رواية هذيانٌ بين جمرٍ وجليد ..(ارملة اخي المجنونة) الفصل الأربعون 40 - بقلم نورا ناصر

السلام عليكم
هذيان بين جمر وجليد
الفصل سبعة وثلاثين
نورا ناصر ..

آخر كلماتي
أعترف
نعم أحببتك
نعم عشقتك
وتخيلتك حاضري المزهر
حل الخريف باوراقه الصفراء
والبرد القارص
وانفاسي كاتمه
لقد كان خريفًا مؤقت
احسست فيه بعمري الضائع
وشبابي التائه
وحبي المغمور
وألملم جراحي وامشي
أبعث عن نعيم الحياه
جراحي بقيت شعارًا وعنوانًا لكل قصه عاشق
لكل حزنًا قديم تاه عن ألانظار
طفله ضاله أنا بدونك
بدون مأوى يضم جراحي على أحزانك
فأين السبيل إلى طريقك
وانا بدون تأشيره
تمنحني الدخول إلى سجنك.
بقلم Wyaam1990

****

جريت العلاكة منها بقوووة ، وفتحتها وانصدمت اشوف البشت مالته بيها ...

باوعتلها بحقد وسألتها بعصبية
_ هذا البشت مالته شيسوي يمج ها شنووو احجي ؟

رجعت جرتها من عندي وخلته ابطن العلاكة

كالت حجي وياج ماعندي يكعد علي بالسلامة وهو يحجيلج اني مامصرح الي احجيلج شي مفهووم وهسه يله ابتعدي عني انطيهم للحجية اني موو الج
اني مااعترف بووحدة مثلج .

فتحت عيوني مصدوومة تحجي عبالك عن شخص يخصها هي معبالك الي كدامها مرته .

كتلها انتي منوو حاسبة نفسج وللج اني مرته دتفهمين
ظليت اجر بالعلاكة وهيه تجر .

جتي بلقيس يمي وموج وريلام ودانيال خابص البيت بالبجي مالته يريدني .

حسيت بقبضة بلقيس وهيه تضربني على عكسي
وتنتر بيه وصاكة سنونها
_ لا تفضحينه كل البلاوي من وراج الله لا ينطيج ان شاءالله ..

موج كالتلها وهي شعليها صدك تحجين انتي ..

ردت بلقيس اخذيها وروحي منانه لاتفضحنا اختج مايفيد وياها غير الحبس ..

ردت موج وكوة مسيطرة على اعصابها
_ بس على كيفج راح اخذها

وظلت تجر بيه موج وتصعدني الدرج واني اباوع لختام اخذتها بلقيس وفوتتها لغرفة الحجية .

صعدتني الغرفتي سحل ، اول مافتت دفعتي الاغراض الي على الميز وكعتهم من الجهة الثانية .

لزمتني مووج واخذتني للسرير كعدتني واني بس ابجي
ودخلت ورانا ريلام وبيدها دانيال وكفت يم الباب .

باوعت لموج واحاجيها وجسمي كله يرجف كله ..
ولج موج اغراضه وياها خاف متزوجها عليه بالسر نفس سالفة حمدان نفسهاااا راح تتكرر ويه علي ....

بس كليلي اني مااعيش مرتاحة مااعيش ليش هيج يصير بيه ليش كلهم يخونوني ليش يتزوحوني اذا مايحبووني ويدورون غيرري ليش شناقصني ليششش ؟

لزمت وجهي بأثنين اديها وتهدي بيه
بس اهدي الله يخليج انتبهي لأبنج ديموت نفسه عفية فرررح لاتسووين بنفسح هيج ولاتوهوسين كلشي يتوضح بس ابعدي ظن السوء عنج وانت ترتاحين ..

ريلام كالت لا فرح خالو علي مو نفس خالو حمدان اني من فتحت عيني ع الدنيا واشوف ختام تطب وتطلع لبيتنا وشكد هو جان يساعدها بالدراسة وشغلها ويا لو يريد جان تزوجها من قبل .. ...

بانهيار رديت عليها : لعد شسوي العباية مالته وياها وجنطته شسووي هو جان بدبي عنده شغل معقولة سافرت ويا ؟ هو اجه من المطار الي راسا شوداهم عنده بس كليلي ؟؟

ظلت تباوعلي بس متعرف تجاوب اي شي ..
ودموعها على خدها ..

ودانيال فرغص روحه منها بسرعة ونزل واجه يمي لازم برجليه ويبجي
اخذته وشلته وحضنته حيل .

