رواية هذيانٌ بين جمرٍ وجليد ..(ارملة اخي المجنونة) الفصل الثالث وستون 63 - بقلم نورا ناصر

االسلام عليكم
هذيان بين جمر وجليد
فصل ثمانية وخمسين
نورا ناصر

*****

لا تغفر أبداً لمن شعرت من فرط أذيته أن الله لا يحبك.

‏"إضطررت لِنزعكِ مني، أثقلتِني و أنا لا أنحني."

******

فرح ...

Flash back >>استرجاع

رجعنا للمزرعة وعلي بقى يمنه .. جان البيت فارغ ، هو فتحه على اديه ، محد موجود بس الحراس اثنينهم

اني تشكلت وظليت انظف لأن كله التراب البيت وهو اخذ الجهال بالمزرعة وظلوا يفترون ناموا شبعوا نوم بالسيارة

ورى ساعتين تقريبا اني خلصت تنظيف المطبخ وبلشت اسوي غدا .. خليت الدجاج بالفرن وطبخت تمن ورحت انظف باقي البيت

وكل شويه ارتاح واكعد اكرط جزر ويجيني دانيال ياخذهه مني واني اصيح عليه

راح لعلي كاله بابا بابا هاي ماما بس اتيح (تصيح) ..

رد عليه : اجيبلك ماما غيرها ؟
ويباوعلي رافع حاجبه ..

رد عليه دانيال : ماما اليلها (غيرها) هم تاكل جزر ؟

باوعلي ورجع باوع لداني وهو يمسح على راسه ويعدل بشعره .. لا بويه هاي امك ماكو مثلها .

اني وزعت نظري بيناتهم ها ولك داني تريد تتزوج اءؤ اا تريد هاذه شسمه..

انوب الكلمة جلبت اريد اطلعها ماكووو ..

كوة صححتهه وكتله ها تريد ماما غيري موو اتووبة اذا اطيك بعد جزرايه مالتي والله ..

وكل شويه ارجع واعيره بالجزر الي ياخذه مني ..

اخر شي علي كلي الولد راح يكره الجزر من وراج شكد عيرتي الخاطر ربج ، جزرة الكشرة عليه لو ضال جوعان احسن..

بعدها بقى يمنه هو يومين وتالي راح ..

بهاي اليومين فاطمة تمرضت جسمها كل انترس حبوب ناعمة وتكرصهه وهيه تحك بيهه ...

الخرسات انطوني التليفون خابرته وجاوب باشد الاختصار جااي ..

ولمن اجه بعدها
جانت عيونه براسه ومعصب مدري شبي وعرفت انو ابو هدى توفى انطاني التليفون خابرت هدى خطية كتلها بقية بحياتج وظليت ابجي وياهه

وخابرت موج واحمد وانين حاجيتهم والعصر اخذنا ورحنا لطبيب جلدية

كاعدين بالعيادة وجانت عدة عيادات بيها يعني مجمع
اسنان جلدية نسائية ومختبر وصيدلية ..

كعدنا ننتظر دورنا ، عندي فطومة وعلي لزم دانيال ...

اكو رجال جايب ابنه لطبيب الاسنان ، وزوجته للدكتورة النسائية ، كاعد ويهدد بإبنه والله اشبعك كتل ادمييك والله بس تكول اخخ ...

متت قهر عليه واباوع لعلي وهو يهز راسه ويستغفر ويفر بسبحته ...

انوب ظل يصيح على مرته ولج يله فضيهه دخلي ..

جاوبته شون افوت مو هو حسب الرقم واني رقمي عشرين قبلي ١٩ وحدة

كاللها امداج وامده شكولج ماماخذ مرة ماخذ حمارة ..

هيه خطية سكتت واستحت .. فشلها كدام كل الموجودين ..

علي هنا مكدر يسكت كاله انته متزوجها حتى تكرمها لو تهينها ؟

رد عليه الرجال يا شيخ والله فاهية تكتلني بفهاوتها

جاوبه اي بس مو تهينها كدام الناس!!! وبعدين انتَ مراح تنزل بس من قيمتهه راح تنزل من قيمتك الناس هسه راح تباوعلك وتسكت بس داخلهم يحجون عليك ...

