رواية حين يزهر الحجر الفصل الخامس عشر 15 - بقلم Shaqraa

مساء المحبة
حين يزهر الحجر
الجزء الرابع عشر

احساسي بذيج اللحظات مينوصف..بوساته تعبر عن اشتياقه وتشرح تعبه بالايام الفاتت...
ماعرف شكد استمرت بوستنا..بس بقينا واحد يتنفس من الثاني...
لا اني ودي اتركه ولا هو يقبل يتركني..
اخر شي ابتعد مني تعبان كال لتطلعين هسه اجي ..
اني اصلا ذايبة ومنتهية..
كعدت ع القنفة وسارحة باللاشعور ...
ورا شوية اجه راد يكعد كال نسيت الباب مقفول..
راح فتح القفل وكعد بالقنفة كدامي..
يباوعلي بحب اني خليت ايديه ع عيوني..
كاافي لتباوع خجلتني...
اكو وحدة تخجل من رجلها ..
نزلت ايديه وتنهدت..لتذكرني اسكت...
لا هسه لازم اذكرج..شفتي الصار بينا هذا كله حلال مو احسن من السويناه قبل وحصلنا ذنوب؟
لازم تفرها علي وتغلبني اعرفك ..يلا نبلش بالشغل؟
اي يلا مساعدتي الشاطرة...

توني اريد اقره بالملف وانتبهت لبنطرونه مو نفسه..
صح هو جينز بس مو اسود هذا ازرق!!
باوعتله باستغراب واني اريد اكذب نفسي..
انت بدلت بنطرونك؟؟
باوعلي وهو رافع حاجب..مو اول مرة بس مهرتي بريئة ومامنتبهه..
فتحت عيوني بصدمة وخليت ايدي ع حلكي خجلانة..
رح اكوم اني...
دكعدي ولج ملعونة لعد وشلغنا لو خلصنا تمطك وشغلنا الغسالة وشغلنا ع حطته..
غسالة شنو ههههه ..!
غير البنطرون ذبيته بالغسالة..
ههه لازم تخجلني..
اموت ع خجلج ..ودزلي بوسة بالهوا..

بلشنا نشتغل وكل شوي يذبله كلمة ويتغزل..
شوية وخابره وسام كله خالك برا...
اني فزيت رغم وضع طبيعي وجاي اشتغل بس ماعرف خجلت ..
كله يفوت قابل يحتاج اذن..
شوي وانفتح الباب وفات نفسه الرجال الشفته..
سلم وكعد ع قنفة بصف شجاع..
كله ها بس لا عطلتكم..
كامله وتسالمو..لا خال انت تدفع الباب وتطب يمته ماتريد..
احنا مستمرين نشتغل وخاله كل شوي يكلي يابه شجاع خوش عندك موظفة شاطرة..
مرة يكول حقه شجاع بس يمدح بيج طلعتي ذكية ..
اخر شي كال تتذكر شجاع من كتلك اجيبلك موظفة ع عرفي ..
كتلي لا عندي وحدة شاطرةانتظرها بس تتخرج...
اباوع بوجه شجاع صار احمر ع اصفر ..
اني من اساله شوكت حبيتني يكلي من قبل ..
بس ميقبل يكول شوكت...
بسيطة بعدين اخبله..
خلصت وترخصت منهم وهو بس حاط ايده بجيبه ويهز رجل...

خلص اليوم ورجعت للبيت..
شفت سيارة براق يم الباب اف لا هلا...
دخلت اتخنس اخاف الكاه بوجهي يسويها الحظ..
فتت المطبخ فارغ ونظيف..
سودة عليه امي اليوم صايمة بس طابخة ومنظفته ومرتبته..
متخليني اطبخ من اكعد الصبح وهي مابيها...
سمعت صوت عاطف وبراق بالصالة...
اففف شنو رح ادخل واسلم ع هالمتطفل هذا..
بقيت كاعدة بالمطبخ ومصفنة هسه لو اكو باب ثاني..
هسه لو كاعدين بالاستقبال شعدكم هنا...
شوي وفات عاطف كال الله جابج..
سوينا جاي ..امي نامت ماكدرت اكعدها وتماضر تعبانة..
خو تماضر دومها تعبانة ودومها حامل..
هسه عليها سادس حتى الخطر زال وهي متتحرك اخاف تسقط..
مدري منو كلها الطفل ملزوك بصمغ ورق ..
ولو خليها ع عميانها والماي ماشي من جواتها ...

