هذيانٌ بين جمرٍ وجليد ..(ارملة اخي المجنونة) الفصل الحادي وتسعون 91 - بقلم نورا ناصر

هذيان بين جمر وجليد
نورا ناصر
تكملة احداث

ـ اذا ما اگـودچ
المـن بيدي چـفي،
واذا ما شال راسچ انسى چتفي
مو زلمه اذا مليتچ بيـوم،
اقوي گبالهم بس يمي ضعفي
(منقول)

سمعت صوت احمد يم باب غرفتي ..
ها انين افوت ؟
عرفت موج كلتله
انكلبت خلقتي احس وجهي ظل يطلع منه حرارة من الخجل مديت البوز ..
وصحت وحروفي متبعثرة اي احمد تعال فوت

فتح الباب باوعتله جان مبتسم فدوة بسرعة نصيت راسي ..استحي اخلي عيني بعينه

جان بيده تليفونه كال هاي من شوكت ؟

كمت وكفت من على السرير بعد ما جنت كاعدة
ها شنو ؟

من شوكت حسان يريد يجي يخطبج ؟
جاوبته هو من فترة كلي اريد ادز النسوان بس اني كتله اريد افكر

كال؛ هااااا

اي ... كعدت كتله وانت شنو رأيك ؟
جاوب رأيّ من رأيج انتِ ..

يعني هو متغير عن قبل صح مو تشوفه هيج انته ؟

اي والله دااشوفه وصاير احسن وكله ويانه بالمناسبات ويانه مو مثل قبل متختل وبعدين انت هم وياه بالشغل واكيد صرتي تعرفينه اكثر وهو اله فضل علينه من قبل

اني مو اكولج هالكلام عمود اريد اخلص منج وازوجج لا بالعكس بس احجيها لله الولد مامنه قصور ومحد ما يغلط ومحد مايندم على غلطه ومحد يظل على حاله الكل تتغير

سكتت اني واعرف احمد اخويه كولش زين يعرف مصلحتي ومستحيل يفرط بيه هو لوو ممتاكد منه ميكول هالكلام

كعد يمي خله ايده على جتفي كال انت فكرتي زين مقتنعة ظلت يمج اني انطيت رأيي بالولد وبقت يمج

باوعتله وعمر خو مياخذ ابني مني
عبالك هلجملة لزكت بلساني ادري الحضانة الي بس غريزة ام

لا شحده الحضانه الج ..احنه كلنا وياج انين واي قرار تتخذي وياج توافقين ترفضين انت تعرفين مصلحتج محد يعرفها بكدج

شوويه بداخلي خوف ماريد اتسرع مثل قبل صارتلي جرة اذن من زواجي الاول وفشلي مو فشلي اني صح اختياري وتسرعي خاطئ بس بذلت كل جهدي حتى ينجح زواجي ورغم المشاكل ردت ارجع اله بس مو ويه ضرة

... بس بالاخير وبهالوضع هذا اني احسان احبه
دعيت الله يوفقني وياه ويسعدنا ويبدد كل هاي المخاوف

طلع احمد واني رحت توضيت وصليت استخارة
وسويت مكالمة جماعية وحجيت لموج وفرح عن موافقتي

فرح ام دميعة تبجي فدوة لعيونها وبس ساكتة متحجي بصوت انفاسها

وموج عمري كلتلي هذا هو مدام خليتها صوب الله الله كفيل بتيسير أمرج
انسي الماضي وابدي حياة جديدة

سديت المكالمة واحس حمل وانزاح عني ...

بقيت الليل كله افكر وين يله عيني اخذت نوم
الصبح كعدت شفت مسج منه
كاتب واخيرا حبيبتي فكتها ....
هسه اكدر اكلج حبيبتي موو؟
حيييل صار شكد مكايل هالكلمة لوحدة تستاهليها عمري ونبض گلبي الله يقدرني ويسعدج واحقق كل الي ترديه

جان بنفسي اگوله هواي كلام عن كل ذيج السنين الي جنت بيها دافنة حبي اله بكلبي تمنيت اخابره احجي ويا واكوله حبيبي الحجي الي ماينحجي يتعب واني جنت حيل تعبانه من كاتمة كل شي ودافنه كل شي تعبانه من جان كلبي يرشدني اله باستمرار جانت حقيقة حبه بكلبي وبس

اني اصلا حتى اسمه ما اكوله كدام احد استحي واخاف لا رجفة لساني تفضحني وتفضح حبي واني انطق حروفه ...

هسه لا مستعدة اكول للكون كله احبه ولغيره مانبض كلبي

خليت الفون على صفحة ماعندي اجابة او يمكن اذا اجاوب ميكفي يوم كامل من الكتابة اله او الحجي ويا

شغلت اغنية اليسا وحلقت باحساسي وياهه
نفسي اقوله يااا حلم نفسي اموت واطولو
فعلا جان حلم بالنسبة الي يصير من نصيبي
وبالنهاية الله مخيبلي ظني .....

بعدها احمد كال راح ابلغ بيت عمي وخوالي وعماتي همين ضروري ننطيهم ...

انطاهم خبر واتفقوا يجون نسوان من طرفهم
قبل ميجون خابرني اني صار فترة مشايفته ولا محاجيته وهو من اخر رسالة ماتصل ولا رسل اي شي

اني جنت اريده يشتاقلي اكثر ، هاي اللهفة مال المحبين جنت اريدها منه وحتى مني لذلك قطعت كل تواصل وياه

بس من خابرني جاوبته ... كال اول شي بعد ماسلم مشتاقلج ولج ...

ابتسمت شوكت لحكت تشتاقلي ؟
رد والله مشتاقلج ودا احسب يوم يوم تصيرين الي ...

يله مبقى شي .... وبداخلي اكول اني هم مشتاقتلك وهاي اللحظة جنت متمنيتها من زمان صبرت السنين هسه خلي اصبر كم يوم ...

حاجيته اريد اسألك سؤال احسان انت تحبني ؟

رد ليش انت اكو بيج شي ماينحب ....

لا والله عليك الله ...

والله تنحبين وتنعشكين عشگ بكد العالم كله ...

خليت ايدي على حلكي اكتم ضحكتي ...

بس ليش كاطعة وياي ؟ ها ولج كطعية ؟

لا والله مكاطعة بس ماعندي مجال ابد

تره اني مستعجل

على شنو مستعجل احنه مو اتفقنا نطول شوي بالخطوبة

اي افتهم بس قصدي نعقد هسه خلال هالايام

اي بس هسه رمضان وحارة ...

