رواية حين يزهر الحجر الفصل الرابع والعشرون 24 - بقلم Shaqraa

مساء الورد
حبايبي اعتذرنت ماكو وهسه اشتركت ع شريحة حتى انشرلكم...
متابعة ممتعة
*********
حين يزهز الحجر
الجزء ٢١

لحظة دخوله صار هدوووء وكالو بالسبيكر..
العريس يهدي اغني هل عندك شك...للعروس...
بدا مقطع هل عندك شك انك اغلى امرأة في الدنيا...
وهو يمشي تجاهي بنظرات فرحانة ومنتصرة...
السعادة الي شفتها بعيونه رجف قلبي
ماجنه رجال وبهذا العمر..
بعيونه فرحة طفل صباح العيد..
لابس ملابسه الجديده وعيديته بيده....
تقدملي يمشي واخواته يطشن ورد..
لحد ما وصلي...
لزم ايديه ثنينهم بايديه...
وصفن بعيوني وكال بصوت عالي...
احبببببج...
وباس كفوف ايديه...
ماعرف الزعل البداخلي تلاشى..
حل محله فرحة ...
واني اشوف فرحته بيه وحركاته فاضحته....
الكل بقى يصفك خلال ماباس كفوف ايدي...
بعدها دارني ولف ذراعه غ خصري...
اخذني للكوشة ويهمس باذني....
هذا الجلي المن مطلعته..حركتي اصلي بت اليهود...

مابينتله مهتمة..لازم اعلمه ع طبعي مثل ميريد اتعلم ع طبعه...
بلشت المراسيم ..
لبسني الذهب ولبسته حلقته...
بعدها كصينا الكيك...
اخذ قطعة كبيرة وخلاها بحلكي..مكدرت افوتها بكبرها..
عضيت شوية وتقرب هو اكلها مني...
ع حركته الكل بقى يصفك ويهلهل...
اقاربهم كلبو الحفلة بالرگص والهلاهل وبنات عمه يصفرن...
اني مستغربة لان منطلع حفلات واعراس...
بس اجواء حلوة ووناسة...
تالي من خلص ونزلونا نركص...
سوو حلقة اخواته وبنات عمه ورحاب واني ويا ...
وبقينا نركص يعني احس اندمجت حيل..
ولا كاني قبل شوي كنت قافلة...
تالي من خلصنا طلع هو واني كعدت اخذ صور وياهم...

صارت ساعة عشرة وطلعنا...
اخذني لبيتنا وبالطريق يحجي ويتغزل..
اني ساكتة مااجاوب...
الى ان وصلنا ..تنهد ونزل حتى يساعدني انزل...
وكفت سيارة حسين ونزلو هو وزهرة..
ساعدتني نزلت وفتتا جوا..
شجاع سلم ع حسين وراح...
امي واصلة قبلنا وررد هم..
حسن كال لزهرة ابقي اليوم...
بعد ماسبحنا وارتاحينا...
تجمعنا نسولف بغرفتي..
ورا شوية اجت صبا يمنا وبقت تسولف...
تقريبا جانت ساعة ١١ ونص بالليل..
دك فون صبا..فتحت خط اباوعلها وجهها ضرب الوان...
وسدته بسرعة...
كامت كالت اني اترخص نعست...
ج
اني هنا الفضول اكلني حشرية مو بيدي...
بس ماكدر قابل اسألها شبيج...
ورا شوية امي كامت تنام وياها ورد..
زهرة بقت يمي بالغرفة...
فتحت الفون مكالمات من شجاع ومسجات...
دزيت مسج وبسرعة خابر....
زهرة كالت حطلع احاجي حسين برا...
اني فتحت خط وهو اول مشافني ابتسم ...
هلا بشريان گلبي..بعدك قافل ياحلو؟
هلو بيك...

اووو ماراحت الطنكورة بعدها...
رجعت راسي ع المخدة وعضيت شفتي...
شوف شوف شلون تتحرش وتالي تكول اني مو راحة...
اخ منج شليتي حالي وريتني ...
بداعتي كافي زعل..
ولج مو جنا ننتظر هاليوم وممصدكين..
هيج تعيش بزعل وكآبة؟؟
بداعتي عوفيلي حصة من شفتج ترى اكلتيها باسنانج كافي...
مهرة ويامن احجي اني؟؟
نعسانة اريد انام...
تنهد وكال..روحي يابة روحي نامي وارتاحي....

