للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
حُب وحرب
وقلب مضرم بنيران البعد والقرب
يريد الوصال ولكن ماضيهُ صعب
كل مايريدهُ هو الحب
وشفاء القلب من ألم الحرب
إصابته نيران قاتله في القلب
يصارع القدر في الغيب
وكأن ليس هناك عذاب
لم يصب قلب النقيب
خاطره بقلمي
زهراء احمد
هَيْصَم: شنو صاير لائِث ليش تمشي بهاي الطريقه الغريبه وعيونك حمر؟
لائِث: عباس تصوب بالمظاهرات.
هَيْصَم: وليش هسه تحجي بعدين ليش انت مو يمه؟
لائِث: معقوله اعيفك وحدك وانت بهذا الوضع؟!
هَيْصَم: وشنو بيه وضعي؟
لائِث: ماعيفك وحدك لتلح.
هَيْصَم: شلون يريدني انزل بيه عقوبه هسه يا أخي ابن عمك متصوب روح اوكف وياه لتكابلني هذا اني كدامك مبيه شي بس اهلك محتاجيك يمهم.
لائِث: اتصلوا عليه طلع من العنايه يعني ماكو داعي اروح.
هَيْصَم: ليش كل هل اعناد بس اريد افهم؟
لائِث: ما أريد اعيفك هذا كل مافي الأمر، هاك تفضل اجه الدكتور العزيز.
أرفد: لتحجي هيج يجي يوم وتحتاجني اعالجك متعرف شنو يصير خليني لطيف وياك ماشي.
لائِث: ما حبك مو بأيدي.
أرفد: ممحتاج حبك اصلاً اجيت حتى ابشر هَيْصَم طلعت من العنايه المركزه صحتها بخير وماكو اي مضاعفات واذا تحب تكدر تشوفها بس ها لازم تروح للدكتور محسن يحجي وياك بخصوصها لان هو اللي أجرالها العمليه.
هَيْصَم: ليش صار شكد نايم اني؟
أرفد: ست ساعات.
هَيْصَم: بسبب المهدأ مالتك مو؟
أرفد: تكدر تكول اي، نمت وهي بالعمليات صحيت وهي طلعت من العنايه سويت هيج حتى متعيش التوتر ويرتفع ضغطك اكثر انتبه لصحتك هَيْصَم انت تكبر واعضائك بحاجه للراحه لتعبها هواية.
لائِث: ويريدني احبه!!
أرفد: منو طلب من عندك تحبني؟!
لائِث: كلبي بي هوايه ناس انت مو من ضمنهم.
أرفد: صديقك ليش يكرهني هيج؟!
هَيْصَم: اخويه الثالث هذا.
أرفد: الله يديم المحبه راح اروح اني شنو تحتاج تكدر تجي يمي للغرفه أو اتصل بيه اني اجيك وها صدك الحمد الله على سلامتها ان شاءالله متتكرر.
هَيْصَم: راح تبقى بالبيت وملعون الوالدين يطلعها بعد.
أرفد: مو لهاي الدرجه اذا شددت عليها تتركك وتهرب لتخليها تكره الحياة وياك.
هَيْصَم: سواء كرهتها او حبتها مستحيل اعرضها لنفس الموقف مره ثانيه وحتى نقاب راح اخليها تلبس محد يلمح ظلها حتى ميصير بيها شي وتتأذه.
أرفد: اعرفك عنيد وتسوي اللي براسك مو جديدة.
هَيْصَم: بما انو تعرفني فلتعب نفسك، بأي غرفه هي اريد اشوفها؟
أرفد: بالطابق الثاني الغرفه العاشره بس لتنسى تشوف الدكتور محسن قبل متروح يمها خلي يحجيلك عن وضعها وشنو صار بسبب هاي الرصاصه.
هَيْصَم: ماكو شي خطر أرفد مو؟
أرفد: هذا السؤال جوابه يم الدكتور محسن مو يمي.
هَيْصَم: الله يصبرني عليك.
أرفد: نفس الدعاء ألك، انت مو اقل من عندي بالعناد.
هَيْصَم: مصرت هيج اعتباطاً وانت تعرف سبب تغييري.
أرفد: الماضي مات وي اهله ليش بعدك عايش اهناك ماعرف!!
هَيْصَم: لاسامح الله لو صار بريفان شي راح يكون جوابك ذاته لنفسك؟
أرفد: الموضوعين مختلفات لتحاول تجمع بينهن.
هَيْصَم: ماكو اختلاف نفس الوجع بل ازيد انت تعرف خساراتي والسبب اللي خلاني بهاي الطريقه اتعامل وي الناس أو وياها هي هم.
