رواية هذيانٌ بين جمرٍ وجليد ..(ارملة اخي المجنونة) الفصل السادس وثلاثون 36 - بقلم نورا ناصر

رواية هذيان بين جمر وجليد
الفصل الثلاثون
نورا ناصر .

******

لا تَغضبي مني، أعلم أنني في بَعض الأحيان قَد أبدو أقرب إليكِ من روحك، وفِي الليلة التالِية أكون قَاسي كَصخرةٍ وبَارد وبَعيد كَنجم وحيد ، وأدرُك تماماً أي أذى قد يَتسبب به تنَاقض كَهذا . .

لكنني لا أتعَمّد هذا الأذى كونِي واثقةٌ من ذلك، كل ما فِي الأمر إن روحي في مدٍ وجَزر دائمين
" وأنتِ الشاطئ الذي يَحتويني "
///منقول///

*******

هدى ...

صاح عليه ابوي ، عفتها وطبيت يمه جوه شفته يريد ينزل من السرير بس مدايكدر ، رحت سندته ولزمته من ايده .

كال شبيها وياج بت الكلب هايه العار هسه اكوملها اكطع ظهرها .

لزمته اهدي بي وهيه اجت وفاتت تخصرت ووكفت
كالت اي عود مسوي روحك مريض ومساع ضربتني بالحجارة على ظهري واني شمدريني بي حيوكع شمدريني بالله ؟

هم روحه يريد يكوم ويتهدد بيها .. واني التفتت الها
ظليت اصيح الله لايوفقج متشوفي شلون تعبان ولي منا ولي يلللله ..

ظلت تفر بيدها ماظلت عليه بس انتي دشوفي حل لمصيبتج الي سويتيها .

تركت ابويه ورحت عليها واني اصيح عليها بصوت مبحوح من البجي وبعصبية
انت شنووو ماكوو احساس متشوفينه حيموووت ؟
ارحمي بحالنا حراام عليج مكافي هذاك ممطول بالمستشفى بسببج انتي شنو من بشر شنووو.
طلعتها وسديت الباب ورحت يم ابويه .

كال اخوج شونه ووينه هسه ها ؟ ليش مارجعتي وياج ولج هداوي بويه بس لاا مات علاوي طمني كلبي ؟

حاجيته بنبرة مطمئنة واني امسح دموعي
: لا يابه اسم الله عليه الدكاترة كالوا نخلي تحت المراقبة وعمي خطية بقى يمه .

اباوعله شفافه ترجف وعيونه مدمعة ونظراته تنبعث
بقهر وندم ، يباوع ويدير عينه مايباوع لعيوني مباشرةً.
وبنبرة مليانة أسف سأل : خاف يموت علاوي ولج بويه ؟

جاوبته بنبرة رجاء : لالا عفيه يابه لاتكولها ، اسم الله مابي شي ان شاءالله ، انتَ بس لاتفكر هيج هو يصير زين واكعد ادعيله انتَ مريض ودعائك من الله مستجاب بحيل الله .

خله ايده جوه صدره وهو يتمدد ويتمتم
_ اي بويه راح ادعيله شبيدي عاجز ماعندي غير الدعاء .
ساعدته يتمدد ، وكعدت بصفه ودموعي مابطلت تنزل من خدي بغزارة .
تمدد وخله راسه على المخدة ، باوعلي ودار وجهه
همس هداوي شنو تكلج هالعار شبيها وياج
انتِ صدكَ حامل ؟

خليته ايدي على حلكي ومسحت دموعي باطراف اصابع جاوبته ما ادري يابه والله حتى ما محللة اني .
رد : مو جنتي بالمستشفى ؟ ليش ماحللتي ليش مخليه نفسج هيج يبنيتي ؟
_ يابه الله يخليك بيا وضع احلل واني جنت مفرفحة ووحيدة وماشوف دربي!
_ حللي بنيتي لاتظلين هيج ولاتضمين على عيالج عيب وفشلة من الشيخ شيكول علينا .
_ اي اي بس احلل اكللهم والله ، بس هسه ممتأكدة خاف اسوي تحليل ويطلع مو حمل واتفشل ، ترضاهه اتفشل يابه ؟

رد : لا يابويه عسى دومه راسج مرفوع ، تعاي يمي ابوس راسج .
غمضت عيوني وقربتله راسي ، باسه بكل حنية
حنية كنت محتاجتها قبل ومفتقدتها .
خليت راسي على صدره ودفنت وجهي بي ودموعي بللته .

