رواية حين يستبد أدم الفصل الثاني والعشرون 22 - بقلم همس ليل

يسعد.مساؤكم بالخير والعافية....موعدكم الاثنين بالليل مع الجزء الاخير من قصتنا....
ارجو ان تعذروني...باجر السبعة ومشغولة ماكدر اكتب....
#حين يستبد أدم
همس ليل
البارت الواحد والعشرين
ذرى...
بيوم مهر سما...وبعد موقف كرم...
ماكدرت انام....مابجيت بكد مابجيت من عرفت كرم لسة...
بعدها بكم يوم اجة دكتور حسام بعد المحاضرة
حسام...ذرى ممكن احجي وياج
ذرى...تفضل استاذ
حسام...لا مو مال وكفة...خلي نكعد بالكافتريا
رحنا هناك...وجاب عصير واجة كعد كبالي
حسام...ذرى...اني عمري ٣٧...ماسبق لي الزواج...
عندي اخين...والدتي عايشة بس والدي متوفي
وضعي المادي زين
ذرى...الله يزيدك...استاذ بس مافهمت شنو علاقتي بالموضوع
حسام...اني اريد اتقدملج
انصدمت وبقيت اباوع بوجهه...
ذرى...صراحة كلش فاجأتني
حسام...اخذي وقتج وفكري
ذرى...هية مو مسألة افكر لو لا...
بس ترة استاذ اني مطلقة....
حسام...اعرف هالشي...ومايهمني لان موعيب...يجوز
ماتوفقت بزواجج الاول ...
ذرى...فهمتني غلط...اني ماكلت عيب...
بس هواي ناس ماتتقبل هالشي
حسام...مو كتلج مايهمني...اني شفت اخلاقج...
وراقبت تصرفاتج...وصراحة عجبتني كلش شخصيتج...
ذرى...شوف استاذ حسام...
اني ما طولت بزواجي... وصراحة ماعندي استعداد حاليا اكرر التجربة
حسام...مو تشوفين نفسج مستعجلة بالاجابة...
فكري ورجعيلي جواب
ذرى...مو كتلك هية مو مسألة تفكير...
انس متأخذة قراري
حسام...يعني شنو....ماراح تزوجين ابد
ذرى...حاليا هذا الموضوع مو ابالي ...بس مستقبلا
ما اعرف...
حسام...ما راح اعتبر اجابتج نهائية....
راح انتظر بلكت تغييرين رأيج
ذرى...هاي مسألة عايدة لك...
من رخصتك....
عفته ومشيت للبارك...
واني افكر بطلبه....خوش شاب وجاهز من كله
شانتظر ...يجوز اكدر بيه انسى الصار...
والتهي بعائلة واطفال...
*****
كرم....
خابرني صديقي كال اريد التقي بيك...
ومن شفته...نصدمت من طلبه...
جان يريد يعرف شنو ظروف زواج وطلاك ذرى
من سألته ليش...
كال اخوية الاستاذ يريد يتقدملها...
حجايته شعلت النار بصدري...
حتة ماكدرت اجاوبه...طلعت منه....
واني اغلي...رجعت للبيت وراسا لغرفتي
ساعة اكول...ظلمتها خليها تروح بفالهة
ومن اتخيلها بحظن غيري...
ترجع تشب النار بصدري
وارجع اكول لنفسي...هية ماتريدني...
ليش انزل نفسي لها....
اذا رايدته الله وياهة
وساعة اكول ...ابد ماتصير لغيري...
من احس ماكو امل بعد....
لحد ماصبح الصبح....
بدلت وطلعت لكليتها...وصلت وية نزلتهة من الخط
طبكت يمها....
هية بس شافتني تفاجأت...
كرم...اصعدي اريد احجي وياج
ذرى...عندي محاضرات...
كرم...مو مشكلة اذا عفتي محاضرة...اصعدي
ذرى...روح كرم ماكو شي بينا...
مشت وعافتني...نزلت من السيارة...
