رواية حيادر الراء . الفصل الثامن والعشرون 28 - بقلم ريتاجة .

روايتي حيادر الراء .

اريد تصويتاتكمَ الحلوه وتعليقات بين  الفقرات لان نقراهن كُلهن .

....

ما جاوبتني قدمت أيدها وكالت :- وياك الدكتورة ريم مرحلة ثانية

- تشـرفت عندي مُحاضـرة مستعجـل
- الي الـشرف دكتـورنة

عفتها وراي ودخلت القاعة رحت لآسر لكيتة يسولف وي مجموعة من الولد كعدت يمه وكال :- أعرفكم هذه ضلعي

تعـرفنة عليهم وكعـدنة شويه وبدت المحـاضرة خلصنها وطلعنـة بره القاعة اجه رجـال بأتجاه آسر كعد يمه وكال :- آسر أنتَ عراقي ؟

آسر :- لا يسطا انا مصري

الرجال :- قبل شـوي شفتك داتحجي عـراقي وي الجمـاعة

آسر :- ايوا انا النهاردة بفهمش عراقي

حيدر :- شو أسكُت خبـطت اللهجـات كُلها

ضحكنة وكال آسر :- أي حبيبي أني عراقي من بلاد الرافدين

الرجال :- على راسي

قدم ايـدة وكال الرجال :- أني هم عـراقي من بغداد

آسر :- تشرفت حبيبي أني من كاع الله مره من الكوت مره من بغداد بكيفك ، صدُك شو ما كتلي شنو اسمك ؟

الرجال :- سعيد

آسر :- تشرفت بيك حبيبي وأني حزين اقصد آسر

لازم يجفـص ما يرتاح بـاوعت عليه وكتله :- آسر ضـلعي أمشي راح تبدي المحاضـرة

آسر :- يله يله بعدچبدي

كـمنة ومشينة وكتله :- بشرفـك لاتخزينـة

- شنو كايل يا عزيزي جاي اللطف الجو ما تشوف الجامعة متكهربة

- بعديـن لطفة خلي نتعـود هسه على الـوضع والله كريم

- صار حبيبي ، أوامر ثانية ؟

- لا هاهيـة أمشي

خلص الدوام ورجعنة للشقة

....

بدلت ملابـسي وكملـت ونزلت الهم وكـلت :- يله يُمه كملـت أني

- يله يعُيوني نطلع

طلعت بره وشفت حُسين مشغل أغاني بالسيارة ومندمج دكيت على جامة السيارة فتح الجامة وكال :- دخليني مندمج لازم تخربين اللحظة

- يله يا عـيني راح نتـأخر
- يله صعـدو بعد عيني

صحت الأمي وصعدنة وطلعنة وحُسين خلص الطريق أغاني رومانسية أدري بي يحُب هاي صديقتة الي من المسيح بس احنه مُسلمين شلون راح ياخذها حُسين ما أعرف يارب لاتكسر كلبة

وصلـنة للبيت ونزلنـة وحُسين رجع أول ما دخـلت لاكتني حواء حضنتني وهمسـت بأذاني :- الله يا ريحة الكفو

أبتسمت الها ودخلنه سلمت على أسماء وعمتي ضلينة كاعدين شويه وكالت حواء :- رتوج تعالي نصعد فوك

- جيتـج

كمنة ورحنة صعدنة فوك أول ما صعدت كتلها :- البيت أظلم بدونة

- أي عيـني غير حبـيب الروح هذه
- الروح وصاحبـتها

- يُمه الحُب يُمه
- عوفي الحُب انطـيني رسالة العزيـز

فتحت الكنتور طلعت ظرف صغير وانطتة الي وكالت :- راح أنزل جوه أسوي چاي خلصي ونزلي

- صـار

نزلت وفتحت الظرف أول ما قريت كاتب :- " ريتاجي قُره عيني شغلي أغُنية مجنوني وكملي قراءة "