تمددت ومددته يمي ، ظل يلعب بكلادتي ويجر بيها
واني على دموعي مانشفت عيوني ملتهبة وافكار تاخذني لوين وترجعني يائسة مخذولة ...

هم طلع خاين هم خاني والا شيسوون ملابسه وجنطته ويه ختام شيسوون ؟؟

صح قلبي محروك ومتضرر ومتألمة بس ما اريده يموت ولايصير بي شي ، لمن اذن اذان المغرب كمت توضيت وصليت ادعي الله يصير زين ويرجع لعائلته .

جانت موج تخابر يمي وتحجي ويه احمد مافهمت منها شي لمن ختمت المكالمة سألتها على احمد
كالت يروح ويجي يا للمستشفى يا للقصر واكف وياهم خطية ..

سالته عن انين كالت اخذها من المدرسة وداهه لبيت عمو ابو سالم تبقى يمهم اليوم وكلساع تخابر وتبجي وضايجة وممتعودة وحدها تبات عندهم .

كعدت يمها كتلها روحي انتي اني ماعليه شي ابقى هنا عادي

انداريت عليه لاء مااخليج انتي موزينة وخايفة عليج اذا تعدت هاي الازمة ان شاءالله لازم ترحين دكتور يشوفج هواي تستفرغين خاف بيج شي وضعج مامطمني ..

تمتمت الله كريم بس يكوم علي بالسلامة ، موج ليش ملابسه عند ختام دااموت ..والحقيرة متقبل تكول ماقبل

يابه هم رجعنا لهاي السالفة ريحي نفسج ولاتفكرين اله بنفسج وادعي لزوجج وكل شي يتوضح بعدين .

يعني موج معقولة سافر وياها ؟ وعلى اي اساس يسافرون سوى ع اي اساس ؟ حتى لو شغل بس هماتين ميصير ، وليش يضم عليه هاا ليش ؟؟

لزمت اديه هاا فرح شكلنه يمعودة دكافي عيونج حتطلع من مكانهم والله

سحبت اديه من اديها وكمت ع حيلي
كتلها اروح اسأل الحجية هيه مو ودتهم الها اكيد كالت الها .

سحبتني اكعدي يمعوودة اكعدي وين رايحة ماشفتيهم شلون متعصبين ومحمليج مسؤؤلية شسووين رايحة .

عاندت وتجاهلتها ورحت طلعت من الغرفة
فتحت الباب وهيه اجتي ورايه تتوسل بيه
بعد ما اتحمل راح انفجر والله ...

داانزل شفت وحدة من البنات ع الدرج التفتت عليه
شفتها هيام ، جانت عيونها حمرة وتبجي ..

بس شافتني كالت كله منج والله مهيب اذا صار عليه شي انبت سجينه ابطنج والله ..

نزلت من البابه ولزمتها من طرف ملابسها
ولج منو الي خلى الرقم الغريب بتليفوني غيرج يالحية بس يكعد علي اله يطيح حظج لا عبالج تمر عليج من دوون عقاب .

ظلت موج تفارغ بيناتنا واحنه نتكامش ع الدرج وصعدت بلقيس وريلام وبنات عمها الي هنه نفسهن حمواتها اخوات رجلها وعمات البنات ، صعدن على صوتنا .

بلقيس فكتني من بنتها ونترت بوجهي بعصبية
صعدي لغرفتج وفكينه من شرج لا بارك الله بيج هو ينلام الشيخ لمن جان يحبسج انتي مايفيد وياج غير الحبس .

كتلها واني الزم بسياج الدرج ماعليج بيه اني اريد انزل للحجية احجي وياها

كالت وهيه تدفعني من زندي
وهي الحجية تشتهي تشوف وجهج كوة صارت زينة وبس تدعي عليج وكون تصيبج وحدة من دعاويها دعاوي ام محروك كلبها على ابنها امشي ولي يالله .

ظلت تدفع بيه وموج لزمتها من ليدها
ونترت بيها كالتلها لا تدفعين بيها اني راح اخذها

كالت بلقيس لموج الله يخلصنا منجن اثنينجن بلا كرامة اصلا الشيخ يريد يطلك اختج مستحيل يخليها بعد عمايلها وبلاويها بس هيه مدري شنو الي مبقيها هنانه

موج : هذا الحجي كولي كدام الشيخ اذا تكدرين

بلقيس : اي اكوله واكول لشرار يطلكج هم مانتشرف بيجن اثنينجن .

