رواية حين يزهر الحجر الفصل الأربعون 40 - بقلم Shaqraa

مساء الخير

حين يزهر الحجر
الجزء ٣٥

فزيت من شفت براق رجعت بسرعة وفتت للحمام...
دخلت وقفلت الباب..
بقيت ارجف هذا شجابه هسه اني ناقصني ضيم...
احتاريت شلون اطلع اخاف هسه زيوني يبجي...
بقيت الوب جوا..
ورا شوية امي دكت الباب...
يما تاخرتي مهرة وينج...
فتحت الباب ع كيف..
بعده هذا موجود؟
معليج بي طلعي جبتلج عباية لبسيها وعبري..
وكت غروب ولازمة الحمام عايزج تعب...

اخذت العباية لفيت نفسي...
طلعت وكلت السلام عليكم واني مدنكة قبل ليجاوب بسرعة فتت للغرفة...
جان عاطف كاعد يمه...
فتت زيوني نايم شلته لحضني...
اباوعله وعيوني مدمعه..ماعرف شنو مستقبلك يا ماما...
هم مثل حظي تتربى بلا اب ..
انحرمت من ابوي ع وكت والدنيا لطشت بيه...

لشوية فاتت امي جابت صينية بيها ماعون رمان مفلس..
وماعون حلاوة نشا...
لان الدكتورة نصحتني اكثر حلاة حتى يدر اكثر ويتغير بسرعة...
بس عسه واحس بي ورم كلش حجر...
اكلت رمان شوي واكلت حلاوة...
اريد اسال امي شلون عرف شجاع بس مستحية ...
تمددت يم زيوني وغفيت...

حسيت امي دخلت للغرفة بس ماكعدت...
اسمعها تحجي بالفون بس كلام مو مفهوم لان نايمة...
ورا شوية هي كعدتني كالت ابنج يبجي سويله ممه...

كمت سويتلع وانطيته ..امي طلعت شوية ورجعت..
كالت..شجاع خابر وراد يشوف زيوني...
وشوفتهيا بالفديو...
اها ..اي من حقه...
حجيتها وسكتت...
زين راح هذا لو بعده؟
لا بعده راحوللاستقبال هو واخوج...
كلت بقلبي هسه يلطش كل يوم وجاي...

بقيت متمددة بس جسمي ثكل...
حرارتي ارتفعت اكثر واكثر...
لزمتني رجفة...
امي بقت تسويلي كمادات وصبا شربتني دوا...
بس اني انتهيت وتفكيري بزيوني تخيلي رح اموت ويبقى يتيم...
بعدين ساءت احوالي...
احس صدري يبزني والم بكل جسمي...
اجه عاطف كال امشي للمستشفى...
لبستني هي وصبا وبقينا زيوني يمها واني عيني عليه بالكوة طلعت...

شافني الطبيب الخفر كال حمى بسبب الحليب المتجمع وورم صدري...
ضربوني ابرة وعلاج ورجعت...
ملهوفة بس اريد اشوف ابني...
لكيته نايم وصبا يمه...كالت مابجه من كعد رضع ورجع نام...

اني شوي جسمي فك ورحت للحمام وبقيت انزل بالحليب...
بس الم يكتل ومنا نفسيتي تعبانة...
اختلط جوا الدوش الماي والدمع والحليب...
الى ان احس ارتاحيت شوية وطلعت....
اخذت علاجي ونمت...
كالت امي وصبا نامي احنا يمه...

كعدت مرتاحة احسن...
تريكت وحاولت اساعدهم بالغدا ماخلوني...
رحت طلعتي فوني وشحنته...
اجتلي المسجات والمكالمات الفائتة صلي...
قريت مسجات شجاع..

مهرتي اني ضايع..

تخيلي واحد ينحرم من امه مرتين هيج حالي بدونج..

اني مسودن واذيتج وماقاصد بس ساعة شيطان..

احلفج بالعشرة البينا فتحي وجاوبي...

عاد بس صورلي زين ماكدر ع فراكة وحگ ربج ...