وانه واحد من الناس هم حجيت عليك بكلبي ترة .. عود ابريني الذمة ولو هاي مو غيبه هذا انتقاد الشخصك ..

رد عليه ها شيخ شنوو كلت !!

رد عليه كلت اذا انت كدام الناس هيج تسوي بيها ببيتكم شسوي ! ابد ماعندك احترام لنفسك لان مامحترم حرمتك والناس هم ماراح تحترك وهاي مو رجولية منك

كال والله يا شيخ شسوي يوومية مريضة طكت روحي منها هيه وابنها ...

كاله اذا مو كد المسؤؤلية ليش تتزوج!

والله يا شيخ الزواج ورطة والله ..

شاورت عليه كتله علي والله هذا مو مال هيج حجي كون بالكرسي الكاعد عليه وعلى راسه ..

باوعلي خزرني ، سكتت ودرت وجهي .. وايدي على حلكي

بعدين اجت مرته كلتله الدكتورة تريد اسوي تحليل انطيني فلوس

ظل يصيح تحليل شنوو بعد يعني هسه هيه ماتعرف على حجيج وخل تكتبلج دوة

ظلت تتوسل بي والله متوجعة والله ما اتحمل بعد ...

كاللها مو هذا ابنج هم لازم اشلع رحاته وهم يراد فلوس منين اجيب

هو الرجال خطية مبين متعوب وبسيط حيل .. وابنه يعرج ومبين مو صاحي ابد يموت قهر

اني من اشوف هيج حالة اموت قهر واباوع لدانيال واحمد الله واشكره الف مرة ..

كام علي طلع فلوس وانطاهه لزوجته وهيه ظلت تتشكر منه وتدعيله

والرجال راد يرجعها هو صدك عصبي بس عنده عزة نفس واجه يطلع فلوس من محفظته بس علي لزم ايده الي بيهه المحفظة ورجعها لجيب دشداته

وكاله هذا هو دفعة بلاء اخذهه ماترجع ..

بعدهه دخلنه للدكتور ابو الجلدية ، فحص فاطمة
وكال لتخافون جسمها متحسس .. كتب النا علاج واخذناهه للبيت ..

راح علي لبغداد بالليل بيومها وجان كلش ضايج ..

واني اهتميت بفطومة هو انطانه عصارة وسائل امسح بي جلدهه المتحسس بالكطنة ..

بس اشو هاي زادت وحتى صارت تحك ويطلع دم منها متت من الخوف وخابرت على علي

وراها اجه بس ابد ميتحاجى كال راح اخذهه لبغداد لطبيب جلدية اعرفه ..

دانيال تخبل من االبجي هم يريد يرووح وياهم ..

كتله خلي نروح هو كلب الدنيا ...

_ سكتي فرح مو تردين ترحين تسويلي مشاكل فووك ماااني مشااكل الدنيا كلها فوك راسي هناك كعدي وسكتي ..

اني متحملت هاي صار اله كم يوم هو عيونه براسه اني شنو ذنبي وشعليه بالمشاكل هناك اصلا مادري شصاير

كتله ادري بيك ادري انته عبالك اني هاملة بنت اخوك
دااشووف دااشوفهه نظرة الاتهام بعيوونك داااشوفهه ..
صيحت بدون وعي او كردة فعل على صياحه الي ماله مبرر ..

ترك فاطمة واجه باتجاهي كال ولج اشوو انتي تخوطين بصف الاستكان فكييت حلكي حجييت اني اتهمتج بشي لو بس تردين موضوع تفتحينه

وخلي يكون بعلمج فاطمة انتي الي تربينهه وماراح تفارك اخوهه افتهمتي لوو لا ؟

كتله واني مكايلة غير هييييج ترة واني اربيها ممتعاجزة منها بس انت لتعاملني هييج ترررة ما اتحملك مااتحمل

عاط هذااا هو سدي حلكج لعد سديييي ..

رفعت اصبعي السبابة بوجهه واصيح لا تسكتني علي لااااتسكتني خليني احجي اكوول ضيم كلبي مننك خلييني

خله اديه على راسه من ورى وحركهم ليكدام بعصبية وصاك اسنانه ويحجي .. غيير تسكت غيير تسسد حلكهه

لزم ايدي الي موجهتها باتجاهه بتهديد وجعصها حييل ووجعني ولف ايده على صدري ولافني كلي صار ظهري على صدره ويعصر بيه ...

