للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه.
شاركوا القصه حتى تكبر عائلتنه ونستمتع وي الهَيْصَم مع بعض..
هَيْصَم
الكاتبة زهراء احمد
___________
جَاءتْ بـِ هدُوءٍ بَالغْ، ومَلأت رُوحَهُ رِقّة، خطوَاتُها.
هَيْصَم: شنو تريد تسوي مثلاً اذا ما عندك علم فأحب اكلك رجالي محاوطين المكان من كل جانب أشارة وحده اخليهم يهجمون ويخلون هذا البيت حطام.
: لحظه بس قبل متسوي هذا البيت حطام الأسود حاب يحجي وياك وهاي المره متگدر تتعقب مكانه مثل القبلها فلتحاول.
هَيْصَم: خلي يكون شجاع ليوم واحد فقط ويواجهني بدل ميلعب ختيلان مثل الأطفال لو اسودكم ماعنده شجاعه؟
الأسود: لتخاف اني شجاع كفايه حتى اواجهك لكن منتظر الوقت المناسب لكن هسه بما انك دخلت بيتي لازم اضيفك الأصول هيج تگول.
هَيْصَم: هوب هوب لتتحمس وترفع مسدسك بوجهي ولازم تعرف جميع رجالك الأن تحت سيطرت فريقي وانت بقيت الوحيد حر حتى هاي اللحظه بس الغزاله في عرين الأسد لتتأمل تگدر تعيش هوايه.
: مو قبل ما انطيك هديتك حضرة النقيب.
هَيْصَم: استعجل لأن لازم تجي للمركز حتى نفتح وياك تحقيق.
: تعتقد ألقاء القبض عليه بهاي البساطه!!
هَيْصَم: بما إني قررت ف أكيد الهَيْصَم ميحجي شي عبثي.
: تعجبني ثقتك بنفسك وهذا الغرور والتكبر اللي حامله بس هذا الشي مراح يطول ابداً لابد يجي يوم وتنال جزائك اللي تستحقه وتكون مثل الأشخاص اللي ودعوا هاي الحياة تحت حكم " ادخلت بشي ميعنيك".
هَيْصَم: واني اطرائك اليه معجبني، غصب عنك ادوس روسكم جميعاً وكلكم تتعاقبون على كميه الدمار اللي سببتوا للشباب والأرواح البريئة القتلتوها بدون ذنب فقط علمود الفلوس هوايه امهات نثكلن والعديد من عدهن ترملن، كلكم راح توكفون كدام محكمة العدل، ومستحيل اتراجع قبل ما اوصلكم لحبل المشنقه جميعاً بدون استثناء.
: سحب ازناد وخله المسدس بوجهي، طلعت الرصاصه من المسدس صارت بكتفي، فقدت التوازن ودخل الفريق، اجاني لائِث ركض وسندني.
لائِث: سيدي الله يخليك لتعاند وخلي ناخذك حتى تتعالج.
جاوبني بصعوبة.
هَيْصَم: لا، اخذني للبيت ولتخلي احد يشوفك خلي نطلع بغير سيارة.
لائِث: سيدي.
هَيْصَم: لائِث لتعبني واسمع الكلمه.
لائِث: ماشي يلا خلي نروح.
سندته وطلعنه اول مشافونه البقيه ركضوا اليه وساعدوني هو ضخم حيل ما أگدر عليه وحدي خليته بالصدر وصعدت اسوق وطلبت من البقيه يرجعون للمركز ويسدون عن غيابه حتى محد يعرف بالموضوع غير اللي جانوا موجودين ويانه، وصلنه للبيت ساعدته حتى ينزل ومقبل ادخل وياه بقيت يم السيارة اطمأنيت عليه دخل يلا صعدت ورجعت لشغلي.
فيروز انصدمت من شفته مخلي ايده على الباب بصعوبه والدم مالي ملابسه، اجيت اصرخ من شفته بهاي الحاله بس منعني من خله اصبعه على حلگه بمعنى اسكتي اقتربت من عنده حتى اسنده بعد مشفت حركته الغير منتظمة بعدني عنه وگال بهمس شبه مسموع.
هَيْصَم: حرام لتلمسيني.
فيروز: للضرورة احكام ميصير اتركك هيج لازم تتعالج.
هَيْصَم: اللي يسمعج يفكرج دكتوره كلج على بعضج محاسبه شنو فهمج بالطب.
فيروز: تبقى مستفز حتى وانت بأسوء حالاتك.
هَيْصَم: وخري عن طريقي ماعندي وقت حتى اسمع كلامج اذا ابقى هيج اموت قبل وقتي.
فيروز: خليني اساعدك لتعاند، مرة وحده اسمع من عندي.
هَيْصَم: متعرفين اسعافات أوليه ولتخيطين الجرح شنو نوع المساعدة اللي تردين تقدميها؟
فيروز: فهمني شنو اسوي؟
هَيْصَم: اخذي هذا الموبايل واتصلي على أرفد هو الوحيد اللي يگدر يساعدني بهذا الوضع.
