رواية حين يستبد أدم الفصل السادس 6 - بقلم همس ليل

#حين يستبد أدم
همس ليل
البارت السادس
نمت قبل مايرجع...او حاول اتصنع النوم...ماردت اواجه بعد الي سواه...
ماعرف شوكت غفيت....بس حسيت هو هم ما نام
بس طلع الفجر...هو بدل وطلع...
يمكن يوقتها نمت اني...ثاني يوم تاخرت يلا كعدت...
عدلت المخدة برة ظهري...وكعدت بمكاني...
رجعت كالعادة بفكري للاشهر الي سبقت زواجي...
ذكرت من سألت ابوية عن روحته لاهله...علمود زواج ريم...
شفته بوقته سكت وظل صافن...
_بابا...شصار بوقتها...
_والله بنتي ماعرف شنو اكولج...بس من صار السقوط ولسة اني افكر اروح لاهلي..
_ليش بابا
_يابة ماتشوفين هسة لازم كل واحد يتحامى بعشيرته...ولغة العشاير هو السايد...
يعني لا سامح الله... صار شي...غير لنا جبير نلجا له
_بابا...هاي انتة المعلم والمثقف تكول هيج...ليش وين الدولة وين القانون
_هسة تايهة يابنتي...ماتشوفين الوضع ...اكو قانون....بس قانون العشاير سايد اكثر...
_يعني احنة رجعنا ليورة
_ان شاء الله يكون وضع مؤقت...
_اي من رحت شسوو...
_استغربت اتلكوني ورحبوا بيه...لكيت ابوية كبران بالعمر ...وخولة ميتة....حتى جاسم اخوية هم متغير
_الزمن كفيل يغير البشر...ويلين طباعهم...ويجوز حسوا بغلطهم
_اني هم كلت هالشي...او حاولت اقنع نفسي ...
بس بعدين ظهر حقيقة الموضوع
_يعني شنو
_انتي مالحكتي توعين على بيبتج...امي باخر ايامها....كالت الكاع الاصلية ورثها مو ورث ابوية
_ليش مو ولد عم
_اي بس جدي ابو ابوية...جان كلما يعتاز يبيع لاخوه يعني ابو امي...لحد ماخلصها الكاع...
فمعنى هالشي كلها لامي مو لابوية...بالتالي هاي ورثي اني وحسنة...
_اي بس مو تكول جدي كبر الكاع واشترى بعد
_صح....بس الكاع الي اشتراها بالجهة الثانية...
وكاعنا خصبة وقريبة على الشارع العام...وسعر الدونم  ضعف سعر الدونم مال الكيعان الباقية ...وهواي لها مواصفات...وبنتي ترة هية هم مو قليلة
_لعد ليش جدي جان وضعه تعبان...ليش ماستثمر بيها
_وحده وماعنده احد يعينه ...وماعنده فلوس يكري فلح يساعدوه...المهم
_زين بابا...يعني بيبتي من كالت هيج ...مافكرت تروح ادور ورثك
_بوقتها رادت مادخل مشاكل وية ابوية واخوتي...هية هم فقيرة وتخاف عليه...
وشريد اسوي...ماكدر ازرعها ولا اكدر ابيع
_اي كمل...يعني من نشوف ناس بالمسلسلات والافلام تتكاتل على الكاع مانصدك....
_الكاع عزيزة ...من ربج هالشي...
_وبعدين شصار وية ابوك واخوانك..
_تصالحنا وتغديت يمهم...وتعرفت على ولدهم...شباب ماشاء الله...
بس من اجيت كتلهم على خطوبة ريم...
ابوية كال...ليش تنطي بناتك لغربة...
ولد عمهم اولى بيهم
_ها هسة صاروا ولد عمنا...وبعدين خوما غصب
اصلا مانعرفهم...شلون نزوجهم
_لا بنتي مو غصب...بس حسبها مثل اي شاب هسة يتقدم لوحدة مايعرفها...يعني زواج تقليدي ..
عموما...اني رفضت...وكتلهم بناتي مامتعودات علة العيشة هنا...وهنة كليات
كالوا...بناتنا هم كليات...والوضع مو مثل قبل
..ماعدنا بنات يطلعن للزرع او للحلال...
مشغلين فلح همة يسوون الشغل...
_وبعدين...شصار
_والله ماعرف شكولج بابا....ابوية انسان مايتناقش...احيانا ماتفهمين ليش يصر على موضوع معين...
