتفي هذا هو جا مدام مرتاحة انه شنو اريد غير راحتج ...

باوعتله ليش مجنت مخليهن يحاجني ؟

رد .. اريح الج فرح حتى لا تتعاركين ادري بيج متعيشين بدون عركة

ضحكت وحكيت كصتي : اصلا اني جنت اسبهن واغلط عليهن بصوت عالي

ضحك ؛ كال : ادري بيج والله كل شي يوصلني ..

هزيت راسي شكد فشلة والله عبالي مايسمعن عود لمن تشوفهن اعتذر منهن بالنيابة عني

كال اعتذرت بوويه من جان يوصلني الحجي

كتله مبتسمة : اي وما كالن عني مخبلة ؟

رد : لا بس جانن يشكن منج ومن مزاجج وتقلباتج .. وانه اصبر عليهن واصبر على روحي ..

دنكت : ياربي لعد شكد مأذيتكم اني ..

كال اروحلج فدوة وانتي سالمة ...

سكتنا كال امشي نزلي تغدي ماجعتي من الصبح طالعين ونفتر

همست بكيفك ..

كال شنو رايج نصير اصدقاء تقبلين ؟

باوعتله مبتسمة .. وهزيت راسي ؛ نزلنا لمطعم وتغدينا ..

وبعدها رجعنا للسيارة .. حركهه وانطلقت بينا ووصلنا للبيت الي المفروض يكون بيتي..

ظليت اباوعله جان كامل مبين ، من بره مصبوغ وبابه كبيرة ومقفولة

وكف السيارة يمه .. باوعت للبيت وصفنت ثواني
والتفتت عليه سألته منو كاعد بي ؟

رد .. محد ينتظرج .. وضحك ..

اني دنكت واعصر بأصابعي هو سألني وين اوديج هسه ؟

رديت عليه لبيت خالو ...

هز راسه وكال صار .. وتوجه لبيت خالو ..

باوعت عليه كتله شعدها انتقام ؟

كال شنوو؟

رديت عليه بنفاذ صبر اقصد ختام العفو

ضحك كال غير جايه تعزيني ...

اي وبعدين ؟

والله هيه عزت بالتليفون وهمينه اجت للبيت ماقصرت البنية

ووين تشتغل هالايام ؟

هيه تلمح تريد ترجع للشركة وانه بيني وبينج الحجي اريدها ترجع لان شاطرة وذكية او بالاحرى داهية ومحتاجها هالايام ..

بلعت ريك وباوعلي هو بنظرة جانبية ودار وجهه حسيته يجس النبض

هزيت ايدي ... اي شكو بيها يابه رجعها مدام تفيدك

باوعتله جان مبتسم ، ظليت ادردم عليه وعليها بقلبي ..

باوعلي هو سالته بنفاذ صبر شبيك هيج تباوعلي
كال ماكدرتي اله تطلعينها موو ؟

التفتت عليه بكل جسمي على كعدتي يمه بالسيارة
كتله شنو تقصد

كال بعد ضحكة ولا شي طليقتي العزيزة صديقتي الغالية لا يشغل بالج شي ارتاحي.

عدلت كعدتي بأريحية وكلت بعد ما زفرت نفس
اي الله يهنيكم واذا تريد همينه اخطبها لانها ذكية وعاقلة وماتسوي مشاكل

كال والله مو بيدي ، انه وگلبي نهوى ام مشاكل ..
ومبتلين بيها والله يعينا على ما بلانا .

رفعت اديه بدعاء : امين

وصلنا لبيت خالو كال طلعيلي الجهال اشوفهم ..

فتت اخذتهم من انين جانت فدوة مغسلة الهم ومغيرة ملابسهم ومسوية شعر فطومة رافعته ليفوك ومسويته فيونكه متفننة بيها ومطلعة ابداعاتها ، تحب الاطفال هيه

طلعت بيهم برة مقبل يفوت ومحد موجود بالبيت لا خالو ولا ولده .. بوسهم وكعد يحجي وياهم
كال لفطومة اخذج وياي بويه ؟

هيه مخليه اصبعها بحلكها وبس تباوع وهسه كل شوي وخره ولزم ايدهه

مقبل دانيال وظل يبجي ويجر بيها بملابسها يريد يفوتها جوه ..

كال خوش بويه خليها وياكم بس لاتتعاركون وتلوعون كلب امك صيروا عقال

هو هز راسه برفض وجاوبه أءءعارك اني احب ماما احب فتومة

هو ابتسم بوجهه وبوسه .. وانطاهم فلوس هو وفاطمة ..

كال اخذها عنج فطومة ! خاف تأذيج ؟

كتله لا خليها ويه اخوها ودانيال يحبها يلعب وياهه

رد .. مايتعاركون ويأذوج!

