للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه.
شاركوا القصه حتى تكبر عائلتنه ونستمتع وي الهَيْصَم مع بعض.
هَيْصَم
الكاتبة زهراء احمد
__________
هناك أمور يكاد يستحيل على المرء أن يرويها، وأن أبسط الأفكار وأوضح الافكار هي بعينها أعسرها على الفهم.
عقدت حاجبي بتساؤل وكلت.
فيروز: منو هذا لّهيم؟
هَيْصَم: هذا سؤال موجه الج منو لّهيم وشنو العلاقه اللي تربطكم حتى استنفر كل جماعته يدورون عليج؟
فيروز: احنه متفقنا تحقق ويايه وانت مو بوعيك روح نام ورتاح وباجر نسولف بهدوء.
ضرب على الكرسي بقوة وصاح بغضب.
هَيْصَم: لتحاووولين تلعبين وياي بعدج ماعرفتي اني منو، اتقي غضبي وهااااي آخررر مره اسأل لّهيم منوو وشنووو علاقتج بيه؟
اخذت نفس عميق وحجيت بقلة صبر.
فيروز: ماعرفه وهذا الأسم اول مره اسمع بيه ماتربطني علاقه مع اشخاص يمتلكون اسماء غريبة مثلك ومثل لّهيم، اني مجرد بنيه حالي حال جميع نساء بقاع الأرض اطلع الصبح لوظيفتي الساعه ثنتين ينتهي دوامي أرجع لبيتي، وهكذا حياتي ماشيه بهاي البساطه حتى اجيت انت وعقدتها.
هَيْصَم: تصحيح اني نقذتج من موت حتمي جان ملاحقج سواء صدگتي ام لا هاي الحقيقة، شي ثاني فرضاً صدگت انتِ متعرفين لّهيم منو، شنو جنتي تسوين ببيت مشبوه ومثل متگولين انتِ بنيه مثل باقي النساء من العمل للبيت و العكس صحيح؟!
فيروز: ماعرف، اني همات اتفاجأت من شفت نفسي هناك ونصدمت اكثر من شفتك.
هَيْصَم: سولفيلي بالتفصيل شنو صار وياج بيوم الحادث من فتحتي عيونج من النوم حتى اغلاقهن من شفتيني.
فيروز: ليش حتى اثق بيك ممكن تكون انت هم خطر على حياتي وتريد تاخذ من عندي معلومات حتى تقتلني؟
هَيْصَم: اني وعدتج احميج بحياتي مستحيل اخلي شي يضرج كوني مطمأنه من ناحيتي.
فيروز: بس انت گلت اذا مقتلوج اني اقتلج اعتقد هذا كلامك.
هَيْصَم: اني گلت؟
عندج دليل؟
اخذت نفس بتذمر ورفعت حاجبي: معناها انت مينوخذ من كلامك حق وباطل يعني ضماناتك بدون معنى.
هَيْصَم: شنو تردين مقابل اعترافج؟
فيروز: شنو ممكن تقدملي؟
هَيْصَم: اللي ترديه.
فيروز: حريتي.
هَيْصَم: مستحيل.
فيروز: السبب؟
هَيْصَم: الخطر محاوطج من جميع الأتجاهات و كتلج من قبل، اذا رخيت الحبل ممكن تموتين بدون حتى ميكون الج قبر او عزاء او يمكن جثه يستدلون بيها اهلج عليج.
فيروز: لهاي الدرجه حياتي بخطر، شنو السبب ليش حتى يصير ويايه هيج شي؟
هَيْصَم: عن طريق الخطأ دخلتي بنص قوقعه مجان لازم تفوتين بيها دوامه جبيره وناس مجرمين لذلك اتحملي العواقب.
فيروز: وشنو سبب مساعدتك؟
على حد علمي اني ماعرفك شنو الدافع اللي يخليك تضحي بحياتك علمودي.
عدل گعدته وقرب راسه من عندي وأدية مثبتهم تحت فكه: الهَيْصَم ميدخل للعبه اذا ميعرف القواعد و الطريقه والشخص اللي يلعب والفائز محدد من قبلي قبل متبدي اصلاً لذلك لتحسسيني اني ضعيف لدرجه حتى احميج لازم اضحي بحياتي.
