هذيان بين جمر وجليد
تكملة احداث
نورا ناصر
غيـر طـولـك محـد يلـوگ أعلـه طولـي♥️
أنين.....
بالفترة الأخيرة جان يجي دائما للصيدلية احسه يراقبني مو شخصيا وبس وانما يراقب شغلي عرفت من خلال هالشي هو انسان عملي وهم احسه يدرسني
ومرات اذا هو موجود واجه شاب ياخذ دوه يترك كل شي و يظل يراقب حركاته وتصرفات ويخزر بي
حتى اني ارتبك واتوتر والشاب خطية يظل يحسب لكل نظرة ولكل حركة تظهر منه ويمكن يتسائل بداخله شبي هذا هلكد حريص عليها
لا و حتى مرات اذا اجه واحد ميرتاحله هو ياخذ الراجيته عني وينطي
بس اني كل هذا ماا اعلق عليه ابد التزم الصمت وحتى ما اوجه اله اي سؤال بخصوص كل هاي تصرفاته
ولا ابدي اي رد فعل حتى مرات احس بنظراته عليه بس اني اسوي نفسي مشغولة بغير شي
بهاي الفترة احس نضجت هواي وتفكيري صار أوسع
حتى من يوصلني هو ابقى على كد سؤال وجواب وكلما اتذكر جفصاتي قبل امووت من الخجل بس ارجع وأقوي نفسي واكول محد ميخطأ ومحد ميجفص ويزل لسانه كلنا معرضين للخطأ
وبيوم جنت بالصيدلية انفتحت بابها وفات عمر !
انصدمت بجيته كال سلام عليكم
ردينه اني وهند وعليكم السلام
بس اني حيل مصدومة
وكومة اسئلة اسأل بداخلي
شجابه وشون عرف العنوان خاف اخذه من احد ومنو هالاحد ! واني ماعندي تواصل وي عائلتهم
حتى لو اتواصل بس على كد السلام والواجبات ومرات عماة حسوني يردن يشوفنه ادز الهم صوره او فديواته او يحجون وياه اتصال بس ابد ما احجي عن نفسي وكلامي وياهم قليل بس على كد سؤالهم عن ابن اخوهم
اني وللحظة من دخل عمر عبالي صدفة جاي يشتري أدوية بس من اقترب مني وكال ام حسن ممكن دقيقة من وقتج بره احجي وياج ؟
تأكدت جاي عليه ومو بعيدة مراقبني راح تفكيري لبعيد خاف شايفني اصعد ويه إحسان وتصير مشكلة او يطلعون عليه اشاعة كل شي اتوقع
بعد لحظة تفكير هزيت راسي ومشيت وراه من طلعنا من الصيدلية بقيت واكفة يم بابها هو التفت عليه وجان مستمر يمشي كال تصعدين بسيارتي نحجي ؟
خفت اني مستحيل اصعد وياه خاف يطلع بيه كبل انوب لأن هو دوم يراسل يريدني ارجع ويتوسل بيه
ويوعدني بحياة وردية ولا بالاحلام
اني بس اقرا رسائله ومرات ما اقراهم ومخليته بالتجاهل حتى على طلب المراسلة ما أوافق سواء بالانستغرام او بالمسنجر
وكفت وهزيت راسي من شدة توتري اصابعي تشابكن بس بعدها فكرت اني ممسوية شي غلط دااشتغل بمكان محترم ليش اتوتر خلي لا ابين اله انو اني خايفة منه
كال اوكي بس موضوع مهم وانتي مدتجاوبين شون هيج نحجي بالشارع ع الاقل نروح مكان عام بيننا طفل احنا
رفعت راسي والشمس تضرب بوجهي خليت ايدي على كصتي احجب اشعتها عن عيوني لان احس راح ادمع
جاوبته اني كايلتها الك من قبل اي شي عندك اي شي تريد تكوله كوله لأحمد احسن
رد .. لاء شلون يصير اكو شغلات بيني وبينج
جاوبت بانفعال ... لا ماكو شغلات بيني وبينك
هو جله حنجرته وكال ماشاءالله دتشغلين ؟
رديت اي الحمدلله
وحسن وين دتخلينه ؟
يم اختي
منو منهم
يم فرح
شلون عايفته يمها وهيه مريضة توكع يصير شي بيها اني اب وهم اخاف على ابني
باوعتله مصدومة ترة اختي زينة ومرضها اكثر شي يعتمد على حالتها النفسية وهيه هالايام الحمدلله زينة ماله داعي كلامك هذا
تنهد مناويه ترجعين ؟
وين ارجع ؟
بنفاذ صبر كال : الي الي ترجعيلي
واردف بتوسل : لخاطر حسن انين فكري بي انت ليش لهلدرجة انانية وبس تفكرين بنفسج ؟
عمر اني عندي شغل هسه رجاءً بعد لتجي لمكان شغلي اي شي عندك كلام كوله لاحمد هو يجاوبك ورجعة ما ارجع لتلح انت عندك زوجة وعندك طفل اتركني اني مستحيل ارجع الك انت ضيعتني من بين ايديك ولازم تتقبل خطأك ولا تحاول تصححه ابد ارضى بواقعك ولا تباوع لوره
من رخصتك اروح عندي شغل اني
اريد افوت
كال بعصبية سمعي انين انت ظلمتيني وياج
جاوبته بارتباك اني حاولت اتقبلك انت ماصبرت عليه رحت خنت واجيت ضربت اريد ارجع لك عمود ابني رحت تزوجت كل هذا وجاي دتكول ظلمتيني حسبي الله ونعم الوكيل
_ ابني اذا صار بي شي ابتلي بيكم اسحبه منج وتموتين بعد ومتشوفينه
_ اسم الله عليه ليش تفاول بيش طالبني كل شي ميصير بي الله موجود يحمي
كال امشي وياي وديني اله اريد اشوفه
باوعتله مصدومة اني مستحيل اروح وياك روح لأحمد خابر عليه هو ياخذك
جاوب انتي موو امه امشي وياي لو أحمد امه ؟
خفت من عنده هذا على شنو ناوي بالله والله مدري شبي يخوف ... كتله رايحة اخابر احمد يجي ياخذك
كال لاء عوفي اني رايح ارتاح يم اقاربنا وبعدين عود اشوفه ..
