رواية حين يستبد أدم الفصل الخامس 5 - بقلم همس ليل

#حين يستبد أدم

همس ليل

البارت الخامس

بعدما امي قطعت حديثي مع بابا....

استغليت فرصة ثاني يوم ...جانت طالعة هية وريم...وسما اختي تقرى لان صف رابع اعدادي

طبعا رغم احنة اخوات...وكلب على كلب..وابد مانختلف على شي...بس اطباعنا وشخصياتنا مختلفة...

ريم مثل ماكلت تهتم بنفسها...يعني اهم شي تحقق الي تريده...بس مو بطرق انانية

اني من النوع الي بكول عنه ابوية ...قيادية...داىما احب القرارات بيدي واوجه الامور مثل ما اريد....

سما ...من النوع الضعيف والمسالم

_شلون الحلو...واحلى كهوة لاحلى اب

نزع نظاراته ونزل الكتاب الجان بيده

_ههههه...هاي الكهوة ماتجي اذا مابراج حجاية

_زعلتني منك...يعني ابد ماسويلك كهوة

_هو منو يذكرني ويسويلي غيرج

كعدت مقابيله...يلا جواد كملي الحجي

_ولج بطليها ...كبرتي لا تظلين تصحيلي باسمي

_غير ما أريد اكبرك...يلا ياحلو كمل

_وين وصلت بالحجي وياج

_لحد ما اخذت بيبتي وعمتي وهجيت بيوم عرس اخوك جاسم

_اي أذكرت....اي رتبنا امورنا بديالى وعمتج تعينت مدرسة...وأجرنا بيت...

وبعد سنة عمتج تقدملها مدرس...وكان لازم انطي خبر لابوية ...

واني هم خف غضبي..صح بقت حركة الظلم مو من بس هالموضوع...لا من هواي مواقف ...

لكن الانسان بهالدنيا يحتاج لاهله وناسه

_ورحت لجدي...وشلون استقبلوك

_رحت وماجنت اتوقع يستقبلوني بالاحضان...

لان اني ابن ريف واعرف شنو معناة الي سويته...

_يعني شنو الي سويته

_ان كان على شردي هينة ...بس الي صاحبها هو الي أزحم الوضع ....طلعت مرة عن شور رجلها....وشردت اختي من خطيبها...

_بس جانت خطوبة مو رسمية وغصب وانتة اخوها ما شردت وحدها

_ابوية انطاهم كلمة...هاي بمثابة خطبة مو الا تلبس حلقة...

عموما...من رحت ...هد ابوية علية...وكال امك اعتبرها اطلكت....واختك لو انولها اذبحها...انتة مو ابني...ونزلتوا راسي بين العربان...

سكت بابا فجأة ...كأنه جان يستعيد ذكريات الماضي...ويعيش الموقف الي صار...من تعابير الي صارت على وجه بينت شكد متأثر بهالموقف

_بابا...وبعدين

_حاولت افهمه واعتذر ...بس ما نطاني مجال...وزاد الطين بلة .....جاسم ادخل وبدة يتجاوز..ويكول ...صرنا حجاية بحلوك الناس من ورة فعلتك...

انتة شردت ليش اخذت حسنة....ليش خليتهم يتهمونة بعرضنا...

وزادت اللغوة...وصلت مرحلة سحب جاسم سلاحه علية...لوما تتدخل باسم وقاسم...

_ليش هالائمة من اخوك

_العتب مو عليه....لا على امه جانت تشحن بيه...وهو شاب وطايش...

ومن عدها طردني ابوية وكال احسبك انتة متت...واختك له غير حساب

_يعني كبرت المشكلة من وره خولة وولدها

_لا بنتي اني هم تصرفي خاطئ...كان المفروض ماعرض امي واختي لهيج موقف واواجه

_بس هو مستبد مايكدر واحد يواجه...ويريد يفرض رأيه

تنهد بعمق...صح ...بس الانسان من يكبر ويعيش التجارب تتكون عنده قناعات اخرى

_زين وعمتي ازوجت نفس الولد...الي هو خالي

_اي من رجعت ...التقيت بيه...وحجيتله كل الصار...وهو تفهم وكال اني شاريها وماشفت مثل اخلاقها...وتزوجوا..والولد اصلا من بغداد...

وقرر يرجع لبغداد...

واحنة هم انتقلنا وياهم....

_زين شلون ازوجت امي...

_هية بقيت بعدها لحد ماصار عمري ٣٠...وامي تعبت وكامت ماتكدر على البيت ...وظلت تقنع بية على الزواج....

