هيلانه الاسر الفصل الثاني وأربعون 42 - بقلم زهور ال سلطان

مساء الخير 🩵 / رجعت نشرت البارت
علمود صورة تالين بالاخير ........

#هيلانه الاسر
بين لفحات أُوَرا و الزَّمْهَريرُ

زهور الـ سلطان
مهم" لا تنسون التصويت و المتابعة فيروزاتي

"صّوتكْ مُّهم للغايِه كَّدقْت أَّجراسٍ كنَّيسةً عتْيقةَّ
بقلمي 🪄

.

هـيـلانـه

گعدنه سويه و جابو الچاي أزاد وزعه
من كملو گال جدي

الشيخ داود _ چا خطيب بنت عمكم وين
أزاد _ مابقى اجة و طلع ظل بالديوان

الشيخ داود _ هيل
هـيلانه _ ها جدو

الشيخ داود _ روحي گلليله يجي مو غريب صار
هـيلانه _ ان شاء الله

گمت اروح گال
_ محد بديوان وگلي لويلاد اعمامچ ايمن و أدم خليجون

هزيت راسي و توجهت للديوان اشرتلي ميس من وين اروح لجهه باب الديوان الخلفي بعدني توني واصله صار صوت وراية

_ لحضه انتظري

نداريت بسرعه شفت ايمن جاي من جهه مكان
بي مثل الباب عالي حديد مشبك بي فتحات هواية
واكو شجر باين وراه و نخل عالي التلفون بأاذنه

يخابر اشرلي بأيده بمعنى انتظري محجيت شي
بقيت واگفه ماتأخر ونهى المكالمة ....

ايمن _ شسوين هنا

صافنه بوجهه اكثر متغيرر هواية ايمن بس محجيت
لان أصلا نقطعت علاقتي بي حالي حال مارين
هيلانه _ دزوني دااصيحك انت و قسور

_ روحي جايين
_ اوكي

مشيت گدامه دخلت من باب المطبخ اريج و مارين

هيلانه _ ها شكو هنا
مارين _ الأخت معجبتها الگعدة

هيلانه _ لعد أبقن اني رايحه
اريج _ دتعالي گعدي شوية سوالفهم كلها بسياسة
و الجيش معبالك كومه نساوين يمهم

مارين _ عليج الله لعد شرايدة يحجون عن المكياج
لو آخر اطلالة اليسا
اريج _ عاب حلگج الفاهيه

هيلانه _ من نباهتج نجوى كرم
اريج _ صدك شعجب بالعائلة بس اروى و فدوى
ليش ماكو نجوى

مارين _ تزوجي و خلفي و سميها
اريج _ دولي
عفتهن يكملن نقاشهن السخيف و تكترت ع جهه
فتحت نت بالشريحة شتاقيت احجي وي غيد

دخلت للماسنجر لگيتها مراسلتني من ساعات
رغم نشط دايطلعلي

هيلانه _ شوكت ناوية تسألين عليه
انتظرت شوية و جاوبت
غيد _ لمن يرد عليه اخوچ

_ هههههه عزههه بعينج بعدج تراسلينه
_ أصلا كل وقته وياي

_ ممحسسته بغربة الوطن
_ ههههههههه يي

_ مناوية ترجعين الزوجج
_ راح اطلگ بس يرجع من ..... لان طگت روحي منه

_ عاد عما تتطلگين عوفي اخوي مو عأساس
ميصير تحجون وي شخص مو محلل عليكم
_ يمعودة قابل هسه اني شحاجية وي بارق
هي كم كلمة ناوية اوگعة بحبي

_ يييي فكرة ذهبية هاية ههههههه بس مو يعوفج
و تزعلين مني تره معليه اني انتي لحيتي تريدين
صفحات اخواني
_ لا ما ادخلج شالقصة

_ هي مراسلج مراسلتيني واضح جداً مدخليني
لحضه يريدوني بعدين احجي وياج

هيلانه _ ها اريج هستوج حجيتي وياي لو مشتبهه
اريج _ وين بالج شگد لغيت

مارين _ تراسل بقسور عيني
هيلانه _ لا مو وياه ويصديقتي هسه مگلتي شردتي
اريج _ صدگتج ، گلت تروحين وياي للبستان هسه تالين
و ميس يجن هماتين ويانه

هيلانه _ اوكي
مارين _ اني ما اروح

اريج _ ليش عود
مارين _ مثل آخر مره تعوفني فلا اوصل

اريج _ لا منعوفچ بيبي چلبي بطرف فستاني نيات
مارين _ طاح حضج

اريج _ و المطي ععضج
مارين _ عزههه بعينج ايععع

اريج _ تره أدم يگولياهه صبح وليل عادي حبي
مارين _ دنجبي

اريج _ احترمي تره اني اكبر منج بشهرين
مارين _ من هيلانه تقدر فرق الدقيقة الي اني اكبر منها بيها اقدر الشهرين

هيلانه _ ما اقدرهن لتحلمين
مارين _ لعد نجبي اريج

دخلن البنات و رحنه سوية المكان كلش حلو بي نخل
هواية و شجر مريح للنفس بنهاية اكو نهر فرشنه يمة
كوارتين و اشياء هواية لگينها و گعدنه نسولف

اريج _ اگلجن بنات شعجب أزاد مجاب خطيبته
ميس _ اخوها مراضي هيج سمعت

تالين _ لا مو اخوها امها مقبلت و بحجة هي مريضة
و رسيل دايره بالها عليها
ميس _ شدعوه گمزتي يمعودة دافعين

غمزت اروى و گالت
مو تدرين اخذنه بنتهم لازم ياخذون بنتنه
ميس _ ههههههه مبروك

تالين _ اسكتن عابت
ميس _ احم باعو ع طاري اخذنه و نطينه اريد اگول شي

اروى _ ميسس
ميس _ احسن مما تعرف گدام نسوان اعمامج و كناتهم

هيلانه _ شكو قلقتني
ميس _ بنات اكمشن اريج خاف تسويلها مصيبة

كمشت مارين ايدها
اريج _ وچ عوفيني

ميس بدت تحجي وگفت گلبي
_ باعو من طلعتن بدو يطشون كلمن راح الغرفته
، قسم كمشو تلفوناته عاد جدي و عمو احسان
أزاد بسيل و بارق يعني شبابنه و بيبي و زوجة
عمي احسان و كناتها و احنه أكيد

يي صار .....

قبل ساعة

بارق عيونه بأاتجاه المطبخ و عين ع جدي
چنت مقابيله عيوني انتبهت الحركاته لحد
مطلع الي بگلبه اخير و نطق

بارق _ جدي مرخصتك

شيخ داود _ مرخوص بوية احجي

_ مدام رجعت بخير و شفائي ما يطول ان شاء الله

_ ان شاء الله وليدي

_ ما اگدر اشوفكم بمثل هالجمعه بسبب الاشغال و ناوي
بس اترك العكاز ارجع الدوامي فأاريد اخذ شورك وهم
اخذ كلمه من أدم و بسيل اني ناوي اخطبها الاريج

الحجية وضحه _ اللهم صلي على محمد و ال محمد
زين ما اختاريت ابني

الشيخ داود _ ما بيها كل عيبه ابن عمها و اوله من الغريب

بسيل _ عفواً منو تريد

رفع بارق حاجبة و رد بثقة
_ اريج

_ اريج مو طفلة و نقرر عنها أكيد اني ما عندي اعتراض
من بعد أدم و أمي بس الرأي الها

ابتسم بأاستهزاء و رد بسرعة
_ ما يفرق عندي رأيها ......