عفته دخلت متوترة وضايجة امسح العرك على كصتي بالكلينكس واتنفست بصعوبة اباوعله من باب الجام شلون يحوم على المكان ويباوع عليه بقى تقريبا ربع ساعة ..
هند سألتني منو هذا ؟
تنهدت وجاوبتها ابو ابني ...
ردت شبي وياج مبين عليكم اثنينكم معصبين
هزيت راسي وجاوبتها شوية مشاكل لا تدوخين نفسج بيها
وجبرت نفسي ابتسم ..
كالت العفو مو قصدي اتدخل ..
جاوبتها لا ولا يهمج عيني ...
رجعت للبيت حاجيت احمد عنه وهو خابره وحجه وياه ...
بقيت اليوم كله ضايجة ومتوترة واحمد اخذ حسن ووداه لابوه يشوفه بس عمر ابد مااجه للشقة
تأخروا هواي بقت الهواجس تخوفني وخاصة وحدي بالشقة وخالة ماكو يم بيت خالو
خابرت احمد كال كاعدين بالكوفي ويمنه عمر نتعشى ونرجع
كتله شعدكم بالكوفي والطفل وياكم صدك جذب
كال مو حجينه شويه
ها مو تدخنون يمه نركيله تره خاف تأذي صدره
لتخافين عليه يمعودة شسالفة
احمد دير بالك من عمر خاف يخطف ابني خايفة منه اني والله احسه مو طبيعي عفية لترجع وحدك وياه حتى لو تخابر على شرار يجي يمك
دروحي زعطوط اني شبيج انت اليوم ؟
يله احمد لتتأخر ترة حتصير ساعة ١١ موعد مخابرتك ويه دينا من هسه حاكمتك واذا ما اجيت تبطل متتزوج كيفك بعد انته اني وصيتك
ظل يضحك دكاافي شهالمزعطة ادري خايفة على ابنج بس مو تلزميني من ايدي الي توجعني يله روحي من خلقتي
أحمد حدكم للعشرة ونص تجيب حسن وتجي تره هو اني معلمته ينام على وكت اذا مجيتو اخابر دينا وكللها ديخونج
بعدها ترد الثولة لج بابا ولي وتره تارك عمر وي حسن وصار ساعة نتراسل اني ودينا وخطتج هاي افشل من الفشل الكلوي
حرامات عود كلت استخدم الكيد مالتي
والله انت مال كيد انت؟؟ انت اصلا كيدج عطلان ومنتف روحي سويلج شغلة اللتهي بيها علما نجي ...
سديته منه بعدها ظليت انتظرهم بس كوة فاتحة عيوني احس منعسة
خليت راسي ع المخدة والفون بيدي والظاهر غفيت دقايق وصحيت على صوت الفون فتحت خط وحجيت واني منعسة ها احمد لحظة جايه افتح االباب
اجاني صوته اوووويلي اشتعلووو شهالصوت جنتي نايمة ؟ ولج صوتج بهالوضع يكعد الشيطان من النوم واني كوة مصبر روحي
وخرت التليفون من على اذني مصدومة واباوع لأسم المتصل فتحت عيوني بصدمة واشوفه احسان عيوني وحلكي بقوا مفتوحين وجان اسده بسرعة من الفشلة .
عاد هو رجع اتصل بيه ما رديت ضجت من حجايته مرات اخاف منه واخاف من الاستغلال رغم ماشفت منه شي موزين بس مرات يشمر كلام
من مرديت دز رسالة : جاوبي خاتون اريد احجي وياج بموضوع هذا الي مدري منو جايج للصيدلية
من قريت المسج بالاشعارات كلت عزاا بعينج هند هاي بسرعة رحتي حطيتيها بحلكه هيه هاي جديدة غير ذيج اخت صاحبه بس هاي شوي فضولية وتنقل كلام مدري هو مصخرها تنقل له كلام اوووف منه ولا يكعد
واني افكر رجع اتصل كمزت فززني صوت الفون جنت صافنة باوعت للساعة خاف يجي احمد هسه ويسمعني احجي ويااه انوب هو مايفك ظل يتصل
رديت عليه بعد ماجليت صوتي وكحيت
كلت بهدوء الو
رد : مساء الخير
جاوبت : مساء النور
كال : شنو ليش سديتي بوجهي ؟
كلت بارتباك ها لا هو انسد
ضحك خاف خدودج سدنه هم مرات تصير
جاوبت اي يمكن ...
كال اي ام دروب عبريها عليه واني اساعدج بيها المهم منو هذا الي اجاج للصيدلية اليوم ؟
جاوبته الي كالك عنه ماحجالك بالتفاصيل ؟ اني سولفت كل شي الها
ضحك : قصدج هند ؟
_ اكو غيرها البلبل الفتان العصفورة المغردة تطبيق تويتر ...
_ اي هذا درس الج حتى لا كل شي تحجين كدامها
_ اني ما احجي كدامها شي بس هيه فضولية وجنت مجبورة احجي لان شافتني طلعت حجيت ويا
_ اي المهم هذا ابو حسن مو ؟ شعنده جاي للصيدلية بالله
_ لتخاف على صيدليتك بعد متتكرر لان احمد حجه وياه
_ هو شنو جان رايد اصلا ؟وليش ميخابر ليش جاي بنفسه
ماعرف ليش حبيت اختبر ردة فعله واعرف شنو اني بالنسبة اله
جاوبته :اني ماعندي تواصل وياه على التليفون وهو يريد يرجعني ..فأجه بنفسه يحجي ويايه
بسرعة كال :وانت شنو رأيج وشنو كتيله ؟ هم تردين ترجعين ؟
مادري شبيه وجاوبته : ها ماعرف اني رفضت بس صراحة جاي افكر ارجع له عمود ابني
عله نبرة صوته وعاط
يااا ثووووولة
كتله : هااا شنوووو ؟ شكلت منو سمح لك تغلط عليه
رد : شنو انت نسيتي الي سواه بيج ؟ ذاكرة ذبانة شايلة لو مال بشر ؟ وبعدين هو متزوج ترحين على ضرة حتى يومين وترجعين مفشووخة ؟
_ لا شحده االي يفشخني شنووو تايهة اني ..