كمت ، انطيته علاجه ، نام ، طلعت ادور سهام
شفتها جانت كاعدة بالمحل ، طبيت عليها باوعتلي
خزرتني ودارت وجهه.

كتلها بتوسل : عفية اريد موبايلج اخابر على عمو اسأله عن علي والله ظل بالي يمه ، شويه وارجعه الج .

نترت بيه بعصبية : شوو خري من خلقتي ماريد اشووفج وديري بالج تكربين على تليفوني رصيد مابي خلص خابرت على اخوي يجي عليه باجر اني راجعة ويا لبغداد .

تعجبت : ياا صدك تحجين ؟ ليش عود شون تعوفينه بهيج ظروف ؟ مو مرة اصيلة انتِ يمعودة كَولي غيرها ؟

كامت على حيلها ودفعت الكُرسي : وشحصلت منكم اني ؟ حتى اصيرلكم مرة اصيلة ، خو ذاك الشويب بي كل البلا مسوي روحه مريض ويكتل بيه .

جاوبتها بصدمة : عزا عزا شوكت ضربج ابويه ليش تجذبين مو حرام ترتكبين ها ؟ انتِ أصلا مدللة عدنا بس والله ما حامدة ربج .

كالت بثقة وتأشر بأصبعها السبابة : أني الف واحد يتمناني بعدني صغيرة وحلوة ارجع لبغداد واتطلك من ابوج واخلص منكم ومن فكرككم .

كتلها بقهر : حرام عليج والله تعوفين ابويه بهيج ظروف وتشوفينه كبال عينج مريض وتعبان وكملها هسه وكعة علاوي وانتِ جنتِ السبب .

اجت يمي ودفعتني من زندي وعاطت ووولي سدي المحل يله طابه انخمد .

هزيت راسي ورحت سديت المحل وطفيت الضوه ...
يوم ثاني الظهر اجه اخوها عليها ، حتى لادخل ولا سلم على أبويه ، اخذها من الباب وراحوا .

سأل عليها ابويه ولمن كتله انتكس وتخربط وصارت البلوى بلوتين ، وعلاوي مادري عنه بالمستشفى .
للعصر يله اجه عمي مطلع علاوي وكال لازم يشوفه
طبيب اخصائي .

طلعت الفلوس الي انطاهم الي عمو الشيخ علي وانطيتهم لعمي ، حتى ياخذه لدكتور اخصائي .
خطية عمي هم على كد حاله وابنه بعده طالب مدرسة ويصرف عليه وهم ابتلى بينا .

مرت كم يوم زاد الحمل عليه واني وحدي
اركض لابويه لو اركض لعلي اخويه .
النزف انقطع من وحدة بعد مااستمر يومين تقريبا .
كلت يمكن وكع الطفل ..

بس الظهر لمن رحت اريح تمددت فاجئني بحركات قوية يم المثانة حركات عشوائية ، حسستني بالحياة النابضة بداخلي ، كمت على حيلي وظليت اشهك
ياربي الك بيها حكمة .

قررت بس اتخطى هاي الامور كلها يطيب اخويه وتتحسن حالة ابويه اكوللهم او اذا اي احد بين منهم اكول بعد ماراح اضم هذا الموضوع عليهم وشنو الي يصير خلي يصير .

موج ..

بقينا بس اني واحمد بالبيت ، بقوا اهلي يم بيت عمي .
على ساعة اشوفه حينهي حياتي ، على كد ماكان معصب وكارهني .

اول مرة اشوفه يدخن هيج بشراهة وكلساع يكسر اله حاجة ، واني اراقبه بصمت ودموع .

اخر شي ضل يضرب قبضة ايده بالحايط ، رحت يمه بسرعة ابجي بنحيب وغصة واتوسل بي مايأذي نفسه

لمن اقتربت منه تخبل وظل يضرب بيه ، احس تبنجت بعد مايهمني ولا اتألم ، المي الوحيد هو اخويه ، الي مخلي ثقته بيه وعباله خنتها بس الموضوع مو هيج ابد .