_يعني شنو بابا...مافهمت قصدك
_يعني همة مصممين ياخذوجن لاولادهم
_شنو مصممين...وين جانوا قبل
_هسة بنتي اني شفتيني وافقت...ومستحيل اجبر وحدة منكم على شي
_اذا على الكاع تكدر تاخذها بالقانون
_هاي نموت وما نحصل شي ...استشاريت محامي...لان هية تحت اليد....وصار لهم ٣٠ يزرعوها....وشغلة طويلة عريضة
_بيعها..
_بنتي منو يشتري...الي حولهم يعرفوها هاي لهم من زمان....
وبعدين خوالهم الشوخ محد يتورط....
واذا ابيعها لغريب....يكتلوه ومايخلوه يوصل لها
_يعني شنو....اتركها ...طول عمرنا عايشين بدون هالكاع...
_بابا كاع يقترب سعره فوك ٢٥٠مليون ويجوز اكثر شلون نعوفها...
وافرضي  عفتها....تتوقعين راح يقتنعون..
لازم جدج يسوي الي يريده
_يعني شيسون قابل
_مايخلوجن تزوجن....ينهون عليجن
_ليش احنة  بيا وكت ...العالم وصل للقمر واحنة بعدنا ابن العم ينهي على بنت عمه
جنت احجي بعصبية...
ابوية كام....بابا وصلت الناس او لا هذا مجتمعنا رضينة او رفضنا...
دخلت امي وريم راجعات من السوك...
ام ريم...شكو شبيكم...
ابو ريم....ذرى تحجيلج
عافنا وطلع....
ام ريم...شكو ماما شبيه ابوج
ريم...ذرى عفية حجيتي وياه على الخطوبة
صفنت عليهم ...شنو اكول وشنو احجي...جنت متعصبة ومالي خلك
_خلي ارتاح وبعدين احجيلكم المصيبة وانتو فكروا بحل...
صعدت لغرفتي واني دايخة....معقولة اكو هيج بشر...
المغرب نزلت...ولكيت امي بالمطبخ...
_ماما وين ريم...
_بغرفتها...احجيلي شنو موضوع ابوج
حجيتلها كل الي صار
_لا شنو يعوف الكاع انتي خبلة....فلوس بالملايين نعوفها
_لعد شنو تضحون بينا...
_لا طبعا...لازم اكو حل ...
_ ماعرف والله...بس اكيد اني مازوج مصلحة علمود كاع
ثاني يوم رحت للكلية...ومن رجعت شفت سيارات حديثة اثنين بالباب...احنة مشتمل صغير بيتنا...
لان بس راتب ابوية وامي هم معلمة...بس الحمد لله
دخلت للبيت من باب جانبي للمطبخ لان بالواجهة ..صالة لاستقبال الخطار...
واكو باب جانبي بعده ممر يوصل لمكان مفتوح مسوي مطبخ وكعدة للعائلة....
بعده غرفة نوم امي وابوية...
وفوك غرفتين لنا...
لكيت ماما مخبوصة بالمطبخ...
_السلام عليكم....منو يمنا
_وعليكم السلام....بيت عمج
_بيت منو....عمي ...هاي من شوكت
راح اصعد ابدل...
_ادخلي سلمي
_ما اريد....صعدت واني ادردم...من شوكت عرفونا...هسة صاروا عمامي...
وين جانوا....
انتظرت لحد ماطلعوا...نزلت جوة يم اهلي شفت امي وابوية وريم وسما
_ها مجتمعين بالخير ان شاء الله
ريم رفعت عيونها...جانن حمر
ذرى....هاي شبيج...
سكتت ماجاوبتني....
ذرى ...شكو شبيكم...بابا شبيهم اخوانك
ابو ريم ...اجو يخطبون ريم...
ذرى...صدك تحجون...شنو كل عقلهم...وبعدين الولد الي انطيتوه حجاية
ام ريم...يكولون راح نروح لاهله ننهي عليها...
سكتت... اعرف اهل علي من الجنوب وهم عشاير ...اكيد.مايكدرون يتجاوزن هالتقليد
ذرى ...وتالي شلون يعني ...بابا تنازلهم عن الكاع
ام ذرى...انتي شدحجين...حقنا شنو يتنازل
ذرى...لعد شنو تتنازلون عنا
كام ابوية....بنتي افهمي مو مسالة كاع ... هاي فكرة صارت براس ابوية
ذرى...واحنة شنو لاعبات مثل مايريد يمشينا...عوفلهم الكاع وتخلص المشكلة...
