رواية حين يزهر الحجر الفصل الرابع عشر 14 - بقلم Shaqraa

مساء الخير
حين يزهر الحجر
الجزء الرابع عشر

شلون يعني نزيف زهرة هواي ؟؟
اي احسه مجاي يتوقف وراد يسال عمتي ماخليته استحي كلت اسالج..
ولج كومي خل ياخذج للمستشفى وينه يمج خل احاجي...
اي هذا...
حجه بصوت خجلان ..
ها خوية..
حسين اخذها للمستشفى لان النزيف شي مينهمل..
اي مو جاي اقنعها ماقبلت كالت خل اخابر مهرة لان خايفة خطية..
اي اخذها هسه احسن وطمني عفية بس توصل..
انشالله خير يلا في امان الله...
اخذت الفون زهرة وحاجتني...
روحي للمستشفى احسن مدام شي بسيط ويتعالج كومي يلا اني انتظركم طمنوني..
يلا رح اكوم بس لتكولين لامي..
لا طبعا ماكلها يلا استعجلي وروحي...

راحت واني كمت فرشت السجادة وكعدت اصلي وادعيلها...
صارت ساعة ٤ ونص الفجر ..
خابرتني زهرة..
ها طمنيني ؟
لتخافين شي بسيط كالو جرح صغير وانطوني علاج وهسه رجعنا...
الحمدلله ..دربالج ع نفسج وع كيفكم...
انشالله ههه ليضل بالج..
سودة عليه قلقتج روحي نامي وارتاحي..
اسم الله عليج..
يلا اخذي راحتج الصبح نجي اني وامي..
هلا بيكم ..

سديت الفون ورحت تمددت ..
للسبعة يلا غفيت.
ونومتي قلقة وتعبانة واحلامي مخربطة..
ب٨ ونص كعدتني امي حتى نروح..
رحنا اني وياها واستقبلتنا ام حسين وخالته ..
هم تزوجو بالمشتمل بس ريوكهم وي العائلة لان كلها ملتمة...
سلمت ع زهرة واخذتني لغرفتها..
وسالتها عن وضعها كالت لا ماكو شي خطر الحمدلله...
وكعدنا نسولف بدكة عاطف لان ماخلانا نروح وياها...
كالت ولج اكتشفت عاطف وصبا بينهم شي...
اني سويت نفسي ماعرف كتلها شلون؟؟
ولج قبل الحنة من اجو ..
براق كاعد يم عاطف وامي وصبا اجت يمي بالمطبخ..
شوية واجه وراها عاطف...
كلها بت عمي زهرة مشغولة..
تعالي انت طلعيلي نفاضة من البوفية..
هي كلتله مااندل..بس اباوع لوجوههم مرتبكة واببد مو طبيعية..
هو كلها دوري وانت تلكين ..

راحت كدامه وهو وراها..
اني صفنت ع تصرفاتهم..
سويت نفسي مشغولة وممنتبهه عود ومن راحو طليت اباوع راحو لغرفة امي ..
انسد الباب ورا دخلتهم مباشرة!!!
رحت ركض بس خليت اذني يم الباب ..
وعينج متشوف الا النور...
شلون؟سمعتهم يتحاربون يختي وهي تريد تفلت منه تخاف يجي احد...
عاطف وبنص بيتنا وهيج يسوي!!!!
معقولة عاطف الرزن العاقل هيج تصرف مال مراهقين يتصرف...
حجيتلها الشفته وبنص الحديث اجت امي..
وزهرة تلوب تريد اكمل كتلها نتخابر وافهمج...
طلعنا وحسين اصر الا هو يوصلنا ومقبل نروح لوحدنا...

رجعنا وبلشت بالغدا رغم كوة اتحرك جسمي نحلان كلش ومتضايقة...
كالت امي سويلنا كيكة مرتبة يما اليوم يجونا ناس ..
التفتت عليها بخوف..
ياناس المن!؟
خطابة الي عجبتهم شيباتي..ولج غير الج...
اوي يما ماريد عفية تعبانة كلش..
مهرة تعبانة شنو قابل جايين يحملون عليج ؟؟ترى طولتيها ورفضج ماله مبرر...
تركتني ودخلت واني احس مخليني بطاوة ويقلبون بيه بقيت الوب...
كملت الغدا وسويت الكيكة..
دخلت سبحت بلكي اتنشط..
انوب زدت نعس ونحول..
لفيت شعري بالخاولي ولبست بجامة وتشيرت وتمددت..
ماعرف بسرعة غفيت لان تعبانة وقليل نايمة البارحة..
فززتني امي..