طول عمري محافظة على نفسي ومانزلت راسهم بيوم بس الي صار هو غصب عني وكعت فريسة للنصب والاحتيال .

هو يضرب بيه ويجر بشعري واني بلا وعي ادنك او ادور راسي وترتفع ايدي بلا ارادة تحمي وجهي يضرب واحاجي : اضربني احمد موتني هاي ركبتي وهاي سجينة واذبحني بس اسمع مني لأخر مرة .

جر شعري حيل وظل يحجي بهستيريا
ولج مافكرتي بأبووووج المريض مافكرتي بأخواتج وسمعتهن !

واخر شي صاح بصوت متضخم بالقهر
مافكرتييييي بيه بيه انييييي شون احط عيوني بعيون الناس بعد مافكرتي بكسرة وجهنا مااافكرتي .

وزاد ضربه وكعت يم رجليه منهكة القوى
صار الضرب دفرات ، خليت اديه على وجهي
مو أحمي ! لا وانما مكسورة يائسة وجهي مليان دم
وورام واحسه حينفجر .

حسيت شي حار وجعني حيل عرفته طفى الجكارة
براسي ، مالحكت احس بالالم فقدت الشعور صرت احس نفسي بين الوعي والاوعي .

خوف ألم يأس وانكسار ، تمنيت مااكعد بعد واموت بمكاني ، بس فتحت عيوني كوة عليه ، شفته يمي
وبيده سجينة وجان يبجي .

دكم قميصه مشلعة وشعره مخربط ، اديه تنزف بسبب التكسير والضرب ع الحايط .

مانكر اكول خايفة ، لان هو مو بوعيه واول مرة اشوفه بهالحالة وما أكَدر احزر شنو ممكن يسوي .

ظل يضرب ببوز السجينة ع الكاع واني ابجي وارجف واباوعله باستنكار .

اجاني صوته : ولج اذا طلع الفديو شراح تكولين لأبوووج هاا حليها الي هسه اريد حل .

شهكت ونحبت وبجيت ، سحبني من شعري
وتوجعت حيل مكان الجكارة جان قريب من كمشته
لشعري .

كال كااافي عوووي احجي شراح تكلين لابوووج شراح تكليله هااا ؟

تمتمت اصبر عليه : م ميطلع وا ني ممبينه زين .

تركني وجن جنونه : شلووون ميطلع لج اوس حاقد عليج حااااقد حاااقد يريد بآي طريقة ينتقم منج
ولج خاينته ويه اقاربه الكلب شرار شتريدين منه يصفكلج لو يتفرج ويسكت .

جاوبت من بين رعشة شفايفي : بس بب س اني ماخاينته .

تقرب مني داابتعد لزمني من زندي وقربني
وكال بعصبية ابوووج مريض مررريض رجعتله الجلطة القلبية وعنده تلث شرايين مسددة ومن بينها الشريان التاجي اقل صدمة يموووت يرضيج هالشي ؟ تكونين سبب موته يريحج هالشي .

جاوبته من بين دموعي ورجفة لساني
_ ليش تكول هيج أحمد انتَ تدري شكد احب بابا اني مانزلت راسه ولا فكرت .

عاط : لعد هذا الفديو شنوو شنوووو

حضنت نفسي باديه وكتله انت مجاي تفهم عليه احمد ولا دتنطيني فرصة احجيلك الصار بالضبط ، يمكن اني غلطانة بس انتَ هم خليني اشرح لك .

تربع وكعد وكال احجي المقتل بالله خل اسمع .

رديت بنبرة رجاء : بس توعدني ما تطلعني كذابة وتصدكَني لأن والله راح احجيلك الحقيقة وروح أمي .

صك سنونه وكال يله بله غردي .

احمد لازم تعرف أوس هواي أذاني وهواي حاول يتقرب مني وأني صديته ورزلته وكم مرة يتبعني ويكول يريد يخطبني فعلا بس اني مااحبه ولا اطيقه رفضته اكثر من مرة .