كنفت ردني وسويت جاي وحضرت صينية واستكاين..
كعدت انتطره يكمل ..
فتحت الفون يبوو مكالمات من شجاع شكد ومسجات..
فتحت المسجات..
جاوبي..
هذا المخنث موجود يمكم؟؟
لتكولين لا سيارته برا..
ولج جاوبي...
مهرة لتطلعين كدامه كعدي بغرفتج وقفليها عليج..
دربالج تخلي يلمحج..
دزيتله مسج...ليش عيوني تكدر تشوف غيرك انت مالي عيني وقلبي وروحي..فديت عطرك دمااار...
اخ اخ هذا الدلال كله الي..
ولو كاتله نفسج ع عطر مو علي...
لا حبيب عمري عطرك حبيته لان منك ..
اكلج ليش ماجيبلج شيشة تحطيها يمج مو احسن؟
بس اني احب اشمه بيك..
اشتعلو...وين انطي وجهي هسه بعد ماسمعت هالحجي..
روح نام وارتاح ههه..
لا اشغل الغسالة احسن بس يصير خير باجر الزمج ..
اممممم اني راييحة...
دولي خليني احير بروحي بت اليهود ..
بقيت اكتب واضحك ..ودعته وكمت صبيت الجاي...

صحت ع عاطف يجي ياخذه..
كال تعالي ماكو غريب..استغربت عاطف شكد متغير..
قبل يتخبل ولا نطلع كدام احد لو نسلم..
هسه عادي عنده..
عدلت شالت اخذت الصينية بلا مااباوع ..
اشوف براق كمز قبل عاطف واخذها مني..
وحجه بصوت هامس كلش..مشتاقلج..
سويت نفسي ماهتميت..
فتت بسرعة للغرفة وسديت الباب..
شكد شايل وقاحة..يعني حتى ماسلمت عليه ولبسته وبكل صلافة مشتاقلج..
تشتاقلك الوجعة ياناقص..
حتى اكل مااكلت انسدت نفسي...
قفلت الباب وبدلت ونمت...
كعدت ع صوت دك ع الباب..
فتحته ..امي كعدتني اتفطر وياها..
ها بنيتي تعاي اكليلج لكمة وياي سويلي واهس..
ها ماما اي جاية شلونج خو ماتعبج الصيام..
لا يمه نعمة ..

صليت وكعدنا ناكل ونسولف اني وياها..
كالت دكيلي ع زهرة مشتاقتلها...
خابرتها وانطيت الفون لامي وكمت اغسل مواعين...
خلصت منه كالت هاج حاجي اختج تريدج..
ها خيه صدك حتجين؟
اي كلت لحسين وكال اوديج باجر..
اكلج الجبة الفوشي رح اجيبها الج..
يا ليش بعدج ملابستها..
لا لبستها بس جنها مو قياسي شوي يعني كتفها كبير واني شفتيني ضعفانة احسها مخربطة اكيد تكعد تمام عليج..
ولج انت اول متزوجة تضعف اشو البنات يسمنون ..
هو السيد ينطي مفكة حتى اسمن لا بقت طاقة ولا يفيد اكل..
ههههه حيل لعد خابصتنا عمرها خسارة متتزوج سيد..
ايي اروحله عشر فدوات هههه..
الله يخلي الج..
امين ..شخبار الصومالي..
اي امي هم تنتظرج خطية مشتاقتلج..
عابت ههه يلا سلمي عليها ..بااي...

خليت الفون ع جهة وفتحت اليوتيوب ادور شنو نازل من شعر..
خليت هيدفون باذني كملت العشا ...
محد باقي بس عاطف وتماضر..
خطية ذول الاطفال معيشتهم ع الجبس والعصاير ..
متطلع تسويلهم اكل..
سويت حميسة كبد دجاج ونظفت المطبخ ورحت لغرفتي ..
امي تنام من وكت وحتى من تكعد تبقى بغرفتها تقرا قران ..
واني ع اساس انام بالعشرة لان عندي شغل ...
بس اني اتحجج لان ادخل احاجي شجاع...