ابو ريم...ماراح يقبل...اذا مايضمن على الاقل اثنين منجن عدهم...
عافنا وراح...
ريم...يعني شلون ...الولد صارله اربع سنوات ينتظرني....شلون تقبلون تهدمون حياتي
ذرى...ماعرف والله
ام ريم....اصبري ماما خلي نشوف
ذرى ...شتشوفين....انتوا تردون الفلوس...ومامستعدين تتنازلون...
ام ريم...ذرى شنو هالحجي
ذرى هذا واقع ...
عفتهم وطلعت للطرمة واني مختنكة...
***************************
وعيت من افكاري على صوت الموبايل...
رفعته شفت ريم اختي تتصل....
_هلو حبي شلونج ذرى
_هلو ريم...
_اكولج حسبي حسابج من تجون على العزومة...تباتين حتى ترحين وياي اكمل جهازي
_ليش شوكت عزمتونا
_ليش ما كالج كرم....بابا خابر كرم مرتين بالمرة الاولى اعتذر لان عنده حصاد...وبالمرة ثانية كال نجي
_يجوز نسى...عموما الله كريم...ربي يسعدج حبي
سديت التلفون...وبداخلي ضجت..بس الشخص الوحيد الخسران اني...
مو حاسدة اختي...لا ابد والله...
بالعكس اتمنى لها الخير والسعادة بس تمنيت
يكون لي نصيب من الراحة....
اشتاقيت لاختي سما...هاي مثل النسمة ودائما تجي تحجيلي عن مشاكلها...احسها مو اختي بنتي
رغم فارق السن بينا فقط اربع سنوات...
تنهدت اخذت برنص وردت ادخل للحمام...
بعد عقوبة البارحة...كرم اليوم مارجع للبيت...
من الصبح طلع وهسة خلصنا عشى وهو ماكو..
بس اكيد على جية...
سبحت واتاخرت شوية متعمدة...
من طلعت وكفت مقابل المراية امشط شعري
على كيفي...اني متأملة...يجي هسة
وفعلا سمعت صوت خطواته على الدرج...
تلبكت بالبداية...وبعدين قويت نفسي
شوي فتحت البرنص من فوك...بطريقة ماتبين مقصودة...
ورجعت امشط....فتح الباب ودخل...
سلم وبطرف عيني شفته باوع علية...
توجه للتعلاكة نزع دشداشته...ردته يحجي ماكو...
_بابا مخابرك
_اي...ليش ممنوع يخابرني
_ماكلت هيج...بس ماكلت لي عازمنا
_ماشايفج حتى اكولج
_شوكت نروح
_من اقرر اني
جوابه نرفزني...ضربت المشط حيل على ميز التواليت...وانداريت ...
وبلفتي انفتح جزء من البرنص...
شفت عينه كمزت باتجاه الفتحة...مرات الصدفة اضبط من التخطيط
_يعني شنو...صار شهر من ازوجنا...شوكت اروح اشوف اهلي
جنت اشوف نظره مركز على صدري...
_ماعندي وكت هسة...
_بس اشتاقيت لاهلي مايصير...
غيرت اسلوبي...وحجيت بهدوء ونعومة...
رفع راسه لوجهي واحس بعينه نظرة متفاجئ
_نروح اول وتالي ...اصبري شوي...
تقربت منه....اشكرك كرم...اعرف ماتقصر...
بس كون من وكت حباب...
وبطارف اصبعي خليته على خده بسرعة...ومشيت من يمه.
مد ايده وسحبني بأتجاهه....
_شصاير...بيج شي
باوعت بعينه....لا شيصير ...
حسيت بنظرته ليونة....
ظل يباوع بعيني وسحبني باتجاهه....
دنك براسه يريد يوصل لشفايفي...
خليت اصبعي على شفايفه...ودفعته بهدوء
_لا ..لا...شنو نسيت وعدك...
نزل ايديه على جانبيه....واخذ منشفته وطلع...
بعد ماباوعلي نظرة قاتلة...
من طلع ضحكت ....بعدك ماشفت شي...راح استوك على نار هادئة...واخليك تكره اليوم الي ازوجتني بيه
بدلت...ورحت لجهتي ونمت...
ثاني يوم من نزلت حتى نبدي يومنا...شفت ام كرم كاعدة ضايجة...