وظل يفح بعصبية يم اذني .. حلكج سدي ،
.... سدييي حلكج ولا تخلقين مشكلة من لاشيء وعلى اشياء تافهة تلغين ...

ماناقصج انه ترة ...... ضييم الله والدنيا كلها على راسي .. ابقي هنا وسكتي ..

بعدني عنه وايدي متووجعة حييل منه ..
باوعتله بكل حقد ... والله اني اكرهك اكرررهك وساعة السودة الصرت بيها مرتك سااااعة السوودة ..

صفكني راااشدي قووي على خدي .. عطت ولزمت خدي وارتديت للخلف بخطوات بسبب خوفي منه ..

هو ظهرت علامات الندم على عيونه وبسرعة اختفت وحل محلها البروود ..

اخذ فاطمة وطلع .. هو جاي ويه السايق حرك السيارة وراح ..

ودانيال تخبل من البجي .. بس يبجي على فاطمة ..

كووة سكتته واصلا اني جنت محتاجة احد يسكتني لان جانت تبجي لان ضربني عمود سبب تافه بس هو جان معصب حيل

اصلا هو السبب محد كاله يبعدنا كل هالبعد هذا عن بغداد ويجي وطريق طويل ، هسه شدعوة هلكد مبعدني عبالك راح يجي احمد يخطفني ويطلعني لو هذا عقابه الي مراح يخلص ..

سكتت دانيال فتحت اله التلفزيون ورحت للمطبخ وظليت اسوي كيك ، اخبط كريمة واسوي صووص شوكولا

لان ضايجة طلعت حركتي بالكيك اريد اغير من نفسيتي شسووي اريد اعيش

واني بهاي الفترة صار الكيك لعبتي حيل حبيت ازينه واسوي منه اشكال

خليت قوالب الكيك بالفرن والكريما والصوص بالثلاجة ورحت للغرفة

طبيت للغرفة ملكيت دانيال ، طلعت ادور عليه واصيح اجو الخرسات والحراس وحتى الفلاح وهم ماكو

كلبنا المزرعة كلاب وهو داني ماكو ، متتت ظليت ادك والطم

اجت وحدة من الخرسات جابتلي التليفون ومكالمة من علي خليتها على اذني واصرخ

علييي دانيال مااكو الحكني

كال بعصبية لا حول ولا قوة الا بالله ولج فهيتي عنه ..

صيحت بالبيت بالبيت خليته بالغرفة وهسه ماكو

دورتي فوك السطح ع الشط شفتوا الكاميرات ووووولج شسووويتي بالولد ولج فرح لايكون هاي لعبة منج ترة والله مراح ارحمج

عيطت رووح رووح تحملني مسؤؤلية هذا ابني شوون اسوي لعبة هذا لوو ابنك جان اهتميت بس هذا موو ابنك هذا يتيم ابو مات وحتى ابو مجان يحبه بس اني احبه

وكملت بقهر وهدوء ... كمل طريقك يا شيخ كمله اني ادور ابني واني الكاه ..

رجعنه ندور ندور ورحت على الشط والخرسات موتني خووف موووتني ياشرلي اطلع صدري للشط حتى يطلع ابني

اني وكعت بالكاع من الخوف واجتني نووبة صرررع وحسيت صدك راح مني ابني وللابد ووكع بالشط وغرك

صحيت على صوت علي يكعد بيه .. وعيت شفت نفسي بحظنه ... اول مانطقت بشتات ..
كتله علي دانيال!!!

حك راسه كال لكيته لكيته متلفلف وداخل بالكنتور ونايم وظل يرزل بينا كلنه

كال والله اني جنت شويه واوصل لبغداد ورجعت تالي يطلع جاسم نايم بالكنتور طيح الله حظكم كلكم وخلى ورجع مرة ثانية

واني ركضت حظنت ابني وجان دنيا الليل اخذته ورحت للملحق ..

قفلت باب الملحق الخارجي ورحت للغرفة دخلت بيهه اني ودانيال شردت من الخرسات لان حملتهم مسؤؤلية
المفروض اني بالمطبخ هنه يراقبنه مو دايحات مدري وين ...

