رواية حين يستبد أدم الفصل الثالث والعشرون 23 - بقلم همس ليل

مساء الخير والعافية.....خلصت حكايتنا...اتمنى استمتعتوا واستفاديتوا منها....وعذرا للتأخير الصار...
بس تعرفون الظروف..وممنونة منك لتعيلقاتكم الحلوة 😘😘😘......تحياتي
#حين يستبد أدم
همس ليل
البارت الثاني والعشرون والاخير
سمعت صوت الموسيقى مال العرس قربت....
وصوت الاطفال من يصيحون
_اجو ...اجو
والطلقات الي شعلت الدنيا....
ايد باردة تمتدد تلزم ايدي وتضغط عليهة....
رفعت عيني لها...شفت عيون سما المدمعة
وبيها الف سؤال....
هزيت راسي اطمنها....قرب صوت الطبل
وعلت الهلاهل لاهل العريس....
ودخلن يهوسن ويدبجن....
شوي ودخل العريس...باوعت عليه...
غاط نيلي...وقميص بيجي...
والرباط ماروني ....وكصة الشعر الحلوة...
اذكرت عرسي ....
كرم اجة بزي عرب...جان ناوي يغثني بوقتها
متصور ماحب هالزي....
وهو مايدري الزي عليه يزيده هيبة...
عيني اجت الشخص الكايد العريس يوصله
لعروسته....
جان نفس الزي لابس....ونفس الهيبة...
عينه اجت بعيني...وبيها بسمة...
وصل ايهاب وكعده يم عروسته...
والتفت عليه...غمزلي ...وطلع..
ظليت جامدة بمكاني....نظراته...وبسمته
جانت تواعدني بشي...
هوسة حولي ...هلاهل ...على دبجة نسوان
طلقات برة...طبل....
بس اني جنت بعالم ثاني....
حسيت على بنت عمتي تندسني...
التفت اشرتلي على سما...
ياااا...نسيتها ...دنكت عليها اريد اعرف شتريد
شاورتني...
سما....ذرى...الله عليج وعدتيني ...مو تعوفيني
تبسمت لها...لا تخافين...جاية وياج
اذكرت البارحة بالحنة...ظلت تتوسل بية...
وتبجي حتة اجي وياها...
بالبداية جان الاتفاق نسويلها حفلة حنة...
وثاني يوم نزفها لبيتها...
بس تفاجأنا بكرم ميقبل....
كال هو بقة بس عرس ايهاب...
لازم يسويله عشى...والناس هم تعتب عليهم
لذلك نفس غرفة ايهاب جوة ...بس اشتروا اثاث غرفة نوم جديدة...كالو بكل الاحوال تفيدهم من يجون يباتون نهاية كل اسبوع...
لبست سما الكب...حتة نطلعها...ولزمت بدلتهة
...ومن طلعت سلمت على بابا وهية ادموعها ادير
جنت ملتهية ووياها...
احاول اصعدها بالسيارة...وحسيت واحد وكف يمي
كرم...ذرى اركبي بسيارة علي...
ماجاوبته...طبعا عمي باسم كاعد بالصدر بسيارة العريس...
والي يسوق كرم...هو راح صعد بالسيارة
ويأشريلي....
رحت اشوف وين سيارة علي...
دخت هوسة وهواي سيارات...شفت الكية مال جماعتنا واكفة...
رحت اصعد بيها ...من وصلت ..حسيت واحد جرني
التفت شفته كرم
كرم...مو كتلج بسيارة علي...
ذرى...وينها
بقى لازم يدي ويجرني وراه لحد ماوصلني سيارة علي...
فتح الباب...صعدت ليورة...سد الباب وراح
جانت ام محمد لكدام كاعدة...
سلمت عليهم...وطول الطريق  جنت بعالم ثاني...
اذكرت من اجة ايهاب للصالون حتة ياخذون صورة
جان كرم وياه...
طلعت سما وصعدتها...وردت اصعد
ايهاب...وين اصعدي كدام اني اكعد يم عروستي
صعدت يم كرم...
كرم..وعليكم السلام
التفت عليه...وانتبهت اني ما سلمت...
لحد ماوصلنا للمصور...هو بقة برة...واني دخلت وياها
من خلصنا ورجعنا للبيت...
انتبهت ابد مابين مهتم ولا باوع علية...
جان مركز بالسياقة...
صحيت على  صوت ام محمد من كالت وصلنا...