كعدي مهرة كعدي تحاجيني وتهز بيه مو مثل عادتها من تكعدنا...
فزيت خايفة..
شنو شنو يما ؟؟
ماكو شي بنيتي العاقلة ..تحجيها بزعل..
بس اهل مديرج هنا ..
كومي بدلي وتعالي سلمي بسرعة عفتهم محد يمهم...
هي كالت هيج اني وكفت ع حيلي ..ثبتت الشبهة ع نفسي...
بقيت اروح وارجع بمكاني واكول سويتها شجاع حتصخمني يا شجاع...
انوب حتى ممشطة...
مشطت شعري ورفعته بالقراصه زين ناشف تقريبا وهو دهني يعني ميتعب لو يكفش...
لبست تنورة سودا بينصل وتشيرت زيتوني ربع ردن ..
طلعت واني اقرا ايات...

اول مافتت شفت بنات شابات ووياهم مرة جبيرة...
سلمت عليهم وخليت الصينية ع الطبلة وكعدت..
عرفوني ع نفسهم الحجية مرت ابوه واخواته ثنين نهاد ووسماح..
سماح بحضنها طفلة صغيرة ونهاد ماوياها احد..
بقو يسولفون وياي كالو رحاب ماتدري رح نجي لان عد اهلها ..
اي هي البارحة كالت حرجع من العرس واروح الهم لان امها مريضة ...
وانوب حاجو امي كلولها استعجلينا بالرد لان نريد نفرح باخونا...
بس وجه امي ميبشر بخير يعني باختصار جنها معاجبها الموضوع...
بس مع هذا يعني سايرتهم بالكلام..
خلال مانحجي اندك الباب..
كامت امي وبس طلعت...
اخته سماح كلتلي..
حقه شجاع لو انفكت جبسته شنو هالكيمرررر وكرصتني من خدي..
اني خجلت كلش ومرت ابوه ضحكت واخته الثانية هم ..

بس اختفت ابتسامتي من شفت خالة حسين دخلت ووياها مرة !!
وامي تهلي وتمرحب...
سلمت عليهم اني بس وجهي فالت ماعرف اذا ظني صح ومثل ماافكر..
يعني هم التقصدهم امي مساع..
خو ماتقصد اهل شجاع الكعدتني سحل وتكلي كومي..
وهسه كل ظنها اني وصلتله خبر انه ناس تريد تجي اليوم وهو سبقهم واجه..
انلاصت الامور ببعضها والله اليستر...
هم بس كععدو.. اهل شجاع ترخصو وطلعو..
طلعنا وراهم واني شردت للمطبخ...
مشاعري تضاربت ومخي كله انضرب..
يعني مااجيتو الا سوا ومنين طلعتلي خالة حسين...
وديتلهم ضايفة وخالته بس تمدح بيه وتتغزل..
كالت كعدي يمي فدوة شنو هالزبد هذا..
اليوم كلش وحدة تصيح زبد وحدة كيمر ..اخر شي وحدة تكول بقرة وتفضها...

تحجي وي امي واني اترقب..
ام عاطف لا تردينا امانة..حتى الولد من شافها مساع كال يمه زين ماختاريتي ..
اندارتلي..شنو رايج مهرة اكيد حجتلج امج...
اني سكتت وابتسمت بوجهها شوي وكمت..
بس ردت اطلع منهم ..عزا العزاني شراح يصير ماادري...
بقيت بالغرفة لحد ماطلعو وي االاذان..
صليت واجتلي امي...
ها خلصتي زين حتى احاجيج...
اي يما خلصت..حجيتها بقلة حيلة...
كعدت كدامي وكالت احلفج بالمتوجهتله..انت خبرتي المدير يجي يخطبج لان كتلج رح يجون خطابة؟
غمضت عيوني بخوف...
لا يما ولله اصلا مادري فاجئتيني من كلتي اجو وحتى رحاب عد اهلها ومتدري حتى تكلي...
ها خوش يصير خير..
شوفي يما صح هو زلمة من ظهر زلمة وكفو..
بس يا بنيتي مطلك وجبير فرق بينكم هواي ..وهم شيعي يعني اخوج ذيج كوة وافق ..
يعني هالقسمة واكفة..
اني اشوف لو تقبلين بابن خالة حسين ..
دكتور اسنان وعمره زين ٣٢ وهم اقارب حسين والولد عرفناه درة ...
صفنت شحجي وشجاوب..
شكلها بلة مو ثنينهم شيعة..شمعنى هذا تقبلون بي ..
وثنينهم بالثلاثين فرق خمس سنوات بس...
استغفر الله ربي شنو هالبلوة...

