رواية هذيانٌ بين جمرٍ وجليد ..(ارملة اخي المجنونة) الفصل الخامس وثلاثون 35 - بقلم نورا ناصر

السلام عليكم احبتي
اعتذر ع التأخير
صارلي ظرف وانقطعت عنكم

رواية هذيان بين جمر وجليد
الفصل ٢٨
نورا ناصر ...

ماذَنبي... إن كانت روحي كَحمامةً تَحلُم بالحرية
نقيةٌ كَبياضُها
ماذَنبي وجدتُ نَفسي... حَبيسةً في عرينُكَ
مُحاطٌ بِقُضبان من الذهبِ
وروحي أنا صدأت كأبواب بيتٌ ...مهجوراً
بتُ أنتَ الجاني وأنا المجني عليهِ
لنا وقفةُ حسابً وقصاصِ ...
ياتُرى اي الأعذارُ تُقدِمها ...لتداوي نُدباتي
و اي الكلمات تواسي روحي الممزقةِ ...
الى اشلاءَ مبعثرةً !!!
ماذَنبي إن كان حُلمي رسمتهُ بأبهى الألوانِ ... وروحي أفاقت على واقعٌ رمادي اللونِ
أردتُ الأمانَ مِنكَ وبَتَّ أنتَ المنفى لي ...!!
بقلم noora-1995

فرح ..

بسنوية حمدان الصبح ، كَعدنا على وقت وتحديدا قبل الفجر ، اني بعد زواجي من علي الدر ، كله يكَعدني بوقت أذان الفجر أصلي وياه ، بس اليوم كَعدنا قبلها بوقت ، كعدت وراسي صاير بكَد الكرة الارضية عبالك
على كَد مابجيت البارحة واني اتذكر هذا اليوم المشؤؤم من حياتي الي لهسه مانطوت صفحته وبعدني اعيش بعتمة ذكرياته .

بجيت وجانت صوت شهكاتي مسموعة ، علي ماتدخل ابد ولا حاول انو يسكتني ، يمكن جان يريدني ابجي واعبر عن حزني وهذا من حقي .

رغم كل الي جنيته وحصدته من زواجي السابق بس العشرة متهون وحمدان ابو ابني وعندي ويا ذكريات اكدر اكول عنها لابأس بيها .

بس خيانته وخذلانه خلف ثقب بقلبي لايمكن ينسد
وحتى بعلي اشك مو بيدي بس صار بيه مرض مال شك وحتى هو بدا يضوج من هالسالفة وكوة عليه
صابر عليه واحسه على ساعة ينفجر بس متحمل .

خلصت صلاة ورحت تمددت على الجرباية اتثاوب منعسة واباوعله هو بالكاع يقرا قرأن . خلص شال القرآن خلاه بمكانه وسجادته هم بمكانها .

راح وكف ع المراية تحسر وفرك وجهه
وتكلم وياي بدون مايباوع لي : راح ترجعين تنامين!

نزلت من السرير بهدوء ، ورحت يمه ، خليت ايدي على زنده ، التفت عليه ببطئ وصار يباوع لعيوني واحس عيونه ضامه شي وحجي هوايه .

باوعتله بتوسل وحجيت بغصة وصوت مبحوح
_ اليوم سنوية المرحوم ماراح تكلي منو قتله؟؟

غمض عيونه لحظة بأسف وبعدني عنه بلطف وهدوء
تحسر وكال حجينا بهذا الموضوع هواي فرح لا تظلين تلحين على هالموضوع ادعيله بالرحمة والمغفرة واقريله قرآن ترتاحين اكثر وانسي .

يريد يروح باتجاه الكنتور ، لزمته من ردان دشداشته وتمسكت بيها قوي ، دموعي صارت تجري على خدي .
حجيت واني ابجي : انته انته بس كلي حسان كتله وانته متستر عليه ماكول ولا سوي شي والله .

عكد حواجبه وظل يباوعلي بعصبية
_ شنو هالحجي فرح منين تجيبين هالكلام انتي ، ريحي عقلج شويه ولا ترحين زايد بالتفكير ، حسان ماكتل حمدان وخلص هذا الموضوع ماينفتح .

كتله بس هذا سكوتك مو مبرر ابد تعرف شي انته وساكت وماكو غير هالتفسير .......

خله اصبعه على شفته كال اشششش كافي لو تنامين لو تنزلين جوة تساعدينهم سوي ريوك للخطار وانسي هالسالفة لا تفتحينها لا اليوم ولا بعده .

رحت كعدت على السرير وضربت على افخاذي
وكتله شوون تريدني انسى واليوم سنويته ها شلوون انسى انته ليش ماتريح كلبي وتحجي قابل اني شراح اسوي اني ادري كلش زين انته تعرف كولشي بس ليش ساكت ومتحجي هيج اشك اني اشك بيك وهيج ثقتي راح تنعدم بيك.