ماصار بعدها دوخة....لحد ما دخلنا العروسة لغرفتهة
وزفو العريس...
حسيت هلكت....خلصوا العشى وبلشوا جوبي
جنت نفسي اشوف الجوبي
اغلب النسوان طلعن برة ...يتفرجن بس من بعيد
اني اذكرت اكو شباك مقابل غرفتي ...
يطل على الحديقة مقدم البيت ..
صعدت فتحت شوية البردة...بقيت اتفرج
علي جان على راس الجوبي...
دبكتهم حلوة...مرات جنت لا اردايا...التفت لباب
غرفتي...او الي جانت غرفتي
واني اباوع على الجوبي...
حسيت اكو احد وكف وراي...التفت بجفلة
وبنفس الوقت شهكت...
كرم....اسم الله شبيج...شفتي جني
ذرى...ما توقعتك هنا
كرم...صعدت ابدل دشتداشتي...ندمرت
من ديصبون عشى
انتبهت على دشداشته..جانت بيها لكعة
كرم...شعجب صعدي لهنا
ذرى...ردت اشوف الجوبي...ماشايفة قبل
تقدم باتجاهي...يعني ما حنيتي تشوفين غرفتنا
بالبداية بقيت واكفة بمكاني ...
بس من اقترب اكثر...تراجعت لحد مانطخيت بالحايط
خله ايده يمي على الحايط قريب على وجهي
التفت على مكان ايده...
ردت احجي ...بس حلكي جف...
تقرب اكثر...
كرم...ها ذرى وين لسانج...
قرب وجه مني...اني احس كلبي نسى يدك...
وفجأة رجع يدك سريع
ذرى...كرم وخر دانزل ...مايصير الي دسوي
بس صوتي الطلع ماعرفته...جان بيه بحة غريب
شفته تبسم...
كرم...مو كافي عاد...شلعتي كلبي...
حني شوي...شنو قلب عندج لو صخر
ذرى...انتة قسيته...
كرم...هو قاسي من كاعه...
جانت نظراته تحوم على وجهي ...وتنزل لشفايفي
ودكات كلبي اعلى من صوت الطبل
كرم...لج ورب الكعبة احبج....
فتحت عيني بوسعهم ....
كرم...يعني ليش متمسك بيج تصورين ...
جر ايدي وخلاها على كلبه....
كرم...اسمعي دكاته من تكونين يمي...
ايدي جمدت على صدره...جان من ودي امشيها على صدره الواسع....
رفعت عيني عن ايدي لوجه...شفت عيونه مركزة علية....
ونظراته ذابلة ....تخردلت كلش....
وبلعت ريكي بصعوبة...
بس صوت الطلق الي صعد فجأة صحانة...
ضحك كرم...الظاهر العريس جان حيل مستعجل
خجلت ودنكت واني افهم معنى حجيه...
سمعت صوته من قترب من يم اذني
كرم....يوم لنا
عافني متخردلة بمكاني وراح....
بيومها ماقبلت ابات....بقيت عمتي ورجعت بنفس الكية وية بنات عمتي ...
ظليت طول الليل كاعدة ...ومشاعري مخربطة...
بالمرة السابقة من قررت ارجع خبر لحسام
من رحت...وردت اكوله موافقة ...وكفت الكلمة بحلكي....
خلصت الامتحانات...ومن طلب حسام ردي...
ما رفضت راسا...كتله انطيني مجال...
اتمم زواج سما واتفرغ للموضوع....
جنت ناوية افكر بهدوء...هاي حياة كاملة
مو سهلة...
حايرة بين عقلي وكلبي...
كلبي يريده ويهواه...اذا جذبت على العالم
ما اكدر اجذب على نفسي...
وحجايته من كال احبج...
خربت كل الموازين....
بينما عقلي يكول ...مانتراهم...
الي صار حتة لو الخطا مني هم....
بس مو سهل....كون اوصل لقرار يريحني
الصبح من كعدت لكيت امي كاعدة بالمطبخ تبجي
كعدت يمها....
ذرى...ليش هالبجي....هسة كلها اسبوع وراح تجي يمج
ام ريم...هو احنة نربي ونكبر..حتة يجون ياخذوجن على الجاهز
ذرى...ههههه...هاي انتي معلمة وهيج تحجين...