وهماتين حيل ضايجة من نفسي لان هسه علي عباله داللعب عليه لمن رجعت للمزرعة وهو ماشي طريق طويل ..

اكو بالملحق جرارة نايلون بيها العاب واغراض دانيال ...

هاي الجرارة جانت بالغرفة ، بس لمن علي بدل اثاث الغرفة جابهه هنانه هيه والاغراض الي بيهه

بقيت كاعدة على الزولية ودانيال يفتر بالغرفة ويلعب .. ويطلع اغراض من الجرارات

اخر شي طلع شموع هوايه ، هو قبل فترة عيد ميلاده سويته والشموع لمن طفيتهم خليتهم هنا

هو اصر اله نشعلهم .. شعلتهم اله كلهم وظل يطفي بيهم واني اعلك ..

بعدها نعست اني وهو بيده لعبه مثل دجاجة يلعب بيها وتسوي صوت حضنته ونمت ... والشموع نسيت اطفيها ..

اني نومي ثكيل بالعادة ، بس الي صار معجزة لمن صحيت بذيج الليلة وشفت النار مشتعلة بالجرارة بس الدخان اكثر واكثر منها .

‏كعدت على شي جاثم على صدري‏ ‏فتحت عيوني وما اشوف بس الضباب والظلمه‏

ابني لا حس ولا نفس والظاهر مستنشق ثنائي اوكسيد الكاربون هواي وهو نايم ..

احتاريت حاولت اطلع صوتي اصرررخ مايطلع صوتي وبس اكح ومخنووكة

دعيت الله ما تجيني نووبة الصرع بسبب الخوف الي دااعيشة النار محاوطتني وابني شبه ميت او ميت بالفعل ما ادري

شلته واضرب على ظهره داحاول افتح الباب مايفتح والقبضة مالته حارة تجووووي ..

احتاريت واناجي ربي ، النار راح تلتهمنا اني وابني احنه الاثنين

او بالاحرى احنه التلاثة ، ثالثتنا الطفلة الي ابطني ..

ركضت على الشباك هماتين ميفتح واني مخنووكة مخنووكة والفزع مغلفني ..

لا اكدر اصرخ ولا اكدر اسوي شي الصرخة ماتطلع بس بدااخل رووحي مايسمعها غير طفلتي الي ابطني ..

اخذت شمع داان وظليت اضرب على الشبباك كسرته كوة .. طفر الكزاز وبعدها كملت اضرب بي داسوي مكان لدانيال حتى اطلعه من الشباك لازم ابعده عن هذا المكان الملوث

ضربت دانيال على ظهره وسويتله تنفس اصطناعي اضغط على صدره عدة مرات واتوسل بي مايمووت ولا يستسلم ولا يتركني ...

دانيال حبيبي لاااتموووت لاااتتموووت امك محتاجتك امك ماعدهه غيرك حبيبي اتوووسل بيك لاتتركني والله اضيع والله اتخبل ..

ان جان ذرة عقل بيه بعدك اني ابد ابد افقد واضييع ..

واني دااسويله التنفس الاصطناعي هو شهك .. رغم الي اني بي ابتسمت والدمووع بعيني والدخان خانكني ...

وهو كووة ظل يتقيء قيء اسوود ويخووووف وانوب ظل يبجي ويرجع يتقيء ....

حاولت اخلي يبتعد عن الدخان وماريد تلتهمه النار خليته بين حدايد الشباك وهو يكح ويتقيء ويفقد وكل شويه هيج

واني ابجي واحاول اطلعه من الشباك كوة كوة الله سهل وطلعته وخليته بالكاع طخ بالكاع خطية توجع راسه لان اديه بعيدة عن الارض لمن خليته بس احسن مما يبقى بالغرفة بلكي بعيش
..

خليته على الكاع بقى مكلوب على بطنه ويكح وكل شويه يفقد ويرجع يكح ويتقيء ...ويبجي ويشهك ويناشغ

واني لازمة بحدايد الشباك وابجي واستنجد بربي ماعندي غيره ...

واني وصوتي ميطلع بس اكح اكككح متتتت واختنكت بس اهم شي ابني اول فرحتي مايحترك طبني طوب اني طز بيه خلي اموت ..