أرفد: انطي لنفسك فرصة، صار عشر سنوات، أتجاوز الماضي وعيش حياتك.
هَيْصَم: غرفه الدكتور محسن وين؟
أرفد: راس يابس وعناد فضيع شلون تتراهمون ماعرف،
بنهايه الممر على ايدك اليمين.
هَيْصَم: خليني اشوفك قبل متسافر.
أرفد: ما اوعدك لان بأجر مراح اجي لهنا.
هَيْصَم: مو حباً بيك أريدك تتطمأن عليها قبل متروح.
أرفد: دكتورها موجود اني ما ألي فائدة وحتى لو بقيت مراح اقدم شي.
هَيْصَم: نشوف تاليها وياك شنو.
أرفد: كل خير ان شاءالله.
رحت لغرفة الدكتور محسن طرقت الباب سمعت رد الثاني فتحته ودخلت.
محسن: يا اهلاً وسهلاً ابني شلونك؟
هَيْصَم: الحمدلله، اجيت اعرف شنو راح يصير بيها بعد العمليه؟
محسن: اكيد كلك الدكتور أرفد انو هي تعدت مرحلة الخطر لكن اكو مشكله صغيره ممكن تواجهه بالمستقبل.
هَيْصَم: شنو هي؟
محسن: لازم تسوي عمليه تجميل للجرح حتى ميترك أثر او تكدر تستخدم المرهم لكن على الأغلب راح يبقى أثر واضح وهذا الشي يزعج البنات خاصتا الصغار بالعمر.
هَيْصَم: فكرت شي خطير متكدر تتخطاه.
محسن: بالنسبه الهن شي خطير ومزعج هم بس لان انت رجال متفكر بهاي الطريقه.
هَيْصَم: على كل حال وضعها شلونه هسه؟
محسن: كدرت تتجاوز المحنه ولسلامتها بقيها اهنا يومين نتأكد من انو صارت افضل حتى تكدر طلعها.
هَيْصَم: مو مشكله حتى لو تبقى شهر المهم صحتها تكون بخير.
محسن: ميحتاج شهر يكفي يومين بالأضافه شغله مهمه خليها ابالك اللي تعرضت اله هاي المره مو ضربه سكين نحلت بخياطين وإنما عمليه كبرى رصاصه وجان جسمها تحت تأثير المخدرات يعني وضعها اصعب وتحتاج عنايه خاصه واهتمام ولتنسى حالتها النفسيه راح تكون سيئة أو ممكن تتعرض لصدمه تفقد الذاكره بسببها أو تفقد النطق كل شي وارد خليها ابالك حتى متنصدم اذا شفت ردة فعل غريبه من عدها.
هَيْصَم: وليش هيج يصير وياها؟
محسن: كتلك تعرضت لصدمه وجسمها جان تحت تأثير المخدرات يعني كل شي وارد بس مو بالضرورة يصير هاي مجدر تخمينات على حسب عملي بهذا المجال واللي شفته فكل الأحتمالات واردة وممكن تصير.
هَيْصَم: وشكد يطلب الوقت حتى ترجع طبيعيه؟
محسن: هذا الشي ميحدده الطب كل إنسان وقوته الشخصيه ومقدرته على مواجهه المرض وطبعا شي اكيد الناس المحيطه اله وعنايتهم بيه،
خليها شغله مهمه ابالك بهيج مواقف ممكن تكسب كلب الشخص وتأخذ كل كلبه وتصير المرتبه الأولى بحياته أو العكس هي مجرد ايام اهتم بيها.
هَيْصَم: ان شاءالله، شكرآ لوقتك ولجهدك هم.
محسن: هذا واجبي مسويت شي انشكر عليه.
طلعت من الغرفه وصعدت للطابق الثاني حتى اشوفها فتحت الباب ودخلت شفت الأجهزة محاوطتها من كل مكان، وجهها اصفر وشفايفها بيضه، التعب واضح بملامحها، والسواد تحت عيونها مبين حيل، هن مجرد يومين كدرن يغيرن جمالها ويذبلن وردة الهَيْصَم مثل هيج، اقتربت من عدها وكعدت بصفها مدت ايدي ومسحت على وجناتها، حزن وألم يكطع كلبي على اللي صار بيها بسببي، لو ما خليتها تصير كدامي جان ما صار كل هذا، حجيت بس متسمع ، حضنتها بس متبادر بردة فعل، وقبلت جبينها وخدها ومتعترض وتمنعني، الأشياء اللي جنت استمتع بيها وياها ماكدر اسويها هسه، مو لشي ثاني بس احبها من تعكف وجهها زعلانه من حركاتي، احب اشوفها معصبة واحب عنادها، شنو بقى بيها شي ماحبيته هَيْصَم؟
سألت نفسي هذا السؤال والجواب ماعرفته لان من صدك ماكو شي بيها ماحبيته، أيدي اخذت طريقها على خدها وهي غافيه متدري بيه موجود اصلاً، حجيت وياها بهمس قريب من وجهها.