وبعد هواااية مسجات ماقريتها كبل مسحت ...
شوية وخابرتني رحاب...
بقت تعتذر مني وماكدرت تحجيلي...
كالت ماتدرين بشجاع شمسوي بيوم المشكلة...
شمسوي يعني؟
رايح لبيت مؤيد ومتعارك ويا ...
كايلة مرتك تريد تهجم بيتي وانت جبان وتخاف منك من تسوي المصيبة تسكتلها...
بالكوة مؤيد مسكته ومعتذر منه ...

وكاتل مرته ومخابر اهلها وابوها جاي وحاجيله كلشي...
وماهر اخوها هم هاد عليها من عرف بالسالفة...
كايلة مادري بيها مرتك سالت البنات كالن من الگرايب...
ومعتذر من شجاع بس بعد شجاع عرف بماهر انت عاجبته..
وسائل عنج رايد يخطبج...
متخبل اكثر...

هو شافت بعينه القصة كلها تلفيق بعد شبي اجه بارود ...
ومن سالته ع السجن زاد...
ولج هم محذرين سالفة السجن ماتطلع ابد ..
اي ليش قابل كيفه انسجن...
مادري مهرة ارفد امس هم سالته عود اختاريت وكت هو مرتاح وهادئ...
ماحجه شي بس كال ماصدكنا شجاع ينسى ويتغير ..
تنفتح السيرة من جديد..

استغفر الله غير نعرف شوكت مسجون وليش!
اني احاول اسحبلج كلام واكلج...
صدك الحجي والحجية يريد يجون بس خجلانين...
يكولون بيا عين نروحلهم ومهرة طلعت من بيتنا مضروبة وماحميناها...
لا يمعودة شبيدهم هم ..
هلا بيهم بكل وكت...
اوكي لعد احتمال اجيبهم واجي...
هلا بيكم بكل وقت...

سديته منها وراسلت زهرة حجت وياي شوية...
ورد هم خابرتني وسولفت وياي...
ورا الظهر اجه عاطف وويا براق...
اني جنت بالغرفة سمعن صوته برا...
جابتلي امي الغدا وتغدت يمي وشالته...
ورا شوية كاعدة اشرب جاي...

دك الباب عاطف ودخل...
اي زين كاعدة عندي حجي وياج...
اي تفضل...
اكلج رجلج وين عايش؟وانت شلون تقبلين تعاشرين مجرم؟؟
ها؟
سمعي كلش زين..اذا جان الي ولو مجرد نية ارجعج اله هسه لااا...
لو يجيبلي الشمس بيد والقمر بيد ماترجعيله...
تعرفين شمسوي؟؟؟
مهددبراق ومطلعه من العراق وبهذله...
لعد هذا شك مستهتر وعصابجي...

شوفي وسمعي وحجاية وماثنيها ..
اطلكج منه وتطلعين عدة وانطيج لبراق بلا مهر فاهمة؟؟؟؟؟
اريد اراوي مو بس هو كادر ع العالم ويسوي البراسه...
بس العتب مو عليه عليج...
ورطتينا بهيج جيفة ورحتي خلفتي ..
كمل رزالته وطلع وسد الباب حيل...

بقيت صافنة لعد هذا براق شكد خنيث صدك...
قبل جان خاتل وماله صوت...
هسه طلعله لسان وبقى يحجي...
بكل صلافة يحجي بوحدةمتزوجة...
مايدري بيه اكرهه كره العمى وكرهت الزلم كلهم...
بس خل اتطلك وطززز بالترجع ترتبط من جديد...

امي بعدين اجت يمي وبيدها الفون تحاجي شجاغ...
اخذت زبوني اني نمت وانطيت ظهر..
ماريد اشوفه ولت يشوفني...
كعدت تحجي ويا امي وهو يحاجي زيوني...
باباتي مشتاقلك بعد ابوك..
اروح فدوة لوجهك الحلو ..
يناغيله ويحاجي ورا شويه سلم وكال لامي سلمي ع ام زيوني ...

