رواية هذيانٌ بين جمرٍ وجليد ..(ارملة اخي المجنونة) الفصل التاسع وثلاثون 39 - بقلم نورا ناصر

سلام عليكم
هذيان بين جمر وجليد
الفصل اربعة وثلاثين
نورا ناصر

احببتك بطفولتي وبجنوني وهذياني
واحببتني بكبريائك بدهائك وسيطرتك
جمعنا سقف من الحطام لا المودة
سقف يجتمع به حب سيطرة وهذيان
احببني بسيطرتك
وساحبك ب هذياني
ولنرى من الفائز يا شيخ هذياني
بقلم Senorita__25

هدى ...

أحس نفسي بأبار عميقة ومظلمة ، وحيدة غريبة
تايهة ، ووحوش داير مدايري تريد تنهشني وتاكل بلحمي .

ظليت ارفس برجليه وأصرخ ، الجدة لطمتني على حلكي واني بس احوس اريد اخلص نفسي منها .

كالت وسم حتى سم يسمج ولجن شبيها هاي المفلوكة
فضحتنا فضيحة تعالن لزمنها من رجليها خل اشوف شغلي .

اجن اثنينهن عبالك ريه وسكينة وحدة لزمتني من يميني واللخ من جهة اليسار .

مرة عمي تضرب على فخذي وتكرص بيه
تكولي لج فتحي بس فالحة صرتي جواه وحبلاج
افتحي خلي تشوفج يمصخمة .

غمضت عيوني بأسى ، ماتحمل الالم مااتحمله
يمه وينج لوو انتي يمي يصير بيه هيج ييمه ...
ليش متي مااخذتيني وياج لييش !

كمت وكعدت واني ارفسهن ، سديت رجليه ولزمت بطني .

واني اصيح وابجي وخرررن عني وخرررن عني ماريد اجيب ماريد بعدني مووو شهري .

كالت الجدة ولج بطنج نازلة نامي خل اجيبج نامي .

حسيت بضربة قوية على ظهري ..
وعياط مرة ابويه عليه ..
ولج نامي خل تجيبج ولج المن طلعتينه بنص الليل لعد المن .

نفضت نفسي منها كمت وكمية الالم بيه مينحمل ، جسمي مرة حار مرة بارد مرة ارجف مرة اعرك ، نعاس يداهم جفوني وتصيحني نوبة الالم .

لزمت بالحايط وكمت من الكاع كوة ورجعت وكعت من الالم الي بين رجليه ، الم فضيع اول مرة أحس بيه
ااااه لهيب ااااه ، ذنبك لو ذنبي!! اااه .

اريد اتوجه للباب واطلع احس اختنكت هنانه ...
الجدة راحت للباب وكفت عليه كالت ماتطلعين
اديجن على خمسة وعشرين الف .

سهام جاوبتها عزااا هو انتي شسويتي حتى ننطيج خمسة وعشرين حتى ماكملتي فحص .

ردت بعصبية وتزمخ : جا جايتلي بنص الليل تدكدكن ع البيبان كعدتوا العايلة كلها وتردن تطلعني ايد وره وايد جدام والله تحلمن جيبن الخمسة وعشرين لا اهد عليجن ابني هسه شرطي اخلي يذبجن بالحبس واكول عليجن حرامية .

مرة ابويه جاوبتها حرامية شسالفة ومنو يصدكج هاي الويانه بطنها لحلكها والكل يدري انت تجيبين نسوان .

مرة عمي كالت ولج سهيمة انطيها وفكينها خل نطلع .

سهام ردت ماجايبة وياي ولا فلس أحمر ..

رديت اني والله هسه ارجع للبيت ادزلج خمسين مو بس مية بس طلعوني منا الله يخليكم طلعوووني .

الجدة صفكت وغمتنا كلنا : طيح الله حظجن جايات البت اجيبها وماشايلات فلوس منو كاللكم فاتحين سبيل هنانه لو حاسبينه خدام لبيت الخلفوووكم .

مرة عمي : لا جدة لا هسه نطلع وندزلج فلوس خو انت تعرفيني هنا انه جبت بتي جيبتيها ذاك الشهر ونسوان اخواني كله عدج يجيبن .

كالت والله لو ما اعرفج ام رحمن جان ماخليتجن تطلعن منانه انتن وهاي العيارة هسه تجيبين بالطريق اصلا فرخج نازل .

لزمت بطني وكتلها ماجيب عندج مااااجيب
وخرت من الباب هيه وغمتني
طلعت كبلهن اسحل بالعباية والف الشال على راسي .