ابتسم باستهزاء : هه ثقتج ؟
صيحت : اي اي ثقتي بيك ...
مخلاني اكمل واجه يمي ووجهلي الكلام بصوت مصرور وهو يشد على اسنانه: لا تصيحين صوووتج لا يعلى ولج البيت مترووس خطار شجاج من صباح الله جنيتي ؟ شبيييج ؟ مالكيتي اله هاليوم تفتحين بي هالموضوع؟

كمت وكفت وباحتجاج حاجيته : هليوم هو بس هليوم شكد توسلت بيك من قبل بس اليوم وصلت حدهه ومبين انته ناسي اني جنت مرته ولازم اعرف شلون مات .

كال بتعجرف وهو يلزمني من اكتافي : انتي مرتي هسه والماضي انسي ...

اي اي مرتك بس ابقى ام ابنه وبعدين انته ليش خايف هاا ليش ليش متحجي ليش علي ؟؟

اقترب مني اكثر وانعدمت الرحمة من عيونه
خلاني بنظراته ابتعد واكعد ع سرير مرة ثانية
واني اباوعله بذهول وخوف ..

كال ولج موو انه الي يخاف انه ماعرف الخوف وماموجودة هلكلمة بقاموسي مااخاف بس من ربج الي خلقج وخلقني وكافي لحيتي هواي انسي هالسالفة .

كمل : ابجي ادعي اقري قرآن بس لاتسألين هالسؤال لأن ماراح تلكيله اجابة عندي .

اذا مالكاه عندك الكاه عند غيرك واني مراح اسكت ها ترة ..

تجاهلني ولا كأنما يسمعني ..

كعدت ابجي وانحب بصوت مسموع ، وهو طلعله ملابس وظل يبدل ولايهمه اني ابجي ولا عبالك يسمعني .

جان واكف ع المراية ويعدل بكسرة الشماع مالته
واني اباوعله بكره وحقد كارهته كره مو طبيعي
احسه ولا مهتم لألمي .

يريد يطلع عطت هو بسرعة سد الباب حيل وبعده لازم القبضة عن لايطلع صوتي ..ووكف يباوعلي وهو بقمة غضبه ونظراته تكولي سكتت عنج هواي .

كتله انت اناني اناني حد العظم تريد كل شي تحتفظ بي لنفسك وانانيتك هيج حتخليني اكرهك .

كال مو وكته احاسبج هسه تخلص السنوية يروحون الخطار وتدللين لاحكة ع العقاب .

كتله لا عبالك اخاف والله ماخاف ...

كال لا راح تخافين اوعدج انه ، راح تخافين ..
وتشوفين وجه جديد لأن طول هاي الاشهر انه احاول اعديلج هواي امور واكول تتعدل وتصير ادمية وتتعلم من اخطاءها وبعد عندي امل اكدر اروضج .

لالا تحبسها امل خطية اطلق سراحها عرسها سويلها جارة وبس اني والله اشوفك تندمت لان تزوجتي!

ابتسم بسخرية : لا غلطانة ماتعرفيني عدل ، انه مااندم على شي اسوي وناوي عليه ابقى اكمله للاخير .

بتعجب سألته : انته شنوو تقصد ..
جاوب باختصار واضح قصدي .. .

كمت من السرير رحت لزمت صدره كمشت بالبشت مالته كتله يعني زواجك مني جان لأجل غاية ؟

وخر اديه منه ، باوعلي بغموض : كافي تهور انتي مو طفلة طول الاشهر الفاتت واكول تتعلمين بس كلما الج تتزعططين بالزايد تصرفاتج ماتعجبني وجارة ماتصيرلج انه اروضج بطريقتي احسن .

مو حيوانه اني وتروضني واذا متعجبك تصرفاتي طلكني .

كال شوفيلج غير دبرة ، الطلاق انسي غيري نفسج بنفسج .

فتح الباب ويريد يطلع سحبته من ملابسه
هو يباوع لأيدي متعصب واني احجي
تعال وين رايح ومخليني هنا افور ماتروح قبل مت

لزم ايدي وبعدهه عنه بقووة وسد الباب واجه يقترب مني خازرني : ولج شنو انه اصغر جهالج وتحجين وياي هيج ، تصرفي عدل وعرفي منو انه ؟

تركته وابتسمت بسخرية ومنو انته ؟

فتح عيونه بعدم رحمة ظل يشد على اسنانه وعيونه تلمع بشعاع الغضب
مد ايده وضربني على وجهي ، شهكت بنفس اللحظة وانهاريت ..

الالم مو على خدي لااا لاء الالم برووحي ..

عطت وصيحت انته هم نفس اخوووك اثنينكم خووونة اثنينكم جبناااااااااء وتضربون..........
....