_ واني وين من هذا كله طرطووور اني ليش مكتيلي ليييش ؟

_ انتَ ماكووو أحمد ماكو ولا بعمري اتصلت بيك محتاجتك لكيتج اسأله لنفسك هالسؤال مو تسألني اني لو اشوفك كبالي دوم وبظهري مااااضم عنك ابد .

ضرب قبضته بالأرض : يله اني كلب ونذل كملي داااشوووف مصيبتج كملي .

_ شكيت لشرار منه اكثر من مرة باعتبار هو صاحبه ويكدر عليه .

_ وانت منين تعرفين شرار وشعندج ويا وشجاب رقمه عندج ؟

_ هو صديق ويايه بالفيس أحمد انت من فتحت تليفون شفت بس الرقم شفت شي ثاني ؟

_ لاع .
_ ليش محاولت تتصل بي قبل متكسر تليفوني جان اصلا معرف رقمي لان اصلا ماعنده فكرة انو تركت اوس عمود شرار شيلها من بالك ولا تصدك باوس جذاب جذااااب .

_ ولج صدكته ولما صدكته اذا نشر الفديو اني وين اودي وجهي من الناس!!! ولا اني الااكدر على اوس وعصابته ولج ابوه مسؤؤل بالدولة وجده شيخ منين اطلع حقج اني .

_ روح لشيخ علي بلكي يساعدنه .
_ انجبي وكمليلي سالفة الفديوو شنو
_ قبل سالفة الفديو ترة اوس احتال عليه وجبرني اتزوجه ولا تكوول انت وين جنت انت ماتكدر عليهم احمد .

_ ليش مو رجال بعينج ولج ؟

_ اني ردت اطلع بأقل الخسائر وافقت اتزوجه بس هو مريض مرييييض ... " وحجيتله كل الي صار بالشقة "
سألني شمعنى خابرتي على شرار ..
ماردت اكذب وكتله حافظه رقمه . ولاتسألني ليش حافظته أحمد بس هذا الي صار وممكذبة بحرف وشتريد تسوي سوي مخايفة وماعندي شي أخسره بعد ..

كام على حيله يفرك وجهه ابويه لازم يعرف بالموضوع حتى ماينصدم اذا صار أي شي انتشرت الفديو مثلا .

كمت كوة عليه الم من كل جسمي حتى صرت ماأميز وين مكان الالم التمت عليه كل الاوجاع .
وظليت اتوسل بيه ميكوله ..
كال بانكسار وقهر : يسمع مني ولا من الغريب ...

كمت رغم الالم اتوسل بي الى ان هز راسه بس ممقتنع بس ميريد يسمع نقاش بعد عافني ودخل لغرفته
واني بقيت كاعدة طول الليل ، لا اكدر انام من الالم
ولا من القهر .

فرح ...

تعدت الساعة ثنعش بالليل وعلي ما اجه للغرفة بعده واني بالي يم أهلي وكلساع أخابر احمد ميجاوبني وأنين قلقتها على كد ما اتصل بيها وأسالها "رجعتوا للبيت لو بعد" وشكلهم باقين وبايتين الليل يم بيت عمو .

صارت بثنعش ونص واني حتى نوم مجايني ، بالي يم اهلي هناك وخايفة عليهم ، وعلي مثل الثلج ولامهتم .
بهاللحظة دخل هو ، ظل يباوعلي وباوع للساعة بالحايط ....
سألني : أشو منايمة لهسه شعجب مو من عوايدج ؟

كمت من السرير رحت يمه حاجيته بقلق
_ بالي يم أهلي والله لهسه ما أعرف شبيهم شون يجيني نوم !

رد : سهلة ان شاءالله مابيهم شي نامي ولاتفكرين الله يحلها .
بتوسل : وديني الهم هيج مراح اعرف شبيهم والله قلبي نار نار عليهم .
لزم وجهي بأثنين اديه كال ان شاءالله باجر اوديج بس الصبح من وكت ويه طلعتي للشركة .

كال هيج وابتعد عني راح للسرير ، رفع دانيال وباوعلي بنظرة عدم رضى ، لأن منبهني انومه بسريره ، اني مو اعاند بس اللتهي او أنسى اخذه وداه للسرير مالته .