هزيت راسي لا يتعاركون اكيد هيه احشاء البطن تتعارك بس هم ملتهي وياهه ويحبها ويلعبون سوى على طول اليوم بسيطة يتعاركون ويتصالحون

تنهد كال جا خوش من تاذيج خابريني اجي اخذهه

وانطاني فلوس كال هاي الج

رفضت اخذهن وكتله ممحتاجة

كال اخذيهن اعتبريهن نفقة مو مطلكين احنه ..

جاوبته .. خلي المحكمة تحددها النفقة وعود بذيج الساعة اخذهه ..

كال براحتج ...

كتله اي صدك شخبار ام فطومة
باوعلي بنظرة محذرة انتي امها

اقصد سحر ..

رد استغفر الله ربي واتوب اليه خليني ساكت احسن الله يحب الستر ...

كله من حسان جابهه

باوعلي بنظرات رفض ؛ شعليه حسان هو المرحوم تزوجها ويدري بيهه شنو من ملة وورطته من صارت حامل بالطفلة ومن مات هيه راحت لحسان وحسان جابها خو ما نتبرى منها الطفلة شنو ذنبها ...

خليت الكف على الكف الثاني باحتجاج وكلت اي هو كل العالم صح بس اني غلط ...

رد .. هو منو كال هيج بوويه ؟

انتبهت على شي كلت بس حسان جان ملقنها تحجي وحاجيلها شغلات عني حتى ياذيني ...

شكد تحبين تنبشين بدفاتر قديمة يااابوويه منج ... اخخخ ...

باوعلي بعمق عيوني لحظات وتحسر

كتله بضحكة ليش هالحسرة هاي

كال ليش ويهمج انتي؟
دنكت واني ساكتة ..

ويله بويه انه اروح ديري بالج على نفسج خوش ..

كتله بس عليه توصي لعد والجهال ؟ مادير بالي عليهم

رد بتهكم اي اوصيج انت اولى اذا سلمتي سلموا الجهال وياج ...

عضيت شفتيي بعصبية ..

ودعنا وصعد سيارته وراح .. ظليت اباوع لسيارته وهيه تروح وتختفي بالفرع

كل شي بداخلي يصرخ ابقى ولتروح بس شفافي كانت مغلقة ومتحجي ولا تتحرك .. شنو قيمة وجودي يمه واني مختنكة بفسحة هواه ..

دخلت الجهال ودخلت وياهم .. يوم الثاني اجى علينا احمد وجايب وياه عمر ورجعنا لكركوك ..

أنين ..

بيوم الي نريد نرجع لكركوك .. رحنا لبيت الشيخ ودعنا موج وطلعنا ، عمر عزمنا على الغدة بمطعم ببغداد ..

ونزلنا بعدها للسوك .. احمد وفرح والجهال يمشون كدام واحنه وراهم عمر لزم ايدي وهمس اشتاقيت الج ..

ابتسمت بهدوء ورديت حتى اني ..

هو ضحك باستهزاء .. لا والله ممبين ابد

رفعت حواجبي مستغربة ليش تكول هيج؟

كال لو صدك جان كلتي اني اكثر مو حتى اني ..
ضحكت .. ماكو فرق ومتعودة ارد هيج ..

فدوة للضحكة احبج اني أنين والله مستعجل ع زواج هواي لورى الأربعين ..

دنكت وسحبت ايدي منه .. لا فشلة منهم من الشيخ واختي امهم توها متوفية ..

كال بنفاذ صبر .. اي اعرف افتهمت هو انتي ميهمج عليمن اني احجي ..

باوعتله برجاء ... لا والله عمر بس اني
كال يله كافي تعالي نشوف احمد وين راح لانضيعهم ..
مشيت بخطوات مترددة وهو سبقني وراح يم أحمد واني دحست روحي بفرح .. وضايجة احسه بسرعة يتعصب وعلى اتفه الاشياء

رجعنا لكركوك .. وبعد اربعين الحجية بأسبوع بلشت تحضيرات العرس ، هم اخذوني وياهم حجزنا بدلة وصالون بس كله جان على ذوقهم ...

خطية موج مكدرت تجي جانوا ملتهين باربعين عمتها وخطار عندها ...

وفرح ملتهية ويه زعاطيطها مكدرت تروح وياي عاد هم اخذوني ومقصروا نعم الله عليهم ..

بس قبل العرس بيومين اجتي موج واحنه سوينه حنة بسيطة بالشقة مالتنه وهمات اجوي بيت خالو وبيت عمتي بس بيت عمي زعلانيين مقبلوا يجون ..

اني جنت احس نفسي لعابة او اني جنت امثل دور اللعابة الي يجيبوها منا يودوها منا .. حسب رغباتهم .

حتى هم اختاروا االي صبغ لون شعري جان اشكر بس معجبني ....