وبعدين اشو مكابلتج وكاعدة اني...لو مو بعينج
ام ريم...لا يمة...الله يرزقج بابن الحلال
ذرى...مافتهمنا تريدينا نزوج...لو نكعد يمج
ام ريم...اريدجن تنسعدن بحياتجن
سكتت...
ذرى...ماما ممكن اسالج...
ام ريم...كولي
كمت على الطباخ...اريد اسوي جاي...وبنفس الوقت الهي نفسي
ذرى...تريكتي
ام ريم...لا ...بس هو هذا سؤالج
جنت اشعل الطباخ...مترددة شلون ابدي سؤالي
ذرى...ماما جنت تريدين وحدة توافق على الزواج من ولد عمامي...
بس ليش كرم رفضتي ...ليش اضوجين منه
ام ريم...ما اضوج منه....بس
ذرى...بس شنو
ام ريم...ماما تعرفين اغلب الي جانوا يجون من ولد عمج كرم واحمد وعلي....
وبالمستشفى ...كرم جان هواي يجي...صارت هواي مواقف...
شفته من النوع المتمسك برأيه...حتة لو يفرض على الباقين....
وعمتج حسنة كالت خاطب بنت عمه...
وشفت مواقفج وياه...ومن اصر على زواجج
عرفت صارت شغلة عناد...واني اعرفج زين
فجان مبين هالزواج من البداية غلط...
يعني انتو اثنينكم عنيدين...واكيد مسالة عوفته بنت عمه ماراح تعدي بدون مشاكل...
ببنما احمد اكثر مرونة منه....
ذرى...شمدريج باحمد
ام ريم...ابوج كال جاي وحاجي وياه...
سكتت...وفهمت ليش اكرم دائما يبعدني عن احمد
لحد السبعة مال سما ...واني افكر
ومارحت بس ماما وعمتي وبناتها...
واني بقيت يم ابوية....
ابوية احسه مو مثل قبل...
صحته تعبت بعد الجلطة....كام مايركز هالكد

ثاني يوم السبعة رجعت سما وايهاب لبيتهم ورحت
باركت لهم....
وابوية عزمهم...حتة كرم وعمي ومرته...وسعاد وحامد
كرم ابد مارفع نظره علية ...
وحتة من كام غسل...جانت المغاسل مقابيل المطبخ
من خلص والتفت ...شافني راسا دنك راسه...
هالشي نرفزني كلش...وين حجيه عن حبه..
مر شهر وبعد ماحجى وياي ولا كال اي شي...
وحتة ماشفته...
يوم رحت لسما...تغديت يمها...لان جان ايهاب
اصدقائه عازميه....
ذرى...اريد اروح للجامعة...اسوي شهادة التخرج بلكت
احصلي وظيفة
سما...اكولج ذرى..الاستاذ الوياج شصار وياه
ذرى...حسام شبيه
سما....رفضتي...لو شنو
بقيت اكلب الخاشوكة بماعون التمن الكدامي
ذرى...دافكر اوافق...خوش ولد وجاهز من كله...
ومواصفات مناسبة لاي بنية...مو عاد اني مطلقة
سما...زين تسوين...
تفاجأت بجوابها..ورفعت عيني لها
ذرى...شعجب مو جنتي تكولين على كيفج لا تستعجلين
سما...اي ...بس داشوفج ماتقبلين ترجعين لكرم....
وهو هم أيس...وسمعت يريد يخطب...
عبالك واحد وضربني على راسي....
دخت...واريد اجاوبهم...بس الكلمات اختنكت ابلعومي...
سكت وبعد ماكملت...واني ماريد ابين مهتمة
ماسألت....ظليت الوب...كلما اتخيل زفته ...
واتخيل مرته حامل...وراح تجيبله طفل
نار الغيرة تشتعل بداخلي...
شريد...لا اني الي عايفته يشوف حياته...
ولا اني راجعتله....
بقيت اسبوع...حتة نوم بالليل جفاني...
واني اتوقع بأي لحظة راح اسمع خبر خطوبته...
لحد اليوم...سما خابرتني كالت تعاي يمي...
ذرى...ليش ايهاب وين ...
سما...راح لاهله...ماعرف شعدهم ...منجمعين كلهم
ذرى...شعدهم
سما...على الاكثر يخطبون اليوم
من كالت هيج عبالك طعنتني بسجين...
حسيت وجع صار بكلبي....
ذرى....ليش ماتجين انتي
سما...اني يوميا يمكم...هالمرة انتي تعاليلي
رحت واني اجر برجلي جر....