ردت موج واني هم ميشرفني رجال يمشي بشور اخته كوليله خلي يطلك وشنو يعني ..

ردت بلقيس بعصبية : يمه من الصلافة والعرامة ام الرجولة طاح حظج اي والله كل سوالفج نعرفها احنه بس سترنا عليج نكول مرة اخونا ومايهون علينا نشهر بيها بس بعد الي صخمته اختج لا والف لا مانسكت وطردتكم من القصر تصير بالنعل بس خلي يصير بالشيخ لو مهيب شي من وراجن لو بس خل يتأكد خبر الي سواهه بي وطلع بسببجن..

سكتت عنها موج وظلت تجر بيه وصعدتني الدرج اني الساني انعكد بس ارجف ولا اكدر احجي شي بعد ابد
دخلنا للغرفة موج مفرفحة تفرفح .

ظلت رايحة جايه بالغرفة
كالت اني مابقى هنا خلي نطلع منا اخابر احمد نروح ..

رديت خاف علي يزعل لمن يعرف اني تركته وهو بهذا الظرف ..

اجت حضنتني حيل وتعدل بشعري وتمتمت وتبجي
ان شاءالله يصير زين ان شاءالله ..

بقينا على هالحال ، مرة نص ساعة وسمعنا صوت بلقيس تصيح حيل ريلاااااام.....

وراها سمعنا صوت مواعين تتكسر يم الباب ..

راحت موج فتحتها شافت ريلام مكرفصة كبال الباب وتلم بالمواعين والاكل الي وكع يم الباب ..

واجت امها يمها سحبتها من ملابسها بقسووة
ورفعتها عن الكاع وهي تفح نفس الحية السامة
شيلي المواعين والاكل من الكاع وشمري بالزبالة والله اذا شفتج جبتي سم لهاي الغرفة اله اسممج تسمم .

ريلام باوعتلي واني كاعدة ع السرير بعيونها البريئة المدمعة ..

نزلت من السرير ورحت وكفت يم الباب ، جان الاكل واكع ع الكاع تشريب دجاج مسويته ثريد ، اكيد لان عدهم خطار هوايه البيت متروس...

اخترقت ريحة الاكل انفاسي واشتهيته حيييل
لزمت بطني حسيت اكو حياة داخلها ، بس اجه بوقت حيل صعب .....

اشتهيت الاكل لدرجة جان عندي استعداد اخذه من الكع واكله ...

جانت ريلام تلم الاكل والمواعين المكسورة ودموعها توكع وتبجي بصوت مسموع .

خلصت وكامت اخذت الصينية وراحت ..
موج سدت الباب واجت يمي
كالت جوعانة انتي موو ؟ راح اخابر احمد يجيب النه اكل من بره .

لزمت ايدها كتلها لا عندي كيك وبسكت هنانه ناكله هسه اكيد مشغول هو وياهم.. وبعدين هو منو اله نفس ياكل بهالزلك .

طلعت الاكل يمكن اكلت قطعة بسكت وحدة عمود العلاج لان احس راسي راح ينفجر وجسمي كله يرجف .

ظلينا على هذا الحال ، علي استمرت عمليته بالساعات اصابته بمكان خطر وهو راسه وحتى شضايا اخترقت كتفه وزنده .

ومهيب شضايا الرصاص مخترقة جدار الصدر والرئة اليسرى وهم سووله عملية ..

مكدرت اروحله للمستشفى رغم شكد لحيت على احمد وهم بقيت محبوسة بالغرفة طول اليوم واليوم الثاني لحد المغرب احنه باقيين بالغرفة اني وموج ..

فتحت الكنتور مالته طلعت الغترة مالته الي شمرها عليه بفاتحة حمدان ..

مرة كالي هاي بعد ما البسها بيها ريحتج خاف اللبسها وتروح ريحتها منج وانه ماريدها تروح ..

خليتها على وجهي جانت بيها مزيج ريحتي وريحته
شهكت وهمست بداخلي تحبني علي ؟ ياريت اعرف احساسك تجاهي ..

اخذتها ورحت ع السرير تمددت وبقيتها على قلبي .صفنت بالفراغ ودموعي ع خدي مشتاقتله حيل رغم كل شي صار هم يكعد مرة ثانية واسمع منه كلمة بوية حيل مفتقدتها.

دخلت علينا بلقيس وعصابتها .