مخلاني اكمل كلامي ، حوطني بحيث صار ظهري على صدره وايد على حلكي وايد على بطني احس يعصرني عصر بحيث ماكدر اتنفس.
....

ظليت احوس بس اتملص منه وبسبب حركاتي والفوضى الي سويتها كعد بيه ع الكاع وصرت بحضنه.
....

جان ساد حلكي ويهز بيه يريد اثبت ، كلما اتحرك وأميل يلزمني اكثر قوة ويثبتني .
....

ظل يهمس يم اذني بشدة ولج انتي شنو كلما تكبرين لو تتزعططين ؟؟ هااا شجاج من الصبح احترمي وتأدبي ليش تخليني اتصرف وياج غير تصرف وامد ايدي عليج وأذيج!
....

غمضت عيوني كرهت نفسي لمن دموعي وكعت على اديه الي سادة حلكي .... كرهت ضعفي كدامه لالا ماريد ابجي اريد ابقى اواجهه ليش اضعف.
....

كال بوعيد راح اهدج بس والله اذا سمعتلج حس! ماتلومين اله نفسج راح تكرهين اليوم الي انولدتي بي وتكرهين حتى روحج على هاي تصرفاتج والله لحبسج هنا وتحرم عليج الطلعة من الغرفة بعد وانت كيفج واختاري وخلي يكون ابالج انه مو حمدان.
....

تركني وكام ، عدل ملابسه وطلع واني بقيت على الارض ابجي وانحب ، احس انخذلت مرة ثانية
وعلي الدر جان الي حسبته سند مجرد سحابة
صيف .
....

ومن لم دخلت لهذا البيت والشطر الاخضر من حياتي
انشطب وانتهى وصرت مثل غصن يابس حياتي بلا الوان بس رمادية وخالية من شي اسمه فرح.
....

ماانتبهت على دانيال كاعد ويبجي ، جنت بدون وعي
مسحت دموعي بقووة بردان كلبيتي حتى احس خدي انجرح اكثر ، اخذته من سريره ، دانطي ممه ميقبل ياخذ حبيبي اخترع يمكن من العركة ، كوة رجعته على نومته .
....

طلعت لي ملابس سودة ، غسلت وجهي بمي بارد واتمنى اغسل وجعي الي بروحي ويا ، بس مينغسل كل ما إله ويزيد .
....

نزلت جوة جانت الساعة قريبة للستة
الشمس طالعة والخطار شي نايمين شي كاعدين .
دا افوت للمطبخ سمعت وحدة تكول : خطية حمدان راح من روحه ابنه يكبر هسه ومرته كبل لايصير سنة تزوجت وارتاحت .
....

دخلت شفتها مرة خالهم مرة يطلع عمرها بالخمسين لازمة استكان الجاي تشرب وتسولف ومكابلتها بلقيس
....

ظليت اباوع لها بعصبية وبلقيس عرفت بيها راح اعصب اجت يمي ولزمتني مني اديه
كالت بارتباك ها فرح كعدتي تعالي عندي حجي وياج .

ادري بيها تريد تبعدني من المطبخ حتى لا اعصب
بس اني مو مال اسكت اصلا اني اليوم كلش تعبانة .

كتلها بس لحظة ام رحاب...
واني اباوع ع المرية احجي ووجهت كلامي
لمرة خالها ...
خالة بلا زحمة شلون عرفتي اني مرتاحة ؟ شون عرفتي نسيت ؟

كالت بأسف : لا خالة حجاية التنكال واني مقهورة على حمدان ...

جرتني بلقيس بسرعة من المطبخ واني افور واغلي
دخلتني بالمخزن بصف المطبخ ..
كالتلي فرح على كيفج لا تتهورين يمعودة عيب حجت حجاية مو اله تردين سمعيها وسكتي هم يوم يومين ورايحين .

جانت تحجي ولازمه ايدي واني مااباوعلها بس اتنفس بصعوبة الله يصبرني على هاليوم هذا الي من اوله مصايب .

تركت ايدها وحجيت يعني شنو اتحمل واسكت ام رحاب اني ما اعرف اسكت .

فرح عيب لازم تسكتين مرة جبيرة وحجت حجاية

اي ابلعها واسكت مو ؟

واذا سكتي يرتفع مقامج سمعنا اشكال حجي ولا نطقنا حرف ..

اني مو مثلكم واني مو من نوع يسكت وبعدين هي شعرفها بيه وبظروف الي عشتهه والتبن الي اكلته والدااكله .

فرح اعصابج يمعودة كالت حجاية وانتي تدرين بنفسج مو مثل ما هي كالت بعد شكو خلي تحجي ماراح يطير نصج وبعدين انتي هسه مرة الشيخ تحكمي بنفسج لاتنزلين راسه بتصرفاتج هاي وتهورج وراح تسمعين حجي ومن هسه اكلج اذا ما تتحملين كعدي بغرفتج احسن ولا تفشلينه كلساع متعاركة وي وحدة .