خلص انتهى الموضوع...انسى واسكت احسنلي
بس اذا هو سنتين مانسيت وهو بعيد...
راح انسى من اقترب مني...
من عرفت هو هم يحبني...
كلام كاله...من يكول صدك...
جنت احجي وية نفسي لحد ماوصلت لبيت سما...
جان الباب مفتوح...
دخلت للمطبخ...وجانت الدموع بطارف عيني...
لذلك وكفت على الطباخ....
احاول اشغال نفسي بالموجود من الاكل...
لحد.مااتمالك نفسي....
جنت اكلب بالجدورة...وسمعت صوت وراي
كرم...هيج جوعانة
التفت بارتباك...ومن ارتباكي ومفاجأتي
قبع الجدر بيدي...وكع وصارت وكعته على الجدر...
الي مال حاولت ارجعه بسرعة...
وكع جزء من المرك على ايدي ونجويت...
صحت من الالام...
طفر كرم وجر ايدي جوة المي مال السنك...
هذا صار بثواني اذا مو لحظات....
عيني دمعت من الالام...هو راح للثلاجة وجاب دهن...
وبدة يفرك يدي....
جانت عيني تتأمل ملامحه ...ونظره موجه على ايدي....
كلبي كام يدك سريع...واكو مشاعر ثانية صحت جواي
******
كرم....
التهينا بعرس ايهاب....
وقررت من نخلص ونرتاح اتفرغ لموضوعي
وبالعرس الموقف الي صار وية ذرى...
عرفت منه هية مو تماما محصنة ضدي...
بس يجوز خوف من الي صار...
عزة نفس وكبرياء وياها....
شفت احسن شي اعوفها فترة ما اضغط عليها...
وخليها براحتها...
واي شي ممكن يصير راح اعرف بيه عن طريق ايهاب...
اليوم ايهاب اجانة...وكال ترة ذرى راح توافق على استاذ حسام....
وباجر راح تروح للكلية ترجعله خبر...
اعصابي فارت....وفد شي حسيته صعد بصدري...
كتله هسة ترجع وياي لبغداد...
وطلبت من سما تخابرها تجي....
وقررت اذا جان فعلا قرارها توافق على صخمان
بعد ما امنعها...
لان معناها ماتريدني....
ما اريد ارجع اكرر نفس الخطأ...واجبرها
سمعت ردت الباب من دخلت ...
اشرت لايهاب وسما ...لا تكومون...
ورحت للمطبخ جانت مدنكة على طباخ...
من حاجيتها فزت وكلبت المرك على ايدها
ركضت غسلت ايديها وخليتلها دهن...
واني امسح الدهن على ايدها وكلبي يرف عليها
كرم...شبيج كلما تشوفيني تفزين
ذرى...دائما تطلعلي فجأة...ماكون متوقعة جيتك
رفعت عيني لها....وصارت عيني بعينها
كرم....ذرى....هاي اخر مرة اسألج...
بعدها ماراح اجبرج على شي
جاوبتني بصوت خافت...شنو
كرم...ترجعيلي...
فتحت حلكها تريد تحجي وبعدين رجعت سدته
سحبت ايدها وابتعدت عني...
جنت اتمنى اجرها لحظني ...واشفي صدري من حظنها....
بس صبرت نفسي...اريدها عمر مو مجرد لحظة
ذرى...واذا ماقبلت تعوفني بحالي
كرم...بعد ما تشوفين وجهي
ذرى...شعجب...
كرم...بالبداية اخذتج جبر...وكلت بمرور الوقت راحت تحبيني...
وشفتي الي صار ....
ما اريد اعيد نفس الوضع...هالمرة الخيار بيدج
التفت علية...الخيار بيدي...لو لان لكيت وحدة
صفنت على حجايتها...جان بصوتها رنة غيرة
عجبتني...ولكفت الصار...عرفت لعبة من ايهاب
وسما...
بس عجبني اكمل اللعبة...
كرم...اني رجال...اكيد ماكدر اكمل الحياة بدون
مرة ...وهم اريد خلفة
جنت اباوع لوجها...تغير لونه...
تبسمت بداخلي...اعرف بيها تكابر...
خليها تدلل...تستاهل التعب والدلال
ذرى...خلص لعد اخذ راحتك...اني هم اشوف حياتي
كالتها بنرفزة ...واجت تطلع...
جريتها من ايدها...تلاوت وياي...