طلعـت تلفوني من الجنطـة والهيدفون خـليتة بأذاني وبديـت اقرة :- ريـتاجي حبيبة روحي صحيـح هسه أني بعـيد عنچ ما أحـس بيچ ما أشـوفج من تضوجين من تفرحيـن من تبجين بكُل الحـالات بس صدكـيني وثقي بالله گلبي وياج ودافكر بيچ كُل لحـظة وكُل ثانية ما ناسيـج ولا راح أنساج يا شُغاف گلبي أنتِ بويه

صـحيح راح تمر الأيام والشهور والسنيـن بس حُبي الچ راح يُبـقى مثل ما هوَ مُمكن يزيد ومُمكن اشتياقي الچ هذه هسـه راح يخلي يكبر بگلبي أبدًا ما ينقص ولا راح ينـقص ولا تفكرين أبدًا ولا تشـكين ولو للحظة أنُ ينـقص

دمعت وانقهرت ردت أسد الرسالة بس لا بقيت اقره وكملتها :- لا يا بويه مو معناه بعيد عنچ راح يقُل بالعكس البعد بين الطرفين ٩٠٪؜‎ راح يزيد الحُب واللهفة بين العشاق وبالأخير اكُلج أحبچ أني وادعيلي ان شاء الله تخلص هاي الخمس سنوات وأجي اتقدملچ على سنة الله ورسولة

صحيح ما راح اجيج كُل شهر بس راح احاول اجيج كُل فترة ديري بالج على روحح لأن روحج هاي تخُصني أني أبدًا لاتضوجين ولا تبجين لأن ما أريد ابجي عُيونج العسلية بغيابي أني وياج بكُل لحظة بكُل خطوة ودا اذكرج بدعائي وبصلاتي أحبچ

كملتها مسـحت دموعي وطفيـت الهيدفون رحت للرسـائل دزيتلة :- أحبك اني بكُل زمـان ومُكان

...

مرت شهرين بين الحياة الجامعية والغُربة دانحاول نتعود على هذه الوضع إجباريًا مفتقد حبيبتي فُستق مُكانها فارغ يمي أريد اشارك وياها گُلشي بس ما أريد وداحاول قدر المُسطاع اخابر الها بين فترة وفترة أطمئن عليه

كعـدت الصبُح صليت ودعـيت الها تكون بخيـر وين ما كانت كملت دعاء قريـت قرآن ونمت كعـدت الصبُح آسر بعـده ما كاعد طفـرت للمطبخ خليت أربع بيضـات على النار ورحت لغُرفة آسر

دكيت الباب ما كعد دخلت للغُرفة وصحت اله :- آسسسسر كووم يمعود

- بس شويه
- كوم ما ضل وكت

- كايم انعل أبو الجامعة وانعل أبو الطب وانعل أبو الي يدخُل طب

- مـنو هذه الي بس يريـد يدخُل جامـعة ؟
- أبوي النـذل

- دكوم لعد عوف أبوك
- كايم وداعتك

كمنـة تريكنة ونظـفنة وطلعنة وقفـلنها :- بشرفك مو يحـق النه رجال يدارينـة ؟

- أنتَ كُل ما غسلت الك ماعون كول نريد رجل
- ولله لعبت روحي أريد اتخرج

- يمـعود كول يا الله توها مـرت شهرين بس
- يا يُمممممه بعد أربع سـنين وشويه

- أي
- راح أكُل تبن تريد وياي ؟

- لا شكرًا أمشي

دخلنة الجامعة أول ما دخلنة اجه صادق صديقنة المصري :- ازيكو يجماعه عاملين أيه ؟

آسر :- ماكلين تبن حـبيبي

صادق :- لا لا تبن يعني أيه تبن يعني خر* بالعراقي ؟

آسر :- لا حبيبي الخر* يخـتلف

صادق :- كيف بيكون التبن ؟

آسر :- علف الحيـوانات

صادق :- هوَ داه ؟

آسر :- ايوا

صادق :- جهزتوا البحث بتاع اليوم ؟

حيدر :- جـهزناه حبيبي

صادق :- أنتَ كويس اما عن آسر مش عاجبني برضوا

آسر :- أني ما اجهـز شي حبيبي أني گُلشي اخـذه من ضلعي

صادق :- ايوووا هوَ داه بيستند عليه دكتور حيدر

آسر :- لاتزحف محجـوز يله امشو راح تـبدي المحاضرة

رحنة ودخلنة أول محاضرة خلصت عفت الجماعة وطلعت بره قريت للامتحان ضليت نص ساعة وشفت آسر جاي بأتجاهي أجه كعد يمي وكال :- شتاقيتلك