استغربنا هي وهيام وبنات عمها وشايلين سجاجين مالة اللحم بيدهم .

اخذت دانيال من الكاع وحضنته وموج جتي يمي وظلينا نتراجف وخايفين عزااا حيكتلونا المايخافون من الله .

صرخت بوجهها مووج عزااا بلقيس شدتسوووين تخبلتي تردينا نطلع هسه نطلع بس موو هيج .

كالت ولج ولج حسان خابر وكال الشيخ وكف كلبه وديسووله انعاش كله منها اختج الكلبة عمت عليه الكراطة كراطة الزلم .

لطمت على وجهي وظليت اصرررخ يعني شنووو يعنييي شنووو علي مااات علي ماااات ؟

نزلت دانيال ع سرير وكعدت ع الكاع ادك والطم ..

دكعدت موج يمي تهدي بيه وبلقيس اشرت لهيام تاخذ دانيال واجت اخذته ..

كامت الها موج تريد تاخذه واني كاعدة عاجزة مااكدر اكوم مجلببة بطرف المفرش مال الجرباية وكل كوة ماعندي .

بس بلقيس وجهت السجينة عليها وباقي بنات عمها صارن حواجز بينها وبين هيام الي طلعت تركض من الغرفة ..

واني ظليت اصرررخ ابني لااا دانيال جيبي لاااا عليج الله رجعيييي

بلقيس وهيه توجه السجينة علينا
كالت طلعن الذهب يله ترحن

موج كالتلها وهيه تبجي والله الشيخ اذا موجود مستحيل يخليج تسوين هيج بفرح والله ميخليج

عاطت وصاحت طلعن الذهب يله طلعنه

موج ردت اخذي كلشي كدامج الغرفة احنه لا همنا ذهب ولا فلوس بس رجعيلها ابنها وخلينه نطلع ..

كالت ماااكو كلشي متاخذن تطلعن بطرك هدومجن والولد يبقى هنانه وماتطلعن منا اله لمن اطلع الذهب من عيونجن ..
واشرت للي وياهه وهنه انطلقن هجمن الغرفة هجم فتحن الكناتير والدواليب ..

واني كاعدة ع الكاع منهارة وموج لازمة بيه وتمسج على ظهري وتباوعلهن بذهووول واني ماهمني شي الخبر وكع على قلبي مثل الصاعقة كسرته وتناثرت اشلائه .

ظليت اتمتم ماصدك علي مات ماااصدك ...

همست يم اذني موج
لتخافين لتخافين تصير هسه ينعشون قلبه ويرجع فدوة فرح خلينا نطلع منا هسه نروح للمستشفى اله بس قوي نفسج خلي نطلع منانه وناخذ دانيال ويانه ..

ماانتبهت عليهن شوكت طلعن الذهب واخذته بلقيس بعلبة وخلته جوه ذراعها ..

وكالت لموج يله اخذي اختج العايقة الدايحة ام الشوارع وطلعي منانه وحتى بالعزا لا تلفووون ..

لزمت بملابس مووج بقووة واباوعلها وابجي
كتلها مووج دتكوول عزااا هاي متأكدة

سحبتني بسرعة لفت راسي ولبستني عباية جانت واكعة ع الكاع لان كل ملابسي صفت ع الكاع ..

وطلعت من الغرفة وكفنا بالممر واصرخ على دانيال
واتوسل بيهن يجيبنه وبلقيس تدفع بيه وتطرد بينه اني وموج .

وظليت ادكدك ع غرفة البنات فتحت المسكة مالتها ماتفتح مقغول من جوة وصوت ابني جوة يبجي وصوت ريلام وهيام يتعاركن وتدفر بينأتهن .

اباوع لموج صرخت بوجهه بلقيس : طلعي الطفل طلعي ما الج حق بي مو تايهة الدنيا الج ولا احنا تايهين ترة حقنا نطلعه من عينج طلعي الطفل ..

ردت عليها مالجن يمنه شي لا طفل ولا غيره ما تتأمنن انتن اخذي الزبالة اختج وطلعي خلصوونه من مصايبجن .

سمعت صوت رجال من بين الهوسة يصيح
شنووو هالعياط شنوو هالصياح شبييجن شبيييجن ؟

باوعت شفته لهيب كمت ع حيلي دااروحله

راحت عليه بلقيس وكفت مقابيله ..
سألته هاا لهيب جيت يمه شفت شصار بابوك

رحت لزمته من ايدي اجر بي باوعلي
كتله بقهر لهيب لهيب صدوك ابووك ماات عفية كوول صدك .