فيروز: شنو نهاية هاي الحرب؟
هَيْصَم: بكل حرب طرف خاسر وطرف فائز.
فيروز: يعني احتمال يقتلوني وارد جداً ؟
هَيْصَم: حتى يوصلون للَّباءَة لازم يعبرون هَيْصَم وحتى يعبرون الهَيْصَم لازم يسلمون على عزرائيل قبل.
فيروز: كلامك غريب ومو مفهوم ويزيدني حيره اكثر.
هَيْصَم: الغرابه تفيض من عندي من كل جانب، ويحتاج وقت طويل حتى تفهميني.
فيروز: ماريد افهمك ولا اريد ابقى يمك فترة طويلة وكعد اكتشفك، كل اللي اريده ارجع لبيتي وهاي هي.
هَيْصَم: وهذا الشي الوحيد اللي مستحيل يصير بالوقت الحالي.
فيروز: ماتنبلع.
هَيْصَم: اي مثل الحامض حلو، افضل نمص حلاته مانبلعه.
فيروز: مستفز.
هَيْصَم: غبيه.
فيروز: اكرهك.
هَيْصَم: بعد الكره حب عميق لَّباءَة.
فيروز: لتسميني هذا الأسم ما احبه.
هَيْصَم: لكن اني احبه إله لحن مميز وجماليه خاصه.
درت وجهي عنه رجع گال.
هَيْصَم: مكملنه الحديث لتتهربين من عندي وتفكرين تگدرين تتملصين من اسألتي بسهوله اليوم لازم اعرف كل شي صار وياج وقت الحادث من الألف الى الياء.
فيروز: واثق جداً منو كلك اني راح احجي اصلاً؟
هَيْصَم: تردين طلعين مو لو مو مو؟
فيروز: اي اريد اطلع.
هَيْصَم: اذاً صيري مثل البلبل الفتان وغردي.
فيروز: فيروز اني مو بلبل.
هَيْصَم: ماتضحك.
فيروز: لا عليك الله اضحك.
هَيْصَم: يلا غردي ماعندي وقت فراغ هوايه اريد ارجع للمركز عندي شغل مهم.
فيروز: ما اعتقد مقيدة حركتك روح براحتك وين متريد.
هَيْصَم: حابه تتعاقبين لَّباءَة؟
فيروز: عاقب مو مشكلة.
هَيْصَم: تتحملين تنحبسين داخل هاي الغرفة اسبوع كامل بدون متشوفين ضوه الشمس مثل السجناء تماماً وفي حال خطر على بالي عقوبه ثانيه انفذها على سبيل المثال اخلي اصوات اشباح يمج والأضويه مطفيه، تخيلي بس شنو يصير بيج وقتها.
فيروز: متسويها اعرف لتحاول تخوفني بهاي السوالف.
هَيْصَم: واثقه جداً.
فيروز: گتلك ماعرف شي ليش مصر احجي بشي اني ماعرفه؟
هَيْصَم: معقوله اخذوج من البيت وانتِ نايمه، دخلوا لبيتج عنوة وخلوا على انفج مخدر بعدين خطفوج وخلوج بذلك البيت المشبوه صح؟
رفعت اكتافي بحركه الممكن، اجوبتي عصبته أكثر كام من على الكرسي وحجه بغضب.
هَيْصَم: راح اعد للثلاثه اذا مسمعت جواب هاي المره راح انفذ العقوبه وبدون متاخذني بيج رأفه ورب الكائنات، واحد ، اثنين ، ثلا..
فيروز: تمام راح احجي بس قبل لا انطق اي حرف اريد من عندك ضمان متأذة او يصيبني مكروه من مهمتك.
هَيْصَم: وعد، خدش بسيط ميصيبج كوني متأكدة.
فيروز: وعدك ما اريده اقسملي على القرآن وخلي رب السماء شاهد على كلامك بوقتها فقط اگدر اثق ويطمأن گلبي.
هَيْصَم: مثل متردين.
كام من يمي وراح يم المجر مالت المرايا، فتحه وطلع من عنده قرآن خله ايدة عليه راد يقسم وقفته.
فيروز: لحظة.