واناجي ربي مناجاة ‏محد يسمعها غير انفاسي ا وطفلتي الي معانقه الموت‏ ويايه ..

سمعت صوت باب البيت الي مقابيل الشباك انفتحت واخيرااا ..

ظليت اباوع واترقب بفزع وهلع وشوية امل ...

طلعن الخرسات لالاء مو خرسات جانن يحجن ويصرخن ...

يبوووي يبووووي مرة الشيخ احتررركت يبوووي

صحت عليهم بتووسل وهلع ... دخييلكم ابني اني خلي احترك ودووو ودووو للمستشفى وددووو ..

صاحت عليه وحده طلعي طلللعي لا تحتركيين طلعي ..رووحي فتحي الباب

كتله معليج بيه الباب مينفتح اخذي دانيال للمستشفى مخنووووك ..اخذذذي ..

شفتهم اخذوا واني انداريت كفخ اللهب بووجهي حركني حرك والدخان كله يدخل بانفاسي

وشفت النار دتاكل بالزولية وحتوصلني النار ويمكن تاكلني اني همين ، خفت حيل وتذكرت نار جهنم ....

تشجعت وقويت نفسي ودنكت عليها كفيتها كوة واحس طفلتي ببطني انشلعت وهيه برحمي

لان الزولية حيل ثقيلة حييييل بس النار حتوصلني منها ...

سمعت الحارس يحاجيني من الشباك وهو الفزع متملكه افتحيلنا االباب بوويه فتحي فتحييييي ..

كتله بعياط وصراخ باب الغرفة ماتنفتح ماااتنفتتتح ..

وهيه صدك ماتنفتح بسبب ضغط الحرارة وباب الملحق حديد واسمعهم ديكسرون بيها ..

ماكدر ابقى واكفة بالشباك اتنفس لان رجليه بادت ودمي تشبع بغاز ثنائي اوكسيد الكاربون وحفقد الوعي

كعدت جوة الشباك احمي وجهي باديه عن النار وبعدها استسلمت لفقدان الوعي .....

ومصير ابني بالنسبة الية مجهووول .....

مهيب...

رجعت للبيت اخذت اجازه لان سمعت نسيب لهيب مات ابو هدى كلت لازم اروح ويه شرار اعازي اخووي و اوكف بصفه ميخالف يضل ابو زوجته وجد بنته...

سبحت وكملت وشفت شرار ينزل حتى نروح بس جنت حييل ضايج ولحد الان موضوع هل خسيسه ماخذ مني قسم من تفكيري...

احس حياتي متورط بيها وشكد ما احاول اتقرب من ريلام واحاول ان نرتبط تطلع الي سالفه عوجه تخرب عليه الاول والتالي...

لزكولي بسالفة انت اخوها انت اخوها تالي حاولت اتخلص من هالسالفه انوب اجتني هوويمه والله شنو انت مغتصبني

اغتصب صخل وما اغتصبج هو شنو انتي صوره جرجوبه واغتصبج ...

اجه شرار وهو يلبس بساعته وكاشخ اخر موديل باوعتله بقهر...ادري هو المرحوم معرس لو ميت ؟

رد عليه بعدم اهتمام وهو يلبس بساعته...لا توكل الرحمة ربه بس ليش؟

هزيت ايدي ...بس ليش؟ الي يشوفك يكول المرحوم معرس ... بعرسك ما كشخت هييج

رد عليه بانزعاج ...دنجب قابل نروح وصخين ترى محد مات وره واحد لو تريدني مثل حزن ام شوارب ..ما تحف شواربها لان حزنانه

درت وجهي منه على صوت حبوبتي طلعت من غرفتها لابسه ثوب اسوود وفوكاه كيبور مدري دانتيل شي خفيف اسوود وتعدل بي وريحة المسج والعنبر تعط منها صاحت وهي تعدل بفوطتها الفاخره...واحد منكم ينطيني هووويله الهيل مالي مخلص...

تنهدت...ياربي شبيهم ذوول احسهم كاشخين مو مال رايحيين يعزون معقوله هيج الناس صارت انوب تريد هيله

انتبهت النفسي اني صاير معقد لو على الحق ؟

اخذتهم ورحت وحبوبتي طوول الطريق تسوي بروفه وكل شويه وكالت...يمكن اكول هاي الكوله علمك طووب هز لندة وفلسطين

كلها شرار ...ادري يمه منو الميت نوري المالكي شنو لنده شنو فلسطين عادي كولي لندن

ردت عليه ...جاا خوش اكول هاي حطوو بالنجف دلال .. طب راعي العزوبية ..