كال وشراح نسوي احنه ماراثون عدنا وراح نركض؟ هو نعقد اريد اخذ راحتي وياج

عزاااا رااحتييييش شدتحجي انته ؟

عاط شبيييج وبعدين تره عقلج راح زايد

سكتتت وبس اتنفس

هو كال بهدوء ومرح : غير اريدج مريتي نسولف على راحتنا ناخذ على بعض مو الي ابالج تره ها حتى لو بالتليفون لان انت كلش مسويتها يابسة عليه

_ يعني نعقد هسه برمضان ...

اي عادي شكو بيها المشية وره الفطور نسويها مشية زلم بس نعقد ووره العيد وره عرس احمد نسوي حفلة
لا تشلعين كلبي انين شطالب هسه اني منو شنو خايفة انتي ؟

لا هذا هو براحتك لا خايفة ولا شي بس لان رمضان وصايمين بس عمود هيج

اي يالله حبيبتي فكيها شوييه لحلحيها .....

_ ماشي
_ شنو طلباتج كليلي هسه هنا اريد اسمع منج ماريد اسمع من النسوان ..

_ انت تعرف بس تأجل العرس علما اتخرج
_ مو هيج تصير طويلة ومشاكل يا عيني ماحب هالسالفة هاي اني
_ لا عفية انت مودتكول طلباتج هذا طلبي الوحيد
_ ديلله سهلة بعدين اعرف شلون اقنعج ههه وبعدين اني هم عندي طلبات مو بس انتِ

_ شنو ؟
_ لبسج هذا تغيري صراحة معاجبني
_ ليش شبي لبسي ؟
_ اي شي مفتوح من النص ماريدج تلبسي يعني عريض ضيك ماريدج تتبنطرين وتطلعين بعد تره يغري اني من اشوفج شيصير بيه ماريد احد يشوفج

_ ياربي لعد شنو اللبس
_ اني اختارلج على ذوقي شي مرتب وحلو
_ وهذول ملابسي وين اوديهم اصلا اني كله هيج لبسي
_ مادري وين توديهن تحركيهن تصدقين بيهن المهم ماريدهم

_ خو ما تلبسني عباية مثل فرح ؟

_ هههه علواه والله شبيها العباية تره الستر حلو وحتى بعد محد يشوفج بس اني ...

_ لا والنبي ما اعرف البسها اووكع بيها والله ...
_ مدام توكعين لا تلبسيها بس لبسج يتغير

_ اي عود نتناقش بهذ الموضوع
_ خلص تناقشنا وبعد نقطة الي اسمه عمر متتواصلين ويا ابد
_ هو اني ابد ممتواصلة وياه تره ... ولا اريد اتواصل وياه
_ هذا هو اتفقنا ...

وره أيام اجتي مرة عمي وموج وفرح للشقة مالتنا وهم من طرفهم اجتي بلقيس اخته وبناتها رحاب وريلام وهماتين اجت خالته ومرة خاله ...

واتفقنا على كل شي .. المهر وموعد المشية هو اصلا اني ويا متفقين على كل شي حتى بلقيس كل شوي وكالت هم متفقين احنه عليمن بعد نحجي عود تلمح انو بيناتنا علاقة بس اني مهتميت ولا حتى جبت سيرة اله كل هذا مو مهم عندي

ورا كم يوم جانت دينا عدنا معزومة على الفطور .. خلصنا ورحت للمطبخ اجت ورايه تشكلت كالت والله تعبتج اليوم وطبخج كولش طيب عاشت ايدج

يمعودة لاتعب ولاشي اصلا يومية هيج اطبخ اني
كالت اني اغسل المواعين ...
كتلها لا روحي يم احمد اني اغسلهم
ظلت هيه تكول اني واني اكوللها لا اني ..

سمعنا صوت الباب تندك تسائلت منو جاي هسه توه خلصنا فطور ..

طلع احمد فتحها باوعت دخلوا عمر وابوه وامه ... من شفتهم كرصني كلبي الظاهر وصلهم الخبر ...

بقيت بالمطبخ اني ودينا واحمد اجه فتح الباب كال وين حسوني ؟
لزمته من ايده احمد شنو يردون ياخذون ابني
كال لايمعودة يردون يشوفوه

هو جان وقت مغرب راح اخذ حسوني جان ديلون بدفتر تلوين بالغرفة طليت شفته شايله وهو القلم الملون بيده واخذه الهم

بقيت يم باب المطبخ واكفة واسمعهم شنو يحجون وكلبي بيدي
سمعتهم يحاجون حسوني ويبوسون بي ..

وراها بشوويه عمو ابو عمر كال سمعنا ام حسن تريد تتزوج

رد احمد عليه اي والله عمي وصلت قسمتها وهيه موافقة

_ مو هذا الرجا منك ابو شهاب ولا هذا العشم بيك ليش احنه صارلنا جم سنة نريد نرجعها لعمر تالي تروح تنطيها لواحد

عمر قاطع كلام ابوه وكال بعصبية
اي تروح تزوجها لواحد خريج سجون واخلاقه سكط

احمد رد عليه شمعرفك انته بي وهيج تحجي عليه ؟ داك بابك معتدي عليك نسويله مكسورة وياك ؟

وحتى لو جان هيج صار ماضي والولد استعدل واحنه نعرفه كلش زين هسه علينا بالحاضر وحتى بالماضي هو جان اله فضل علينه

عمر : اني ابني ماريده يربى عند هيج واحد خريج سجون واخلاقه طايح حظها

اني من كال هيج كعدت يم الباب ولميت رجلي لصدري وحضنتهم وعيوني غوركن ماريده يحجي على احسان هيج وخايقة ياخذهه حجة عليه وياخذ ابني مني واصير مخيرة بين ابني واحسان ياربي لا تختبرني بيهم ابني محتاجني واني مستحيل اتخلى عنه واحسان احبه وصارلي سنين انتظر هاي الفرحة ...

دينا كعدت يمي ولزمت ايدي وتطمني بنظراتها ...