جانت عصبية...حاولت تجر نفسها مني...
لويت ايدها ورة ظهرها اريد اثبتها بمكانها...
بقيتها مسافة عني...حتة احافظ على فكري صافي
كرم...يعني شلون تشوفين حياتج
ذرى...مثل ما انتة اتشوف حياتك
كرم....لا تصدكين بيوم اخلي رجال يمس شعراية منج غيري
ذرى....حلال تتزوج وتشوف جهالك...وحرام علية
حجايتها نغزت كلبي....من اصورتها حامل ومن غيري
لويت ايدها اكثر...
صاحت شوي
كرم...أذيتج...هاية شوية لاذى كلبي
اجت عينها بعيني...
ذرى...كرم ليش تحب تأذيني
كرم...لج انتي روحي اكو احد يأذي روحه
ذرى...ليش هيج تسوي...
قربتها علية اكثر...اريدج حلالي...ام جهالي...
ترجعين تنورين البيت
ذرى...والي خطبتها
كرم...مافكرت اصلا اسويها
ذرى...ليش
كرم...لان ماتحلالي مرة غيرج
ذرى...والشك...والغيرة ...
كرم...ما شكيت بيج الا بعد ماشفت التصوير...والغيرة سمة للرجال الشهم...لان بدونها مايصون بيته
ذرى...والعصبية ...والتسرع
كرم...من اعصب اتحمليني...وعرفتج شنو...نتفاهم ماكو تسرع بعد
ذرى...والضرب
كرم...تنكسر ايدي اذا مديتهة
ابتسمت...بديت اخفف ضغطي على ايدها
كرم...وانتي
همست ...شنو
_ماكو ضم علية
هزت راسها لا...اصلا جنت ناوية اكلك
_والعناد
ضحكت ...موبيدي...بس اخففه
خففت اكثر....وتسمعين الكلام...
بس قبل  ماتجاوب...شبكت ايدي بيدها وقربتها لي
بعد ماعندي قدرة تحمل....
بس بلحظتها خلت ايدها على صدري...
_لا كرم كلشي باصوله...
ابتعدت عني ...وعلى وجهها ابتسامة
طلعت وعافتني غركان بيها...
******
ذرى....
ماعرف اذا جان قراري صح لو خطأ....
بس حاولت انساه ماكدرت....
جان بصمته بحياتي قوية....
وهو انطى وعد...وطول عمره يلتزم بوعوده
اليوم جاب مشية من جديد...
ابوية كال بكيفج بس القرار قرارج
وامي كالت اول وتالي حتة لو اعترضت راح تمشين
رأيج...بس هالمرة ماكو خط رجعة
عقدنا من جديد...وكتله ما اريد اي هوسة اخذت كفايتي من الاولى...
نزلني من خلصنا عقد محكمة...
دخل ابوية جوة...وهو طب للطرمة...
كرم...ذرى...راح اروح حظري نفسج باجر اجي اخذج
ذرى...انطيني مجال...شبسرعة
عندي هواي شغلات اريد اشتري ارتب وضعي
كرم...لا ماكو بعد....اي شي تريديه اشتري بعدين ...خلص صبري...
وعافني وراح...بيومها نخبصت شسوي وسما جانت تركض وياي...
وعرفت منها الي صار اتفقت هية وايهاب عليه...
حتة يدفعونه ناخذ قرار نهائي
وثاني يوم ...اجت اكثر من سيارة...
واني لبست فستان بيجي طويل...
وقللت من المكياج..لان اعرفه مايحبه
دخل هو وعمي وعلي ...سلموا على ابوية
وراسا كال يلا ...
صعدت يمه...جانت سيارته بس اني وهو
وطول الطريق...لازم يدي...
لحد ماوصلنا...اتلوكونا طلقات...وطلع قبل يوم مسوي عشة وكعدة لجماعته...
جانت سعاد ونسوان عمامي...وفرح وام محمد وضحى...
كلهن استقبلني ...هالمرة غير شكل النظرات...
ماطولوا راحو...
سعاد كالت تعاي نصعد لغرفتج....
تفاجأت ...مغير اخشاب الغرفة....
سعاد...هالمرة ان شاء الله غير...ربي يهدي سركم...
ويسعدكم...هاي
اشرت على علاكة محطوطة على الجرباية
سعاد...كرم جابها لج لبسيها عود
باستني ونزلت...