- أبنـك أبوك أني ؟
- أحبك حتى لو قـاسي

دانسولف وأجت بنيه سلمت على آسر وكال الها :- هلا ريم

ريم :- هلا دكـتور آسر شنو الاخـبار ؟

آسر :- الحمدُلله و أنتِ !

ريم :- أني تمام داسئـل عليكـم

هاي ريم شنو جابها ليش ورانة دافكر وقاطعت تفكيري وكالت :- هلا دكتور حيدر شنو الاخبار ان شاء الله تمام ؟

حيدر :- عفوًا تعـرفيني ؟

ريم :- لا بس آسر سولفلي عليك أكو مُشكلة ؟

حيدر :- لا مفيـش كوم آسر راح يبـدي الامتحان

كمنة سوه وضـلت هيَ بمُكانها وكال اسر :- مفيـش !!

- ليش تعرفني عليها ؟

- ليش ويـن المُشكلة زميلـة حالها حال الـزملاء ؟

- أكو مُشكل ماريد زملاء من الجنس الثاني .

حسيتة ضـاج بس رجع وكال :- هاهيـة اعتذر

- لاتعتذر آسر

- لا اعتذر هاهيـة أني سويت غلط ما أعـرف بي اعذرنـي أخوي

دخلنة القاعة بدأ الامتحان خلصنة وطلعنة خلص الدوام وطلعنة تغدينة بره ورجعنة للشقة أول ما رجعنه كال آسر :- راح أنام شويه وكعدني اقره لباجر

- شبيـك ؟
- مابيه لا تهتم مـثل ما اتفقنة كعدني
- ميـخالف

راح نام بغُرفتة كعدت بالصالة دكيت على فُستق جاوبتني وكالت :- مُشتاقة مُشتاقة مُشتاقة

- على كيفج أبويـه وحدة وحدة
- شوكت تجـي ؟
- بالثـاني

- بعد شهرين لشهر للثاني ؟

- ميخـالف يا روحي نصـبر
- مشـتاقتلك والعـراق هم مشتاقلك
- وأني هم مشتاقلكـم أكثر

سكتت شويه وكالت :- راح أروح حُسين يصيحني

- ماشي هُيامي إذا صار الـي مجال اتصل عليج
- ماشي يله مع السـلامة
- بـحفظ الله

....

سديتة منه ورحت لحُسين وكالي :- ريتاجه تعالي اكويلي ذن الملابس

- صار بس ليـش ؟
- أريد اطلـع لكربلاء

- واحنه حسين ؟
- اخذكم ان شاء الله بس يصير الي بعقلي

- شـنو بعقلك ؟
- من أرجـع اكُلج

- تمام

رحت كويت اله الملابس كملتهم وكتله :- شوكـت تطلع ؟

- وره صلاة الفجر
- جيب الي وياك حلاوة
- صار

اجه الليل اتعشينـة وكملنة وحُسين راح نام وكلت الأمي :- شعجب حُسين راح يـروح وحدة ؟

- ضايج وعنده شغله بباله مادري شنو
- شنو هيَ ؟

- داكُلج مادري شنو
- مـاشي

عزلت المطبخ وكملت وصعدت لغُرفتي أول ما صعدت خذت تلفوني اتصلت على حيادو جاوب وكال :- العافية واهلها مشتاقلج بويه وهواي