واعصابي تفور...وجريتها من ايدها
كرم...دحجي وياج...اصعدي
هية نحرجت...شبيك كرم منة الطلاب
شوي اجو اثنين سالوها اكو شي
جاوبتهم لا ماكو..ابن عمي
من راحوا ...التفت علية
ذرى....يعجبك هالفضايح
كرم...انتي سويتيها...لو صاعدة من الاول
يلا امشي...
صعدت....سقت بسرعة
ذرى...ممكن اعرف شنو الموضوع...وليش هالسرعة
خففت واني اذكر هية تخاف من السرعة العالية
كرم....شنو موضوع حسام
ذرى...شمعرفك بيه
جنت اسوق ونظري على الطريق
كرم...اخو صديقي
التفت اباوع عليه...هسة فهمت منو وصى علية
ماعرف ليش كلبي حيل رف عليه...
ظليت اتأمله وهو يسوق بس بحركة...
جانت ايديه تضغط على الستيرن..
تحسيه يريد يضرب احد....
ذرى...كرم انت شتريد بالضبط....
احنة مانتوالمن....ابدي حياتك وية غيري
كلت الحجاية وكلبي نغزني....
كرم...ما اخذنا فرصة حتة نشوف نتوالم لو لا
كل الظروف جانت ضدنا
ذرى.....وهسة الظروف مو ضدنا....
عموما صار سنتين من تفاركنة ....
وعايشين ومستمرين بالحياة
كرم...ردت اكول لها...اني ماعايش بدونج
حياتي مالها معنى.....
كرم...حجاية وحدة تسمعيها....زواج ماكو
ذرى....شنو هية بكيفك....
كرم...اي بكيفي
ذرى...اعصابي فارت من ودي اضربه بشي
هسة خلصت حجياتك رجعني للجامعة...
رجعتها...وكل ماذكر راح تشوفه هالصخام...
اعصابي تحترك....
بالطريق حسيت راسي راح ايطك...
اذكرت ما اخذت حباية الضغط...
بقيت ادور صيدليات حتة اشتري الحب
******
ذرى....
شكد ما تفاجأت بجية كرم....ونحرجت من جرني كدامهم....
وبنفس الوقت بداخلي شي فرح...
خاصة من عرفت هو موصي علية....
اني ما اكدر انكر حبيته...وبعدني ما نسيته
اجذب اذا كلت غير هالشي....
بس اكو خوفة بكلبي....
هواي جرحني وشك بية....
المشكلة...عمري مانعجبت برجل...
لحد مادخلت كلية واحس الي حولي...
شباب طايشة....
من زوجت كرم...شفته شلون شخصية
وهيبة...والكل تعتمد عليه..
وصاحب قرار....بس ليش من يجي يمي
قرارته كلها تصير خاطئة....
جنت كاعدة على مصطبة بحديقة القسم...
ماحظرت اي محاضرة....
ساعة يمتلي المكان بالطلاب بالريست...
وساعة يفرغ....
واني بغير عالم....
من تعرفت على بيت عمي ولغاية الان
مشكلة تاخذني ومشكلة ترجعني
رجعت للبيت واني دايخة....
شفت ايهاب يمنا ...جان مأجر بيت
قريب على اهلي....ويريد يبلش يصبغ
صعدت لغرفتي واني دايخة....
لليل ورغم نزلت نظفت وسويت عشى بس
جنت بعالم ثاني....
رجعت صعدت فتحت كتبي...
بس ماجنت اشوف الكلمات....
اندك الباب....ودخلت سما
تبسمت لها كعدت على الجرباية...
انداريت عليها...
ذرى...راح تبلشون جهزون بيتكم
سما...اي ...بس يخلص ايهاب صبغ
ذرى...الله يتمملكم بخير...اشو ضايجة
سما...لا بس
ذرى...بس شنو
سما....ذرى من خطوبتي لسة انتي مهمومة...
خاف احنة السبب...
ذرى...لا حبيبتي...
سما ...لعد شنو ...اني مو صغيرة..احجيلي
مو اختج...خلينا قريبيبن من بعض
اذكرت من موج شكت من سعاد كالت ماجانت ابد قريبة مني....