وبيوم العرس راحت وياية موج للصالون ، ورجعت شعري اسود طبيعي لان الاشكر احس طلع وجهي شاحب

ماعرف ليش هو شحب بسبب التفكير والقهر والحزن ، القلق ، احس وجهي انسحبت منه الحياة ، واكتسب شحبة الاموات بسبب النفسية الزفت ، لذلك رجعته اسود

ولمن اجوا للصالون ورى الظهر .. انصدمن شون رجعته اسود وسوزان حجت عليه ليش رجعتي اسود الاشكر جان لايكلج وعمر يحب الاشكر ..

اني باوعت لموج حتى تنقذني لان ماعرف شنو احجي ..

موج كلتلها ترى طالعة حلوة تجننن ولايك الها حيل ..
هيه كالت اي بس والله حتى سوينا الها غالي وشعرها طويل ..

ضحكت موج يمعودة اني انطيج فلوس الصبغ عليه بس خليها لاتضوج خطية شبعت بجي من الصبح لهسه ..

ردت سوزان .. ليش شبيها شبعت بجي مموافقة لو شبيها ..

كالت الها موج لا عمري منو كال هيج ؟ بس الظروف الي مرينا بيها صعبة شوية وجانت تتمنى بابا موجود ..

كالت .. بتفهم : الله يرحمه ااي والله حقها وان شاءالله احنه منقصر وياها وعمر يحبها ويصير الها اب وزوج وكل شي ..

_ ميقصر الله يحفظهم لبعض .. ويسعدهم ويهنيهم ..
_ امين ..

بعدها كالن اجه عمر .. واني اريد اتنفس ما اكدر اختنكت .. والدموع تنزل لا ارادي وصدري يعلو ويهبط ..

كوة سكتتني موج وصارت تباوعلي بنظرات استغراب .. غطتني بالبرنص واني بس اريد اضم نفسي عنه .. ماعرف شنو الي صارلي

احت سوزان رفعت البرنص كالت شدعوة خلي يشوفج .. هاي شسويتي بنفسج ترى هم اهلج بعد كم بايه عنج موو اكثر ..

انطتني كلينكس مسحت دموعي ورجعت لام الصالون رتبت مكياج عيوني وطلعت شفته لابس قاط جوزي طوخ والقميص جوزي فاتح ورباط جوزي غامق .

صرت ارجف تمنيت المسافة تطول بيني وبينه وما اوصله ، تسرعت شسويت بنفسي ....

اسناني تضرب ببعضها ورجليه ترجف .. لزم ايدي احس انساقيت لقبري وهالبدلة هاي كفني والسيارة التابوت
مااحس نفسي عروس ابد وبيه فرحة العرس .

رحنه صورنه واخذوني بعدها لشقتنه .. كعدوني هناك وبعدين اجوي عليه وزفونا للفندق .. واني كولشي ممفتهمة روحي بخشمي وممتحملة شي ونفسي تلعب واكل ماكو معدتي فارغة

كعدت على السرير بغرفة الفندق وهو اجه كعد يمي
نزع سترته وشمرها ورانه وكعت على السرير ، نزعني البرنص ولزم اديه بوسهم ...

كال شبيج ترجفين ؟ اكلهم يطفون التبريد ؟

شون اكوله اني ما بردانة ومادارجف من البرد ..

هزيت راسي ، صكيت اسناني احاول اسيطر على رجفة جسمي ..

بعدها تعشينه ، اكلت لان جنت جوعانة واحس راح اوكع .. وبعدين غسلت ونظفت اسناني ، هدأت شوية ، احس تشبعت بالبجي والقهر وتبنجت بعد ما احس بشي رجعت امثل دور اللعابة الي بلا مشاعر

وسلمت نفسي إله ..

مهيب ...

طول هالفترة هاي جانت جمانة تخابر وترسل رسايل واني مغلس عنها .. لا ارد عليها ولا الي خلكها ..

وبيوم اجت هيه وميسلون للمركز وطببتها لغرفتي
رفعت عيني عليهن وكتلها خير شكوو
ردت ميسلون جمانة عدهه موضوع وياك

قلصت عيوني خير يا طير موضوعيش هذا احنه مابينا مواضيع واني عندي شغل هسه رجاء اطلعي برا

طلعت ميسلون وبقت جمانة.. خزرتها اني شنوو حجيت ؟ اطلعي كلت ...

اجت تقربت مني وتبجي مهيب اني احبك ليش ماتحس بيه ؟

عطت بيها تحبيني ولج شنوو اني بحالج اني!!! دروحي من خلقتي هسه ، ترى اني عندي الي تارسة عيني وكلبي فلا تحاولين ..

كالت والله راح تندم على هذا الكلام مهيب ..
دروووحي بابا رووحي وخلت وطلعت ..

ورى ايام وصلني تسجيل على تليفوني بي كل اتفاقنا على مرتضى اني وجمانة وميسلون من اتفقنا نورطه بدعوة تحرش ..