كتلها اي اكعد بغرفتي حتى يصير الحجي عليه بفلس مووو ؟ وانتن خو تكيفن وماتصدكن واحد يطعن بيه وتكابلنه وتكعدن موو ؟

كالت اهوو هاي شحجي وياها وشون افهمها ، يمعودة مرة جبيرة حجت حجاية وانت رديتيها وفشلت هسه وتندمت كافي سدي الموضوع اني شون ابقى وراج وراج واراقب تصرفاتج لو شون بالله ؟

لا مالج علاقة بيه مو جاهلة اني وتراقبيني اعرف اتصرف وها خل اكلج الي يرشني بمي ارشه بنار كولي لجماعتج هالحجي ولا يكعدن يلغن مااسمح لأحد يحجي عليه اني وهاي اني هيج وانتوا كيفكم بعد .

خلت اديها على راسها بنفاذ صبر كالت
الله يستر من هاليوم الي من بدايته ماتبشر بخير .
وطلعت من المخزن .

رفعت تك حاجب وكفت ثواني اهدأ روحي شويه
عضيت شفتي احس نيران متأججة بداخلي ، لزمت خدي الي بعده احسه حار بسبب كفه لعلي
والله اني اعلمك علي تضربني مو بسيطة .

طلعت من المخزن دااسد بالباب ميسد كوة سحبته حيل وركعته ركع ..
التفتت شفت شرار ورايه لابس دشداشة سودة ولاف الغترة على راسه لفة عمانية وبيده كلاص بي جاي .

باوعتله ودااروح كال فرح اهلج يجون ؟

التفتت عليه كتله ها شنو ؟ شنو تسأل على اهلي ؟

كال اي شبيج دااكلج اهلج يجون لو لا ؟
جان يحجي ويشدد ع الاحرف حسبته معصب .

كتله اي شتريد منهم شعجب تسأل عنهم

كال بنفاذ صبر شبيج وسألتج سؤال جاوبي .

حكيت راسي احس حرارة صعدت لراسي لو اني بيه الخلل لو هم لو كاتل اليوم لو مكتول .

جاوبته بنبرة سريعة ماريد اكثر عرايك لحد الان حيصيرون تلاثة وشرار عصبي خاف انوب يفشلني ماكدر على لسانه ....
اي اي طبعا يجون عزمهم الشيخ البارحة كلهم يجون .

ها يعني موت تجي ؟

جاوبته بانزعاج شنووو ؟

رفع تك حاجبه اقصد موج اختج تجي لو لا ؟ اذا ماتجي خابريها تجي .

هزيت راسي شمعنى موج تسال عنها وتريدها تجي ؟

كال بملل وبرود وهو يرتشف رشفة من الجاي مالته ...
عندي حجي وياها

بخصوص شنو عندك حجي وياها ؟

تحقيق هو يافرح كليلها تجي ولا تلحين ..

شرار انته لاننسى نفسك متزوج ابتعد عن اختي كافي الي جنته من اوس وهو منكم وبيكم

سكتي سكتي دخيلج فرح ترة الموضوع مو مثل الي ابالج انتي وبعدين الي جنته من صنع ايدها وبسبب غباءها احجي وياها اني وبعدين هي خليها تكلج شكو .

خله وراح واني احس ممفتهمة شي ....

سوو ريوك ودزوا للمضيف واني كاعدة مااشتهي اكل
اي هو هسه يتريك ولا هامه الي سواه بيه الصبح
واني ميتة قهر فوك قهر .

الصبح بالعشرة طبوا بيت عم علي الي هم اهل ختام بس هيه مو وياهم تفاجئت ، شعجب!! سلمت عليهم ولو همه ماطايقيني ولا طايقتهم بس بعد سلمت .

ورحت ركض طليت من البردة عبالك كلبي علمني
شفتها واكفة لابسة فستان اسود خربيومها شكد ذواقة حيل حلو فستانها لايك الها وجنطتها بيدها وكأنها تنتظر شي!

بقيت اراقب الى ان شفت علي اجه باتجاهه وهي تلكته بابتسامة هادئة ومن عيونها تتقافز نظرات الاعجاب ، هو ظهره عليه وهيه كبالي .

حسيت بعصرة بقلبي والم ببطني وراسي
عضيت شفتي حييل ، جانت تنتظره هنانه!!!

وهو طلع من المضيف وعاف الزلم واجه سلم عليها!!...
يمكن منطته خبر اي اي دكتله تليفون واجاهه اكيد .

تذكرت هيه مختفية من كبل زواجنه مادري وين بس ما اشوفها تجي للمكتب هالأيام .

بقوا دقايق يسولفون واني اباوعلهم وميتة قهر
هو واكف ومبين حيل يحترمها ، وهيه حيل شخصيتها قوية . ومبين جوعانين سوالف ...