اني عن سبع زلم محد يكدرلي
_ لا كلش واضح اكول يابا استجني احسلج
_ خلصت كلامك اني اريد انام باجر امتحان عندي وهم مراح اروح للصيدلية
_ اكلج تعاي كبل لا تروحين اني ترة اطلبكم فصل واريد الفصل مالتي مرة
عضيت شفتي حيل بس اريد امنع ضحكتي من كال هيج اعتقد تحرك الحجر واخيرا
كتله :- شنووو شتقصد
كال : تتذكرين قبل جم سنة من اخوج احمد ضربني خياطات ومستشفى وضيم
_ قبل جم سنة وهسه تذكرتها ؟
_ اي والله هسه ...
_ كلتلي تريد مرة فصلية ؟
رد : اي ومااتراجع عن حقي اني وكلمتي وحدة
كتله : تدلل بس تحتاج تنتظر بعد كم سنة هسه احمد اخويه زواجه بالعيد بلكي تصير عنده بنية تكبر تكمل دراسة يعني يرادلك فد ٢٥ سنة هيج صحيح بوقتها تمشي على عصا وشايب بس ميخالف هذا الموجود
كال : لا ماريدها بنت احمد اني اريد وحدة عدها خدود
وصاكة
جاوبته : ميخالف الفلر والبوتكس موجودين ننفخها الك نفخ بيهم
كال : لا ماريد بت احمد اريد اخت احمد
هو كال هيج وجان اسد التليفون اني وحتى قفلته فد نووب ، ورحت للصالة ارجف ضجت من نفسي اني شون استدرجته هيجي
اني هاي المرحلة أحسها حيل صعبة من حياتي ولازم احسب حساب لكل خطوة أخطيها
مشاعري أله هيه هيه ماتغيرت من سنين ولا مرة تجاوزت حبه وبقى مدفون بداخلي
بس هنا چــنت مخيرة بين عقلي وگلبي وچــنت گاعدة واعصر تفكيري عصر واريد ارجح الكفة الي ارتاح عليها بأيامي الجاية ...
بقيت كاعدة على طرف القنفة ساعة اضحك وساعة اصفن واسرح بكلامه
بعدها اندكت باب الشقة رحت فتحتها شفته احمد شايل حسوني نايم
شافني كال هلو
كتله هلو حبيبي نايم؟
كال اي نام بالسيارة
اريد اخذه منه كال لا اني اودي لفراشه
رحت بسرعة مشيت قبله حضرت فراشه
سألني على تليفوني كال اتصلت مغلق اشو ؟
جاوبته اي مو غفيت شويه
تنهد ولزمني من جتفي كال تعاي بالصالة نحجي
رحت ويا سديت الباب على حسوني
كال رحت على خالتي لبيت خالي مقبلت ترجع
وخلتني وراحت نامت
ضحكت خطية فديتهه والله هسه كم يوم وترجع اكيد بس تضوج ترجع
اي خليتها على راحتها ... ديحجي رن موبايله
جاوب طلعت دينا كاللها عندي حجي وي أنين بس اخلص ارجع اخابرج
سكت شوي باوعلي كال تسلم عليج
رديت سلمني عليها ...
ختم وياهه المكالمة وباوعلي كال
_ بس كوليلي انت ترجعين لعمر لو لا ؟ شنو رأيج ؟
رحت كعدت ع التخم وجاوبته: لا احمد شسالفة ولا مفكرة اصلا ارجع اله انوب هو تره مرتاح ويه مرته بس يحب يضوجني ويعلكمني خباثة منه
كال: شحده خليولي اني كتلج هيج داشوفج شتكولين والا اني من كلي كتله كطنه وشيلها من اذنك انين مترجع بعد
_اي احمد ما أرجع
_هسه انت مناقصج شي ولا حسونه ناقصة شي واذا تتعبين بالصيدلية هم مالها لزمة تستمرين كعدي واني ما أقصر
_لا عمري ... والله طول عمرك ممقصر واني كلش مستمتعة بشغلي بالصيدلية وهماتين ممأثرة ع دراستي ابد بآي يوم اشوف مالحك اگدر ما اداوم
_ هذا هو لعد الموضوع يمج بقى بعد واذا على حسوني هو مو اول طفل يربى بعيد عن ابوه
_ وانت هم ممقصر وياه حبيبي انت هم خاله وهم ابوه اني مطمأنة من هالناحية
_ ان شاءالله ما اقصر وهسه يله ممحتاجة شي اريد احجي وي دينا شويه وانام
_ لا محتاجة سلامتك وتصبح على خير ..
ابتسم واخذ تليفونه طكطك بي وخلاه اذنه وكال الو بسرعة جاوبته هههه منتظرته خطية .. هم خطبوا قبل فترة سوينه حفلة كلش بسيطة عمود كورونا
بس العرس ان شاءالله ناوين نسوي ونعزم اقاربنا ونفرح بي اخونه الوحيد ...
بقيت كاعدة بالصالة وحتى نوم مجايني ...
بعدها رحت للغرفة نمت بصف حسوني بوسته على خدوده واديه شفته تحرك مزعوج .. ابتسمت لعبت بشعره شميته ورحت للسرير مالتي
فتحت تليفوني شفت جاي مسج منه كاتبلي
اركض اخوي عامر شردتي موو ؟
صكيت اسناني من الخجل سويت الرسالة تمييز كغير مقروءة ونمت ..
مرت ايام مرحت للصيدلية بقيت بالبيت .. هو ماحاول يتواصل ويايه واني مرديت عليه ابد ...