هَيْصَم: مشتاق لكل شي بيج ضحكتج، وجناتج من يصيرن حمر من تضوجين، وعيونج من تباوعلي بالختلات، عصبيتج من اسوي شي متحبيه، وحتى اعنادج ورفضج المستمر بالأعتراف لمشاعر عايشه بداخلج بس اني اعرف بيها وكدرت اقراها بتصرفاتج، اما جفصاتج اللي اموت عليها، انتِ اقوة من عندي بهوايه والسبب يمكن لان محبيتي من قبل أو منجرحتي بسبب الحُب، تكدرين تعيشين الشعور براحتج بدون متفكرين بأي شي ثاني غيره، عكسي تماماً، اني اللي عشته وجربته وضكت مره، ولو يسألوني شنو اصعب شي بالكون اكول الخيانه ولتفكرين ابدا مقصدي من الخيانه هي الغدر وي شخص ثاني بالعكس تمامآ جانت مرأة ونعم من تربيتها بنت شيوخ معروفه لكن غدرتني بشي اكبر لعظمته مكدرت اتجاوزة لهذا اليوم حبها أو وفائها عشعش بكلبي واني انسان مو ناكر للجميل ابدا مابالج بحب عاش ويايه سنين طويله يمكن يجي يوم واكدر اكمل طريقي بدون ذكرياتها بس مستحيل أكدر انسى ومحال تكدرين تتحملين تعلقي بيها وذكري الها الدائم راح تنفرين وتكرهيني وهذا الشي اللي يمنعني افتح صفحه جديدة وياج، ماكو حل لجروحي لَّباءَتي ماكو حل.
همهمات جانت اجابتها لكلامي خلتني اوعي على نفسي وسكت ماكمل ورجع اصفن بيها، شويه وبلش يرجع وعيها فتحت عيونها الذابله ابطئ قابلتها عيوني السرحانه بتفاصيلها، عيوني اللي السعادة واضحه بيهن بسبب رجعتها للحياة بصحه وعافيه مره ثانيه.
العيون مرات حديثها احله من اللسان بيها اسرار عشق جبير بقلوبنا واحد ضامه عن الثاني، كلب يستحي يعبر عنه وكلب ثاني يخاف يعترف بيه حتى.
: وعيت بعد فتره طويله وجان اول شي اشوفه عيونه اللي مشتاقتلهم حيل ما اكذب اذا كلت صرت مغرمه بتفاصيله وياخوفي عليه إذا صار بيه شي مو زين مجرد الفكره خلتني اتخبل اذا صارت واقع الله ليقدر شلون بيه؟
قرب راسه من عندي صرت اني وياه نتنفس ذات الهوه حجه بهمس قريب من شفايفي.
هَيْصَم: ليش هيج سويتي؟
جاوبته بتعب.
فيروز: لان ما اتحمل خسارتك.
هَيْصَم: خلي اولي اني وسلامتي المهم انتِ تبقين بخير اذا صار بيج شي تتوقعين اتحمل؟
فيروز: ليش متتحمل شنو اعنيلك اني؟
هَيْصَم: انت وردتي المستحيل اتحمل ذبولها، متعرفين حالتج هاي شنو سوت بكلبي والا اي مدا عذبتني تمنيت الوجع اللي بيج يندار بيه وما اشوفج بهذا المنظر.
فيروز: لتضحكني واني مابيه حيل من شوكت صرت رومانسي هيج؟!
هَيْصَم: من عرفت راحتي واستقرار كلبي بشوفة عيونج اللي غابن عن عيني يومين.
فيروز: صار اللي صار وانتهى ماكو شي تقلق عليه هَيْصَم.
هَيْصَم: لو تعرفين شكد مشتاق اسمع اسمي من شفايفج.
فيروز: ولو تعرف شكد وضعك هسه مخليني مصدومه.
هَيْصَم: شنو السبب؟
فيروز: يعني متعرف؟
هَيْصَم: لا اشرحي.
فيروز: من شوكت تحجي هيج ويايه وتتغزل بالقلم العريض؟!