هسه سلمتي عليه ولي وفوتي جوة مو كافي!!

درت وجهي منهم شبعت قهر وتشلعت وتغلغل بدمي وسديت البردة واحاجي نفسي
شبيج فرح غيرانه عليه ؟ ومقهورة ؟ نسيتي الراشدي الصبح ؟ امداج اي والله هو يكفخج وانتي تغارين عليه !

والله مايستاهل ذرة مشاعر مني لا غيرة ولا حب ولا اي شي من هالخرابيط اني ما احبه استعجلت ووافقت حيل استعجلت .

خليت اديه على وجهي وتنفست حيل النفس مايطلع عدل ، سمعت صوت رنا اختها يمي .
تكولي شبيج ؟

خزرتها وشديت على اسناني وكلت مابيه شي ..

هي راحت فتحت البردة وظلت تباوع واكيد شافتهم
باوعتلي مبتسمة بشماتة ..

كالت هاا هسه عرفت ليش مخلية اديج على وجهج وتبجين .

تقربت منها كتلها مااداابجي لا تألفين بكيفج خوش .

كالت بأصرار لا دتبجين والله اصلا انتي مدري شلونج مخربطة ورعنة مدري شلون قبل بيج الشيخ جنه متوقعين يخطب اختي علاقتهم عميقة بس السحورة خوش تلعب دور والله اخذتي الصغير وموتي بسحورتج ونوب اخذتي الجبير والله بس الي يحفظه منج خطية .

سديت قبضة ايدي اريد اضربها عبالها فد انجاز الزواج واسوي سحورة علمود اتزوج..

كتلها بعقلج مطي انتي ولي من خلقتي لا اكلب عليج البيت كله هسه ماناقصني بس انتي.

خليت وصعدت فوك اخذت تليفوني واحس راح اوكع تعبت حيل من اشهر مااجتني نوبة الصرع ، مرتاحة منها وشكلها اليوم حتجيني .

خابرت موج جاوبتني نعسانة جانت نايمة وجان اهجم عليها طلعت حركتي كلها بيها وبعدين تندمت كتلها تعاي تعبانة ماتحمل بعد مقهورة حيل .

جاوبتني بانكسار : وين نجي فرح مو عزمونه على عشا مو ع الغده .

وانتوا شنو فرقكم عن الي اجو ع الغده انتوا اهلي معليج بالعزيمة اصلا الكل هنانه اليوم تعاي والله تعبانة موج محتاجتج .

اي اي نجي بس ارتاحي واهدي اكليلج شي علاجج اخذي ادري اليوم صعب عليج بس والله مانكدر نجي هسه لازم نودي خالة لبيت خالو لان مانكدر نجيبها ويانة .

موج احس نفسي نهايتي مثل خالة اني والله هيج راح اتخبل مثلها موج اني ماتحمل حياتي وندمانة حيل
القرار الي اتخذته بقى جاثم على ضميري احس تسرعت موج ليش هيج أني!

كالت ياقرار حبي ؟

زواجي من الشيخ غلطة اكبر من غلطة زواجي من حمدان احس تنتظرني ايام سودة ومظلمة اكثر من ذيج الفترة موج اني مراح اكدر اتحمل.

لا فرح لاتكولين هيج الشيخ يحبج ويحترمج وسند الج بس انتي خاف غلطانة ويا ادري بيج تجفصين .

لاء هو مايحبني ولا مرة كلي احبج هو تزوجني يريد يسيطر عليه وعمود ابن اخوه لا أكثر .

انت منين جبتي هالحجي هو كالج هالكلام هذا ؟

اي كال اريد اروضج وحسيت يريد يكول انو زواجي منج جان لأجل غاية .

لا تخلين ابالج هيج فرح عفية تحملي شويه كسبي خلي يحبج تعاملي ويا مثل ميريد هو بشكل مايسيء الج ولا إله ، فرح ترة الشيخ مو نفس حمدان لازم تخلين هالشي على بالج .

مسحت دموعي وماعلقت على كلامها
كتلها شرار يريد يحجي وياج ..

انتفضت كالت شيريد ديري بالج تنطينه رقمي ترة والله مالي خلك اغيره مرة ثانية .

لالا منطيته شبيج بس هو عنده حجي وياج شنو بينكم انتوا ؟

يمكن عمود اوس لا تشغلين بالج ...

اي عفية ترة هو متزوج والله اذا تدخلين لهاي لعائلة مترتاحين موج اني اريدلج الخير وماريدج تندمين مثلي .

كالت برفض وانكسار لالا شبيه تخبلت..

كتلها موج انتي تحبيه لشرار ؟

ليش تسألين هذا السؤال فرح ؟

هيج مجرد احساس اجاني ..
ختمت المكالمة وياها واحس قلبي ممطمأن من هالموضوع وحتى لعثمتها ارتباكها معجبتني وهيه تنكر حبها .

