رواية حين يزهر الحجر الفصل السادس عشر 16 - بقلم Shaqraa

مساء الخير
حين يزهر الحجر
الجزء الخامس عشر

كال عاطف...
اعرف جيتكم ومقدرها ..بس البنية حاجي بيها ابن عمها..
وهي موافقة...
كله شجاع ..
من شوكت هالكلام ؟
من قبل فترة قليلة...
بس احنا جسينا النبض ومرت اخوي سئلت كريمتكم اذا احد متقدملها ..
هي مجاوبتها محد متقدملها وع هالاساس اجينا..
يعني لو كايلين البنية مقرية فاتحها مانجي نخطب ..
الا البنية متدري انتو ناطين كلمة..
ع العموم اتمنى تسالون البنية ..
هنا عاطف بقى يتمت لان كال هي موافقة بابن عمي..
وهسه شجاع حرجه..
اخر شي كله نسالها ويصير خير...
خال شجاع ساله..

المرة الفاتت رفضتو ومدامنا اجينا برجلنا نريد نعرف
السبب ليش؟
الصراحة حجي ابن عمنا رايدها..
هم عنده يتيم وتكسب بي ثواب...
مرته ميتة الله يرحمها..
الله يرحمنا اجمع..
بس يابة هي هم يتيمة لا تظلمها بقرار من يمك..
الله الشاهد احنا متمسكين بيها...
شفناها والنعم منها مستورة وشريفة..
واكيد هيج جوهرة الانسان يصر حتى يحصل عليها...
سمعت شجاع سال عن الحمام ..
كلتله امي تفضل وياي يمه..
انا سديت باب المطبخ حتى ليشوفني من يطلع..
شوي وفتحته باوعت محد..

رجعت مديت راسي اتصنت وصار شجاع بوجهي..
عزاا فزيت فزة نشف دمي..
شعندك هنا؟؟حجيتها بهمس ومادة راسي..
خالي شافتي تعصبت وخاف اتعارك طردني ..
لان اذا ابقى اسوي اخوج جنازة...
حجاها وهو ينصي صوته...
عزا شجاع روح جوا واستر علينا فدوة لتتعصب وتصخمها فوك ماهي مصخمة..
تنهد حيل ووهو يباوعلي من فوك لجوا..
جنت لابسة دشداشة نص ردن ولحد الساق مخططة ابيض واسود..
اشتعلو بلة افتري خل اشوووف بسرعة..
رووح جوا لتشهرنا رووح ...
ترى كوة لازم نفسي افتري كتلج..
اوكي باوع اخاف يجي..
خليته يلتفت وسديت باب المطبخ...
اذا احد شافني شيخلصني...

بس راح من يمي ترخصو وطلعو...
وامي استلمت عاطف..
ليش يمه تريد تكسر بختها وتخليها تربي ابن براق ..
يعني فوك ما هانها بالشارع؟
تروح تزوجه الها..
ومنو كال هي موافقه مو كلتلك مموافقة..
يما اني كتلهم هيج حتى يقتنعون ويفكون ياخة..
مادري ليش مجلبين هيج...
وينها مهرة بلة...
صاح عليه ورحتله..
تعاي بلة عندي حجي وياج...
شوفي مهرة الافضل الشغل تتركي..
مدام خطبج ورفضنا هسه يشد وياج ويمرر حالج...
يومه هو كال هيج واني نزيت ..
ناقص بس اتركه وماشوف شجاع..كتله لا شلون اتركه ماكدر..
غير عقد ثلث سنوات وشرط جزائي بي...
اوووف يعني ماراح نخلص من هذا العميرجي..
بداخله اكله اكو احلى من العميرجي اصلا يسوا راس براق والف منه...

