مساء السعادة
حين يزهر الحجر
الجزء العشرون
يوومه قريت السمج واني ارجف..
شيخلصني منه هسه اني شوداني...
همزين طلع وياهم جان هسه ماخلصت...
خلص الدوام ورجعت...
فؤاد وثريا بالصالة يلعبون وامي يمهم ...
سلمت عليها وفتت للغرفة بدلت وصليت وطلعت...
لكيتها تريد تصب ماخليتها ..
كعدت واني صبيت النا..
واجو الجهال يمنا...
سالتها عن تماضر وصبا اشو مختفيات...كالت..
تماضر بغرفتي نايمة وصبا يم عاطف بالغرفة...
تماضر حتبقى يم امي بالغرفة..
لحد ماعاطف يسويلها الفوك مشتمل..
رحت لغرفتي تمددت واني اخاف الزم الفون..
اخاف الكى مسج او يخابر يلعب بيه لعب اكيد...
اذن الاذان جاي اصلي المغرب ودك الفون..
خلصت صلاتي وسويته صامت..
اباوع دز مسج..
جاوبي مريتي جاوبي ليش لابدة؟
حسيت نفسي مثل الطالب بالابتدائي وجايب نتيجة راسب ويتهرب من اهله...
دزيتله مسج...
حبيبي اني جاي اسوي عشا بالمطبخ ماكدر اجاوب ..
اخاف نسوان اخوي ينتبهون وتصيرلي مشكلة...
ماشي لعد خلصي وخابريني لان هسه او بعدين نسوان اخوج راح ينامن ..ماشي مرتي؟
عزاا يعني فهمها كذبة..
اي اوكي حبيبي...
خلصت خلاصتي وطلعت للمطبخ...صبا لكيتها تحضر تريد تسوي كبة بتيتة...
وكفت وياها وساعدتها..
ماقبلت بالاول بس امي كلتلها انت عروس بعدج..
كالت لامي ..بعد اني من عدكم مو غريبة ومن اشتغل هذا بيتي...
بقت امي يمنا بالمطبخ وكملنا العشا...
صبينا والكل كعد..
تماضر كعدت بصف عاطف وصبا من جهة الثانية...
هه شكد غريبة..
قبل تماضر ماتكابلنا ع وجبة وجهالها منشوفهم..
هسه ابنها بحضن امي وبتها بحضن عاطف...
خلصنا عشا وتماضر اخذت جهالها وكامت..
عاطف كل لصبا..
صبا اني رايح للغرفة اريد استكان جاي بسرعة..
هي كلتله اي تدلل...
رادت تشيل الاكل..
امي كلتلها لا يما روحي لرجلج اني اشيلهن..
اني ماخليت امي طبعا..
اخذتهم وغسلتهم ورتبت المطبخ وبس ادورلي شي انظفه..
اريد بس اشرد من شجاع...
ورا شوي وطلعت صبا يمي....
ها بعدج ماخلصتي؟
لا مخلصة معندي شي..
شبيج مهرة وجهج مخطوف؟
تعبانة صبا هالايام شغل لود...
الله يساعدج بس احسن من كعدة البيت...
هسه اني جان الشغل مصبرني..
بس اخوج الله يخلي مقبل الا ابطل...
هو عاطف قلبه طيب حاجي مرة ثانية بلكي يقبل...
اي اجرب بس مو هسه حتى ليكول تلح..
هو تعبان بالبناء وماريد اضغط عليه...
باوعتلها عرفت شكد ذكية ..مو مثل تماضر تلح وعاطف توة داخل للبيت تحط بحلكه المشكلة..
هي مكتسبته وتعرف شلون تتعامل ويا...
صفنت كالت..
صدك مهرة تدرين؟
شنو؟
براق يمكن راح يسافر...
يا الله يوفقه خطية...
مدري وين طلعنا بسالفة السفر...
امي تبجي وابوي يحجي عليه...
كله فترة وارجع...
خلو يروح يمكن يرتاح هناك احسن...
تنهدت وكالت...
انشالله يرتاح....
رحت للغرفة ساعة تسعة ونص...
قفلت الباب وتمددت...
لازمة الفون بيدي ومحتارة ..اتصل لو اغلس ع اساس نمت..
بس اعرف شجاع ماتاكل عنده هالسوالف...
خابرت بسرعة جاوب...
مرتجي ع الكرسي وذاب الفانيلة ويدخن اركيلة...
اني ردت عيوني عنه ..
وهو مستمر يسحب نفس...
لا اني سلمت ولا هو نطق اصلاً....
بقيت احك بوجهي وهو يدخن اركيلة...
اخاف احجي...
اخر شي كال..
باوعيلي...اني مادرت..
عله صوته..بااوعيلي...
درت وجهي مثل المجرم واباوع بخوف...
حبيبي مادري موجودين عبالي راحو..حجيتها واختنكت اريد ابجي...
هو كال..وليش هالخوف قابل راح اكلج؟؟
مجرد تتعاقبين ع غلطج ونفض السالفة ...
دنكت وحجيت..لتعاقبني مااقصد تعرفني زين...