كمت وكعدت يمها على الجرباية....
ذرى..حبي اجاني استاذ بالجامعة يريد يخطب
سما...وكرم
جانت حجايتها عفوية وسريعة كأنما ماسيطرت عليها....
ذرى....كرم ماضي وانتهى
سما ...ذرى انتي اختي الجبيرة صح....
لا تعتبرين حجيي نصيحة...
بس اني خارح المشكلة ...واشوفها غير ماتشوفيها
تسمحيلي انطيج رأي
ذرى...طبعا حبيبتي كولي
سما...الي صار خطأكم اثنينكم...بديتوا حياتكم بعناد
واثنينكم راس يابس...
وماتتنازلون....بس الزواج مو هيج...
ذرى...بس هو اتهمني...وما سمع مني
سما...مو كتلج اثنينكم غلط...شلون تريدين يثق بيج
ويسمعلج...وانتي على طول معاندة وياه...
وتتعاملين وياه ند بند...
لا تنسين...الرجال العراقي يتربى على انه اعلى
من المرة....
مو عاد هو ترباة عرب....
باوعت على سما...هاي شوكت كبرت....
وحسيت ختي عاقلة كلش...بعد ماخاف عليها
تكدر تتماشى وية ايهاب
سما...ذرى لا تزعلين مني....بس لازم واحد يكولج الحقيقة...
انتي غلطانة بكده واكثر....
وفكري بالصار واحكمي...رجال تجي صور وتصوير
غيره جان سوة اكثر من هالشي
ذرى...يعني شلون اني اعرض نفسي للموت واذب ابني...جان سويتها من البداية
سما...نسيتي جدالكم الاول مو لان هو شك بيج...وبالعكس جان يدور على الي سواها...
ذرى...والصور جانت عادية...وية ابن عمي
سما...وهو محذرج منه...حتة لو صارت غصب
فحقه لان مايعرف
ذرى....جان المفروض يسمع مني
سما...هاي غلطان بيها...بس تاخذه الغيرة
بس ذرى...ليش من دون الكل احمد جان يحذرج منه
ذرى صفنت عليها...اكوللها لو لا
ذرى...ماعرف يجوز بينهم سبب
كمت من يمها....وهي هم وكفت....
سما...ذرى...لا تستعجلين بقرارج...
وبعدين تتندمين....صح صار سنتين من صارت المشكلة ...وشكد من اطلكتي ...
سنة ونص يمكن...
هزيت راسي اي
سما....بعده جرحج ما اندمل...اخذي وقتج خيتي
عافتني وطلعت وكلامها يفر براسي....
******
احمد.....
بعد المشكلة الي صارت...
ونكشف كلشي...انقهرت على ذرى
ماتستاهل ...خوش بنية...واصلا محترمة نفسها
ومانطت اي مجال....
زاد اعجابي بيها ...بس بياوجه اروح لها...
واخوية سوو كل هذا...
ليش واني هم مافكيت ياخة....
نعجبت بيها وردتها لي....
بس المفروض من شفتها صارت من نصيب كرم
اعوفها لحالها....
لكن غيرتي من كرم....خلتني اخلك مشاكل بينهم
من بلشت ذرى اداوم بالثالث....
وقريب نهاية السنة...رحت لها....
شفتها جانت كاعدة تقرة يم قسمها....
احمد...السلام عليكم
رفعت راسها ومن شافتني...فتحت عينها
ذرى....احمد...وعليكم السلام
احمد....شلونج ذرى
ذرى....الحمد لله...
احمد....ممكن احجي وياج
هزت راسها...كعدت على المصطبة يمها...
احمد...ماعرف شلون ابدي...وماكو اعتذار يوفيج حقج
ذرى....الموضوع انتهى...
احمد...بالنسبة لي لا...ذرى...
سكتت شوي....اني احبج واتمنى لو ما تاخذيني بذنب سامر...
ومستعد اذا تقبلين بية ...اجي هنا ابغداد اشتري بيت ونستقر...