وكَف يم الميز كال هاي شنو بعدهن الكتب هنا ليش ماشايلتهم انتِ شكد ماتهتمين بالشي ليش هيج عود ؟

كتله والله مالي خلك شي أني افكر بأهلي .
_ ترة ماتخسرج ثواني تشيليهن وتحطيهن بمكان ثاني تحافظين عليهن بي بس انت مهملة!
رديت : حقك اي والله حقك الايده بالمي الحار مو مثل الايده بالمي البارد .
باوعلي بنفاذ صبر ..

هو دائما يكلي انتِ نظيفة بس ممرتبة ماعندج ترتيب ، بس هو والله اني مو هيج هو الي منظم زيادة عن اللزوم يشوفني مخربطة .

راقبته اخذ الكتب ، رتبهن مدري شلون حسب الكبير والصغير ، ضرب حافاتهم ع الميز وضمهم بالكومدي
مالة الميز .

رحت للفراش تغطيت لحد راسي ، حسيته دخل ويايه سحبني من خصري اله وظل يهمس يم إذني
- : ترة اطلبج مال العصر لا عبالج تشردين ولا عبالج نسيت .

عضيت شفتي واني اباوعله ، خليت ايدي على صدره وبس ساكتة .
كال ياهو منهم خدج اليوجعج ؟
باوعت بعيونه عكدت حواجبي
سألته ليش ؟

كال اطيبه وغمز .
درت وجهي صفح على واحد من الخدود انطيه اله واني أصلا نسيت منو منهم الي ضربني عليه .

خله كف ايده جوه خدي وقرب وجهي منه
وصار يبوس بخدي ، جانت البوسات عنيفة
حتى شعر لحيته نبت بوجهي .

حاولت افك روحي منه كوة بعد حلكه من خدي
باوعتله عاكدة حواجبي
يعني هسه انته طيبته لا والله وجعته بالزايد ..

ابتسم وقرب وجهه من وجهي ، طبك شفايفه على شفايفي ، حسيت بدفئ شفايفه واحس نفسي أذوب
بأحضانه .

ابتعد عني بتردد وعذاب ، ظل يباوع بوجهي
واني خجلانة ، ادنك وهو يرفع راسي .
همس : شكد حلوة انتي...

ابتسمت وخليت راسي ، على صدره ..
وسألته : انته تحب الحلوات!

رد بضحكة الله جميل ويحب الجمال .
ورجع رفع راسي وسألني وانفاسه مضطربة
: ليش تتهربين من نظراتي ؟
حكيت راسي بصدره وعضيت شفتي ....

مايصدك اذا اكله لهسه اخجل منه بس اضيع اضيع برومانسيته ....

.......

يوم ثاني كعدنا الصبح ، نزلت احضر ريوك حتى اصعد ابدل ملابسي ، صار شرار بوجهي عيونه حمر ويحك براسه ويعدل شعره .

كال ها حصلتي موج افتهمتي شي منها ؟
جاوبته لا بس هسه راح اروح الهم ..
رد: اي بس توصلين بشريني عود ..
_ والله مبين مابيها بشارة وضعهم مايطمن يعني شرار انته متأكد من نفسك ممسوي شي لأحمد ؟

عكد حواجبه : يعني شسويله مثلا ؟ علاقتي ويا ماتتعدى السلام وبس .
هزيت راسي بتفهم وكتله الله كريم ورحت للمطبخ ..

خلصت كل شي واخذت جنطتي ورحت للسيارة
وكفت يمها ، اجه علي مبدل ملابسه وبيده دانيال
ويباوعلي بعدم رضى .

خليت اصبعي على شفتي نسيت دانيال نايم
وحتى مابدلتله اجه يمي كال ناسية حتى روحج حتى ابنج شدعوة هلكد مستعجلة!

غلست منه ودااصعد اكعد بالسيارة ، سحبني من ايدي
وكال كعدي بالورة السايق يوصلنا .
هزيت راسي ورحت كعدت بالوره وهو انطاني دانيال .
خليته بحضني نايم حبيبي .

اجه السايق وشغل السيارة انتبهت ع الطريق هذا مو للشارع العام تفاجئت وكف السيارة يم بيت ختام!!
اووو من الصبح .

فتح الباب هو ونزل دك الباب فتحوا اله ودخل للبيت وبقى الباب مفتوح .