سمعت عمو ابو عمر كال هيه اذا تريد تتزوج خو ترجع لابو ابنها احسن لخاطر الولد يربى يم ابوه مو يم الغريب مع الاسف عليك احمد

احمد : والله عمي انت على راسي والنعم منك افضالك ما انساهه من اجيتك دخيل وصرتلي سند بس كل الي صار كدامك اختي ما طلع منها قصور من جانت وياكم ولا طلع منها الشين

بس الخلل بابنك ماجر عدل وياهه ويوم الي رادت ترجعله راح خطب وتزوج وهسه عمر بذمته مره والرجال الي خطبها نظييف وتكفل بابنها واني اذا الخيار بيدي انطيها لاحسان لان عمر عنده مره اولا والقرار بيد ام حسن هيه قررت واختارت

عمر كال كل شي واضح لازم جانت تنتظره يطلع من السجن حتى تتزوجه موو ؟ وهم هيه تشتغل وياه لعد كل شي مبين

سمعت صوت احمد عاط : عمر لا تتجاوز لاتخليني اذيك انت ابيتي خليني احترمك

كامت دينا وفتحت الباب بس مو كلش وظلينا نطل من الفتحة اشوف احمد واكف على حيله وساد قبضة ايده ... دينا كالت عزاا بس لا يتضاربون ويضربون احمد

ام عمر كامت صارت بيناتهم وكالت لاحمد يمه موو هيج اعصابك هو مايقصد

احمد جاوبها لاء يقصد جاي يطعن باختي وابيتي هاي جبيرة تره

ابو عمر كال بويه احنه جايين نصلح وعمر انت لو تحجي عدل لو تطلع تخلينه احنه نحجي مفهووم ؟

عمر كال بعصبية ويباوع لاحمد مو قصدي بس اني اريدها واريد ابني واحمد ماجاي يفهم اضطريت اتصرف هالشكل والا ام حسن ام ابني واني مو قصدي اطعن بيها

احمد بعصبية : عمي شوفه شيحجي وانت تريدني ارجعها اله ...

عمو كاله ابني احمد اذا ع المرة تره مره ماتاكل مرة خلي ام حسن ويانه وذيج ابيتها وان شاءالله يعدل بينهن

_ اي عمي صحيح حجيك ماتاكلها بس بعض النسوان كيدهن عظيم والله يستر منهن كل شي يطلع منهن واني اختي اخاف عليها وابنك مو كفو من كلامه كبل شويه

عمر جاوبه شنوو انته شتعرف عن مرتي وتحجي عليها هيج ؟

احمد تجاهله باوع لعمي : اسمع عمي الناس انطيناهم كلمة ميصير نتراجع بيها واصلا احنه من رجعنالهم الموافقة واثقين من قرارنا وهاي قسمتها وصلت بعد مانوكف بوجه القسمة

عمر : خل تتزوج انطوني ابني وهيه الله وياها

احمد : حجي يفيدك هذا قنع روحك بي لو تحجي منا لباجر محد يسمعلك لان انته تعرف الحضانة الها وانت شوكت متريد تعال شوفه انت لو مفكر بي من البداية مجان كل هذا صار بس انت الغلط راكبك ومتعرف تتصرف

عمر : لا والله ما امشي بكلام المحكمة اني من باجر عشيرتي كلها يمكم اخذ ابني وخلي اختك تتهنى بزواجها عود

عمي جاوبه : عمر اكعد شنو هالحجي لا تأزم الامور مالك نصيب لا تكعد تلح وتسوي مشاكل يله امشو

احمد لزم عمو وين تروح عمي اكعد حظر وصايمين انتوا ابقوا يمنه

رد عليه لا احنه بايتين هنا ببغداد وباجر نرجع لكركوك بايتين يم اخوي مشكور ابني الله يسعدها

طلعوا واني اباوع من فتحة الباب واشوف نظرات عمر لاحمد كلها توعد

فتحت الباب من شفتهم راحو وطلعنا اني ودينا ورحت اخذت حسوني جان كاعد على التخم بكل هدوء ويباوع على التلفزيون حضنته حيل

باوعت لاحمد واني حاضنه حسن وحاجيته
شفت عمر شيحجي شفته شيكول وشون يباوع ؟

راح كعد احمد على التخم وتنهد راحت كعدت دينا كعدت يمه هو باوعلها ابتسم ولزم ايدها ...

باوعلي وكال عوفي فارغ هذا بس حجي لسان وهوبزة لاتفكرين فكري بحياتج الجاية اهم شي مقتنعة وهم افرحيلي مبقى شي لعرسي يله شوون خوات انتن لا تهووسن لا تصفكن ولا عبالك بقى بس اسبوعين لعرسي

ضحكت دينا وهو يباوعلها وعيونه بعيونها ...

رحت كعدت يمه مو صايمين وتعبانين والله بس هم تدلل باجر اجيب زعاطيط فرح ونفتح دي جي ودك وركص

ظل يضحك ويكفش بشعري هاي فرحتج مو اليه لخطوبتج مووولج
وكرصني بخدي

لزمت ايده متووجعه وكلت اخخخ لا والله الك هو شكم احمد عدنا هو بس انته بس عرسك حصرنا تره منا عيد ومنا رمضان

وضحك كال وخطوبتج هم مووو ؟

ابتسمت فرحانة وخجلانة ودنكت ...

دينا كالت احمد ولا توقعتك هيج عصبي يبووو

باوعلها لتخافين مااعصب عليج بس غير هاي اختي والي يمسها يمسني

كالتله والله اني افتخر بيك هيج تدافع عن اختها والي مابي خير لاهله مابي خير للناس وانت كلك خير وبركة

لف ايده على جتفها كاللها حبيبتي وعمري انتي .. اني اخذت ابني وعفتهم ورحت للمطبخ وشويه واجت ورايه تغسل مواعين

كتلها ولج روحي يمه كالت ولج ميكعد رااااحة خليني يمج ...
ضحكت عليها ورحت اسوي جاي نومي وهي ظلت تغسل المواعين ...

ام جاسم...

غسلت مواعين الفطور وسويت جاي للشيخ وخله وراح طلع ما اعرف وين راح ما سألته ان شاء الله من يرجع اسأله ما افوت شئ اني

كلت ما دام طلع وراح واني ما متابعه ولا مسلسل محد عاجبتني غير مسلسل خليجيه وحده واشوفها بالإعاده

فكلت خليني انضف والله واطلع اغراض الكاونتر غسلتهم والكاونتر والطباخ والسيراميك ما خليت شئ يعتب عليه ...

والجهال فوك راسي كل شويه واحد اجاني...ماما شوفي هاي روان اخذت موبايلي وعندي درس علئ التلي كرام وانوب راسله بصمات وابويه يصيح عليج ام جاسم شراح تسوين فطور اذا تتاخرين افطر بيج ...

لطمت وجهي بيدي وهي كلها زاهي ...عزا العزاني كون ولك حذفتها لو لا وبعد شراسله ؟

رد عليه مقهور ويريد يبجي لان مفشلته كدام كروب المدرسه كاتبه... بققققغغغ بنمممههخ وبعد كومه كاتبه هيج كلام

تنهدت...هسه حذفتهن لو لا ؟

جر نفس وهو يبجي كال...حذفتهن بس المعلمه رزلتني والطلاب يضحكون علية

غسلت اديه ومسحت دموعه بسته بخده...ميخالف حبيبي لا تبجي بابا مو كلك اذا صار وياك موقف صير قوي ولا تزعل نفسك لا تضوج هسه اني احجي وياها

اخذت الموبايل ودخلت علئ التلي وهو راح اخذ دفتره يكتب فتحت البصمه مال المعلمه كاتبته...دانيال هاي اخر مره الك تخلي الاطفال يسوون ضجه بالكروب ويزعجوني ويزعجون الطلاب مره ثانيه اطردك والله تمنيتك يمي جان علئ راسك بالكتاب لا تصير مهمل وبلا قلة ادب خلي امك تنتبه عليك بلا مكاعده وساكته

وسجلت صوت بصمه واني متعصبه شلون هيج تحاجي دانيال ...عيني علئ كيفج ست سامية هو طفل اكلتي وشربتي هاي فوك ما التعليم طايح حضه انوب انتي عليهم وشصار هسه طار نصه الكروب لو تفلشت الوزارة طفل ورسل بصمة شلون بله تردين نموته الج مثلا خلي اسلوبج ارقى من هيج هسه كون التعليم بي حظ واحد ما انقهر انوب مخلصيها علينه الرصانه والرصانه العلمية طاح حظ الوزاره والرصانه...

