رواية حين يزهر الحجر الفصل الثالث عشر 13 - بقلم Shaqraa

مساء الرقة حبايبي
حين يزهر الحجر
الجزء الثاني عشر

اباوع لوسام فتح الملف طلع استنساخ هويتي..
وشجاع طلع هويته..
اخذها الرجال وفتح سجل صغير بايده..
واخذ هوية وسام وارفد وبدا يردد بعقد زواج!!
باوعت لشجاع مصدومة..
ردت اكوم باوعلي ووجهه عيونه ع القنفة...
تحيرت شسسوي..
اعقد بلا علم اهلي واحط نفسي بمأزق..
لو ارفض طلب شجاع..
وماعندي استعداد اتحمل رد فعله وهو هددني..
صرت بين نيران مو بس نارين...
لحظات مرت بس احسها سنين من ثكلها..
انتبهت ع صوت الرجال يسالني موافقة ..
صفنت وترددت...
شجاع رفعلي حواجبه ..دنكت ووافقت..
بس خلص العقد الرجال كام..
وسام طلع ..وشجاع وارفد كامو وياه بس كلهم كلش مستعجل مااكدر اتاخر..
تسالمو وطلع هو وارفد...

بس طلع اجه شجاع يمي اني وكفت...
باوعت بوجهه بعتب ومقهورة..
هو فرك وجهه بايديه وتنهد...
نزلت دموعي كتله بصوت مخنوك...
ليش تحطني بهالموقف؟؟؟
ليش شجاع حطيتني بمصيبة ماعرف حلها شلون وشنو...
استغفر الله العظيم ..لا تبجين كافي..
ماكو غير هالطريقة اضمنج بيها..
حتى وان جنتي مرايدتتي وتتهربين هسه انجبرتي بعد..
وحتى لو موافقو اهلج ينطوج ولو قروو ينطوج لغيري ميصير...
جبرتيني اتبع هالحل ...
اوكي بس بهذا تصرفك خسرتني ونهيت الحب الهنا واشرت ع قلبي..
نهيته بايدك..

اخذت جنطتي وطلعت..
اريد اطلع منا بس ماريد اروح للبيت..
اريد مكان محد بي..
اريد ابجي اعيط براحتي اريد ابجي وافرغ همي كله...
وكفت اريد اجر تكسي..
سمعته صوته وراي..
صعدي وياي اني اوصلج...
حجيت واني ناطيته ظهر..
شكرا اخذ تكسي..
فضة انت ليش صلفة يعني تأديب اليوم كله ماكسر عينج ؟؟حجه بحركة وصوت ناصي..
خفت يتعصب وتصيرلي مشكلة بالشارع انوب...
درت وكتله ..
حرجع وانتظر حيدر يجي ..
رجعت جوا وخابرت حيدر كال اني اصلا يمكم ماطول...

رحت كعدت بالحمام وانتظرت حيدر يجي...
بس اجه طلعت..
دخلت للمطبخ محد ..
رحت للغرفة لكيت صبا اخت براق كاعدة يم زهرة...
سلمت عليها زهرة حست بيه اشرتلي بعيونها وسكتت..
استغربت وجودها اصلا احنا نتزاور بالمناسبات من دون العمام احنا منغلقين...
كالت زين اجيتي متنا جوع..
ابتسمتلها وكتلها يلا ابدل ونصب...
هي تتفحص بلبسي..
تالي كالت..
لج مهرة ذكرتيني بذني الموظفات الاجنبيات اليلبسن كعب عالي ويصيدن المدير..
هي ماقصدها شي بس اني متحسسة..
كتلها لا تطمني المدير بكد جدي شصيد منه ..
زهرة رادت تلطف الموضوع لان اسلوبي مو حلو جان..
كلتلها دعوفي هسوالف بالج كله يم التكبيل خلينا ناكل ع مايجون ..

اني كملت لبس وسالتها باستغراب منو يجي؟
امي وعاطف وبراق راحو للسوك ع مود اغراض الحنة..
اهااا ..
كلت لو متاخرة شوي وراجعة وي رجعتهم جان رجموني...
وكملو البدا بي شجاع بيك...
يلا رب ضارة نافعة...
اه يامهرة وين النفع وانت تزوجتي من ورا اهلج ..
شراح يصير بيج بس الله يستر...
عقلي ماحسه متقبل الفكرة اصلا ...
حضرت وي البنات الاكل وكعدنا ناكل ..
سالتهم ع تماضر كالو تغدت ورجعت للجحر مالتها...
زهرة وصبا كعدن واني وكفت اغسل مواعين..
سمعنا صوت معناها اجو..
عفت المواعين وفتت وزهرة وراي لان ممتحجبات...