وبعدها داومت احمد جان يوصلني هو يجي للصيدلية يحجي بالشغل ويروح ميطول .. واني نادرا ما ارفع عيني بعينه بعد اخر موقف استحي هوايه ..
واحرص على مخابرة احمد حتى يجي عليه يرجعني للبيت وبدربنا ناخذ حسوني من يم فروحه ..
وبيوم جنت محضرة نفسي لبست قميص ابيض بي بيجي على الاكتاف وكيلوت ( بنطلون قماش عريض) تركوازي طوخ كلش وشيليه بيضه وكعب بيجيه ..
داانتظر أحمد يجي عليه
كعدنه بالصالة .... العب حسوني
هو هم متحمس يروح لبيت خالته يلعب ويه روان وغيث ودانيال وفطومة هماتين يحبو كلش ..
مخلي جنطته على ظهره بيها العابه وحاجاته وكل شوي يسألني شوكت يجي بابا احمد ياخذنه لبيت ماما فرح ...
هو يكول للكل بابا وماما حتى موج وشرار هماتين والكل يحبوه ....
خابرني احمد كال : مراح اكدر اوصلج خابرت على حسان يجي عليج تمام ...
كلبي تخربطت دكاته سألته ليش انت وين حتروح ؟
كال خابروني عمود الغرفة مالتي جهزت رايح اجيبها ومالحك بعد
اوكي ماشي الله يوفقك يارب ...
حبيبتي خيتي ديري بالج على نفسج ..
سديته منه وبقيت انتظر احسان بس اكل بأظافري متوترة حييل من اخر اتصال واني خجلانة منه ..
رن موبايلي كمزت كمزززة حتى حسووني ظل يكركر عليه ..
باوعتله وضحكت ، فصلت الاتصال واخذت اغراض حسوني وطلعت قفلت الباب ونزلت شفته واكف اباب العمارة
لابس قميص اسود ومفتوحة الدكمة ومبين شوي الوشم مالته الي على صدره وهو الوشم عن اخوه حمدان برذر بالانكليزي واسمه همات بالانكليزي زخرفة ..
وكفته شكله كشخته وهيبته كلها تخلي دكات كلبي تتخربط اصلا بس سيرته كفيلة بهذا الشي
نزلت عيني واحس ما شبعت عيوني شوف منه وتطلب مني اباوع أكثر عليه
هو من شافني نازلة اجه اخذ حسوني شاله وباوعلي من فوك ليجوه يقيم لبسي وبوجه ثگيل وبنبرة ثكيلة
كال : هلوو
جاوبته بسرعة بدون نفس : هلوو ...
وباس حسن بخده ويسأله شلونك يابطل
حسوني وهو خجلان يجاوبه زين ...
اخذه وراح للسيارة فتحلي الباب الصدر
صعدت وهو دار كعد كدام وبحضنه حسن
كتله خاف خطر هيج مكعدة بحضنك
كال عوفي معليج خلي يتعلم يسووق يصير بطل ..
سكتتت اباوعلهم وهو باوعلي ورجع يحجي يم اذن حسن تروح لماما لو تظل عندي تسوق ؟
جاوبه حسن اسوووك ...
كاله هذا هو تدلل تريد تسووق تسووق ولا يهمك ...
مشت السيارة ... وحسن فرح وظل يدك هورنات ... خبصنه خبص اني اكوله لاتسوي هيج واحسان يكووله معليك منها دوووسلها يله .. وهذا مكيف ظليت اضحك عليهم ...
فاتت من يم سيارته سيارة عرس بيها بنات يصفكن ويغنن وشي ماخذهن الواهس يهزن .. ...
هو دكلهن هورن وخله حسن يركص وهو دار جتفه عليهن لازم ادين حسن و يصفك بيهن هنه شافنه هيج زااد واهسهن ...
اني بدون ارادة مني اباوعلهن واخزر بيهن شاافني طكاهه ضحكة درت وجهي بسرعة ع الجامة الي بصفي ...
بعدها انطاني حسن اخذته بحضني
كال ليش شردتي تره اني مو شقة صدك داا اخطبج ...
باوعتله بس اني تعرف ظروفي انته ...
طبعا كل شي اعرف عنج واني مو صغير وخبرة بالحياة انفاصلين من قبل زواج وعلاقة حب صارت عندي خبرة ومستفاد من اخطائي وانت اريد اقفل بيج ...
_ وابني اني مااكدر اتخلى عنه ودراستي همين يعني مو وكتها هسه
_ ابنج ابني يبقى ويانا واوعدج نبقى تلث سنوات مانخلف هم نكبر حسوني وهم نتعود ونستفاد من اخطاءنا
جنت احجي وياه خجلانه عيوني بحضن حسوني
_ ماكدر اتزوج خاف ابوه ياخذه مني ....
_ ياااكل تبن ابوووه .... عذرا ع اللفظ يعذرنه حسوني جاي نسب ابووه ولوو اني ممعترف بي ابو هو حيصير ابني بس انت هم لاتصيرين ثولة هم عذرا ع اللفظ للمرة الثانية تره الحضانة الج حتى لو تتزوجين اذا اني تكفلت بي بالمحكمة ولتخافين احنه القانون كله بظهرنا
ضحكت وبعدها سكتت شويه وجاوبته : خاف يجيب عشيرته وياخذه مني بالعشاير مو اكو هيج ؟
_ هاي شبيج بابا كتلك ميكدر وروح اخوي ما اخلي ياخذه ... الم عشاير خوالي وعمامي ومااخلي حتى يتنفس
_ خليني افكر
ظل يباوع لساعته عندج خمس دقايق بس كافي تره اني ما اصبر هواي بعد ...
_ بس اني اذا صدك وصار النصيب اريد فترة خطوووبة طوويلة
_ يعني شنو ؟
يعني ... هيج اخليك بالاختبار ...
كال : ولج شنو تحت الاختبار لقاح فايروس كورونا اني لخاطر دين محمد
ضحكت : مو اني هم دوام وخايفة مااوفق بين دوامي والزواج ...
