للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
حَاولت أَن أَخفي هواك وكلّما
أخفَيته في القلبِ فاضَت أَدمُعي
بالبَين قَد قَضَت الليالي بَينَنا
لكن روحك لَم تغِب دوماً مَعي
فيروز
هَيْصَم: يوم اريد اتزوج.
كلاثم: شنوو!!
هَيْصَم: ليش هيج مصدومه متردين ابنج يتزوج؟!
كلاثم: اي بيها الخير بس صدمتني من جنت اكلك متقبل وهسه اجيت فجأة تكولي اريد اتزوج اكيد هيج تكون ردة فعلي شنو متوقع لعد؟؟
هَيْصَم: على كل حال حضري نفسج يوم الجمعه ترحين تخطبيلي.
كلاثم: وليش اروح؟
بس لحظة انت منو ناوي تزوج؟
هَيْصَم: مو غريبه تعرفيها حق المعرفه وتعرفين أهلها هم.
كلاثم: لتجيبلي الجلطه من الصبح كول منو هي اللي تريد تزوجها هيج فجأة ليكون دكيت الناقصه وياها وتريد تورطنه ولك؟
هَيْصَم: استغفر الله ليش تخبليني معقوله هيج تسوين بس لان كلت اريد اكمل حياتي وي البنيه اللي اختاريتها من الاخير كولي تخطبيلي لو لا؟
كلاثم: غير تعرفني على ست الحسن والدلال السحرت ابني بين ليله ويوم وقرر يتزوجها هيج فجأة وبدون سابق انذار.
هَيْصَم: حوري.
كلاثم: حوري منو؟
هَيْصَم: بنت اختج متعرفيها.
كلاثم:على جثتي مستحيل اخطبها.
هَيْصَم: ليش؟!
كلاثم: البنيه بكد بنتك شلون تكدر تعيش وياها وتتفاهمون؟
هَيْصَم: اربيها على أيدي مو مشكله انت بس اخطبيها اليه والباقي محلول.
كلاثم: سوالف الهمج بطلها انت اعقل من هيج.
هَيْصَم: يا همج ام هَيْصَم ليش تخليني اروح اخطبها وحدي او والله اسويها.
كلاثم: روح اخطبها والله العظيم من بعدها لا انت ابني ولا اعرفك وتنسى عندك ام فاهمم.
هَيْصَم: كل الأمهات يفرحن لأبنهن اذا راد يعيش حياته ويتزوج ليش انت فرق عنهم جنت مفكر راح تفرحيلي بس طلعت غلطان طلع كلامج مجرد لقلقه لسان مو حقيقي ابداً.
كلاثم: افرح تزوج زعطوطه متفهم شي من الحياة وين لكيتها هاي؟!
اول مره اشوف واحد يعيف الألماس وياخذ فحم فاجأتني متوقعتك هيج غبي ابداً.
هَيْصَم: لأن اريد اتزوج صرت غبي؟!
كلاثم: لعد شنو تسمي تصرفك هذا؟
هَيْصَم: كل انسان يختار شريكه حياة مناسبه اله وين المشكله ما افهم!!
كلاثم: شريكه حياة كلتها يعني انسانه تكون وياك بكل لحظاتك الحلوة والسيئه تشارك سعادتك وحزنك تضحي بحياتها علمود سلامتك بس انت عقلك محجر لو مو اختي وما اعرفها جان كلت سحرتك بس اللي اموتني انك من وحدك مقتنع تاخذ وحده بكد بنتك.
هَيْصَم: العمر مو قياس اهم شي الأخلاق.
كلاثم: حتى لو جانت بنت اختي اني رافضه تماماً هذا الزواج واذا سويتها وأخذتها لا اني امك ولا اعرفك واعتبرني ميته واضح كلامي.