هَيْصَم: من شوكت تغزلت اني كل اللي كلته مشتاقلج واني اعترفت بهذا الشي من قبل كلبي يشتاقلج غصب عليه وما أكدر ما اعترف بهذا الشي.
فيروز: فقط هيج؟
هَيْصَم: شنو تردين اكثر؟!
فيروز: سلامتك.
هَيْصَم: كولي اللي بكلبج لتخجلين من عندي.
صارت عيني على قميصه عقدت حاجبي وسألته.
فيروز: ملابسك ليش بيها دم؟
هَيْصَم: لان وحده غاليه على كلبي تصوبت بمكاني فمن خليتها على صدري ادمر القميص وفدوة لسلامتها اني والقميص.
خجلت وسكتت مجاوبته حسيت الوضع توتر بيناتنا فحجيت بغير موضوع.
فيروز: ارجع للبيت ورتاح لتبقى يمي.
هَيْصَم: ماعندي شي راح ابقى اهنا يمج من تصيرين احسن نرجع سوه.
فيروز: عندك شغل هَيْصَم لتأخر عملك علمودي بعدين تتأذة واني ما أريد هيج يصير.
هَيْصَم: ميصير شي لتخافين اكو شخص غيري يدبر الأمور حتى ارجع وفريقي اهناك هم.
فيروز: أجيت بالزي؟
هَيْصَم: لان طلعت بمهمه.
فيروز: شلون عرفت مكاني؟
هَيْصَم: لتعبين نفسج بهاي الأسئلة المهم صحتج ارتاحي راح اصيح الدكتور يشوف حالتج.
فيروز: لا لتصيح احد مبيه شي.
هَيْصَم: اي بس اهدأي ليش هيج عصبيه؟!
فيروز: مو عصبيه بس ما أريد احد يجي لهنا خليني هيج افضل.
هَيْصَم: دكتور بضمانتي مراح يسوي شي الج واني هم موجود يمج واكسر الأيد الي تأذيج لتخافين لَّباءَة هذا اكثر شي أكرهه من اشوفج ضعيفه وبسهوله تنهزين.
: حجيت بقهر واني اتذكر اللي صار ويايه صعب والله الشخص يتحمل مثل هيج اشياء انضربت مخدرات غصب وتحرش بيه خارج أرادتي شنو من كلب عندي حتى اتحمل هيج عذاب وشلون أكدر اثق بالأشخاص بعد كلهن التمن بنفس السنه مات والدي وتعرفت على خالتي وهم ماتت ونخطفت ونضربت طلقه والله اعلم شنو منتظرني بعد ويا عذاب ثاني لازم اتحمله؟
فيروز: انت متعرف شنو سوه بيه لتلومني اذا خفت.
هَيْصَم: اعرف شنو سوه ومتفهم عذابج وخوفج وممطالبج بشي غير تثقين بيه وتتأكدين مستحيل اعرضج للأذيه انتِ روح الهَيْصَم وماكو انسان يأذي روحه.
فيروز: اثق بيك لان انت مسويت شي يضرني ماعدا مرتين قليت الأدب.
هَيْصَم: تردين اسويها ثلاث مرات؟
فيروز: مو هسه مدحت بيك ليش تخليني اغير رأيي؟!
هَيْصَم: متكدرين.
فيروز: وليش بله؟
هَيْصَم: انتِ تعرفين الجواب.
فيروز: ليش تسوي هيج هَيْصَم؟
هَيْصَم: شنو مسوي؟!
فيروز: تأذيني هوايه بدون متحس.
هَيْصَم: بشنو أذيتج!!
فيروز: لتوصلني للمي بعد صيام وتكلي هذا بحر متكدرين تشربين من عنده.
هَيْصَم: بس اذا رحلتنه اطلبت هيج شنو بأيدي؟
فيروز: ممجبور لتقنعني انو متكدر لتحاول تظهرلي جانبك اللطيف بنفس الوقت تكلي لتتأملين ممكن احبج، لتتغزل بيه وداريني وانت متحمل مشاعر ناحيتي تره اني انسان مثلك من دم ولحم اتأثر وابقى افكر بكل تصرفاتك لتعيشني بوهم مناقصه جروح جديدة الله يخليك تره ما استاهل من عندك كل هذا والله.
هَيْصَم: لهاي الدرجه تصرفاتي تزعجج؟
فيروز: مستحيل تفهم قصدي.
هَيْصَم: فهميني انتِ وضحيلي الصورة المبهمه لَّباءَة.
فيروز: مراح أوضح شي الحر تكفيه الأشاره انت مو تكول انك ذكي اذاً افهم قصدي وعلى شنو احجي اني.