هَيْصَم: شنو؟
فيروز: ممتوضي شلون تخلي ايدك على كتاب مقدس و اسماء طاهره بالأضافة قسمك بدون وضوء مينمشي بيه.
هَيْصَم: مجنت من كفار قريش حتى ما اعرف الأحكام لَّباءَة.
فيروز: متوضيت مشفتك.
هَيْصَم: مبقى شي لأذان المغرب لذلك توضيت حتى اصلي عندج سؤال ثاني لو نبدي بشروطج؟
فيروز: متوقعتك متدين ابداً فاجأتني الصراحه.
هَيْصَم: منو گلج اني متدين؟
فيروز: مو تصلي لو تكذب عليه؟
هَيْصَم: ليش كل واحد صلى معناها متدين!!
انتِ قاريه مقولة الف من قارئ القرآن و القرآن يلعنهُ؟
فيروز: لا بس سامعتها.
هَيْصَم: تحششين؟
فيروز: غريب امرك يا اخي اصلاً لو تتعبد بعد الف سنه رب العالمين ميتقبل من عندك على اللي دسويه وي وحده بريئة مثلي.
هَيْصَم: اذا تقبل من عندج ودخلج الجنة بذلك الوقت ردي معروفي اللي اقدمه هسه وسحبيني وياج اهناك، سمعت يگولون المؤمن يغفر لأربعين مؤمن وياه.
فيروز: تستهزء حضرتك.
هَيْصَم: استغفر الله تفيضين نكد انتِ.
هسه اتركي هذا الكلام و سولفي.
فيروز: بعدك ماقسمت.
هَيْصَم: استغفر الله على مابتلانا، اقسم بهذا القرآن المنزل على نبيً مرسل راح احميج مقابل حياتي ومستحيل اخلي اي شي يصيبج او يطخج حتى لو عن طريق الخطأ، تگدرين تحجين هسه؟
فيروز: ماشي راح احجي.
Flash back
: فتحت عيوني على صوت المنبه شفتها ساعة سبعه الصبح كمت من مكاني ركض، اني انسانه متكاسله جداً وما احب الألتزام واكره شي اسمه عوف النوم وروح للشغل ليش يعني ميصير دوامنا مسائي؟!
لو صرت مسؤولة بالدولة أول قانون انزله ماكو دوامات الصبح واخلي كل الناس ينامون، اخذت دوش سريع وغيرت ملابسي لبست جينز اسود وبدي اسود رفعت شعري ذيل حصان وطلعت من البيت أجرت سيارة ورحت لشغلي اني اشتغل بشركه وظيفتي محاسبه مديرنا نحس حيل ويعاقب على ابسط الأشياء ک تأخير خمس دقايق حتى لو مجنت متعمدة يخصم من راتبي شركه اهليه والموظف عدهم غير محترم ، كملت شغلي الساعه ثنتين الضهر رجعت للبيت بتكسي موظفه جديدة وبعدني ملگيت خط يوصلني و الصراحه ماعندي ثقه بأحد لذلك كتفيت بتأجير سيارة ابوية علمني احفظ رقمها قبل ما اصعد بيها للأمان لذلك التزمت بهاي النصيحه لأن مره واني راجعه من الدوام حاول ابو التكسي يلعب بذيله ويايه خفت حيل وقتها ومعرفت شنو اتصرف خطرت على بالي فكره اطلع موبايلي واتصل بأي احد يصير بوجهي لحسن حضي مرت من يمي سيارة شرطه فسويت نفسي اتصل بشرطي على اساس هو احد اقاربي السايق خاف وصلني لبيتي ومن ذلك الوقت صرت اخذ الحيطه والحذر كل مره اصعد بيها تكسي، المهم نزلت قريب سوبر ماركت صغير يصير بدايه الفرع مالتنه اشتريت من عنده كم شغله احتاجهم ورجعت، طلعت المفتاح حتى افتح الباب اتفاجأت مفتوح حجيت وي نفسي واني ادخل للبيت: اني متأكدة قفلته قبل ما اطلع منو فتحه؟!