: اختنكت حيل ومتحملت ابقى بهذا المكان واسمع شنو يحجي اكثر نهضت من مكاني على كيف ودخلت للغرفه وهنا سمحت لدموعي تنزل على راحتها خليت أيدي على حلكي ومنعت شهكاتي تطلع حتى محد يسمعني ويفكرون كاتله نفسي عليه، جنت متأمله حتى لو مجرد احساس انو يصير اليه يوماً ما بس هو سوه العكس، كلما يقترب من عندي يوهمني بحبه ويرجع يصحيني على نفس الجمله ( لتحبيني اني وياج ما ألنه مستقبل) وهسه راح يخطب بنت خالته شنو اللي شافه بيها ومشافه بيه ليش هيج يسوي ويايه واني الف مره كتله لتعلقني بيك وانت تعرف نهايتنه شنو، بس مستحيل اسمحله يكسرني بهاي الطريقه لهنا وكافي ما ألي مكان بهذا البيت لازم ابتعد عنه قدر المستطاع، بجيت، لطمت، صرخت، كله بسكته منو الشخص اللي يستاهل اذل كرامتي عليه؟
الواضح كل اللي حسيته وعشته جان وهم خلقه عقلي لا أكثر، بقت فكرة تاخذني والثانية ترجعني حتى غفيت بدون ماحس، فزيت على صوتها وهي تكعدني.
كلاثم: يا أمي شنو بيج صار ساعة اكعدج وانتِ ماكو ولا حرف خوفتيني حتى اتصلت بهَيْصَم يجي علمود ياخذج للمستشفى عبالي صار وياج شي لا سامح الله.
فيروز: مبيه شي بس لان اشرب العلاج انام بهاي الطريقه لتخافين عليه.
كلاثم: شفتي الملعون شنو يريد؟
جاوبتها والغصه بداخلي جبيرة.
فيروز: من حقه ليش تمنعيه يعيش حياته مثل ميريد؟
كلاثم: لتخليني ابتلي بيج انتِ الثانيه زعطوطه شنو يفهمها بالزواج والعيال مصار فتره من تخرجت من السادس بعدها مراهقه متفقه شي باجر من تكمل جامعة بلكي عجبها واحد من الشباب اني هيج بنات صغيرات ومدللات ما احب احملهن مسؤوليه يصير عدها أطفال تربيه وتعليم وين تكدر عليهن كلهن اذا هي نفسها محتاجه تربيه؟
فيروز: انتِ اول وحده اشوفها متحب بنت اختها!!
كلاثم: مو قصة حُب بالعكس بس اني اكثر وحده تعرفها وما اريد اورط ابني بيها.
فيروز: عذريني على فضولي بس شنو السبب؟
كلاثم: حاسه تحب واحد امبينه اربع وعشرين ساعة من اجتي يمنه الموبايل موكع من ايدها ودائماً كاعده بالغرفه قله اشوفها نازله واذا نزلت بس تراسل وتضحك صحيح اني مرأه جبيره بس اعرف بنات هذا الجيل.
فيروز: لتظلميها يمكن تحجي وي صديقتها مو شرط عدها شخص تحبه.
كلاثم: لا أعرف الحب امبين بعيونها من تجي رساله على موبايلها حسيت بيها وكلبي ميجذبني.
فيروز: ليش مكلتي لهَيْصَم؟!
كلاثم: اخوانها صعبين وما اريد اتحمل خطيتها عندي بنات اربعه بس صدكيني على كص ركبتي ما اخليه يتزوجها.
فيروز: يجوز هو الشخص اللي تحجي وياه بس ميردون يكولون؟
كلاثم: اي ليش لا هاي الدنيا الغبره كل شي بيها واني جنت متأمله ازوجج اله شوفي الحظ.
فيروز: اريد احجي وياج بموضوع مهم.
كلاثم: اي حبيبتي سولفي اسمعج.
فيروز: اريد اطلع من هذا البيت بما انو ابنج راح يخطب فماكو داعي ابقى اهنا ما أريد تصير وياه مشاكل بسببي.
كلاثم: وين ترحين انتِ كلتي ماعندي بيت؟
فيروز: أأجر، راتب والدي التقاعدي طلع أكدر أعيش بيه واني من اتعافى وافتح الخياط أشتغل واعيش نفسي المهم اطلع من هذا المكان.
كلاثم: طاح حظ بنات هل وكت شيلعبن بعقول الشباب وين ردت نوصل وشوفي شنو صار ويانه.
فيروز: رب العالمين كاتب كل شي لتلومين احد خاله بعدين انت فاهمه الموضوع غلط اني و هَيْصَم مبيناتنا شي ولا حتى حب.
كلاثم:هذا حجي اقنعي بيه نفسج اني اعرف عدل ومثل مشايفتج هسه كدامي كلوبكم ثنينكم تنبض لبعض بس انتوا واحد معاند الثاني اكيد متنجمعون.
