رواية هذيانٌ بين جمرٍ وجليد ..(ارملة اخي المجنونة) الفصل الثالث وخمسون 53 - بقلم نورا ناصر

السلام عليكم
اشتاقيتلولكم 😘

رواية هذيان بين جمر وجليد
الفصل تسع واربعون
نورا ناصر

(())
من أينَ لكَ هذا البرود الصارخ كصرير نافذة في الشتاء
والتجاهل القاتل كموت يختار من يشاء والقدرة على الصبر ، لكنه صبرٌ لإتمام التعذيب ، والبقاء وحيداً وحزيناً ، كمنارة مهجورة على شاطئ والنوم بلا مبالاة كعصفورة في قفص ...
(())

هدى ..

صفنت بوجهه ثواني مصدووومة وخااااايفة وبعيوني دموع مسجونة .. بشنو غلطت اني ياربي!!

لزم ركبتي من ورى وميلني ليكدام .. هالحركة عدمت مقاومتي ..

ظل يوجه لي كلامه بغضب حارق ويشدد على احرف كلماته بتصميم ..
_ احجييي فتحتيله الباب لووو لا وشعنده وياااج ؟

خليت اديه على ايده الي لازم بيها ركبتي واريد افلتها واخيرا تركني ابتعدت عنه بخووف واباوعله بصدمة وقلبي مرعوب
والقرآن مافتحت اله الباب والله ماعندي شي وياه والله
لهيييب شبيييك لو عندي شي ويا اخابرك واكلك ؟؟

ظل يهز بيه تعرفي منوو شفتي!!!!
هزيت راسي برفض وملامحي متقلصة بسبب الخوف منه فجأة انقلب وحش معقولة الهالدرجة يشك بيه!!!

تمتمت بنحيب ودايرة وجهي عنه
_ شفته فات للشقة الي مقابيلناااا ....

تركني بعنف ارتديت بخطوات ليورى وهو طلع من الشقة وطبك الباب بقووة .

واني رحت امشي بقهر وحسرة وامسح بدموعي الي غسلت وجهي وتوجهت للغرفة فتت وقفلت الباب

رحت ع السرير حضنت رجليه لصدري وخليت راسي بين ركبي وصرت ابجي بقهر ما استاهل هاي المعاملة ولا اتحملها بعد ابد

ورة دقايق سمعت صوت ضرب على باب غرفة النوم
واسمعه يصيح هيييه انتي ويينج طلعي

واني فعلا محتاجة اطلع واوجهه واخليله حد لان متت وتعبت من هاي المعاملة

وهم اذا استمر يضرب ع الباب هيج راح تكعد ديما مخروعة وبعد شيسكتها .

فتحت الباب من القفل ووكفت كباله بلا مبالاة
وهو مشتعل نار مبين من وجهه ، عيونه بكصته وصايرات حمر ودم يم حاجبه

كتله ببرود " نعم "

لزمني من ملابسي وسحبني للصالة ودفعني بنصها
رجعت ليورى وكعدت ع القنفة وهو ظل يحقق وياي واني بس اباوعله بحقد وكررره

من شوكت هذا يدك الباب عليج ؟؟ هاا وهاي اول مرة لو شنووو ؟ متحجينن شكوو ساكتة احجي لا اني اعرف شون احجيج

باوعتله بعين ونص كتله خلصت هسه ؟ اسمع اني مستحيل اعيش وياك ع هالمعاملة هاي اني ممسوية شي غلط طلكني خليني اروح للسماوة بيت ابوي موجود ومفتوحلي احتواني كل ذيج الاشهر الي انته مسافر بيها وداير وجهك عني يحتويني بعد اكثر

مد ايده نبت طرف اصابعه بكتفي بقسوة
وكال بغضب : ولي درب الصد مارد ان شاءالله بس بنتي تبقى هنا وانتِ سبع حجارات وراج

نطيت واني متخصرة اله لاااا والله هيه مو بنتك حتى تاخذها بنت واحد ثاني

ضربني رااااشدي من قووته احس اسناني تحركت بفكي وبعدها ماحسيت بجسمي بسبب الضرب الي اكلته منه

دخل جوة واني بقيت بالصالة ابجي واشهك واناشغ وامسح بالدم الطلع من شفتي وخشمي وحتى خدي اتجرح بالمحبس مالته وصار يجري دم منه

كرهته وكرهت نفسي وهاي الدنيا كلها كرهتها تمنيت اموت بهاللحظة وتنتهي حياتي واندفن وتندفن ويايه اخطائي الي ارتكبتها بحق نفسي والي كلفتني هواي

فرح ..

من لمن راحت موج واني اكضي ايامي الليل طويل وحالك مايعرف الرحمة وعلى طوله واني ابجي مثل طفل يتيم مشتاق لأمه ..

والخرسات يفترن عليه ماعرف اسمائهن سميتهن من يمي ديالاك رقم واحد وديالاك رقم اثنين ..

انوب طركاعة لايشتغلن لا ينظفن كلها واكعة براسي انظف واشتغل واسوي غدا الهن وللفلاح والسايق والحارس

شكد جنت مدللة اني ببيت اهلي وحتى بعد ماتزوجت شغل مو هلكد اشتغل هسه الدلال طلع من عيوني

واخيرا ناموا فطم ودانيال واني طلعت بره الساعة تلاثة العصر اشتم هوا

شفت سيارته دخلت للكراج صارله عشرة أيام ماجاي ولا شايفته يدز مهيب لو حسان يجون يشوفون الوضع ويروحون ..

خو يوم الي يدرز حسان بعد شويه ويصير مكامش من الروس اني وياه لا اطيقه ولا يطيقني

لمن شفته نزل من السيارة باوعلي وعدل عباته ماقلدته نطيته ظهري ورحت للشط

وكفت ع الشط وحسيت بي اجه ورايه سمعت حفيف خطواته حجيت واني منطيته ظهري وعيني على الشط : هذا المي يغريني ...

لزمني من كتفي بدون مايديرني عليه وقربني منه ببطئ وثبات ، طاوعته اني بدون مقاومة
رقة نبرته وهمساته خلت قلبي يرفرف بين اضلاعي
بشنووو يغريج ؟

حجيت من يمي بما انو انته اجيت والجهال بأمانتك هسه اشمر روحي بالشط واخلص من حياتي وأخلصك

دارني عليه والتقت نظراتنا خزرني وكال بلا خبال ام جاسم ويله امشي حضري الاطفال خلي اخذهم يتونسون

سألته بحماس وين تاخذهم ؟

كال للالعاب

سألته بتوسل : واني مااروح وياكم ؟

كال : انت مو جاهلة هم جهال ..