ظليت امشي وادردم على روحي استاهل حيل بيه كون اموت بالولادة اني جبتها لنفسي لو من الاول ومعترفة للهيب جان انذبحت من الاول ولا هالمرحلة الي وصلت الها .

اجن وراي سهام وام رحمن وسهام سخام ظلت تدردم
ولج وين نولي بيج بهالليل ليش ماخليتيها تجيبج ليش ووين اردج للبيت واذا فتحتي حلكج وكلت اخخ لو اووي والله اله الطج على حلكج واسكتج والله .

اني امشي والزم بالحياطين وابجي
واكللها ماعليج مني ماعليج كلشي ماريد منج كلشي ماريد .

طول الطريق يجيني الالم واكعد بالشارع وبين البيوت
اعض بطرف العباية واكتم صريخ الوجع .
ومن يروح الالم اكوم امشي بس وجع بين رجلية موتني .

اجاني الالم كعدت بالكاع وخليت ايدي على الارض اسند جسمي ، بس هالمرة الالم صار اقوووة بأضعاف مضاعفة .

وكفن يمي ام رحمن وسهام صخام وحدتهن تفر بيدها وتستهزء بيه ويكولن من ايدج ، اخخخ يمه وكعت بيد المارحم بيه .

بالله سهام ممخلفة وماتعرف شنو ألم الطلوكة بس ام رحمن شبيها تولتني عيارة اله ما عيارة وهي جايبة وتعرف شنو يعني هذا الالم .

ظلن يرزلن بيه اثنينهن واني الالم بيه وكاتمته كووة ماصرخ لان احنه بالشارع ، واني مدنكة واسمع يمهن صوت رجال .

رفعت راسي اشوفه شاب واكف يمهن ويتفسر
يكللهم شبيه هاي ؟

جاوبته ام رحمن : بنات اخر وكت عيارات وليدي عدهه ولادة وماتقبل تجيب ..

كاللهم وين تجيب بالشارع صدك جذب منجن انتن

سهام كالت لا عيوني وديناهه للجدة وهي تعايرت وماقبلت تجيبها وعدها ولادة .

باوعلي كال بس هاي صغيرة شكم طفل جايبة ؟ حتى تجيب عند الجدة ؟

ردت سهام : بجر دادة بجر اول طفل هذا .

كال انتي امها ؟

كالت لا عيني مرة ابوها بس والله مثل امها مداريتها من حبلت لهسه عيالها ذابينها علينا واني مداريتها مثل الماي بالصينية .

ابتسم باستهزاء ، والتفت على مرة عمي
كاللها وانت حجية امها ؟

كالت لا وليدي انه مرة عمها ...

كال والله لو وحدة منجن امها مو هذا حالها خطية ..

اني اباوع وانتظر الالم يجيني ...
هو كال ودوها للمستشفى خطية بعدها صغيرة مو مال تولد عند الجدة خاف الطفل تعبان لو هي تتعب ترة اني هم اشتغل معاون طبي بالمستشفى وهسه خلصت خفارتي وهاي جيتي وتوه دخلت السيارة وسمعت صوتكم يم الباب وطلعت .

سهام جاوبته والله احنه مانكدر نوديها اني عفت زلمتي بالبيت وبي خبيث وطفل صغير همينه وعمها مموجود بالنجف وشيوصلنه للشارع العام ناخذ تكسي علما توصل اله هيه جايبة كلنه الجدة اقرب وهي واصلة وديناهه .

كال انه هسه اطلع السيارة واوديها للمستشفى الاداوم بيها هم بيها قسم نسائية وتوليد ..

رغم الالم حسيت اجه الفرج والله بعثلي هللرجال الطيب ومن بين البيوت كلها كعدت يم بيته وسمعني ..ياربي الحمدلله والشكر ماتركتني

سهام كلتلع راح نكلفك توك جاي من دوامك وتعبان ...

جاوبها لا واحد هم يريد اجر وهم يسوي لأخرته ..

طب بسرعة وطلع سيارته ودخلنه بيها ، مرينه ع البيت نظلت سهام جابت الفلوس مالتي الي دزهم الي عمي الشيخ .

كعدت يمي كتلها لو باقية يم ابويه خطية ...

ردت مابي شي ابوج كلشي مابي وام رحمن مابيها عليج وحدج ضروري اثنين وياج هسه تجيبين ونرجع للبيت ..

ظل يروح ويجي بس يجي اقوة من القبله والمدة قليلة بين كل طلوكة والثانية ..

وصلنا للمستشفى ، واني ماعندي غير بس جنسيتي وهمزين محولة ومكتوب بيها متزوجة جان طولت الاجراءات ويمكن حتى مايستقبلوني اني مادري
بس ام رحمن ع طول الطريق تخوف بيه .