هية ظلت ساكتة...وتباوع كدامها ....
احمد...ماجاوبتني
ذرى...احمد ...شلون فكرت هيج...شلون رهمتها...
احمد...مالي ذنب بالسواه سامر
ذرى...حتة لو مالك ذنب...جنت زوجة ابن عمك...وجزء من المشكلة هم انتة...
بس الظاهر كرم جان عنده حق...
وكفت تريد تمشي...اوكفي ذرى
احمد...لا تاخذين فكرة غلط...اني خطبتج قبل كرم...
لان جنت اشوفج من ادخلين ...
وسمعت من جانوا يحجون عنج....
يعني مو وانتي على ذمته رتج
التفت علية...حتة وان يكن...كان المفروض من صرت على ذمة ابن عمك ...اطلعني من بالك
احمد...مو بيدي ما كدرت...
ذرى...روح ابن عمي...الله يهديك
عافتني وراحت...بوقتها مدري انقهر منها...مدري انعجب بيها اكثر...
مرت الايام وحسرتها بقت بكلبي....ومرة...
عمي قاسم طلب اوصل ضحى...
لان فاتها الخط....وظلينا طول الطريق نسولف
وبدت تشتكي من غيبة امها...وتتمنى ترجع
ماجنت اكدر اكولها امج غلطانة...
لان اخوية اتعس....
وبعدها تقاربنا اكثر ....وشفتهة خوش ابنية
وبنت عمي...قررت اخطبها...
ما اخذت الي احبها...خلي ازوج والتهي بلكت انسى
وبعد ماطلعت سنة سامر...رحنا وخطبناها...
وصار كم شهر من ازوجنا..طبعا تخرجت هية
كرم....ابد ماحاجاني...ولا حظر الخطبة وبالعرس حظر لخاطر علي...وحتة كدام الناس
ذرى بزواجي دزيتلها مسج...شفت حياتي بنت عمي
انتي هم سامحي وشوفي حياتج...
بس ماجاوبتني ومجنت متوقع دجاوب
وحياتي عادية وية ضحى...مراعيتني ...
واني اقتنعت بنصيبي...
*******
سعاد....
بعد الي صار...حامد اخذ موقف فترة مني...
وكام مايهتم لي مثل قبل...
وطلب مني اروح اعتذر من ذرى...
بس اصلا ما استقبلتني....
ظليت فترة افتقدتها ...جانت مو بس مرت اخوية
لا صديقة مقربة...
هواي ساعدتني...من كطعت حسيت بقيمتها
بعد ولادتي...شوي شوي رجع حامد
بس ما رجع مثل الاول...حسيته اخذ موقف مني
عمتي التهت بابني ...بس ماتركتني بحالي تماما...
مرات من اذكر الصار ابجي ...
اريد احد قريب لي....اشيكله...
من خطب ايهاب سما ...تأملت بلكت ذرى
ترجع....
كرم اخوية ما يستاهل الي جراله...
من اشوفه اموت قهر...احس اكو شي انطفى بيه
بس لا بالنيشان ولا بالكعدة قبلت احجي وياهة
اليوم طلبت من حامد يوديني
حامد...شعجب شذكرج
سعاد...لازم واحد يسوي خطوة...حتة اذا مارجعوا
على الاقل لم عائلتنا
وصلني العصر...وعمي فتحلي الباب...
رحبوا بية...بس هم مانزلت ذرى...
ترخصت منهم وصعدت لغرفتهة...دكيت الباب
كالت تفضلي
من دخلت جانت كاعدة كدام الميز تقرا...
من شافتني بقت جامدة بمكانها...
تقربت عليها...وخليت ابني بحظنهة
سعاد...مصطفى يريد يتعرف على خالته
باوعت على الطفل...وابني هم لوكي مثل ابوه...ظل يسوي حركات ويضحك...دنكت باسته
سعاد...ذرى ادري غلطت بحقج....بس انتي احسن مني
سامحي وانسي.....احنة اهل وكلشي يصير بالعوائل
دنكت بست راسها...