_ لا تتوفقين عندج مثلا أني هسه مو جنت طالب كلية صيدلة ومتزوج زواجي الاول والله وفقني وتطلكت ...
باوعتله : إحسااااان ....
ضحك : شبيج كلمة حق تقال داانطيج مقدمات
_ هاي كلمة حق يراد بيها باطل
_ وين احنه بفلم الرسالة رحمة لربج ...
وصلنا لبيت فرح وانتهى النقاش ... نزلت شفت سيارة يم بيتها معرفت منو عدها ...
إحسان فتح الباب ودخل بالطرمة وكف واني فتت جوه .. شفت نرجس عدها هاي نفسها حبيبة احسان قبل سلمت وفتت
فرح اخذت حسوني بوسته .. وسألتي وي منو جيتي ؟
جاوبتها وي إحسان ..
ولا اراديا باوعت لنرجس ..
هيه كمزت يااا احسان حماج ؟ ويينه بالله خلي اشووفه حييل صار شكد مشايفته
وراحت تطل من البردة كالت اشوو ميبين ..
فرح جاوبتها نرجس كعدي راحة مدام النفس علينا راضية تره كوة تصالحنا دك مشاكل من اول ماجفصت كدام ابوج لحد قبل كم سنة
كالت الها هاي شبيج زين خل اطلع اسلم عليه ... اني واكفة واخزر بيها
كملت كلامها : اشووفه يتذكرني لوو لا ؟
راحت فتحت باب الاستقبال وطلعت للطرمة ...
واني رحت وراها وكفت بالباب واعلي برجليه واباوعلهم احسان جان مكرفص ويمه فطومة ودانيال يسولف وياهم
وهيه سلمت عليه إحسان شلونك ؟ شلون صحتك ؟
رد عليها وهو مدنك ... هلا بيج خويه الحمدلله ...
كلتله هاي شنو معرفتني ؟
جاوبها لا شلون عرفتج عرفتج شلونج طيبة ان شاءالله ..
حاجاهه وهو مدنك بقت صافنة وتمتم ترد عليه الحمدلله .. هوبوس الجهال وطلع ....
واني انداريت وكلت لفرح بسرعة ماوصيج على حسوني جرتني وكرصتني شكوو ولج ها؟
صكيت اسناني جاوبتها بعدين اخابرج وافهمج تمام ؟
ظلت فاتحة عيونها عرفت اكو شي مو طبيعي بيه
طلعت رحت شفته ينتظرني فتحت الباب وصعدت
باوعتله اريد احجي هو التاف عليه اريد اقرا نظراته شنوو بيها بس للاسف لابس نظراته ...
سكتت واباوعله كال بهدوء شبيج اكووو شي ؟
جاوبته : اي هاي عرفته الي سلمت عليك مو؟
رد وهو يضحك ها هذا الي شاغل بالج ؟ اي يابه عرفتها
بسرعة جاوبته : شلون عرفتها بالله وانت مارفعت راسك عليها لو الگلب يعلم وماينسى احبابه مووو
جاوب بنبرة اقرب للعصبية : تره عرفتها من صوتها شبيج ...
سكتت مجاوبت بس خفت من نبرته
باوعلي ونزع النظارات كال ولان ادري بتفكير النسوان شنووو عرفت جاي تراقبيني وتبعتيها من اجت سلمت عليه
جاوبته لا غلطان ماتبعتها اجيت اطلع لان انطيت حسوني لفرح بعد شعندي باقية
كال لا يابه لعد موو اني تحت الاختبار على كولتج وهذا اول الاختبارات موو ؟
جاوبته لا كلت بالخطوبة هاي اذا صارت خطووبة احنه بعد ماكو بيننا شي بس الشغل ...
كال ريلكس شبيج اتنفسي عدل منو راكض وراج كل هذا غيره ؟ صدك لو كالو الانثى تكتم الحب ٤٠ سنة بس متكدر تكتم الغيرة ساعة وحدة
بلعت ريك وجريت نفس ودرت وجهي ع الجامة اباوع عليها .... كرهت روحي من صدك جنت جاي احجي بدون نفس
لج شبيج بابا مو كتلج اقفل بيج ...
كال كلامه برومانسية ولهفة وبصوت اقرب للهمس
نبرته ارتاح الها كلبي
خفيت ابتسامتي ...
هو يدري من سنين اني احبه واني هم ادري بي يدري بيه .....
جربيني ماتخسرين والله ...
التفتت عليه : شنوو هالثقة ؟
كال والله شبيج صح اني غلطت هواي بحقي وحق عائلتي بس دفعت الثمن غالي هواي
دفعت الثمن اخويه الي جريته لسوالف مشبوهة على اثرها قرر ينهى حياته بعد ماشاف صديق عمره ينذبح كدامه وهو لاحول ولاقوة ولهسه كلبي يكطعني ويقطر دم عليه
حتى من وشمت اسمه على صدري جنت احس المه برووحي مو بس بجسمي ...
وسنين من عمري الي عشتها بالسجن والمفروض اعيشها ايام حلوة وجانت من احلى ايام شبابي بس اني كضيتها بين اربع حيطان
انقهرت من كلامه احتاريت شنو اجاوبه بس اباوعله بقهر ...
كتله ميخالف محد ميخطأ كلنا نغلط بس كون نستفاد من هالغلط ونعتبره درس النه
كال وهو كذلك واني اريد اعدل مسار حياتي الجديد بيج
جاوبته اكول بعدك تشرب لان اول لقاء الي وياك انته جنت سكران
باوعلي وضحك كال لا والله تعلمت بالسجن بدون شرب بس اذا انت ضوجتيني مو بعيدة ارجع للشرب
ضحكت زين انت تشرب اذا اني ضوجتك اني شسووي اذا ضوجتني انته ؟
رد بضحكة هم شربي
ضحكنا اثنينا وصلنا للصيدلية ...