دخلنا لردهة الولادة واسمع النسوان يونن ويصرخن
واني رجعلي الالم وعلما وصلي السرة كعدت بالكاع وظليت اصرخ رااااح يطلع لحكوووني راااح يطلع مني ....

كالت الدكتورة دخلوها بسرعة ، دخلت امشي كوة واون وانحب ، اشرتلي صعدي على السرير .

كتلها دكتورة عفية ولديني الله يخليج لا تفحصيني نفس الجدة موتتني ...

كالت صعدي ماما صعدي خلي اشوفج ..

صعدت وشفتها لبست الجف واني عطت لااايربي ماريد فحص بعد ماااريد...

كالت ماافحصج كلش بس اشوفج ..
هدأت على كلامها
كالت هاي شمسووين بيج انتي واصلة روحي لصالة الولادة بس راح تجيبين هناااا ....

صاحت منو ويه هدى تعالي بسرعة ..

دخلت ام رحمن ..
الدكتورة كالتلها اخذيها لصالة الولادة راح تجيب
واذا وحدة وياكم خلي تجي افهمها على حالتها
واكتب تقرير تحتفظون بي ..

اخذتني ام رحمن واني احس راح يطلع الطفل مني ويوكع والالم بعد يروح ويرجع ويخطف انفاسي واحسه ياخذ روحي ويرجعها واحس غصة الموت وغرغرته ببلعومي .

اخذوني لصالة الولادة وتلكني السسترات وصعدت ع السدية ، جان الالم ياخذ روحي ويردهه اليه ..
الى ان حسيت شي ينسحب ، توقعتها روحي وهيه فعلا روحي ..

رفعت راسي حاجيتها بانفاس مخطوفة وصياح وصوت مخطوف خطف :هاااا جبت جببببت ؟

كالت اي اي جبتي بنيه جبتي وشوفتها اليه
رجعت راسي واني احمد الله وابجي بس اريد اسمع صوتها اشو ماتبجي ليش ياربي!!!

كالت ولا يهمج هسه اخليها تبجي ..
ومدري شسوتلها وخلتها تصرخ بس صوته ناصي كلش كووة يطلع ..

كالت هاي كلش صغيرة مابيها كيلو خطية اموتتها جوع ..

غمضت عيونييي شفت الويل والاه والمرض بحملها وماشكيت تحملت الام وعذاب ونزف بس الله جان يحمينا اني وياهه .

بعدها السستر نظفت رحمي ، بنجتني وخيطت الجرح
وهي كبالي اباوعلها تفتح وتغمض ومبوزة حلكها وتدور يمكن جوعانة سودة عليه .

اجت عاملة جابت ملابس وظلت تلبس الها ، استغربت منين هالملابس احنه جينه حتى ملابس ماجايبين ويانه!

داافكر والعاملة كالت بشنو الفها هسه ؟ جيبي حجابج خلي الفهه بي ليش ماجايبين وياكم الها حضينة وكماط!

مجاوبتها ومديت ايدي وسلتت الشال من على ركبتي وانطيته الها لفتها بي وحتى لفت راسها بطرفه .

نزلت من السرير وكعدت على كرسي متحرك
وبنتي عند العاملة ، طلعنا من صالة الولادة
تلكتني سهام وودوني للقاووش ، وتمددت على واحد من الأسرة وخلوا بنتي يمي ، وكالن رضعيها .

باوعت لسهام سألتها منين هالملابس ؟ نزلتوا اشتريتوا الها ملابس ؟

ظلت تفر بيدها كالت ولج هسه بالتلاثة الفجر
منين اكو محل مصخم وجه وكاعد ولج ظلينه نفر بأذانه اني وام رحمن ونفتر ع النسوان مثل المكادية نطلب هدوم لبتج وحدة جايبهةنفانيف اثنين انطتنا واحد وحدة غيرها انطتني حفاظة ودبرناهه .

باوعتلها انقهرت عليها سودة عليه بنيتي
ابوها بروسيا وجدها شيخ ، ابوها يلبس كله ماركات غالية وبنته نكدي ونلبسها .

سامحيني بنيتي كله مني سامحبنييي ، شميتها حييل وبست راسها ..

كتلها همزين صحتها زينه وكاملة رغم مو بشهري

كالت شهرج شهرج انت ماحاسبة عدل ثولة

وبلش هم اكبر من هم اخفاء حملي شلون راح اوصل خبر ولادتي وشون راح تكون ردة فعلهم ، الخوف يعصر قلبي عصر ، اكو اشياء مالازم نهرب منها ودائما لازم نواجه مخاوفنا حتى نتخطاها ونتجنب نوكع بالمشاكل .