خابرني شجاع فديو وكعدنا نسولف.......
مهرتي خل اشوف ثوبج...
لا عيني لا ..
زين الحجاب ذبي ..
خليني استمتع بالشعر الاحمر الموجر مثل گلبي...
واخر مرة اطلب هالشي لان ذليتيني ترى رجلج اني..
يلا اوكي..
ذبيت الحجاب وهو كعد ع حيله وطلعله جكارة..
اخ بوية اشتعل اصلج..
درت وجهي خجلانة وضحكت..انت ليش بس تسب ههه..
لج مو مسبة هاي مدح وحگ هالرگبة المصبوبة صب..
هسه محسسني اول مرة تشوفها ..
لا بس كل مرة اشوفها خطف وكلشي مااحصل بحجة الحرام..
هسه انت حلالي واشوف اليعجبني..
كالها وغمز وجر نفس قوي كلش من الجكارة...

لتحاول ماكو ماكو ههه...
اعرفج بخيلة ولا جنج بصراوية..
اهل البصرة يفيضون كرم ويكطعون اللكمة من بلعومهم للضيف..
بس مهرتي بخيلة ويابسة وياي..
ايي شورطك وي بصراوية لعد..حجيتها بهدوء وميلت رقبتي واني مركزة بي...ذب الجكارة وتمدد وجر الغطا عليه..
نظراته جريئة ورجولية كارثة...
ولج شوكت الزمج واخذ حيفي ااااخ يابة..
ههه شمسويتلك بلة..حجيتها بدلع ..
ذب الفانيلة السودا اللابسها اني درت ..
لتدورين اشو باوعي علي..كافي خجل حلالي انت ..
اني صخنت من شفته شكله يخبل وجسمه اسمر مملوح ..
اصلا ماكدر اباوعله من وسامته..
اشو دوري وجهج علي يلا..

باوعتله بعيون ذبلانة ووجهي احسه صار نار ..
حبيبتي خلينا ثنينا نرتاح ..
ترى انت مو اقل مني محتاجة.....
شجاع ماريد عفية كافي..
هو شنو المتريدي هسه لازمج صدك اني؟؟؟حجاها بنوع من الغضب المكتوم..
شجاع ماكدر عفية ماعرف كافي خلينا هيج..
حجه بقهر وعياط ناصي..
لاا تريدين بس تحبين تشلعين كلبي..
متهمج راحتي ابددد..
ماتكولين هذا الك..محروك حرك خل يلكى الراحة يمي...
اريد راحتك بس ماريد هالشي...
حجيتها بخوف من عصبيته...
تنهد وجر باكيت الجكاير..
هذا هو رويحتي انسي..بعد ماافتح وياج هالموضوع ..
نسيت نفسي كلش..
روحي نامي..

زين عندي حل خل اكوله الك..
سحب نفس من الجكارة وهو يهز راسه يعني كولي...
انت مو ردت شسمه ..مو قبل ردت..
شنو ردت كولي ليش مرتبكة..
مو ردت مني الثوب الانام بي حتى تحضنه وتنام..
اي وهسه شوف ماقبلتي اشوفه مو تجيبي الي بعد..
لا حجيبه الك ..حجيتها واني دايرة..
تريد تشوفه هسه..
لا بوية هو انت كاطعة عني الاكل والماي وتراوني المفطح شيبقى بيه..
روحي نامي وارتاحي..تصبحين ع خير...
فشلني حسيتها طردة بنزاكة..
سديت الفون وغطيت وجهي خجلانة من الحيطان يمكن ...

يوم ثاني رحت للدوام وشفت الوضع هادىء ومحد..
رحت للغرفة شافني ابتسم بس ممبينة ابتسامة حقيقية..
قفلت الباب هو استغرب من تصرفي..
كام باتجاهي ..
رحتله بسرعة حضنته..
خليت راسي بصدره ..دااافي والعطر تغلغل انفاسي...
حط ايده ع ظهري وعاصرني عليه حيل...
بس مخلاني اطول بعدني بسرعة..
لتفكرين بموضوع البارحة انسي...
افهمني حبيبي فديتك...
شوف شنو جبتلك..حجيتها وفتحت الجنطة..
طلعتله الثوب مالت البارحة..
قصير للركبة وربع ردن..ومنقوش بدباديب صغار حمرا..
طلعته هو ابتسم واخذه من ايدي..
شمه حيل ورجع حضني وباسني براسي..
عاشت ايدج ..
يلا حبيبي رح اروح اخاف ينتبهون..
ماشي اخذي راحتج...