فيروز: تمام بس خلي اساعدك توصل للغرفه متگدر تمشي وحدك انتَ.
هَيْصَم: لَّباءَة لتعبيني وياج كتلج وخري عن طريقي اكدر امشي وحدي.
: عند وعند و مقبل اساعده، هسه فهمنه حرام بس للضرورة احكام شنو يصير لو خلاني اسنده حتى يوصل الغرفه قابل راح اكل جزء من عنده، نسى روحه من جان يوكف قريب مني لدرجة يطخ بيه، مشيت وراه واخذت الموبايل وعيني عليه شلون وجه صار اصفر وعيونه ذبلن، حسيته ديقاوم لكن بصعوبه على اي لحظه يفقد توازنه ويفقد الوعي سميت بأسم الله وطلعت الأسماء، طبعاً موبايله على بصمة أيدة لذلك فتحه قبل مينطيني اياه.
التفتت اله بسرعة وحجيت: منو من عدهم ارفد الأبرة لو النجمه لو التاج؟
جاوبني بصعوبه.
هَيْصَم: الأبرة.
:رفعت حاجبي بتفاجئ من تصرفاته غريب حتى بتسميه الأسماء عجيب هذا الرجال، دست اتصال دقيقه وسمعت صوته.
أرفد: يا مرحبا واخيراً اتذكرت عندك ابن خاله تسأل عنه.
فيروز: عفواً منك لكن تگدر تجي للبيت، هَيْصَم كلش متأذي.
أرفد: انتِ منو؟
فيروز: هسه انت شدخلك اني منو!!
تعال للبيت وشوف شنو بيه بسرعة لو تلحگ عليه لو لا حالته كلش خطره.
أرفد: بس شخص واحد اريد يتصل بأرفد و ميكون عنده مصيبه على يوم تسوون بيه انفصام وتخلوني اترك حتى الطب.
: غلق الخط بوجهي ليش عصب عليه هَيْصَم كلي خابريه، فتحت الكنتور طلعت احد قمصانه لفيته على الجرح اذكر بالأفلام يحضرون مي حار بسرعة خليت على الطباخ گدر مي نظيف حتى يكون جاهز من يوصل الدكتور ورجعت يمه اقتربت سمعت ونات خفيفه من عنده قربت أيدي لامست جبينه حرارته مرتفعه يا الله شنو اسوي المشكله اني ما احب امور الطب وماعندي فهم بيها ابد، ماحاضره ولادورة تعليميه طول حياتي فقط بعض الأمور اعرفها من الأفلام و المسلسلات تقريباً مستغرق وقت طويل وصل الدكتور عرفته من رنة الجرس.
فتحت الباب لگيته واگف شاب اسمر عنده لحيه محدده وشعره مرفوع لابس قاط رسمي اسود وقميص ابيض و بأيدة جنطه، صفنت عليه ونسيت لازم اگله اتفضل انتبهت على نفسي من أشر بأيدة وگال.
أرفد: اخابر الوالد يجهز الچادر والخروف؟
جاوبت بتساؤل: ليش؟
أرفد: لأن اكيد مات على هاي صفنتج.
فيروز: اها فهمت.
مخلاني اكمل جملتي قاطعني من گال.
أرفد: بعديلي حتى اشوف يحتاج طب عدلي لو تشييع سريع الله مبتليني بناس الطب النفسي ميتحملهم و الخالق.
فيروز: استغفر الله اخلص من هَيْصَم يطلعلي أرفد هو اني الله مبتليني بيكم مو انتوا، دخلت وراه بعد مغلقت الباب ورحت للمطبخ طفيت النار واخذت الگدر يمه للغرفه هو شافني لازمته صفن بوجهي بعدين گال.
أرفد: هَيْصَم صيح يا علي واضغط حيل ابني لتعبني وياك يلا بسرعة عندي هوايه مراجعين غيرك.
جاوبه بصعوبه وشفت شبه ابتسامة مرسومة على ثغره.
هَيْصَم: أرفد لتزعجها واشتغل.
أرفد: بالمي الحار؟
جاوبت بشجاعه واني مخليه أدية على خصري ونظرتي اله بعدم رضا: ليش شنو بيه المي فوگ محبيت اساعد هيج تعاملني!!
أرفد: ليش هي ولادة شسوي بالمي الحار؟!
فيروز: شعرفني هيج اشوف ب المسلسلات دارسه طب قابل.
أرفد: ومن اگلهم تعلموا ميقبلون!!
ياست افهمي هاي عملية جراحية يحتاج بيها خيط وأبره وديتول يعني معقم بوجوده منحتاج مي حار وهسه اذا ممكن اتفضلي بره خلي اشوف شغلي ابنه يستحي ينزع قميصه كدامج.
فيروز: واضح جداً حيل يستحي، تركتهم وطلعت دائما مذموم اللي يسوي خير ان شاء الله م.. لا خوش رجال ما ادعي عليه.