رجعت سالتني ..مهرة يما صفنتج وراها هواي حجي...
اذا الابالي صح احجي كليلي لا تخليني ع عمى عيني...
تنهدت وكتلها...
يما الولد رايدني وفاتحني بالموضوع بس كتله ع اسباب رفضكم...
وهو ماقتنع واكيد راد يجرب حظه...
يعني هو رايدج ومفاتحج؟؟
اي يما ليش اضم عليج...
زين وانت رايدته؟؟؟
يما الحماني من ابن عمي وكعد تفاصل ويا هذا تنصحيني مااقبل بي؟؟؟
ضحكت امي..اي يابت بطني دومج فارتنا بلسانج ..
اذا هيج يصير خير..
اني احاجي اخوج واشوف..
رادت تكوم لزمت ايدها..
يما الدكتور يولي مايناسبني...
طبطبت ع ايدي...
ادري ييما ادري ..راح اوكف وياج ..بس اذا طلع غير الحجيتي وبينكم شي ترى يصير غير حجي..
لا ماكو غير الكلته..كامت وكالت خير خير...
بس من يسالج اخوج كولي المدير مامحاجيج بالموضوع...

تعشينا وخلصنا تماضر اخذت جهالها وفاتت للغرفة كالعادة..
اني كملت الجاي واخذته ..
امي جانت تحاجي عاطف..
انطيتهم الجاي كال كعدي...
هذا مديركم محاجيح بالموضوع؟؟
ها لا ماحجه وياي شي ابد...
اي احسن ..
اني كلت للحجبة تردلهم خبر ..
لا تكولين اكطع قسمتج وخطابة ثنين طيرتهم..
بس مايناسبونا يا بوية..
كرايب حسين هذا منتهين منه..
احنا وحده وانطيناها كوة الهم مو ننطي الثانية..
واستاذ شجاع هذا كلش مامناسبج..
لو يجيب وزير الداخلية هذا ماقبل بي..

كلتله امي...
بس حرام عليك يمكن طول عمرها مايجيها هيج شخص..
لا حجية لا..
حرام علي انطيها لشيعي وعمارة وبكد ابوها ومطلك..
ادري لاكينها بالشارع لو بايرة وهيج تريد تذبيها ذبة...
وشبي الشيعي يماا صدك منك تحجي؟؟
كلنا نعبد الله ونتبع رسوله واهل البيت..بعد هالافكار المريضة المن حاطها براسك؟؟؟
واذا عمارة شبيهم العمارة مو بشر ماربيتك هيج ولك عاطف ليش مكلوبه علومك ىنفسيتك...
تعصب عاطف كلها ..استغفر الله يمه انت ليش مصرة؟؟؟
هسه قحط زلم انطيها لواحد لام شكو شي ردي...
امي علت صوتها وكلتله..
هذا الردي التحجي عنه..وكف لاختك وكفة زلم..
وابن عمك بعز المطر وبنص الشارع طكها ..
كاطع قسمة الفرخة ولك ليش..
ذاك شيعي وهذا هيج وذاك هيج ..
شنجيبلك رجال تفصال حتى ترضى..

دكت ايدها بالارض وكامت..
اني ماراح اردلهم خبر فكر عدل وروح اسال عن الرجال ويصير خير...
كام هو كلها ..لا تنقهرين حجية وباسها براسها..
نترت ايده واني فلتت بسرعة..
انسحبت مثل الحرامي كاعدة بنصها وهم يتمالخون..
رحت ظلمت الغرفة وسويت الفون صامت ونمت...
اريد ارتاح ماريد تفكير..ماريد نقاش..اريد رااااحة...
نمت يمكن بالعشرة..
كعدت يوم ثاني ع صوت المنبه..
رحت للشغل ..شجاع يم الريسبشن..
شكد مامقهورة منه من شفته مدنك ولازم الفون بايده...
اصابعه السمرا..والمحبس شذرته سودا مربعة زايدهم جمال وحسن...
ركزت بي لان مشتاقتله واستغليت فرصة هو مدنك..
بس عطره الي ملى المكان ضيم افكاري..وضيعني...