طلعت رجعت للغرفة لكيت حسن ينتظرني..
ها مهرة وين صرتي اجه المحاسب محتاجح..
ها رحت للحمام..
ماشي بس اخذي هذا الصك وهو شوي ويجي..
كعدت ورا شوي اجه وكملت شغلي بس استحيت ع خفت..
ماريد يشكون بيه ..
خلصت شغل ورجعت ..
امي تنتظرني وتغدينا سوا..
حجية شوكت تفكرين بروحج وتتغدين بلا ماتنتظريني..
يا يما مالي واهس بحدي مرت اخوج تاكل بحدها ..
واني ابقى انتظرج تسويلي واهس...
مو ضغطج اخاف عليج لو جعتي..
لا ييما اجوع شنو ديرة جوع..
هي خبيزة وخضي تسد الجوع والف نعمة...
الله يديمج النا بعد عمري..
بستها براسها وكتلها روحي ارتاحي...

غسلت مواعينا وسويت كاستر وجلي ..
بس متت ضحك واني اباوع للجلي واتذكر شجاع..
كصيتله صورة كلت الا ادزها اله...
للاربعة اجت زهرة جابها حسين..
دخلتهم جوا وامي طلعتلهم..
جبت الصينية واجيت كعدت ..انفتح الباب وطلع عاطف..
سلم عليهم..
باوعلي كال..
مهرة فوتي جوا...!!
كمت وحسين كام..خليهم اني اترخص..
حس ع عاطف كومني لان هو كاعد..
امي كامت ويا وعاطف كله وين بعدنا ماشفناك..
الجايات هواي وماكو فرق هذا بيتي..
من رخصتكم...

طلع وطلعو وراه..
زهرة حسيتها انقهرت وضاجت ووجهه عبس...
كتلها لتضوجين هو تعرفين بي ميرتاح لحسين..
شاورتها مو حقه كاسر عينه ههههه...عاد ضحكت شوي وفرفشت...
رجعت امي وعاطف مدري وين راح..
حجت وي زهرة اخاف ضاجت من الموقف ..
كلتلها لا تخلين ببالج..
اخذتها للغرفة بدلت ونزعت الحجاب..
درت وجهي عليها شفت رقبتها...
يبووو ولج شنو هالنقش السومري ..
هههه يوم الج وتنقشين مثله..
ولج توسلت بي لتطلع برقبتي بس اليوم ع الاقل ..
يكلي بعناد اخوج بلة هسه هذا مو مخبل..
ههههههه زين يسوي ترى ...

بقينا نسولف واحجيلها عن شجاع..
وطبعا كل مرة تصير ويا ضدي..
اشك بيها عميلة مزودجة هالبنية...
بقت لليل واجه حسين اخذها...
توسلت بي امي يدخل حاولت ..
ابد ماقبل كال مستعجل...
اخذها وراحو..
اني رتبت البيت ورحت لغرفت...

دزيت صورة الجلي لشجاع...
شوية وخابر فديو ع التانكو...
الو..
فدوة للصوت الحلو..اشو اليوم دازة جلي ولج..
هههه حبيت اتحرش ميصير؟
يصير ليش ميصير ..
يلوكلج يابة تتحرشين...
اشم ريحة بسامير..
لا اني اشم ريحة جلي هههه...
اخ بوية شوكت الزم هالجلي واكله بيديه الثنين..
اووي ليش بيديك..
مو حتى تزيدين بالاوي عدل من اكل بيدي بت اليهود...
ههههههههههههه هههه هههههه ...
غصيت من الضحك من حجاها...
كافي كافي..
ضميلج ضحكة للعيد...
مديتله لساني وعيبت..
بقينا نسولف شوي وكال حسد الكاميرا...
سدها وبقينا نسولف...

ورا شوية رجع فتحها ...
مرتجي ع السرير والثوب مالتي ع صدره..
باوعلي بعيون ناعسة..وباس الثوب...
هذا حيشبع حنان لحد متجين...
يمكن يتشكك من الحنان هههه...
ههههه انطيك غيرة عادي...
تنهد وكال..
انشالله الثوب وصاحبته بحضني عن قريب...
امين...حجيتها وصفنت...
مهرتي...
ها حبيبي...
يفداج حبيبج..بس اني ماتحمل بعد..
راح اجي لعاطف باجر واجيب ابوي وخالي ونحاجي...
ها..
بلا ها لان ماجاي اخذ رايج..
اني مقرر وخلاص...
اوكي حبيبي ربي يسهل....
بقيت احاجي وذهني شارد...
باجر شراح يصير الله يستر...