كعدت اتريك...ومن حجت ما تفاجأت بحجيها...
بس مستغربة اخذت وكت طويل يلا بدت ..
تحاجيني بهالموضوع...
_شنو عمة...مايصير هجي...صارلكم شكد مزوجين...مافد يوم نزلت سويتي ريوم لزلمتج...
_عمة هو يطلع من الصبح...واني مامتعودة اكعد من وكت
_تتعلمين...جنت بنية وحد...وهسة مرة مزوجة...خلي عينج على رجلج...مو هجي هاملته
_ان شاء الله
وكالعادة روتين كل يوم من شغل ونسوي اكل...
دخل ايهاب وعمي...
واني عيني على موج...قررت اخلي سعاد تاخذني...يوم للحقول اشوف شكو هناك..
حتى مرة ثانية من الحكها...اعرف ارجع وحدي
ايهاب...وين ذرى ...
ذرى...ها شنو...وياي
ايهاب...ابوية صار ساعة يحجي وياج...وانتي بغير دولة
ذرى...يا ساعة هي كلاوجي...هية كلها ثواني صار من دخلتوا
ايهاب...بوياي...شنو كلاوجي...اليوم اخذ فصل على هاي الحجاية
ذرى....اخذ من نفسك...انتة مو اخوية وابن عمي
ابو كرم...يلا رجعت حجايتك عليك
ظلينا نضحك ونشاقة ...دخل كرم ...سلم..وهو ضايج..صعد فوك..يغير ملابسه
ام كرم...روحي ورة رجلج خاف يحتاج شي
صعدت ...طلع من الحمام ...مغسل ايديه وجه ومبلل شعره...
جان ينشف بوجهه...ومن نزل الخاولي صرت كدامه...رفع حاجبه...
_تحتاج شي
_هاي من شوكت
_عمتي كالت...روحي شوفيه خاف محتاج شي
عافني ودخل للغرفة....مو اكول ...ماتطلع منج
كعدت على الجرباية....وهو وكف يمشط كدام المراية...
خليت ايدي على الجرباية ليورة ورجعت جسمي..وظليت احرك برجلي...
شفته عينه بالمراية عليه...
التف فجاة...اكعدي عدل
هزيت جتفي...ليش شبيها كعدي
_الله مطولج ياروحي...
راح للكنتور اخذ دشداشة ولبسها...
_صبيلنا غدة ...عندي شغل اطلع
عدلت نفسي...وين الدنيا حارة..
_شنو فلمج انتي...
وكف قريب مني ....تبسمت له ...
وكفت مقابيله ...ماكو اي فلم...جنت قريبة كلش
شفت عينه نزله لشفايفي...
قطعت سلسلة افكاره...يلا راح اصب غدة
نزلت وعفته ....
اثناء الغدة بقينا نشاقة اني وايهاب وسعاد...
_كافي شبيكم ...ترة تعبانين وانتو مابطلتوا حجي
الكل تفاجىء من عصبية كرم ...عاف الاكل وكام...
ايهاب...شبي كرم
ابو كرم...بوية عوفة لاخيك تعبان خطية بالشغل...وانتة هم ماتعينه حيل
ام كرم...هو بس بالشغل تعبان...
تحجي وتعوج بحلكها...
بيومها هم مارجع لليل ....من دخل سلم
ذرى...اصبلكم عشى
كرم...اني ما اريد....راح اصعد انام
ام كرم...يمة ما كلت شي على الغدة
كرم...كتلج يمة ما اريد...حجى بنرفزة
مشى...ورد رجع...
_اذكرت باجر معزومين ابيت عمي جواد ...حظروا نفسكم روح بعد الريوك
من خلصت عشى وغسل مواعين واحنة نسولف...صعدت للغرفة...
دخلت ...شفته نايم...بس حسيت بي ماغافي
بس يتصنع النوم....
وكفت مقابل المراية ونزعت الشال...وفتحت شعري...وحركت راسي حتى ينفرد شعري...ورحت للجهة الثاني...
بحيث يكدر هو يشوفني بالمراية ...
نزعت الكلابية.....جنت مااباوع بالمراية ...
بس بطارف عيني اشوفه شلون يباوع على صورتي الي تنعكس بالمراية....طلعت دشداشة قصيرة...ولبستها بس على كيفي...
وتوجهت لجهتي من الفراش....ونمت واني مبتسمة ...