- أني بعد أكثر منك
- الله يخليج الي

ضلينة نسولف هواي سولفلي على الجامعة مالتة وايامهم وهيح خلصنة الاتصال سديتة سمعت آذان الفجر رحت صليت ونمت كعدت الصبُح حُسين ماكو رايح يزور وأبوي بالشغل وأني وأمي بالبيت خلص هذه اليوم عادي ما بي اي شي

لمن أجه حُسين السـاعة بالتسعة باليل اجه ودخـل من باب المطبخ خله علاليـك على الكاونتـر وكالت أمي :- زيارة مقبولة

حُسين :- تقبل اعمالج

ريتاج : زيارة مقبولة

حُسين :- تقبل اعمالج عين الشمس

أنتبهت على عيونـة حمر أستغربت وواضـح التعب عليه بس أمـي لو انتبهت لو لا بس لو منتبـة جان حجت غلسـت على السالفة ومـرت الايام الى ان بيوم المُغرب صـاح الي حُسين :- ريتاجه

- جايه

رحت وكفت بباب المطبخ وكال :- تعالي كعدي يمي

رحت كعدت يمه وسكت وكتله :- حُسين اكو شي ؟

- عندي حجي وياج
- اي احجي

- لا كومي بـدلي خلي نطلع نجـيب عشه مـن بره

- أكو شي ؟
- لا ماكو كومي سريع

كمـت على السريـع بدلت ونزلت شـافتني أمي وكالت :- جيبو كباب

رد حُسين قبل لا ارد أني :- ميخالف أمي يله ، ريتاجه تعالي صعدي

- جيـت

رحنة صعدت السيارة وطلعنة الطريق كُله هدوء تام وكفنة كبال مطعم وكال :- ابقي هُنا راح انزل اجيب عشه واجيج

حركت راسي بمـعنى اي وراح نزل ورجـع وره ربع ساعة صعد وصعد الأكُل وسكت وره شـويه كال :- شوفي ريـتاجه اريدج تحجي وي راسيل

- اي بشـنو ؟

- اليوم فتحت الموضوع وياها بالجامعة

- يا موضـوع ؟

- نترك بعض .

- لييييش ؟

- مانكدر نصير سوه أساسًا هيَ مسيحية وأني مسلم مانرهم

- منو كـلك ؟

سحب تنهيدة طويلة عبرت عن حسرتك وكال :- تتذكرين مر رحت لكربلاء زيارة ؟

- اي اتـذكر ليش ؟

- بوكتها رحت مخصص اسئل الي هُناك بالائمة السادة الي بالعتبات

- شنو تسئلـهم ؟

- الزواج بين مسلم ومسيحية

- وشنو كـالولك ؟

- كُلهم نفس الجواب كُلهم

حزنت لوضـعة وكتله :- شنو بأيـدي كُلي وانفذة الك

- ما رايد شي بس تخابرين الها وتكولي الها

- دقيقة دقيقة ليـش مو أنتَ تخابر ؟

- بيا وجه اكُلها ما نرهم لبعض وأني جنت اوعدها مواعيد زلم أنُ زاخذها ريتاجه مدا تدخل بعقلي

ضجت وأني داشـوف أخوي منهار ومابـأيده شي كتله :- شوف أخويه الافضل أنتَ تتـصل عليها وتنهـون علاقتكم من هاي اللحظة

- والعشك شلون ينتهي إذا مُمكن ننهي العلاقة بهاي البساطة بس راح يبقه حُبنه اجذب عليج إذا اكلچ بمرور الوقت ينسي ويصير سوالف لا راح ابقى احبها اني هذه أول حُب حياتي شلون ينسي ؟

يحـجي سريع أريد اسكتة علمـود انصحة بس راح ياخـذ نظرة عليه ويكول شنو معرفـها بسـوالف الحُب فَ سكتت ورجعـت كُتله :- أتصل عليها وافتح مُكبر الصوت