نزلت جوة ، شفت ختام كاعدة يم الحجية ، ظليت اباوع الها ، تسألها الحجية طولتي وهالأيام ماتجين النه ؟ ولا اشوفج ؟

هيه جاوبت ولزمت ايد الحجية الي انحطت على رجلها وتسولف وياها اي والله خالة تعرفين احنه بالصيف نسافر ورجعنا قبل فترة .

ردت الحجية انه صحتي مو تمام وماكدرت اجي واشوفج والله .

ردت بهدوء : معذورة حجية ..

رغم ختام شافتني بس ولا كامت سلمت عليه باوعتلي ودارت وجهه خلصت كلامها ويه الحجية واني اقتربت منها يله شالت ايدها سلمت بدون ماتبوسني .

للظهر وانصدم بجية سحر وامها وبدت اللواكة وتمطك
هي وكابلت الحجية وظلت تبجي وتصرخ ومسويها روحها متأثرة مدري هي صدك متأثرة وتاهت عليه
والنسوان شافوها وكالن خطية مبينه كلش تحبه يكولون جان يحبها من كبل لا يتزوج .

واني تخبلت ياربي بس انطيني الصبر شون راح اتحمل هاليوم اني ، ركضت فوك واخذت تليفوني واتصلت على علي شكد اتصلت مارد عليه .

نزلت اركض جوة وشفتها بعدها تبجي ومكابلينها النسوان .

طلعت بره وكفت كبال المضيف ، واجاني مهيب يركض
ها فرح شعندج واكفة هنا يمعودة دخلي زلم طابة طالعة .

كتله بقهر وحركة مهيب روح صيح لابوك عندي حجي ويا .

كال مااعتقد يكدر يجيج هسه انت شنو تردين كليلي وانه اتصرف واروح اكله .

رديت ليش مايكدر يجيني مو مرته لو بس بي اجه لختام مناك لهنا!

كال ها؟؟

روح مهيب روح كله هل يجي واني راح افوت واذا ماصحته هم اطلع .

هز راسه وراح صوب المضيف واني طبيت جوة .
بقيت الوب كلساع اطل عليهن شون اجن هو مو طردهن شلفاهن انوب الصبح جايات واني اهلي عزموهم ع العصر لا والله ولا اسكت هم يجبروني احجي شسوي شون اتحمل .

اجت ريلام كلتلي خالو يريدج
رديت بحماس وينه هو ؟
كالت صعد فوك ..
عفتها وطكيتها ركضة للفوك عثرت بطرف ثوبي
جيت اوكع ع الدرج .

فتت للغرفة فتحت الباب شفته بالغرفة واكف يم الميز مثبت اديه عليه وينتظرني بنفاذ صبر .

سديت الباب وفتت كتله ليش ماتجاوب مو اخابرك عليك لو هاي ختام اجيتها تركض مناك لهنانه بس خابرتك .

رفع راسه يباوعلي بعصبية : انتي شنو جاي تحجين فرح ؟ خلصيني شنو تردين ؟

اي اخلصك مافارغلي دومك مخليني بالاخير واخر همك اني .

باوعلي بنظرات مرعبة كتله ها تريد تضربني من الصبح مو ؟ اخذت ايدك على ضربي .

ضرب قبضة ايده ع الميز ، جفلت وتحركت اكتافي وخليت ايدي على قلبي .

كتله ختام هنا . اوووو اقصد المسحورة سحر انته مو طردتهم انته مووو طردتهم شكووو جتي بالله .

رفع اصبعه السبابة باتجاهي كال فرح خلي هاليوم يعدي على خير واذا اجو شراح يسوولج مثلا وانه هسه اوصي ام رحاب عليهن ادزلهن تهديد و اخليهن يحترمن نفسهن منا لمن يخلص اليوم .

صدك والله وهنه راح يكعدن ويسكتن زين جايات بعلمك لو لا ....

اي بعلمي اجن خو ماترديني اروح اطردهن وكدام الناس وامة الثقلين هنانه عدنه ؟؟

حجيت باستهزاء واهز راسي : لا عيب هم شون يصير ...

كال بسرعة تردين شي بعد خلصيني ؟

عاد كلش اذا طلبت منك شي راح يتنفذ

كولي فرح شتردين

رديت بحركة وقهر : ماريد شي .

نزلي وصيحيلي ام رحاب بسرعة خلي تجي هنانه .

طلعت ميتة قهر ونزلت وصحت لبلقيس .
صعدت تشوف اخوها واني رحت للمطبخ منين ماافوت اسمع حجي وبسامير مثل المطر وادعي بس الله يصبرني على هاليوم .

بس شون اصبر واني انصدمت صدمة عمري صار الليل وقبل العشه و سمعت بحمدان مات منتحر ، معقولة انين متوهمة !