مارين _ الله اليستر

هيلانه _ و بعد الشصار

ميس _ اجة أدم و بعدها خطيبج فلتنه

هيلانه _ عزهه بعينه

حچت اريچ بحرگه گلب
_ ههه عبالة أقبل بي شو لو يصبوه ذهب
ادير عليه نفط و احرگه

اروى _ لا مو هنا الدگة خاف أدم يرجعها على بارق
و يخطبني اني لو مارين

مارين _ أكيد ميس _ اني صغيرة

ميس _ هجم بيت الصغر

هيلانه _ بس عجيب جان ضد افكار جدي و كلامة

اروى _ بوقتها نفسيته تعبانه انتو متعرفن اطباع
جدي و قساوته كلها عند بارق بس بنفس الوقت
هو حنين يتفاهم يعني اذا مصارت شغله عناد

اريج _ لو مو عناد غير اموته

ميس _ مدري شگول كل ما نلتم تصير مشاكل

اروى _ تنحل يمعودات بس هدن

لقبل العصر البنات لبسن عبي و اني هم اخذت من
اروى و ردنه نروح للگاع وي مرت عمو احسان
و البقية دخلت وحدة من الغرف افكر شلبس
بهالوقت دگ تلفوني رديت حتى بدون مشوف منو
وفتحت سبيكر

دريد _ الو
هيلانه _ نعم

_ بسرعة تعالي
_ وين

_ تندلين مكان الباب الثاني للديوان
_ يي اعرف مكانه بس شكو

_ ماكو شي تعالي

نهى الاتصال و اني رجعت ارتب بشالي المدري
شلون راح يثبت ع راسي هو و العباة و طلعت
وياهن

ميس _ دريد أتصل بيچ مو

باوعت بطرف عيني و نداريت
هيلانه _ تتسمعين عليه انتي

ميس _ لا شنو اتسمع بس هيج چنت
ماره و سمعت اصواتكم
هيلانه _ بيها الخير

ميس _ هيله دروحي شوفي اني الفضول كتلني
شلون بهاالبرود العندج
اروى _ وين تروح عوفيها رايحين نتونس

ميس _ شنتونس ممليتي من وجوههنه روحي الخطيبج
مارين _ هيج وجوهنه صارت متعجب جنابج

اروى _ ليش داز عليها
هيلانه _ لااا

ميس _ يي داز
اروى _ لعد عوفنها و مشنه

هيلانه _ لا اروى تچذب عليج

اروى _ فوتي هيلة لتجين ويانه
باوعت الميس بغيض
هيلانه _ حقيره

ضحكت بوجهي راحن و مقبلت اروى امشي وياهن
رن تلفوني اباوع اسم المتصل وجه لـغراب '

هيلانه _ ها شكوو
دريد _ شكووو وسم مو صار ساعة منتضر

_ بسببك اخواتي عافني وراحن
_ اووي تأثرت

_ عندك گلب خاطر تتأثر شتريد هسه
_ تعالي نروح للمزرعة الشفتيها الصبح

_ و رب
_ دتعالي عليمن هاللحلفان

عفت العباية و رحت صارن گدامي كم وحدة اسمع
ينقدن بتصرفاتنه احس متعمدات ممعقول شگد صلفات

طلعت لگيته متگي ع الحايط و رجله ليورا مخليها
_ خلص العرس و العروس بعدهي

_ شلون يخلص عرس ما بي عروس
_ يلا تحركي

_ هاااا وين رايح شبيج غير نطلع
_ لتضحك عليه اكو طريق ثاني

ضحك و رد
_ لا هنا احسن هم نكمش ايادي و كذا گالها و غمز

_ سخيف ما امشي
_ كيفج

گالها و تقدم من يمي راح گلت بگلبي فلا اروح الحقير
عبالة يگدر يضحك عليه لان ساكتتله نداريت داروح
عاط بأاسمي

_ ها خير
_ امشي نروح منتضرينه الوادم

_ شعليه گلهم متجي وخلص
_ مو جيت الاهلج فتجين الاهلي خوش ؟

_ هي گوه
_ يي

_ حقير ، مستفز
_ عرمه ، جاهله

_ شتريد هسه رفع ايدة اشرلي لمكان
_ روحي اعبري هالمكان و انتظري ثواني و أجي

اوك عافني و راح تمشيت للمكان الي اشرلي بي الثواني
صارت ربع ساعة و سمعت صوت السيارة رفعت راسي
عرفتها سيارته وگفت گدامي صعدت و اني ادردم

هيلانه _ لعد مختصرتها من مساع

دريد _ ما اعرف للطريق و بعدين فريت الجهه كلها يلا وصلت شهالطلابة

_ اووي عيني تعبناك
_ تعبكم راحة مدام

_ اني أنسه مو مدام
_ نجبي مراة متزوجة انتي

_ عشتووو
_ اسكتي خلينه متونسين

_ نعست تدري

_ يي ياالله خوش بشارة هاي
_ انت وحضك لو اگعد اذا نمت لو باجر

_ لا بربج لا
ضحكت ع ملامح وجهه عبالك گتلة راح انتحر
مو أنام ، انتهت تلفونه رن سواه صامت

رجع يرن انتبهتله لان يصير ضوه قوي

_ تره صار ساعة يرن التلفون

_ ايولي ابنل ابنل خليني مبرد راسي هسه

ساق الحد موصلنه المكان قليل بحقة كلمة يجنن
الخضار مالي المكان و اشجار حلوة فات گدامي
شفت بنية گاعدة بهالمكان تقريبا يعمر اروى

اول مرفعت راسها و لمحتنه گمزت ركضت لدريد
اباوع حضنته بقوه

شيماء _ شلونك حبيبي صار هواية مجاي

لتفتت الية و اجت حضنتني و سلمت
_ الحمد الله ع سلامتكم يلا تعالو

دخلت و هو صف يمي دنگ لمستواي
همس .... اختي هاي.... و اسمها شيماء
همست .... شعليه تگلي

_ اعلمج حتى ما تبقين اطرش بزفة
_ ديلا مشكور
_ ادللي اغاتي

دخلنه البيت اخوالة چانو حبابين استغربت
دريد واحد منهم لعد مو يگولون ثلثين الولد
عالخال شبي هذا حقير لو هم هسه دايمثلون

شلون تعامله وياي كله مسرحية واهيه اخته
متزوجة ابن خالة و عايشة هنا رادت مقبلت
نروح لا هي و لا زوجها الا نتعشه عاد هو اقتنع

و اني منتضرة شوكت تخلص هالطلعة اختنگت
شوية و دز عليه طلعت آلة

گال ... شنو رأيج افررج للمكان المغرب نرجع

_ اوكي

طلعت وياه سألتة سؤال اجة بالي و بدون ما افكر
شعجب معلقت و گتلي البسي عباية و لعبت دور
الرجل الشرقي الاصيل

هتزت امتونه و ابتسم ابتسامة خاطفة و سكت
لا يمعودة عليمن هالعباة و السحل

سكتت محجيت شي ع الأقل عنده احساس
و يعرف بالمعاناة شوية تمشينه ردت اصور
اجتني لحضه إدراك تلفوني مو بيدي

هيلانه _ عزهه بعينك دريد تلفوني تلفوني ماكو
ندار عليه خزرني
دريد _ آخر مرة وين استخدمتي

_ ما أذكر يمكن من اتصلت بية بيت جدو لو بالسيارة
مجاي أتذكر زين

_ لعد نلگاه ما عليه شر
_ اريد اصور شلون هسه

مد ايدة گدامي و بيها تلفونه تريدي
_ ما شو شتسوي بصوري مأامن بيك

_ تره صور الخطوبة عندي وواضححة هواي أمور بيها
يعني الصور الي تصورينها هسه بيش تأثر

_ گايلتلك انت سخيف مو شنو قصدك
_ فهمج كفاية

سحبت التلفون بيدة و رحت ادور برنامج بي حظ
_ ماكو فلاتر

_ مفلترة بويه ما يحتاج
_ شگلت

_ سلامتج ما گلت
_ هاي عندك انستا ع اساس متحبها

_ گلت ما احبها مو ما استخدمها لا توگفيلي ع الحرف
_ عزهه متابعينك هواية و تنشر همينه

_ يي
_ هههف

دخلت ع كاميرا الانستا هم ماكو فلاتر بيهن خير
صرت اصور اشياء تعجبني و صورت كم صورة
الية قبل لا اغلق التلفون انبهت عليه گاعد و عيونه

عسمه و الشمس عاكسه ع لحيته و شاربه و طالع
لونها مختلف هاي اول مره انتبه لونهن الاسود بي
نوع من الجمال هزيت راسي انفي هالافكار لو يسمعني

أحمد امدح بشي غيره غير يزعله فد كم شهر ، صورته
بدون ميدري و بسرعة حذفتهن گلت بگلبي ميستاهل
اصورة غلقت التلفون و رحت قدمته الة مد ايدة ياخذه