اخذت دانيال ونزلت وكفت يم الباب ، شفته واكف يسلم على ابوها ومبين ابوها يكله ادخل بس هو مادخل ويأشر على ساعته .

بعدها طلعت ختام وكالعادة بأناقتها المعهودة لابسة قاط اصفر .

سلمت عليه وانطته علاكة!!! واني بقيت صافنة عليهم
حتى العباية وكعت من على راسي وصارت على جتافي ولو شويه بعد ممنتبهة جان وكعت بالكاع!

اجه هو من شافني سرع مشيته وختام وراه تحاول تلحك خطواته الواسعة ، صار يمي ، صك سنونه
كال ليش نزلتي ؟

ارتبكت كتله هاا نزلت اشوف دانيال العلاكة
رفع حواجبه باستفسار .

عدلت كلامي اقصد البزونة ..
تشوفينه بزونة وهو نايم ؟

بقيت اباوعله بعيونه صافنة وبالي يم العلاكة شنو بيها!!

رفع العباية من اكتافي وخلاها على راسي .
وهمس ختام تسلم عليج ردي ..

ابتسمت بتوتر وكتلها صباح النور اهلا وسهلا ...
هي ضحكت الظاهر ماكايلتلي صباح الخير
لان ضحكت بسخرية .

اخذ مني دانيال وفتحلي الباب وصعدت بالسيارة وختام هم صعدت كعدت يمي .

ظليت اباوع للعلاكة الي بيده شكلها مابيها اوراق تخص الشغل ممبين عليها بيها اوراق ابد .

ختام وعلي طول الطريق وهم يسولفون
هي تحجي ويا بلباقة وهو يرد عليها باهتمام .

شكد ضجت نار الغيرة اشتعلت بيه
والاكثر من هذا ميخليني احجي وياه بالسيارة بوجود السايق وينبه عليه مااحجي بس هسه لا منطلق وياها بالحديث .

خلوني اصفن وانقهر شكد منسجمين واني كل حجاية والثانية رزالة ..

ياترى لو متزوجها شلون تكون حياتهم ؟

ماحسيت اله لمن وصلنا لبيت أهلي ..

اجه فتحلي الباب واخذ دانيال ، جان مطنكر
باسه وظل يسكت بي وهو هدأ عنده .

دك الباب .. ووكف يمي باوعتله مقهووورة
كتله روح شيخنا روح الله يوفقك ويه البلبل الاصفر ..

بس بقلبي كلت مو بلبل شمبانزي...

ضحك كال تغارين ؟

رديت : على شنو اغار تره هي متتقارن بيه ولا حتى اني اتقارن بيها بس اكو فرق بين الغيره وبين عدم الوجود انت لو تعتبرني فعلا زوجتك وكرامتي من كرامتك جان اجلت ميانتك وميانتها بالدوام تره احنه كاعدين بسياره مو بشركه .

انت مثل ما تحاسبني على صوتي كدام السايق اني همات احاسبك مو على صوتك ولا على كلامك وياها
بس تضل هي حرمه غريبه وانت رجال غريب عنها واني زوجتك حسيتها هي زوجتك واني الغريبه.

جر حسرة : انت ليش تكبرين الامور؟وانفاعلج يطغى على عقلج؟

بصدمه رديت : مو اكثر منك انت على اتفهه الاسباب تحاسب على شعرايه طالعه من الحجاب على شال ملمع مدري شنو اشياء سطحيه وتافهه اني مطالبه شي بس طلبت تحترم وجودي وتكون الي خصوصية

يعني انت ممسؤؤل عنها ولا انت سايق عندها وتنطيك اجر حتى تتعنى وتاخذهاوتكعدون تتناقشون باشياء انتم بغنى عنها .

حسيته عصب من كلامي : ولج شنو سايق عندها ولج ؟؟؟ بووويه عدنا شغله وخفت تتاخر عليه وهي لازمه القضيه اخذتها بطريقي بيها شي هاي ؟

ضحكت : فديتك ماتطلع اسرارك اله بالاستفزاز .

ابتسم : مااستفزيتيني .

عدلت العباية مالته وضحكت وباوعت الختام الي جانت تباوعلي وتباوع لعلي بأهتمام .
كتله وداعتك استفزيتك واعترفت ماخذه علمود قضيه انت وياها مشترك بيها .