وبما اني ما ابالي وحدة...خليت الاختيار لهم...

وحسنة قنعتني على امج لان حماتها...

_هسة عرفنا سبب الخلاف...من رحت قبل كم يوم شصار....

جنت واكفة امشط شعري واني اذكر هالامور.

_وين جنتي مسافرة...

رجعني صوت كرم للواقع...جان مجتف ايديه واكف يم الباب

_بأرض الله الواسعة...

_حلو شعرج...مبين هواي تعتنين بيه

تقدم وكف وراي جنت اشوفه بمراية مال الميز ...

بدة يتلمس شعري بيده....واصابعه تخلل خلال خصلاته...

جنت اترقب تعابير وجهه بالمراية....

كان مبهور بشعري ...

_اصور كلت ما تريد تلمسني...

_وبعدني عند حجايتي....بس اني احب الشعر الطويل...

ادفعت ايده من شعري وابتعدت عن الميز

_لوما شعري معتنية هواي بيه وتعبانة عليه..جانت كصيته

_يعني اتكصي بس لان كتلج عجبني...

هزيت كتفي....مثل ما انتة فرضت علية زواج لاجل كلمة ماعجبتك واستفزت رجولتك

_الامور مو دايما مثل ماتشوفيها بالظاهر....

جان متوجه للكنتور...طلع ملابس له...واخذ منشفته...وطلع

ظليت اباوع ابراه شنو يقصد...خلي انزل احسن..

لان اكيد راح يرجع بطرك المنشفة...

رحت للمطبخ لكيت سعاد تسوي غدة...طبعا موج ابد مالها شغلة ...خطية كله براس هالبنية...

_هلو سعاد ...اساعدج

_تعرفين اطبخين...

_طبعا ...بس اكيد مو مثلج...ليش مصورة ماعرف الطبخ

_يعني انتي بالكلية اكيد ماعندج وكت لهل مسائل

_لا ...امي علمتنا من احنة اصغار التنظيف...والطبخ من كبرنا ....بس صراحة ماحبه هلكد...

_اني حتى كيك اعرف ومعجنات

بديت اثرم زلاطة وياهة....نسولف ونضحك...

دخلت ام كرم...هلا يمة باللمة الحبايب...اي خطية سعاد بلكت بعد منة وهيج اتساعديها بالبيت

اشتغلت سوالف العمة...بس هية ام كرم شبه مالها حجاية بالبيت...نسوان عمامي كلهن هيج...ماعدا مرت عمي قاسم...

من تغدينا ام كرم ظلت تكول اليوم العروسة ساعدت سعاد...

عمي باسم...اي بعد وحدة من البيت صارت...وهية اصلا مو غريبة

ايهاب...اكول اليوم الاكل غير طعم له

سعاد...يعني شلون كل يوم مو طيب

ذرى...ههههه...لا ولج هو مايدري بس الزلاطات اني مسويتها...

ظلنا نشاقة ونضحك...نتبهت للكرم جان يبتسم باستهزاء...وموج كانت تاكل بطريقة عصبية..

جنت اتمنى ينطخ بية حتى اطلع حركتي...

بس هو جان ملتهي عنده حصاد الصبح من الصبح..والظهر يتغدى وينام...والعصر يطلع لليل يلا يجي....

مرت ايام على هالحال...علاقتي بسعاد قوت..والظهر من جان يجي كرم...من اتاكد من كل البيت ناموا...اعوفه بالغرفة وانزل جوة...

خلال هالمدة..شفت موج من ينامون اهلها تطلع

هية مالاحظتني ...لان جنت اشوفها واني انزل تطلع من باب المطبخ...

صفنت وين تروح...ردت الحكها...

بعدين كلت اصلا علاقتي موزينة بيها...

النوب اراقبها...يجوز تروح لبيت واحد من عمامها...

بس ماكدرت اتغاضى...لذلك مرة راقبتها من تطلع...ولحكتها...شفتها اتجهت للحقول مال الدواجن ....

جان الظهر وحارة كلش...وهدوء تام....بس صوت الحمام...

ظليت اباوع باتجاه الي راحت بيه موج...

وحايرة الحكها...لو خاف اتيه....

بس جانت كلش حارة ...كلت خلي ارجع هسة...وحاول مرة ثانية بغير وقت..

دخلت المطبخ واني روحي مفرفحة من الحر...

_وين جنتي بهالظهرية....

فزيت على صوت كرم...خليت ايدي على كلبي

_جفلتني...