درت ظهري مرة ثانية وافرك باديه بتصميم
كتله روح حضرهم انته هم نايمين كعدهم بس اتحمل خبالهم لان من راح تكعدهم مشبعانين نوم ورح يبجون

كال وانتي شعندج ماتجين تحضريهم ؟

كتله واني صاكة سنوني وعيوني ع المي ...
عندي سالفة ويه الشط اريد احلها ..

سمعت صوت ضحكته وحسيت باديه خلاهم على كتفي وسحبني اله رجع ظهري على صدره صار وايده على بطني يتحسسها ..
كال اكيد هسه بنتي نوران ضايجة تريد تطلع تتونس اخذج لخاطرها ..

نعم نعم نوران ؟ والله اله اسميها كاظمية مدام تصيح لدانيال جاسم ..

ضحك بصووت وباس راسي وكال شوكت تكبرين انتي والله مادري ..

سكتت عنه ، مشى بيه واني جوى ذراعه
همست بتوسل عفية علي لاتشيل عليه بكلبك ....

هز راسه وكال شي واحد اشيله بكلبي

بنبرة مكسورة ودمعة مسجونة : سألته شنو هو ؟

كال بس انتِ ...

لعد ليش تعاقبني بغيابك!!

احسن لانج تستاهلين اذيتيني ولازم تضوكين من نفس الكاس ..

وكفت مقابيله اباوعله : يعني هسه انته تتلذ بألمي!! تطربك أهاتي ؟ تسگيك دمعاتي؟ تتغذى على وجعي ليش ؟

سكت بس يباوعلي ونظراته من نار وجمر
كتله انت مو رجلي لا والله انته صرتلي حبل مشنقة وموت ....

بعدت عنه ورحت قبله سبقته ضايجة منه حيل قاسي وبليد ومتعجرف

حضرت الجهال اثنينهم وديتهم يم السيارة باوعت هو واكف بعيد يم الحارس والنسوان الخرسات
يحجي ويوجههم باديه وهم يصغون اله ..

شافني من بعيد وكف شويه يحجي وياهم وبعدها اجاني ..

وكف يمي كف عباته يباوعلي كال وانتي خو ما راح ترحين هيج ؟

انطيته ظهري كتله بنتر اشر باديه : ماروح اني ، اخذهم بس انته وروح يله

لزمني من زندي كال خفة وراحة بس تعاي وياي سحبني من ايدي للبيت

وهو يسحبني حاجيته بعصبية وووين مووديني علي اتركني شجاااك !!

كال الظاهر ماراح تتعلمين الاحترام تعالي اعلمج شلون ماتحجين بنتر وتقدرين الواكف كبالج

فوتني للغرفة ودفعني ع السرير كعدت كعدة وهو اجه انحنى كدامي يخووزر بيه عيونه حادة ومشتعلة ...

_ شنو هذا صوتج شعلوه ولسانج شطوله ماتتوبين انتِ ؟؟ البستان متروس اوادم هيج تصيحين كبالهم

ملت ليورة ابتعد منه خايفة
كتله بصوت يرجف
ما صيحت اني وبعدين مثل ما انته ممخليلي اعتبار اني

مكملت ولزمني من زنودي ورفعني اله بعصبية
تحترميني لو كاتل اهلج هسه مفهووووم لو لا ؟؟

ابقي هنا يطبج طوب انتي طووول عمرج ماراح تتغيرين ولا تتعلمين من اخطائج ولا راح تتعلمين الاحترام لانج ماتعلمتي من صغرج ولا تربيتي عليه ...

راح للبردة سحبها من السكة بيد وحدة وشمرها برة الغرفة وراح سد الباب وقفله من برة

احنه لمن اجينه هنا جان اثاث بسيط بس لمن استقرينا اثثوهه النا فرشوا الارضية وجابوا النا اسرة حتى لدانيال همينه سرير وجرارات نايلون مدري بلاستيك اخلي بيها اغراضه وملاعيبه.

باوعت شفت الخرسة تفتر يم الشباك يمكن هو موصيهه تراقبني

رحت تمددت ع السرير ظهري ع الشباك
ونمت غفيت مادري لشكد حسيت بدانيال يمي يبوس بيه وفاطمة هم شيسوي هو تسوي همينه تبوسني

حضنتهم بوستهم ومددتهم يمي بس هم مبين شبعانين نوم بالسيارة ميقبلون ينامون اله يريدون يلعبون لان علي مشتريلهم العاب

كعدوا بالكاع يلعبون واني طلعت من الغرفة بس هو علي ماكو ماشفته كلت خفة وراحة بعد احسن من اشوفه لو يغثني لو نتعارك

طبيت للمطبخ شفت علاليك كبيرة ع السنك محطوطة
فتحتهن شفت بيهن راس مال عجل انصدمت عزااا ووياه كراعين

طبت الخرسة وظلت تأشرلي على راسها عود ابو عكال وغترة وعلى وجهه عود ابو شوارب وتأشرلي على الباجة يأمرني هو انظفها

لطمت صدري عمت عينج اي والله تعاي مدام ماتسمعين تعالي خلي اقسملج اني ما حب جرح الخواطر

بس خليني اغرد بلكي ارتاح شويه اني ويني ووين تنظيف الباجة وبعدين هسه ليل شنسوي بيها

سمعت صوته ورايه التفتت جان واكف
كال اي نظفيها وباجر اريدها ع الغده

كلت اله بلهفة انته باقي ع الغده لباجر؟؟

مجاوب على سؤالي جان نازع البشت مالته باقي بالدشداشة رن موبايله اخذه وراح يخابر

واني الغبية عبالي راح اني ممنظفة باجة من قبل كعدت عود نظفتها واسمع الجهال يلعبون يمه

الباجة نصها انشمرت كشطتها كشط وبقى شويه بيها قليل شمدريني ماعرف اسويها

اجت الخرسة وراي تفر براسها بعدم قبول ورجعت الي شمرته بالجدر ونظفته من جديد وشالته خلته بالمجمدة لباجر للغدى