و اول منتبهت ع اصابعة نغزني گلبي بقوة
هبلانه _ دريد
دريد _ همم

_ انت من يمته تلبس الحلقة وي محابسك ؟
_ تعجبني تگعد وزن

_ تضحك عليه
_ لا ، ليش متلبسين انتي

_ اختنگ منها
_ تره مو برگبتج

_ تخنگ اصبعي اني حساسه انأثر عيني
_ سندرله استقري

_ شكد حلو هالمكان مال واحد يجيب خيل
_ تحبين الخيل

_ بجنون اتمنى اگدر اشتري كومات
_ وين تخليهم

_ سهله اشتري گاع مثل هاي
_ حتى اليغرف فلوس من الشط ما يترهه بحچية مثلچ
_ ما فهمت

_ احسن ، اكو هنا خيل
_ صدوووگ عفية شوفني

_ بعدين اتأخر الوقت ارجعينه
_ بعدين يمته

_ غير مره
_ واو واثق اطلع وياك هيج طلعة بعد

_ سكت مجاوبني
_ خلينه نروح نشوف الخيول ؟
_ جج

_ زين هن كبار يخوفن لا
_ عبني ربيت هنانه صرت متعود عليهم اگدر اروض الخيل

_ ههههههه
راعي حضيره چنت

_ شني ولچ راعي بصخول ابوچ؟

گوه كتمت ضحكتي عليه بعدها رجعته للبيت
گعدت يم اخته تحجي و تشاقة و اباوع النظرات
بنات وياهه يسون زلاطة گاعدات و عيونهن علية

كل خزرة ينطنها تموت خوف عزهه عبالك كاتلة
اهلهن بعدها صار المغرب گامو صلو و اني الوحيدة
بقيت اصفن طلعت لحديقتهم المكان بدة يضلم حيل

شلون راح نرجع بلعت ريگ و رجعت ليجوة حضرو
العشه و تعشينه و گعدو يسولفون تقريب ورا ساعة
ونص يلا دز عليه سلمت عليهم و طلعت بعدني بالباب
حضنتني شيماء و گالت

_ ديري بالج ع نفسج
_ ان شاء الله

_ قسور مريتك احلى من صور طلعت
رد و عينه عليه
_ شعبالج لعد

_ هههههه معبالي شي توصل بالسلامة سلملي على اهلنا
بوس... سكتت وضحكت

_ ها خف عقلج عليمن هالضحك

_ ردت اگولك بوسلي ماما و بابا و افنان نسيت انت
بالعيد و هم ميحصلون منك شي

_ شيماء

_ سكتت ههههه توصلون بسلامة انتبهو ع طريق

حسيت بنفسي دخت هواية فجأة ضغطت ع راسي
و تحركت من يمها حسيت بصوت دريد قريب حيل
مني بس مداركز شدايصير وياي

همس .... شبيج هلال
همست _ راسي يأذيني

_ نعسانه
_ هممم كولش

حسيت بي كمش ايدي نترتها و صعدت
بالسيارة حاولت بكل قوتي اسيطر و ما أنام
بس ما گدرت اتحمل غفيت ....

.
اريـج

گاعدة يم البنات خلصنه عشه چان تكه و كباب
شووهن برا و ريحة الاكل ملت المكان المة جانت
حلوة رغم النظرات و الكلام المحدود بين عائلتنه

بس حسيتهم حاولو قدر الامكان يبعدون كل شي
عن بالهم و يتونسون آخر مره أذكر الي لازم المشواة
و يشوي امير و أدم چانو ميرضون واحد يأحذ لمن

يكملون و أزاد كل شوية و اخذ شي و فالت الله يرحمه
هسه الي واگف مكانه أزاد ملامح الجدية ماليته و سامح
هم واگف يمه اشتاقيت الهيلانه اني و مارين گعدنه

ننتظرها بس طلعت متجي بعد العشه كلهم تفرقو كل
واحد و جماعته هههههه ، دگ تلفوني شلته شفت المتصل
هيل رديت عليها بسرعة

اريج _ ها خاينة وينج لهسه تره دنيه
ليل و شيطان موجود
دريد _ احم مرحبا اختي

متت من الفشلة رديت بتردد
_ مراحب اخي
اكو شي ليش رديت انت هيلانه بيها شي

_ لا ما بيها بس نامت ما اريد اسوي هوسه بهيج وقت
تگدرين تحصليلي واحد من اخوانها
_ يا يمكن طلعو مو هنا هسه اشوف اروى و نجي انت
وين

_ بالوراني
_ اوكي انتظر

رگضت الاروى لگيتها گاعدة يم بيبي

شيخه وضحه _ اسم الله يمهه شبيج
طبيتي چنچ مسودنه
اريج _ اني مسودنه رحمه الله والديج بيبي
اروى سالفة مستعجله تكدرين تجين

اروى _ وشكو يمعودة رجلية صايرة خيو
گد ما افتريت ورا قدودي اليوم
اريج _ لا تعالي شوفي قدودي الچبيرة

صفنت بوجهي ثواني يلا گامت و فهمت قصدي
_ صخام جيت ، شبيها اختي
_ هي و زوجها بجهه الثانية من البيت مشينه

_ لتگليلي نايمة
_ اتصلت عليه رديت چان هو و گال نامت

رحنه اني واروى شفناه واگف يم السيارة
من اجينه فتح الباب و شالها صرت اتلفت
و اني مشغله ضوة تلفوني عزهه هسه يجون

الولد و نتعزه عدل دخل بيها الوحدة من الغرف
و اروى صارت تسألة شصار و هو ما رد عليها غير
كم كلمة و راح بقيت نايمة يمها للصبح

حسيت بحركه وصوت فزيت
من نومتي و جفلت اول مشفت بارق يباوع عليه
اريج _ عزههه شسوي هنا
بارق _'اجيت اشوف اختي هم ممنوع ؟

نداريت اباوع هيلانه بسابع نومه رجعت باوعتله
_ يي شوفها براحتك رايحة اني

طلعت رگض و بيدي تلفوني فتحته الساعة ٩
مو ع اساس من الصبح نرجع لبغداد رسلت رسالة
البسيل و توجهت للمطبخ صبحت عليهم كلهم گاعدين

تقريبا تريگت وي عمو احسان و فدوى بنته و فتحت تلفوني شفت راد عليه .... العصر مو هسه

رحت ادور ع مارين فتريت هواية يلا صادفتها
شفتها گاعدة بداية للبستان ركضت الها

اريج _ ها ولج متخافين يطلعلج الهو هو ، صباح الخير
مارين _ صباح النور ، ما اخاف لان گال جدو ميأذي

_ صدگتج اخخ شتاقيت الغرفتي
_ و اذا تزوجتي لازم نجيها يمنه لو شنو

هزيت ايدي ورديت _ مصدگة ازوج اخوها
_ بطرانه وين أكو من اخوي بعد ووووين تلگين

_ تزوجي اخوي و افكر بالموضوع
_ يا اخوج

غمزتلها وگلت
_ بسيل
_ دنجبي

_ ليش ولج ليش
_ هو صحيح حباب و كلش هادئ بس احسه مثل ايمن

_ شلون يعني
_ ايمن سمعته يگول ما ابقى وي طفله
هذا هم يگلي طفله

_ ههههه أذكر بوقتها گمتي تسمي عمو
_ تره حتى بسيل ودي اگوله هيج ههه

_ عابت غير يحرگج
_ من جنت اگله استاذ ينطيني خزرات عاد اذا
اگله عمو شلون

_ ينتحر
_ هههههههههه صحيح مگعدت هيلانه ميس

_ هيلانه بعدها و ميس ما أظن يخيه تگعد
_ ليش عود

_ تخاف لا تشوف رائد كل شوية وگالت خلونه نطلع
منا لا ينده عليه نافخه روحها يمنه و هي بوخه
_ ههههههه عزههه ولا وحدة بينه مرتاحة

_ هجولتنه الرياجيل
_ ههههههههه

...... صوتچ ست مارين

.
مـاريـن

گعدت من الفجر لان نايمة يم بيبي و هي تگعد هيج
وكت مگدرت أنام صرت تراقب شغلهم قسم يجهز
الريوگ و قسم يخبز و قسم نايم صرت ادور ع هيلة

لگيتها نايمة بغرفة من الغرف الضيوف هي و اريج
تريگت وياهم بعدها تمشيت بالبستان أحاول ارتاح
نفسياً متمنيه ما تجيني حالتي و المي بهيج ايام لان