ما اشوف طب حظرت داني وطردته من الكروب همست من بين اسناني ...بسيطه عود فصلتنه هي ام الرصانه يجي علي واخلي يشوف جاره ويه ست سامية هو عنده صديقه بالتربية اخلي يعلمها شلون تطرد داني وتفصله هي دوم هيج وياه...

رجعت اكمل تنظيف اجت فاطمة كالت...ماما ست حميده رسلت الي درس واني ما ادري شلون طلعت من التلي وانحذف عندي هسه شلون ارجع وعندي حفظ سورة الحمد

رجعت غسلت اديه ودخلت علئ التلي رسلت بصمه بتوسل...السلام عليكم هلاو حبيبتي ست حمديه ياريت لو تعيدين ارسال الدرس لان بنتي فاطمه حذفته من دون قصد وياليت تطولون بالكم شويه علئ الطلبه لان تعليم جديد عليهم وميعرفون يستخدمو وهم اطفال هو احنه كوه مدبريها...

رسلت الدرس بدون متجاوب علئ البصمه باوعتلها بقرف...اوووي عاد كولي ادللي حاضر ردي السلام ناس ما عندها ذوق...

راحت فاطمه تكتب واني رحت اكمل غسل وكل شويه واحد جايني ...

روان ماكله كاكاو ومتلفه ملابسها غسلتلها وغيوثي سويتله ممه...

كملت تنظيف حسيت براحه بعد ما سعفت البيت نمت شويه لان تعبت وكفوا اربعتهم بباب الغرفه باوعتلهم بنعاس...العباس عليكم الله يخلي ابوكم بس نومه ام النص ساعه الحمزه ابو حزامين ما أتأخر نص ساعه وعلي فدوه لا تكعدوني

فاطمه كالت...امشو امشو خلو ماما تنام يله ماما انامي اني الزمهم ولا اخليهم يجونج

شمرتلها بوسه بالهوا...فدوه الكلبج بعد روحي يله اخذيهم بس نص ساعه ونبي ميته نعاس

بعدني هسه خليت راسي واجت فاطمه تركض...ماما ماما الحكي غيوثي يريد ياخذ لهاية روان و روان عضته

كمت بتعب وركضت لكيتهم مكافش وغيوثي مدخله اصابعه بخد روان وهي لازمه كفشته وثنينهم يتصارخون ودانيال حاط رجل علئ رجل مسوي روحه يقره وهو فاتح اليوتيوب يباوع ماشا والدب ويتمضحك

فارغتهم واخذت غيوثي وروان نومتهم ضلو بس الكبار نمت شويه وحسيت بيد ناعمه تنده عليه فتحت تك عين...هااا خير داني هاي عود حلفتكم بالعباس

كال بانزعاج...اريد اسبح حضريلي المنشفه والحمام وملابسي

عطت بي ...متحضرهم انت؟

رد عليه وهو يرفع حاجب...لا والله لعد بابا من يكلج حضري لحمام ما تصدكين وكل شويه و وكفتي بباب الحمان علي حبيبي رايد شئ ...شنو قابل اني وحد

جاوبته بهدوء...ابوك رجال كبير ويجي تعبان لازم ادير بالي عليه واساعده انت كاعد وساكت ومخلصها فاتح اليوتيوب وتتمضحك شبيها اذا عاونت نفسك

كعد علئ الجريايه...كومي ماما كومي كولة بابا النوم ما فاد اهل الگبور

ابو لسان اني اكدرله كمت حضرت الحمام هو اصلا مبي شئ اخذت فره بي وطلعت

بس علكت ملابسه والمنشفه والشامبو وليفته كتله هاااي ليفتك لا تليف بغير ليفه لكل واحد ليفه

ضحك ضحكة شيطانية...ليفتي اليف بيها جسمي وليفة فطومه اليف بيها رجلية

اخذت ليفة فاطمه وطلعتها من الحمام بعد ما خزرته شلون لوتي يلف بيها رجلية علكتها بالمنور ورجعت نمت يارب محد يكعدني...

والله ماكوو خمس دقايق حسيت واحد غطاني ودقايق وسمعت الشيخ يصيح...ام جاااسم ام جاسم اكعدي بوويه جبتلج كاهي وكيمر بسج نوم

فزيت وجريت نفس وحسبت من واحد للعشرة حتئ ازيح العصبية كتله..هسه نمت والله هم جهالك يخلون واحد ينام ليكول الخدامه مال الخلفوهم...

رد عليه ...بويه لا تجفصين شني الخلفوهم وتعاي اسولفلج سالفه علئ وحده عجبتني

عكدت حواجبي بعصبية...شنووو شنووو عجبتك منو هاي بلا زحمه شيخنا ابو الحريم...

كعد يمي وجمع شعري كله وخلاه بصفحه وحده كال...بوية هذا انه دخلت علئ بيت واشوف بنيت نايمه علئ بطنها يا ام جاسم ما اسولفلج شصار بيه

هي بيضه مثل الثلج وثوبها صاعد ومتمرد علئ رجليها جاات بويه انه شصار بيه اجيت اهجم عليه بس تعوذت من الشيطان وغطيتها هذا من طيب اصلي

جنت اباوعله متعصبه...وين لكاها هاي

كال...انه غرت عليها من فروخها يفترون عليها جنهم ذبان

ضربته بقبضة ايدي علئ صدره...احجي منو هااااي هسه تطلكني

رد ببرود...وحده اسمها فريحه طاك فيوز براسها من بده رمضان لحد هسه وهي تنظف تنظيف العيد

ضحكت...غير قايمه بواجب البيتك هههه

باس خدي...دكومي بواجب ابو بيتج وانه اضمنلج الجنه بدون صيام

لزمت ايده وبسته همست...احبك

رد عليه برومانسيه...بويهرد عليه برومانسيه...بويه جا دامج تحبيني خلينه نتسحر قبل لا يصيح امساك

استغربت...بعد وكت

لزمني ومددني وهو يبوس بكتفي كال ...لا ماكو وكت يام جاسم خلينه نلحك ورانه سبح

افتهمت قصده وابتسمت خجلانه منه وطار النعاس بعد ليلة صاخبه بالرومانسيه وفاطمه وداني فلشو الباب تفلش ما فتحه الهم ههههههههههه
صيح عليهم نعله علئ شيل ابوكم والله من اطلع الكم

أنين ... نزلنه لسوك بغداد الجديدة اني وفرح وموج والجهال خليناهم بالبيت الجبير يم ريلام وهدى
نزلنا نجهز لخطبتي وعرس احمد وللعيد ولكل شي ...