بس اني ماجنت امتلك الشجاعة الكافية وخوفي طغى عليه غزاني واحتلني ، ولهيب قصر وياي هوايه .

طول هالفترة هو مايساأل عني ولا مرة فكر ابد جان يمكن كدرت اعترف اله بس هو قرر انو يبعد عني ويمكن ينساني ويعيش حياته .

وسط دوامة التفكير المعتمة الي فجأة لكيت نفسي ضايعة بيها بعد ولادتي ..
اجاني صوت مرة ابويه تسألني " شراح تسمينها"

باوعتلها مبتسمة ابتسامة مجروحة : ابوها يسميها .

فرح ...

كعدت على صوته واني على سرير المستشفى ، بعد اربع ايام من وفاة بابا .

جان يقرا قرأن يم راسي ، باوعتله بقهر وهيام .

انتبه عليه باوعلي ثواني ، همس صدق الله العلي العظيم نزع نظاراته الطبية ، وسد كتاب القرأن الي بيده وجان حجمه صغير ، باسه وخلاه على كصته وضمه بجيبه .

كال ها شون صرتي وشتحسين هسه ؟
ظليت اباوعله مفتقدة كلمة "بويه" صار هواي مكايلها الي واني فاقدة أب!! محتاجتها هسه اكثر من قبل لا بل بأمس الحاجة الها ليش حارمني منها .

وبعده يحاجيني بنبرة جافة ! معقولة كرهني ومل مني ! وبعد ميتحمل يعيش ويايه!

زين اني ليش هلكد مهتمة! اني مووو اريده يطلكني
درت وجهي بعد ماعجزت احصل منه نظرة .

كتله تعبت اريد اطلع منا ماريد ابقى ...

رد باختصار : صيري زينة وتطلعين ..
كام على حيله ، وعدل البشت مالته
كال هسه شويه وتجي اختج موج تبقى يمج ام رحاب وريلام رجعوا للبيت ..

يريد يبتعد من يمي لزمت ايده بتعب ، جانت دافية حييل غمرت ايدي بين اصابعه بس هو ماحركها ابد
بعده مصر يعاقبني حتى واني بهاي حالتي ابد مايتنازل .

اخترقتني اسهم من مشاعر ...
وماكدرت اردع تطفل الافكار الي ظلت تحوم حول احاسيسي المجروحة .. معقولة مل مني! او ديحسسني انو اني بلا قيمة عنده!

تذكرت كلامه انتِ نزلتي من عيني! شسوي ياربي وارجعه اليه! اني كرامتي وكبريائي مستحيل اتنازل عنهم مستحيل! بس شسوي ..

سحبت ايدي منه بعد ماشفت رد فعل منه ولا ابد
كتله بنبرة عناد اريد اطلع منانه حالا .

كال بهدوء وبرود : خلي يشوفج الطبيب يله وخلي تطلع نتيجة المفراس .

حاجيته ببرود وجفاء : ما ابقى اذا انته ماتطلعني اني اطلع لوحدي .

زفر بضيق وكال بلا عناد كتلج طلعة ماكو صحتج اهم صيري زينة فكري بابنج ع الاقل لا تفكرين بنفسج لا تصيرين انانيه مو لأن ضجتي تردين تطلعين .

يحجي وميباوعلي ، بهاللحظة وبعد ماخلص كلامه اني جنت دافكر ارد عليه بس ماكو رد سكتت
دخلت موج ، سودة عليه مكسورة لابسة اسود ولافه شال على راسها باهمال سلمت واجت يمي

هو رد عليها وكاللها ديري بالج عليها انه ماراح ابتعد بس اروح اشوف الدكتور واجي .

كالتله والعبرة خانكتها : ان شاءالله عمو بدون ماتوصي .

هو عدل عباته الرجالية وطلع وهي كعدت يمي
وظلينه نشكي ، هي ماقبلت تعبر عن ألمها كدامي
كالت حالتج ماتسمح توتر ...
جاوبتها خلص تعودت بعد شنو يريد يصير بيه الغالي وراح بعد شنو اريد اخسره .

كالت باستنكار وهي تخلي ايدها على ايدي
لا فرح لاتكولين هيج صح هو بابا ماكو اغلى من على قلوبنا بس بعد عندج ابنج زوجج وعندج احنه بابا هواي وصى نبقى سوا وايد وحدة وصى عليج هوايه .