هَيْصَم: منو كال اناا؟
فيروز: هَيْصَم شنو مشكلتك اليوم؟!
هَيْصَم: انتِ وبما انو ماعندي شي اريد احلج.
فيروز: اريد انام تعبت.
هَيْصَم: لهاي الدرجه مليتي من عندي؟
فيروز: وتالي وياك لا أرحمك ولا اخلي رحمة الله تنزل عليك عجيب أمرك حيرتني يا أخي.
هَيْصَم: كم مره كلت لتكولين أخي اني مو اخوج؟
يعني تردين اعاقبج يلا تبطلين هاي العادة؟
فيروز: أخي ليش شنو لازم القبك غير هيج؟
هَيْصَم: لتلقبيني ولا القبج خلينه على الأسماء افضل.
فيروز: اريد انام.
هَيْصَم: لازمج نامي نوم العافيه.
فيروز: ما أكدر بطني تأذيني والألم ديزيد.
هَيْصَم: راح اصيح الدكتور ارتاحي انتِ.
فيروز: وانت ارجع للبيت أرتاح وكمل شغلك وتعالي بعدين.
طلع اشويه ورجع هو والدكتور جيك وضعي وطمأني وضربني ابره بعدها دخلت بنوم عميق محسيت على شي.
لائِث: الحمد الله على سلامتها.
هَيْصَم: الله يسلمك تكدر تروح هسه لأبن عمك اني هم راح اطلع للبيت هم اطمأن امي واغير ملابسي واروح للمركز.
لائِث: وتخليها وحدها اهنا؟
هَيْصَم: مو وحدها أمنت عليها أرفد واهنا الأطباء ثقه وهي نايمه اصلاً.
لائِث: أرفد مو سافر؟
هَيْصَم: يوم واحد ورجع، صار يومين ممنتبه للقضايه اريد ارجع وشوف شنو صاير بغيابي مالازم اغيب فترة طويلة عن المركز.
لائِث: اني اطمأن عليه وارجع مراح اخليك وحدك.
هَيْصَم: ميحتاج خليك اليوم يمه وارجع على راحتك لتسوق سريع وانتبه على نفسك ما أريد اسمع شي مو زين مابيه حيل تره.
لائِث: اوي فديت اللي يخاف عليه.
هَيْصَم: بديت سخافه.
لائِث: اي والله صعب اتحمل اعيش بهاي الجديه اني انسان متعارف عليه بخفة دمه ويجي هيج وضع سيء انجبر بيه اصير ثكيل يا أخي والله متعرف العذاب اللي اعيشه من اخذ هذا الدور.
هَيْصَم: الله ليبليك بهم وتعيش كل عمرك مرتاح.
لائِث: اريد احجي وياك بموضوع بس احس الوقت مو مناسب فرغلي نفسك شي يوم.
هَيْصَم: علمود البنيه اللي تحبها تريد تخطبها صح؟
لائِث: مو حب بس اريد استقر بحياتي كبرت وحاب اشوف نسلي.
هَيْصَم: منو المحظوظه؟
لائِث: اريد اجيك واحجي وياك بالتفاصيل مراهمه اهنا نسولف.
هَيْصَم: اعرفها؟
لائِث: شنو هذا السؤال الغريب؟!
هَيْصَم: لأن الواضح ممنتبه لنفسك شلون خجلت وصارت وجناتك السمره حمره.
لائِث: غلطان هذا من الخوف على ابن عمي.
هَيْصَم: مو كلت طلع من العمليات ومبيه شي؟
لائِث: اي صح بس هم خايف عليه شكو بيها اذا خفت؟!
هَيْصَم: لا شكو بيها خاف براحتك وخليني ارجع للبيت اشوفك باجر ان شاءالله واذا تريد تبقى يم اهلك كم يوم مو مشكله اجازة مفتوحه لان صار هوايه مراجع لأهلك.
لائِث: لتمسلت تعرف عدل ما أكدر اعيفك وحدك اهنا.
هَيْصَم: لتخاف عليه ميصير غير رب العالمين الكاتبه.
لائِث: مع هذا شوفت وجهك الصبح تريح اعصابي مثل الجاي عند الشياب.
هَيْصَم: انت فد واحد تافه وهسه تأكدت من هذا الشي.
لائِث: اذا كان تفاهه فنسوي برتقال مو مشكله اهم شي الصحه خويي.
هَيْصَم: وخر عن وجهي ما أللي خلك سوالفك التعبانة.
لائِث: ماكول بس الله يساعدها عليك.
