رواية حين يزهر الحجر الفصل الحادي والأربعون 41 - بقلم Shaqraa

مساء الخير

حين يزهر الحجر
الجزء ٣٦

كله عاطف بعد احسن..
هو كال..جيبي اغراض ابني اخذه وياي ..
بقى يكح امي كلتله اشربلك مية يما...
شرب وكال...
وانت باجر الكاج بالمحكمة وبيت الطاعة ينتظرج...
ماكذب من اكول متت خوف من كال انتظرج بالمحكمة وقرر يطلك..
بس الخوفني اكثر من كال بيت الطاعة...
امي كلتله مو هيج التفاهم ابو زين انت العاقل عود..

حجية ذني شهرين مرن واني اعتذرت وراسلت وخابرت ..
وهي معتبرتني نكرة...
وسالفة طلاك ماطلك لو تنكلب الدنيا..
مرتب وابني واريدهم ...
واذا هي ماتعرف مصلحتها وتريد طلاك اني اعرف مصلحتها اكثر منها ..

عاطف كله انت كلشي براسك تسوي؟؟
ترى سالفة ابن عمي دريت بيها...
واذا ساكتين ترى مو خوف منك...
بس نكول عيب وانت نسيبنا ..
ولو انت ماعرفت العيب وهددته وشردته...

كله شجاع بنبرة شبه عصبية...
العيب نعرفه كلش زين ابو فؤاد...
مو احنا الناكل بلحمنا ترى العرض اغلى من الرگبة...
وابن عمك تحرش بعرضك بنص بيتك ..
شنو السويته بلة هااا؟؟؟؟؟
قاطعته شهرين ورجعت كعدته بنص بيتك...
وهسه جاي تكلي احنا مانعرف العيب؟؟؟
العيب عليه وع كلامه الكاله حتى مايشرفني انطقه...

مرتي وردتها واخذتها..ومحد اله شي عندي..
تعاركنا تذابحنا مصيرنا نرجع..
لهنا وكافي ..ماتجي بالطيب اخذها غصب ..
وهذا اذا يندك بيه يتندم...

ومانكر ولا اخاف..كتله بيوم التندك بيه
اغسلك غسل واعلمك المراجل شلونها..
و ادوس راسك جوا رجلي...
اني جنت اباوع ..من كال هيج بسرعة درت نظري عنه ودمعت..
هو كال اترخص وباجر نتلاكى...

اباوع لعاطف تغيرت ملامحة وحجه بنبرة رضا...
كله استريح يمعود وين باجر ..
عوف المحاكم ع جهة ويصير خير..
لا مالي كعدة ولو حالف ماادوس عتبتكم..
بس بعد للغالي يرخص كل غالي..

امي كلتله عوفهم اليوم..
باجر تعال وتفاهمو..
انت راجع من سفر وتعبان روح ارتاح ونام ..
وباجر تعالي وتفاهمو ثنينكم..
لا انت نردك ولا هي نغصبها ونرجعها كوة..

اني طلعت وبقى زيوني بحضنه...
رجعت للغرفة بس مشفت براق!
يا هذا بس لا شرد من سمع بشجاع اجه...
شكد ضايجة بس هالموقف ضحكني...
واني خايفه يتشاوفون ويتعاركون...
انوب هذا شارد...

ولو حقه هو منو ميخاف من شجاع...
اكيد براق صارت بيه حاله نفسية من الدك الاكله ...
وبقى يخاف حتى من اسم شجاع...
بس اوف شكد مشتاقتله ..
ها مهرة سلامات المن مشتاقة؟
لا لا مو اله ماريده بعد خبيث يريد ياخذني بيت الطاعة...
اعرفه ميصبر هو مو حباً بيه...
شكد كنت اكول مارجع...
بس هسه لا اريد ارجع من شفت براق يحوم وعاطف متقلب كلساع براي...
اهم شي ابني ماتتخربط حياته..
وكلام شجاع صح كلشي كاله...
بس اخاف هسه ياخذه ويا..