لا شون تتوهم انين ماتجذب بس ليش ضم عني علي ليش !! راح اتخبل بعد مااتحمل كلشي صار اليوم تحملته بس يضم عني هالسالفة لا والف لاااا .

طلعت مثل المخبلة من الغرفة وشفت ريلام ومهيب على الدرج .

مهيب ..

لمن كال عمي حسان هيج فكرتها تريد تنتقم مني بس هي جانت تبجي مستحيل تسويها ام قلب الطيب ولا تأذيني ، اخذت العصارة وطبيت للبيت ، بالكليدور باوعت لكفاهه كتلها ريلام .

اندارت شفت الشامة وحدة عرفتها هيام
ابتسمت لمن باوعتلي ..
كتلها صيحي لريلام ..

كالت مزاعتلك هيه متحاجيك كول شمحتاج اني موح
جودة .

شسوي بيج انتي روحي صيحي لريلام كتلج .

عوجت حلكها ودخلت ... تأخرت عرفتها ماصاحتهه ادري بخباثتها .

دخلت واني اكول احم احم لان البيت مليان نسوان واني لازم ابدل دشداشتي .

داافوت لغرفتي شفت ريلام ع درج تباوعلي
بقلق .

صعدت وانطيتها العصارة كتلها هاج مشكورة وخوش اخذتي بثارج مني.

باوعت للعصارة ببلاهة ممفتهمة شي كالت والله ممتقصدة مهيب ونزل المي حار عليك .

جاوبتها مو قصدي ع المي ولج هاي عصارة مال مفاصل سمطتني سمط يافهيمة انت شي متعرفي شكو جبتيهه اليه .

كالت يااعزااا

اي هسه متعادلين موو ؟ بعد متطلبيني ..

لا لا انته تطلبني وضحكت ..

واحنه واكفين اجت فرح ترجف ومتخبلة وتعصر باديها
وجهه صاير احمر وحجابها متخربط وكلها مخربطة .

وكفت يمنه ظلينا نباوع عليها متفاجئين ..

كالت مهيب صدك هالحجي حمدان انتحر مو احد قتله
كول معيب عليك الله .

فتحت عيوني مصدوم وظليت انلفت وريلام لطمت وجهه وصاحت عزاااااا صدك ؟

باوعت لريلام خزرتها كتلهااا اششش سكتوا شبيكم ..
فرح استهدي بالرحمن انتي منو كلج هالحجي .

عرفت عرفت مهيب عررررفت وابوك كل هالفترة ضام عني ليش لييييش؟ كوول مهيب ليش

اششش فرح شجاج سكتي لايسمعج احد البيت مترووس ناس وانت اسمعي من ابوي احسن وهسه روحي للغرفة ارتاحي ريلام اخذيها وروحي للغرفة

لا تلزميني ريلام لا تلزميني اريد اروح لعلي هسه خلي يكلي ليش ضم عني لييييش؟

تبجي وترجف وراح توكع من فوك الدرج ريلام كوة
لازمتها وهيه متقبل تلزمها .
صعدت اختها موج وكوة اخذوها ودوها لغرفتها

واني نزلت اركض ورحت كلت لابوي
هو تفاجأ
كتله ترة منهارة وراح تسببلنه فضيحة هيج .
عاد هو ترخص من الناس وراحلها .

موج ...

كلولي شرار ينتظرج بالاستقبال ، رحت فتحتها وفت جان لوحده كاعد لابس دشداشة سودة ولاف الغترة على راسه باوعتله اجت عيني بعينه جانت نظراته تختلف عن قبل احس انكفت بعيونه نظرات الاعجاب
اني مكسورة ويائسة بعد كل الي صارلي وهالشي زاد انكساري وألمي .

وكفت يم الباب حاجيته : يكولون رايدني بموضوع مهم تفضل احجي اسمعك .

دار وجهه ونزع الغترة من على راسه وخلاهه بصفه ع التخم وكام على حيله باوعلي كال فوتي وسدي الباب .

كتله مااكدر لايصير حجي الي بيه كافيني اني بعد مااتحمل .

كال لاتظلين تشكين جنج بومة مهمومة واحنه مو بغرفة النوم هذا استقبال وبعدين كوة فرغته من النسوان حتى التقي بحضرة جنابج سدي وسمعي الكلام .

سديته ووكفت وراه خليت كف ع الثاني وكتله تفضل .

كال سمعت من مهيب انتي رافضة تقدمين شكوة؟

جاوبته اي مالي خلك مشاكل اني كوة خلصت من اوس وطويت صفحته ووللأبد ...

كال لااء اوس لازم يتحاسب وبعدين لا تتوقعين راح يعوفج بحالج ترة انتي متوهمة .

شرار اوس هددني ببابا و بأخويه كال يأذيهم ماريد اندك بي بعد .

انتي شبيج غبية ؟ اكوللها ثور تكلي حلبه ولج مراح يتركج مراح يتركج اله وهو داخل السجن يله .