فتحتها لكيت بيها سيت ابيض...تلمسته
كله شغل وموديله كلش حلو
اذكرت مالبست بعرسي واحد...واصلا ابد مالبست سيت...
غيرت ملابسي...ولبسته وفتحت شعري وتعطرت...
وعدلت مكياجي واني متوترة كلش...
دخل كرم...واني واكفة يم الشباك...اباوع على الحديقة
التفت عليه من دخل وتبسمت...
شفت فرحة بعينه ...تقرب مني باس كصتي
وايده تتلمس شعري....
كرم...ماطول مثل قبل...
هزيت راسي بلا
كرم...كلش اذيتيني من كصيتيه ...
لزم ايدي وجرني للكوميدي الي بصف الجرباية
فتح المجر...
باوعت بالمجر...تفاجات بضفيرتي موجودة بجيس
رفعت عيني له...
كرم...جانت سلوتي بعدج...
ماعرف شكوله ...بس دمعت عيني
كرم...ابد ما اريد دمعة بعد اليوم
كعدني على الجرباية...وراح للكنتور جاب علبة
فتحها وطلع منها سوار....
بس تفاجات...من كال ارفعي ثوبج...
ولبسنياه برجلي
كرم...هذا جان هديتج من الهند
جريت راسه لصدري احظنه...
ذرى...كرم احبك...بس لا تأذيني...
حظني حيل....الله احلى كلمة سمعتها...
كوليها مرة ثانية....
ذرى...احبك ابن عمي ...
ماكملت...سكتني بقبلة حسيت بيها كل حبه
كل شوكه....
جانت ايديه تتلمس بجسمي بتوتر...
وشفايفه تبتعد عن شفايفي...
حتة تترك بصمته واثره على كل جزء من جسمي
شوقي له جان مو اقل منه...
بليلتها مانمنا...الا وجه الصبح...بس هالمرة نمت بحظنه
*****
كرم...
جنت اسوق ويمي حامد...شفت لمة جهال من بعيد
وكفت يمهم...
كرم...تفضل لازم من يرجعون من المدرسة...
يتعاركون بالطريق....
نزلت بعدت الجهال...وشفت بنية واكفة تتعارك وية ولد
اقتربت واني اسمعها شلون تحجي وياه
كرم...هابابا يسر شكو
يسر...شوف الفندي ابن ابن عمك...يريد يمشينا على مزاجه...
التفت شفت سيف ابن علي...ها عمو شبيكم..
سيف...عمو داكول لها انتظري الخط لا ترجعين وحدج
يسر...وانتة شعليك
كرم...اش لاتعلين صوتج...هذا ابن عمج من يكلج شي اتسمعيه...
يلا اصعدي بالسيارة...
صعدت وصعد سيف حتة اوصله...
جانت ادردم...وماسكتت ...وحامد يضحك عليها
حامد...من شابه اباه فما ظلم
كرم...بكلبي...كلت لا والله من شابه امه
وصلنا للبيت...وبقت على درمة مالتها...
فاتت للبيت...وذرى واكفة على السنك تغسل مواعين
ذرى...هاي شبيها بنتك الخبلة تدرم وحدها
كرم...هو ماخلص من درمة امها تطلعلي بنتها
ذرى تخوصرتلي...شبيها يمة امها...
تقربت منها ...اكو احلى منها...جريتها علية
وين حسن وطه
ذرى...عد بيبتهم...
كرم...خوش...مو اطلبج...تعاي وفي
ذرى...عفية طلب هية سنتين ...وصار ثمن سنوات...اسدد
كرم...شفايفي تمشي على خدها واذنها....سنتين ونص...ولاتنسين المفروض اسدين الضعف
******
ذرى....
المشاكل الي صارت بداية زواجنا...
عرفتنا معدن كل واحد....
اختاريت ارجع لكرم ....وبداخلي خوفة
لا اكون غلطانة بقراري...
بس مرت ثمن سنوات ما خلاني لحظة اتندم على رجعتي....
صح تصير مشاكل.. بس عاديةماتخلة منها الحياة
الزواج تفاهم...ثقة..احترام..والحياة حتة تمشي لازم
اكو تنازل من كل الاطراف....
موج...ماتجي الا من اروح لاهلي...
سما وايهاب استقروا  ابيت اهلي لان ماكو احد يمهم
ريم استقرت هية وزوجها برة...
والحمد لله تعلمنا من اخطائنا.....
انتهت الحكاية