وكملت وهي تلطم...وسبع دوال على ابو هديوه مجدرين

ضحكت تفاجئت من كلامها...سبع دول على ابو هدى نصبوا جوادر...

ردت عليه...اي ولك مالك شغل المهم اريد يكولون هاي الجالت الميدان منين ...

والنسوان تنابز وتناغز ...هاي ام الشيخ علي الدر جدة لهيب رجل هدوه

مسافة الطريق كلش طويله جدتي تعبت من الكولات واللطم وخلت ونامت وهي تشخر وفاتحه حلكها وشرار كتف اديه ونام بس ما يشوخر لو يشوخر اله ادفره واشمره من السياره...

وصلنه البيت ابو هدى خابرت ابوي وصف المكان لان تيهت وبعدها رحنالهم كعدتهم اول ما نزلنه وشافوا الجادر جدتي شدت احزامها وصاحت...يبوووووووو يبووووو ياهو الكال هذا الشط نشف ماية .. وانا استاهد عمامة البيهم كفاية ..

واحنه خلينه ودخلنه للجادر فرينه الجادر كله سلمنه طاحت رجليه شكد مكروه هل سالفه بالفواتح واحد جاي تعبان يجي يسلم على فيلق مال زلم ...محد يحس بيها اله المجربها...

سلمت على ابوي ولهيب وكعدت شويه وجابوا الاكل اكلنه وشربنه جاي ومن بعدها قرينه الفاتحه للمرحوم

بتنا وثاني يوم ابوي ترخص منهم ورجعنه لان عدنا اشغال وان شاء الله خاتمة الأحزان الاهل هدى ويصبرهم على فراك والدهم...

من رجعنه انتظرت ابوي شويه يرتاح وافاتحه بموضوع هويمه الادبسز...

تقريبا فاتت ساعتين ابوي شويه ارتاح ونام وكعد يصلي واني دخلت اله كعدت مقابيله وتنهدت...

باوعلي وهو يسبح كال...احجي بويه مهيب شكو اشوف بعيونك حجي ؟

تنهدت بضيق ونفخت بقهر...يابه صارت وياي شغله ما اعتقد اذا سمعتها مراح تصدكني ...

رد عليه بتنهيده...ليش بويه ما اصدكك انت ابني وتربيتي واعرفك اذا جذاب واذا صادق شلون ما اصدكك احجي ولا تشكك بيه

نزلت عيوني مقهور ومرتبك...يابه والله اني ما الي ذنب بلي صار بس هاي بنت عمتي هيام انت تعرفها وتعرف شكد هي نذله ومستفزه ويطلع منها كلشي

باوعلي بنظرات وكأن منتظر اكمل باقي كلامي

عقدت حواجبي بقهر:...يابه اني جنت بواجب رسمي وحتى اذا حاب اسأل عني بدوامي وأسأل باقي الضباط والداخليه

احنه جنه بواجب على واحد مشعوذ يستغل البنات وعنده مكان مشبوه وياخذ عذريتهن في سبيل يسويلهن سحر ومحبه وزواج ومن هالسوالف التعبانة اعتقلناهم جان من ضمن المعتقلين هي هيام ...

ابوووي من سمع اسم هيام انتفض بجبروت وشد على سبحته بعزم و وكف مصدوم...ولك شتحجي انت شهال سالفه ولك كمل احجيلي

وكفت على وكفته وبلعت ريك...يابه افهمني هذا الصار والله واني سويت باصلي وبمساعدة واحد من الضباط كدرت اطلع هيام من السجن كونها ما عليها قضيه او مذكور اسمها ...

جانت تبجي وتنوح اخذتها البيت عمي حسان ومن تالي خابرت على امها اشو هاي اجت وهاي اتهمتني ان اني مغتصبها ؟

فتح عيونه مصدوم ومن بعدها مسح على وجهه بتوتر..استغفر الله ربي العظيم من كل ذنب عظيم استغفر الله يرب ربي لا نسألك رد القضاء ولكن نسألك اللطف فينا

باوعلي بعصبية : ...لك يابه انت ليش ما تفهم هاي حيه شلون تنفرد بيها ببيت حسان جان جبتها هنا للقصر موجوده جدتك وعمك ومرة عمك ...