بيتي عباره عن غرفتين واستقبال طابق واحد كلش بسيط لكن بيه ذكريات طفولتي وحياتي بأكملها مميز عندي بشكل مختلف، احلى شي بالكون هي البساطه ابويه الله يرحمه معلمني ابداً على التكبر او الغرور بنفس الوقت مجان يحرمني من شي ابداً مخلاني جوعانه يوماً ما ودائماً يخليني بحضنه من ينام يخاف عليه وكأني جوهره ثمينه الأباء هم هيج او ممكن فقط هو، اول مدخلت للبيت رحت بوجهي للمطبخ بصفه على جهة اليسار الغرفتين وحده مقابل الثانيه والأستقبال بابها خارج البيت ، خليت الأغراض اللي جبتهم نص طبقة بيض واجبان وعلبة حليب وتوست رتبتهم بالثلاجه ورحت لغرفتي سمعت صوت حركه اتجاهلت الموضوع واجيت اغير ملابسي بس وقفني صوت فتح القفل الخوف بهاي اللحظة والرعب اللي عشته لايوصف ابداً لو شنو محجيت مستحيل اوصف شعوري بهذا اليوم بقيت واگفه بمكاني والأفكار غادرت مخي بالكامل، منو؟ شنو؟ ليش؟
كل هاي الأسئلة افترت بمخي واني اشوفه يدخل، شخص معضل لابس اسود بأيدة سلسله يلعب بيها ويفرها على اصابعه ويرجع يفرها مره ثانيه واكو سلاسل فضيه بالبنطلون مالته ومخلي كمامه على حلگه مرسوم عليها شعار القراصنه ب الأفلام كارتون جمجمه وعضمين على شكل X، اتقرب من عندي واني ارجع ليوره وگعت على الجربايه واعضائي كلها دخلت في حاله سكون غريب بردت والرجفه سارت بكل انحاء جسمي معرفت شنو اتصرف ومنو الشخص اللي يگدر يطلعني من هاي المصيبه، سحب أيدي وصرخت بألم.
فيروز: الله عليك عيفني مسويت شي اني والله.
مسمع من عندي شنو احجي ترك أيدي وطلع من جيبه كلينكس ومن الجيب الثاني قنينه صغيره فتحها وخلاها عليه ورجع رفع راسه ممبين من عنده شي جان لابس جاكيت اسود بيه كبوس مغطي عيونه سحب أيدي وقرب الكلينكس من انفي حركت راسي واني اصرخ حتى يبتعد رجع ثبت راسي بأيد والأيد الثانية ضاغط بيها على خشمي فقدت الوعي ودخلت بظلام دامس صحيت واني بغرفه ظلمة اصوات غريبه وخيال قريب من عندي حيل سمعت صوت خشن يحجي وياه.
: "اقتلها قبل متفضحنه بسرعة".
:بس سيدي هي مسمعت شي ليش حتى تموت.
: حتى لو، منگدر نسيطر عليه اذا هي موجوده خلينه ننهي حياتها حتى يبقى تحت امرنه ومتقودة مره، اكبر عدوا للرجال هو الحب وللأسف هو حبها على رغم حذرته من عدها الف مره بس راسه يابس ومعند فكر اذا خطفها واخذها يمه يگدر يحميها ميدري هو سهل عليه الطريق.
: مفكرت اذا عرف شنو ممكن يسوي بينه هو ميحترم احد وتعرف طبيعته عدل انت تلعب بالنار بدون متحس.
: لو تقتلها بهاي اللحظه لو تموت بنتك شنو تختار؟
: مثل متريد اسوي اللي تريده بس اترك بنتي الله يوفقك سيدي.
: اوگف مو بمسدس اقتلها بسكين حتى محد يسمع.
فيروز: شفته اقترب من عندي و بأيدة سكين جسمي ما اگدر احركه احس اطرافي مشلوله ولساني مخدر ما اگدر الفض كلمه دعيت بداخلي رب السماوات يساعدني ويدزلي منقذ، صارت كل حياتي كدام عيني، خساراتي واخفاقاتي ونجاحاتي، ابوية اللي مگدرت اودعه تركني وحدي بهاي الدنيا الظالمه يم ناس وحوش لو والدتي اللي ملمحتها اصلاً لو اقاربي اللي ماعرف عنهم شي، منو الشخص اللي راح ينقذني واني وحدانيه بمكان مليان ناس مجرمه سفاحين، عدهم قتل الأرواح مثل شرب المي بداخلي اتشاهدت وستغفرت راح اقابل ربي واني عاصيه وممتبعه معالم الدين بأي وجهه اذا سألني اجاوبه واي عذر يكون مناسب لقبيح عملي،
من بين افكاري ودموعي اللي تنزل، سمعت صوت سيارات الشرطه والنداء اللي صار بالسماعه حتى يخلون المكان سمعت صوته وهو يحجي بأنفعال.