غصيت بالعبرة حبيبي وصى عليه ....
خلت ايدها على وجهه ياربي اني مو وكته هالحجي انتي تعبانة ...

دخل علي والظاهر سمع كلامنا مبين من نظرات الاستهجان بعيونه ..

اجه يمنا باوعتله كال هسه يسوولج تحاليل ويشوفون الضغط والسكر ونطلعج ..

كلتله موج نطلعها ناخذها يمنه بين ماتطيب ؟

جاوبها لا بويه اخذها وياي تعرفين حالتها انتي نبعدها عن التوتر واجواء الحزن بهاي الفترة وان شاءالله الخميس من تسوون الثواب لروح المرحوم اجيبها الكم تكون صارت زينة .

همست ان شاءالله وباوعتلي ..

واني عيني عليه مفتوحة على اوسعها بس هو متجاهل نظراتي ، يهتم بيه ويخاف عليه ، لعد ليش هيجي يعاملني!!

بعدها طلعنه من المستشفى ، موج راحت للبيت واني رحت وياه ، طول الطريق بس ساكتين ، لا هو يبادر ولا اني ، وحتى اذا حجيت هم راح استقبل منه نفس الكلام المختصر والنبرة الابرد من الثلج ففضلت السكوت .

رجعنا للبيت ، فتحت الباب اني وهو دار ديساعدني انزل ، بس اني اشرتله بيدي بما معناه اكدر اعتمد على نفسي وماريد مساعدته .

بس هو مااهتم الي لزمني من عكسي ونزلني
على ما طبك باب السيارة اني رايحة قبله واحس بخطواته ورايه .

وصلت لباب البيت واني طول هالمسافة بين الكراج وباب الاستقبال احس بصداع ودوخة ، بس اتمنى مااوكع .

فتحت الباب وفتت جوه ، ورحت للصالة
شفت دانيال يلعب والحجية يمه ، من شافني اجاني
يركض يحجي ويدردم .

دنكت عليه ماكدر اشيله احس بضعف
كعدت على الكاع وحضنته وابوس بي .

الحجية كالت هلا فريحة هلا انه رحت للفاتحة ويه كرابتي بعد ابو مرة الشيخ هذا والشيخ هو تكفل بالفاتحة كلها وعشاير اجته ومن كل المحافظات
وكل اللزوم نحضر فاتحته
بس ماشفتج كالوا بالمستشفى المهم البقية بحياتج والله يجعلها اخر الاحزان .

رديت بقهر حياتج الباقية عمة
وبكَلبي كَلت همزين طلع منج حجي بي خير .

دخل هو وكال السلام عليكم الله يساعدح حجية
ردت هيه بترحيب : هلا بالشيخ هلا بعد بيتي الله يكويك ويساعدك .

دانيال تركني وراح اله ، هو اخذه وشاله وراح كعد يم الحجية ، وصاح ريلااام .

اجت ريلام نعم خالو ..
اشرلها عليه : اخذيها لغرفتها ترتاح وشوفيها شنو محتاجة .

اجت يمي كومتني ، خليت ايدي ع التخم ، حسيت بعيونه عليه ، باوعتله دار وجهه لازم ايد دانيال ويسولف ويه امه .

كلت لريلام مابيه شي اكدر اصعد لوحدي
وكملت بقلبي شبي مايريدني اكعد هنا ..
كتلها جيبي دانيال وياج مشتاقتله
راحت تريد تاخذه مقبل يريد يبقى عند عمه
ويكوللها بابا بابا ويختل بحضن علي الدر .

وعلي ظلي يبوس بي على راسه .
ولازم ايده ويلعبه .

صعدت لغرفتي اني وريلام بس اني معصبة ..
دخلت للغرفة شمرت العباية على السرير
كتلها مدري شبي خالج بعده مطنكر عليه .
عشتو بس لا بعده يريدني اعتذر لختام ....

ريلام كالت اول شي اعصابج يمعودة مو هيج تسوين بنفسج ، ثاني شي مااعتقد علمود هاي ابد بس فرح ترة انتي الوحيدة الي توكفين بوجهه وهو الكل يخاف ويتراجف منه .

وحتى ماما أحلام أُم مهيب مجانت هيج نفسج من لمن يدخل لحد مايطلع كله حاضر وصار وتأمرني وتدلل وهي اكبر منه ، صح جنت صغيرة بس ماما هم تحجيلنه .

رديت يعني شنو تردين اخاف منه اني ممسويه شي ابد حتى ارجف او اخاف .

لاء مو هيج فرح بس من باب الاحترام ...

الاحترام عمره ماجان هيج ..