كمل بقهر: ...والله هيج شكول مو مال واحد يساعدهم هاي مخليها مجيمه بالسجن ومخليها عبره لامة محمد وكل وحده تروح تفتر عند الدجالين...

زفرت بألم...يابه شسوي غير كلت هي بنت عمتي عرضها من عرضي ما ردت اضرها ويحجون بيها اشو انوب لافت السالفه عليه...

نزلت راسي مقهور حيل...المشكله مو هنا المشكله هي دكول اني مغتصبها انوب لا تطلع صدك ناطيه عذريتها للساحر وتالي تطيح براسي عاد والله هنا احط طلقه براسها واموتها...

تقرب مني وضرب على كتفي...كول يالله بويه هذا مو حجي والحقيقه تبين لو بعد حيين وان اني حالها الك ومطيح حضها وحظ امها الما عرفت تربيها...

هي يضل عارها على اهلها وعمامها واحنه متبرين منها من زمان بس ريلام الي تنتمي النه ...

من ذكر اسم ريلام احس بفرح نعش روحي يالله شكد احبها هالبت اعشقها من زمان يارب تصير الي ويبعد عني هيام الجايفه ...

حمدت الله وشكرته لان ابوي تفهمني وكال هو يسد الموضوع ويحجي وياهن ويطيح حضهن واذا تمادن يوصل خبر العمامها...

موج ...

بلعت ريك وطخيت راسي بيدي ، وتوجهت لباب البيت ورحت فتحتهه الهن

هنه مثل الهجمن هجووم وحتى ماسلمن ، وبلقيس تصييح وين وينه الشيخ وينه احجي مدانحجي وياج ..

تنهدت وتمتمت بداخلي اللهم طولج يارووحي ..
كتلهن واني احاول اسيطر على هدوئي ونبرة صوتي ..

جاوبتهن راح الشيخ لفاتحة ابو هدى توفى اليوم الظهر ..

هيه لطمت صدرها يااا الله يرحمه اي يموت الزين وتبقى العارية وفرت ايدها واخذت بنتها وراحت كعدت .. على القنفات بالصالة

وهيام تتصنع البجي مدري شبيهه بقيت مستغربة وامها تكول الها اطيح حظه اطيييح حظه والله ودباره عندي وابوه اذا ماادبه والله افضحهم واشتكي عليهم وبعد مااسكت

اني خفت من عدهم ان جان قبل شويه جنت خايفة من الجني وخايفة وحدي هسه خايفة منهم ...

هيام نامت على رجل امها وامها تخابر مدري شنو تحجي بالتليفوون .. وتخابر ..

رحت قدمت الهم عصير وكيك خليته ع الطاولة بس ابين الهم اصلي مو عمود شي ثاني لا اتلوك ولا شي

بس هم صفنوا من شافوا تصرفي هذا ..

خليت ورحت للغرفة ورن موبايلي ريلام تتصل بيه
جاوبتها سلمت عليه وكالت موج صدك ماما وهيام يمج ..

جاوبتها اي .. كالت ماتدرين شبيهن وشعدهن عفية!!

رديت بعد حسرة لا والله ..
بتوسل : حبابة اذا تعرفين كولي شي يخص مهيب!!
رديت عليها : ريلام والله ماعرف صدكيني ..
هيه ودعتني وسدته ..

نزلت ماشفتهن السعالو رايحات ..

بعدها صارت مشاكل كومة بسبب هيام والتهمة الي شمرتها على مهيب ..

وبيوم ومن الصبح جنت نايمة يم شرار وغافية سمعت موبايله يرن اكثر من مرة وهو كعد يحجي بالموبايل ومصدووم .. كمت بسرعة ..

وهو ظل يباوعلي بنظرات قلق وخووف ...
بلعت ريك بخوف وسالته شكووو فرررح بيها شي ؟

اجت ابالي فررح لان انين من بالليل قبل لا انام اني مخابرته وحاجية وياهه

الا فرح وحدهه وبغير محافظة وحامل اجه على بالي خاف وكعت وصار لطفلتها شي لو داني بي شي ..