: استعجل راح يداهمون المكان يلا.
: حاضر سيدي.
فيروز: اقترب من عندي وحجه قريب من أذني.
"سامحيني بس اني اب وما أگدر اشوف بنتي تخسر حياتها كدامي".
فيروز: مرحم حالي ابداً وطعني بالسكين، الألم قوي حيل وحسيت عيوني بدت تنغلق وحدها قاومت حتى ابقى بوعيي واطلب المساعدة بعد مطلعوا من دخلت الشرطه جان عندي امل واحد منهم يدخل وينقذني وبائت كل مخططاتي بالفشل من هدأ الصوت وختفى صوت السيارات حسيت نهايتي قربت وبعد ماكو فايدة تعبت و الدم ملاني غلقت عيني واني اتخيل بابا لابس ابيض وصار قريب من عندي و ابتسامته مرسومه على وجهه، فتحت اعيوني على حركه قريبه مني فرحت واني اسمع صوت اقدام تمشي ناحيتي حجيت بصعوبه و جاهدت حتى اطلع الكلمه مشهد سينمائي من الأفلام عمري بأكمله متخيلت انحط بهيج موقف وانخطف شنو السبب اني حياتي مأذيت نمله ولدخلت بسياسة او دين وحتى اسماء الوزراء ماعرفهم ليش حتى يصير ويايه هيج؟
الصورة مو واضحه لهذا الشخص اللي اقترب حسيت بيه راح يساعدني لذلك بقيت اردد بهاي الكلمه.
: ساعدني.
بعدها غلقت عيوني ودخلت بظلام مرة ثانية وهاي المره من فتحهتهم وشفتك.
هذا اللي صار ويايه بدون تلفيق ومضفت ولكلمه زايدة.
هَيْصَم: معرفتي اسم معين يعني اثناء حديثهم اسم مميز او غريب؟
فيروز: لا، حتى اني اتفاجأت من سميت هذا الشخص صدگ منو هو؟
هَيْصَم: لّهيم عدوي والشخص اللي بسببه وصلتي لهذا المكان لو مجبتج اني لهنا جان هسه انتِ في عداد الأموات.
راد يكوم استوقفته.
فيروز: لحظة عندي سؤال.
التفتلي ورفع حاجبه وگال.
هَيْصَم: اسمع.
فيروز: شنو عرفك اني موجوده بذلك المكان على حد علمي الشرطه غادرت المنطقه والأصوات اختفت؟
هَيْصَم: لأن ما اثق ببحثهم ولازم اتأكد لذلك دخلت وشفتج عن طريق الصدفه لا اكثر.
فيروز: كلامك مقنعني.
هَيْصَم: اقناعج مو غايتي المهم انتِ هسه بأمان اكلي وأشربي ونامي.
فيروز: الى متى؟
هَيْصَم: حتى اگدر اطمأن ميصيبج مكروه و تگدرين ترجعين لحياتج الطبيعيه.
فيروز: وهذا اشوكت يصير؟
هَيْصَم: حتى القي القبض عليه.
فيروز: يعني اندفن بهذا المكان وانت ممسوي شي.
هَيْصَم: تفيضين تفاؤل.
فيروز: انسانة صريحه ما احب اجامل.
هَيْصَم: گومي صلي وتعشي ونامي اما باقي الأمور لتفكرين بيها بما إني موجود الخطر يصيبني قبل ميوصل يمج.
فيروز: وعودك وكلامك وحتى قسمك مو محط ثقه عندي على رغم انت مضريتني لحد الأن ومسويت شي يزعجني وحتى محاولت تستغل سوء حالتي لصالحك بس گلبي ممتقبلك ابداً وعقلي ميريد يسلمك الأمان.