فرح اني ماريد اضوجج وانتي ضايجة وتوج طالعة من المستشفى وابوج استوة ميت بس انتي لازم تعيدين حساباتج ويه خالو شويه ميصير تتمردين هاي اذا ردتي تعيشين حياة طبيعية .

نترت بيها يعني شنووو ترديني اشوفه يخوني واسكت!

خلت ايدها على حلكها لا عزااا خالو ميسويها والله .

كمت تخصرت وليش ميسويها بالله معصوم لو نبي لوو شنو هو بشر حاله حالنه .

ضحكت : فروحه احضر لج الحمام ؟ تسبحين حبيبتي ؟ مبينه تعبانة حيل اخذيلج دوش دافي وترتاحين .

نزعت الشال وحكيت راسي كتلها ترة مابيه شي والله
اني ادبر حالي لتعبين نفسج
وكرصتها من خدودها ورحت اخذت ملابس ودخلت للحمام .

سبحت وطلعت شفت صينية اكل رحت يمها
دمعت عيوني ، سودة عليه بابا اكل وانت جوه التراب
اخخخخ عمت عينه التراب الغطاك عمت عين الكبر عمة عينه .

رحت كعدت على السرير ، والخاولي على راسي
خليت اديه على وجهي وابجي ، بهاللحظة دخلت
ريلام ووياهه دانيال ، خلته ريلام بحضني واني
جنت ابجي ، ظليت اباوعله معبس ملامحه ومعصب
مايريدني ابجي .

نطق بلسانه المتكسر : أإبتين بفففف
(( لا تبجين تف عليج))

حضنته وزدت بالبجي وهو يضرب بيه مايريدني ابجي اخذته ريلام مني واني كملت الظهريه كلها بجي .
ودانيال رجع يمي لان ماسكت عند ريلام ، نومته يمي ونمت .

لليل اجت ريلام كالت خالو كالي انام يمج بالليل خاف تحتاجين شي .

بقيت اباوعلها ومقهورة لعد هو ليش مايجي يمي ليش يا اللهي ليش يسووي بيه هيج ليش متجاهلني
يربي أني مو مريضة مااخذت عمري وموتتني
مو اربعة وعشرين ساعة الجلطات تهددني بلكي
وحدة تخطف عمري وارتاح من هالدنيا العوجة .

لفيت راسي بالبطانية وظليت ابجي جواهه ريلام حست بيه بس سكتت خطية ، بس دانيال شيسكته
اجه يمي يجر بالبطانية ويبجي مايريدني اتغطى .

وخرت البطانية من وجهي واخذته بحضني ابوس
بخده وامسح دموعي ، ابتسمت بقهر
عندي انته وانقهر وابجي تروحلك فدوة
دموعي انته عندي تسوى الدنيا ومابيها ...

حضنته حييل حتى هو ضاج وظل يتفل عليه
خزرته عييييب عيييب ...
ظل يضحك كل شي مايفتهم ..
كله من مهيب علمه ع تفال من يضوجه يتفل عليه وهو اخذها سولة ومجاي ينساهه ولزك بيها للي يضوجه يتفل عليه .

مرت اسبوعين على وفاة بابا ، كل خميس أروح يم أهلي ، مهيب يوديني ونسوي ثواب اله ونوزعه واكعد يم اخواتي نتذكر سوالف بابا مكانه فارغ شكده حبيبي غرفته سوالفه صوته كلها هاي مشتاقيلها .

الاسبوع الثالث وعلي بعد مقاطعني ، مادري شبي وليش هيج يتصرف وياي ، بعده عقابه ماخلص ياربي
مااشوفه اله صدفة على الغدة او العشى .

مرات اكعد من الفجر حتى اشوفه وهم مايحصلي شكد ابقى انتظره ومن اسأل عليه يكلولي بالمضيف يبقى .

ظليت اشك بي يخوني او متزوج عليه او عنده علاقات ، دمرني الشك دمرني مو سهلة عليه ابد اني مطعونة سابقا وهسه بعد ماكدر ابعد ظنوني والشك عني .

سمعت بي بالمكتب مالته ، صبيت اله جاي واخذته اله
دااشوفه والله قلبي طاك عليه ومتحمل هوايه
ميصير كل هالجفاء ميصير ، يريد يعاقبني خلي يعاقبني بس هالطريقة تموت واحس دتقتلني وتذبلني من صدك تخليني أذبل .

وصلت لمكتبه سمعت صوته ديحجي بالتليفون
دكيت الباب لأول مرة بتاريخي وفتت ، شفته
كاعد ورة المكتب التليفون مخلي على اذنه
لابس دشداشة رصاصية ، التاف من شافني وباوعلي مستغرب .