سديت الخط منه ومقهورة عليه...
شكد فرحان ويريد يحجيني بس منطيته مجال...
يوم ثاني جمعة عطلة عندي...
بقو اخواتي للعصر وراحو...
صبا تعبانة وشكلها ضايج..
من واكفة اني اغسل استكاين الجاي العصر ورا مراحو البنات...
اجت صبا يمي بالمطبخ..
اكلج مهرة...
ها صبا كولي...
عمتي جانت تسوي تمن بحت حلو واني مشتهيته...
واستحي اكلها تعلمني اخاف تكوم تسويلي ..وخطية اتعبها...
بسيطة اني اعرف هسه اسويلج..
لاا عروس انت اصلا عيب نخليج تشتغلين...
بس علميني واني اسوي...
اوكفي يمي هالمرة وشوفيني من اسويلج والمرة الجاي انت سوي...
اي عفية ولو اتعبج...
تدللين ...

بلشت اشتغل وهي يمي..فاتت تماضر للمطبخ..
ايع شنو هالريحة...
بلا ماادور كتلها...ريحة حليب تماضر شكو؟
اوي صايرة نفسي تلعب من كلشي مادري شبيه...
حجت هيج وطلعت...
انتبهت لصبا قرضت اظافرها باسنانها وتعلس وممحلكة...
ها صبا ع كيفج يمعودة حتاكلين اصبعج...
باوعتلي ونزلت دموعها...
باوعتلها باستغراب..شبيج!!!
ارتجت ع الكاونتر ومسحت وجهها ...
مقهورة مهرة حيل مقهورة...
من شنو شبيج احجي؟؟؟
البارحة من جنت يمكم ودك الفون...
اني بداخلي كلت اي رح اكتل الفضول العندي ...
بس من حجت انقهرت عليها...
اي ؟؟؟
شفت رقم عاطف كلت اجاوبة اكله شوية واجي...
بس من فتحت الخط..نزلت دمعتها وهي تحجي...
سمعت..اصواتت... تماضر وعاطف سوا ...

مسحت دموعها وراحت للسنك غسلت وجهها..
رحت وراها طبطبت ع كتفها..مهما يكون وضعها بس حقها تنقهر ...
اخلي نفسي بمكانها انجلط اموووت ....
هدي نفسج صبا انت سبعة شبيج ؟اصلا عاطف يموت عليج...
دفعتني وركضت للحمام...
رحت وراها..
وكفت تستفرغ وتبجي...
ساعدتها وغسلت وجهها وايديها ...
ع صوتنا اجه عاطف وامي...
شبيها حبيبتي حاجيني اسم الله..حجاها عاطف وهو يسندها وياي فوتناها جوا ...
من فتنا اغمى عليها...
اباوع لعاطف مثل طفل وامه متاذيه كدامه عيونه مدمعة ..
وركض جاب العطر شممها....
واحنا غسلنا وجهها...
فركلها راسها وباسها بكصتها...
كلها امشي اخذج للطبيب ماقبلت....
اخذها لغرفتهم واني رجعت لفرفتي...

تمددت شوي باوعت شجاع مخابر...
غلست مجاوبت...
حتى بالليل من خابر كتله دايخة ومالي خلك احجي...
يوم ثاني داومت...
الكل باركلي من استعلامات وموظفين...
اجت هنادي سلمت عليه كالت..
جنت حاسه استاذ شجاع يحبج..حجتها باتسامة مصطنعة....
كتلها غريب شلون تنتبهين ع غيرج اشو اني يخصني ومانتبهت..!
يلا يمكن لان مو فضولية اني...
جوابي صدمها معرفت شتجاوب....
عابت جنها عصا مطيرجي..
شكد جنت احترمها بس كلش كرهتها...

ورا شوية اجه علوان جاب صحون كيك ووياهم عصير راني...
انطا لحسن واني اجاني...
ست مهرة هسه شلون انطيج باعتبارج موظفة لو باعتبارج العروس...
ابتسمتله..ميهم المهم تنطيني لان جوعانة ههه...
ضحك انطاني ماعون وراح...
اني اكلت ماعوني وحسن يكلي كثرو مناسبات حتى ناكل ...
رحت للحمام اغسل...
طلعت ولكيته واكف بالممر...
باوعلي بحنان وقهرتني نظراته...
اريدج بموضوع..تجين للمكتب لو تحبين نطلع؟؟؟
ماردت بالمكتب حتى لا يستفردني ومااقاومه...
عادي نطلع كيفك...
ماشي لعد جيبي جنطتج واني هسه جاي....