هَيْصَم: لاحظت رجليج المتأذيه نتيجه محاولات الهرب الفاشله عندج حق حتى متثقين الصراحه.
فيروز: مستفز و مزعج، مكروه.
هَيْصَم: اتركي شتيمتي وكومي اذكري رب العالمين ممكن يساعدج ويخليني القي القبض على المجرم بأسرع وقت و ترجعين لحياتج الطبيعيه ولا كأن هَيْصَم دخل بيها اصلاً.
سألته قبل ميطلع.
فيروز: ماعندي أحرام صلاة.
هَيْصَم: كل شي تحتاجيه موجود بالكنتور كدامج.
: قبل ميسمع جوابي طلع كمت من مكاني وستعديت للصلاة كملت وطرق الباب رجعت كل شي لمكانه وطلعت من الغرفه ورحت يمه للمطبخ شفته طلع قطعة لحم من المجمدة وبدأ يغسلها نظيف جداً ومرتب حيل، حبيت اتعرف على الشخص اللي اني يمه ولو بجزء بسيط: شوكت عرفت تطبخ؟
هَيْصَم: من زمان.
فيروز: هوايه؟
هَيْصَم: ممكن.
فيروز: مزعج.
هَيْصَم: شهادة اعتز بيها.
كمل كل شي وبدينا ناكُل كملنه وتقدم ناحيتي حتى ياخذ الماعون منعته.
فيروز: ماكو داعي اني اغسله.
ابتعد عني وكال.
هَيْصَم: وجودي بهذا البيت فقط حتى اشوفج واطمأن عليج بما انو انتِ فهمتي الموضوع وهدفي من بقائج بهذا المكان لازم تعرفين اني مو دائماً اجي لهنا شنو مكان وضعنا الحالي تبقين انسانة غريبه ومتجمعني بيج اي صله قرابه وجودي لفتره طويله خطأ لذلك راح اجي فقط بالوقت اللي تحتاجيني بيه او حتى اشوف شنو ناقصج، تركت موبايل اهنا بيه رقمي اتصلي بأي وقت تحتاجيني او يصير وياج اي شي سيء، هذا البيت آمن وبمنطقه سكنيه جيدة لذلك لتخافين واخذي راحتج، في حال مأجيت باجر عندج كل اللي تحتاجيه بالثلاجه عقمي جرحج ونتبهي لنفسج زين، اخليج بحماية الله.
: تركني وطلع من البيت وبقيت وحدي، من توفى ابوية لهذا اليوم احس نفسي ميته بين الحياة ماكو طعم لحياتي واعيش بدون هدف، الأيام الفاتت مرت بصعوبه والواضح القادم أسوء، سوء الحظ هاي المره مرافقني بشكل جبير و ميقبل يعوفني، كملت شغلي ورحت للغرفة حتى انام اصلاً ماكو شي اسويه غير هيج، خليت راسي على المخده وعقلي راح لمكان بعيد ياترى منو هذا لّهيم وشنو الشي اللي يربطني بيه حتى مخلي هَيْصَم يحقق ويايه بهذا الشكل اصلاً هو ليش حتى يساعدني ما اذكر شفته من قبل!!
صفنت على نفسي اني ليش غبيه لهاي الدرجه شنو الشي اللي يخليني ساكته وما انطق بهاي الأسئله من يكون موجود بعيد عن كل هذا ليش سامحه لنفسي ابقى بيت غريب ماعرف عنه شي، ملازم اثق بيه هوايه وأأمن بلي كاله يبقى رجال غريب ماعرفه صح هو ماسوه شي غلط يخليني اكرهه بس مع هذا ماكدر ما احاول اطلع منا، بقت الأفكار تلعب بعلقي حتى غفيت.
ضَرْضَم: سيدي خبر خبر مهم من احد العناصر.
هَيْصَم: ولي هو؟
ضَرْضَم: لّهيم متخاصم مع احد الممولين.
هَيْصَم: السبب؟
ضَرْضَم: البنيه اللي يدور عليها لكو اسمها بأحد المستشفيات.
هَيْصَم: شنو وضعها؟
ضَرْضَم: ميته سيدي.