بس دخلنا زهرة كالت انت شلابسة شمصخمة؟؟
شلون شردتي من شجاع اليوم؟
تنهدت كتلها..
لا عادي شردت..
باوعت لخدي كالت عزا ضاربج يغبرة كله من ايدج ..
هذا لبس مالت وحدة مستورة بضميرج...
بس كليلي شلون خلاج عايشة هذا اعصابه تخوف ونار شورطج وهيج لبستي...
كعدت بالارض صفنت كدامي..
كتلها زهرة عقد علي...
كعدت كدامي وتباوع بوجهي شنو؟!!
اي ضربني وعقد علي حجيتها وقبل لا اكمل بقيت ابجي واشهك...
حضنتني وتهدي بيه...
كافي لتبجبن كافي..الجمعة خل يجي يخطبج بس خل يخلص الخميس ع خير...
هم حقه الرجال يا مهرة خبلتي خبال وتمنعي يجي يخطب واحد غيره يفكر انت تتهربين...
مسحت دموعي وكتلها..
كرهته وطلع من قلبي بعد ماريده..
مينحمل ابد وميتعاشر...
سمعنا صوت امي تسال عنا..
عدلت نفسي وسوينا نفسنا نسولف...

شوية ودخلت حاجتنا تالي كالت تعالو رتبو الاغراض...
سالتها زهرة نكدر نطلع كالت اي براق يم عاطف وصبا كاعدة يمهم..
اني رايحة اصلي الظهر لهسه ممصلية...
لبست عباية ولفيت نفسي خوفا من اصادف براق..
وزهرة باوعتلي وضحكت..
ها لعد منو قبل شوي تكرهي ؟ههههه..
عوجت حلكي وطلعنا..
بلشنا نرتب المسواك والمواعين السفري الجايبتها امي للكيك وبعد احتياجات للحنة...
سمعت صوت براق سلم ..
السلام عليكم بنات عمي شلونكم؟
اني لبسته وزهرة كلتله بخير مشكور خوية..
كال تفاحة السلام لله؟
ماعرف ليش بوقتها صار شجاع بين عيوني وحسيت بالانتماء
اله ..
واني ميصير احاجي براق لو اخلي يلمحني...
لفيت عبايتي وفتت من يمه وهو واكف...

دخلت للغرفة وسديت الباب...
ردته بس يولي حتى ارجع...
ورا شوي اجت زهرة كالت تعالي راح...
كمت يمها نعدل واحجيلها بالصار ..
كالت ليش خايفة من موضوع العقد؟
اصلا اني اشوفه شي زين ويمكن قبل شوي تغير رايي...
من شفت براق يحوم عليج ويتودد لعاطف...
ومن اكتشفت...
قبل لتكمل فاتت صبا وهي دارت الموضوع...
بقيت الوب اريد اشوف شنو اكتشفت ماكو..
صبا ويانا وورد اجت هم...
ماكلت اختلي بزهرة مطلقاً...

لليل وشجاع ابد ماكلف نفسه خابر لو سال حتى بمسج...
رحاب خابرتني بالليل فديو كالت..
باجر من الصبح اجي...
وارفد انطاج الحنة والعرس اجازة ..
كال اكيد اختها تحتاجها...
كتلها سلمي عليه وشكري..
اي يوصل بس شنو رح تلبسين؟محضرة لو اجيبلج من فساتيني مالت السبعة...
لا محضرة فستان ذهبي زهرة اشترته الي ..
اه ياخاينه غير تراويني؟؟
شيكومني ولج ..
ديلا كومي اعجز من ام التوم...
كمت فتحت الكنتور طلعت الفستان طويل للكعب وضيق كله وبي فتحه للركبة...
ومن فوك تور ع الصدر والفتحة كبيرة ..
شي فخم وحلو كللش..