شفنا بالسوك شباشب ابو الكركوشة متنا ضحك وفرح صممت اله تشتري كالت ولجن هذا العزيز الي صار تريند بالكروب بس هذا كركوشته خيوط ذاك العزيز جانت كركوشته لاستيك وملونة

كلتلها موج كعدي وسكتي لا ترة والله نكتلج بي هسه هذا فكر وجوده مقترن بالمصايب

كتلها اي والله على عين خطوبتي لتسويلنه مصيبة جديدة فرح

التفتت عليه موج كالت لتكولين هالحجي فكري بالشي الزين لتفكرين وتخلين عقلج الباطن يجذب المصايب والمشاكل

كتلها مادري موج ممرتاحة احس حيصير شي

ولج ليش تحجين هيج ميصير اله الخير ان شاءالله انت لتفكرين باشياء سلبية فكري بايجابية تجذبينها

تنفست اي ان شاءالله .. باوعنه لفرح شفناهه تقيس شبشب عبالك دتقيس حذاء سندريلا ...

وكفنا ننتظرها اباب المحل وهيه دتنكي واحنه نباوع ع المحلات شويه وطلعت كالت اشتريت الي ولبناتي كله كركوشات وجبت لروان نفس لون مالتي ومالة فطومة لأن تكرعني

طلعنا من المحل مشينا شوية واسمع مووج تكول عزاااا ولج فرح !!!
شكووو
ولج لابسة النعال حذائج ويينه ؟

باوعت لرجليها وكالت يااااا
وفتحت العلاكة كالت هذا حذائي نسيت بدل مااخلي النعال بالعلاكة خليت الحذاء ولبست النعال

كالتلها كولي والله فرح لو انت تموتين على لبس الشباشب بالطلعة وترتاحين بيهم ولج عيب فشلة كل هالجمال والاناقة لابسة نعال وتمشين بي

اووو مايبين العباية طوويلة وبعدين مايبين عوفي عوفيني خل نمشي ورانه فره

ياا عزااا ولا يهمها هالمرة هاي ولج فرح عيب انوب لونه اصفر وكركوشته فسفورية
دخيلج لبسي حذائج فدوة

وكفنه بمكان وغطيناهه اني وموج وهيه لبست حذائها وتدردم علينه ولا يهمها ابد تكول محد يشوف...

رجعنه للبيت جان احمد هستوة كاعد من النوم بعده رمضان ١٢ يوم يله يخلص واحسان حدد موعد العقد بهالايام ورة وفاة الامام علي عليه السلام ومصمم كتله العشر الاواخر مال ليلة القدر ميقبل يكول مراح نسوي شي بس نعقد مرات احب عناده ولواته ....

كعد احمد على التخم وبيده تليفونه ويحجي نزعت حذائي وخليت العلاليك بالكاع وكعدت بصفه عرفت من خلال الكلام ديحجي وي عمر تنهدت تعبانة حييل ومنا صايمة ومنا موضوع عمر يوترني

اسمع احمد يكوله احنه ما اتفقنا هيج الولد متشوفه بالمحكمة مانريد تتعب نفسيته احنه اهل ومابينه هالسوالف تشوفه هنا يمي بالشقة وشكد تريد تظل يمه ظل محد يطردك

خليت اذني على تليفون احمد اسمع وياه ويجيني صوته عالي يكوله اي بس من حقي اطلعه وياي هو عمره فوك السنتين المحامي مالتي يكول من حقي مشاهدة واصطحاب واذا متقبلون اخذه ويايه كم ساعة اقيم دعوة مشاهدة واصطحاب واخذه من المحكمة غصبا عليكم

رد عليه احمد : شنو غصبا علينا احجي عدل يووول مقصرين وياك احنه ؟ وبعدين هذا ابنك ليش بهاي سوالفك تريد تضره

جاوب اني اريد حقي بالابوة مو هو راح يعيش وي واحد غريب وانتوا حارميني منه تره مايصير هيج احمد هاي عود انت صديقي وتصرفاتك كلها ضدي صدك لو كالو الصداقة مواقف وانت ولا موقف صرت وياي

_ ادري تريدني اصير وياك ع الباطل شون حجي هذا واصير وياك ضد منو ضد اختي ؟ تره اني خواتي خط احمر خوش ؟

_ كيفك لعد احمد توصلكم ورقة من المحكمة تبليغ عود ...
وسد التليفون

باوعت لأحمد يعني شنو ؟؟

رفع شعره ليفووك وتنهد كال هو ديسوي هيج لان مغثوث منج ركعتي بوري وبعدين هو ابوه تره شراح يسويله ؟

اي خلي يشوفه بس مياخذه يبات عنده يرجعه لهنا .. وميسافر بي لكركوك ...

لا يابه مو من حقه هيه مشاهدة واصطحاب كم ساعة ويرجعه .. اذا نمنعه مو بصالحنا

زين شوكت يريد يشوفه ؟ وهو هيج اله خلك رمضان وصايم رايح جاي كركوك بغداد
_ شسويله مثلا تمنعينه؟؟ ماتكدرين حقه هذا وهو مايأذي تره هو مو الهالدرجة سيء ...
_ اي اعرف خلي نشوف لغاية حجته ويانه هيه كم ساعة ويرجعه نشوف بالله وراها شراح يطلعلنه!!

بعدها إحسان حدد العقد كال المشية ورة الفطور وحضرنا كل شي ..

قبلها بيوم موعد المشاهدة اجه عمر الصبح واخذ حسن الصبح والموعد يرجعه قبل الساعة ٣ الظهر .. هيج حدد القاضي ..

حسن جان متردد ميريد يروح وياه لان هو ممتعود عليه هوايه بس هم يحبه ومن يشوفه ويجيبله العاب يظل يسولف بي وعلى طول يحاجي بالتليفون يعني علاقته زينة بي

جنت فرحانة واحضر للمشية وكل شوي اخذ رأي موج او فرح او حتى صديقتي زمن بالفستان الي راح اللبسه والمكياج والتسريحة ..