- هيج تكولين ؟
- أي
- لحظة

اتصل أول اتصـال ما جاوبت ثـاني اتصال جاوبـت وكالت :- الووو حياتي

حُسين : وياج

راسيل :- شـلونك يا عُمري ؟

حُسين :- بخير ، عندي موضوع وياج

راسيل :- اي تفضل عُيوني أنتَ

فتحت باب السياره ونزلت ما أريد اسمع شي يوترني لو يقهرني كعدت كبال السيارة اباوع على حُسين يحجي بهدوء بس أعرفه دايكتم الي بگلبة مُستحيل هذه هدوءة وهوَ بهيج موقف

مرت أقل السـاعة وسد الاتصـال ونزل اجه كعد يمي وكال :- ليش نزلتي ؟

- حُسين علمود راسي

- حـقج

- شنو رده فعلها أكيد انهارت ؟

- أكيد

- ميخالف حُسين أنتَ اقوه من هذه وان شاء الله الله يعوض

- والنعم بالله كومي نصـعد ونرجع

كمنة صعدنة السيارة ورجعنة للبيت أول ما رجعنة صعدت فوك خذت تلفوني لكيت رسالتين من حيادر خذته وقريتهن جان كاتب :- " ريتاجه داتشربين علاجج وشلون صرتي داتحسين أكو تحسن أني داسئل وأستفسر من الدكاترة الزينين هُنا وان شاء الله من ارجع اشوفلج علاج زين "

والثاني كاتب بي :- " مشتاق لعيونج "

دزيت اله :- أي الحمدُلله حيادر ، وهنَ هم مشتاقات لوجهك حيدري

ثواني ورجع دز :- يا بعد روحي الله ليعلم شگد مشتاقلج فساتق

- تره فسـاتق هم مشتاقتلك
- شوكت أرجع

- يله ما بقه شي
- ان شاء الله

سمعت أمي صاحـت الي وكتله :- حـيادر يله أمي داتصيحني للعشة

- روحي تعشي حبيبي وعوافي مقدمًا

سلـمت عليه ونزلت وهيج مرت الايام أسمع اخبـارة ويسمـع اخباري مر شهر كامل نفس الشي وماكو شـي جديد بي بعد شـهر واحد ويجي حيادر للعراق زياره فقط .

....

مرت الايام والاسابيع وبيوم جنت كاعد بالغُرفة وصحت لآسر :- تعال آسر

- شتريد
- دتعال
- أجيت أجيت

اجه ودخل كعد يمي وكال :- هسه أني شنو جابني للطب كتلك خلي اروح طب اسنان صخام انعل أبو الجينات شكد صعبة

- على اسـاس الطـب الاسنان سهل ؟

- ادري بي هم اكلان خر* شنو ردت مني ؟

ضحكت وكتله :- شبـيها الجينـات ؟

- يا أخي صعبة جاي احفظها منا انسها منا ما تدخل عقلي

- تدري أني فهمتها بسـهولة

- أنتَ مدري شنو بعقلك عقل آينشتاين الله شاهد آينشتاين شنو يقربلك ؟

- أبـن عمي

- عرفتتتتة مو بعيدة

- حبيبي ولله كوم سـوي فاصـوليا

- خاف احركها مثل التبسي لو تطلع مالحة تكص كص مثل مركة البتيتة

- اسـويها اني أحسن

- لا أنتَ كوم سوي الزلاطة عوف اني اسويها اطلع على النت

- خـوش يله دكوم خلي اصـلي واكوم اسوي الزلاطـة

- عفية

- يله كووم

كمت صليت وكملت رحت لآسر بالمطبخ وكتله :- ها شنو الوضع ؟

- الحمدُلله السيطـرة لحد الان تحت الوضع
- مبين عليك التعب من وره الجينـات

- شلون باجر راح اجاوب ما أعرف
- سهلة يمعود بس ركز شنو يراد الها الجينات

- عليك العبـاس نكمل عشة واشرحلي عليها
- لعد الدكتور لمـن شرح ما تكلي

- شلون دكتور الله يسلمك خشمة بكصتة هذه المصري الله وكيلك جاي اتعلم اللهجة المصرية مو الطب