فيروز: ميفيد الحجي صار اللي صار وانتهى وكل واحد لازم يمشي بطريقه.
كلاثم: والله لو اعرف اسطره بأم عباس وما اخليه يتزوجها اني تالي عمري وصبري عليه كل هل سنين يتزوجلي وحده متفتهم شي بطول رجلي والله لو يموت ما اورطه هيج ورطه.
فيروز: اسم الله عليه خاله اهم شي سلامته وخلي يتزوج اللي يختارها كلبه.
كلاثم: شفتي شلون ادافعين عنه ومتقبلين عليه هذا كله من حبج ليش معانده يا أمي انتِ؟
فيروز: شنو تردين من عندي اسوي؟
كلاثم: كليلي اني مثل امج والله العظيم امنعه بس انتوا مربطين أديه.
فيروز: شنو تكدرين تسوين مثلاً؟
كلاثم: اي شي بس المهم اعترفيلي بمشاعرج ناحيته خليني احارب علمودج يابنتي.
فيروز: ليش حتى تسوين هيج؟
كلاثم: هوايه اسباب واحد من عدها اعرف محد يستاهله غيرج وثاني شي حبيتج هيج من الله وتمنيت تنجمعين انت وياه واني عايشه.
فيروز: عمرج طويل ان شاءالله.
كلاثم: هسه قصير لو طويل كليلي انتِ تحبيه؟
: صفنت بعيونها شويه اعرف عدل هي متكدر تسوي شي واعترافي الها مذله لنفسي مو أكثر قررت اكتم اللي بداخلي واحتفظ بيه ميحتاج شفقه من أحد اذا هو كلبه مختارني فأني ايضاً ما أريده حتى لو صار نبي زمانه، جاوبتها على سؤالها وجان عكس داخلي تماماً.
فيروز: ما احبه واللي سويته مجان من باب مشاعري وإنما بسبب امتناني على اللي قدمه اليه، سكتت شوية ورجعت كملت بس رب العرش يشهد مو هذا اللي أريده ابداً: لتوكفين بوجه حبهم كوني سبب لجمعتهم وعسى ربي يوفقه لان يستاهل كل خير.
كلاثم: جوابج مقنعني بس راح أحاول اصدك ولتفكرين ابداً اني راضيه على زواجه من عدها ربي يشهد عليه معاجبني الوضع ابد بس بما انو هاويها مراح اكسر بواهسه.
تركتني وطلعت بقيت لليل بالغرفه وخالتي الله يسلمها جابت العشا يمي هي تطبخ وتنظف تعبت ويايه حيل وصدك حسيت بيها ام عدها حنيه عجيبه حبتني وثقت بيه على رغم متعرفني الا من كم يوم، العلاج اللي اشربه يخليني دايخه وبسرعه انام يمكن بسبب العمليه حتى ما اتأذه، الدنيا ظلمه والجو دافي، فزيت على أيد تلامس وجناتي نرعبت للحظه هذا منو بس اول مفتحت عيوني سكتت من شفته كاعد مقابيلي متحملت هذا القرب وهاي لأول مره يصير بيه هيج من بعد محسيت ناحيته بمشاعر حب ضجت من عنده او يمكن كلبي ميريد يستوعب انو اللي يسوي والأسلوب اللي يتعامل بيه ويايه هو نفسه راح يعيشها اياه لذلك قررت ابتعد عنه قدر الأمكان، صمت قطعته واني اباوعله.
فيروز: اطلع بره ولتجي لهنا مره ثانيه لأي سبب حتى لو شفتني انازع.
هَيْصَم: شكو شبيج ليش تحجين وياي بهذا الأسلوب اليوم؟!
فيروز: عاجبني شفت من غير المناسب انو تتصرف ويايه هاي التصرفات الهمجيه وانت على أبواب خطوبه على ما اضن اني مو لعبه بأيدك وتتحكم بيها شوكت متحب.
هَيْصَم: بيج شي لَّباءَة؟
فيروز: ليش شايفني مكفشه شعري لو اصرخ؟
هَيْصَم: عوفج من كل شي وكولي ليش تردين طلعين من البيت وترجعين البيتج؟
فيروز: لان بقائي اهنا غلط واكبر غلط هم وطول عمري راح اندم عليه وصار الوقت اصححه برجعتي لبيتي وانهي كل شي بهذا المكان.