اني حتى لمن كسرت اسنان الراس مال الباجة كسرت وياه نص العظام وشمرته وياه شمدريني اول مرة انظف

ظهري انكسر وهيه تجيب وتخلي كدامي اسوي عشا ولاتساعدني ناوين يكسروني مايكولون حامل وتعبانة

سويت العشى معكرونه وفنكر وبيتنجان مشوي ودجاجة مشوية ومديت السفرة بالصالة ورحت على الخرسة تصيح لعلي احاجيهه بالاشارة

وهيه راحت صاحت اله واجه بيده التليفون يخابر والجهال وراه كعدنا بالصالة ناكل بس ماحجيت وياه ولا حجه ويايه كلامه بس ويه الجهال واني همين
وتستمر بينا حرب النظرات تحجي هوايه والعتب سيد الموقف

خلصنا عشى لميت السفرة ورحت للمطبخ غسلت المواعين وعزلت المطبخ وهو بالصالة كاعد يتفرج اخبار وكلساع يخابرون عليه

لمن خلصت تعزيل المطبخ توجهت للغرفة ما باوعتله من فتت بس احس نظراته عليه ، ادري بي يريد يذلني بالشغل ، ورغم تعبانة حسسته انو مابيه شي

دخلت للغرفة وسديت الباب على كيف ، بدلت ملابسي لبست دشداشة سودة خفيفة ارتاح بيها بالنوم
ورحت و تمددت على السرير واحس ببنتي وحركاتها تسبح بداخل رحمي
ابتسمت وشعور كلش حلو متشوقة الها واشيلها بين اديه

بقت عيني ع الباب اتأمل منه يجي يمي يحسسني بوجودي يصالحني يعتذر مني ع السواه ويسوي بيه بس اي من هالشي ماصار ، انجبرت واستسلمت للنوم مثل المقتول لمن يستسلم للموت

كعدت بالليل باوعت بالغرفة الضوة الخافت مشعول الجهال نايمين بمكانهم .

باب الغرفة دائما مفتوح ع الصالة واشوف المرية نايمة كبال الغرفة ، كل ليلة وحدة تبقى كاعدة ، ووحدة تنام الليلة اثنينهن نايمات

تفاجئت معناهه علي بقى هنا ، فرحة اشتعلت بداخلي بس افتقدت مكانه يمي وتساءلت بداخلي ياترى وينه هسه هو ؟ نايم لو كاعد مادري بي !!

طلعت من الغرفة الجو بره جان حيل عاصف مطر قوي وهوا عالي

طليت من الشباك شفت سيارته بالكراج وهالشي اكد الي انو هو هنانه بعده ومارجع لبغداد .

افتريت بالبيت غرفتين وحدة ع اليمين ووحدة صايرة ركن باوعت بيهن ماشفته ، باوعت ع الدرج فكرت اصعد ..

بس الغرف الفوك اني صاعدة وشايفتهن ابد ماينام بيهن لان لا كهرباء ولا مفروشات وحتى جام للشبابيك هم مكسرات

فتحت باب البيت وطلعت برة لفحني الهوا العالي وطير شعري وطرف ملابسي ، حضنت روحي مطر اجه بوجهي ولو ما مسكف الي فوك جان تبللت

باوعت ع الملحق جان ينام بي شرار ، غرفة بي ضاويه معناهه هو هناك وهو بالعادة يسهر ..

رجعت لبست شبشب بس مو ابو كركوشة ولا لونه أصفر ههههه

وطلعت للملحق والمطر خفيف على راسي مهتميت اله ولابسة نص ردن ، ودشداشة قصيرة حد الركبة
والجو بي برودة بس مو كلش اني مخبلة هسه اتمرض جازفت وطلعت ودومي متسرعة حتى روب مالبست

طليت من شباك الغرفة الضاوية
ماشفت شي لأن البردة ع الجام صايرة تمنع الرؤية

رجعت خطوات اباوع شون هسه افوت للملحق اشوفه وينه لو لا!!!

وكفت ثواني والمطر صار خفيف فوكاية وافكر
كلت بقلبي هسه يااام جاسم شعندج تزحفين اله
وهو ممعبرج كرامتج وين كبريائج وينه بس لا جعتي واكلتيهن ..

درجعي للبيت لا بارك الله بيج شكد تحبين الذل والاهانة

شبي حضن دانيال يخبل ودافي خاصة اني ملبسته كومة ملابس حتى يدفى ..

خو اصابعه تنكرط مثل الجزر من اعضهن فدوة ..

احضنه وانام واسكت احسن اله حضن علي يعني !

داارجع للبيت والطريق كله مي المطر اجيت اوكع لزمت بغصن شجرة الصفاف عتيتها وانكسر بيدي الغصن وصار صوت وهمزين ثبتت نفسي وماوكعت

جان ادعبلت ووكعت ...
انوب هيه اغصانها محملة مي المطر لمن تحركت وكع عليه المي كله .. ظليت ارجف

باوعت شفته يطل من الشباك ركضت للبيت بسرعة
اني وبطني حتصير نص متر ليكدام

فتت للغرفة مبللة وأرجف ، سمعت صوت باب البيت انفتحت وخطوات جايه

عزاا اجه هسه اكيد شافني وين اختل هسه باوعت للكنتور مدري اختل بي هسه!!

بس وين يكفيني اني وبنتي الي سماهه هو نوران
واني راح اسميها كاظمية ..

بلله موج ختلت بي ، بطنها مسح ورشيقة الا اني مدعبلة وبطني جنهه طوبة والله ولا ينسد الباب عليه

واخيرا فكرت اروح للفراش ، بسرعة دخلت وختلت بي
بس بعد فوات الأوان حسيته واكف على راسي
ويكول بصوت ناصي بس كلش حاد هاا ختلتي !! خايفة مني ؟ بس ماخفتي لمن طلعتي بالليل وجوة المطر ، كومي وياي!

سويت نفسي نايمة ، بس ايده امتدت الي وسحب البطانية من فوكي ولزمني من زندي ودارني عليه

باوعتله واسناني تضرب ببعضها خوف وبرد وخجل..