اي اعرفج خبلة وتفوتين بنص سبع زلم وحمرتج تلمع...
حبيبي عبالي طلعو...حجيتها بخوف...
ماتفيد عبالي وعبالج...
باجر اني اعرف شلون اخليج تتادبين...
وهسه ولي نامي يلااااااا...زمخ بيه حيل..
لتكطعين الخط..خلي الفون كدامج ونامي يلا غمضي....
فز قلبي من صوته وحتى ماعرف اتصرف تخردلت...
خليت الفون ع جهة وغمضت...
كال رفعي حتى يبين جسمج ووجهج...
رفعته ورجعت غمضت بامر منه...
بقيت متمددة ومغمضة ومااحجي لان ميقبل...
شوي وبقى يرزل بس عبالك اني مو يمه يعني..
بت اليهود جاية وحلكها يلمع وجسمها كله يتمركص..
اني الج الا اادبج...
اني اسمع وارجف..
ورا شوي سمعت صوت حركة يمه...
بس نعست كلش لان من رجعت مانمت...
غفيت ماحسيت بنفسي..
الصبح كعدت هو كاطع الخط ...
رحت للدوام بس قلبي من الخوف يطكطك...
ورا نص ساعة دز عليه ورحت...
فتت واني مدنكة...
هو جان مرتجي ع الميز وايديه بجيوبه...
اني وكفت كال تقربي...
تقربت كال اكثر...اكثرررر...
صرت كدامه كلش...بس مدنكة...
كال عجبج الصار امس؟؟؟
خلص اليوم كله فيصل يحجي بيج ..حجاها بقهر وصوت شبه عالي...
بقيت مادنكة ماحسيت الا لزمني من رقبتي وحط وجهه بوجهي...
ليش ساكته خايفة؟؟؟يحجي بغضب وحواجبه معقودة...
ماكنت اعرف..حجيت بخوف...
دفعني ع الارض صرت يم رجليه...
متعرفين مو؟؟؟؟
اني هسه اعلمج حتى متكولين ماعرف بعد...
وكف كدامي وبقى يرزل واني بالارض...
وكل شوي يضربني بخدي خفيف...
هيج رزالة وضربة خفيفة باطراف اصابعة...
اخر شي رفع راسي وباس شفتي حيييل ودفعني ..يلا هسه ولييي.....
طلعت بسرعة من المكتب للحمام...
بقيت نص ساعة بس كاعدة وابجي....
شكد احتقرت نفسي من تصرفه هذا..
كل مرة بمزاجي ومااقبل بس هالمرة لوا ذراعي وذلني...
بسيطة شجاع يراد احطلك حد...
اني اعلمك شلون تذلني وشلون كسرتني...
اغسل وجهي وارجع ابجي..
كلساع اغسل حلكي من قهري..كلشي ماريد منه حاليا حاقده عليه وع اسلوبه الحقير...
هالمرة اذا توبته يمد ايده لو يهيني بسيطة....
رجعت للمكتب وكملت شغلي..
رجعت للبيت وخابرت رحاب وسولفنا...
كالت ارفد سولفلي...
هذا فيصل بس يسال عنج وعن عمرج وبيتكم...
ومتخبل عليج يكول صدك عمرة خسارة المايتزوج عراقية....
وبعد عبالهم موظفة عادية ويحجون بيج..
كل واحد يزيد كلمة..وشجاع راد يتعارك ...
بس ارفد حاجي ويا لان شغلهم ورزقهم هذا مو يروح يخربه بعصبيته...
ميخالف بس ميحقله هيج يسوي...
انتو متزوجين وهو زوجج يعني طاعته واجبه..
بس صح هي تحز بالنفس خصوصا من هو واكف وانت بالارض ...
زعلي ميخالف بس مو تطولين...
ترى البيت يدخل بانذار يبقى شجاع يمشي ويزاكط...
اي مو ثور الخلفوج ويزاكط...
هااا لعد منو هسه يحجي عنه...
اي معليج ..ادعي ع رجلي واكره التكول امين....
ههههه الله يهديكم بس...
بقيت شوي وياها غيرتلي مزاجي بس احس قلبي مقهور منه...
بيومها بالليل ماخابر ولا راسل...
يوم ثاني مموجود..
ارفد هم ماكو..بس وسام كال طالعين وي الخليجين للسيبة ويريد يفترون بالبصرة...
يعني مراح يجي لا اليوم ولا باجر احتمال..
يوم ثاني اجه ب١١ تقريبا...
دز عليه مرحت...
اكثر من ثلث مرات ومارحت...
اخر شي دز ع حسن ..
ورا شوية حسن اجه ...
يمعودة مهرة نقذيني....
ها شصار؟؟
روحي ساعدي استاذ شجاع عاط بيه توة ..
ولكيت هنادي طالعة من عنده وترجف ...
يااا؟؟ليش ترجف...
سمعت خيط رزالة بس مافهمت هههه....
واني هم عاط بيه بس مو بالمعنى يعني رزلني بنزاكة..
كتله مو شغلي شغل مهرة هذا...
كال دزها خل تجي بسرعة ...
يلا رايحة لعد....