وكف السيارة كال ها شكلتي ؟
حضرت نفسي اخذت جنطتي والله مادري بس خلي افكر واشاور خواتي
اي ولا يهمج شاوري بس نصيحة فرح لتاخذين نصيحتها هو صح يكولون اخذ الشور من راس الثور بس انت رجاء لتطبقيها
احسسسسان فررررح موووو غبية تره
ضحك يابه شكد حلوو من تعصبين حتى وانت معصبة كلج انوووثة
وعض شفته
خزرته ونزلت ......
هند جانت جايه رحت طبيت ..
وره ساعتين خابرت فرح تلح عليه شكو وشكووو
كتلها نتجمع اني وياج وموج ونحجي فدوة اروحلج لا تلحين
جاوبت حسان سوالج شي ؟
لالا وين راح بالج فدوة فرح عندي شغل
اليوم تجين تبقين ع العشه يمنه ماتطلعين وتكعدين تحجيلي واني هم حخابر موج تجي يمنه ونسولف
وعلي مموجود عنده كعدة بغير محافظة واخلي موج تكول لشرار يخليها يمنه ويروح تكوله كعدة خوات بيناتنا
كتلها ولللللج عيييب
كالت ها لعد خلي يكعد يم الجهال واحنه نكعد بالغرفة ونسولف
جاوبتها : وين يصبر على فراكها كل شوي وصاحلها موت مووت
اووو لعد شوون ...
هيه تدبر حبي وهسه بوووسة الج وبوسي حسوني والجهال وباي
سديته منها ..
حبيبتي ام گلب الطيب شكد تخاف عليه ...
كل ماروح للصيدلية تحسبلي شكد واوصل وتخابر خاصة هاي تسوي من اطلع ويه حسان بعدها تخاف منه ..
خلصت شغلي احمد جان مشغول يشد غرفته خابرته اني حتعشى يم فرح كال اخلص واجيكم .
اجه عليه احسان صعدت ويا طول الطريق يسولف يحشش يضحكني
وصلنه يم بيت فرح قبل لا انزل كتله انت اذا تريد تروح روح اني حبقى يمهم على العشة اكو عمال بشقتنه ديشدون غرفة احمد
هو غمزلي كال متأكدة حتبقين عمود عمال بشقتكم لو اكو مناقشات حادة اليوم ابيت الشيخة فرح
ضحكت كتله لا والله حتى خابر احمد واسأله اذا متصدك ...
ظل يضحك كال لا عليمن مصدكج يابه ...
كتله بعفوية والله
كال والله مصدكج بس فدوة استعجلي
عدلت كعدتي ليش انته مستعجل ؟
كال اي والله ما اتحمل اعيش وحيد كلش داحس بالوحدة واريدج وياي ...
واذا تاخرت تشوفلك وحدة
ضحك لا منين اكو وحدة غيرج اني مصر عليج اخذج يعني اخذج
دنكت راسي وسكتت
دنزلي عود اني راح اخليج تفكرين على راحتج وتستشيرين خواتج وانت رجعيلي الخبر انتظرج حتى ادز النسوان
كتله ماشي ... نزلت وكفت يم باب بيت فرح ، دكيت الباب وهو دك هورن رفع ايده سلم عليه ابتسمت وسلمت عليه بيدي دك هورن مرة ثانية وراح
دخلت لبيت فرح ..
تلكتني فرح تلح عليه شكو شصاير وياج
ظليت اطلطل وينها هاي صاحبتج الخفيفة الزاحفة وينها الماستحي راحت
دفعتني من كتفي عدلت وكفتي كالت شبيج شبيج عليها شسووت
اي صدك هيه شسووت
كالت احجي
رحت كعدت على القنفة وبحضني حسوني ابوس بي
كتلها تجي موج واحجي
كعدت يمي تكرص بيه واني خبلتها وهيه شلون ماتصبر سمعنه صوت الجرس يررن
اجتي مووج نقذتني من ملحتهها ظليت اضحك عليها اني احب اخبلها
دفعتها كوومي فتحي الباب اجتي موج لاتخلين شرار يرزلنا مافحتنا الباب بسرعة
كالت لا اني حسيت اكو شي من مساع جيتج مستعجلة وهسه اريد احصل خبر حصري واريد اعرف اني بالاول
كتلها احسان خطبنييي ارتاحيييتي
كالت بصوووت عالي ......يبوووووووي
شكووو عدنه عزااا دروحوا فتحوا الباب حيكسروو رجلج واختها
راحت تطل بالكاميرات شافت وصاحت داااانيال رووح افتح الباب لعمك ولخالتك
دانيال جاوب صار ماما وراح يركض
وهيه اجت كعدت يمي كالت اي ولج وانت شكتيله
سكتي هسه اجه شرار عيب بعده الموضوع بيناتنا ....
كالت يعني معقولة مكايل لأخوه هو معقوولة تقنعيني طابخها لوحده؟
هو موو طفل شبيج فرح ...
راحت لبست شيلتها على راسها لابسة ثوب احمر وبي ذهبي نازك كلش عليها
ورحنا سلمنه على موج وشرار .. وموج نظراتها كلها تساؤل ...
خلينه شرار يم الجهال وفرح بعد متصبر متحجي ..
رحنه للغرفة الفوك
وحجينه لموج هماتين ...