صارت عيوني بعيونه ، رغم الضوة خافت بس مبين شكد جان معصب

استسلمت اله وكمت وياه ، اخذني لحد غرفة الاستقبال تصير بداية البيت ، يفصلها عن الصالة كليدور

وكفت مقابيله احاول اسيطر ع رجفة جسمي من البرد والخوف وابين طبيعية بس ماكدرت

كال شعندج بهالليل والمطر طالعة بالبستان ؟ وفوكاهه معرينة ؟

باوعت لملابسي معرينة معرينة شنو مو لابسه ملابس هياتني ؟

اجه لزمني من دلعة الثوب ويعت بي هاي تسميها لبس ؟ ولج احنه بالشته مو بالصيف وبعدين طالعة هيج مصلخة بالله احد شافج ؟ شيكول مرة الشيخ تفرفر مصلخة ؟

نطيته ظهري علي شنوو هالحجي مصلخة شنو ترة لابسة وبعدين الكل نايمين منو يشوفني

لزمني من كتفي دارني عليه بقسوة ولج شنو كلهم نايمين والحارس ماحسبتيله حساب مافكرتي يشوفج!

كتله لا ماحسبت شيسوي الحارس كاعد بهالليل !

ولج انتي شنوو جاهلة؟؟ الظاهر بقيتي طفلة وناسية تكبرين ، اي شي يجي على بالج تكولينه ولج هو الحارس شنو شغله لعد اذا ينام بالليل

سكتت واعصر باديه بعدها تقرب مني كلش
صارت انفاسه الساخنة تضرب بجانب وجهي وتلفح شعري المبلل

كال بمكر ... انت طلعتي تدورين عليه موو ؟

كتله برفض قاطع لا لا ليش ادور عليك ؟؟ اني طلعت اشوف الجو

رفع تك حاجبه تشوفين الجو ام جاسم ؟ سولفيها لغيري بويه ماتعبر عليه ترة انتي طالعة تدورين عليه مدري شنو تردين

اي بالله كولي شنو جنتي تردين انه برسم الخدمة تدللين امريني امر
وغمزلي ..

فشلت كلش احس وجهي تطلع من حرارة كتله شبيك ترة اني دوم اطلع بهذا الجو بره اباوع

رد بغضب جذابة لاتصيرين وجذب لا تجذبين ترة انه ادري بيج شسووين ليلية افتهمتي لوو لا ،

وكمل بنبرة شيطانية : وهسه يله كليلي شنو تردين مني ..

حجيت بسرعة اريد ارييييد اااريد ......تليفووون

كال طالعة بنص الليل ساعة وحدة هسه تردين تليفون؟
رديت اي ورفعت راسي ..

خزرني ورد بحدية : مخبل انه اخلي بيدج تليفون بعد!! عكب الي سويتي لا بويه انسيها هاي السالفة

_ شنو شنو انساهه احنه وين عايشين بالعصر الحجري علي لاتطوخها ترة اني احتاجه للتليفون اريد اخابر اختي اشوفهه وين صارت اخابر احمد وانين الي بعدتني عنهم غصب ونفيتهم
صار شي هنا اخابرك احاجيك ..

انته مايصير تعاملني بهالطريقة ليش تتخذ من ضعفي ووحدتي قوة الك ...

ترة للصبر حدود ياشيخ علي واني بدا صبري ينفذ ..

باوعلي هز راسه برفض وتحسر

كتله علي لاتصير ظالم كافي ترة تعبتني ..
كال انه ظالم!! وانتي ماظلمتي نفسج بتصرفاتج!

كتله اي انته ظالم واني ظلمت نفسي لمن دخلت روحي لعائلتكم انتوا ناس ظلام ومابقلبكم رحمة

كز اسنانه وبصوت مصرور كال فررررح ...
انتي لشوكت تبقين هيج بالله!!!!

كتله راح اوكف بوجه ظلمك الا ان الله ياخذ امانته الى خلاها بهذا الجسد واخلص ..

اجه سد حلكي حييل وكال لاتكووولين هيج سككتي

وخرت عنه كتله ليشش اسكت!! الموت علينا حق واني تعبت ماريد اكبر بعد احس نفسي عشت الفين سنة مو اثنين وعشرين

ع الاقل اروح يم رب رحيم يرحمني احسن مما اعيش يم الناس الماترحم

لزم جبينه بسبابته والابهام وكال هسه شتردين ...
اشرتله بأديه أريد أعيش حياة طبيعية حالي حال العالم والناس شنو حابسني هنانه ؟ لا اشوف احد ولا احد يشوفني تليفون ماكو وفوكاهه حابسني بأخر الدنيا

كال شنو تردين ترجعين لبغداد حلوة عيشتج هناك ؟؟ عاجبتج العرايك والمصايب والطلايب الي سويتيها والمكايد الي سووها الج

كتله مو بلقيس وهيام طلعوا من البيت وسحر وامها انته حتسجنهن وعاقبتهم وختام بعدها عني همين وكلشي يرجع طبيعي ..

خله ايده على كتفي خلت جسمي فجأة يتخشب ويوكف عن الرجيف

وهو يتلمس ظهري كال يله بويه روحي بدلي ملابسج مبللة لا تتمرضين ونامي ونيمي الشياطين وياج

باوعتله باستغراب وبنبرة سريعة رديت
ياشياطين !!

اشر على راسي بيده كال الشياطين الي توسوسلج وتخليج تجين تتحارشين

كتله اتحارش شنو بمنو ليش هيج تكول!

كال استغفر الله .... فرح روحي نامي ليش تخليني اندم لان بقيت الليلة هنانه!

وليش انته مسوي عليه فضل لان نمت هنا اني شستفاديت منك بالله!

شو بس تتأمر عليه وتسمعني حجي يغث وحبستني بالغرفة وقفلت الباب وخليتني للمغرب انظف باجه وظهري انكسر

كال اي وطلعتي بالمطر تدورين عليه وتبللتي
يله ام جاسم كافي تلغين

سحبني من ايدي اخذني للغرفة كعدني على السرير وراح للكنتور طلع ملابس

واجه يمي سحبني من ملابسي توقعت يريد يبدلي لزمت ايده وكتله اني ابدل

لان استحي منه بطني جبيرة واني ممتعودة عليه يشوفني وبطني جبيرة اخذت الملابس خجلانة وركضت للحمام

وهو يحجي وراي على كيفج بويه ام جاسم لا تدعبلين وتتعور البت الي ابطنج

من طلعت واني مبدلة ملابسي هو جان يم باب الحمام
اجه مبتسم ابتسامة شرسة و همس يم اذني كال ها تستحين ابدلج ؟ لعد ماستحيتي لمن طلعتي تتحارشين وتطلين عليه من الشباك موو؟؟ ماخفتي على روحج!!! يدخل الشيطان بينا؟

ظليت افر بؤبؤ عيوني من اليمين لليسار هو شمعرفه طليت عليه!! عزاا شون شافني لو مجرد ديخمن!!! لو ابين اني!!