خاصة الشيخ جان البارحة اجه وجاب فاطمة ويا وجانت مريضة خطية واني اهتميت بيها .. لان محد بالبيت بس اني ..

هو شرار صدمني لمن كال فرح تعرضت لحادث .. انهاريت واني انحب واساأله حااادث شنوو شرار شنوو ؟

كال حررررريق ..

فرح ...

بعدها بين الوعي واللاوعي حسيت نقلوني بالسيارة للمستشفى بس داني مجان ويايه وحدي ..

هناك اني جنت دااموووت حرفياا داااموت ... خلولي اووكسجين لان جنت مختنكة اكثر شي من الدخان ..

واوجاع مثل الحمم البركانيه تاكل وتنهش بروحي وجع لا يطاااق الحرق اصعب شي من بعد الولاده...

جنت بصالة الحروق واني اتلوى بين اديين السسترات والممرضات والدكتورات واني اصرخ بصوت مبحوح وضاج المكان : يمممممممه ولج يمممممه اااااااه راااااح اموووووت فدوووه عفيييه انطوني اي شي اضربوني ابره وموتوني والله ما اتحمل ما اتحمممممممل ...

احس وجهي نار مشتعله بي كل خليه بجسمي تاذيني كل شرايين بداخلي احسه يصرخ من الوجع وجع كااااافر اقوى من كل شي وما يسكن اببد...

حجت ويايه الممرضة : على كيفج ماما بس خلي نداوييج وهسه ترتاحيين

لزمت ايدها بيدي المحترقه واتوسل بيها والدموع تارسه وجهي ترس وتنزل على حروق الموجوده برقبتي واعلى صدري وتاذيني اكثر وتحرگني حييل لزمتها بتوسل...فدوووه فدوووه الله يخليج بس جيبيلي ميي بس خلي على الحرگ مي والله حاااار حاااار فدوه كوون مي باااارد بس شويه ارتاح فدوووه ..

باوعتلي باسف وحيره خطيه جانت نظرتها حزينه على حالي...سلمي امرج الربج المي مو زين هسه اخليلج مغذي ومسكن ترتاحين والله

رجعت لزمتها واني الدنيا هايجه بداخلي وما استقر بمكاني من الوجع : ...فدوووه بسرعه فدووه والله راح امووت من الوجع...

من بين وجعي ومن بين تداويهم اليه جنت الهج باسم داني وطفلتي الي نرعبت وهيه بداخل بطني...

حطيت ايدي على بطني بالم وهديت من روعي شويه وكأن نسيت اوجاعي من تذكرت الموقف ما عشته الوحدي عاشو وياي توأم روحي الي هم هل وردتين بنتي و ابني الغالي...

ضمدوني واني رجعت النوبة البكاء محد يتحمل هل وجع اببد والموت ارحم من الوجع الواحد يتمنى يندفن يختنك بالتراب ولا يتحمل هالوجع...الموت الي الناس تخاف منه اني تمنيته ...

سكنت شويه من الالم ولو هو ما يسكن بس اني تعبت من البجي والوجع ..

جنت اني هوايه اتهمت علي الدر واغلط عليه واكول كوله بسبب الحقير هو السبب هو الحبسني هوو وجنت حيل منهاره ...

وحده من الممرضات سالتني...زوجج هو الي حركج ؟

باوعتلها والدموع لاصقه باهدابي ومذهووله هزيت رأسي بأي...اي هوو هوو السببب هووو السبب بكووولشي...

رجعت راسي على السديه و شمرت عليه جسمي المتعوب واني ابجي...وكلساع اختنك واكح .. احس بعدهه ريحة الدخان بخشمي ..

دقايق وحسيت انفتح الباب وهو يصيح...وينها وينها مريتي فررحة كلبي وينها...

اول ما دخل وتقابلت عيونه انصدم من شكلي جان وجهي مشدود بشاش وذايبه روحي من شفت عيونه واسفه على حالي ..

واني انهاريت برعب وقوووه وهذره....اطللللللع اطللللع كله بسببك انت السببب طلعوووا ما اريده راح امووت طلعوا هو السبب هو السبب ......

يتبع ...