بقت صافنة بس ذيج فرح ظلت مثل الدجاجة وبيها بيضة
ولج انين شكتيله
كتله افكر واستشير اخواتي
ولج خاف بعده يكرهني ويريد ينتقم مني خاف يأذيج أنين
موج كلتلها فرح مو هيج لاتخوفين البنية احسن شي احنه هسه نسأل اخوته عليه ابو مهيب وشرار ونشوفه تعدل لولا هم اكيد اخوهم يعرفون كل شي عنه واكيد ميورطونه وميردون ترجع المشاكل من جديد احنه ماعولنه استقرينا
فرح كالت اي واني هم اخلي علي يعزمه ويجي هنا واسولف ويا بالموضوع واستدرجه اني اعرف للغة الجسد اعرفه اذا جان جذاب لو لا
كتلها عزااا فرررح فدوه لا تجفصين وبعيدن انتوا ناسين شي ؟؟ تره بعد اني منطيت الموافقة ولا كلت الكم اني موافقة
موج غمزتلي يعني انت تقنعيني مموافقة أنين لعبيها على غيري انت موافقة وطايرة من الفرح
اي صح موج بس والله خايفة والله خايفة مانتفق
سمعنا صوت شرار يصيح وموج كمزت نزلت اله
وفرح ماخذة الغرفة طول بعرض متوترة
كتلها عفية فرح اهدي مو هيج ترة راح توكعين
تره والله اني احبه ماشوف نفسي غير وياه
وكفت تباوعلي صافنة وتتنهد
كملت كلامي : والله هو تغير ويريد يعيش حياته اني حاسته صادق وياي اعرفه من نظراته مايجذب والله صار شكد اشتغل وياه ماغثني بشي ولا ضوجني حتى احمد واثق من عنده يجيبني ويوديني
لزمت راسها عبالك تتذكر كل شي صار كبل
رحت يمها لزمتها اهز بيها فرح فررح شبيييج
والله اذا انت مموافقة مااتزوجه والله اخسرج شبيه اني علمود رجال لااا والله
حضنتني وتبجي لا ولج انتي بنيتي اني مااوكف بوجه سعادتج مستحيييل بس خايفة بسببي وبسبب غبائي قبل انت تنظلمين هيج مو اكثر القرار مو قراري بس وحدي قرار الكل انت واحمد وموج وميصير بالتالي بس مصلحتج ...
كتلها لا قرارج مهم فرح لتكولين هيج واني هم منطيته اجابة بس كلت افكر
احجي وياهه وامسح بدموعها
فرح ماكو واحد ميغلط انسي الماضي وخلينا بالجديد وكل شي يتصلح ....
هزيت راسي ... اتفقنا كلنا هنه البنات يسألن زواجهن واني افكر ويه نفسي ...
فرح ...
كاعدين اني وعلي الدر هو كاعد على التخم واني بصفه ديشرب جاي واني صافنة
انتبه عليه خير بويه شعندج جنج مهمومة وضايجة احجي اسمعج صاير شي
جاوبته شلونه حسان هالايام بعده مشاغب ويشرب ويمشي بدروب مشبوهة ..
خله الاستكانة بالصحن وخلاهم على الطبلة الي كدامه ...
باوعلي بنظرات تساؤل : ليش شكو بويه صاير شي ؟ ليش تسألين
_ ها مو هو محاجي انين كايل يريد يخطبها ...
_ الرجال مالة الله من طلع من السجن لهسه وهو جر عدل مو ذاك حسان الاولي
_ يعني شنو شنو ننطيهه واحنه مغمضين ؟
_ لا بويه شنو هالحجي الزواج مشروع اتفاق حاله حال اي مشروع ثاني خلي البنية تفكر زين هم لا تستعجل وحسان هم حاجاني تره
_ صدك حجالك اشوو مكتلي ؟
_ بويه مو كل شي ينحجي وانه كتله على كيفك لاتستعجل وخلي البنية تفكر وهيه قسمة ومحد يكدر يوكف بوجه القسمة تره ...
هزيت راسي بس اني صافنة .. هو مد ايده لخصري وسحبني عليه خليت راسي على صدره ...
باسني على راسي همس باذني وين الجهال
كتله غيث نايم دانيال ديكتب وفطومة لازمة الايباد وام لسان دتباوع وياهه ...
لشويه اجت روان معصبة شمرت الممه عليه
وتباوع لأبوها وتحجي
هاي فرح متسويلي ممه
وكتفت اديها مزعوجة
وخرت راسي من حضنه وكتله هاك استلم اجت ام لسان المحامية
كال شمعنى محامية جاوبته عليك تطلع والله متكلمة
ضحك وكاللها تعاي بابا شبيج
تأشر عليه فرح ماتسويلي مميه
كاللها فرح لو ماما ؟ عيب بويه عيب وبعدين انت كبرتي شربي حليب بالكوب مو بالممه
جاوبته ببراءة لا الكوب فرح تشرب بي كهوة ..
باوعلي شنو فرح ضرتها ؟
كتله حظي غير هاي من تعصب تكولي فرح ومن تتلوك وراضية عليه تكولي مامي ..
دار وجهه كاللها باباتي ميصير الممه تخرب حلكج يصير مو حلوو
كلتله اخلي حمرة ويصير حلووو
ضحك وشالها خلاهه بحضنه
كاللها سنونج تاكلهن الدودة ...
خلت اديها على اسنانها وفكرت شويه
ضحكت وكالت افرشهم بالفرشه هيييه وتروح الدودة ..
باوعلي علي وكلي اكول بويه كوومي سويلها ممه احسن لا تقيم علينه دعوة وتسجنه ...
ورى كم يوم خليت علي عزم احسان على الغده وهو اجه رحت سلمت ..
علي اجاه اتصال وطلع بالحديقة يحجي
احسان كال خاف خالتلي سم بالاكل وماتردين اتزوج اختج تخوفين انتي فرح
كعدت بهدوء كتله لا مسويتلك غدا محترم .. بس كولي حسان عليك برووح اخوك حمدان انت ماناوي تأذيها مو ؟
وخر الجاي من حلكه وظل يكح
منيلج هالحجي هذا فرح مايصير واحد يتزوج ويستقر ..
زين شمعنى انين
باعي فرح اول شي اختج عاجبتني من سنين من هيه طفلة بس جنت بفورة انتقامي عليج وخفت من داخلي لا اذيها بس مادريت بيها راح تأذي نفسها وتتزوج هذاك المطي الي ميستاهلها
وحتى تتطمأنييين .. كال هيج وخله الاستكانة على الطبلة كال وانه ماحب احلف بس هاي لخاطرها هيه
انه وروح حمدان احبها تره والله اختج تنحب وتنعشك ...
وانه مسامحج من زمان
دمعت عيوني ظليت افرك بيهن ... كتله ان شاءالله خير بقت يمها ..