هَيْصَم: ليش وين تلكه واحد مثلي؟
لائِث: لتفكر لان اني امدح بيك معناها ينعاش وياك لا حبيبي غلطان انت مستحيل يكدر احد يتحمل اسلوبك بس اللي يحبك من صدك وهي هذا الشخص.
هَيْصَم: جنت شاك بيها ودائماً تحذرني من عدها شنو غيرك؟!
لائِث: كبرت بعيني من ضحت بنفسها علمودك.
هَيْصَم: متوقعتها تكون انسان استغلالي.
لائِث: مفهمت قصدي الشخص اللي يضحي بحياته علمودك ومستعد يخسر روحه هذا يحبك بدون قيد أو شرط وممنتظر من عندك مقابل تكدر تأمن بيه وتخليه ابيتك وانت مرتاح عكس اللي يتظاهر بالحب المخادع اللي يتركك بنص الطريق بس تخلص مصلحته وياك، واحنه بطبيعة عملنه منثق بأحد سواء من جنه محاميين او من صرنه بالسلك العسكري.
هَيْصَم: كلامك منطقي بس بعض المشاعر تكون غلط وملازم نحس بيها وحده من عدها حبها اليه.
لائِث: والله اشوفك واحد بطران.
هَيْصَم: احترم لائِث لتميل زايد بالحجي.
لائِث: يعني بشرفك شنو تريد اكول مثلاً؟
هو وين واحد محصل بنيه تحبه وتضحي بحياتها علمودة صدك دافر نعمتك.
هَيْصَم: اذا ابقى يمك ينتهي هذا النقاش بعركه ارجع للبيت احسن.
لائِث: محروس من توصل خابرني مو تنسى.
هَيْصَم: بطل سوالف امي.
لائِث: اريد اعلمك على الحياة الزوجيه من هسه.
هَيْصَم: مستحيل اورطها وياي هيج ورطه.
لائِث: بس اني مكلت راح تزوجها.
هَيْصَم: وين تريد توصل من الأخير كولها لتجر طول وعرض بالكلام؟
لائِث: تحبها انت؟
هَيْصَم: لا.
لائِث: والعباس عيونك تكول غير شي بس انت تكابر.
هَيْصَم: انتبه على نفسك حبيب.
طلع من المستشفى ورجع للبيت نزل من السيارة وفتح الباب صارت بوجهه وسألته بسرعة.
كلاثم: بشر شلونها؟
رفع حاجبه وباوعلها بتعجب وحجه بنبرة تساؤل.
هَيْصَم: الحمد الله طلعت من العنايه ، اني متحمس اعرف شنو سبب هذا الحب المفاجئ الها بوقت قصير بالوقت المفروض بيه تكرهيها لان عايشه وي ابنج بدون صورة شرعيه؟!
كلاثم: لان اعرف تربيت ابوك شنو ومتأكده متسوي شي غلط وهم اعرف ومتأكده من حبها الك وحبك الها بس ثنينكم واحد اعند من الثاني، انطي فرصه وانسى الماضي وعيش حياتك لتعذب نفسك أكثر من هيج الفات مات وفيروز تستاهل تفتح وياها صفحه جديدة.
هَيْصَم: تعرفين جوابي بهذا الموضوع لذلك لتعبين نفسج.
كلاثم: الى متى تبقى هيج بدون زوجه واطفال تره تعبتني ذلك مسافر وميعرف عن أهله شي وانت معذب كلبي وياك ليش تخلي بالي يمك يا أمي؟
هَيْصَم: اعرف وين تردين توصلين بهذا الكلام وهذا السبب الثاني اللي يخليني ما ارجع للبيت ولا اتصل بيكم لان بكل مره تحجين بنفس السيرة على رغم تعرفين جوابي عشت كل عمري وحدي بدون زوجه واكدر اكمل باقي حياتي هيج على اي ساعه اموت فعلى شنو أعذب بنت الناس وياي؟
كلاثم: الموت حق علينا كلنه متفرق اذا جنت ضابط لو عامل لو الكل تفكر بنفس الطريقه جان ولا واحد تزوج وشاف حياته بس انت متريد تريح عقلي وكلبي وحاب تعيش بالماضي تستمتع بتعذيب نفسك وعاجبك هذا الوضع المأساوي والحزن، البنيه تحبك خليها تملي حياتك فرح صدكني مستحيل تندم احساسي ميخيب هاي اذا مصرت مدمن عليها حتى الشغل تنساه من تشوفها ثق بأمك وليدي وخليني اخطبها والله اسويلك احسن عرس كل المحافظه تحلف بيه.