رحت ركض دخلت للفراش وغطيت راسي كلي
الصبح ماكعدت ولادريت بالدنيا رغم اسمع صوت الجهال يمي ودانيال يريدني

بس مابيه اكوم ، حسيته خله ايده على وجهي يتحسس حرارته ويحجي
حرامات ردنا نضوك الباجة من ايد ام جاسم بس ام جاسم طاحت مريضة يله مامقسوم ..

فتحت عيوني وكعدت ورجليه مدده شفته يباوعلي مبتسم
رفعت شعري من على وجهي بوهن
كتله كل شي مابيها ام جاسم جنهه العافية لاتفرحك طيحتها

مد ايده حاوط ظهري وصار كفه على زندي
سحبني إله حيل طخيت بصدره واذني امتلأت بنبضات قلبه الصاخبة وايدي على رجله اسند بيها جسمي

كال ولج افرح بطيحتج شنو هالحجي هذا شنو !! منين تجيبين هالسوالف هاي ! لوين تردين توصلين ؟؟ ماتعرفين تحجيلج كلمتين بيها خير اذا ماتلوصينها

ابتعدت عنه كتله انته مراح تفهمني علي اني ماشفت بيك الزوج والصديق الي يفهم زوجته خاصة اني شكد احتاج الي يفهمني بس مالكيته

نزلت من السرير واني انزل ثوبي على رجليه
كتله اكوم اسويلك باجة تدلل

كام و لزمني من ايدي ديرجعني للسرير
_ انتي مريضة يصير العصر اوديج للطبيب ردي نامي بفراشج يله

سحبت ايدي منه كتله ماريد ارجع للسرير بس انام يزيد المرض عليه

كال لااااا.... ترجعين وغصبا عليج مو علمودج
علمود الطفلة

ابتسمت بسخرية رافعة تك حاجبي
خطية هالطفلة والله مقهورة عليها اني اكيد راح تكرهني لان راح اجيبها وسط هذا الظلم

خزرني بنظرة شرسة
وكال بثقة : ماتنظلم وانه ابوها .....

ضحكت بصوت قهر وسخرية ممزوجة ...
انته اكبر ظالم ومو بعيدة راح تشهد ظلم على اديك مثل ما ظلمتني ....

واني انظلمت واني مرتك!! لو اني لان ماعندي اب الي
يدافع عني ولا عندي الخال والعم الي يطلعون وراي واخويه نفيتوا وظلمتوا

لزمني من كتفي بقسووة وكزز اسنانه بعنف
وكال فرررح اكو امور ما احب النقاش بيها ...

تألمت على اثر قبضته جسمي الي احسه بسبب المرض متفتت ومطحون

وخرت عنه وابتعدت منتفضة من قبضته
هتفت بغضب وووخرر عني علي لا تلزمني هيج اني مو نفس اجسام ولدك لو اخوتك لمن تلزمهم ميتأذون اني اتأذى

فررررح .... صاح اسمي بنبرة تحذيرية
وكال رجعي للفراش كتلج ، حتى بهاي تعاندين ؟ بوووويه بطلي عنااااد

لازمة كتفي افرج بي وبنفس نبرته كتله مارجع حتى بهاي تتحكم بيه واني مااكدر اعيش اسيرة لاهوائك

ظل يفح من بين اسنانه بانفاس لاهبة : انتي شنوو سالفتج ناوية توصليني لاخر حدود صبري وياج ؟ ماكافي تعاندين انوب تتجاوزين ترة اكص لسانج والله ولا عبالج مااسويهه!!!!

وكفت انفخ معصبة ونظراتي بعدتها عنه ....
تقرب مني لزمني من ايدي ، نطيته ظهري و اصطدمت بحايط صدره الصلب ... شهكت برعب حاولت الابتعاد عنه بس هو هو لف اديه عليه لف ...

التصقت بيه لدرجة حتى الهواء مايكدر يمر بيننا ، هالشي خله التوتر يزحف لجسمي ويحل محل الغضب الي جان مسيطر عليه ..

لزم وجهي وقربه لوجهه كال بهمس وعيونه بعيوني بطلي عناد كبري شويه كافي راح تصيرين ام للمرة الثانية وصدكيني عيشتج هنانه احسن الفين مرة من بالقصر ..

كتله اوكي اعيش هنا بس انته بطل تعاملني على انو اني

مكملت هو طبك شفايفي بأصبع السبابة والابهام وجعصهم حيل وكال اششششش ..
وخذني للسرير ومددني غصب عني وغطاني بالبطانية
و طلع وطبك الباب بهدوء لان الجهال نايمين..

كمت من على المخدة وخرت خصلات شعري ليورة بعنف وكلت لااا والف لااا ...... اله اضوكك اليوم الباجة من ايد ام جاسم ....

الجهال همزين نايمين ، دانيال بصفي وفطومة بالسرير مال دانيال ، ومرات يتعاركون ودانيال يريد سريره انوم فطومة يمي ، وهو بعدين يكعد ويجي ينام يمنه ...

مرات تكعد جوعانة انطيها ممه ومرات تجرها نومة للصبح ودانيال هم نفس الشي رغم اكبر منها ، الحمدلله الله هاديها فطومة ، يمكن لأن أنثى مثلي تحس بيه وبتعبي وماتشلع قلبي

لبست روب لان احس بردانة ، رفعت شعري ليفوك
وطلعت من الغرفة توجهت للمطبخ ، كعدت بالعتبة مال المطبخ الي تطل ع المزرعة ، متعودة على هاي الكعدة أني كل يومية الصبح نفسي تلعب الى ان شويه تفك مني اكوم على شغلي ..

شربت كوب حليب ورحت ادور على علي الدُر
طلعت من المطبخ ورحت للطرمة باوعت الجو بعده مغيم والسما محملة سحب سودة مبينه مليانة مي المطر ..

باوعت سيارته موجودة بالكراج ، بس هو لا شفته ولا لمحت طيفه بعد ، شبسرعة اختفى عن الانظار ...