بس كلبي جان ويه حسن وخايفة عليه رحت لغرفة احمد شفته نايم خطية عود كلت اريده يخابر عمر يسأله عن حسن

صارت الساعة وحدة كمت سويت فطور للساعة ب ٣ مخلصة طبخ ...

كابلت الباب وكعدت هسه يجي حسن واخذه اسبحه وابدله يمكن اكل ويه ابوه ويمكن هسه مشتريله العاب هو كل مرة يشتريله راح بالي لبعيد خاف يغيره عليه يخلي يكرهني خاف يكوله على شغلات موزينة عليه

ظليت افرك بوجهي وافتر بالشقة ... تأخر الوقت صار ب٣ ونص ونوب بالاربعة وهو ماكو يربي تأخر خلي اروح لأحمد اكعده

رحت فتحت باب غرفة احمد شفته مخلي التليفون على اذنه ويحجي وهو منعس الظاهر دينا كعدته
شويه وعااط شنووو وكتها امج تنكسر ايدها لو خاف جذب ماتريدنه نتزوج بالعيد ؟

شويه سكت وكال يمعودة لتبجين لتبجين هسه جايكم للمستشفى بس لتبجين
هاا طلعتو؟ يله ماشي وره الفطور اجيب انين واجي نتحمدلها ع السلامة

سد التليفون وباوعلي متفاجئ هاي من شوكت انت هنا
هاا اسفة والله سرحت شبيها ام دينا
كعد وظل يتمطط كال واكعة ومكسورة ايدها واحتمال يتأجل الزواج الظاهر كلش متأذية ودينا بس تبجي حتى ورة الفطور نروحلهم بسرعة ونرجع

رحت كعدت يمه ان شاءالله بس خلي عمر يجيب حسوني تأخروا هوايه مو ع الاساس ب ٣ يرجعه عبرت ال٣ وصارت بالاربعة وعشرة هسه

اخذ تليفونه وكال هسه اخابره ..
طلع رقمه خابره وخلاه على اذنه شويه وباوعلي كال مغلق

خليت اديه على راسي يبوو ليش مغلق احمد ممرتاحة

كال يمعودة على كيفج انطي صبر شبيج يمكن خلصان شحنه يمكن تأخروا بالازدحام تدرين جاي عيد وناس تطلع تتسوك

اي بس مو هسه تطلع الناس العصر مو هسه ظهر ووكت واحد يسوي فطور عفية احمد كوله خلي يرجعه

صبري انين صبري شوويه خل نفتهم انتظري شويه ...

بقيت الوووب الووب متوقعتها منه لليل وهو ماكو والكل تحرك يدور عليه احمد واحسان وشرار ومهيب ولهيب كلهم استنفروا راحوا على اقاربه الي ابغداد بيت بيت يسألون عنه ...

و خابرنه على اهله اخوته محد يعرف عنه شي وبقى تليفونه مغلق

اجوي خواتي يمي فرح بس تبجي وموج تصبر عليه ودينا تخابر وتبجي وزمن كل شوي رسالة ترسلي
الكل وكف وياي بس اني رووحي لايبه

خاف جوعان خاف نعساااان خاف وخااف ...

هاا خاف بجى عليه وضربه ميتحمله خاف شمره بنهر شي مثل الام الي شمرت اطفالها هالهواجس هاي تقتلني من الداخل

ليش هيج يسوي بيه هو مو تزوج واني جنت على ذمته وجنت دارجع له ليش ديسوي هيج بيه !!! شهالحقد ياربي ميصير اعيش حياتي مثل هو عايش حياته ! ماريد ارجعله هيه كوة.... طكت روحي

اني من سحور البارحة ولا اكدر اخلي لكمة بحلكي حتى وكعت من الهوووف كووة موج شربتني مي قطرت بحلكي وكعدت

خابر احسان يصبر بيه جان معصب حيل
كال اشكه شك بس خل احضى بي انت لتضوجين نفسج
كتله خاف يأذي
كال لا ابوه مايأذي لتخافين وعنده اطفال ميكدر يدمر مستقبله ومستقبلهم

يعني ماصارت ؟ مو اكو اب حرك اطفاله مو اكو ام شمرت جهالها من فوك الجسر!!! مو اكو بلاوي احسان حموت والله اريد ابني اررريده فدوة اريد حسن

كال يطمني اجيبه الج والله اجيبلج حسن واخليج تجيبين عشرة اخوان اله

كتله واني انشغ وابجي كلش فرحت من ولدته وفرحت لان انطيته اسم حروفه مشتقة من حروف اسمك

كافي لاتبجين يانبض روحي والله صوتج وانت تبجين يكطع كلبي والله

شسوي خايفة ما أكدر خاف يأذي عفية خلي يرجعه الي ...

كال الصبح نطلع لكركوك ندور عليه بس اهدي نحفر الكاع ونطلعه وين يروح

سديت المكالمة منه بعد ماكومة وعدني انو يرجعه اليه

اني الليلة المفروض افرح باجر اراح اصير لحبيبي بعد صبر سنين يعني اني المفروض الليلة انام وبيه فرحة عروس .. حتى هالفرحة انسلبت مني

خطية احسان هماتين هو عازم عمامه وخواله للمشية باجر بس كل شي تفشكل ....

من الصبح يوم ثاني طلعوا لكركوك احمد واحسان وشرار ... مهيب ولهيب بقوا ابغداد يدورون ...

واني حالتي ماتسر لا صديق ولا عدو ، اخواتي ماتركوني زمن يمي ودينا خطية تركت امها وجتي يمي

ماكو فص ملح وذاب عمر اخواتي يصبرن ميسويله شي صدكي ميسوي هو ابوه ميدمر مستقبله وهو عنده اثنين اطفال بالجديد صار عنده طفل ثاني من مرته ميدمر مستقبلهم ويسوي شي لابنه ضناه وهو يحبه
اني هالكلام ميطمني اريد اشوف ابني كبالي ..

قبل العيد بيوم وبعد مامرت ايام اني حالتي يرثى لها وجهي شحب وطاح حظ حظي وتكنسلت المشية وكل شي واحمد والولد خطية صايمين ورجل ابغداد ورجل بكركوك تبهذلنا حييل

اندكت الباب اني اذا اسمع صوت الباب تندك لو التليفون شيصير بيه اكول خاف جابولي خبره خاف سواله شي خاف موته ماكدر اطلع هذا التفكير من راسي ...