خليت اديه على راسي وتنفست بعمق ، دكيت رقم جمانة وكتلها شنوو هالتصرفات هاي؟

ردت ... شنوو رأيك ؟

شتردين ولج ؟ وعبالج هيج تلوين ذراعي لا غلطانة وجري عدل لا ادفنج ترى هاااا

كالت والله ماعندي كلام زايد ناقص بعد تريد تعال نتقابل بالكوفي ونسولف واذا ماتجي انته الخسران ..

طلبت اجازه مؤقته وخليت ورحت بزيي العسكري رحت للكوفي لكيتها كاعده علئ الكرسي وحاطه رجل علئ رجل وضاربه المكياج علئ اخر حبايه طالعه جنها شيطان...

باوعتلها بقرف وسحبت الكرسي وكعدت مقابيلها...

هي جانت تلعب بموبايلها من شافتني طفته وخلته بصفها كالت بمياعه ومصاخه ...هلاو حياتوو شلونك ؟

شمرت سويج سيارتي بملل علئ الطاوله وتنهد...بلا حجي ماصخ واحجي شتردين

حطت اديها علئ الطاوله وحضنت وجهها بدلع..تتزوجني !

باوعتلها بقرف ورجعت ضهري ببرود علئ الكرسي...بالمشمش...

رفعت حاجب...نشووووف

كلتلها ...احجي من الاخير وبدون لف ودوران ترئ ما فارغلج عندي شغل

مطكت بحلكها وكلبت عيونها...امممم تتزوجني لو افضحك واخليك حتئ وظيفتك تخسرها بتهمه تلفيق تهمه وادعاء كاذب...

جاوبتها ببرود ونفخت الدخان بوجهها...كملتي؟

ضحكت ...هههههه عندي تسجيل يوديك وره الشمس

رديت عليها بنفس البرود...تمام اسمعي وسلطني عليه

رفعت حاجب بغرور...ما خايف ؟

غمزلتها... تؤؤؤ لاااااا ما خايف اطلع من زروف المنخل واكدر افر السالفه عليج واكدر اسوي كلام زوور ...

ابتسمت وهي تخلي أصابعها بين شفايفها عود تتدلع...ميسلون تشهد ضدك همينه

ضحكت باستهزاء...تمام انتي وميسلون وعماتحن وخالتجن وصاحباتجن وكل وحده تعرفنها خلي تشهد ضدي واثق الخطوه يمشي ملك انتي تصرفي تصرف واحد ضدي وشوفي شنو الي يجرالج...

تقربت مني وتحجي بثقه...تهددني ؟

ضحكت بغموض ...عود هم سجليني ...وبعدين شتعتبري اعتبري مال ازوجج لو اعرف اعفن بالسجن واخسر رتبتي ما اتزوجج

باوعتلي باستهزاء..كله لخاطر بنت عمتك بالله بشنو تفرق عني

تقربت منها واني اباوع لعيونها..ههه شجاب الثرا علئ الثريا ...او شجاب الثوم علئ الحلقوم بابا ماكو وجهه للمقارنه

بنت عمتي واحبها واعشكها من هي طفله واني عاشكها من اشوفها ادووخ احس روحي طفل مو ضابط ورتبتي شكبرها لا والله احس نفسي ضعيف كدامها..

كالت بغضب...زين مدام ما منك فايده تتزوجني انطيني فلوس وبعدها التسجيل احذفه

وكفت وعدلت قميصي اخذت السويج والموبايل كلتلها...اوك تمام اني مقدم علئ سلفه اذا طلعتلي انطيج منها عشرة الالف دينار

بس ادعيلي تطلعلي ولو دعائج ما يوصل لباب الشارع بس ميخالف بلكي الله وتطلع...

وكفت بغضب...ياااا والله شنو عشره اريد ورقتين

هزيت ايدي...لو عندي ورقتين اضل يم اشو انتي تلعبين

صاحت بصوت عالي...والله اشتكي عليك واشوفهم التسجيل

درت وجهي عليها باستفزاز ...روحي اشتكي منو لازمج

وبعدين كلنه بالهوئ سوئ اني وياج مذنبين خلينا ناخذ جزائنا يعني قابل بس اني الي راح اتورط انتي هم متورطه وياي وتهمتج اكبر من تهمتي ...

انتي ترحين للسجن واني اروح للسجن اني يومين واطلع وانتي تعفنين وتصيرين خريجة سجون ويالله باي عندي شغل...

عفتها ورحت صح قهرتني وصح اني ما انكر غلطت من سويت هيج بس بعد اني مو معصوم

رفضت كل طلباتها اعرفها مطيه ما تسوي شي وحتئ لو سوت عادي...

بس اني لا اريد اتزوجها ولا اطمعها اكثر واخليها تتماده بطلباتها واخليها تسحب مني فلوس تخسئ هي والخلفوها انوب عليها جمانه مدري زماله...

هسه افتهمتي ياريلام يامطية اني المفروض هسه اركعج بلوك واطيح حظج لان تسرعتي وحكمتي عليه يا ثووولة ..

موج ...