سدته وكعدت يمي وكعدنا نحجي بسالفة براق...
ابد ماعلقت تهديد شجاع اله...
بس كالت نجم السما اقربله من يلوح اظفرج...
اصلا باسمة شايفتلن مرة وتريد تخطبله...
لا تهتمين لحجي اخوج لان ساعة عصبية...
كتلها ماريد اتزوج بعد لا براق ولا غيره...
سكتت هي ما جادلتني...

مر اسبوع تقريبا وعاطف مايحجي وياي...
شجاع يومية يخابر امي ويشوف زيوني...
وكل يوم يخابرني حتى يمل...
بس ابد ولا اجاوب...
براق بقى يوميه يمنا..
بس مااخلي يلمحني وابقى بالغرفة ماخلي امي تطلع...

الحجي والحجية ورحاب اجو..
اعتذرو عن شجاع واجو يعني مثل وصلة صلح بس عاطف كلهم اني قررت وهي مقررة...
بس امي كلتلهم خلوها يىهم هم اصحاب الشان...
راحو وما ماخذين كلمة من عدنا...

مرت اشهرين وزيوني كبر...
شجاع تخبل عليه من يشوفه بالفون يبقى يمكن نص ساعة بس يسولف ويا ...
بيومها كال لامي اريد احاجي مهرة..
لاول مرة يطلب من امي كدامي...
وطبعا قبلها بكم يوم جان عيد زواجنا...
من كال لامي كلتله اي هسه تحاجيك...
انطتني الفون مافشلتها اخذته...

اول ما باوعتله رجفت ..
درت وجهي بسرعة...
امي طلعت وسدت الباب...
كال شلونج؟
زين محتاج شي؟
محتاجج...
اوكي اذا متريد حتى اسد الخط...
لا لا بس اريد قياس اصبعج شكد؟
ماعرف قياسه ...

مهرتي...
اني مجاوبت...
مهرتي..كل عام وانت حبيبتي..وزوجتي وام بيتي...
من رخصتك...
كوة كتمت بجيتي وسديت الخط...
انقهرت ع هذا الحب الي دارينا بالكوة وحافظنا عليه...
ماصمد حتى سنة؟!
مجنت متوقعه هيجي النهاية ابد..........

مرت يومين ورجع من السفر...
كالت رحاب اجه الظهر من السفر...
وقبل ليجي المغرب دزتلي مسج رح يجيكم...
جنت اني جاي اصلي ..
وبراق موجود بالصالة وي صبا كاعدين...
لحد الان ممصادفته ولا طالعة...
من كالت رحاب رح يجي متت خوف...
اذا تصادمو شجاع وبراق وعاطف الله يستررر بس...

بقيت ادعي وخايفة كون براق يروح لو شجاع ميجي...
ورا شوية واندك الباب...
بعدها اجت امي كالت جيبي ابنج وتعاي رجلج اجه...
كعدو وتفاهمو لا تخلين موقفه ضعيف كدام براق ..
حتى ينكطع امل براق منج...

كمت بسرعة بدلت لزيوني ولبست عباية ع الجتف ولفيت الشال...
امي وياي طلعت وبراق بالصالة...
سلمت ورحت للاستقبال...
عاطف كاعد يم شجاع...
فتت سلمت واني مدنكة وكعدت...
امي ودت زيوني اله...
جعص الطفل جعص من البوس...
وحطه بحضنه وكعد...

بلش الحجي والمشادات بينه وبين عاطف...
طبعا عاطف يتهدد ويحجي بس يم شجاع يتغير...
مو نفس شخصيته وهو مموجود يتحلف...
المهم كال شجاع اني غلطان وهم هم غلطت ونعتبره درس النا...
كله عاطف مالك مرة يمنا..
ومدامك اجيت من باجر احنا بالمحكمة..
ومثل ما طبينا بالحلال نطلع بالحلال...

بس الطلاك ابغض الحلال!حجاها شجاع...
صح بس مو حرام...
بتنا ماذابينها وكافي الاجانا منكم...
كام شجاع كال..
بسيطة باجر نلتقي بالمحكمة ..بس بتكم الكم وابني الي....

للحكاية بقية
بقلم شقراء(قمر كانون)