كمل العشه وصـب النا وكال :- شلون فاصوليا طيييييبة

- الحمدُلله طلع من عندك شي بي خير
- كُلي خير اني

- واضـح مثل وضح الشمس
- لعد شعبـالك يا عيني

كملنة عشة ونظفنة الهوسة ورحنة نمنح كعدنة الصبُح تريكنة وقفلنة الشقة وطلعنة للجامعة أول ما دخلنة كعدنة كال آسر :- شو تعال ادعيلي خلي اجاوب

- وين داخل للمـوصل
- شو ادعـيلي أنت دعائك مُستجـاب

دانسولف اجو الزملاء سلمو وكال صادق :- ازيك يا آسر ؟

آسر :- أنتَ تعـرفني وكبل تجي تسئـل على وضعي

صادق :- بعرفك مش كويس

آسر :- لا كويـس كويـس ان شاء الله

صادق :- آمين

شوية ودخلنة قاعة الامتحان خلـصت بالبداية وطلعت أول ما طلعت بوجهي للـسنتر أول ما دخلت خذت مي ورجـعت كعدت مر وقت طويل وسمعت مناداة بأسمي التفـتت وشفتها ريم وكلت :- صبرك ربي

اجت بأتجاهي وكالت :- مُمكن اكعد هُنا ؟

حيدر :- تفضلي .

كعدت وسكتـت وره وقت كالت :- اليوم الفايـنل مالتكم الجينات ؟

- اي
- جاوبتو ؟

- الحمدُلله
- الحمدُلله زين الاسئلـة مابيها صعوبة

حركت راسي بمعنى اي وداجاوبها على كد السؤال وبس وترجع تسئل :- اي شي تحتاجو اني موجودة عندي سلايدات مرحلة اولى اشياء تخص المرحلة الاول گُلشي عندي

- شُكرًا
- عفواً دكتـور اترخص أني

حركت راسي بمعنى اي وراحت أجه آسر دخل السنتر وأجه باتجاهي وكال :- لك جاوووبت

- الحمدُلله

التفت وره ورجع باوع عليه وكال آسر :- جانت يمك الدكتورة ريم ؟

- أي
- شنو تريـد ؟

- تسئل إذا مجاوب بالجينات لو لا
- هممممم

- ها شكو ؟
- لا مـاكو شي واضـح شنو غايتها

- اعرفها متشوفني مبتعد عنها
- عفيه عليك

خلص الدوام ورجعنة للشقة وكال آسر :- نروح للبحر اليوم ؟

- ميخالف
- خوش لعد المُغرب نطلع

أجـه المُغرب سمعت الآذان رحت صـليت وكملت أجه آسر وكال :- يله راح ابـدل اني هم كمـلت صلاة

- ماشي

رحت بـدلت ملابس طلعـة وآسر كمل وقفلنة الشقة وطـلعنة وكال :- نتعشـة فد مرة مابيك اسويـلك عشة اليوم

- على اساس أنتَ ما شاء الله منال العالم

- غير سـويت فاصوليا تـجنن

- اي مو داكول ما شاء الله حتى منال العالم ما راح تلحكك

- شعبالك لعد يابه

رحنة للبحر تمشينة وكعدنة ضلينة وقت نوب رحنة لمطعم طلبنة أكُل كملنة
ضلينة كاعدين وآسر صافن طلعت تلفوني أريد اراسل فُستق أجه مصري
بأتجاه آسر وكال :- أنتَ بتبص على ايه يعم ؟

آسر :- أنـي ؟

الولد :- ايوا أنتَ على ايييه

آسر :- شـبيك ابـص على ايه

الولد :- بتبص على زوجتي أنتَ ؟

تدخلت وكتله :- توكل حبيبي

الولد :- انت ايه شو بتقربوا ؟

حيدر :- رفيقـو

الولد :- ضب رفيقك قاعدين شمال ورفيقك بيبص هُنا وهُناك

حيدر : خلي يبـص عاجبة ، أمشي آسر أمشي

الولد : عامل حالو ريس وهوَ هلس

باوع عليه آسر وكال :- هذه شنو جاي يحجي ؟

حيدر :- شمدرينة دمشي لخاطر ربك

آسر :- لا ومحمد هـسه اخبزة هُنا هلسك البيـن ان شاء الله

حيدر :- يمعووود لك مو بالعراق احنة علمود تخبز اي واحد بكيفك

آسر :- أمشي أمشي لا ابتـلي بي هُنا اطلع ضيم الـجينات بي

خلينة ورجعنة للشقة أول ما دخلنة طلعنة الكتب وبدينة نقرة شويه وكال آسر :- مرته جنها نعالي ويكلي تبص عليها