هَيْصَم: عرس مره وحده ليش مستعجله انتِ؟
كلاثم: نخطبكم وعقدوا وعلى راحتكم حتى تتعودون على بعض ها امي شكلت؟
هَيْصَم: لا.
كلاثم: وتالي وياك راح تجلطني انت.
هَيْصَم: ريحي مخج اذا اريد اني اجي وكلج ميحتاج تلحين عليه مو طفل أني.
كلاثم: لا والله على هذا العناد حتى الطفل احسن من عندك.
هَيْصَم: اروح اسبح ميت تعب وانام شويه الساعه عشره كعديني اروح للمركز.
كلاثم: متروحلها؟
هَيْصَم: من اخلص شغلي أمر عليها.
كلاثم: وتبقى وحدها؟
هَيْصَم: خليت أرفد ينتبه عليها حتى اروح يمها.
كلاثم: اني اروح وابقى يمها حتى تجي وأريد اطمأن عليها مره وحده.
هَيْصَم: لا خاف يصير بيج شي.
كلاثم: ميصير راح اخابر نسر يجي ياخذني.
هَيْصَم: انتبهي على نفسج ولتخلين احد يعرفج ابقي يمها بالغرفه حتى اجي.
كلاثم: ماشي.
ضَرْضَم: نعم سيدي أأمر.
هَيْصَم: صار شي وياكم اليوم؟
ضَرْضَم: طلعنه للمظاهرات انصابوا كم واحد ورحنه دعم.
هَيْصَم: لابسين الواقيه؟
ضَرْضَم: اي سيدي.
هَيْصَم: انتبهوا على نفسكم ساعه واني جاي.
ضَرْضَم: أمرك سيدي.
هَيْصَم: ميخلون واحد يرتاح كل يوم مطلعين سالفه ناس طالعه اطالب بحقوقها بكل احترام ليش حتى يموتون بهذا الشكل وطن ملزوك بتيب ما اله حل ابد.
خلص الحمام وغير ملابسه مكدر ينام وكلبه يم فريقه وباقي المنتسبين طلع بسرعة الهم وصل للمكان المحدد نزل شافهم مجتمعين على مجموعه من المتظاهرين مرمي عليهم غاز مسيل للدموع ساعدهم بقوا للعصر بالمظاهرات بعدين نسحبوا للمركز بعد ما اجه الأمر من الأعلى.
ضَيْثَم: راح ادزلك عنوان تاجر مخدرات مطلوب من زمان روح داهم المكان وأهم شي تطلع سالم انت وفريقك.
هَيْصَم: أمرك سيدي، شباب.
هَمْاس: سيدي.
هَيْصَم: راح نطلع مداهمه لأحد البيوت تحركوا.
هَمْهَام: أمرك سيدي.
: فتحت عيوني بتعب شويه يلا وضحت الرؤيه انتبهت عليها كاعده على الكرسي والسبحه بأيدها ابتسمت وحجيت وياها.
فيروز: ليش تعبتي نفسج خاله؟
كلاثم: الحمد الله على سلامتج، تعب شنو هذا يابنتي حاسبتج مثل بناتي وان شاءالله تصيرين وحده من عدهن عن قريب.
تحجي بألغاز ومبتسمه بوجهي ارتاحيت نفسياً بشوفة وجهه اللي بيه نور رباني شخص امبين عليه البركه والحنيه من شافتني هيج صافنه بوجهه وابتسم مثل الثوله قاطعت الصمت وكالت.
كلاثم: ماعرف شلون اشكرج بنفس الوقت عندي عتب عليج شلون هيج تسوين وتشمرين نفسج على الرصاصه مخفتي يصير بيج شي لاسامح الله؟
فيروز: ابنج يستاهل اموت علموده وصدكيني مفكرت ولا للحظه بهذا الشي اهم شغله جانت على بالي انو ميصير بي شي ويتأذه.
جوابتني بسؤال خلاني ماعرف اجاوب.
كلاثم: تحبيه؟
صفنت بوجهه شويه بعدين كلت.
فيروز: ابنج اله افضال هوايه عليه وجان هذا اقل شي أقدمه حتى ارد معروفه أو وكفته ويايه.
كلاثم: ماكو انسان عاقل يرد المعروف بهاي الطريقه.
فيروز: شنو قصدج؟
كلاثم: قصدي يا أمي بس الخبل يسوي اللي سويتيه والانسان اللي يحب يكون مثل الخبل اتجاه محبوبه يشمر نفسه على الموت بدون ميفكر.
فيروز: بس أني ما احبه.