اوووف تأفأفت وانزعجت من نفسي والحالة الي اني بيها ،هسه اني شعندي ادور عليه!!!

شكد تحبين شلعان الگلب أم جاسم !! بس عبالك لمن أشوفه تنحل كل مشاكلي ...

والله لأن هو محور هالمشاكل ، يتعبني هو اكثر من اي شي ، الجهال شكد متعبين ماحس بتعب وياهم كد ما احس بتعب وياه ..

حملي ووحامي كذلك .. ارحم من عذابه بهوايه ..

التفكير المستمر بالفراغ الي بيننا يرهقني ويتعب روحي ، دائما افكر بمنعطفات علاقتنا وأمكانية فراقنا وابتعادنا عن بعض مرة ثانية ..

يقهرني كل ما اتقدم وياه خطوة يبعدني القدر عنه ألف خطوة ..

بالاضافة الى سكوته القاتل وبروده ويايه كل هذا يشكل عبأ عليه يثقل كاهلي ، يوترني ويسبب لي انهيار تام ..

كعدت ع الكرسي بالمطبخ ومددت ايدي ع الطاولة مالة الطعام ، اخذت نفس شوية ، المرية الي تكعد الصبح ماكو مدري وينها ، انتبهت ع السنك اكو جدر مطلعين الباجة من المجمدة كمت غسلتها وشعوطتها ع النار حتى خاف اكو شعر مينشاف يروح ..

اتذكر خالتي بعد عمري هيج تسويها والله مشتاقة الها ولا ادري عنها شي ، هيه تركناهه بيت خالي وهم يحبوها ويداروها نفسنا بس هم قهر ، ااااه شكول عليك علي والله هيه ربتنا لمن توفت ماما الله يرحمها

والله اني فتحت عيني ع الدنيا هيه تسبحنا وتغسللنا وتطبخ وتنظف ، صح مو بعقلها بس نظيفة حيل ونادرة

دمعت عيوني والله ميتة عليها اريد اشوفها اشم ريحتها احضنها اتذكر ايام طفولتي لمن اشوفها ، اتذكر بابا بعد عمري وروحي مايصير ع الاقل اروح ازور قبره اقراله الفاتحة وقرآن

صح اني كل ما اصلي اقرا اله الفاتحة واسويله ختمات على طول هو وماما بس مو نفس لمن ازور قبره الي يحتوي جسمه هناك احس هو روحه بالمكان واحس يسمعني لمن احاجي ، مجرد احساس يترك بداخلي الراحة

بس حمداان اخخخ حمدان ، احس شي يمنعني من القراءة اله واهداء اله آيات من القرآن ، واختمها بالدعاء اله الله يغفر له ويسامحه

بس اني ما اغفر اله ولا اسامحه بس الرب الي يسامح ويغفر

دمعت عيوني وأني واكفة ع الطباخ احمس الباجة وصافنة بالفراغ .. واغرق بتفكير عميق ..

وواكفة اتذكر شون خالة جانت تسوي الباجة
كون مااتفشل كدامه ويكول عني مافالحة بس باللسان والمشاكل ..

وأني اطبخها أفكر بي ... وينه هسه وشديسوي مدري رجع نام اشو ما اجى للبيت بعد يمكن ظل بالملحق عنده شغل ..

تساءلت بداخلي هسه اني ليش اشغل نفسي بي لهذا الحد واحد اناني مغرور متسلط يريد كل شي لنفسه ..

واني بزحمة تفكيري بي سمعت صوته جاي من الصالة
يكول الله يطيح حظكم إي والله اثنينكم مطايه سواء انتَ أو أخوك ..

سكت شوية وكال انه مو كتلك ووصيتك تشوفله مكان بي خير يستقر بي ، وتدري بي هو ناسي الديرة شبيك هاي عود انته الي براسك حظ وتفتهم

وعاط اي و جااا تكعده يم واحد سكراااان!!!
ولك مهيب لاتخبلني ماكو شمدريك لاتكووول شمدريني غير تسأل على جيرانه يله تكعده !!!

وكمل : خل ياكل ياكل تبن هو خلي يحلها ...

خليت الجفجير على حلكي بتفكير عبالي اصبعي لسعتني حرورته وعطت وشمرته بالكاع

دنجت ااخذته ورفعت روحي بتعب وايدي على ظهري خلسني منظره واكف كبالي

رافع تك حاجبه شبييييج؟

بارتباك جاوبته ممماكو شي .....

شكومج ؟؟ مو كتلج نامي ارتاحي!! العصر اوديج طبيب حرارتج مرتفعة ليش ماتسمعين الكلام انتي

رحت ع السنك جلفت الجفجير وشطفته
وانوب رحت الطباخ واخوط بالباجة بالجفجير واجاوبه
مابيه شي اني وعاجبني اليوم اطبخ باجه اصلا مشتهيتها ..

لاء انتي تحبين العناد وشلعان الكلب فررح ادري بيج

تحسرت واني منطيته ظهري وبعد ماسمعتله نفس ، التفتت شفته ماكو وظليت افكر بكلامه شبي!! وعن منو ديحجي ويه مهيب خاف صاير شي ؟

كملت الباجة طبختها ضكتها طيبة رغم قبل جانت تلعب نفسي منها بس اشو هسه اشتهيتها ...

بعد صلاة الظهر صبينه الاكل وكعدنا بالصالة ، الجهال كعدوا قبلها بوقت بدلت الهم وريكتهم وكعدوا يباوعون ع المطر من الشباك ..

جان تمنيت يبقى المطر حتى يبقى هنا يمنه ينحبس واني هم اضوجه واخلي يعصب ...

بس خطية مدري شنو عدهم يحتاجونه يمكن يقصد لهيب مدري شبي
دعيت الهم كون مابيهم شي ان شاءالله ..

تغدينا والباجة جانت كلش طيبة حتى هو كلي عاشت ايدج ... ... واني بداخلي فرحت عود سمعت كلمة حلوة بس ما بينت اكتفيت بهز راسي بخفة

العصر اصر اله ياخذني للطبيبة وانطتني علاج للانفلونزا ورجعت للبيت ، الطريق جان كله مي مطر
وهو رجع لبغداد واني خفت عليه حيل ، توضيت لصلاة المغرب صليت ودعيت اله وبقى بالي مشغول وياه خاف صارله شي بالطريق ..