أكيد راح اتعبهم ويايه و هذا الشي ما رايدته لل ١٠
تقريبا طلعت من للبستان بعدني اتمشى اجتني اريج
طايرة سولفنه شوية الحد مسمعت صوت انغث منه

ايمن _ صوتج ست مارين
همست .... اهوو هذا شجابة
عليت صوتي وكلت ها عمو اسفين زعجنه مسامعك

ايمن _ اريج مرخصتج تگدرين تروحين شوية

مارين _ أصلا اني رايحة وياهه يلا جوجه

ايمن _ لحضه داحجي وياج

كتفت اديه وگلت
مارين _ خير احجي اسمعك

تجاهلني و باوع الاريج
ايمن _ اريج

اريج _ ها اخذو راحتكم رايحة اخابر
ماما مارين مو تتاخرين

فلتت الحقيره و عافتني عيني عليها و هي تمشي
أحاول ما اباوعله حتى أضيع توتري محسيت غير
ايدة ع زندي ابعد بي ماكو

مارين _ وخر انت ما تستحي
ايمن _ يا قشمر گلج استحي تعالي گدامي

_ تره اصرخ و الم البيت عليك شايف
_ اشش بابا عيب خل نشوفلنه مكان نگد نسولف

_ ما عندي سالفةةةة وياك
_ بس انه عندي بويه

دنگت ع ايدة الي لازمني بيها عضيتها بقوة حسيت
راح اشلع لحمه من كف ايدة بس و لا حاول يبعدني
هالشي عصبني اكثر و اكثر

دخلنا للبستان راح نهايته ورا مكان يخلون بي سعف
النخيل مالهم متت خوف اني شبقاني وحدي وياه
اووف مني ترك ايدي أخيرا صرت افرك بمكانها

و هو واگف گدامي عيونه متشخصه عليه

_ خير هاي صرنا الوحدنا
_ شبينچ و بين الگو*** المثقف

_ منو هذا
_ نعل بسيل

_ شبينه يعني
_ انه الاسأل مو انتي ليش هاي ثاني مره يخطبج

_ ها يمته
_ عليمن مصدومه تقنعيني ما عندج علم

_ و اذا
_ شگلتي !

_ و اذا خطبني هو ابن عمي حالة من حالك
يعني مو غريب و تعصب

_ اشش اشش ما اريد ااذيچ سالفة حالة من حالك
نگعيها و اشربي مايها انتِ و الخلة الفكرة براسج
محد حالة من حالي بهالدنيا فاهمه

_ ايمن بروح امير طلعت روحي منك شتريد مني

_ وروح امير اريدج .... سكت شوية و راها رجع گال
ارجعيلي تعبت

الخوف سيطر كلش عليه حاولت اقوي روحي بكل
وسيلة ممكنه بس من گال كلامه نفجرت بي

_ شنووو شداتگول انت من كل عقلك
_ مو لعبة بسس ما جنت واعي للسويته ل....

_ لا واعي ايمن
چنت تباوع بعيوني
من گلت اخطبولي واني بعز انكساري بأختي
باوعت بعيوني و گعدت يمها لبستها الحلقة
الچنت انتظر اني البسها
ليششش ساكت ههه صحيح و انت نفسك

الگلت عني طفلة ما اصلح الك مراة
حاولت تحرمني من اختي مره لخ لو ما
ستر رب العالمين جان وگف گلبها من الصدمه
لزمت راسي بدة يأذيني كملت و اني عيوني
تصب دموع

تزوجت وچنت قريب منها حيل و أكيد دلعتها
و غازلتها كلام حتى مگلتة الية بيوم

_ مر كافي

_ لا مو كافي اني مر و زقوم وخر عني شسوي بيه

حاول يكمش ايدي دفعتها بقوة بس هو أقوى مني
سحبني عليه صرت بحضنه ايدة بوجهي يمسح
عيوني الي موگفن ثانيه و الايد الثانيه نزل بيها

شالي غرس اصابعه بشعري
رفعت راسي صرت اباوع بعيونه
و ابچي ليش هالگد اصير ضعيفة

بهالقرب همس .... گدامي وجهي حرارة
انفاسه وحدها خلت جسمي يرجف

ايمن _ شلون اعوفنچ و اخلي غيري يباوع عليج
و اني الچنت حارم روحي منچ حتى لا اذيچ

هذني گالها و لمس شفتي روحي راحت حتى
حركه ما گدرت اترحك

ما تدرين شعملن بيه ضگتهن مره نسيت حتى
ياهو انه كل الاعرفة هنه و انتِ الي ما اخلي واحد
يفكر يجي صوبچ ولون اجة هذا موته

لا حنان و لا عشره منها يگدرن يحركني بس
حقها تجيني و ما اگدر اگلها لا

_ ايمن
_ عمره مرِ
_ فدوة عوفني خلص اني وياك ما نصير سوة
خليني اشوف حياتي

اني گلت هيج لو هو نگلب فد نوب اباوع حتى دماراته
طگن من الحرگه گلت بگلبي عليش هالحرگه و انت بعتني

قربني اكثر آلة أحاول ابعد بس ماكو تگول حط كل
قوته بهالحضن

_ خلص عوفني لا تخوفني منك اكثر
ايمن مو داحاجيك حرام الي داتسو.....

بعدني ممكملة گلامي حبس شفايفي بين سنونه
رجف كل جسمي حاولت ابعدة سحب ايدي و كمشها
كل رده فعل اختفت عندي جمدت بمكاني بعد سنونه

سحب شفايفي بـ شفايفه باسني بلهفه غريبه
ما بادلته بس حسيت بشعور غريب رجع تغلغل
بيه أقوى حتى من اول مره اريد ابعده بنفس

الوقت ما اريد حس بيه مستلمه رخه ايده استغليت الفرصه دفعته بقوة استهضمت من الموقف

_ انت من كل عقلك داتصرف لو شنو

اباوعله صدرة يعلو و ينزل و ساكت عني

_ من تركتني و تزوجت لغيري حليت بعينك الهلدرجه
يا ابن عمي رخيصة اني تبوسني هيج بالختله ؟
و ذيج مرتك گدام ربك و عباده

حچة من بين سنونه و نبرته غاضبه
_ مر

_ ها

_ لا توافقين اموت وحگ روحه الماتفارگتني

_ اني متت من يوم الي حاولت تقرب من و شبعتني
ضرب و اهاين و بعدها بكل جرائة خطبت غيري

متحملت و بجيت اكثر واني اگول
_ لتخاف اني مراح ازوج لا انت و لا غيرك كرهت
كل شي بدنيا بسببك

راد يحجي ما نطيته مجال ركضت بكل ماعندي
من سرعه وصلت للمطبخ الهث اول مرفعت راسي
و ياريتني ما رفعته چانت حنان و ام رائد حتى

وهج و تماره يباوعن عليه بنظرات كلهه حقد
للحضه شكيت شافن ايمن و هو .... يااا عزههه

سويت نفسي مو مهتمه و داطلع من جهه الثانيه
و هن هم محجن تنفست براحه

بقيت ادور على البنات الحد ملگيتهن مجتمعات ......

.

هـيـلانـه

گعدت الصبح بردانه فركت عيني و اباوع وين اني
تململت هواية احس جسمي متكسر بقيت بربع ساعة
بمكاني تالي گدرت اگوم ع حيلي لميت شعري و خليت

الشال شلون مكان على راسي و طلعت غسلت و الي يلاگيني يصبح عليه و اني ارد خجلت هواية عددهم
جبير و كل شوية مسلمة ممتعودة على هالامور لاكاني

أحمد واگف باب المطبخ رافع اديه ساندها ع الباب
و اكو مجال صغير اگدر ادخل منه دخلت و هو فز
لان مجان منتبه

هيلانه _ ها بطلنا اشو فزيت
أحمد _ يول فان حضج عبالي شو ياهي

ضحكت عليه وصبحت ع الموجودين گالن
شنو تريدين ريوگ تشكرت منهن وگلت ما اشتهي
طلعت وي اخوية

أحمد _ البارحة شصارلچ تخربطتي لو شنو
هيلانه _ لا !