ضحك ويباوعلي ماصنعتي الذرة مو شي مهم .

جريت نفس وضحكت : ...بس اني عندي مهم تعرف ليش لان اريدك تكون الي كتاب مفتوح مو متاهه واتيه بيك !!

بهالاثناء وطلع احمد ظل يباوع متفاجئ
لجيتنه سلم علينه وعلي كاله عندي حجي وياك ضروري اشوفك .

احمد دنك وهز راسه ... علي سأل احمد عن بابا
رد عليه مموجود يم بيت عمي ..
كال ممقسوم نشوفه بغير وكت .. والتفت عليه
كال محتاجة شي ؟
رديت سلامتك واباوع اله بتركيز ، حرامات العلاكة بقت بالسيارة جان خمطتها من ايده وشفت شنو بيها ..

ترخص علي وراح واني ظليت اباوع لكفاه وهو يطلع
واتذكر شلون جان يحجي وي ختام وانقهر كولش .

احمد كلي تره راح راح ، مراح تفوتين انتي ؟

هزيت راسي ودخلت جوه ، بس دخلت صارت كدامي
موج وجهه خريطة ويخوف ، مورمه عينها وخدودهه بنفسجي على احمر .

نزلت دانيال بالكاع ولطمت صدري ورأسا العباية وكعت من ع راسي ، رحت الها اركض ، لزمتها من اديها
واهز بيها شبيج شبيييج منووو مسوي بيج هيج منوو ؟؟؟

دنكت وظلت تبجي ، ركضت لأحمد وكفت مقابيله
عطت : احممممد هاااي انته هيج مسوي اننتتته ؟؟ ليش وووولك لييييش .

عاط اششش ولا كلمة فرح اششش تستاهل هواي تتصرف من ورانا ولا كأنو عدها أهل ومنتظرتنه فضيحة كد راسها .

لطمت خدي : عزاااا فضيحتيييش شتحجوووون انتوا هااا ؟

بهاللحظة دخلوا بابا وأنين وحدهم بدون خالة
واجه بابا متفاجئ موج اجت تشرد بس هو سحبها من ايدها وظل يباوع بوجهه واصر يعرف كولشي .

احمد رزل انين ليش جابته واجت ...
هو رد عليه ولك اني قلبي حاس عدكم مصيبة ولك هاي شمسوي بأختك وانتي مووج ليش تخلينه يمد ايده عليج ابويه ليييش شسووويتي احجي احجي نزلتي راسنه شسوويتي ؟

يحجي ويلهث كعدت موج تحجي كل شي وتبجي متتت قهر عليها سودة عليه مقهورة ومكسورة حيل الله لايوفقك اووس .

بعدها رحت خابرت شرار لان طلع روحي بمكالماته
بس يررن تليفوني واغلقه ..

خليتهم كاعدين يحجون ونتبهت لبابا تعب حيل كوة كاعد خفت عليه وقلقت حيل ورحت طلعت تليفوني عود داخابر شرار يطلعنه من هالورطة .

فتحت تليفوني شفت صورة الخلفية مخليتها اني صورة علي الدر ، لابس شماغ ومبتسم ابتسامته الرجولية الساحرة ووبصفه دانيال وجهه يمه بس مغمض عيونه لان شمس ضاربة على وجهه بس ضاحك وطالعات اسنانه .

غيرت رأي مراح اخابر شرار راح اخابر علي الدر وسأله شكو بالعلاكة لان نسيت اساله لمن جنه واكفين .

خابرته واجاني صوته بعد عدة رنات
كال ها ام جاسم احجي؟

كتله شكووو جان بالعلاكة ؟

رد بحيرة يا علاكة ؟

علينا!!! الي انطتها الك ختام شفتكم بعيوني محد كلي لا تنكر ..

رد بعصبية ولج علينا شنو شنو هاللهجة هاي ؟ وانه جم مرة كايلج بالشغل اذا شي مو مهم لا تخابريني .

يعني هسه هذا شي مو مهم ؟ رجلي مرة منطيته علاكة
وماعرف شنو بيها ؟

رد : يعني انلام لمن اسميج ام فاضل ؟ على كد الفضول الشايلته .