بالليل خابرني وحجيتله ع الصار..
كال اي عاشت ايدج زين سويتي..
واذا طلب العقد كليلي قبلها حتى ازيد المبلغ اخاف عنده نية يدفعه..
شلون تزيده يصير؟
ماكو شي مايصير عد شجاع ...
اممم يعني يعني تزور العقد..
حبيبتي الفطيرة هو عقدج كله مزور...
شلون؟
ههه ماكو شرط جزائي اني حطيتة حتى متكدرين تبطلين..
يعني سويتلج عقد وبنود لوحدج مو نفس فورما مالت عقدنا...
تحجي صدك!
اي وحگ الزنود الجنها حليب اخ بوية شوكت تطيحين بحظني...
اوكف اوكف لتدور الموضوع..
يعني ناصب عليه جنت ..
غير اضمنج يمي يا حبيبة...
زين احجيلي مو عبالك ذيك المرة سكتتني من سالتك عن سالفة الشغل من حجه خالك..
شنو منتظرني اتخرج عفية احجيلي ...

تنهد وشعل جكارة..اوف يا مهرة..
تتذكرين بيوم الوصلناج اني وارفد..
بيومها شفتج بالسيارة وي المخنث ..
جنا اني وارفد بالكراج ننتظر ولد صديقنا معيد بالعربي...
جنت ماعرفج ولا اعرف ارفد يعرفج..
بس لفتت نظري كعدتج وي ولد وودايرة وجهج ومبتعدة...
لان قبل شايفين اشكال خصوصا بالكراج ..
يعني البنية كاعده بحضن الولد..
شفتج كلت امبينة فقيرة شمكعدها هالكعدة..
ارفد ملتهي يخابر واني عيني عليكم..
شفته الساقط اخ خرررب..
من راد يتقربلج وشردتي ..
كلت لارفد بسرعة حرك...
خبصته خبص لان شفت هذا النذل اجه وراج..
كلت لارفد الحك البنية هو يكلي ولك مهرة هاي..
اني عبالي يتغزل بيج كتله اكل تبن لا اشك حلكك..
هو مصر يكلي ولك شعرفك بيها غير مهرة صديقة رحاب..
وعافني ونزل صاحج...

شفتج صعدتي ووجههج احمر وتتنفسين حيل ..
كلت مهرة واسمها عليها انوب صديقة رحاب يعني اكدر اوصلج عن طريقها...
بس من كلت لارفد كال تحب ابن عمها ..
گلبي وجعني وشبعتج سب...
بس بقيت ادور وانبش وراج وعرفتج تركتي..
وجبتج يمي للشركة وصدتج يا مهرة يااصيلة...
اوييلي هذا كله واني نايمة ع اذني..
تردين الصدك حبيبي انت دومج نايمة ع اذنج ...
اووو الا تطلعني ثولة يلا ترتاح...
هههه اتشاقى لتصيرين حقنة...
زين ارفد يعرف بيك لعد رحاب تكول ميحجي يمه شي..
اي غير اذا احطها بحلك رحاب توصلها الج واخاف تشردين...
واني ماصدكت لكيتج يابعد كل ناسي...
يا عمري انت مشتاقة اشم عطرك صرت مدمنة..
ههه باجر اجيبلج وخلي يمج..
ايي احسن حتى كل يوم ارشة واغفى عليه...
حجيتها وغمضت عيوني براحة...
اخ بوية لتسوين هيج رحمة لاهلج..
اوو ماسوي بعد مو كل مرة تروح تنام وتخليني...
ماانام بس رح اطفي الكاميرا اريد انزل جوا..
اخاف احد يشوفج بالكاميرا خلينا بس اتصال...
يلا اوك...

اكول مهرتي..وين يعجبج نروح شهر عسل..
اممم حبيبي هسه خل تصير اول...
تصير تصير بعد مرتي انت ليش خايفة ..
ماعرف يعني كيفك اهم شي انت يمي واني افضل نبقى بالغرفة حتى منطلع لو نشوف ناس...
اريد اشبع منك حبيبي...
اويلي يايابة شلون تشبعين بلة احجيلي..حجاها بصوت ناصي وناعس...
يعني حبيبي نبقى نسولف ونشبع من بعض ونعوض ايامنا الفاتت...
بلة شلون نعوض؟
غير نبقى سوا لعد شلووون...
سكتي سكتي اني اكلج شلون نعوض...
التعويض اريدج بحضني سواء نايمين او كاعدين...
يحجيها بهدووووء ورومانسية...
واريد ارتوي بشفافيج المعذبة حالي...
اخ منين ابدي وشنو الزم...
اني سكتت ماعرف شجاوبه ..
هو هم سكت...
ورا شوية كال روحي نامي...
نام وكعد يمكن لان صوته هادئ...