هَيْصَم: هي مو دكمه وطفيها هاي مشاعر مسيطره على الكلب والعقل والروح من الصعوبه تتخلصين من عدها.
فيروز: شنو تريد من عندي هسه؟
هَيْصَم: أجيت اطمأن عليج مو اكثر أمي اليوم اتصلت بيه وكالت كعدت بيها هوايه ومتجاوب متعرفين شنو صار بحالي وقتها خفت لا اخسرج من صدك هاي المره.
فيروز: على اساس انت تهتم!!
هَيْصَم: انتِ اكثر شخص اني اهتم بيه بس الواضح ممنتبهه.
فيروز: نسيت اباركلك.
حجيت هيج بس اريد اشوف ردة فعله حتى اقطع الأمل وابطل افكر يغير قراره يمكن غباء من عندي بس هيج كلبي يريد.
هَيْصَم: على شنو؟
فيروز: على الخطوبه.
هَيْصَم: اي الله يبارك بيج.
فيروز: اطلع بره أريد انام.
هَيْصَم: لهاي الدرجه منزعجه لأن راح اخطب؟
ضحكت مستهزءه: منو أني!!
هَيْصَم: ما اعتقد اكو غيرج بالغرفه.
فيروز: ما انزعج بسبب شخص مثلك أني اكبر من هيج بهوايه.
هَيْصَم: ولهذا السبب تردين تطلعين من البيت؟
فيروز: من الأساس وجودي بهذا المكان اكبر غلط وكل غلط لازم يصلح.
هَيْصَم: واني ما اقبل تطلعين من البيت خاصتا بعد اللي صار وياج.
فيروز: وهاي المره مراح اخذ رأيك وانت متكدر تجبرني.
هَيْصَم: شلون يعني ما أكدر اجبرج؟
فيروز: مو من حقك، انت راح تعيش حياتك مثل متريد واني تحكمني بمزاجك وين العدل بس فهمني؟
هَيْصَم: حياتج بخطر انتِ اللي افهمي، لتفكرين ابداً انو كلامي قبل ما اخذج لبيت خالتج جان صح من البدايه كلت وراح ارجع اعيدها حياتج مهدده والسبب والدج ومن ثم أني تردين تكولين دمرت حياتج كوليها أتفهم بس طلعه من هذا البيت ماكو لو اتزوج عشره مو وحده.
فيروز: بأي حق تمنعني انت منووو، شلون تكدر تعاملني بهاي الطريقه؟!
اعيش وياك وانت متزوج هذا المحال بعينه حتى لو نخطفت ونقتلت وتمثل بجسمي.
هَيْصَم: متردين اتزوج لَّباءَة؟
فيروز: حياتك وانت حر بيها بس اني مستحيل ابقى اهنا اكثر من هيج كلام خالتي صح وجودي يمك هو الخطأ بعينه ارتكب حرام بدون فائدة وسبحان الميخطأ بس الشاطر اللي يصلح غلطه وميستمر بيه.
هَيْصَم: لو صرتي أمام جامع هم تبقين تحت عيني حتى اطمأن على سلامتج وكلت لو اتزوج عشره هم تبقين انتِ الأساس المستحيل استغني عنها.
فيروز: لتعذبني اكثر من هيج هَيْصَم خلي الك بكلبي ذكرى طيبه لتخليني احقد عليك وانسى كل شي حلو صار بيناتنا.
هَيْصَم: وبسبب الايام الحلوة مستحيل اعيفج نقطه انتهى.
فيروز: مو من حقك وراح تشوف حتى لو اموت بالطريق باجر أني راجعه لبيتي واللي توصله ايدك لتقصر بيه.
هَيْصَم: بهاي الحاله ارجع اتصرف وياج بنفس الأسلوب الهمجي واخليج اهنا تحت الإقامه الجبريه.
فيروز: متكدر مو نفس فيروز اللي شفتها قبل أشهر تغيرت هوايه والك الفضل الجبير بهذا التغيير.
اقترب من عندي، صار وجهه مقابيل وجهي دفعته بس مبتعد اقترب اكثر لدرجه شفايفه طخت بشفايفي التفتت وكلت مقاطعه هاي اللحظة: وخر عني لتسوي هاي الحركات سوالفك الطايح حظها بطلها اني مو مرتك.