ودعت أهلي وانطلقت ويا شرار متوجهين لروسيا ، بداخلي خوف من هالرحلة ، رحلة المجهول ..

جان يهمس بأذني لازم تتعلمين تغلسين على اي شي تشوفيه ..

باوعت عليه بعدم رضى .. كال كله لخاطر ابني والله موج وانتي ماليه كلبي اني ممتلئ بيج واحبج بس لازم تقدرين ظروفي ابني مريض ولهسه يعاني ورافض فكرة طلاقنا اني واني وهيه همين خايفين عليه ينتكس ..

هزيت راسي وبداخلي ممرتاحة ماجنت اعرف شنو يقصد وشنو الي راح اواجهه عندهم

هو كلي علاقتي شبه منتهية بيها وزواجنا منتهي مجرد على ورق وهالشي الي خلاني اوافق عليه معقولة يجذب عليه!

وصلنا لروسيا مارحنا لشقتهم رأسا ، اخذني لفندق بقينا بي كم يوم .. ارتاحينا وبعدها اخذني لأماكن سياحية غاية بالرووعة

الساحة الحمراء بموسكو فد شي من الخيال ، المباني الي بيها رائعة الجمال والابداع ، مساحات الورد الشاسعة الي بيها تجننن افترينا بيها هواي تونست جانت مليانة سياح من كل انحاء العالم ..

وبعدها اخذني لموسكو ستي ناطحات السحاب الشاهقة الارتفاع ولنهر موسكو ، صعدنا بالقارب تونست حيل وياه ومادري هالونسة راح تطلع من خشمي

جانت الايام الي بعدها الجو شوية مزعج عواصف ومطر غزير .. والجو بي برودة

وبعدها اخذني لشقتهم وجانت مرته باستقبالنا اول مافتنه حضنته وباسته على حلكه هو تجاوب وياهه الحقير ، اني انصعقت كلي بروودة احس باوردتي جمدتها ووجعتني

سلمت عليها تحجي عربي مكسر وبعدها حضن ابنه يبوس بي وشاله يفتر بي بكل الشقة ونظرات نيفرا القووية تحيط بيه مكدرت اخلي عيني بعينها خجلت من نفسي احس نفسي خاينة

هيه اخذتني من ايدي تحجي كلمة عربي وعشرة روسي وودتني على غرفة فوتتني بيها عرفت هاي غرفتي

جانت مفروشة سرير ابو النفر بس مرتبة وحلوة رحت كعدت على السرير واني مقهورة ، اني شون حعيش نكرة هنا شون رح اتحمل ..

بقيت كاعدة ويجيني صوتهم يحجون ويسولفون ويضحكون بصووت عالي بس اني حيل مقهورة ....

ورة دقايق اجه وبيده ابنه كال معرفتج عليه هذا حمودي .. حمودي هاي موت ..

جان حمودي وجهه بي شحوب وشعر خفيف براسه يمكن بسبب العلاج ..

حضنته وبوسته وهو يحجي وياي هم عربي مكسر .. وكلما يحجي كلمة روسي شرار ميخلي ويعدلهه اله ..

بعدها نزل من حضن ابوه وطلع برا الغرفة واني باوعت لشرار وحاجيته بغصة: هاي غرفتي موو ؟

رد .. اي حبي شونها عجبتج مووو؟ ..

هزيت راسي .. ودنكت اعصر بأصابعي جنت اريد منه يطمني انو هالوضع مؤقت بس هو ما كال

كال شبيج اشوو طنكرتي ؟

درت وجهي عنه ماكووو شي ..

حضني وظل يبووس بيه ، دفعته وصكيت اسناني وخررر شرار شجااك الباب مفتووح لتجي

كال شبيج ترة عادي هنا عدهم البوس كولش عادي ..

رفعت تك حاجبي تريد تقنعني انو مرتك متعرف بعاداتنا وتقااليدنا وانته معرفني عليها على انو اني بنت عمك !!!

كال اي عادي اكوللها ميانة وابوسج كدامها ..

اي وتبوسها كدامي مووو ؟ لعد لاتحجي اذا شفت احد يبوسني ..

خزرني برفض وقسوة وكال ولج موووت شنووو هالحجي ؟ بعدج مصارلج كم يوم هنا استهترتي ...

درت وجهي عنه .. شحجاني هسه بس مدري شصار بيه لمن شفته يبوسها ليش جذب عليه الحقير ممبين زواجهم منتهي ابد

خلاني وطلع برة الغرفة ، كمت سديت الباب ونزعت حذائي وتمددت بملابسي وغفيت ..

أنين ...

بعد عشرة ايام من زواجنا جنه راجعين من بيت حسين اخوه لعمر ، عزمونا على الغده ، تغدينا ورجعنا للعمارة

واحنه بطريقنا للشقة انصعقت واني اشوف إحسان كدامي ..