ابتسمت ودنكت دااروح اوديله الجاي
بس من سمعته كال سهلة بويه سهلة انتي دزي الي والله كريم .

وكفت بمكاني واجيت اوكع الاستكان من ايدي ...
بس قويت حالي ، صكيت اسناني واباوعله
هو انتبه عليه وكفت ، حركت روحي ومشيت
رحت اله خليته يمه وهو نهى المكالمة ..
ب الله وياج بويه ..

باوعلي ساكت بس نظرته جانت متغيرة ..
ابتسمت كتله هاي ختام ؟

كال ليش هيه بس ختام ؟

يعني اكو غيرها؟؟

رد اي اكو غيرها محاميات يشتغلون بالشركة لا يروح بالج لبعيد ....

صكيت سنوني بقهر ، بعد نظراتي منه ثواني
الى ان سمعته كال شون صرتي ؟
باوعتله لا زينة احسن ... انت شوكت ترجع تنام بالغرفة؟

رجع ظهره على الكرسي وظل يحرك بي
كال اني باجر مسافر ان شاءالله .

و ووين ترووح ؟

رد باختصار عندي شغل ..

اشرب جايك لايبرد ..
وطلعت من يمه .

توقعته حيوكفني كول يسال عني يحجي وياي اكثر يهتملي لا ابد ، شكد ممرتاحة الهالمكالمة خاف دياخذ موعد منها وراح يسافر الها اي هو يكول اكو غير ختام بس شيقصد احسه يقصد شي والله .

موج ...

طول فترة العزا مالة بابا والبعده جان شرار يتصل وما اجاوبه رغم شكد جنت محتاجة اله بس كون بغير ظروف .

جنت محتارة بين استقبل الناس الي تعزينا وبين ادير بالي على خالة وبين انين الي تركت الاكل والشرب وسكنت غرفة بابا وبين احمد المنهار والي ضغطه مجاي ينزل رغم عمره الي ميتعدى ال ٢٥ سنة بعده .

راح بابا وبيتنه انطفى احسه اظلم معتم ، مابي ذيج الضحكة الحلوة ، السوالف الدافية الهادئة ، كلمة بابا موج انطيني كلاص مي ، بابا موج خالتج وين ، خابرتي اختج فرح تطمنتي عليها ، انين اجت من المدرسة قرت دروسها ، اخوج خو ما تأخر ، بنتي غيري لبسج هذا ميلوك الج ، شعرج بنتي لا تفتحي من تطلعين اخاف يحسدونه طوله حلو بابا ، تعاي بنتي شوفي تليفوني شبي .......وووو

كل هالتفاصيل اني مشتاقة الها وراح افقدها طول عمري جنت اخاف اتزوج بيوم وابتعد عنه وهسه الموت بعده عني كوة .

خالة وديناهه يم خالو لأن تتخبل تشوفنا نبجي
تضرب انين وتحتار شتسوي ..

دخلت للغرفة بعد يوم صعب وقاسي مر من دون
بابا ، تليفوني جان يرن ..
اخذته شفته شرار يتصل ، انتظرت المكالمة تنتهي
وفعلا انتهت وفتحت الفون جايتني رسالة منه
اعتبريني صديقج اريد اعزيج اواسيج اوكف وياج و ردي لاتصييرين غثيثة لهالدرجة .

تحسرت حسرة طلعت من كل قلبي ..
هه صديق اي والله صديق
خطيبي الي احبه وماأريده ، احتاجه بشدة وماكدر الجئ اله

احس بوخز بقلبي الموجوع والمتشبع بالالم
لازمة الفون بيدي ودمعتي على خدي .
عصرته حيل وابهامي ع شاشة بهاللحظة اتصل
وانفتح خط بالغلط .

فرح ...

يوم ثاني فعلا سافر بدون ما اشوفه ، هالشي خلى النيران تتغلغل بداخلي من العصبية ، دانيال يبجي ورايه يريدني اشيله ، فتحت تليفوني ع اليوتيوب
وانطيته اله ، كعدته بالصالة جانن البنات ريلام وهيام والحجية بس ام رحاب جانت بالمطبخ ..

رحت اغسل الملابس ، اغسل وافكر ياربي
شدعوة عليه هيج يسوي بيه
شسويت اني شسوويت حتى هيج يسوي!!
لهسه اتذكر المكالمة مالة البارحة ، مو بيدي أغار
موو بيدي واشك هماتين وبالي يروح لبعيد.