جاوبني وايدة نمدت لفكي رجع وجهي لنفس القرب.
هَيْصَم: ممكن تصيرين عن قريب محد يعرف الحياة شنو ضامتلنه.
فيروز: وخر عني هَيْصَم خليك انسان محترم وبطل سوالف السرسريه.
هَيْصْم: اصير سرسري بس يمج وطلبت من أرفد ينطيني علاج لهاي الحاله تعرفين شنو كلي؟
من باب الغباء سألته.
فيروز: شنو كال؟
هَيْصَم: علاجك هي بما انو بس يمها تحس نفسك بخير فخليها قريبه عليك دائماً ولتبتعد عنها لحظه، وانتِ تعرفين هو الطبيب الوحيد اللي أثق بيه مو فقط طبيبي وإنما صديق وأخ وكلامه يتنفذ بالحرف.
فيروز: اي واني شنو دخلني نفذ كلامه بعيد عني رجاءً اطلع هَيْصَم اريد انام كلش تعبانه واذا بقيت كاعده يرجعلي الألم.
هَيْصَم: باجر اخلي أرفد يجي لهنا اريد اشوف ليش بعدج تتأذين وصار اكثر من سبع ايام من سويتي العمليه.
فيروز: لان الخياط منفتح والألم من عنده ماكو داعي تتصل بيه.
هَيْصَم: الموضوع من يخص صحتج مراح اخذ رأيج بيه خليها ابالج هاي الجمله.
فيروز: تمام بس اطلع اريد انام كلش نعسانه.
هَيْصَم: نامي راح ابقى موجود حتى تغفين.
فيروز: مراح اهرب واني بهذا الوضع بس من أصير احسن وعد مراح ابقى دقيقه حتى لو هددتني بالقتل.
هَيْصَم: مستحيل اكون سبب بأذيتج لتفكرين أستخدم وياج العنف رجال لطيف اني.
فيروز: شنو تريد هَيْصَم كولها من الاخير ولتشلع كلبي وياك.
هَيْصَم: يوما ما كلتيها واني راح ارجع اعيدها اليوم، اريدج.
ضحكت بصوت عالي وباوعلته بأستنكار وحجيت بغيض جبير من كلامه بوقتها اني مجنت اقصد شي سيء طلعت من عندي لا ارداي بس اليوم نبرته جديه حسيتها طالعه من كلبه فرحت لو مجان يريد يخطب ويتزوج بس واحنه بهذا الوضع شنو الداعي اللي يخلي يحجي ويايه هيج؟
فيروز: من شوكت تحجي ويايه بهاي الطريقه احترامي الك وسكوتي عن تجاوزاتك السابقه ميعني أبداً اني بايعتها خلي بيناتنا احترام حتى ما اذكرك بسوء بالمستقبل.
هَيْصَم: محترم جداً لهاي اللحظة هذا اني بعيد عنج تردين اكثر من هيج احترام؟!
فيروز: اذا كل هذا وانت تحترم عدم احترامك شلون يصير؟
هَيْصَم: تذكرين اول يوم بقيتي اهنا شنو كتلج؟
فيروز: هوايه جمل منو عدهم تقصد؟
هَيْصَم: رجال ومرأه وحدهم بالبيت وثالثهم الشيطان شنو تتخيلين يصير؟
فيروز: مراح اتخيل شي البنيه الشريفه لو خليتها بجيش مال ساقطين تربيهم وتطلع لتتخيل ابداً اسمحلك تتجاوز الحد ويايه اموتك صدكني وادخل بيك إعدام.
هَيْصَم: اعرفج ولهذا سميتج لَّباءَة الهَيْصَم لان اعرف منو انتِ وشنو اخلاقج حتى قبل ما تجين لهذا المكان.
عقدت حاجبي وعقلي بلش يلعب سألته وداخلي ميت حتى يعرف جوابه.
فيروز: شلون يعني تعرفني قبل ما تجيبني لبيتك؟!
هَيْصَم: بأعتقادج شخص مثلي خلص عمره بالحروب والجيش والمشاكل راح يأمن على بنيه ميعرفها ويخليها أبيت يحمل ماضيه وحاضره؟!
فيروز: وضح أكثر مفهمت.