_سألتج وين جنتي...

اني تلبكت...ماتوقعته كاعد....

_هيج طلعت اتمشى

_هو احنة متعلمين على الحر مانطلع بهيج وكت ...انتي شطلعج

توجهت للثلاجة اطلع مي...احاول اخذ وقت اكثر

للتفكير بالجواب...طلعت بطل المي وفتحته...واني لاحظه بطرف عيني يتبعني بنظراته

_ماجنت اعرف هيج حارة...

شربت مي...واجيت اطلع من يمه...لزمني واني دامر من ايدي...رفعت عيني له بتساؤل

_ماكو داعي انبهج....

وعاف ايدي وطلع....

صعدت لغرفتي واني افكر شيقصد...وبعدين ظليت افكر بموج وين تروح...

بعد كم يوم....سالت سعاد..

_سعاد شكو بعد حقول الدواجن...

جنت داخلط باللبن....وهية تصب غدة...

_ماكو شي...بعدها البستان...

_زين بشنو يربط البستان

_مافهمت شتقصدين...وليش هالسؤال

_هيج بس اريد اعرف المنطقة

_هو البستان كلش جبير بعده يجي الشارع العام

_ها....

_من خلص غدة تجين للغرفة اسولف وياج...

_اوكي تتدلين

فعلا رحت لغرفتها...وكعدت يمها على الجرباية

_يلا راح تصارحيني

_ههههه...لا بس ردت اسال ...ليش هالبرود بعلاقتج بكرم...اسفة ادخل بينكم...بس الوضع واضح للكل

_عادي...ما حاولت ابين غير هالشي...اصلا اكيد تعرفين شلون صار زواجنا....ليش الاستغراب

_يعني توقعنا بعد الزواج راح تتعودون على بعض

_وليش نتعود...زواج بدايته غلط وكله مصلحة

_اي بس ممكن تحاولون...على الاقل يطلع طرف من الاطراف مو خسران

_متو تقصدين بالاطراف

سكتت ....

_جاوبيني سعاد

_مو هنا تعرفين...من ولادتنا يصير فلان لفلانة...وفرح جانت محجوزة لكرم...وبالمقابل اني محجوزة لاحمد

_ادري بفرح بس انتي ماعرف...زين انتي تحبيه

دنكت ومن ارتباكها بدت تفرك بيديها

_اول مافتحت عيني واني اسمع سعاد لاحمد...وكبرت على هاي الفكرة...وتعلقت بيه حيل...و....

_و...شنو حبيته....

هزت راسها بنعم

_شنو اذا الي يمنع...هو يحبج لو لا

_ماعرف...بس بعد ما كرم ازوج ...اكيد ما راح يفكرون يخطبوني لاحمد

خليت ايدي على ايدها

_حبيبتي...انتي طيبة وحبابة وحلوة...وماقاصرج شي...اذا هو يحبك فاكيد راح يحاول يقنعهم...اما اذا لا فهو الخسران...

عفتها وطلعت واجت بوجهي موج...جان وجها احمر...وعيونها بيها فرحة غريبة...

باوعتلي صفح...ودخلت...سمعت صوت سعاد

_وج مصخمة هم رحتي...والله اذا يعرف كرم الا يذبحج

_هو انتي شعليج...جاوبتها موج

اني كملت طريقي مو من طبعي اسنط...بس بقت ابالي حجاية سعاد...

وين دتروح موج...وليش كرم ممكن يذبحها

بعد يومين جان جمعة...وكل العمام انجمعوا يمنا...

وصارت لمة الولد الشباب بالحديقة وخلو مناقل يشون كباب وتكة...

والبنات بالمطبخ يسون المقبلات والسلطة...

الكبار بالصالة يسولفون....

الغريب فرح ابد مانطخت بية ....صح جانت نظراتها مامريحة لي...بس ماحاولت تذبلي حجاية

او حتى تحجي وياي...

سعاد....ذرى عفية هاج صينية اللحم انطيها لاحمد بالحديقة ديشوي...

اخذتها وطلعت للحديقة جان احمد وسامر وايهاب يشوون ..

وكرم وعلي الظاهر يم عمامي جوة ...

احمد....اي شكو عليكم انتو يجيكم كلشي جاهز

ذرى ...هو شدسوي انتة يدوب تخلي على النار

ايهاب....تستاهل الحجاية...ما انطخيت غير بذرى

سامر....ليش ذرى خط احمر

رفعت عيني اباوع عليه...غمزلي بدون ما ينتبه احد...