كال شبيجن انتن شنوو كدامجن وحش من صوب ذيج اختج ومن صوب انتي شنووو ظلت عليه ومااخذ من عدكم مااسووها اخوواني وخذووكم تره من حقي يااجماعة شنوو هاي وبعدين وين لاكيها احصل مرة هيه وابنها ...
ظليت اضحك بالله هسه هذا شحجي ويااااه ....
موج :
ورى أيام جان اجه حسان يتعشى عدنا هو يوميه عدنا غداه عشاه بس نومة الليل ابيته ...
اني كمت اعزل المطبخ لان صادف عليه مواعين العشى كل شي مقسمينه احنه وهم ظلوا كاعدين كلهم سوى يسولفون
خلصت المطبخ وطلعت هدوء بالصالة الظاهر حسان راح وكلمن راح ويه مريته لغرفته ...
دااطفي الاضوية الجوة شفت باب الرئيسي مفتوح
طلعت داسده واسمع صوت بلقيس تكول لحسان
ملكيت غيرها تتزوجها انت وخوانك شسالفتكم ويه هالعائلة قافلين على بناتها هاي عندك بنات خالك وخالاتك اية من الجمال يخبلن شبيك مااخذت منهن ؟
حبيت اسمع رد حسان اريد اعرف شنو ضام الزمن لاختي ...
هو جاوبها دخيلك لاتذكريني بنات خوالي وخالاتي مو خذيت من يمهم مرة لعبت بأحوالي وبعدين اني اختاريت وهالبنية داخلة لگلبي من زمان
كالتله وابنها تتحمل مسؤوليته انته ؟ هسه لو ماعدها ولد ميخالف بس مخلفة لو ناوين ترجعونه لابو ؟
لا يمعودة هو طفل ويحتاج امه شنرجعه لأبوه وبعدين هيه شنو هيه مسؤؤليته شراح يسوي هو هو طفل شبيج خيتي ؟
بعد ما اتطمنت عفتهم ورحت صعدت فوك .. دخلت للغرفة شفت شرار متمدد وعينه بالموبايل ..
صافن ممنتبه على شي عرفته ديباوع لصور حمودي
خليت ايدي على بطني وتنهدت اخر مراجعة للدكتورة كالت الرحم متعافي بس لازم ننتظر بعد كم شهر ونشوف شنسوي ..
رحت للحمام غسلت ورجعت للغرفة بدلت ملابسي .. وخليت مرطب لاديه .. ورحت تمددت بصفه هو اخذني يمه وغلق موبايله
خليت راسي على صدره كتله اكول حبيبي ؟
كال كولي يابعد عمر حبيبج ...
فدوة العمرك اريد اسألك عن حسان شلونه هالايام خما يمشي بدروب موزينه
رد مدام دتشوفينه ممفاركين جهرته وليل نهار عدنا كولي كولشي ماعنده ...واني اكفله يمعودة خلي نزوجه تره خطية والله هم يحتاج زوجه يريد يشوف خلفته
جاوبته زين اذا صارت القسمة خلي يجي يكعد هنا ويانه هواي مجال بالبيت ...
رد شبيج موج تره هو مو طفل ونراقبه جبير هو واختج هم مو صغيرة
ميخالف افتح وياه الموضوع فدوة اريد اختي يمي هاي انوو والله احسها بنتي اني ربيتها من جنت بالابتدائية وامي ماتت ربيتها ويه خالتي رغم جنت صغيرة
غرس ايده بشعري كال سهلة لتفكرين كل شي بالقسمة ...
أنين :
بعد ما حجيت وي اخواتي وفكرت كاعدة بالغرفة اخذت حسن لحضني وسألته حبيبي انته تحب عمو حسان ؟
هز راسه وضحك كال اي حبه يعلمني اسوك
يشيلني ويجيب لداني وفطومة ويجيبلي العاب
زين وتحب بابا عمر ؟
خله ايده على خده بتفكير ...
هز راسه وكال اي هم حبه
تروح وياه بابا عمر ؟ تعيش يمه ؟
باوعلي بتفكير انت ترحين
اريد اختبره : اي اروح
كال : وماما فرح وبابا احمد وموج
وظل يعددهم كلهم والجهال ...
كتله لا ميرووحون بس اني وياك نروح ...
هز راسه كال لا لا منروح نبقى يمهم ...
حضنته وبسته حبيبي احنه يمكن حنروح نعيش ويه عمو حسان ومنا جاي انته تكوله بابا ميخالف ؟
باوعلي يضحك بوجهي : اي اي حبه ( احبه)
ابتسمت ... خليت حنجي على راسه واتمتم بكلام هو يمكن مايفهمه .. وملتهي يسوي بالمكعب مالته يشكله ..
حبيبي اني مراح اتخلى عنك مستحيل ولا افضل احد عليك ابد ويارب تسامحني اذا ظلمتك وياي وبعدتك عن ابوك بس ماكدر كل الي اكدر عليه انو ماقصر وياك واكون الك الام والاب وماانتظر من احد يقدملك اي شي اني الي راح اقدملك كل شي حبيبي ...
عفته يلعب مسحت دموعي وخابرت على موج تنطي خبر لأحمد تاخذ رأيه لان اني استحي احجي وياه ....
يتبع ....
طبعا اكو بعد احداث هاي بس مقدمات 😬بس البارت طويل ماريد اتعبكم بقراءته .. لذلك توقفت عند هاي النقطة
كون تتفاعلون وتعوضون تعبي لان كلش طويل البارت🥺
واي وحدة عدها نقد للرواية تجي تحجي هنا او بمنشوراتي بالفيس مو تحجي من وراي من شنو خايفة ؟ ها عادي تعالي اناقشج وطبعا اغلب الي اناقشهن يشردن للاسف
وخاف تكولون ماكو هيج فلم تلث اخوان يتزوجون تلث خوات لا اكو وهواي هيج واليوم هم وصلتني هيج قصة تلث اخوات متزوجات تلث اخوان بس ماسكرنت لان ماترخصت من البنية اترخص منها واسكرن محادثتها ...وانشرها ع البارت الجاي الي اكمله وانزله بس كون مانسى لأن أنه نساية ..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!