شافته رحاب كالت لا مهرة محلو لتلبسي..
دروحي محلو شنو لج شبيج صايرة عديمة ذوق..
ولو هي التتزوج واحد اخو شجاع يبقالها ذوق...
اباوع لرحاب فزت..
لتجفصين مهرة انجبي وغيري مو حلو...
لتحطين خشمج خليني مستمتعة..
اني خلصانة من حماج تطلعين انت...
اباوع لزهرة خبطت الوان وتحرك الفون..
توجهت الشاشة واباوع شجاع..
عزاااا...
باوعلي بعيون مليانة شوق..
مهرة لخاطر الله لتلبسين شي يبرز جسمج ويميزج..
لا تفتحين عين عليج ونصير بدل الهم همين...
طبعا هالحجي اني مدنكة..
نسيت نفسي شنو لابسة وبلا حجاب اصلا...
بلا مارفع راسي كتله..
الله كريم...
يلا اخذي راحتج مع السلامة...

نبرة صوته وجعت قلبي ..حسيته شايل هم ومقهور هواي....
صح ضربني واذاني وعقد علي بظرف غلط...
بس لحظات فكرت عذرته ..
وانطيته تبرير لتصرفاته المتهورة...
وقررت اعاقبه ع ضربي حتى ليعيدها...
اني مو مستمتعة بضربه..
بس متوقعه منه هالشي...
شجاع عدواني ويعبر عن ردود افعاله بالضرب...
شكد حسيت بي حنين وشريف ويحلل ويحرم باقل شي...
بس الجانب الثاني منه مظلم...
ماعرف ليش هيج بس اكيد اكو سبب قوي...
لان اكو اشياء تتناقض بشخصيته..
معناها اكو اطباع وليدة ظروف معينة...

قررت البس شي مستور لخاطره..
ومجرد مسمعت صوته وشلون خايف ويفكر اخاف يشوفوني مبدلة ويخطبوني...
تمسكت بي اكثر...
وكلام زهرة بقى بذهني...
مهرة صيري ذكية ترى العقد راح يحلل علاقتكم وكلامكم احسن ماتحجون بالحرام...
وهالشي ميخليج تضعفين بلحظة عصبية لو غصب وتوافقين ع غيرم...
وعمره مراح يشهرج ويحط اهلي كدام الامر الواقع...
لان شجاع تهمه سمعتج ويخاف ياذوج ...
كلامها خلاني اعيد حساباتي بمجرد ساعات تحولت من غضب لحنين اله...
بس لازم يعرف غلطه ومو كلشي يريده يصير ولا يمد ايده علي....

ردت اراسل رحاب واداهرها شلون تخابرني وهو يمها وصايرة عميلة سرية اله...
بس ماعتقد امان هسه اخاف بعده يمها....
طلعت يمهم برا..
وبيومها صبا باتت عدنا...
للوحدة واحنا سهرانين وسوالف...
بعدها كمنا ننام..وصبا يمنا فرشنالها...
اني صار عندي ارق من التفكير...
بس مغمضة عيوني اريد شوية اريح اعصابي...
زهرة نامت واباوع لصبا بيدها الفون...
ورا شوية التفتت ع جهتنا وبعدها كامت بهدوء....
استغربت هي طبعا تطلكت صارلها سنة...
بس كومتها مالت سالفة مخابرة وحبيب امبينة...
كمت والباب بقته مردود حتى من ترجع وتفتحه ميطلع صوت...
اباوعلها راحت للمطبخ..
فتحت الباب بخلسه عبالك حرامي وامشي خفيف...
المطبخ ضواه مفتوح وهي طلعت للطارمة...
ركضت للسطح حتى اباوع لان هو يتسلط ع الطارمة..
الدنيا ليل وابد لا خفت لا فكرت يمكن من حبيت شجاع ضربت فيوازاتي حتى الخوف نسيته...