مسح وجهه بتعب وكال بقهر وغصة
لاء منو كال هالحجي ؟

ردت بلقيس بقهر حسان خابرته كال دينعشون قلبه توقف ثواني ..

طلع تليفونه بسرعة كال بنبرة اسرع ومليانه خوف
كال هسه اخابرله واروح اشوفهم باي مستشفى .

حاجيته بتوسل لهيب كوللهم ينطووني ابني كووللهم الله يخليك اخذه واروح للمستشفى .

عاط وينه ابنها وووووينه وليش اخذتوا ؟

بلقيس ردت ختولي اني اخذته انته تدري شسوووت لو لا ؟؟

عاط ماادري ولا اريد ادري يله طلعنه وووينه

اشرتله على غرفة البنات ، راح باتجاهه وظل يضرب الباب اثنين ادي حيل وهو عبالك صار بطول الباب اجه يفلشه .

وظل يصيح منوووو هنااااا هيام افتحي الباب لا افوووت اشك حلكج هسه .....

اجاه صوتها من جووة ماافتحه ختوولي انعل ابوهاااااا

ظل يدفر بالباب برجليه وبلقيس تجرجر بي وهو يسحب ايده منها ..

الى ان انفتحت الباب وبينت ريلام بيدها دانيال يبجي بس شافني ظل ياشر عليه ...

اخذته واباوع لريلام جان وجهه مخرمش وشعرها منكش ومبتسمة ابتسامة الم وعيونها مدمعة .

باوعت لعمق عيونها ، اجاني احساس هالنظرة نظرة وداع .... اكثر من اي شي ثاني

احساس تملكني كُلي ، ينبئني انو بعد كل الي صار مراح ابقى بهذا القصر ولا راح ابقى ببغداد كلها .....

مو رغبة إنما إحساس.....

*****

سأفتقدك جدا ، حين يأتي الليل بلا صوتك وبلا طيفك وبلا دفئك وأبحث عنك في رداء القمر واغفو فوق صدر السماء ...
فيا انت لا تمنحني نصف احتواء..ونصف بقاء...او نصف فراق صدقني أنصاف الأشياء مميتة ....

****

هدى ....

خلصت مكالمة ويه لهيب انطيت التليفون لعمي
كال ها بويه شكالوا خو ما ظلوا يحجون عليج ؟؟

هزيت راسي ورديت بقهر وغصة
لا عموو

كال يابنتي انت شبيدج قابل مامتعمدة كليلي انه اعرف شون احجي وياهم .

خليت ايدي عايده عمو ماتقصر عمو ماتقصر الله يحفظك ويطول عمرك ..
وكملت بقلبي اني مصيبتي جبيرة ياعمو جبيرة حقك ماتدري ..

رحت وكفت يم باب الغرفة الي بيها بنتي ووكفت ابجي .. واباوع للاطباء وهم واكفين عليها ويتناقشون بيناتهم .

بعدها طلعوا وكفت الطبيب اتوسل بي يخليني اشوفها
قبل وكال فوتي يمها بس انتي .

فتت جوه وكفت يمها جانت تبجي بصوت كلش ناصي وجهه كله خراميش البزون والمعقم على وجهه حياتي شون تحملت برودته بهالبرد على جلدها الناعم ..

وايدها عليها اثار انيابه ...

عضيت شفتي مااكدر حتى الزمها شلون لو جان ماخذها وطالع بيها ، شلون لو مفكس عيونها او عض اذنها!!

مااتحمل هاي الافكار عذبتني مااتحمل هالعذاب ياربي ..

بقيت الليلة يمها كله واكفة على رجليه ولهناك فكرت بابويه وعلاوي بس لا ضربته على كتفه المتأذي خطية بس فقدت اعصابي بوقتها وماتحملت ..

وهو طفل مايعرف ينتبه او يسد الباب وراه ولا منتبه ع البزونة لمن دخلت للبيت هو اني ابطن البيت ما انتبهت .

اجت يمي مرة عمي وعمي راح للبيت
كال اي شي تحتاجوه خابروني اجيكم ...

لنص الليل الطفلة وجهه تغير صار قبيح حيل
رغم جانت تجنن تجننن صح صغيرة حيل وناعمة
بس حلوة .

البؤبؤ مال عينها كبر صار اسود طوخ ووجهه صار زراك على سمار ...