رحت اخذت جنطتي وهو واكف...
اجيته وطلعنا سوا ..
مشينا شوية وكال..شلونج؟حجاها بتنهيدة...
زينة ماشي الحال...
مهرة ليش تتهربين مني؟؟؟
مامتهربة...مو جاي احاجيك...
وبنظرج هذا حجيج حجي؟؟
مهرة انت لابستني...
صارلنا شهر واكثر احنا اغراب...
يعني من اغار عليج تضوجين ليش؟كتلج دخلتج بيها خراب وانت مامهتمة...
وسويتيني متخلف ومنغلق ومعقد وعقلي متحجر....
شجاع انت تعرف سبب زعلي..مو من غيرتك اني..
بالعكس المرة الي متحب رجلها يغار عليها هاي ماتحبه...
بس انت هنتني..
شلون اهينج ولج..كرامتج من كرامتي وقيمتج وقدرج من قيمتي...
معناها اذل نفسي لو اذلج....
بس اني جنت مشتاقلج بوكتها...واعرف اكثر شي يغثج شنو...
واكثر شي احبه اني وشفتها فرصة...
اعاقبج هيجي حتى هو عقاب وهو تعليم ههههه...
وشفتج متربعة بالارض يعني شتردين اسويلج؟اجيبلج صينية كيمر واكلج بيعي...
وهو اني هم جبتلج كيمر ..حجاها وغممزلي وجر خدي حيل وباس اصبعه...

لعد وجرة الاذن ..وعياطك بيه وصياحك وتكلي يلا ولي...
عبالك انساه...
لا يابه شلون تنسي..اصلا كاتبته بدفتر انت امبينة...
لان هاي تاسع مرة تعاتبيني وابررلج...
وطبعا نفس التبرير...
بس هو العناد شلون يصير احمر لو اخضر...
منيلي عناد من صدك تحجي....
لا من جذب يلا ننزل ونكمل حجي جوا....
نزلنا يم مرطبات...
كعدنا واخذ الولد الطلب...
باوعلي وتنهد ...
اااخ ..شليتي حالي..لا اني بنومة لا بلگمة لا براحة...
اليوم ماارجعج اذا ماتفكين وتنسين الزعل...
اي انسى وورا يومين ابن جيرانه بالكماط يصيح اوا اوا..
تجي انت تضربني وتلوي اذني..
وتكلي جاي يباوعلج ويكول اوا معناها عاجبته...
اني حجيت هيج وطكها ضحكة وبقى يكركر...
اجه الولد جاب الطلب وهو كوة يسكت نفسه...
كله عاشت ايدك بس اريد بطل ماي ثاني ..
لان هم جابو ماي وشربناه...
جابله الولد البطل شرب وفرك وجهه...
ويكول اشتعل اصلج ع هالتشبيهات...
دكلي الموطا لا تموع ام لسان..

اكلت واحنا نحجي...كال اخر مرة اعتبريها وان عدتها عاقبيني باليعجبج...
يعني متلوي اذني وتعاملني مثل الكسالى؟
هههههههه لا يابه وروحها للغالية امي...
اذا هيج صدكت...
وهسه عيني ع موطتك خلصت لو انطيني اساعدك...
ام بطن شبسرعة خلصتيها هسه تطك بلاعيمج ..
باوعتله بنص عين..
مو تدري معندي بلاعيم شايلتها...
اوف مدري ليش انسى ..هسه شنو انطيج موطتي.....
درت وجهي عنه ومن نظراته ..بالعافية اشبع اشبع ماريد....
بقى يضحك عليه ويريد يوكلني كوة اخذت شوية...
طلعنا وافترينا شوي وتغدينا ورجعت للبيت...