ولا يهمك اجيبلك فاضل بس كلي شكو بالعلاكة .

ضحك كال لا اريد فضيلة ..

رديت والله اسويلك فضيلة جاسمية كريمة اي شي .

كال ولج فرح عندي شغل لاتعطليني وروحي يم اهلج شوفي شنو مشكلتهم من حقج بس ديري بالج مو تكببينهم .

تجي عليه ورة متخلص شغل ؟

لا ما اجي ابقي يم اهلج بويه الله وياج .

ادري بي يتهرب مني مايريد يكول شكو بالعلاكة يس مصيرك اعرف يا ابو مهيب .

شمرت التليفون ودااطلع سمعت صوت التليفون يرن رحت اخذته شفته شرار يتصل ، ركعت كصتي شلون نسيته!! هو حتى منايم البارحة خطية .
خابرته اجاني صوته كال بشري ؟

كتله شبشرك ماتكلي صخام ولطام ...

رد : اي هو هذا الصخام واللطام اريده احجي الي مو فتيتي جبدي ادري وين صرتي مو اريد ارجع انام وداانتظر .

تنام تنام شرار واختي بسببك مصيبة هلكبرها !!

رد بعصبيية فررررح تحجين لوو اجي لبيتكم افتهم .

لا يمعود وين تجي الاوضاع مكهربة حيل
وظليت احجيله .

خلصت مكالمة كال سهلة تنحل ان شاءالله
بس جان متوتر وقلق كلش ..

طلعت رحت يم اهلي وبابا تعب حيل للعصر تخربط كوة يجر النفس .. اختنك فد نوب .. سودة عليه انقهر
وداه احمد للمستشفى هو وسالم وموج تخبلت وبس تلوم بنفسها .

....

شرار ...

بقيت ليلة كاملة منايم وموج شكلها ماراح من بالي
وهيه مضروبة ، بقيت انتظر فرح وكلساع اغفي ، واتصل بيها ومترد الى ان ردت اني مشعول شعل .

من كلتلي على الي سوااه اوس تمنيت ارتكب جريمه بهالحظة ، رغم نعسان بس رحت غسلت وجهي بمي بارد واخذت سويج سيارة مهيب بدون ميدري وطلعت فكرت اروح لأوس واطلع الفديو من عيونه بس خفت تكبر المشكلة واني طزز بيه بس افكر بموج مافكر بشخص ثاني هي بنيه والها سمعتها .

ماعندي غير علي الدر اروحله فريت السيارة وتوجهت لالشركة مالته بعد ما اتحمل خاف كل شي يصير وينتشر الفديو وتصير فضيحة عاد هو يتصرف وهو علاقته زينة ويه اهل أوس خلي يحلها وياهم .

سقت السيارة وصلت للشركة ، شفته ماكو مموجود
اضطريت ارجع للبيت وانتظره ، بس ماكدرت اخذتني نومة للعصر .

لمن كعدت سألت امي كالت اجه وموجود بالمضيف ، طفرت رحتله ، بين ما خلصوا الزلم الي يمه شغلتهم وصلي الدور .

كال ها شرير شعندك ؟ مقلص عيونه ويباوعلي وجنه يعرف عندي شي .

خليت ايدي على لحيتي افرك بيها اباوعله واسولفله الي صار كله .

خلصت هو لزم سبحته وكال انت مو تكول اني اسوي المشاكل واطلع نفسي منها يالله بويه طلع نفسك

رديت بتنهيده طويله : هلمره عصيت

كال يطبك مرض حتى ما تسوي مشاكل بعد ...

شيخنا هسه اعتبرني رجال غريب مو اخوك وتعرف سوالفي ومو من شيم الشيوخ يردون اليدخل عدهم واليطلبهم ؟

رد : والله اذا دخيلي خوش ادمي اساعده بس مو انت ابو المشاكل ابو الروسيات

وكفت على حيلي : هااا صار بيها معاير مشكور شيخ ما قصرت تعبتك على الفاضي .

دااطلع سمعته فر سبحته وكال تعال بويه

يتبع ....

ممكن متابعة لحساب الكاتبات

islam_7j

Labua18

شكرا ع تصويت ☻