راحت موج تفتح الباب واسمعها تصييح ركضت اني وركضت فرح واشوفه حسن عند موج حاضنته وتصيح على عمر

اني شفته عدل بعد رجليه ماتعيني هيه فرحة وهيه وكعة وكعت بنص الصالة وهو اجاني يركض حضنتتته حييل واشمشم بي وابووسه

محد جان موجود من الولد بالبيت بس احنه
موج كلتله سوايتك هاي العاقل ميسويها احنه وثقنه بيك شلون تخطف الطفل من امه

كمت وكفت وشلت حسن ويايه هو يباوع عليه باستهزاء ويضحك كال هاي جرة اذن الج ام حسن ان شاءالله فهمتي ووصلت الرسالة

كتله حسبي الله ونعم الوكيل عليك تحلم تشوفه بعد ليش هيج تبعده عني ليش

موج كلتله حقنا ناخذه منك بالمحاكم واحنه لا عبالك نسكت الك

هو كال عادي السجن للرجال ويضحك
وباوعلي كال والله ماتتهمنين اني ماخليج تتهنيين ومدام نفسي بيج ماراح تشوفين يوم حلووو

موج سدت الباب بوجهه وقفلته وراحت خابرت على الولد واني مدااشبع من ابني ابووسه واشمشم بيه واحضنه

اجتي موج وفرح ظلن يسألن بي سوالك شي ضربك اذاك ظلن يفحصن جسمه هو كال لا ماضربني ...

وين وداك حبيبي وين رحتوا ظل يوصف النه بيت وبي مزرعة وصوت حيوانات وكال بالليل اخاف من صوت الجلب بس ينبح ..

اخذته سبحته رغم هو نظيف جان ولابس ملابس جديدة ووعنده اللعاب سألته جوعان كال لا اكلت وشربت حليب ..

رجعوا الولد كالوا نقيم عليه دعوة اختطاف بس احمد كال لا هو فترة ويستوعب الوضع هسه لان مغثوث ومدام ممسويله شي ولا مأذي يولي

بس احسان يشيل روحه ويركعها يريد يلزمه ويكطعه كتله هو كاتلته الغيرة ومعنده غير الطفل وهيج يسوي

كال ولج كلامه هذا بي تهديد ...
احمد كاله لا ميسوي شي اني اعرفه هو بس كلام ...

وسوايته هاي شنو ياخذ الطفل خمسة ايام ميرجعه

بقى احسان مصر نقيم عليه دعوة اختطاف وهم اصلا قدموا شكوى بالمركز من اختفى ...

عرس احمد تأجل وثاني يوم العيد جانت المشية مالتي اني تعبانه بس احسان جان معاند اله نسويها بأسرع وقت وهيه مشية زلم ونسوان سوة وحفلة ..

عجبتني بدلة ذهبي دزيتها لزمن تعجبت عليها
كتلها راح ادزها اله يشوفها
كالت ولج هسه يطيح حظ ذوقج عوفي لتكوليله اخذيها وفاجئي بيها بيوم الحفلة

واني مااخذت بكلامها رحت دزيتها اله
وصدك كال لا محلوة وحتى كرهني بيها وراح يدور ودزلي صورة بدلة زيتونية تجننن حبيتها حيييل وحتى التاج وياهه زيتوني ....

بالصالون سويت تسريحة وبالمكياج برزت عيوني وكبرتهن اكثر طلعت كلش حلوووه رغم تعبانة حيل بعد الي صار بيه بسبب عمر برمضان ضعفت حييل ووجهي شصار بيه ....

بالشقة مالتنه صارت المشية بس اهلي واهله خالته ومرة خاله وجناينهم اثنين وعقدنا ...اجه كعد يمي يلبسني الذهب شاورني مو كتلج اخذج شووفي اخذتج
ضحكت من كل كلبي ....

سوينه جلسة تصوير جانت اللقطات جريئة واني ممصدكة هلكد قريبة منه كلما تكولي المصورة قربي منه وخلي عيونج بعيونه اظل اضحك ماسيطر على روحي

وكل شوي تعيدها واني اضحك اخر شي شاورني كال والله هسه ابوسج كدامهم وعلى حلكج
كتله بصوت ناصي عزااا وضحكت خليت راسي على صدره لا ارادي ....

ترخصت من احمد وتواعدنا ثالث يوم العيد نتغدا سوا ابيته كال اريد اكل من طبخج
كتله شنو عاجبك تاكل ؟
كال كيفج بشنو انت شاطر ...
كتله اسوي مندي بالفرن ... بس لازم تنكع الدجاجة بملح وخل ابيض من الليل
عاد هو راح تسوك ونكعها وعلى الوعد يوم ثاني اني اشوويها ...

اجه عليه الصبح وطلعنا اني وياه اخذني لبيت خواله عيدت جده الشيخ جان فرحان بيه واني فرحتي بي متنوصف ....

بعدها رحنه للبيت الجبير بيت العائلة ....عيدنا اخوانه وهناك جانت فرح ...
كالوا ابقوا يمنا تغدو ..
هو كال لالا منكعين الدجاجة من البارحة
مهيب كاله هاا صاير تنكع دجاج افااا هذا العرس هيج يسوي بيك
وباوعلي كال والله خوويه طلعتي موو هينه

ضحكت ودنكت ...
شرار كاله كلنا عرسنا بس ما نكعنا دجاج
عفيه عليج خيتي سووكي عليه مااوصي

كال يله امشي انين تره اذا بقينا يمهم باجر احنه اباب المحكمة ننتظر دورنا نتطلك

كاله لهيب شلك بيها هاي اصلا انتوا بعدكم ماعاقدين وبعدين انتوا القاضي يطردكم من الباب يكلكم شنو هالسبب التافه هذا اكو واحد يطلك علمود منكع دجاجة

جاوبهم هو اني صوجي اكول اسراري البيتيه والعائلية هسه يجلبون بيها دمشي

مشيت وراه واني اضحك اسمع صوت فرح تطك بكعبها وشايلة طرف القفطان مالتها وتسحل بدانيال وتصيح علينا واحنه توه طالعين من البيت ودنعبر الكراج

كاللها ها شتردين انت بعد ؟
جاوبته اخذوا دانيال وياكم يونس حسوني خطية يظل وحده

باوعلي وهمسلي هاي اختج حرامات ماكتلتها من جنت اني مجرم جنت ناوي بس مدري شنو لزمني عنها

كتله اسم الله عليها
اجت يمي تعض بشفايفها وشاورتني هاج اخذي دانيال وياج للامان متخافين تروحين ويا لبيته
ضحكت كتلها لا حسوني هم وياي
كالت ميخالف عاد دانيال جبير اكبر من حسوني ..

كال ديالله بابا يالله .. وصعدنا بسيارته ..
رحنا لبيته ... جنت متوترة وخايفة منه كلشي يصير الشيطان شاطر

من دربي للمطبخ واسأله عن الدجاجة هو حس بيه متوترة حتى عيوني ماخليها بعيونه واحوس

كال ع الاقل بدلي ملابسج
كتله لا مرتاحة ...
سويت الدجاجة وخليتها بالفرن ..
الجهال بالصالة واني ويا بالمطبخ البارد

تقرب مني واني اباوع بعيونه مبتسمة واحس خدودي حينفجرن من الخجل ... لزمني من اديه كال اريد اخلي راسي بحضنج ...