بس لا صدك هسه ياخذ زيوني يوومه!!
طفرت بسرعة فتحت الباب..
لاكيته يريد يطلع وامي بيدها زيوني وعاطف وراه واني مثل الراكض وراي اسد..
اجيت راكضة شكد عيب..
امي كالت اسم الله الرحمن شبيج!!
ها ..لا شفت شسمه صوت شسمه صوت سمعت...
هو ابتسم برفعة حاجب اني اخذت زيوني من امي...

دخلت وحطيته بحضني واشمشم بيه..
اووف هذا العطر الطيح حظي...
بس شكد احبه ..ايي احبه احبه..حجيت ونزلت دموعي...
تذكرت قبل من جان ماينام الا اني بحضنه..
ولو تحركت يجرني ويكلي كافي تحوسين جنج دجاجة كركة ع كولة بيبي فليحة...

فززني صوت امي من دخلت..
ها بنيتي مسحت دموعج وبلا قهر لخاطر امج..
توة يلا صفى حليبج ووليدج استقر..
لا تبهذلين حاله بهالمميات التلعب النفس..
وحليب القواطي حتى محنة مابي...

انشالله يما لا ماعندي اهم منه اهم شي هو...
ها وابوه بعدج ماحنيتي عليه؟
ها حجية بس لا خفتي منه من كال بيت الطاعة؟
لا يما ماينخاف منه رجلج زلمة ونعومه...
بس كافي اجه واعتذر واعترف هو غلطان...
هالمرة سويتيله توبة مابعدها نوبة...
راح يبقى تنذكر عنده طول الدهر...
اكيد هو انقهر من طكج قابل يكرهج..
بس بنيتي الرجال فوك راسه ضيم ونفسيته تعبانة...

وهو حلف بعمر ابنه مايعيدها..
وان عادها ماخلي يشوف طرف ثوبج بعد ان جنت عايشة..
وانت جنت ميتة يبرالج الله...
اسم الله ع عليج من عمري لعمرج يالغالية...
الله يسلم عمرج ويسعدج يما ..

هسه شكلتي ترجعين باجر؟
الله يسهل يجي باجر ونتفاهم...
زين جاوبي عليه من يدك ..صارله شكد يخابر عاد تفاهمو تعاتبو...
يكلج عتاب الحبايب ملح يحرك الجرح بس يبري ويطيبه...
الله كريم يما لا تفكرين انت ..
بس صدك هذا براق شنو رايح؟
ههه ولج يما بس سمع بسمامه هنا راح..
هذا نفاوة مو رجال..

اتصل هواي شجاع بس مجاوبت..
اجتني مسجات..
باوعت من رحاب..
فتحت صورتين ..
وحدة دشداشتي ومخدة زيوني ع السرير ..
كاتبة شوفي خطيه مخليهم بفراشه ولج لتصيرين قاسية...

وصورة ثانية صورة ادوية..
دزيتلها...شنو هذا؟
هذا علاج مال التهاب رئة..الظاهر مكثر جكاير واركيلة ..
وصاير عنده التهاب ..
لان ساله ارفد عن الكحة وماحجه..
تالي كله صار عندي التهاب بسيط وانطوني علاج..
يااا ومن سالته امي يكلها فلاونزا قوية؟!
لان من كعد هواي كح...

اي خطية الظاهر مدخن هواية..
اي اعرفه من يضوج يدخن بلا انصاف..
واركيلة وجكاير اكيد يصير التهاب..
اي حقه مهرة خطية صارلكم شهرين عاد ذكري زيناته وياج...
اهم حسناته شنو فنج..شنو؟
جبتي زيوني منه..
اي فديته حبيبي ههه..

ها وبعد وحدة مهمة وقوية..
ههه شنو بعد ؟
خلصج من الم الشهرية...
ههه لج من يكول خلصت اشو حبلت كبل يعني مجربت الشهرية...
ياا صدك اشو مااجت بعد!!هي مو تجي ورا النفاس؟
صدك؟انت شكد وخلصتي؟
اسبوعين وخلصت..
يااا وبعد مااجت؟
لا ماكو..
لج خاف حامل؟

دروحي لا منين ابد شلون؟؟
كون يسمعج شجاع تكولين منين الا يملص راسج ههه...
اي هو يشتري الطلايب مشترى..
لا ولج حللي وتاكدي...
وين احلل واني بين اربع حيطان..
سالي صبا بلكي عدها اختبار..
حرامات عندي بالبيت مالت حملي بزيوني شكد جابلي..
يلا رجعي وحللي ههه...
دولي انت هم..