هَيْصَم: مو مهم تفهمين على الأقل اعرفي اني اعرفج لذلك ماكو داعي حتى تعيدين كل مره نفس الكلام عندي علم بأخلاقج وتربيتج وانتِ منو، السيفي مالتج كامل حافظه عن ظهر قلب ولتسألين ليش ماعندي جواب بالوقت الحالي.
فيروز: الى متى تبقى بهذا الغموض تره موتتني على الاقل هذا يخص حياتي ومن حقي اعرف بيه.
هَيْصَم: ميخص حياتج ابداً وإنما اشياء رتبطت بماضي وعلاقات قديمه وعد اشرحلج كل شي بالتفصيل بس مو هسه.
فيروز: وماكو قادم راح اترك هذا المكان غصب حتى لو مرضيت.
هَيْصَم: على الاقل خليج موجوده ليوم الخطوبه وتحضرين ويايه اعتبري هذا اول طلب اليه وعيب ترجعيني.
فيروز: وشنو أسوي بخطوبتك وبصفتي منو اكون موجوده مستحيل اخلي نفسي بوضع محرج مثل هذا اعذرني بس ما أكدر.
هَيْصَم: بصفتج وحده من بنات امي.
فيروز: اعترفت بيه اختك يعني؟!
هَيْصَم: حتى جنتها تصير بنتها وين المشكله.
فيروز: اكره من تحجي بهاي الطريقه.
هَيْصَم: احب اشوفج هيج معصبه.
فيروز: وليش تحب تحرك كلبي!!
هَيْصَم: وجناتج من يصيرن حمر يعجبني.
فيروز: وتالي وياك انت؟ كم مره كتلك بطل غزل؟
هَيْصَم: خلي اشاركج سر صغيروني أرفد من محبين الشعر فغزله كله بقيس والمتنبي اما اني عكسه تماماً على رغم درست قانون وانت تعرفين بس عمري كله خلصته ادرب على السلاح حتى اصير بالسلك لذلك كلش بعيد عن القراءة والحفظ حياتي كلها محفظت قصيده لكن اسمع هوايه بس متهويني هاي السوالف ولأول مره البارحه كسرت هذا الحاجز من سمعت قصيدة وجذبتني ابياتها وحفظتها لان عدتها اكثر من مره حتى لائِث جان يسولف يمي ومنتبهت عليه تردين تسمعيها لو اخليها بكلبي؟
فيروز: وليش تريد تسمعني اياها؟
ابتسم وبانت غمازته نبرة صوته وطريقه كلامه اتدل على انو يريد يحرك كلبي مو اكثر.
هَيْصَم: مو الجمعه خطوبتي فأريد اسمعها الج مثل ميكولون بروفا حتى اعرف نفسي حافظها عدل لو لا؟ اكيد متقبلين انحرج كدامها.
جاوبته بعصبيه حاولت قدر الأمكان ما اظهرها بصورة واضحه حتى ميكول غارت.
فيروز: واذا نحرجت كلش طبيعي مو زين حافظ قصيدة علمودهاا.
اللي موتني جوابه اليه ابرود.
هَيْصَم: وانتِ ليش هيج عصبيه مبيها شي اذا سمعتيني.
فيروز: بشرط.
هَيْصَم: بعدها اطلع وعد.
فيروز: وشلون عرفت اني هيج اريد؟!
هَيْصَم: حافظج اني.
فيروز: سمعني يلاا.
هَيْصَم: استحي.
فيروز: هَيْصَم والخلقك تعبانه فضها عاد واحجي.
هَيْصَم: مو تعيبين عليه.
فيروز: انت شنو مشكلتك اليوم بس اريد افهم؟!
هَيْصَم: اريد اضحكج وجهج حيل مكتأب واني ما احب هيج اشوفج.
على اساس ميعرف هو سبب ضوجتي زادني قهر من بدأ يقرأ القصيدة وتخيلت شنو يسويلها بالخطوبه مالتهم.