_ هيلة
_ ها يي بطريق الرجعة غفيت گعدت شفت نفسي هنايه

_ خير خير دورت على دكتور زين ولگيت حجزتلج لباجر
_ براحتك ، بس شوكت نرجع

_ للعصر بارق گال
_ اوكي حبيبي

ابتسم بوجهي و طلع بجهه الديوان اني حرت وين اروح
آخر خيار صار ابالي رحتله غرفة بيبي وضحه شفتها
مموجودة بس ميس و نايمة و بحضنها قمر

_ ميس ميس
_ هممم

_ اگعدي راح نروح
_ ها يي بعدين الحگكم

_ تگعدين لو شلون
_ هيلة ميلي عني بربج نعسانه نمت وجه الفجر

ابتسمت بخبث وگلت بسرعة
_ رايحين عود ارجعي وي رائد انتي

اني گلتها وهي طفرت
_ لاااا أجي وياكم

باوعتلي أضحك استوعبت الموضوع شمرت الكوشه
عليه و اني مستمره بضحك قمر گعدت متنحسه من
الصوت العالي اجتي عليه حضنتني و ميس گامت

_ صدگ حنروح
_ لا

_ ثول حتينه ثول
_ مقبولة حبي

خزرتني و طلعت اخذت قمر غسلت وجها و بدلنا
و اخذتها تتريگ يم امها جانت توكل بيحيى خلصت
رحنه يم بيبي شوية و بعدين التمينه گعدنه نسولف

اروى _ ولج مرمر وين چنتي
مارين _ تمشيت شوية

اريج _ اگلكم و الي الامان
باوعت المارين و گالت روى _ شنو ولج وجهج صوفر

اريج _ آخر مره عفتها وي ايمن
مارين _ امداج شگد خاينه

اروى _ عزهه شصار سوالج شي
مارين _ لا كل شي ما بيه هياتني يمكم

تالين _ اعتذر منج لو تعارك وياج
مارين _ ما اعتذر و لا أريد اعتذاره

ميس _ يي خل يولي
تالين _ هو عاف الوادم كلها و اختار حنان
حتى بيتنه محرومين منه و مسلوبه راحتنه
گد ما تسوي مشاكل

اريج _ تشيخت
تالين _ يي عبالك البيت بيتها

اروى _ صدگ لو گالو صار البيت
الام طيره وطارت بي فرد طيره

..... استغفرالله ياربي

هيلانه _ مارين شصار بينكم
مارين _ مصار شي

هيلانه _ صوتچ مخنوگ يا ما صار شي
مارين _ لا يخلي رحمه الله تنزل و لا يرحم

اروى _ الله يهديه
اريج _ راح احجيلكم شي حتى
مارين تنسى سالفة ايمن

اروى _ احجي ام الفواين

..... ههههههه

اريج _ البارحه خابرت عليه هيلانه

هيلانه _ اني وچ يمته

اريج _ دسمعي بعدني مسامعه صوتها گلت
.... سولفت الهم عن اتصال البارحه وي دريد

ضحكنه عليها

هيلانه _ عزهه بعينج يا شياطين هاي تفف

ههههههههه

اروى _ كافي يمعودات
تعالو نروح للمطبخ لا ينحجي علينه

مگلنه شي رحنه سويه من دخلنا لگينه الجبهه كلها
موجودة

ام رائد _ شدعوه اروى متمدن ايدچن
صار يومين متكترات

اروى _ عمه غير ردت اساعد البارحه
و تمارة خاتون مقبلت شرد اسوي مثلا
تكترت اني و خياتي

گعدنه شوية صارت سوالف عادية بس بعدين

اسماء _ شوفن هي كل نساوين بيهن
خير الا تگرب من رجال مزوج

وهج _ يي و انتي صادگه عمه ماكو شريفة تسويها

اروى _ شقصدچن

اسماء _ والله الي يلوحه الحچي
ويحس بي فهو المگصود

حجت اروى بكل حده
_ بس بنفس الوقت أكو زلم مزوجه و تروح
دور نسوان غير نسوانهم منما يشوفون الاهتمام
هم يملون ذيچ الساعة

گامت اروى و عاطت بينه نروح وراها

شاورتني اريج
_ عبالك غنم و اروى الراعي نفتر وراها

كفختها و هي تضحك
_ عابت

مشه الوقت عادي الحدما رحنه الكل ظل يسلم
و يودع و بدينه نركب السيارات اروى گالت رجعي
وي قسور مدام رحتي وياه ارجعي وياه ما عارضت

هذا اليوم انطبع بعقلي و بكل حياتي منا بدت
ترجع حياتي و حياة اخواني و اخواتي للصفر

بدت كل اوراق الربيع الي طالعه بشجرتي تصفر
تيبس و تموت كأنما الخريف عبر كل الفصول حتى
يموت ورداتي و يذبل روحي و يعصف بحياتي .....

اليوم بدأ الهيل يصير مكروه و عطره مشؤوم

طلعت من الباب الوراني بيدي جنطتي و العباة
باوعلي دريد من بعيد و صعد سيارته

وصلت يمه طلع راسه من الجامه يضحك

دريد _ شنو هاي دضميها مخليتها مزهريه بيدج
رديت بغيض
هيلانه _ معليك فتحت الباب خليت اغراضي
و صعدت يمه .... مو ع اساس تروح الصبح

_ ما گدرت عطلوني ع الغدة خوما افشلهم
_ براحتك

_ هاج سندرله

باوعت بيده تلفوني اخذته منه و اني ودي ابوسه
گد ما مشتاقة اگلب بي بس حسيتها واگفه و اني
يم دريد

_ ليش تگلي سندرله
_ تعوفن اشيائجن

_ هههههاي و انت منين تعرف هالقصة
_ سامعها هواية

_ ههههههه

لفنه من الجهة الثانيه

_ دريد بطئ
_ ليش
_ شوف هذا جدو ديأشرلك توگف

وكف السيارة بصف سيارة أزاد و نزل البنات فتحن
الجامات و صرنا ندز بوسات البعض عدالك مشايفين
بعض لو راح نتفارگ ضحكت من سمعت صوت بارق

زمخ بيهن رجعت راسي و سديت الجامه التفتت لجهه
الثانيه و اني عمري ما متخيله الشخص الشفته التقي
بي بهيج مكان و بنص اهلي الدنيا احسها وكفت بيه

دارت الدنيا بيه بهالثواني و رمتني بعيدد حيل كلش
الاسر ..... الاسر شش شيسووي هنا دمعه حاره تسللت
من عيني و حرگت خدي بنارها بهالثواني دخل دريد

للسيارة و الاسر بتعد ديخابر ممنتبه الشي اتبعته
بنظراتي الحد موگف يم سيارة فتحت عيني بوسعها
و اني اشوف اريج و بسيل صعدو هالسيارة اريج اجتي

وي اخوانها لا مستحيل لالاا صرخه كبرت بداخلي يمكن
كل الي بالدنيا يسمعوها ردت ابجي ماكو الدمع حتى هو قسى وياي لتفتت باوعلي دريد وگال

_ شبيها خلقتج نگلبت عالبطانه
حجيت بگلبي اني شجاي اسوي بروحي منو هذا و مأمنه يمه بلعت بخوف و رديت بلگوات

_ مب مبيه ششي بسس أستعمل شويه
_ يي صار

سكتت لفترة طويلة جمعت كلام بعقلي حتى اواجهه بي

_ دريد
_ ها
_ الاسر

بلعت ريگي بصعوبه لتفتلي و رجع باوع بالطريق

_ شبي
_ يمته آخر مره شفته

سكت عني مجاوب

_ دريد جاوب
_ اذا جاوبت اجذب خليني ساكت احسن

_ هو واحد يعرف ابويه فراس عنده حقد كلش
جبير وياه الدرجه يخطفني و بسببه طحت
بيد داعش ما بقى بيه سليم ..... منو هو

غلس عني و اني ما لحيت حسيت روحي ضعفت
چن واحد غرگان حاول و حاول يطلع بس استلم
للغرق و رخى كل جسمه حتى ينزل بالاعماق ......