كامت وهية شايلة مصطفى...شبكتني...
كعدنا بعدها نسولف...
ذرى ...شلون عمتج بعدها شادة وياج
سعاد...لا احسن ملتهية وية مصطفى...بس لازم ماخليه بعيد...خوب اذا رحت لاهلي...
وبتت تكلب الدنيا
ذرى...مو عمره سنة وشوية...سويلج واحد.ثاني..حتة تتلهى بيهم
سعاد...حامد هم يريد...مو يشبه كرم
جنت اباوع على مصطفى
ذرى...اي حيل...ثلثين الولد على الخال
ظلينا نسولف...حجيتله على الصار بيوم عرف كرم
سعاد...هسة التمت عليه...منة الي صار وبعدها بمدة جدي توفة...وكرم حيل تأذى عليه...
جان متعلق بيه هواي...اكثر اثنين نقهروا علي وكرم
حتة اكثر من عمامي
موج...بعد الصار...ظلوا مدة ماتطلع برة الغرفة...
وتقدم لها واحد من المنطقة...
زوجوها...ونادرا ماتجي لاهلي....
واصلا كرم ابد بعد ماحاجاها...
ذرى...اول وتالي خربت وراحت بفالها
سعاد....خربت هم على نفسها....زوجها مو شي
وعيال كومة...ومو مثل اهلنا ...النسوان هنا يطلعن
للزرع...
وكراب طول اليوم...وين جانت مدللة ...
مرات تخابرني تشكي...بس حامد مانع اروحلها
بقيت لليل يم بيت عمي ورجعت واني فرحانة
وادعي الله يهديها على كرم
******
ذرى....
التهيت بين صور التخرج وبين السما الي تريدني
بكل صغيرة وجبيرة...
اليوم راحوا اشتروا غرفة النوم...
وطبعا الست ما نظفت مكان الغرفة...
سما كالت لايهاب خلي انظف...وغير مرة نروح نجيبها
كام يحجي...لان مرتب اموره ومايكدر ياخذ اجازة
كتلهم روحوا واني انظف بينما تختارون...
امي راحت وياهم....
كملت الغدة ...ورحت لبيت سما فرق اربع ابيوت عنا...
هو مشتمل طابق واحد مأجرين....
شفته مابي شي بس يرادله غسل ارضية...
وسيراميك المطبخ يراد تنظيف...غسلت السيراميك
وبعدين ذبيت زاهي وفركت ارضية غرفة النوم الكاشي واكع عليه صبغ.....وطلعت على الهول...
جنت اذكر...قبل فترة هم اجة كرم للكلية 
بس ما طول شفته من بعيد التقى بحسام
ماعرفت شراد منه....
ردت اروح لحسام...بس ماعندي هيج حجاية وياه حتة اسأله ...
معقولة راح كاله...واذا كاله شنو يعني...
قابل زوجي...هو طليقي...
شلون ...شوكت اخلص من هالموضوع...
جنت افرك بالكاع...
وكفت اعدل ظهري تعبت....
وسمعت صوت وراي ...انداريت شفت كرم
واكف ومتجي على حافة الباب...
ركضت اريد البس حجابي...
بس جنت حافية...والكاع زاهي ...ازحلكت
وهو جان اسرع مني لزمني من ايدي...
سحبت ايدي منه بقوة...ورجعت ازحلكت
بحركتي السريعة...
هالمرة لزمني من خصري وجرني عليه...
كرم...هيج شوفتي ترعبج...
ذرى...دفعته من صدره...واني كلبي مألف بدكاته
ورحت للغرفة.....لبست حجابي والعباية الاسلامية
من طلعت شفته ماكو...
طلعت برة لكيته واكف بالطرمة صافن...
من حس علية اندار...
كرم...جنت وياهم .....وايهاب بقة وية جماعة الغرفة
حتة يدليهم...
سما وامج رجعتهم للبيت...عبالنا مخلصة انتي تنظيف...