ولا عندي تليفون لا شي اخابر اطمأن عليه ، اني ادري هو مخلي تليفون عند الخرسات بس هو موصيهن للضرورة يله ينطني التليفون وبس اخابره هو

شكد توسلت بيهن ينطنيا مقبلن عصبت عليهن ورحت دخلت للغرفة وقفلت الباب عليه اني والجهال
هيه شكد دكت بالباب مافتحته الها ....

ريلام ...

وصلنا للبيت جدو وهناك جان ابن عمي الغثيث سمير
كلساع وسألنا انتي هيام لو ريلام ؟

هيام تتمنى تكوم تكتله مبينه من عيونها كارهته وكارهة الدنيا وياه واني التزمت الصمت

كعدنا بالاستقبال يم جدو وبيبي مرة عمو ام سمير هيه تجي يمهم تساعدهم دائما وبيتها بنفس المكان الي كاعدين بي بيبي وجدو

كعدنا وماما ظلت تحجي لجدو على خالو كالتله سوء فهم صار بيننا وماكلتله على الحقيقة ..

هو جان يباوع لهيام لأن وجهه احمر وسالها
خو ما احد اذى البنيات بس كليلي اروح افزع عمامها انه كلشي ولا بنيات المرحوم وشغلة ثانية انت تدرين ام رحوبة انه جنت ماقابل على طلعتج من البيت وردت البنيات يبقن كدام عيني بس انت واخوج الشيخ الله يسلمكم خليتوني كدام الامر الواقع

دنكت ماما بندم كالت عمي مو انته تدري امي ماكدر اتركهه ومتعودة عليه هيه وهسه كوة فاركتها كوة لو ما ام حسام يمها هيه محد يمها

كال لعد مرة الشيخ وينها ؟؟ مو المفروض هيه تقوم بواجبها ؟

كالتله مو هيه هم مو بعقلهااااا

هو جدو كال أفااااا الشيخ علي الدر يتزوج شاخطة ؟ مع الاسف والله

اني من يمي ضجت وكلت ماما ترة فرح مو شاخطة هيه صح مريضة بس مو مخبلة
جدو وبيبي باوعولي وماما خزرتني

بعدها انطونا غرفتين كعدنا بيهم اني وهيام بغرفة فوك وماما غرفة جوة لان رجلها متكدر تصعد ..

اول مافتت للغرفة سطرت ملابسي بالكنتور وهيام جانت لازمة موبايله وتراسل وكل شويه خزرتني يمكن تريدني اطلع من الغرفة حتى تاخذ راحتها ..

اني حاسة عدها حبيب بس مبينت الها ، علاقتنا كلش موخوش اني وياها هيه دتخربها بعصبيتها ..

هيه جانت تحب مهيب بس يمكن لمن شافته يكرهها واخر مرة مدري شسوى الها ظلت حتى تتبلى عليه

رحت كعدت يمها طليت بتليفونها مكتوب على الي دتحجي ويا محمد بالانكليزي بس ماشفت شنو دتحجي بسرعة خلته وره ظهرها وكامت

ابتسمت ابتسامة جانبية كتلها ويا منو تحجين ..

كالت بمكر ويه مهيب ديعتذر مني لان خالو طردنا من البيت ..

عطت جذاااابة وخمطت منها الفون وطليت بي
واني افكر معقولة مقريته عدل الأسم ؟ لان مهيب قريب لمحمد بالانكليزي ..

اثنينهم بدايتهم حرفM وبيهم حرف h ...

بس لمن طليت ابتعد منها وبيدي موبايلها وهيه تصرخ وراية تأكدت دتحجي ويه شخص اسمه محمد ...

شمرت عليها تليفونها وابتسمت بشراسة
وكتلها جذاااابة بس ليش هيج دتسوووين

كالت لووو تمووووتين متصيروون لبعض لج أيسي انتوا علاقتكم محرمة لج أنتوا أخ وأُخته ..

وصلني معنى كلامها مثل سجين حاد بلا رحمة وبعنف يدميني ويقتلني ..

طلعت من الغرفة وسط صمت مني وتأججت النار بدواخلي ..

كعدت ع السرير ساكنة بلا حركة ، سمعت صوت موبايلي يررن رحت باتجاه مكانه ع الكومدي ، بوهن وتعب ، اخذته طليت بي شفته مهيب يتصل

دمعت عيوني وجاوبته "مهيب"
رد عليه بشغف : عمر مهيب ودنيته وگلبه ....

ابتسمت بحزن ووصلني صوته ...
شلونج حبيبي ان شاءالله مرتاحة؟

مديت ايدي لعيوني امسحها بظاهر كفي ...
كتله زينة الحمدلله اي مرتاحة ترة مصار كم ساعة من اجينا ..

كال مرتاحة لعد شبي صوتج مبينه باجية حبيبتي لاتجذبين عليه ...

رديت لابس يصعب عليه فراكم راح اشتاق الكم
والله وبعد مراح اشوفكم هوايه ....

كال اجي عليج هسه اخذج ارجعج للقصر واريد اشوف منو الي يعارض ويفتح حلكه؟

_ لا عفية مهيب ماريد مشاكل ولا اريد ازعل ماما من عندي

_ اخطبج نتزوج ورجعي بصفة شرعية مرتي حبيبتي واخذتها لبيتنا بعد محد يزعل ..

لا عزااا ياخطوبة بهالزلك ماما حيل معصبة منكم وخاف متوافق وانته تعرف كولش زين موقفها هيه تعتبرك اخويه مستحيل توافق

كال مو بكيفها ريلام مو بكيفها تعتبرنا اخوة ..

اي اعرف والله بس هسه موو وقتها حباب ...

اوكي بس لتعبين نفسج انتي ماشي ولتضوجين وماريدج تبجين باجر اجي عليج للكلية اشوفج ..

ابتسمت بشغف ولهفة وقلبي رفرف بين اظلاعي
كتله ماشي مهيب انتظرك وختمت المكالمة ..

خليت تليفوني بمكانه والتفت واشوف هيام واكفة تتفرج وتضحك بخبث وكالت بسيطة اله اكول لماما عليج

سحبتها من ملابسها ودفعتها على السرير كتلها انجبي والله اكول لماما اني همين على محمد

كالت كوليلها ع الاقل محمد مو محرم عليه نفس مهيب محرم عليج ..

موج ..