عبالي حلم دااحلم موو حقيقة .. اجت عيني بعينه
ماعرف شنو النظرة الي انرسمت على عيونه ...

حب متأخر ندم .. تذكرت رسالته الي بس بيها اسمي زين هو شجابه هنا شيسوي!!

حسيت قلبي يوكع على بايات الدرج ودسته برجليه ..

تقرب باتجاهنا سلم على عمر وبعدها باوع عليه ، دنكت واسمعه يكول بصوت اني حسيت بغصته
شونج انين شوون صحتج مبرووك ..

بلعت ريك وجاوبته تسلم خويه الله يبارك بيك ..

بعدها هو راح واحنه دخلنا للشقة سلمنا على عمو وعمة .. جانوا جايين قبلنا احنه اجينه متأخرين شوية

ظليت احوص اريد اعرف حسان شعنده جاي هنا فووك بشقتنا

عمر غير ملابسه وراح تمدد على السرير واني وكفت على الميز امسح المكياج باوعت لجنطتي ، مديت ايدي وطلعت الموبايل دا اتصل على فرح اسألها او اردلهه مسج

اجاني صوت عمر سؤاله خلاني اترك التليفون وانتبه عليه .
كال هذا اكبر منج بهواي تكوليله خويه مفروض تكوليله عمو وضحك

اني بقيت صافنة عليه هو ديشاقة بس اني قندبت بوجهه ...

كال بعد ما عبس ملامحه شبييج ؟

درت وجهي كتله هو اني وين اشوفه حتى اكوله عمو لو خويه هيه بالسنة حسنة

كال شكو شبيج طنكرتي لازم الموضوع مسج هواي

بلعت ريك وتصنعت الضحك لا مو هيج بس استغربت كلامك ..

كال اشوو تعالي يمي .. عفت الكلينس مال ازالة المكياج من ايدي ورحت يمه

قربني اله كال اشو انت ماتغارين عليه! طيبة اخت تغريد شكد ميانة اني وياهه وانتي ولا شفت نظرة غيرة بعيونج معقولة متحبيني !! ولا تغارين عليه

جاوبته بضحكة اضيع ارتباكي .. هاا لا بس الي ثقة بيك اني

كال ولج الثقة غير والغيرة غيير يا فهيمة ترى الكل يغار على ممتلكاته وانتي هالشي معدوم عندج

ظليت اشاقي واضحك ويا احاول اغير الموضوع لان هو هواي يلح

حضني وقربني اله .. وديبوس بيه .. اني بلا وعي مني واني بحضنه همست يم اذنه عمر بعد ماتخلص مني ممكن اروح لفرح

هو بسرعة دفعني وكام من السرير .. ادري انتي شنوو لخاطر الله شنوو هالبروود هذا الي عندج لعابة انتي

كتله شبيك عمر ليش عصبت مني ؟ اذا ماتقبل اروح عادي ماروح

خله ايده على راسه وجبينه يفرك بي ..
كال اني ووين وانتي وين لخاطر الله وطلع من الغرفة ..

فرح ..

اجه احمد ووياه حسان كال يريد يشوف جهال اخوه وكعد يمهم بالصالة ، احنه مابيننا لا سلام ولا كلام بس لبست شالي وكعدت بالصالة اشوفه شون يتعامل ويه الجهال

جنت هستوة مسوية كيك ومخليه لدانيال بصحن بالمطبخ هو راح جابه وانطاه لعمه وهو حسان بسرعة اكله كال خوش كيك طيب ..

دانيال كله ماما سوته ..

هو ظل يبلعم كال خرررب بس لا مخليتلي سم بي ..

هزيت ايدي كتله والله مادري بيك راح تجي جان ماقصرت وياك

كال جذب هو انتي مال تسوين هيج كيك هذا جاهز من السووك

كتله لا والله اني اسوي واسوي احلى بعد اصلا اني فتحت مشروع والكل يحب الكيك مالتي ويشتري منه صرت معروفة بالمنطقة وبالعمارة

كال اي والله بخت نجح مشروعج هو ينطي حظ للي لسانه نص مترة واني فتحت مشروع اتاجر مخدرات وسلاح وفشلت للاسف

احمد كال ... الي بي زود يطلع نقش وبالعافية ع الشاطر واختي شاطرة وبعدين ترى مشروعها بالحلال ....مو نفس مشاريعك ..

كال يجي ابالي الحجي واللعن الشيطان ....شبيك ابو شهاب ترى اني تبت تبت من زمااان ...

رديت عليه .. مدام تبت والتوبة لله تزوج وفكنه منك ..
الي بكدك تزوجوا ..

كال لاء انت غلطانة اني ترقيت من رتبة الي بكدك تزوجوا الى رتبة الي بكدك صار عدهم جهال ..

خليت الكف على الكف الثاني وكتله ان شاءالله يوم الترقية الجبيرة ويكولولك اللي بكدك ابنهم بطولهم ..