اني تفاجات...بس كلت خاف هو هيج طبعه بالشقة...غلست

احمد...شنو بس نخليها على النار...شبعت دخان...تعاي بمكاني وشوفي

ذرى...شو دوخر خلي اشوف...

وكفت احاول اجرب...شفت سامر انسحب باتجاه المطبخ...

ايهاب...شيخلصك من كرم اذا شافك مشغل مرته

احمد....لا عمي بينا حيل للكرم...

اجة تلفون لايهاب وراح على صفحة يجاوب

احمد...تعال ليش رايح هنا جاوب

ذرى....صدك وين رايح سمعنا...

ضحكنا على ايهاب وهو يأشر باصبعه اسكتوا...

جنت احاول اكلب شياش الكباب...

احمد ...ذرى شنو راح اتركين الكلية

تنهدت من سمعت الحجاية

_شكولك...هذا فرض

_ليش فرض...مو حرامات خلصتي سنتين ...وبقى بس سنتين...حاولي تقنعيه لكرم....هو اصلا خريج كلية زراعة...يعني مو ممتخرج حتى مايقبل تكملين...

احمد يحجي واني جاوبه بكلبي...الثقافة مو بالكلية...والمسالة فرض رأي واستبداد...شاتفاهم وياه...

_مأيسة من اقناعه...

_زين حولي اهلية...ولا داومين بس ايام الامتحانات

_شلون ترهم...وشكول من اروح امتحن

_اني اكدر اساعدج...وايام الامتحانات روحي يم اهلج...

فزينا على صوت كرم...احمد ليش ذرى تشوي ...انتو شنو شغلكم...وين باقي الولد

احمد ارتبك حيل...كل واحد راح بجهة

ذرى...اني حبيت اعرف شلون يشون...

جاوبته بتحدي...

باوع علية بغضب...روحي ساعدي البنات احسن..

ماردت اربك احمد اكثر...عفتهم ورحت

اني سويت الجاي.. بعد العشى...طبعا الرجال تعشوا وحد ...والنساء وحد

صبيت...واجى احمد اخذه...خاف سببت لج مشكلة اسف

_لا تشيل هم ماكو شي....انتة ابن عمي هم...

من خلصنا تنظيف عفتهم جوة بعدهم...

وصعدت لغرفتي...غسلت وبدلت دشداشة ...

وكعدت اكلب بموبايلي...جنت متاكدة ماراح يعدي اليوم على خير...

وجان واضح هالشي من فتحت الباب بقوة..

وكف يباوع علية...واني مدنكة على الموبايل اكلب...

بينا الجرباية ...اني كاعدة على الكرسي من الجهة الثانية للجرباية...

وهو واكف من ناحية الباب ...

_اني شكلت سابقا

رفعت راسي له بتساؤل...

_لا تجربين حلمي هواي...حاولي تتجنبين عضبي

_هسة منو جاي يمك

_ذرى لا اخر مرة اكولج....اياج تلعبين لعبة انتي مو كدها...لان انتي الخسرانة بالاول والاخير

وكفت وخليت الموبايل على الميز...

_هواي تهدد....بس احب اكولك...ماكو احد يطلع من معركة خسران وحده

_يعني شنو...

_يعني كل الاطراف لازم تخسر شي ...بس بدرجات...

ومادام اكو حرب...كل الطرق مباحة...

اجى باتجاهي بخفة الفهد...ماحاولت اتحرك من مكاني....

لزمني من اجتافي...شنو كواة العين الي عندج...

قسم برب الكعبة...اخليج تكرهين اليوم الي شفتيني بيه....

جان ايديه تضغط على اجتافي ...حسيت اصابعه تركت طبع عليهن

_هو اصلا اني كارهة هاليوم...ماتحتاج تكرهني بيه اكثر

_خلص انتي كارهته كارهته ...ماراح اخسر شي

ما أستوعبت حجيه...بس من شال ايده ولزم شعري من ورة...وجر راسي باتجاهه...يلا فهمت قصده...

خله شفايفه على شفايفي بقسوة ...حسيته ديعاقبني ابوسته...

خليت ايدي على صدره ادفعه...بس جنت ادفع الحايط ممكن يتزحزح وهو لا...

انكطع نفسي...يلا تركني بدفعة ...

اخذ منشفته وطلع للحمام....

وكفت مقابل المراية اتلمس شفتي الوارمة...

حسيت كلش بالاهانة...

زين كرم عرفت نقطة ضعفك....سهلة منة وهيج

.....وللحكاية تكملة

_