- أنتَ اله تصفـن عشوائي غير تنتـبة من تصفن يا ضـلعي

- شمدريني أني دولة طالعة عينها

- منو خبـصني حلوة وحـل

- هيَ حلوة بس ناسها لا ما يستاهلوها البعض طبعًا

- بالله صـحيح

تخطينة الوضع ورجعنه نقرة

....

نايمة وأسمع أمي تصـيح عليه :- كوووومي ريتاجه يُمه

- ها شتردين
- كومي دنيا غُروب ما يصلح
- خوش كايمة

قبل لا أنزل شفت اتصال من حواء خذت تلفوني وراسلتها وكلت :- ها حواء اكو شي

- لا يمعودة بس مشتاقتلج
- عُمري أني هم

- دالح على أمي علمـود نجيكم
- اي عفيـة لحي صار هواي ما جـايين إنتوا

- اي ادري بلكت تقبل
- ان شاء الله

سلمت عليها ونزلت كعدت بالمطبخ شويه واجاني مسج من حيادر كاتب :- " ريتاجه الشهر الي فات صار بي مناسبتين "

فكرت ما اجه على بالي شي وكتله : شنو وشنو ؟

- ما تتذكرين ؟
- لا

- يله من أرجع اكُلج
- داحسب يوم يوم

- صـدكيني أني هم
- يا روحـي

كتله هيج وسلمنة وراح مر اليوم عادي الى ان كملت عشة وغسلت الاماعين وكعدت بالصاله وتلفوني بأيدي اجاني مسج رفعته وقريت المكتوب

من رقم كاتب :- " أنتِ ريتاج اخُت حسين صح "

جاوبته وكلت :- منـو ؟

الرقم :- راسيل

أستغربت وكتلها :- آهلًا حبيبتي

راسيل :- شلون حُسين بخير ؟

ريتاج :- بـخير بس ليش ؟

سكتت وره وقت دزت رسالة طويلة كاتبة بيها :- سلميلي عليه وكُليله راسيل صح ضايجة منك بس ما راح تنساك عُمرها كُله أمانة بما أنُ عرسي باجر حبيت اودعة برسالة خفيفة ولطيفة مهما سوه وياي او كرهني او شاءت الاقدار وما صرنة لبعض بس باقي حُب قليل بگلبي اله وجداً مشتاقة لوجه اتمنى يكون بخير وين ما كان وتدعيلي انسعد وي رجلي اتمنى الج الخير ولعائلتكم مع السلامة

قريت المكتـوب ودمعت على كلامها مبينـة تحُبة من كُل كلـبها ولهسه ما ناسيتة بس شـلون راح اكول لحُسيـن مُستحيل يتقبل رجعت دكيـت على الرقم شويه وطلعلي " الرقم خارج نطاق التغطية "

ليش غلقت الرقم وشنو غايتها من دزت هاي الرسالة لا أستغفر الله شنو هاي الافكار الي بعقلي أستغفرت وكمت لغُرفة حُسين دخلت للغُرفة وما لكيتة رحت لتلفونة جاي مسجات هواي عليه أستغربت رحت قريت أول مسج جان مكتوب

- أحبك تعرف شنو حتى لو ماتحبني بالنهاية أنتَ الي وأني الك

....
يتبع ⬅️ - البارت الثامن والعشرين -

روايتي
قناتي مال التليكرام بالبايو مال الواتباد
نسولف بيها دائما بخصوص الروايه .

الانستا ⬇️.