كعدت الصبح طلعت الجبة الجابتها زهرة..
لبستها كلش حلوة...
ولونها صيفي وخفيف...
لبست وياها حجاب ايراني هم مشتريته زهرة وياها...
وكعب اسود..
كلش عجبتني ..ممجربة البس جبة هاي اول مرة...
بس شكد شكلها كشخة ..اكشخ من العباية الخليجي..
طلعت واول مرة حيدر ينتبه شلابسه..
بس كلي كلش حلوة لايكتلج هالموديل مرتب...
شكرته وابتسمت..
وصلت للدوام ..
شجاع مو يم الريسبشن استغربت...
بس كعدت بالغرفة دك الفون...
وسام كال تعالي الداخلية تريدج..
يبوو الله يستر شنو بعد...

رحت دكيت الباب فتحه ..جان واكف يمه..
فتت وهو حواجبه متربعة وصايرات اربع حواجب..
سد الباب وتكتف وباوع..
اني مثل الطفل التريد تعاقبه امه..
واكفة ومخروعة بس ماعرف شنو السالفة...
مد ايده لزمني من ايدي وفرني مثل ذول اليركصون ..
تالي وكفني وضربني ضربة ع خصري...
عطت ..اااي شبيك..
كرصني حيل وحط وجهه بوجهي...
وين اضمج وشنو البسج حتى يرتاح گلبي..
بقيت اطفر خجل وخوف وشعور ماعرف اوصفه..
بقيت مدنكة وافرك بالمكان وجعني...
واول مرة يمد ايده هيج مكان ..
دنكت وكتله ليش هيج تلزمني...

صار كدامي كال..
تعرفيني ضعيف كدام الجلي..
وتجين جايبلتي جلي بالفراولة..
ههه اوه حطلع..
حتى اكسر رجلج ولج شنو هاللبس منين جايبة هاللون وليش هيج لازكة عليج...
مو لازكة عريضة ترى بس انت لان مركز تحسها للزكة...
اني من اركز حلالي وحر بي..
بس اليركز بيج غيري احط اصبعي بعينه وافگسها...
مهرتي اني هالنوع مال الجبب ماخليتج تلبسي..
تلزك ع جسمج وگلبي يوجعني لو احد باوعلج..
ابقي ع العباية السودا ..صح تبرز جسمج بس مو هيج ..
ذيج سودا وماتجيب التايه...
اف حبيبي هسه كلشي ممنوع مو حالة...
راد يمد ايده وطفرت...
هههه جبانة..هذا الي وبس...
اوكي بس هالمرة البسها حطلع...
ماشي حبيبتي..
اليوم العصر احنا يمكم ترى...
تغيرت ملامحي وكتله..
يصير خير....

بقيت قلبي لاعب وخايفة كلش من جيته...
رجعت للبيت وكلت لامي...
يما اليوم حاجاني استاذ شجاع...
رح يجي اليوم وي اهله...
خل يجي يما والمكتوب يصير..
اخوج علعل گلبي ومكعدج المن..
اخياتج عرسن وهو هالمعرس وفروخه كدامه..
بعد المن حاطج وقف ..
صح هالرجال اكبر منج ومطلك..
بس المرة من تاخذ الاكبر منها ترتاح ييما..
بس سالفة طلاكة رغم حجنلي اخواته ومن سالت رحاب هم..
بس تعرفين الگلب يبقى لاعب ومايصدك بسرعة...
بس هو زلمة والنعم منه..
وبلكي ربج يكتبه الج....
الله يسهل يما ادعيلي...
بقت تدعيلي واني القلق ماكلني وماعرف شلون اتصرف...
ساعة اكوم ساعة اكعد ساعة انظف...

لحد ماصارت بالخمسة واجو...
عاطف نايم كعدته امي...
لبست عبايتها واستقبلتهم ..
وبعدين راح عاطف يمهم ..
كلت لامي خلي الباب مفتوح حتى اسمع....
وكفت حضرت الصينية واخذتها امي...
واني واكفة بالمطبخ وادعي ...
بدو النقاش توه جاي يحجي شجاع..
كله عاطف اعرف جيتكم ع سنو ومقدرها ...
بس البنية حاجي بيها ابن عمها....

للحكاية بقية
بقلم شقراء(قمر كانون)
حبايبي هالحسابات لمجموعة كاتبات ..
اقرولهم وشجعوهم ع مواهبهم
_TOOT_123
Mm113119118114
hawrraa8
Noor-AlZubeidi