رحت نمت ويوم ثاني رحت للدوام..
دز عليه وانطاني العطر...
اخذته وطلعت بسرعة فاتحة الشيشة بالجنطة ومادة راسي واستنشق..
اليشوفني يكول تحشش..
شوية وكال حسن...
امم اشم عطر بروت يمكن استاذ شجاع اجه استعداد مهرة مهرة ..
اني رفعت راسي مثل الحرامي..
ها شنو منو وينه...
شبيج هههه شميت عطر استاذ شجاع وكتلج استعدي لتترزلين ...
اني ابتسمت بوجهه مثل المسوي مصيبة ويغطي عليها...
سديت الجنطة وكعدت عاقلة اخاف انفضح...
بس هذا شمدري بعطر شجاع ..
ولو هو بس يعبر ريحته تكفخ الواحد ...

رجعت للبيت توني ادخل واسمع عياط وعركة...
بادت رجليه ياستار شصاير...
فتت واباوع لعاطف يملخ بتماضر وامي تفاككهم...
والجهال تصرخ ..
بقيت اسال شكو ياستار اسم الله شبيكم..
مافهمت بس تماضر تغلط وتصيح هيج هيج منك عاطف ابو النسوان...
دخلت مثل المصارعين بالنص..
مادري شنو الصاير بس دخلت اخذ الصغار خطية مجلبين بيهم ويصرخون...
اجر بيهم واسال شبيكم استهدو بالله يا عاطف انت العاقل...
وشلت فؤاد وثريا مجلبة بعبايتي ويبجون...
وامي تدفع بعاطف وتماضر تكلها خلي يطني لخاطر.......مالته خلييي...
وهي صوتها عالي وصافي يرن رن...

يا عزا بس لا عرفت بي وي صبا....
امي دفعت عاطف عن تماضر وابتعد..
شبيك يما صدك جذب انت العاقل تحجي وفحطانة سودة عليه...
وهو يهادد ويكلها خل اربيها بت الكلاب...
هي ركضت للغرفة لبست عبايتها وطلعت تريد تاخذ الجال وتروح...
هو شافها تريد تطلع انجن..
يجرها متقبل..
اخر شي فلتت نفسها وركضت ووكعت ع وجهها ...
بس صوت وكعتها قوي خوفني كلت ماتت...
امي بقت تصيح ع عاطف..
ولك موتت بت الوادم يبووو ولك وليدك بس لا ماتت..
انوب انخبصنا نكعد بيها ماكو فقدت الوعي..
عاطف يتراكض وامي جابت عبايتها وجزدانها...
وتصيح شيلها ولك موتت الفرخة شيلها ولج مهرة ولج سنديها ويانا...
واني الجهال بذيالي ويتصارخون...

تالي شالي وطلعها للسيارة...
امي ركضت وراهم وكالت قفلي الباب بنيتي ودربالج ع الجهال...
بس طلعو قفلت الباب ..
واسكت بيهم خطية يتصاخون ومرعوبين...
فتحت الT.V وكعدتهم وطلعت الهم اغاني اطفال وكعدت اركص وياهم واسوي حركات ..
الى ان هدو شوية وسكتو...
انطيتهم كل واحد قطعة ركي بلكي يلتهون..
رحت بدلت ملابس وتوضيت واجيت يمهم صليت...
الله يستر شصاير وشنو عارفة تماضر وهيج عاطف شابعها دك...
شكد متغير عاطف ابد مجان هيجي...
جاي انصدم بي كل يوم...