بقيت افكر لا صدك واطلع حامل!
شلون بلوة لازم محد يعرف ...
يوم ثاني الصبح..
تقريبا ساعة بالعشرة..
اجه شجاع واستقبلته امي..
عاطف مو هنا بالشغل...
اجت كالت طلعي وتفاهمي ويا..

كعدت شوية وهي اخذت زيوني وراحت..
اي ليش ما احرك قلبه ..
كمت طلعت دشداشة صفرةوبيها خطوط سودا ..
فانيلا لطش ع الجسم كلش تطبع..
بيها فتحات بالسيقان ومن فوك سبعة واسعة...
شعري رفعته بقراصه وخليت خصل نازلة...
هالحجي اركض منا ومنا ..
جبت العطر سبحت بي مو رشيت ههه...

بس مكياج مجبت وياي ابد شلون..
طلعت ركض صبا بالمطبخ كالت ها ها خية ع كيفج وتضحك..
تعالي اريد حمرة بسرعة...
اي ركضي للغرفة كلشي يمج..
لا عفية استحي تعالي...
اجت وهي جانت توكل ابنها..
بيدها طاسة سريلاك اخذتها كتلها هناك وكلي...
دخلنا وع كيف خاف الثاني يكعد لان نايم...

اخذت حمرة حمرة وحطيت فوكها مرطب يلمع...
حطيت كحل بعيني ومسكرة...
كالت صبا...
مهرة الرجال ينتحر بيج اليوم ع هالدشداشة...
ركضت للباب كتلها صدك حلوة.؟
خية بلوة مو بس حلوة ههههه...
ضحكت وطلعت...

دكيت الباب وفتت..امي كاعدة تسولف وهو
وزيوني بحضنه جاي يناغيله...
اول مدخلت دار عليه وهو يحاجي امي..
نظراته تحولت وصارت فاترة...
ايي بسيطة بداخلي اكول اني اعرف شغلي وياك....
امي كامت وتباوعلي وتضحك...
كالت تفاهمو..
اي ابقي نتفاهم بوجودج...
لا بيناتكم احسن..
طلعت وطبكت الباب...

اندار عليه وعيونه مليانة شوق...
شلونج مريتي؟
بخيير..حجيتها واني امط الكلمة...
بس اني مو بخير..
انشالله تصير بخير...
اكيد اليوم اصير بخير...حجاها وحط زيوني بصفه وكام...

ها شنو وين..حجيتها واني ارجع ليورا...
تقرب عليه وشبكني صار راسي عصدره رفعته ورجعني بيده...
اني شميت الريحة والوعود والتهديدات ببالي تلاشت...
شميت ريحته حيل واسحب انفاسي...
حسيته بدا يندمج اكثر واعرف شجاع سريع الاستعال...
دفعته حيل وبسرعة اندفع...

هو بقى يلوب بس ماراد يبينلي..
حتى لا اكله مرجعني بسبب هالشي...
كعد قريب مني وبقى يفرك بوجهه...
الماي الكدامه شربه..

كعد وعدل نفسه كال ها ؟شنو توصلتي لقرار؟
انت شنو تريد؟
تنهد كال...
اريد نرجع ونربي ابنا سوا وكافي قلة تفكير ...
اوكي نرجع ونربي ابنا...
بس اني لا تتوقع مسامحتك هسه...
باوعلي بنص عين كال...
لا اني ولا انت مسامحين بعض...
مدامنا بعاد..نرجع سوا وشوية شوية نتراضى...
لا اشو ماخذ دور زعلان بعد ؟!اي ليش لا...حجيتها بداخلي...

اوكي بس شجاع نتفاهم من هسه...
حجيت وعضيت شفتي هو عيونه تركزت اكثر من قبل ..
رجع شعره ليورا كال...
لا تبلعين الحمرة تروح بالحليب وهاي مواد كيمياوية...
مسحيها احسن...
اني هنا لزمتني ضحكة كوة ساكتة...
عاط زيوني وكمت اخذته...
بقيت اهز بي وسكت...
كال خاف جوعان؟
لا شابع قبل شىوية رضع...
اي هو بسرعة يجوع...
لا ليضل بالك...