خلصت الملابس وطلعت من الحمام أغلي وافور
وماكو على بالي غيره هو ، الخاين العرندس .
فكرت اخابره ، رحت اريد اخذ التليفون من دانيال
طليت بالصالة من الدرج ماشفت احد بالصالة الكل مختفي .

صعدت فوك ، سمعت صوته بغرفة البنات ، طبيت للغرفة شفته يم ريلام يلعب ، باوعتله تليفوني مو عنده .

سألتها ع تليفوني ..
كالت مادري اني صعدت وبقى هو يم هيام وبيبي وبعدين دانزل شفته يم الدرج يبجي عليج وانت دتغسلين مواعين اخذته من الدرج للغرفتي بس ماشفت بيده تليفونج .

كتلها خلي يمج اروح اشوف تليفوني وين اخابر خالج
نزلت بسرعة ورحت للصالة ، شفت تليفوني ع التخم ومفتوح ع اليوتيوب ومشتغل مقطع فديو طويل كلش ساعة كاملة العاب اطفال .

اخذته وطلعت من اليوتيوب ، باوعت ع شاشته
اباوع لصورة علي ، صكيت سنوني بقهر
اخابره ؟ لا شنو المناسبة اصلا هو هسه يشتغل
وهو كايل الي من اشتغل لاتخابرين .

عضيت شفتي وبعدني افكر والفون بيدي
صوت بداخلي يكول متأكدة يشتغل! والمكالمة مالة أمس ويه الحلوة اكيد هو هسه يمها .
ياربي الشكوك راح تموتني ..

واني واكفة وجان يرن تليفوني وتفاجئت العرندس يتصل ...

بسرعة جاوبت الووو وجان يجيني صووت بنيه
انصعقت وتخبلللت خبال مو طبيعي .

يعني شكوكي بمحلها والله اله العب بيكم لعب
اله افضحه فضيحه اني يخوني لايربي لاتسويهه بيه مرة ثااانية لااااا .

كتلها انتي منووو ولج وشجابه تليفون زوجي يمج ؟

ردت هو انتي اليي منووو ؟؟ وليش تتصلين وتزعجينه هااا ؟

صرخت انتي منووو احجييي وشجابه تليفون علي يمج ؟

ردت علي حبيبي شتردين تسووين بالله ..

صرخت جذابة جذااابة ..

اذا ماتصدكين تعالي للشقة

يا شقة ادبسز ساقطة ياشششقة؟

الشقق الي يم ساحة كهرمانة ، عمارة *** شقة رقم *** وشوفي بعينج .

اني ماصدكت انطتني العنوان طرررت طير طييير ....

صعدت لبست صايتي وشالي لفيته عدل والافكار براسي مزدحمة هسه هو يمها وووو كومة شغلات اقتحمت مخيلتي .

نزلت جوة نسيت اطلعلي حذاء يادوب اخذت فلوس
لبست نعالي الاصفر ابو الكركوشة وطلعت من القصر .

ومشيت للشارع العام ويمكن قلبي دكاته الف صارت
بعد شويه وانفجر ، واصفك باديه ها علي كشفتك واخيرا انوب مخلي تليفونه بيدها واني حتى الباسوورد مالته ماعرفه اييه يفرحة حظ العواهر جواهر .

وصلت لساحة كهرمانة ووللعمارة الكالت عليها دورت ولكيت وصعدت ، وللشقة دكيت الباب ، صارن بوجهي بنات اثنين خمطني من ملابسي ودخلني جووة للشقة بسرعة .

وكعت ع الكاع وهنه قفلن باب الشقة ، ظليت صافنة وميتة خوووف ، وحدة منهن شالت التليفون وظلت تخابر والثانية اجتني لزمتني من اديه قووي اريد افك نفسي منها ماكوووو مدري شتاكل طابوك صخر .

ظليت ارفس واصيح علي علي تعاااال وييينك
من كل عقلي وبعدني عندي امل هو موجود هنا
ولا تحولت غايتي من فضحه الى محاولة انقاذي من الفخ الي وكعت بي .

سمعت ام تليفون تخابر وتكول يله خاله ام سح
وقطعت الاسم وكملت كولي لصاحبج الضابط خلي يدزلنه دورية ضبطنا حرامية ابيتنه .. !!!!!

يتبع ...

المنشور الفائز بمسابقة اجمل منشور zozo_zahra3

البارت اهداء للمتابعة نور الحسين لان توقعت توقع صحيح ...

احب اشكر 👈
My-love22

Ali______22

--shahuda--

لتفاعلهم على الفقرات ... وان شاءالله بكل بارت اسوي شكر لمجموعة متفاعلين تستاهلون 😍💚