ردت اجاوبه...بس ما طلع صوتي
مشيت من يمه...
كرم...ذرى...عاندي شكد ماتكدرين...بس خلي ابالج
ماتصيري لشخص ثاني...
عفته وطلعت...
من وصلت للبيت...تلكتني امي...
ام ريم...عبالنا مخلصة...خوما ضايقج...
ذرى...لا بس ماكملت
سما ...هسة اروح اكمل
صعدت لغرفتي...واني احس كلبي بعده ما سكنت دكاته
******
كرم....
بعد روحتي لذرى....
ظليت حاير لا تروح تسويها شغلة عناد...
اعرفها راسها يابس...
قررت اروح لصخمان حسام...وفعلا رحت
استقبلني الولد بالترحاب...ومن شفته
وشفت شخصيته....خفت اكثر...
فهمته ذرى تصير زوجتي سابقا...ودنحاول نرجع
الامور
جان جوابه دبلوماسي ...كال ...البنية مانطتني حجاية...
واذا قبلت يعني مالها نية ترجعلك...
بلحظتها تمنيت اكوم اضربه بوكسي...
بس قدرت صراحته...ومن طلعت منه...
شفتها من بعيد.بس ما حجيت وياها...
ضجت كلش....
شنو اظل اتكاتل وية الكل علمودها ....
وهية ما مقدرة....
ماترهم هيج...اذا ماتكون هية هم متمسكة بية
ماينفع الوضع...
اليوم جنة رايحين نشتري غرفة لايهاب...
واصر اجي وياه....
من رجعنا رحت لبيته...
فتحت الباب الخارجي...ومن شفت المي...
عرفت بعدها جوة...
دخلت بهدوء....شفتها...مكبصة بالكاع تفرك بيها...
اتجيت على الباب وظليت اتفرج...
حسيت كلبي رف عليها....
كامت فجأة تتمطى...وتعدل بظهرها...
جمدت بمكاني واني اتابع حركاتها....
طلعت صوت حتة تنتبه..
راسا ارتبكت...ورادت تدخل للغرفة ازحلكت
وبالمرة الثانية من جريتهة من خصرها لحظني...
بوية ...جسمي انتفض ....
لوما دافعتني جان ماهديتها الا وذايك شفايفها
طلعت برة...اريد ابرد اعصابي...
خلص ...ورب الكعبة ماتصير لغيري ...لو كاتل لو مكتول
*****
ذرى ....
اليوم حسام اجاني من نفسه...
حسام...يوم الي كتلج ابن عمج وصى عليج...
ماجنت اعرف هو نفسه طليقج
ذرى...واني هم ما ادري عبالي غير واحد...
حسام...قبل كم يوم جان يمي
ذرى...شفته
حسام...ما سألتي شراد
ذرى...شي يخصكم استاذ
حسام...عموما ذرى...جيته تعني انتي ماموافقة ترجعيله...وهالشي انطاني امل...
وبعده طلبي ...اتمنى تفكرين بيه
عافني وراح...
عرفت جيت كرم مو خالية....
بقيت كم يوم افكر...وبعد ما رحت لبيت سما...
اخذنا صورة التخرج...
بس ما حظرت ولا حفلة...
ماجان عندي خلك لهالشغلات...
سعاد بدت تمر دائما...وتروح وية سما يعدلون بالمشتمل...
اجتني مسج بيوم صورة التخرج...
من فتحتها جانت من كرم...
شدعوة بنطرونج هالكد كصيف...بعد لا تلبسيه
بقيت اقرأ المسج...
شلون بلة...ما راح يفك ياخة عني
ثاني يوم...اجاني حسام
حسام...ذرى بعد اسبوع الامتحانات...
اتمنة بعدها ترجعيلي خبر...
رجعت للبيت ...واني اوازن المسألة ابالي...
وظليت طول اليوم افكر...
واحسب مواصفات حسام وايجابياته....
وشفت هواي بيه امور ممتازة ...
واخذت قراري النهائي....
كلت خلص خلي ارجعله خبر باجر
وللحكاية تكملة