هَيْصَم:
لا ماشاء الله يخبل عليك الشوك
مدري شضام بعيونك حجي النضره
مو شرط الحلو تلكا حلو ومحبوب
ومن تقربتلك وضحت الفكره
من اسمعك كلمه تخجل والبياض يروح
ومن الله تطك بخدودك الحمره
اجيك وتبتسم وامشي وتضل حزنان
وجمالك بلثنين يزيد بلفطره
مثلك ماشفت ضحكتك تسبي العين
وتصير احله من تخنكك العبره
احبك جي ادنك لو حجيت وياي
يم خيالهه اطخ راسهه المهره
المهم حضي كعد خل توكف الدمعات
غزل تنكط عيونك وشتهيت اقره
البطن النكلتك شيصير منهه لهيل
وعلى يانار جانت حسنك تخدره
مصبحه بيا وجهه امك وطلكت بيك
بخد يوسف بدت بوجوهنا الصفره
اله بواسطه هذا الجمال يصير
بس ما اريد اشك بلخالق وقدره
بلون وجوهنه ناسيله ساعه اليل
دكلي بوجهك انته شناسيه الكمره
دفو جفوفك خبز طالع من التنور
ابيض ضاهرك وروحتك سمره
استلذ بيك وانسم واحجي خمس اشكال
وادمن بيك مو مدمن على الخمره
واهنيك وصدك تفتهم من حبيت
الحسن ماي وتبده والعشك مجره
عندي احساس كلمن حب يحبه الكون
الشمس تشتاقله وتغازله الشجره
واحس حته الهوه يتأكد من الروس
الماشايل عشك ما يلعب بشعره
هلا بلطاير تمنيتك وحطيت
ليوم بكل درب وياك احط ذكره
اليوم اندل صبايا وطيش عمري الفات
وسنين العكل من عدهن اتبره
شبيها من ارجع العشرين المغربات
واصبغ شيب براسي بروحك الخضره
واتراهق وابوسك وين ما ممنوع
بستثناء عيون الوادم الفقره
ذوله نحرمو من الوطن ومن الخير
مو مال اتركلهم بلكلب كسره
مادامك جنح محتاج امر بلغيم
من ايام الصغر ما رايح بسفره
عوضني اليحب يصغر بعينه الراح
وسويني بشر ماينكر العشره
(الشاعر رائد ابو فتيان)
: شنو يتحمل كلبي اكثر من هيج بعد؟
صفنت بعيونه وسألته وتمنيت ميكون الجواب اللي أبالي.
فيروز: تحبها؟
صبرت نفسي بألف ياعلي حتى متنزل دموعي من كال.
هَيْصَم: ماعرف بس هي شاغله عقلي اربع وعشرين ساعه أرتاح من اكون يمها وكلبي الهادي يبدي يضربني بعنف وكأن اني بسباق، تبعثرني ايامي وترجع ضحكتها تجمعني من جديد هي بلسم لجروح كلبي وعلاج روحي ودفو ايامي هي وردتي اللي اخاف عليها من نفسي اخاف اشمها زايد وتذبل، برأيج هذا يسموه حب؟
فيروز: شوكت صار كل هذا قبل فتره كلتلي كلبك ميتحمل يحب وحده؟!
هَيْصَم: بعدني على كلمتي وبعدني ممعترف النفسي انو اني احبها بعض المرات الراحه اهم من الحب واني أرتاح من اكون بحضنها وقريب من عدها.
فيروز: هي تعرف بهذا الكلام؟
هَيْصَم: اي اليوم سولفتلها بس منطتني جواب، على كل حال اني ممستعجل انتظر يوم الخطوبه واحجي وياها براحتي واعبر عن كل اللي بداخلي بأريحية.
فيروز: الله يسعدكم ويرزقكم الذريه الصالحه.
هَيْصَم: آمين ان شاءالله تتقبلني بماضيي وجروحي وتعبي وتكدر تغير الهَيْصَم.
فيروز: اذا جانت تحبك تتقبلك لتخاف من هاي الناحيه.
هَيْصَم: ولهذا السبب اختاريتها لان اعرف بيها راح تتقبلني بكل سوادي وتعالج جروحي بأديها الحلوه.
كالها ولزم أيدي تصرفاته اليوم غريبه بس عقلي ميستوعب لوين يريد يوصل كل اللي شاغلني هو خطوبته وزواجه، وخرت أيدي من عنده وكلت بجديه.
فيروز: سمعتلك وهسه تكدر تطلع اريد انام.
هَيْصَم: نوم العافيه انتبهي على نفسج لتتأذين وانت نايمة.
فيروز: خالتي تنام يمي لتخاف.
هَيْصَم: صدك وينها مشفتها من اجيت؟
فيروز: بالحمام.