خوش تسوين واهس انتي وكام على حيلة هو اني كلما اريد اتزوج انتي تخربينها عليه وترديني اتزوج دروحي بابا لعبي بعيد عني ..

لا والله تزوج بعد مالي علاقة بيك اني واذا تريد اني اخطبلك خوش صديقات صار عندي بس توب عن سوالفك المكسرة ..

كال والله ماكدر الي تريد تاخذني تتحملني لان اني
كل ماتوب الشيطان ينزل تحديث جديد ويغريني ...

اني واحمد ضحكنا كناله الله يهديك ..

هو بوس الجهال وظل يوصي دانيال على اخته وطلع ..

انين بعدها خابرتني تسأل وكل شويه وكالت اي شنوو الاخبار منو اجه منو راح منو طلب كيك .. شكيت بالموضوع وخفت لا ملتقية بي او شي رأسا خابرتها
وكالت شافته على الدرج وحجيت الها ليش جاي ..

موج ...

سجلت بالكلية وداومت اول كورس جان دراسة اللغة الروسية لان الدراسة بلغتهم

جنت انطوائية ومنعزلة وشرار يحذرني من الاختلاط واني اخذت بكلامه ..

جان ويايه طلاب من كل انحاء العالم طبعا .. وعراقيين كومة تعرفت على كم بنية ..

واكو ولد جان عيونه خضر وابيض حيل وحتى شعره بي شكار ...

توقعته روسي اني ... بس ممحاجيته

جان يباوع عليه من بعيد وتحديدا على الكلادة الي اني لابستها خارطة العراق المدالية مالتها ..

بيوم جنت كاعدة وحدي ، شفته اقترب مني واجه يمشي باتجاهي وجر الكرسي وكعد بكل جرأة
وكال وااو عراقية ..

استغربت تصرفه وجرأته ، عدلت الكتب مالتي
وكتله شون عرفت !

رد من الكلادة اكيد ...

كال ممكن اكعد ؟

جاوبته انته كعدت بعد ..

كعد ظل يحجيلي عن نفسه مواليده تسعين يعني اني اكبر منه بسنة وهو يدرس هنانه هماتين ماجستير هندسة ..

وكال انو ابوه عضو مجلس محافظة ... اني من كال هيج انقرفت منه وتذكرت اوس .. ابتسمت وكتله من رخصتك ..

كمت هو اجه يمي وكال اي شي تحتاجي كولي اني موجود واساعدج .. وانطاني الكارت مالته

ومااشوف اله شرار اخذ الكارت منه وجعصه
كله بعصبية مشكور مراح تحتاج منك شي اني موجود ..

سأله زياد باستهزاء : ومنوو انته ؟

جاوبه شرار صاك اسنانه .. زوجها ..

هو كال هاا اسف فرصة سعيدة وراح ..

حسيت ايدي راح تنكسر بين اصابعه ..

كتله شرار شبيييك تخبلت ...

خزرني منووو هذاا ولج مووت ؟

خزرته اترك ايدي ترة دتوجعني

جاوبيني ولج سألتج ..

مااعرفه اجه وكعد

واني شكايلج حلقتج وين ادبسز ؟

تنفست سريع .. كتله ليش انته معترف بيه هنا حتى اعترف بحلقتك اني!!

واني شنوو كايلج هاا مو كتلج لتختلطين باحد بنات ولد لتختلطين اي شي تحتاجيه اني موجود ليش متاخذين حجي

ممختلطة هو اجه وكعد ويمكن شافني على طول وحدي حب يساعدني خاف احتاج شي

صك اسنانه يعني مراقبج ؟؟ ارووح اهفه بالقندره اطير شواربه هسه

عزااا شرار شجاك شهالخبال ترى مصار شي الولد مؤدب حيل وابد ماتجاوز

اي بعد صبغي بي صبغي وبعدين هو ليش ديساعدج شمعهى انتي ديساعدج ..

اي عادي احنه العراقيين بالغربة نتساعد شكو بيها ...

ومنين عرف انتي عراقية اذا محاجية وياومن قبل ..

عرفني من الكلادة يكول ..

مد ايده للكلادة وكطعها .. شهكت اني وهو خلاهه بجيبه ...

وكال ... امشي للشقة يله وسحبني من ايدي سحبت ايدي مرة لخ .. كتله بعد ممخلصة ممحاضراتي شبيك

امشي اخلصلجياهن بالبيت .....

ياابيت هذا منيلينا بيت احنه هيه خلك شقة مرتك ..

جانت عيونه بكصته من العصبية ومصر ياخذني واحنه بعدنا بداية الدوام بس هو مخبل مخبببل لمن شافه ينطيني الرقم متوقعته هيج ابد .. بس حيل بي يستاهل خلي يحس بيه وبغيرتي عليه من مرته ..

ومن رجعنا للبيت .... بطريقنا بالسيارة هو جان متخبل وبس يصيح ويعيط ويلغط واني مااسكت اله لان جنت مقهووورة منه ..