هزيت راسي كعدت بالكاع تربعت وهو خله راسه بحضني واحسه مثل الطفل وبهاي اللحظة حسيت نفسي احبه حب الام لضناهه ...

مدنكة راسي عليه وجهي بوجهه عيوني بعيونه خصلة من شعري بيده ويشم بيهه ويتلمسها

رفع راسه شويه وهو بحضني ركز بنظراته
وكال احس بس حبج جاس كلبي ولا جنه حبيت كبلج
ابتسمت ... وحبيت الاحساس الي اجتاحني بعد هالكلمات

كال : شنو تتمنين
امممم اتمنى اغمض عين افتح عين والكي نفسي مخلصة كلية

كال تردين تعرفين شنو اتمنى ؟
هزيت راسي بأي

التمعت عيونه بنظرات جريئة وويااهه رافع حاجبه
اتمناج هسه بحضني ...

_ هو هسه انته بحضني واني بحضنك
كال لا لا بعد اقرب من هيج وغمزلي

فتحت عيوني منفعلة كتله كووم وديني لبيتنا وظليت اضرب على صدره بقبضة ايدي

ظل يضحك بصوت عالي من كل كلبه واني اضربه لزم اديه قيدهم
وكال ولج انت عقلج منحرف وراح يخرب اخلاقي اني شنو ذنبي تره قصدت هيييج
سحبني على صدره وحضني حيييللل

لا اراديا سكنت بصدره واني بقرب گلبه حسيت ماكو شي بعد بالكون بس اني وهو

بس ارجف ممسيطرة على نفسي وخرني شوي من حضنه ويباوعلي بجرأة كال شبيج ترجفين تره ماسويلج شي والله

خجلت من كلامه كتله اروح اشووف الجهال ... رجعني على حضنه راسي على صدره وحاضني
كال عوفيهم ماعليهم شي لاتشردين ...تره كل شي بوقته حلوة لا عبالج استغلج او اتقرب منج غصب لتخلين هاي الفكرة ابالج

ابتسمت وبعدت شعري
عض شفته وغمزلي وكال واذا كلش كلش اقرب موعد العرس ....

اني ادري بي الي براسه يسوي كتله بس كون عطلة مو دوام فدوة ...
كال ميخالف ...

اخذتنا السوالف كال احبج
كتله شنو تحب بيه
كال احب جمالج ذكائج هدوئج ... صوتج كلشي اعشقه بيج

اني احبك اكثر ...
كال لا اني اكثر
رديت اني احب سلبياتك احب عنادك لواتك سيطرتك وهذا الشي يخلي حبي يتغلب على حبك ...

كال مشفت منج شي سلبي لحد الان كلج على بعضج حلوة

واذا شفت شي مني سلبي متأكدة راح تضوج مني وتجبرني اغيره مو ؟

عض شفته عود لذاك اليوم الله كريم ..

كال تره حيل جعنا دكومي شوفي المندي مالتج مااستوة من البارحة واني انكع الدجاجة عجبتني اجيت اكلها وهيه نيه ...

ضحكت وكمت فتحت الفرن اشوفه بارد عزاااا ناسيه اشغله سمعت صوته وراي هاا ماستوت بطني ظلت تصوصي
التفتت عليه هاا لا اي لا .. شسووي هسه ياربي

كال شنو

دنكت ناسية اشغل الفرن
كال شنوووو ؟

سمعنه صوت الباب اندكت ... صاح منه يمه
دانيياااال شوف منو بالباب طل بالكاميرات بالاول

دانيال كال عموو هاي ماما اجتي

باوعلي بصدمة واني هم واباوع للساعة ب ١٢ شجابها فرح شنو مطرودة !!!

رحنه اني وياه طلينه بالكاميرات شفنه دانيال فتح الها الباب ودخلت هيه شايلة غيث على ايدها وروان تمشي على يمينها وفطومه على يسارها وفاتت للبيت ..

اجت كالت هلو شلونكم وخلت غيث بالكاع ظل يمشي
وهيه نزعت عبايتها ...

كاللها هسه مصار كم ساعة من شفناج وسلمنه عليج
طخيته اني اريده يسكت ....

كالها منو جابج ردت حاجيت شرار ماقصر والله

كال اشتغلت الخباثة اني اعلمك شرير اعرفك خبيث

كالت والله ضوجة بالبيت الجبير وعلي كوومة ناس يمه لهسه دتعايده كلش ضجت وجيت يمكم اتونس اووي انووب شون حارة

اي شخبار الدجاجة عاد والله فد اشتهيتها من حجيتو بيها بس لا اتووحم لا اسم الله اي شوونكم بعد شخباركم ...

كاللها حسان الدجاجة تتنتظرج كومي طبخيها واحنه رايحين

كامت وكفت وكالت بصدمة وين رايحين ؟
رد عليها اشوفها الطابق الثاني ماشافته التهت تطبخ الدجاجة والي يصعد ورانه اشمره من فوك السطح
اخذني وصعدنا فوك كعدنا بالصالة الفوك وكعدنا نسوولف ...

فرح : حبيبي هداوي اخذت ٩٥ بالرياضيات

اي بوويه ماشاءالله عليج عاشت ايدج

هههه شبيك حبيبي ويايه انت ؟ مو اني الاخذت هداوي مرة لهيب

خله نظاراته بجيبه وسد الكتاب الي بيده

وباوعلي كال اي والله كالي لهيب وتذكرت انت قريتيها والله افتخر بيج كدام عائلتي معدلة مريتي

ابتسمت فدوة حبيبي رحتلك فدوة انت وعائلتك والله كلش احبك من تمدح بيه

رد وانه احب كل شي بيج

... خجلتني والله ابو مهيب

جاوب : يلوكلها الخجل ام جاسم

رديت : اووو خربت ام االرومانسية مو دنترومنسسسسس ...

رفع حواجبه وضحك كال قصرنا هالسنة مدام الدراسة الكتروني مارجعتج للكلية

كتله اي والله ولو مالحك من وره الجهال بس بنفسي اكمل دراستي ..

كال تكملين ان شاءالله على السنة التجي ..

جاوبته ان شاءالله .....

......

اسفة اذا سريعة الاحداث 😁😁بس خفت يخلص الاشتراك وماانشر لذلك تسرعت ...

نهاية الجزء الى اللقاء 😘😘😘😘بووسااتي احبكم
ان شاءالله استمتعتوا بهاي الاحداث التقيكم بأحداث جديدة اذا صارت انزلها 🤡

نورا ناصر ...