مرة عمي انتبهت كالت عزاا ولج هدووة هاي بتج شنوو صار بيها ولج فد نوب صارت تخرع البارحة اجيتج جانت تخبل مووو هيج .

باوعتلها بخوف فاتحة حلكي وارجف ...
كالت البزون الي اخذها شلون لونه خما اسود ؟

هزيت راسي وعيوني وكعت عشرة عشرة
واني اجاوبها يرجف لساني
اي اي عمه اسود ليش ؟

كالت ولج خاف هذا جن يمصخمة عزاااا ولج ماظنها تعيش هاي مواتة .

لا عمه الله يخليج لا تكولين هيج فدوة كليلي تعيش والله شفت الضيم والقهر والعذاب اني والله بيها تاليها بعد هالتعب تموت ؟ ابوهه شيسوي بيه .

كالت ها لا نروح لعلوية لسيد نسويلها حجاب ونحصنها وخلي عيالج يسوولها فده هم حالتهم زين خلي يذبحون طليان على سلامتها ويسيلون دم .

الله يخليج عمه هم بيا حال هسه واكللهم هيجي اني الدنيا مكلوبة عدهم صدك لو كالوا لو رادت تلتم على البني ادم تلتم وهم هسه خطية ملتمة عليهم سودة عليه ..

للصبح يله قبل الطبيب اشيلها بين اديه وارضعها
وبعده وضعها ممستقر ، وتبجي متألمة .
ونقلونه لغير غرفة ..

الظهر استغربت لمن صار لهيب كدامي هو وعمي ..

كمت ارجف .. واباوعله جانت عيونه تبث حقد وقسوة باوعتله برجاء ثواني وماتحملت دنكت ودموعي وكعت بحضني .

عمي ظل يحجي ويا
بويه البنية مو ذنبها اخوها طفل وفتح الباب وهيه جانت يم ابوها تعرف مريض وهيه تداريه .

سمعت صوته يوصل لأسماعي بغضب مكتوم وسبقته زفرة تدل على نفاذ صبر ..
ولا يهمك عمي مشكور تعبتك وياي اني ..

دخلت وراه عمة بلقيس استغربت!!!

وكفت على حيلي وحضنتها ظلت تلوم بيه ليش ضميتي عنه يا بنتي والله ماتوقعناهه منج انتي هداوي الفقيرة الحبابة الي نحبج هيج تخذلينه؟

..
دنكت وبعدت نظري منها كتلها والله عمه مو قصدي والله بس ماعرف شون صارت هيج مااعرف ....

مرة عمي حطت عبايتها على راسها سلمت على عمة بلقيس وكالت مدام انتي جيتي يمها انه اروح والله جهالي مدارس والبارحة هم كله مانمت الفرخة بس تصرخ .

عمة بلقيس تشكرت منها وطلعت هيه وعمي
رفعت راسي وباوعت شفت لهيب اجه باتجاهي ...

اباوعله بقهر اريده يعطف عليه بس هو نظراته باردة ومظلمة ...

صارت نبضات قلبي تألمني على كد الخوف الي تملكني ..

اجه وظل يباوع على بنته ، يعاين عليها بنظرات اعجز عن تفسيرها ، نظرات طويلة وباردة ، وهي بحضن عمه بلقيس وهو مثبت اديه على السرير ويتحسر .

عمه بلقيس ظلت تباوعلها وكالت خطية هاي شصاير بيها ...

هو باوعلي وصك سنونه وكال
امها غبية ومهملة والا وين اكو بزون هيج يسوي!!!

باوعتله وعيوني انفجرت بالدموع
تمتمت وعيوني بعيونه ..
_ لهيب أني ..

كال ااشششش تعاي وياي كوومي يله ..
سحبني من ايدي قووي وطلعني برا الغرفة ..

يتبع ..

اعتذر البارت قصير بس لان انفلونزا سطرتني سطر حتى ماعرفت شنو اكتب ..

ان شاءالله مستمرة انزل باجر همينه انزل اذا كدرت ..

وهاي زهور سوت سونار للعلاكة 😂
Zozaalnasery

الغلاف تصميم noora-1995

اسماء المتفاعلين ع فقرات القصة ..

rawan9090

LmyaYhyaa

Faty_2007

donia_17

BanenHaitham14

Baneen-Aljubouri

aomnea

__nosha_

--dnoo--

jooorm

MariamAl_Husseini

Marley__2005

وان شاءالله ما انسى احد بالبارتات الجايه ..
💚 احبكم كلكم ..