كملت شغل وطلعت للبيت بلا مانلتقي او يحاجيني...
لمحته بالسيارة ورانا...
تصنعت عدم الانتباه بس اني بالي وياه...
لحد الليل فتت انام ..
دك الفون باوعت هو..
احس قلبي فز وبشوق لايوصف...
بس ماريد اضعف لازم يعرف نفسه غلطان..
اول اتصال مجاوبت..
والثاني هم...
الثالث يلا جاوبت...
بس رفعت الخط اجاني صوته تعبان وكوة يحجي...
اااخ ياقاسية مشتاقلج..
يومه من سمعت صوته ارتخيت وجسمي نمل ..بس ادعيت الجدية..
شتريد شجاع؟
اريدج حبيبتي ومرتي وامي وراحتي بهالدنيا...
اسمع بكلامه وارجف وي نبرة صوته اليهمس بيها..
ليش ساكته مهرة محتاجج لخاطر الله تعبان هواي..
اخوج رفض مو؟
وصلك الخبر ماحاجة احجي...
عادي يابة عادي نعتبرها تمهيد ونبلش نكثف ونكثف لحد ما ننجح بهالاختبار..

اني ساكته بس اسمع..كال لشوكت تبقين ساكتة؟؟
بعدج زعلانة لان ضربتج؟
زعلانة من كلشي..عقدت علي بطريقة رخيصة وضربتني وذليتني..
رخيصة شنو ولج لسانج ليش دوم طويل..عاط بيه حيل..
ردت اضمن مترحين لغيري ويصير البيني وبينج عشك حلال تعتبريها رخيصة؟؟؟
اخ وتلومني لان ضربتها..
ولج اضربج بتوثية ومايبرد قلبي...
اني لزمتني ضحكة من حجايته بس ماحسسته..
اي انت ماعندك غير الضرب..
حيوانة عندك اني وتضرب بيه ..حجيتها بصوت ناصي ودلع عود زعلانة..
اخ يابه اخ ليش ولج يظالمة تدريني رهيف وتزعلين علي وتالي تمطين بهاللسان هذا اليرادله كص..
اريد بس اشوفج اكصه الج بسيطة..
تثاوبت حتى يتركني لان اذا ابقى شوي اصالحة ماقاومه...
شوي وكال روحي نامي بس فكري بكلامي...
وتراويج الايام فايدة عقدنا واذكرج بي..
ختمته ويا ورحت نمت...

استمريت مااحاجي اسبوعين..
بس صباحيات ندز..
وامي خابرت خالة حسين كلتلهم البنية ماقابلة...
الحمدلله خلصت منه...
ورادت تخابر الحجية وتكلهم عاطف رفض شجاع..
بس كتلها اني اكول لرحاب وتكلهم زحمة نخابرهم واجنا رافضين...
بس بداخلي ماردت اصغره كدام اهله وجناينهم بالرفض..
بقيت قافلة عليه وهو مينطي بروحه ويعترف بغلطه...
يكول صح قسيت عليج ومايصير اضربج بس تصرفاتج تدق القلب..
وخدودج تشجع ع الضرب...
يحاول عود يضحكني لو ينسيني السالفة..
بعد اسبوعين ونص يعني تقريباً٢١ يوم...
صار عدنا شغل واني اخذت ملفات ورحت للمكتب لاول مرة بعد العقد...
جان موجود ضيف ..انتظرت يم وسام برا لحد ماطلع ورحت...

لكيته كالعادة مفرش ومفجورة عبوة اوراق كدامه...
كعدت بكل جدية وسكتت..
اورق بالملف بيدي...حسيته يباوع علي...
غلست ورا شوي رفعت راسي...
هو ايده بجيبه وصافن ..
ماكدرت احط عيني بعينه من كد الاشتياق صدك ميته عليه...
درت وجهي ع غير جهة ..
كال متوقعتج هيج قاسية ولج...صار شكد ماحنيتي ماكلتي هالرجال تعبان ويريد مداراة..
كام وكف واني ساكتة..
راح قفل الباب اني كمت بسرعة وصلت اخذ المفتاح ..
جره من الباب وحطه بجيب البنطرون...
باوعلي بعيون هيمانه والشوق فاضحها...
اني باوعت بعيونه نسيت روحي....
تقدم علي بقيت ارجع ليورا ..لحد مطخيت بركن الحمام...
باوع بوجهي ثواني ..حظني حيييل...
مكدرت مااحظنه لان ميتة شوق عليه...
احس عصرني بحظنه وكل ميعصرني تتساقط اهات الحب والاشتياق...
بعدني من حظنه ولزم خدودي بيديه ثنينهم...
احبج يابعد كل ناسي...
غمضت عيوني كتله..
احب..ك قبل لا اكملها اخذ شفتي بين شفايفه...

للحكاية بقية
بقلم شقراء(قمر كانون)