هَيْصَم: روح انت وأحد العناصر لهاي المستشفى اسحبوا شهادة الوفاة والطبيب المسؤول عن العمليه دبروا امره.
ضَرْضَم: حاضر سيدي.
لائِث: سيدددي.
هَيْصَم: اخذ نفس لائِث واهدئ واحجي شنو الموضوع؟
لائِث: الأسود يتصل بيك.
هَيْصَم: صيحلي هَمَّاس و افتح الخط.
لائِث: تأمر سيدي.
دخل هَمَّاس بعده لائث اده التحيه.
هَمَّاس: طلبتني سيادتك.
هَيْصَم: راقبلي مكان هذا الخط، لائِث افتح مكبر الصوت.
الأسود: واخيراً تشرفنا بسماع صوت النقيب هَيْصَم المحترم.
هَيْصَم: منو حضرتك؟
الأسود: الموت الأحمر اللي راح ياخذ عمرك عن قريب.
هَيْصَم: لتسرق اسم أمير المؤمنين عليه السلام، ميليق بيكم هيج اسماء مقدسه.
الأسود: مو هذا موضوعنا حضرة النقيب.
هَيْصَم: اختصر اللي تريد تكوله سريع ماعندي وقت فارغ حتى اخلصه وياك.
الأسود: من الأخير اريدها يمي الساعه 12 بالليل والا يصير غير حجي و اعتقد واضح كلامي ميحتاج اكلك شنو اگدر اسوي فهمك كفايه.
هَيْصَم: اجيت للمكان الخطأ اني مو دفان حتى اعرف اماكن الموتى.
هَمَّاس: رفعتله ايدي بأشارة الأوكي بمعنى عرفنه مكانه.
: اشرت ال لائِث يحضر فريقي حتى نطلع اليوم راح ينور مركزنا، طلعت واني اكمل كلامي وياه واستدرجه بالحديث صعدنه السياره ونطلقنه للمكان المحدد.
الأسود: لتفكر تلعب بذيلك تعرف الأسود شنو يگدر يسوي.
هَيْصَم: اني اللي اعرفك اصلاً محد يعرفك مثلي لكن وعد اذا مدست راسك بقندرتي اسمي مو أليه و ميحتاج اشرحلك تعرفني.
الأسود: اللي مگدرت اتسوي من عشر سنوات مراح تگدر تسوي بعد الف سنة، لتنغر برتبتك اگدر اسحبها من عندك بثانيه سيادة النقيب هَيْصَم.
: اخذت نفس عميق وسيطرت على اعصابي هاي المره اوقاتي السيئة انتهت واجت اوقاتهم مراح ارحم احد و الجميع راح يتعاقب على عملته هذا انتقام الهَيْصَم ومستحيل يمر بدون عقوبة جميع المجرمين اللي الهم ايد بلي صار.
هَيْصَم: كون مطمأن اسمي راح يناطح السحاب بوقت اسمك حيكون على احد القبور او عد مني بين فتره والثانيه راح ارش على قبرك مي من النجاسه وراح اكتب فوگ اسمك الملعون بدل المرحوم.
الأسود: احب هيج حرب من يكون عدوك واضح وتعرف مخططاته، بهذا الوقت تگدر تربح بدون تعب.
هَيْصَم: ما انصحك تفرح هوايه لأن متعرف شنو خطوة الأسد القادمه كون دائماً حذر وبأستعداد تام استنفر جميع قواتك لأن هاي المره انت مو عدو الهَيْصَم فقط وانما عدو اكثر شخص تثق بيه ومأمنه على حياتك، لّهيم.
الأسود: برجعت حبيبته راح يرجع يطيعني خاف على نفسك من يعرف انت اللي ضامها عنه شنو تتوقع يسوي.
هَيْصَم: احتفظ بخوفك لنفسك وكون مطمأن مراح التقي بعزرائيل قبلك ابداً انت فقط اكعد و اشرب فنجان القهوه بهدوء تام وغلق عيونك وتمتع بالمناظر الخلابه وبس تفتحهم راح تلاگيني كدامك ومخلي سلاحي بنص راسك اعد حتى ثلاثه، واحد ، ثنين ، ثلاثه.......بم، انتقل الى نار جهنم القاتل المجرم الأسود.