هالشعور حسيت بي منگبل بس هسه زاد و زاد عن حده
باوعت براحه دخلنا بغداد ع الأقل اامن نداريت سحبت جنطتي صرت ادور بيها عن شي بعد ما لازم يكون وياي

_ عوفيها بعد هواي يلا نوصل اهلج
_ اعرف أصلا تأخرنه صار الليل

_ الدرب بعيد ، عندي حچي وياچ

_ اسمعك
_ ننزل بفد مطعم

_ لا
_ هايهيه ما نحجي افضل

سكتت عنه اني ما مصدگه طبيت بغداد وياه
يگلي مطعم لعبت روحي من قربنه كلش داشوف
بي صاحبه وگلبي يوجعني بأاستمرار وصلني گدام

بيتنه الشارع فارغ و المكان مظلم اخذت نفس قوي
و زفرته فتحت الباب و بقيت گاعدة مديت ايدي لجيب
جنطتي طلعت منه الحلقة خليتها گدامه

_ شايفها شگو مطلعتها بوجهي
_ راح اگول للاهلي بعد كم يوم اني و انت قررنا
نطلگ احسن مما نزوج و تكبر مشاكلنا
و بنسبه الاهلك حتلو تريد تذب الصوچ بيه
ما عندي مشكلة

_ انزلي هلال مالي خلگ

_ انت انذل من الاسر تدري شلون لتباوع هيج
خليتني عايشه بمكان وي اكثر شخص اكرهه
بالحياة حاولت ابيض صورتك بعقلي حتى
لا اتحسس منك و عاملك طبيعي بس بعملتك
رجعتني للصفر دريد

_ صدفة شفته أصلا هو ما يعرف اني خاطبج

_ ههه تتوقع اصدگ صديقك و ميدري بيك خاطب

_ يدري بس مو انتي

_ و ليش ضامني عنه اووو أسكت ما اريد اسمع شي
خلص اني راح أبلغ اهلي بس ندري شنو راح اگلهم
اعدائي ابن عمي و صاحبه دريد

_ هلال

_ لتگول هلال ودي اگلهم عنك بس الي خطبني قسور
مو دريد واحد سكير همجي و ابو نسوان

_ فريتي مخي هسه انتي شوفيني دريد مو

_ مو مهم اهم شي تطلع من حياتي بهدوء

مد ايده قريب ع كف ايدي عبالي راح ياخذ
حلقتِ الي صار ساعة شاهرتها بوجهه بس
فاجئني و هو يغلق بيدي بقى حاظن كفي بقوة

مسح ايدي بأبهامه ما حاولت ابعده بقيت ساكته

_ الي ناوية عليها تسمه حرب مو مشاكل
_ ليش

_ بين اهلج و ناسچ مو غربه
_ هو خلاني كبش فداء فما اندم
حتلو اشوفه گدامي ميت

_ تتوقعين علاقتچ بأخوانچ راح تبقى
_ هم يمته اجوي ما صار كم سنة بس عوضوني
هواية و اذا عافوني ما راح اموت احمي روحي

_ يش وين رحت أنه
_ شبيك انت لشوف نفسك لان مو عون انت عدو
و جبير هم سحبت ايدي منه و دنگت راس حايره

_ راح تخسرين حربج
_ النساء ما تخسر نخرج باقل الخسائر فقط

_ عوفي النساء شنو هي أقل الخسائر بتوقعاتچ
_ حتلو چانت روحي مو هامني

_ انزلي هلال
_ راح تگول الامك

_ عن موعد عرسنه
_ لشوفني هيج تره اعصابي كلها فالته اخاف اعيط
و يجون لهنا كافي إفهم كلامي

_ من يدزون علينه نمثل بفلم اسوي الخريط
الحجيتي هسه انتي حرمتي ! تدرين شمعناهه
_ لتگول حرمتي

_ شحجي بكيفي بطلي سوالفچ باجر التحق ولون
جرالي شي سوي التردي
_ مو كتلك نطلگ خاطر ما يضرك شي

_ يضرني خله يضرني شني اخاف تالي عمري
_ دريددد

_ شتردين
_ الله ياخذكم و ارتاح

_ اذا خلصتي روحي ادخلي
عفته و سديت الباب بقوة دگيت الباب فتحلي
أحمد سلمت عليه و سولفنه شوية و منحس غير
صوت تكسير بغرفه بارق عافني أحمد و راحله

متأخر طلع گال هايجه عليه الشقيقة و أصلا
اجة من بيت جدي معصب ضجت عليه بعدها
صعدنا أنام بس يا نوم هذا للصبح اني ع گعدتي
ابدحتىتعب ما مرني بس

القهر ماخذ نص من عمري اذا مو عمري كله ......

ثاني يوم اجاني أحمد هو اورى گالو جهزي نفسج
لبست شي مناسب اروى عافت قمر و يحيى يم
اهلهم و طلعنه تقريب الظهر الطريق للعيادة طويل

بشكل مو طبيعي بحيث دخت فد دوخه شگدها
من نزلت قريت اسم الدكتور و اختصاصه تفاجئت

جان كل ضني النوم الحالة الي دااعاني منها مرض
نفسي مو يم الدماغ و الاعصاب دخلنا چان دكتور
چبير بالعمر هيج اتوقع بداية الاربعينات شكله بي

نوع من الهيبه و هادئ كولش بالبداية عرف اخوية
عن نفسه وگاله أزاد فؤاد ابن عمي يصير ابتسم ثواني
و بعدها كمل حديثه گعدنهبالربع ساعة نشرحله الحالة

هو بس يستمع آخر شي التفت الية طلب منهم يطلعون باوعت وراهم بأستغراب لو يگلي بز ابچي ع الغرابة الي داحسها

_ يي بنتي تفضلي استريحي هنا

اشر بعينه على الكرسي المقابلية گمت گعدت سألني

_ شنو اسمچ
_ هيلانه

_ جميل و غريب مثل اسمي
اباوع ابتسم صحيح اسمه مو مألوف الية ابد
بس ميدري اني كل شي غريب بحياتي

_ من يمتة عندچ الحالة
_ ٣ او ٤ أشهر دكتور

_ شنو الاعراض الي تعانين منها
_ مرات هواية صداع
و دائماً احس بنعاس قوي بلحضات
مو مناسبة مرات اكون غضبانه لو أضحك

_ بلحضه الي تجيج بيها شنو تحسين ؟
_ ما اگدر اتحكم بنفسي و لا اگدر ابقى واگفه على حيلي

_ متعرضه الضربه براسچ
اجة بالي الداعشي الي ضل يرگع براسي بقسووة
هزيت راسي و كلت .... لا

_ تعانين من اكتئاب
_ نعم

_ شنو تعرفين عن الاكتئاب
_ دائما اكون بحالة مزاجية مو زينة غصب عني
افكاري سلبية هيج شي يعني

هز راسه و كتب بالورقة ما اعرف شنو

_احساس بالضعف الجسدي و النفسي عندج
_ نعم

_ عدكم احد بالعائلة عنده هيج حالة
_ لا بس والدي و اخوية و اختي التؤم بيهم شقيقة

شال التلفون أعتقد حجة وي السكرتيرة

دخلو اخواني صارو يتناقشون و اني اذا نسألت
اجاوب

آخر شي گاله راح اسوي فحوصات

سوينه و بعد كم يوم رجعنه اني
و اروى ويانه بارق

الدكتور گال
_ طبعا الفحوصات چانت للتأكيد هي سليمة و الي تعاني
منه نوم قهري بسبب اختلال هرموني او اكتئاب و عوامل
ساعدت حتى يطلع هالمرض طبعا مو نفسي بس يأثر
على النفسية سلباً

سكت شوية وگال و ياريته محاچي عصرني گلبي
_ هالحالة دائمية مالها علاج بس ما يمنع نخفف عنها

بارق _ دكتور شلون نگدر نساعدها

_ اكو علاجات مضادات اكتئاب حتى يقلل من حدة
اكتئابها و منشطات تاخذهم يساعدنها متنام بالنهار

بارق _ راح يأثر على حياتها

اروى _ اكو اشياء لازم تبتعد عنها

_ نعم لكن كحد عام ميأثر اذا التزمت
بالادوية ، تساعد نفسها تطلع من الي
هيه بي و تلتزم بمواعيد نوم محدده

الضغط ، الحزن هالامور يا بنتي ما يغيرن
شي صيري قوية و راح اكتبلج تعلميات امشي بيهن

طلعت و اني مقهورة الدنيا سودة بعيني

بارق و اروى حاولو يواسوني بدون فايدة
يوم يومين اسبوع اسبوعيين مرن اني لا ليلي
ليل و لا نهاري نهار ابتعدت عن روحي و عن
اخواتي اريج اذا مشت بطريق امر من غيره