بعدها اجاه اتصال يخص هدى .. متنا قهر عليها هالبنية هم يتيمة مثلنا وحالتها تقهر ..

وامتدت الها ايادي الغدر وطعنتها امام انظار عيون بنتها الطفلة البريئة ..

لهيب...

واكف بحديقة المستشفئ علئ صوت اذان الفجر القمر انسحب من السما حتئ تحل محله الشمس...

بروح متعذبه ورعشه بكل جسمي علئ حبوبتي الضايعه مني حسدت هل قمر ياريتني مثلك اغيب واختفي وما اكون شفت الشفته بهدئ...

الكل موجود وياي والكل محاوطني بس اني روحي طااايره طايره من بين ضلووعي مرتي مدججيها بسجين ومخلين دمها بطولها...

اغمض عيوني يجيني طيفها اتخيل من هجمو عليها شصار بحاله ركضت وكعت استنجدت بيه شنو السوته هدئ شنو العانته مريتي...

شنو ذنبها ليش هيج سوو بيها واصلا منو الي سوه بيها هيج والله احس راسي راح ينفجر

اني شسويت بدنيتي ليش درب السعاده معاندني تزوجت هدئ وعذبتها وانجبرت عليها وجنت ما طايق روحي

من حبيتها وتعلقت بيها هيج القدر يعاندني وياخذها مني

كل الي اجه يحاول يواسيني يحاول يطيب خاطري يبين الي ان هذا قدر ومكتوب بس اني مجاي استوعب ابد مجاي استوعب...

ارد اصرخ بصوتي الحزين عليها ام ديمه ما شافت يوم حلو ما لحكت اعوضها...

غمضت عيوني ومر عليه طيفها من واكعه بباب الغرفه والدم مغطيها وعيونها مفتوحه ..

ركضت عليها حضنتها وتببلت بدمها صرخت واني حاضنها ...هددددددئ هددددئ حبيبتي هدئ اكعدي الخاطر بنتج...

ضليت محتار شنو اسوووي رجليه جمدت اريد اتحرك ما اكدر

هي وجههه انكلب لووونه ضليت اضغط علئ صدرها حسيت بيها طلعت منها جيوش من الشهكات...

طلعت برا اركض شغلت السياره شافني جيرانه كال بخوف...ابو ديمه خيرك شو مو علئ بعضك

رديت عليه بصرااخ...مرتي مرتي لكيتها مكتوله مرتي ضاربيها بسجين

العالم التمت واجت مره اخذت ديمه هي جيرانه اعرفها كلتلها دير بالها عليها...

ولفيت هدئ بالشرشف وركضت بيها للمستشفئ وخطيه الجيران ما قصروا واحد منهم هو ساق السياره اما هدئجانت بحضني واني افرك باديها ونزعت قميصي ضليت بس بفانيلة التعلاكه البيضه وشديت جرحها بقميصي...

افرك باديها واحجي وياها وهي فاقده ولا حياة لمن تنادي..

اخذوها مني بالطوارئ اجه الضابط يحجي ويايه ويريد يستفسر عن القتل اني مو بحاله وهو بطران يستجوبني تعاركت وياه وهو ضل يصيح

وهمزين اجه مهيب وضل هو يحجي وياه وانطاه الباج مالته...

الدكتور من طلع كال الجرح عميق والسجين ملوثه ودخلت البنيه بغيبوبه واحتمال وحده من كليات متضرره ...

اني احساسي غيير احساسي مذبووح حتئ اليحجي وياي ما اعرف شنو يحجي عقلي وروحي وقلبي وجوارحي كلها ويه هدئ...

اجه ابوي وعمي حسان بس شرار جان مسافر بهذا الوقت .. الحادث صار ورى اربعين حبوبتي بايام

وضلوا يحجون ويه الدكتور ابوي طمني كال ان شاء الله ما بيها شئ بويه كول يالله ان شاء الله مريتك تصحئ وتصير سوالف...

تنهدت وهزيت راسي بقبول...

ضليت كل شويه اروح اشوفها وهي حالتها يرثئ الها الوارات علئ صدرها وجهاز التنفس والمغذي وبطل الدم وحالتها حاله...

ما تحملت اشوفها هييج طلعت بسرعه والغصه بداخلي جنت امشي سريع من بين الممر المؤدي الغرفة هدئ

سمعت الدكاتره يحجون وهم بباب الممر يكوله..المريضه هدئ داخله بغيبوبه ويمكن تكون ميته سريريا...

انصدمت وانلجمت كل حواسي حسيت بروحي رحت بغير عالم ما شفت شئ كدامي...

يتبع ..

يا جماعة الخير النشر بين يوم ويوم الساعة ((١٢ )) وملتزززززززززززززززززززززززززززززمة بهالموعد هذا ليش هالتجاوز ؟

باقي بارتين للنهاية استعدوا