كمت رحت كلت هذا شبي فضحنا ...
بس هو حسن يكول كم مرة من يتعصب يرزل الموظفين كلهم...
دكيت الباب ودخلت...
الاركيلة يمه والجكارة بيده...
عبالي داخله لمحرقه مدري مدخنة...
شكله مثل اليحضرون ارواح...
حواجبه متربعة والدخان حواليه ولازم راسه...
بداخلي اكول يحتاج بس واحد يصيح كتكوووت....
اني دخلت بدل مااكول اجيت كتله ك...اجيت...
همزين لزمت لساني لان تفكيري طلعه برا...
وهو ملتهي بالمدخنة ماانتبه....
طفى الجكارة وكام...تقدم يمي وتكتف ..
اي ست فضة شوكت ناوية تجين؟؟
شكم مرة دزيت؟؟؟
شنو تريد استاذ...
ها صرت استاذ هسه؟؟؟
اي استاذ ومايربطنا شي غير هالكلمة....
لا غلطانة يربطنا عقد...
اريد اتطلك....
نزل ايديه وتقرب مني شنو؟؟؟؟؟؟
رفع راسي وباوعت جهة...
اريد اتطلك ماكدر ارتبط بشخص مثلك شجاع انت متتعاشر ...
جرني من اذني حيل...
لج اذبحج ادفنج اصلخج..بس طلاك مااطلكج...
واذا اريد هسه اكسرج واخليج خوش تحجين بالطلاك بعد...
اني من حجه هيج خفت يسويها صدك..
انرعبت بداخلي رغم اعرفه شكد حريص من هالناحية وهو حالفلي ميطخني...
بس العصبية مالته تخوف...
بقيت ارجف ترك اذني..كال..
يلا طلعي....
طلعت ومن رجعت حسن كال...
امبينة مترزلة من وجهج الاصفر هههههه...
هزيت راسي ..حالي حالكم عادي ..
سويت الموضوع عادي..
بس بداخلي اغلي منه ومن تصرفاته الحقيرة..
من يغار يتخبل فد مرة...
هسه هو سال عني قابل خطبني وهيج متخبل...
رجعت للبيت وعمال يشتغلون ع مود المشتمل وهوسة...
نظفت وصبا وياي وتماضر ولا طلعت عود الشغل كله لخاطرها عشتو...
احنا فوك عدنا غرفة وعدنا صحيات...
بس يبنون غرفة ثانية ومطبخ وتسقيف ...
بس بعد البناء لو طابوكتين لازم ينعفس البيت...
خلصنا تنظيف ورحت سبحت ..
طلعت من الحمام لاكتني صبا...
لج مهرة اجو خطابة عليج من الامارات واحد اسمه فيصل...
لطمت خدي حيل هي استغربت..
يا شبيج شسالفة..
ها لا بس شجابه منين عرفني؟
ههه شكلج يضحك ولج ع كيفج اخترعتي يكول شايفج بشركة...
روحي مشطي لا تتمرضين هسه اروح اتسمعلج...
رحت للغرفة واني زاد خوفي اضعاف ..هو شجاع هيجي ومتخبل..
انوب يسمع بي خطبني الا ما يدفنني...
رجعت للمطبخ اباوع لصبا تتصنت...
وكفت يمها واسمع كلامه وي عاطف....
وعاطف شلون يجاوبه بمجاملة حلوة ومرحب بي ...
********************************************
ياغالية..صلي ودخلي باليمين...
يمناج يافال البنات الصالحات...
ياغالية الليلة كل المحبين..يقرولج ياغالية المعوذات...
صدى هالاغنية يردد باذني واني افوت للقاعة...
رحاب وزهرة محاوطاتني ورافعين بدلتي...
ويحجون باذني..
ابتسمي مهرة شوية عدلي وجهج..لتخلين احد يشمت بيج ولج ..
قسمتج تتمناها البنات كلها...
وصلت للكوشة ورتبو كعدتي...
شغلوالديجي البنات ويركصون...
اباوع واني مقهورة..المفروض اكون فرحانة بهذا اليوم...
كل بنية تنتظر هاليوم حتى تفرح وتتونس...
واني هم كنت انتظره..
بس مقهورة هوااااي...
اسمع منظمة الحفلة تحجي بالسبيكر..
بنات لبسو حجابكم العريس راح يدخل...
يلا حبايب استعجلو الحجاب لان العريس راح يدخل...
الاطفال لتخلوهم بالنص راح يدخل العرس وتستقبله العروس....
اباوع البنات كل وحدة طفرت من جهة ..
عبالك جايلهم بوليس الاداب...
تالي اضحك ع نفسي..حتى واني ضايجة احش بالعالم....
زهرة صعدت ع الكوشة وهي تلف العباية مالتها...
عدلت بدلتي وبالكلينكس عدلت طرف عيني النزلت منها دمعه او شبه دمعة...
طفو الاضوية وقلبي رجف...
شعلو الاضوية الملونة...
والبنات تجمعو ع الطرفين يترقبون دخلة العريس....
انفتح الباب...
وللحكاية بقية
بقلم شقراء(قمر كانون)
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!