خاطر ما اشوفها حتى اكل ما اكل حتى لا تشوفني
دوم حاطه روحي و ثابته بمكاني هي هم لا حضت
و ابتعدت عني بس عيونها عليه من بعيد لبعيد كل
شي صار بهالفترة سولفته الغيد شجعتني احجي

البارق بعد معرفت هو ناوي يخطبها و هالشي شوش تفكيري اكثر و اكثر اليوم اول مخلصت دوامي رحت

الأم سامي شفت قسيم گوه لازمه روحي
حتى ما ابجي گدامه و اجفله حاولت خاله
تعرف شبيه بس مجاوبتها هي گالت لا انتي
و لا قسور ما تمرون صايرين

استغربت هو يعرف قسيم متعلق بي ليش ميجي
بعدين گلت شترجى منه هسه يطلع ناسي أصلا
ما تأخرت يمهم و رحت و قبلها انطيتها مصرف مني

ثاني يوم صادف عطله و الكل مجتمعين يمنه بارق
عازمهم بسيل و اريچ من اباوعلهم تجيني رغبه اتقيئ
بس الزم نفسي شگد كرهت روحي هم شعليهم بس يمكن

يدرون لالا ما اتوقع هزيت راسي أحاول ابعد عني
هالتفكير ....

.

تـالـيـن

مرت ايام طويلة .... مشت حياتي بيها عادية
بين اهلي و حب صهيب و صداقتي برسيل طبعا
زادت صداقاتي و صرت معروفة هواية بين گروبي

بس ما اختلطت بيهم كلش هواية ، بهاللفترة رجع
صهيب و هم داوم بالموصل طول اللتحاقة گلبي
يمة خاصة من ينگطع خبره ايام و ليالي احس

بالمرض و النقص و بمجرد ما اسمع صوته ترجع
الحياة الية بهالفترة بدة يگول عوفي التأجيل
لازم نزوج و اني اگله لمن اكمل عاد ما گدرت

اقنعه لان قافل فگلي بس هاللاشهر ما اسمع منج
اعتراض ، و ازاد حدد موعد زواجة و رسيل
طايرة من الفرحة هو حاول يأجل بس بابا مقبل .....

اما ايمن فهذا موضوع ثاني اخوية قبل شهر
عرف مرته حامل بتوم الكل فرح و طار من
الفرحة بهالخبر بابا يگول بلكي ولد وبنية

و يجونه ياسمين و امير سوة أمي تگله ....
ان شاء الله بس اخوية الوحيد الي ما فرح
و لا ابتسم حتى كل الوقت بغير عالم كأنما

يباوع للعمر يمشي و هو واگف يباوعه بدون
اهتمام ساعات انقهر عليه أذكر عيونه و لهفته
لطاري مارين الي ما بينلها هالشي بيوم طول

عمره لابس الوجه الغير مو بالي الحد موگع
الفاس بالراس لا هو متهني و لا مرمر مرتاحة

بيوم وصلنا خبر بارق راح يرجع من السفر رحنه
كلنا الهم ايمن راح هو و مرته يسوق ع كيف لان
حامل و بتوم و اني و ماما رحنا اخذنه بنات عمو

فراس ما عدا هيلة راحت وي خطيبها حتى أزاد
چان فرحان و يخطك روحهم هو و رسيل بس انها
نغصت عليهم هالفرحه و رحمه وحدنا كالعادة صارت

مشاحنات هواية ابد بس تونسنه طلعنه الاماكن
فد تخبل خلصنه يوم ونص بأاجواء عائلية حلوة
و رجعنه بعدها التهيت بين البيت و تنظيفة و الدوام

اخلص و أنام گبل مرات ما أتصل بصهيب و هو يتفهمني
لبست اليوم ملابس رسمية قاط لونه بصلي و شال ابيض
و طلعت اليوم متفقين نصور و نطلع نتعشه وي الگروب

گلت الصهيب عندي طلعه ورا الدوام مشاف رسالتي توقعت بعده بالواجب داومت عادي اخذنه كم محاضره
و گعدنه نتغده فجأة وگف شخص گدامنه رفعت راسي

چان واحد من الدكاترة بس مو جبير بالعمر اكو
شياب بس هذا لا واضح صغير جاوبه واحد من
زملائنه بطريقة عادية عبالك صديقة مع انو الكل

تقريبا ميحب هالاستاذ وخاصه الشباب يگولون
عليه يلعب ع البنات و يغرهم بفلوسه محد يعرف
چذب صدگ كلمن يحجي بكيفه ......

جبر _ ها ولك شسوي لافي يمنه
عقاب _ مجاي الك جبر

شمس _ تفضل استاذ اگعد ويانه
عقاب _ على غير مره

اباوعله التفتلي و گال
_ مرخصتكم تالين تگدرين تجين وياي دقيقة

وگف العصير بلعومي حتى شربه صار صعب

تالين _ يي عادي

گمت و هو گدامي يمشي طلعنه لبره ابتعدنه شوية
و ندار عليه

عقاب _ تالين يمكن انتي ما تعرفيني بس اني
سألت و عرفت كل شي عنج

عگدت حاجبي بغضب
_ و شنو الزومه هالحچي

عقاب _ رايد اتقدملج على سنة الله و رسوله طبعا
راح ادز اهلي بس حبيت اخليچ تفكرين قبل بوقت
و كل شي تريدين تعرفينه عني اني حاضر اسألي

و اجاوبچ هسه تگولين ليش دخلت بالموضوع
بسرعة انه انسان ما احب الف و الدوان لهذا
حبيت ادخل مباشرة بالموضوع و انتي عاجبتني

من اول يوم شفتچ بي هنا ..... باوع بساعته و گال
هسه مرخصتج عندي موعد مهم فكري بكلامي

عافني بصدمتي و راح ضليت لا اخذ و لا انطي
رجعت بسرعة الشمس باوعتلي بخوف

شمس _ شكو شصاير
تالين _ تغزيتت خرررب

_ شمالچ ولچ احجيلي
_ اسكتي شميسه گولي للبنات خلي نطلع اختنگت

صدگ راحت جابتهن و اجت طلعت وياهن غيرت
جو آخر شي كلمن رجعت بتكسي و اني بقيت اتمشه
ويه شمس

شمس _ شصار وياچ سولفي

سولفتلها ......

شمس _ عزه بعينه منين اجتج هالمصيبه
تالين _ يا مصيبه يمعودة ارفض و خلص بس وترني

شمس _ هذا يشد وي البنات الي يرفضو ولچ
سمعته الخايسه
تالين _ شبيدي قابل مو تايهه الوادم آلة اذا محد
سوتله حل اني اسويله
_ كارثه يلا راح اروح باي اوصل للبيت و أتصل بيچ

راحت واني رمشت ع أزاد

تالين _ وين صرت يمعود صرت بالمكان النتفقنه عليه
أزاد _ طلعت وي رسيل نختار الاثاث

_ أدري بيكم گتلي البارحه
_ تخربطت شوي و هسه اني وياهه اخوها راح يجيج

_ شبيها هسه احجيي
_ اشش يمعودة كل شي ماكو هبوط بضغط

_ ووف طمنتني يلا شوية و أتصل بيك
_ باي

هذا شبي كل ما ينزل لازم يجي سكته عبالك
حرامي دگول اني نازل ما طلعت هاي نفرزني
حيل بجيته شوي و لمحت السيارة رحت ركبت

ورا ع الأقل اعرف هالحركه تغثه بس اشو محچة
صهيب _ شلونج
تالين _ بخير و نعمه من الله ، انت

_ الحمدالله بخير
_ خوش

_ احچي عدل بلا هالنتر بصوتچ
_ شبيه شجيت هسه اني

_ كافي تالين صوتچ

غمضت عيني ثواني و فتحتهن تالين معناها حضرته
ضايج

_ انت متعرف تگول اني انزل كذا يوم
_ مثلچ اكو وحدة عاقلة تطلع من الصبح لليل
بهالبس هذا

_ شبي نوبه اشو مستور
_ وين الستر الي و هو ضاب الدنيا كلها

_ انـ...... قاطعني و عاط بيه
_ كافي واصلها الحدها تالين

_ اهدئ لا يصعد الضغط هنوب
_ بزودچ لا يبقى سكر لا ضغط لا جلطه ما يصيبني

_ جلمددد اسم الله كافي تحجي هيج
_ لا تعصبين لا يطگلج عرج حبيبتي

_ لا تحجي هيج تره اشمر روحي من السيارة
و لا ابقى وياك

سكتنه بعدها الحد ما سألته
_ رسيل خابر عليهم نشوف شلون صارت
_ مبيها شي زينه ، مدري شغاثها اخوچ هبط ضغطها

_ خو انت كل شي و ذبيته براسنه
ندار عليه مبتسم .... غير عزاز و امون عليكم

وصلني للبيت و راح مر اسبوع التحق و داومت
هالاسبوع محاولة اتجاهل عقاب مجبت طاري
هالسالفة الرسيل اخاف متضم هيج سالفة عليه

صهيب لو عصب ما يشوف دربه تجنبت المشاكل
بسكوتي بس ما ضنيت السكوت سچينه و نبتت
بگلبي ...... ما توقعت تلوة توگع من عين التاليهه ......