شنو رأيك مستعد لو بعدك؟
قهقه بصوت عالي وگال.
الأسود: مُخيلتك واسعة أحييك، ليش متترك الشرطه وتصير كاتب مسرحي وتربح جوائز صدگني اني شخصياً راح اجي اباركلك واسويلك واسطه اذا تحب.
هَيْصَم: شنو دوري كُلي حتى استعد.
الأسود: خادم عند الملك وتكون رفيقه دائماً وتحت امره.
هَيْصَم: واقدمله السم بأيدي واقتله واحتل المملكة، بالنهاية اني البطل وهاي قصتي راح اخطها مثل ما اني اريد و بالطريقة اللي تعجبني ومخططلها، ماعليك فقط تنتظر وتصبر حتى يجي موتك لابس هيئة هَيْصَم.
الأسود: متخاف اسجل هذا كلامك واقدم عليك دعوة بتهمة محاولة القتل مع سبق الأصرار والترصد؟
هَيْصَم: وشنو يمنعك سويها.
الأسود: لاعبها صح ومشوش عليه مراقبتك، لاعب محترف.
هَيْصَم: شهادة اعتز بيها من واحد مجرم.
لائِث: سيدي هذا بيته.
: غلقت الخط واشرتلهم يبقون بمكانهم واني انزل وگفوا كدامي ومنعوني.
لائِث: رجلي على رجلك للموت سيدي.
هَمَّاس: مستحيل نخليك تروح وحدك هاي حربنه كلنه لو نموت سوه لو نعيش سوه ماكو حل وسط.
ضَرْضَم: شباب معليكم بيه تحركوا.
هَيْصَم: هوب لحظة وين تتحركون؟
اني قائدكم وأمركم مترحون لأي مكان بدون اذني مخالفة أمري يخليكم تتعرضون للعقوبه ومراح اتهاون وياكم نهائياً.
ضَرْضَم: مو مشكلة فداك سيدي، مأجينه حتى نشوفك تروح وحدك ونبقى نتفرج هذا الشي مستحيل يصير.
هَيْصَم: لتعبوني ما اريد اخسر اي احد بيكم اسمعوا كلمتي ولتعاندون.
هَمْهَام: سيدي بما انو اجينه سوا راح نحارب سوا ونرجع سوا غير هذا الكلام منقبل بيه.
هَيْصَم: فريق الهَيْصَم مستعدين؟
ضَرْضَم: فداء لخدمة الوطن سيدي.
: هجمنا على البيت وماعرف من وين طلعوا قناصين صارت مناوشات بيناتنا گدرت اغافلهم وادخل للبيت، مشدد الحراسه لكن ميصعب علينه فتحت الباب ودخلت دورت بعيوني عليه ملگيت احد فتحت جميع الأبواب وصلت للباب الأخير فتحته وصار بوجهي.
هَيْصَم: منو انت؟
: سكرتير الأسود.
هَيْصَم: انت اللي جنت تتصل بيه.
: اتفاجأت صح؟
هَيْصَم: حركه حلوه بس مو دائماً يكون النصر حليفه وصله رسالتي يجي يوم والتقي بيه شخصياً ويكون هذا اخر يوم بحياته وعد من الهَيْصَم.
: لتخاف حركته مراح تكون مثل الحركه اللي تصير هسه.
فيروز: فتحت عيوني الساعة 11 بالليل شبعانه نوم و جوعانه همات، كمت من مكاني بكسل ورحت للمطبخ فتحت الثلاجة طلعت توست وخليت عليه قشطه، گعدت على الكرسي وبديت اكل بأول لگمه سمعت صوت فتح قفل تصنمت بمكاني والخوف جمد اطرافي مگدرت اتحرك ستجمعت قوتي بصعوبه وقررت اطلع بسرعة واتصل بيه حتى يجي يساعدني طلعت من المطبخ وصار بوجهي منظر بعمري كله ما اگدر انساه جحظت عيوني بصدمه وحجيت بتفاجئ: انت!!
يتبع..
تفاعلكم اللي يسوي واهس وتعليقاتكم بين الفقرات وتصويتكم للبارت يحلوين
تصبحون على الف خير شمعاتي.
حسابي الأنستا لأي شي يخص القصه
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!