مديت راسي من ورا الدنكة شوي..
ماكو بالطارمة الامامية..
احنا طارمتنا ملتفة ع جانب البيت..بس اصلا ذاك المكان منروحله لان مخلين بي اغراض قديمة...
مشيت بهدوء وباوعت شفت صبا هناك...
لطمت ع خدي لا اردياً...
صخاااام !!!!اني واعيه شنو جاي اشوف لو يتصورلي!!!!!
بقيت صافنة ع المنظر الكدامي...
صبا راجعه ع الحايط ..
وعاطف حاضنها ويبوسون بعض ورايحين بجو ميدرون بالحواليهم...
اباوع عبالك جاي اتفرج ع فلم...
اباوعله تجرأ وياها اكثر وهي مندمجة ولا تقاوم ...
وصلو لمرحلة ماكدرت اباوع اكثر..
احس عاطف جان صورة ببرواز والشفته هسه طيح هالبرواز وكسره...
معقولة يسوي هيج وي بت عمه عقلي مجاي يكدر يشيل الشي الشفته...
بقيت ارجف..
نزلت بسرعة ودخلت للغرفة...

تغطيت ماردتها تحس بيه كاعدة...
بقيت لحد مادخلت وتتخنس...
نامت بفراشها وتغطت..
اني عقلي فصل ..يعني الناس تجيلها الصدمات تداريج..
اني لا اذا يومي بدا مصخم ينختم بالصخم...
بقيت اجيب فكرة واحط فكرة الى ان نمت..
شوي وفزيت ع صلاة الفجر...
كعدت راسي يريد ينفجر..مصدعة وعيوني مابية افتحها...
كعدنا صلينا وبلشنا نرتب البيت ...
وهي ويانا بس ماكدر اباوعلها كلساع اتذكر الشفتة...
ب٨ اجت رحاب واخذنا زهرة ورحنا للصالون...
رزلت رحاب لان تخابرني يمه كالت هو اجه وطلب مني اتطمن عليه واكلج ع الاجازة...
وعيب ارده رجال شكبره واكله لا مستحيل ...
بس خطية مقهور ولج حتى مو نفسه قبل المعزول يحجي ويسولف...
ليش هيج تسوين بي...
صح تعاقبي لان ضربج بس لتقللين منه..
صعبة رجال بعمره وبمركزه وبطبعه اصلا هيج تصغري كدام ارفد ووسام بلبسج هذا...
حتى ارفد كال حقه شجاع اصلا لو سامع سرمد ابو الاستعلامات من شافها شكال جان كطعها...
عزا شكال ولج؟
اندري مقبل ارفد يحجي كال معليج لان يعرف احجيلج...
خلي يجي يخطبج وبعدها لكل حادث حديث..
بقينا نسولف لحد مارجعنا ..
البيت متروس من اقارب وجيران...

اني لبست جينز ثلجي وبدي اسود من كدام مربع وبي شغل نقش وربع ردن...
مكياجي سويته خفيف كللش وشري سرحته وخليته صفح بس..
قدر الامكان ماخليت لبسي مميز..
لان هي حنة اختي شلبس يعني..
اصلا هذا لبسي وانصدمو يكولون شلون اخت عروس هيج تلبس...
كتلهم البدلة متفوت بيه وحاولت وطك سحابها ..
بلشت الحنة واهل حسين جايين..
امه انسانة فوق الوصف..
بحيث هي وياي بالمطبخ وتساعدني...
وامي من شافتها وشافت طبعا بقت تبجي تكول يما ارتاحيت وتطمنت من شفت عمة زهرة..
اني اعرف الانسان اليتلون والمرة امبينه مامتلونة الله يهديها...
خلصت الحفلة ع خير وبس هالليلة زهرة وياي...
كتلها متنامين معليه حتى لو باجر تنامين بنص العرس المهم اشبع منج...
وفعلا سهرنا لوقت متاخر...
صار يوم ثاني عرسها الي رفض عاطف يسوو بقاعة وشكد رادو مقبل...
اجت الزفة واخذوها طكت عيوني من البجي...
مو لان اخذوها وبس ..
لان عاطف مقبل نروح وياها لان عرسهم بالبيت مو بالفندق ..
ومقبل نروح...
كعدت وطكيت من البجي..
سديت الغرفة علي ولا طلعت ولا اكلت...
بالي يمها حتى ماودعتها لان عبالي نروح بس صدمنا هو اخر لحظة...
بالثنتين تقريبا دك فوني...
اباوع زهرة تخابر بسرعة جاوبت..
اجاني صوتها ...
يابعد عمري ياخيتي ولج اشتاقيتلج طمنيني عنج..
سمعت صوتها كوة يطلع..
زينة زينة بس اشو صار عندي نزيف...

للحكاية بقية
بقلم شقراء (قمر كانون)