نهاية الأسبوع رحت يم بنات عمو فراس لان اعرف
ما يسونها و يجن و يعوفن هيلانه بالعطلة فرحتلهم
اريج اجتي وي بسيل و اني وي أزاد أمي بقت بالبيت

گعدنه نسولف و نضحك شوية وگال

أحمد _ شني غدانه
اروى _ دزو من المطعم عيني

تالين _ لا تجلطون الولد اسويلكم الغدة اني
أحمد _ سوي بعد اخيچ

تالين _ شنو تريدون
..... كيفج

تالين _ قيسي تحبونها ؟
..... لالااااا

تالين _ عابت الا اسوي اني أحبه
ميس _ ذاك المطبخ و سوي

أزاد _ اني اكل وياج هالطرشانه
تالين _ مو متحبه

أزاد _ اواسيج شسوي
بارق _ هو هم اكله حشه نعمه الله
تالين _ دضلووو معليه بيكم

دخلت للمطبخ و هم يضحكون عليه صدگ
سويتها اجتي اروى طلعتلي كل شي احتاجة
ضجت كل شوية وجاي واحد ضاحك عليه

و معيب عليها انتبهت التلفوني دگ الاسم
جلمد عاد طلعت لبره اخاف ما ارد عليه
نرجع نتعارك رديت عليه .....

تالين _ الووو
صهيب _ عاش هالصوت المشتاقلة

_ شلونك
_ ولك مشتاقتلك شلوني يعني مشتاقة روحي .....

اسمع صوت اغنيه يمهه
_ لازم سهرت بهالاغنيه مو
_ يمكن وين انتي شهالهوسه اليمچ

_ يم بنات عمو فراس أنه
_ مو چن تبالغين بگد متروحين الهم

_ لا ابد ما ابالغ و بعدين اگلك ليش
_ روحي المكان هادئ حتى اگدر احجي

_ لا لازم ارجع للمطبخ
ليش

_ اليوم الغدة عليه هههههه سويت الروحي قيسي
و محد يحبها غيري
_ حتى اني احبها بس احبك اكثر يرداد روحيي

_ هههههه
_ هيج و تصيرين قيسي و محد يرغبج غيري

_ ها رجعنه على الغزل المعوق
يحح يمكن احترگت الاكله يلا باي

سديته و رجعت للمطبخ صحت اروى تكمله عني
و رجعت گعدت يمهم اباوع هيلانه متغيرة كأنما
غير وحدة قربت منها حاولت إفهم شبيها تگول

ماكو شي و عيونها تلمع بدمع مگدرت الضغط
عليها عفتها وگعدت الوضع ورا الغدة بدة يصير
مو طبيعي صحيح هالفترة محد جاب طاري اريج

بس واضح عدم القبول ان كانت هيه او اخوها
للعصر رجعت للبيت

مرن ايام أقل ما يكونن عاديات هالفترة رسيل
بدت تسوي جلسات تنظيف بشرة و هالامور
و اكيد اني وياهه صار أزاد يوصلنا و ياخذنا

لو صهيب اذا موجود اليوم رسيل مجاية
طلعت تمشيت مسافة گعدت انتظر هيلانه
ماكو ما بيتنت بس اريج اشرت الها اجتني ركض

اريج _ هلو تولي مشتاقتلج شهالغيبة
تالين _ ههههههه صايرين ما نتشاوف تعرفين
هالايام يا دوام يا وي رسيل تجهز نيشانها

_ اعرف حقج بس شنسوي يراد نسوي جمعة
_ طبعا و هسه گوليلي بنت عمج الصغيرة وين

_ مرمر هسه يجيبها بسيل و يجون
_ لا هيله

_ مترجع ويانه بعدين مبتعدة كلش عني ضجت
منها هواية
_ لا تحجين هيج أكيد عدها مشكلة حتى اني متحجي
ويايه مثل قبل

_ غير تگول مشكلتها ليش دومها ساكته
_ اندري هاي جيتي گلت اگعد وياهه اقنعها

_ يمكن هي و قسور مزاعلين
_ يااا يمكن يي
مفكرت بيها هاي خلي الباقي عليه راح احجي الاروى

طلعت تلفونها و هي تگول
_ بسيل وصل تجين ؟
_ لا جوجه روحي انتي

راحت و اني رجعت امشي بشارع اكو هواية ناس
موجودة و الجو بي نسمه هوى تخبل بس كل هذا
تغير من بدت سيارة بيضة تمشي قريبه ع الرصيف

عايفة الشارع كله سويت روحي مو مهتمه و مشيت
سريع طلعت تلفوني من الجنطه راسلت صهيب وينك
بس ما استمريت ووگفني صوت عالي يعيط بأاسمي

نداريت شفت السيارة واگفة و عقاب نزل منها

عقاب _ يمعودة شبيج شادرة
تالين _ ها اسفة بس ما چنت اعرف بيك

_ ههههه هسه عرفتي عوفي التوتر
ابتسمت مجامله
_ ولو المكان مو مناسب بس شقررتي بموضوعنه

_ ها شوف
انت هالفترة مخليت مجاي أجي و احجي وياك
_ صحيح ردتج تفكرين اكثر

_ مو هنا المشكلة اني محجوزة أصلا الواحد من اقاربي
_ ما عليج اني احاجي اهلج

_ ميقبلون أصلا أمي رفضت هم
_ شعليه احجي بيچ انه موافقة لو لا

بلعت ريگي اكثر من مره وگلت
لا ..... و نداريت امشي رفعت تلفوني شفت
يتصل رديت بعد ما هدئت نفسي

تالين _ها صهيب
صهيب _ شبيج تركضين بمشيتج اوگفِ
لحضه وصلت يمچ

هو گال هيج لو اخذت طن هوى خفت شافني
عزههه وگفت سيارة مقابيلي ركبت بسرعة

صهيب _ ترجفين و خايفة صاير شي
توترت هواية حسيت يعرف و دايستفسر
تالين _ مم مصاير شي

_ متأكدة
_ يي

_ مو اذا اعرف من ذاتي ما يصير خير تلوة
نترت بي
_ شنووو تهدد انت گتلك مصاير
_ لا واضح

سكت عني ووصلني گدام البيت وراح
حتىما انتظر ادخل لا هاي هيه واضح
شافني شسوي هسه اني دخلت سلمت

وگعدت ضايجه و مخنوگه حيل ، دخلت
الغرفتي ما طلعت بعد ندگ الباب گلت
ادخل أزاد بس الفاچني دخول ايمن .......

ايمن _ تالين

تالين _ ها عيني اخوية

ايمن _اتصلي بمر اذا تريد تسلم لازم تطلع نفسها
من هالسالفة ........

يـتـبـع فـي مـا بـعـد .... 👿♟️🎭

ان شاء الله حبايه بخشمه المايتفاعل 🦦🦦🦦

اريد عيديتي
شوووو محددد عايدني بالواتباد
ازعل ؟؟؟ يعني .....

الي معدها انستا و تلي و مشايفة هالجزء
البسيط من تالين رجعت نشترتها هنا علمودكم

الباقيات الصالحات
سـبحـان الله
الـحـمـد الله
لا الـه الا الله
الله اكـبـر
لاحـول ولا قـوة الا بـالله
اسـتغـفـرالله
سـبـحـان الله و بـحـمـده
سـبـحـان الله الـعـظـيـم
الـلـهـم صـلـي عـلـى مـحـمـد والـ مـحـمـد