انتظرت فترة وخابرت امي...
حجت بعبرة وقهر ..
يمه الطفل متاذي ببطنها وصار عدها نزف..
وهي ويا حالتهم حرجة...
الله يسهل ًيسلمهم ثنينهم انت دربالج لا تموتين روحج من القهر عاد...
لا تتخربطين لو يرتفع ضغطج...
لا تحاتين يما ودربالج لا تفتحين الباب لاحد...
ع مايجون اهلها يمها وارجع للبيت..
لا تخافين علي ماكو شي حبيبة...
يلا الله وياج...

سديته منها وبقيت يم الجهال ..
للمغرب صليت وسويتلهم عشا واكلو...
عبالك صارلهم سنة مماكلين ..من راحت امهم لهسه ياكلون خطية...
لان يومية متنطيهم بس الوجبات والطفل يجوع بسرعة مو مال يلتزم بوجبة...
الله يهديها ويشفيها..
للتسعة الجهال نامو...
خابرت شجاع وتونس لان افتر بالبيت واحجي...
وبقى وياي ع الخط لحد مااجت امي...
صبيتلها اكل وعصرت رجليها تعبانة وهبطوها عاطف ومرته بعركتهم...
كالت اهلها اجو بس ميدرون السبب عبالهم هي طايحة...
زين يما هم ليش متعاركين شنو تكله ابو النسوان...
سكتي ييما هي هالسالفة تنكال حتى نسولفها...
ياا ليش يما خوفتيني...
اخ يا يما اخوج عاشك بت عمه ومرته شايفة حجي بتلفونه وعارفة بالسالفة...
عود كضيته وكتله التفت لمرتك وبيتك وعوف بت عمك انت مو كدهم ...
بس ضل بعناده وهسه طاح بيها...
يا يمه حتى انت تدرين؟
دهر صابج مهرة تدرين يعني..
اي عرفت قبل فترة يعني ..بس عاطف شجابه عليها...

يما عاطف رادها من كبل ..بس امها زوجتها لوحد زنكين ووكتها عاطف كلي خطبيها الي وجانت صغيرة ١٤ سنة...
بس مرت عمج زوجتها لان عاطف ع كد حاله...
وهالتطلكت لان ذاك رجلها شبعها ضيم ودك ..
تسولف باسمة مرت عمج ..تكول مرتين نامت بالانعاش من الدك اليدكه عليها..
اسم الله شكوكي كلش ..وطلكوها منه...
واخوج رد الها وراد ياخذها...
بس كتله مرت عمك ماتنطيك كلتلك كبل اريدلها واحد يعيشها ويدللها مثل دلالنا...
بس ماسمع ييما گلبه متعلگ بيها...
وكال بس تجيب مرتي احاجي عمي واخطبها وهالمرة مااروحها من ايدي...
انوب هالسمعت مرته وصار الصار ...
بقيت صافنة ع كلام امي...
يعني عاطف انت تحب وجربت لوعة الحب لعد ليش تحرمنا...
شحجي وشكول بعد...

مر هالاسبوع وعاطف ملتهي بتماضر الي حالتها خطرة وقررولها عملية ويطلعون الطفل...
عمره ست اشهر ونص بس وضعه تعبان...
وهي اكثر تعبانة ...
بعد تبقى يم الله...
سوولها العملية بس دخلت انعاش لان وضعها كلش حرج..
ونازفة هواي دم...
اما الطفل بعده صغير كلش يخوف..
بس ظهره مطعوج من اثر طيحتها ع بطنها....
طبعا براق هو التكفل بامي..
ياخذها ويرجعها للمستشفى...
لان عاطف ملتهي ومعتمد عليه...

بيوم رجعت من الدوام
جنت تعبانة لان بوادر الشهرية...
فتت للحمام وذبيت جنطتي والشال والعباية بالصالة لان محد عدنا...
بقيت بالبنطرون ودخلت للحمام...
سبحت بماي دافي وحاولت استرخي ..
بس احس الالم زاد وزاد كلش...
رجعت ع نفس بنطروني والبدي وشعري لفيته بالخاولي...
اخذت اغراضي ورحت لغرفتي...
سديت الباب واحس انجريت وواحد همس باذني..
مشتاقلج مهرة...

للحكاية بقية
بقلم شقراء(قمر كانون)