الصبح من كعدنا...جان جمعة...وكرم جان عصبي بشكل...
الكل تسال شبيه...بس اني اعرف ....
تريكنا سوة هالمرة الكل....
كرم...يابة راح اطلع شوي ..من نرجع نطلع لبيت عمي ..
على السريع بدلت وحظرت نفسي...
من فات للغرفة لكاني متحظرة...
_هيج مستعجلة ..
_انت مو كلت الكاكم متحضرين
_اي وانتي شكد تسمعين الكلام...
يلا بس اغسل وابدل....
_اي عفية...هم الطريق طويل وسيطرات
رحنا اني وعمي وعمتي بسيارة كرم...وموج وسعاد بسيارة ايهاب...
طبعا عمي كعد بالصدر واني ورة كرم...جنت اشوفه مرات يباوع بالمراية...
بس نظرته غريبة بين غضب...وشي اخر وياها
وصلنا وبين السلام والغدة...
الزلم كعدو وحد...والنسوان وحد ...بس نجمعنا على الغدة..
من رادو يرجعون...
ابو ريم...عمي كرم...بيها مجال تبقي ذرى
كرم...باوع علية بغضب...ليش عمي اكو شي
ابو ريم...لا والله بوية ...بس اشتاقينا لها
ابو كرم...بوية خليها هالليلة يم اهلها
كرم...ماشي عمي...
من طلعوا صاحني...
ذرى...نعم
كرم...جنتي تدرين مو...بس بسيطة حسابنا بعدين
..تردين فلوس
ذرى...لا اشكرك...
بس هو كان طلع مبلغ من محفظته وانطاني...
رجعت لابوية...وامي كدامهم جانت عادي تتعامل وياي ...من طلعوا رجعت ثكلت علية...
رحت لها...اعرف زعلانة علية...اني اعتذر منج...
بست راسها...شبكتني وكامت تبجي...
اجت ريم ...هم تبجين علية من اجي معزومة..
ذرى...اكيد لان  انتي مايشوفوج الا بعد سنة..
ريم...عود ليش عيني
ذرى...مامصدكة تزوجين الفندي...
بدينا نتكاتل ونشاقة ...
سما جانت ساكتة...
ذرى...شبيج سما...
سما....مابي شي ...
كامت تبجي ...اجيت عليهة جانت كاعدة على القنفة...كعدت يمه...
_اكو احد مضوجج 
_لا بس مشتاقتلج...بس انتي جنت تسمعين لي
_عندج تلفوني...شوكت ماتردين خابريني
بالليل نجمعنا احنة البنات بغرفتنا...
ريم...احجيلنا عن عيالج...
ذرى ...عمي اغلب الوكت ساكت...وعمتي مثل ماشفتوا تظل ساكتة وفجاة تذب قنبلة...
سعاد حبابة كلش...وايهاب كذلك...بس موج ما ارتاح لها
سما...ليش
ذرى...ماعرف احس ضامة شيء
ريم...وباقي عمامنا
ذرى...ماتعرفت عليهم زين...قليل التقي بيهم ...هسة موسم عدهم مال زرع...لذلك مشغولين
ظلينا نسولف لساعة متاخرة...
وثاني يوم طلعنا للسوك...وبقينا نفتر للظهر...
ماهمنا لا حر ولا اي شي...
رجعنا ميتين من التعب والحر...من وكف التاكسي..
شفت سيارة كرم موجودة
ريم...هاي شنو...جاي هسة...اكيد ما كدر على بعدج
اي حيل اشتاق لي...حجيت بكلبي
دخلنا الاغراض للمطبخ...
ورحت للصالة...السلام عليكم
التفت علية كرم بس عينه تجدح نار...
ابو ريم ....هلا بابا...مبين عليكم تعبانين...
ترخص وطلع...
بعد ماسد الباب...طفر كرم من مكانه...وصل يمي ولزمني من زندي
_وين جنت
تفاجات...وماتوقعت هالحركة
_اخ كرم..بالسوك وية ريم...
_شنو ماعندج رجال بكيفج اطلعين واطبين...
بس حسابج من نوصل...
هدني بدفعة...روحي حضري نفسج بسرعة
بابا جلب بيه على الغدة...بس اعتذر بحجة عنده شغلة
بس صعدنا انطلق  بالسيارة بتهور...واني مجلبة بكرسي من الخوف...
وللحكاية تكملة