وصلنا لكركوك .. واحنه دنصعد للشقة لزمني شرار من ايدي وكال ديري بالج تجيبين سيرة المهر لاخوج عوفيها تولي ماشي

هزيت راسي واني اباوع ع اعلى الدرج بلهفة
اريد بس اوصل للشقة واشوف أنو وأحمد مشتاقة الهم موووت ...

ركضت قبله ظلت ادك بالباب مال الشقة والوقت جان قريب الظهر ويوم صادف جمعة .. انفتحت الباب وصار كبالي احمد واني واكفة اعصر باديه واباوعله ودموعي على خدي

هو صفن بوجهي ثواني مستغرب مدري لان شافني لو لان لابسة حجاب

بعدها مد اليه ذرعانه حضني حييييل وصار يفر بيه ويضحك بصوت عالي لحد ما وصلنا لنص الصالة

بعدها وخرني عن حظنه ويباوع بوجهي مخلي اديه على راسي ويكول ولج شنووو هالجمال شطالعة تخبلين ....
اني اضحك واباوعله ودموعي تصب ..

وبهالاثناء طلعت انين شهكت وعاطت وتبجي وتركض باتجاهنا ، يا لله شكد مشتاقين لبعض عمرنا ممتفاركين كل هالمدة

بعد ماروينه شوقنه بالاحضان والقبلات وجنه مثل الفاقدين سألني احمد عن فرح جاوبته زينة االحمدلله ...

التفت وراه شاف شرار واكف بالباب ..
وراح تقرب منه جانوا يتناطحون بالنظرات ..

شرار واكف متكتف واني حاضنة انو واكفة بنص الصالة ..

راح احمد وكف كباله كاله خابرتك هواي ودزيتلك رسايل وهم ماجاوبت

جاوبه شرار وهو يفتح اديه ماكو شي ينحجي احمد انته جنت غلطان مية بالمية والكلام وياك ماراح يغير شي ..

احمد رد عليه بعصبية غلطان لان ردت بس احمي خواتي!!!!

تقدم باتجاهه شرار بكم خطوة وسد باب الشقة بدون مايلتفت للورى ؛ لاء مو بس هيج بالله انته ماقصرت طلعتهن بوقت احنه جنه ماموجودين وحميتهن لمدة شهرين تمام وراها ليش ماحاولت تخابرنا وتتواصل ويانه ؟

خواتك مو على ذمة زلم ؟؟ تاخذهن وتطلع بيهن ، فرح حامل تريد تاخذها تهريب وتبعد الطفل عن ابوه هذا مافكرت بي

خلي نفسك مكان علي مرتك حامل واخوها يريد يهربها ويبعد طفلك عنك شنو راح يكون موقفك بلحظتها ؟

دار وجهه احمد وجاوبه: ترة هو اخوك الكالي اطلع

ميخالف حسان كالك اطلع بس هو لمن راد يرجع نسوانه انته ضربته وانهزمت ليش ؟ واحنا حتى ماحاسبناك لمن ضربته وكلنا بالغلط ..

وهذا شنو معناه ؟؟ تريد تاخذ النسوان وتشرد لو لا ؟ هذا يسموه اختطاف لان هنه بعصمتنا ولا تنسى ابن اخونا المرحوم هم بيناتهن ومو من حقك تبعده عن اهله همين

احمد : اني اخذتها بوقت جانت علاقتهم منتهية وهو كال يطلكها بس انتوا محد سوا سوايتكم

_ هيه شنو سوايتنا مقابل سوايتك ترة اخواتك محد داس الهن على طرف واخذناهن خليناهن معززات مكرمات

واذا علي جان رايد يطلك فرح فهو حجاهه بساعة عصبية وقبل لايعرف حامل وقبل لا يصيرله حادث واكيد بعد كل هذا الحديث يختلف ..

_ لا والله محد سوا سوايتكم تكطعون رجلي من ديرتي وتحرموني من اخواتي وتبعدوهن عني وتعاقبوني وشكد دزيت زلم لاخوك الشيخ ولا احترمهم ولا عبرهم ..

انته غلطت غلطة جبيرة بحقه احمد وهو شايل عليك هواي وانته لازم تتحمل ، مثل ما انته ردت تبعد مرته وابنه عنه هو سوا نفس الشي ...

المهم احنه ترة مجايين نفتح دفاتر قديمة مر عليها اكثر من شهر احنه جايين نكول الكم احنه ان شاءالله راح نتزوج الاسبوع الجاي او البعده ..

نطيت اني وكتله اي بس بعد منعقد محكمة ..

باوعلي وكال موووج احنه هذا الموضوع منتهيين منه واتفقنا عليه لمن جنه هناك ...

لالا شرار مااتفقنا واني مموافقة اتزوج زواج خارج المحكمة

احمد كال بعصبية شنو زواج خارج المحكمة شنو ماخذها انته متعة حتى بدون عقد وتكولون احنه موو ظلام مو بكيفكم والله تعقد محكمة تتزوجها ماتعقد الله وياك ارجع لمرتك وابنك احسن بناتنا موو لعبة

يتبع ...

طبعا فد ملاحظة شفت فد تناقض بالتعليقات بفقرة لمن فرح صعدت ع سرير بنوته كالت مو ماعدها سرير ؟ هذا السؤال جاوبت عليه بهذا البارت

ومتابعة اخرى كالت ليش تكتبون تفاصيل مالها داعي وتطولون القصة ٧٠ بارت ؟
زين شون تصير القصة واقعية اذا بلا تفاصيل ؟

وبعدين شنوو ورانا وليش نستعجل خلي نخلي القصة تاخذ حقها ونستمتع بتفاصيلها ونتعرف على تفاصيل حياتهم

ماكول انو القصة مطولة او لا ماكدر احدد بس هو السرد الي يمشيها وانتوا مثل ماتشوفون القصة بيها هواي شخصيات وشي مرتبط بشي ..

وانا اعرف شنو الاكتبه وشنو الي الغي واهمله لان هاي مو اول قصة اكتبها عندي غيرها العشرات واقرا يعني صرت خبرة الحمدلله

فانطوني فرصة اكملها ع اكمل وجه واخذ استررررراحة طويلة وارتاحوا مني

ان شاءالله باجر اكو بارت دسم ورومانسي 🙊واذا شفتوا الرومانسية زادت كولوا المصايب جاية ☻👌

احبكم❤