هَيْصَم: تمام تصبحين على الف خير ولتفكرين هوايه بخطوبتي متستاهل تاخذ عقلج تبقين أنثى الأسد غصب عن الكل او وريث الهَيْصَم ميكون الا من لَّبوة أكدر أأمنها على عريني.
فيروز: انت كلها عندك أنثى الاسد؟!
هَيْصَم: والله هي بس وحده والعندي غبيه متفتهم تريد افتح عقلها وادخل المعلومات واني احب اللي يفهمها وهي طايره.
فيروز: اني غبيه وما افهم وهي طايره، اللي تريد تكوله احجي بالقلم العريض لتبقى تحجي بالألغاز وتطلب من عندي افهم.
هَيْصَم: يلا هن مجرد يومين وتفهمين قصدي.
اجه يطلع وقفته.
فيروز: هَيْصَم.
التفتت وكال.
هَيْصَم: وردته.
خجلت وسكتت شويه بس الفضول دفعني اسأل لذلك كلت.
فيروز: ليش قررت تزوج بهاي السرعه؟
هَيْصَم: الجمعه تفهمين وهسه نامي وارتاحي لتخلين بالي يمج يراحة الهَيْصَم.
طلع واني بقيت مبتسمه مثل الثوله على كلماته وردته وراحته غطيت وجهي بالبطانية ولو مو الألم ركصت رجعت ضجت من تذكرت هذا كله مؤقت وراح ينتهي بعد ايام قليله نزلت دموعي وبقيت صافنه بالسكف حسيت بالباب ينفتح سويت نفسي نايمه حتى متحس بيه ضايجه وتنقهر عليه وتشك بالموضوع ومطولت هوايه وغفيت.
لائِث: والعباس مسحور.
ضَرْضَم: استغفر الله ليش تتهم الناس انت؟!
لائِث: ولك اعقلها مصار اسبوع وشمرت نفسها للموت علموده، يجي يخطب بنت خالته بين ليله ويوم؟
هَمْهَام: انت شلون عرفت ليش احنه ماعدنه خبر؟
لائِث: امه خابرتني تكلي قنعوه يبطل من عدها.
هَمْاس: على اساس ماتعرف ابنها شلون عنودي وراسه يابس.
لائِث: ولكم راح انجلط شلون يجازيها هيج؟!
هَمْهَام: وانت شكو تطلك بمكانها!!
لائِث: ولك راح اموووت والله متستاهل يعني واحد يشمر نفسه بالموت علمودي اعيفه واتزوج واحد ثاني؟!
هَمْاس: ما اقتنعت الهَيْصَم مستحيل يسويها.
ضَرْضَم: شنو قصدك؟
هَمْاس: عاش عمره بدون زواج معقوله بهاي السهوله يتزوج وحده أصغر من عنده بهوايه وبعيد عن كل هذا انتوا شفتوا شلون وصل للموت من انخطفت تعقلوها يعيفها بهاي السهولة؟
لائِث: والله كل شي اتوقع من عنده مراح اتفاجئ.
هَمْهَام: بالنهايه هاي حياته مو من حقنه ندخل اذا هو مطلب من عدنه.
لائِث: انجب مندخل والمسكينه اللي مبقى عدها احد أهلها راحوا واحد وره الثاني منو يفكر بيها؟
ضَرْضَم: انت ابو كلب الجبير فكر بيها.
لائِث: امفكر منتظرك تكلي.
هَمْهَام: الله يساعدها خسارة اللي تحبه صعبه.
هَمْاس: وانت ليش تلطم بس لاعافتك؟
هَمْهَام: ابوها رفض يكول ما ازوجها لأي أحد لا غريب ولاكرايب.
ضَرْضَم: تخبل هذا وين وعده والحجي وخبصنه ياحيف على الشوارب الماعدها كلمه.
لائِث: نرجع نخطبها بس خلي تفض شغلة هَيْصَم والله كريم.
هَمْهَام: ان شاءالله.
: فزيت من النوم مخترعه من الحلم اللي شفته طلعت حتى اغسل وجهي وقفني صوته الواضح يسولف، الفضول دفعني اسمع وي منو يحجي بهيج وقت متأخر خليت أذني قريب على الباب ونصدمت من اللي سمعته صدك حطم آخر امل انبنى ابداخلي من انو يكون اليه يومآ ما..
يتبع.
البارت اكثر من 3800 شمعاتي.
تصبحون على الف خير وعافيه غاليني.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!