المهم الاريده منك من هسه وعد رجال متضربني بعد...
سويت نفسي مقهورة...صح اني مقهورة بس زيدت الدراما...
هو كال..استغفر الله ..اكصها ايدي اذا انمدت عليج...
وبقى يكح...
كمت جبتله ماي ورجعت...
انطيته وهو عيونه كصتني كص...
اشو هذا شربه وكال بعد اريد...
رحت جبتله ورجعت انطيته...

شربه وكال اروح للحمام ع ماتجهزين اغراضج ها متفقين؟
اي اوكي بس وعاطف؟
اني اخابره خليها يمي...
بس طلعي كدامي سويلي طريق ...
طلعت وهو راح للحمام...
كال اخلص وانتظرج بالسيارة ..

رجعت للغرفة انطيت زيوني لامي واجمع باغراضي واسولف وياها...
كلتلي اخذيها نصيحة...اذا شفتي تعصب لا تفتحين حلكج يمه...
مدامه يفقد اعصابه يعني يفقد عقله وما ع المجنون حرج يما ما سامعة؟
لا مااحجي شي هو صح محذرني اسكت..
بس بعد صارت..
اي اخذيها درس يما..والصواب ايوجعك يقويك...
الله كريم...ادعيلي يما ...
الله يسهل حياتج ويسعدج بعد روحي....

كملت اغراضي وكتلها كولي لعاطف وحاجي...
هو شجاع كال يخابره...
اي هذا هو لا تحاتين...
اخذت اغراضي طلعتها...
نزل شجاع اخذها..
ودعت امي وصبا..
طبعا تماضر طول هالشهرين شفتها بس ثلث مرات...
من تطلع اشوفها لان عبالك عايشة بغير بيت مو فوك...

طلعنا وهو كل شوية عينه علينه اني وزيوني...
وصلنا للبيت لكيت الحجي والحجية يمهم جعفر يلعب ورحاب بالمطبخ...
سلمت عليهم واخذو زيوني...
رحاب حاضنتتي وبس تبجي..
شجاع كلها يواشج بوية مردتيها مرد...
ههه غير مشتاقتلها...
كال بصوت ناصي..حظوووظ...

واخذ الاغراض صعدها واني بعدها ترخصت ..
كالو خلي زيوني يمنا..
خليته وصعدت للغرفة...
باوعت باب الحمام مسدود...

طلعتلي دشداشة بدلت وكعدت ارتب الملابس من الجنط..
اباوع ع الغرفة بلهفة..
شكد مشتاقتلها صدك لو الف الدنيا كلها مارتاح بس ببيتي..
سبحان الله بيت اهلي عشت كل عمري بي ..
بس هسه احس راحتي هنا....
لحد امس مانيتي ارجع...
بس تغيرت افكاري بثواني...
ولو كلشي مكتوب...

سمعته اذن..طلعت توضيت بالحمام البرا واجيت...
لبست الاحرام جاي اصلي وطلع شجاع من الحمام...
كملت صلاتي..
هو واكف ينظف باذنه ويباوعلي بالمراية...
غلست ولا حجيت شي..
متعودين من نسبح واحد يكول للثاني نعيما...
بس ما كتله...
عباله راجعه وراح اخذه بالاحضان ....

فتت للحمام واني ببالي الاختبار...
عاد صارله اقل من سنة كون بعده فعال...
طلعته وسويته وبقيت انتظر...
اباوعله صارت بي خطوط بالطول وبالعرض..
يا عزا شنو حامل بكروب كامل مو واحد شنو...
اكيد خربان يولي...
طلعت الثاني سويته ووكفت انتظر....

للحكاية بقية
بقلم شقراء(قمر كانون)

طبعا انتو كارثة متت ضحك..اقرا تعليقات اول امس وتعليقات امس قبلها نزلتو ع شجاع والبارحة ع مهرة..دائما بقصصي يوم البطل ينسحل يوم البطلة😂😂😂ماعدكم صاحب