كلاثم: نفس جوابه وثنينكم كذابين.
ضجت من كالت نفس جوابه يعني هم فاتحه وياه الموضوع وكلها ميحبني، حجيت وي نفسي علمود أهدأ كلبي: اي وشنو تتوقعين معقوله يحبج بهاي البساطه انت منو اصلآ بالنسبه اله؟
كلاثم: لتفكرين هوايه بعدين تأذين نفسج اكثر اني متأكدة هو يحبج لتخافين من هاي الناحيه.
جاوبتها بسرعه وبدون مقدمات.
فيروز: ومنو كلج اني افكر بيه؟!
كلاثم: اعرف اعرف ميحتاج تكولين.
فيروز: ليكون انت تاخذين خيره واني ماعرف؟
ضحكت بصوت عالي ومسحت دموعها بكف ايدها بعدين كالت وهي مبتسمه.
كلاثم: سوالفج حلوه اكول ليش ابني متعلق بيج لهاي الدرجه.
فيروز: عندج ثقه بهذا الشي أكدر اعرف السبب؟
كلاثم: لان من سنين طويله مشفته يضحك ومرتاح مثل مشفته هسه وهو وياج.
فيروز: ليش؟
كلاثم: قصه طويله تخص حياته هو يسولفها الج افضل.
فيروز: ماضيه ميهمني خاله.
كلاثم: اعرف ممبين عليج فضوليه بالنسبه الماضيه.
فيروز: والله لو تعرف شنو بمخي محجت هيج ابداً بس محاولت أخليها تشك على شي جاوبتها بسؤال،
تكدرين تقرأين الناس بسهوله شلون تعلمتي هاي الطريقه؟
كلاثم: زوجي مات وترك عندي ست اولاد هَيْصَم اكبر واحد عندي، بعد وفاته شبه تركنه ونعزل بس جان يجي بين فتره والثانيه يطمأن علينا ويجيب راتبه وراتب ابوه علمود المصرف والبيت احنه ساكنين بالبصره بس بعد وفاته رجعت يم اهلي بأربيل انطوني اهلي قطعه من الورث وهَيْصَم بناها ألنه صحيح مجانوا ولدي اصغار بس هم يحتاجون عنايه واهتمام واني عندي اربع بنات يدرسن وحده بالكليه والبقيه بالمدارس عشت بمجتمع طايح حظه حشاج اني المرأه الكبيرة مسلمت من كلماتهم وتحرشهم فالحياة علمتني هوايه أمور اهمها لازم تصيرين قويه وتحاربين علمود تعيشين بسلام وعلمتني منو ناسي اللي اعتمد عليهم واعطيهم ثقتي، الهدف من كل هذا الكلام اللي دوخت راسج بيه انو لازم تعرفين مثقيت بيج بدون سبب بس قريت بعيونج حب جبير لأبني ومغلطت من شمرتي نفسج للموت علمود تنقذيه عسى ربي يديم هذا الحب ويكبره ويجمعكم تحت سقف واحد واشوف أبنائكم وافرح بيكم حبيبتي.
: كلماتها تنطيني امل ابتسمت بوجهه ومحجيت شي، خلصن هاي اليومين وكدرت اطلع من المستشفى وأرجع للبيت مشفت هَيْصَم هوايه اغلب وقته بالمركز بس يراسلني ويتصل بيه حتى يطمأن على سلامتي وضعنه مثل ما هو وما اكو اي تطورات بس خالتي اللي تعبت ويايه حيل هاي الفتره تغسلي وتساعدني اغير ملابسي وتمشطلي صارتلي ام من صدك ومستحيل أكدر انسى معروفها ودعمها اليه وكل شويه سمتني جنتي ومن تشوفني اضحك تكلي راح تتأكدين من كلامي وكولي كلاثم كالت، خلص اسبوع كامل بعدني مفتحت الخياط او مازال أكو ألم مكان العمليه اشرب منوم يلا أكدر انام وبصعوبه يلا اتحرك عكس اول مره يمكن بسبب الرصاصه وجانت عمليه صعبه، رجع للبيت وجنت فرحانه بجيته صار يومين مشايفته ومشتاقتله حيل طلعت بالصاله اخذتني خالتي حتى اغير جو لان اختنكت بالغرفه هو دخل ونظرلي بطريقه غريبه وكال كلمات كسرت كلبي وحطمت كل أحلامي ودموعي شكد كافحت حتى مينزلن نزلهن من كال..
يتبع.
البارت اكثر من 3700 كلمه واللي تكلي قصير اموتها شمعاتي.
تصبحون على الف خير وعافيه.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!