جانت تقريبا ساعة ١الظهر...
فتحت الباب البرا وفتت...
صوت صياح اسمع...
تقربت واسمع عاطف وتماضر ...
اووف...
فتت جوا وتماضر كاعده بالصالة...كفشتها منفوشة ودشداشتها من الصدر مشكوكة...
شافتني وكامت بسرعة فونها بيدها...
وعاطف بدخلتي فات لغرفته...
استغفر الله هم رجعو تعاركو..
رحت لاي بالغرفة..
لكيتها صابة اكل للجهال توكلهم....
دخلت تماضر للغرفة وجرت جنطتها وكعدت تعبي...
وكل فشورة تذبها ع صبا تخزي ...وتحجي وي روحها وتغلط...
امي كلتلتها كافي جهالج يتعلمون الالفاظ الزفرة منج سكتي عاد...
اني اباوع لامي..وهي باوعتلي باسف وامبينه ضايجة ...
اخذت جنطتها طلعتها ورجعت...
يلا خالة كافي شبعو..اخوي راح يجيلي..
خل يشبعون يمه ومن يجي اخوج اخذيهم...
قابل يطلعون جواعه...
يلا لعد انتظرهم برا...
لبست عبايتها وطلعت....

حاجيت امي..
شكو يما هالمرة شصاير؟
اخ يا بنيتي تماضر ماتعرفينها شرانية وبس تحب الحرشة...
اي بس شنو الجديد...
الجديد صبا حامل..وضغطها كلش هابط...
اخذتها الصبح للمستوصف وحللولها...
ومن سمع عاطف وهو بالدوام طالع ومتسوكلها واجه محمل....
من تلكته صبا كلها تسوكت لحم وفواكه ...
اريد تتغذين عدل انت وابني ماعندي اهم منكم...
جنها تماضر واكفة تتصنت وسمعت..
وهدت عليه شلون ماعدكم غيرهم وهم اهم شي واحنا وين وديتنا...
لو احنا مالنا اهمية وصدك متبري من عدنا وراكض ورا ام الزلم...
وهذ عليها وحجزت بينهم...
وهالتشوفين بعينج كوة هدو...
استغفر الله ياعاطف الله يساعدك ع بلوتك....
يما هو اليتزوج ثنين ياشيطان ويمشيهن بمكره...يا سلطان ويمشيهن بجاهه وفلوسه...
وعاطف مينحسب ع ذول ثنينهم...
اييي عاطف صار مثل بواك الموس...
ان بلعته جرحني وان خليته فضحني...
واحنا نحجي دخلت تماضر جرت الجهال خطية تسحل بيهم وطلعت...
حتى بلا ماتسلم.....
راحت وعاطف من سمع كال فكة خل تولي...

يوم ثاني رحت للدوام ولكيت شجاع ينتظرني بمكتبه...
بس دخلت خابرني كال تعالي اريد احاجيج واطلع...
رحت واول مافتت سحبني لحضنه...
اوييييلي شكد مشتاقلج...
عصرني حيل وباس راسي...
راضية عني يحلوة لو بعدج...
حضنته حي ولفيت ايدي ع صدره...
اي حبيبي اهم شي مينعاد الصار وتستصغرني...
باسني ببين شفتي وخدي...
ماعاش اليستصغرج ...
وخرني من حضنه وكال...
اني راح اطلع هسه طالع لبغداد...
ليش !اشو مادري اني...
اي لان جنت معتمد ع ارفد بس ماكدر...
يعني ضروري حبيبي الا هسه..
طبعا والمفروض طالع...
بس مامنطيج خبر وماكدرت اروح بلا ماشوفج...
رجع حضني حيل..واني استنشق بعطره افيييش شلون عطر يرد الروح...
رفع وجهي وحط شفته ع شفتي حيييل...
تركني وكال..اذا ابقى شوي بعد ماروح لبغداد اخذج واطير للبيت ...
ابتسملي وودعته وطلع...

احس صدري انقبض ونزلت دمعتي لا اردياً...
شكد احبه واحب قربه ...
رجعت لمكتبي وكوة اشتغل بتعب....
صارت ب١ونص...
شغلي مخلص ..طلعت انطي ارفد خبر واطلع...
مالكيته..رحت لوسام ماموجود بغرفته...
طلعت للريسبشن سالتهم...
استاذ ارفد ووسام ماكو؟؟
بقو واحد يباوع بوجه الثاني..
ا..طلعو يمكن عدهم شغل...
شنو صاير شي؟؟؟اشو مو ع بعضكم...
لا لا بس...
اجاهم اتصال مهم وطلعو....

للحكاية بقية
بقلم شقراء(قمر كانون)