ظليت اباوعله صافنة واحاجي بقلبي
اذا اعجابك بيه فترة وراح لحاله ليش مهتم لو دتنتقم لرجولتك لان اوس خطبني وجبرني اوافق عليه وانته ماكدرت تجبرني!

ظل يمرر ايده كدام وجهي انتبهت كال وين شردتي ؟

هزيت راسي كتله افكر عود وطلعت من يمه بسرعة دااصعد واشوف فرح منهارة وتبجي كوة اخذناهه للغرفة .

فرح ...

احساس معتم واحس بظلام دامس يحيط بيه ابجي ويمي موج وانين يسكتون بيه ويهدأون ويكولون مو اكيد يمكن اوس جذاب بس اني احس وكعت ع الحقيقة .

دخل علي وباوعتله واريد انقض عليه مثل لبوة متوحشة اخذوا اشبالها منها .

انين وموج ترخصوا وطلعوا وبقيت بس اني ويا
كمت باتجاهه ارجف واحجي بنتر كل قوة ماعندي
والسؤال الوحيد الي ظل يتردد على لساني ويوصل صداه لشفتي وانطق : صدك حمدان انتحر ؟

منو كلج هالكلام ؟

دريت دريت عبالك راح ينضم عني شكد تريد تضم عني شكدددد

لزمني من فكي وكال صوتج كافي فرح لهنا وبس كاااااافي .

انت ليش جذاااب ليش تجذب عليه
حجيت واني انفض روحي منه

كال بعصبية شجذبت ولج شحجيت شبيج انتي شبيج وشتردين هسه اطلع حمدان من الكبر اخلي احد يكتله يله ترتاحين اي حمدان انتحر وانه ضميت هذا الشي عن الكل لان هذا عااااار عاااار علينا والناس راح تلعنه راح تكوووول الى جهنم بدل ماتترحم عليه .

بس انته كتلي هو قاتل وانقتل هيج فهمتني ....

اي قااااتل حمدان قااااتل نفسه حمدان قتله الخمر جان سكران التحقيقات بالبداية اكدت انو مقتول وبعدين اتضح انو قتل نفسه .

شلووون يعني جان ويا احد بوووقتها خاف صدك مقتووول علي لا تخبلني علي !!!

كال انه الي راح اتخبل من وراج انه راح اتخبل وياج انت مخبلة اصلا ....

كتله طلكنييييي ...

تقرب مني كال جبرتج تتزوجيني ؟ لو تزوجتيني برضاتج ؟

سكتتتت اباوعله وبداخلي مجرة من الالم ...

لزمني من اكتافي اصابعه تحفر بيه كال احجيييي...

كتله لاء

كال لعد لاتطلبين مني الطلاق ولا تكررينه بعد مرة ثانية .

هدى ....

كاعدين بالطرمة وابوين طلعناه يشم هوا خطية تعبان
مرة ابويه اشرت لعلاوي اخويه كالتله شوف ذيج الحمامه صاعدة ع المحجر روح جيبها خلي نبيعها ونحصل فلوس .

كتلها مو مالتج شون تبيعيها وتاخذين فلوس صدك تحجين انتي ؟

كالت مالها راعي صارلها ايام هنانه ...

صعد علاوي ديلوح الحمامة وجان يوكع من فوك المحجر للكاع .

موج ... بيوم دخل احمد للبيت متخبل يباوعلي ويريد يفترسني تفاجئت سألته احمد شكوو ؟

كال انجبي ادبسز دخلي لذيج الغرفة حس نفس مااسمعلج بسيطة اعلمج الظاهر ماتربيتي زين اربيج ع اخر وكت .

كتله شكو هالغلط احمد شجاك اول مرة تغلط عليه هيج اني اكبر منك .

انتي خليتي بيها جبير وزغير الله يطيح حظج نزلتي رووسنه .

لزمته من ايده دفعني ...

صاح انووو انييين ووووينج ؟

طلعتله انين .. كاللها حضري خالتي وابوي وانتي راح يجي عليكم سالم يوديكم لبيت خالي بسرعة .

اني انصدمت ظليت امشي وراه احمد شكووو شبيك احمد ظل يدفع بيه وكال اصبري اطلع ابويه من البيت واني اعلمج .

يتبع ..

البارت اهداء لنوارة noora-1995

منشورها فاز بمسابقة احلى منشور .. بكروب فراشات وورود ..

واشكر كل اعضاء الكروب فديتهم وكل منشوراتهم الحلوة ...

ومن ضمنهم princessa_1996 ❤

وهذا ايضا تعليق من الكروب احس لخص القصة والمحور الي تدور حوله ..

ارجوا ان تعذروني اذا اتأخر امر بظروف صعبة رغم هذا جاي احاول اكتب تحياتي الكم جميعا ..