دخلت لغرفتي تصير قريبه على غرفته تشبه التصميم بس جربايتها نفر واحد و الكنتور اصغر اشويه، خليت راسي على المخده وغلقت عيوني ومنظره والدم ماليه مينمحي من عقلي ذكرني بالماضي وخله دموعي تنزل ونفتح جرحي من جديد.
أرفد: تحتاج دم ليش مأجيت للمستشفى واني دبرت موضوعك الى متى تبقى معند ومتسمع الكلمه؟
هَيْصَم: ميحتاج نفس الدكتور ونفس الأمكانيات، لكن البيت أأمن من المستشفى وانت تعرف السبب.
أرفد: محد يگدر يطخك واني موجود بس انت ميبس راسك ومتقبل تسمعني.
هَيْصَم: اذا وگع الأسد كل الحيوانات تتراقص على جروحه وهذا الشي اللي ما أريدة اكره نظرة الشفقه بعيون الناس و اكره الشماته هم.
أرفد: منو يگدر يتشمت بيك، اللي سويته لخدمه العراق المفروض تُكرم مو تُهان.
هَيْصَم: كمل شغلك أرفد بدون كلام مابيه حيل اخذ ونطي.
أرفد: خدرت المكان راح ابدي اخيط الجرح لكن يحتاج دم اني نطيت خبر لأحد الممرضين الموثوقين هسه يجيب بطلين ويجي.
باوعلي بغضب وگال بصعوبه.
هَيْصَم: أرفد دليته على البيت؟
أرفد: نام ولا كلمة، لتعرض بطلاتك وانت ضربه مابيك، ناقصك دم بعدين هذا الممرض ضمانتي ميسوي شي كون مطمأن.
هَيْصَم: اعرفه؟
أرفد: اياد اللي ساعدك من جبت لَّباءَة للمستشفى صدگ اتعافت لو بعدها؟
هَيْصَم: هي نفسها اللي جابت المي الحار.
أرفد: الواضح خايفه عليك هوايه نگول مبروك وشوكت نفرح بيكم ان شاء الله؟
هَيْصَم: اني فرحان بنفسي اما شوكت انت تفرح هاي براحتك عزيزي.
أرفد: مريض وما اخلص من السانك لكن الحق يقال تستحق تفتح وياها صفحة جديدة لاحظت بيها حنيه أم، انسانة لطيفه شفت هذا الشي اليوم على رغم هي متعرف بأمور الطب بس حمت مي علمودك، سكت شويه بعدين كمل كلامه بنبرة تساؤل.
: يول معقوله حبتك؟
هَيْصَم: لتمسلت أرفد حُب شنو اللي تحجي عليه مجرد احد المواطنات وساعدتها بس ترجع الأمور طبيعية أرجعها لبيتها ولا كأن شي صار.
أرفد: أريد اصدگ ودا احاول بكل جهدي بس وحقك صعب ما اگدر.
هَيْصَم: حاول بجهد وخيط الجرح واطلع بسرعة من هذا البيت ولتحاول ترجع مره ثانية حتى اني اطلب من عندك.
أرفد: انت ناكر للمعروف.
هَيْصَم: افضل متترمل ريفان بسببي بوقتها اكون سبب بقتل شخصين مو واحد.
أرفد: لتخاف ما اموت هسه.
هَيْصَم: صحيح وصلك عقد من عزرائيل قبل اسبوع واني وقعت عليه.
أرفد: لتستهزء، بعدين صدگ ليش تسوي اشياء بدون علمي هَيْصَم احنه شنو متفقين لو نسيت وعدك اليه بهاي السرعه؟!
هَيْصَم: جاسوسك كلك؟
أرفد: مو مهم منو كلي المهم عرفت وخلص، أرفض الموضوع بالكامل ونطي عذر بأي شي امي متتحمل خسارته.
هَيْصَم: لتخاف مراح يتعرض لخطر حمايته مسؤوليتي ثانياً هو رجال واعي وفاهم يعرف القرار الصح من الخطأ لتخنگه بهاي الطريقة حتى متتفاجئ بيه بعدين.
أرفد: انتوا الثنين عزيزين عليه ما اتحمل خسارتكم لكن انت عنيد ومتسمع الكلمة، ما اگدر اجبرك علي شي وعندك هدف معين واسبابك تجبرني ايضاً التزم الصمت لكن هو ماعنده سبب مقنع حتى يخاطر بحياته يكفي اللي صار بيه سابقاً ما اريد هذا الشي يتكرر مره ثانية و اتمنى تفهمني.
هَيْصَم: اللي صار من خمس سنوات دافع لنسر حتى يدخل بهاي المهمه هاي المره لا انت ولا اني نگدر نمنعه لذلك خلي يسوي الشي المقتنع بيه لتضغط عليه اتركه براحته.
أرفد: الرصاصه مواصله العظم لذلك سهلت عليه العملية، انتبه لحركة ايدك لتضغط عليها هوايه وحاول قدر الأمكان لتستخدمها هاي الفتره واذا گدرت ابقى بالبيت ولتطلع لمكان، كام من مكانه وهو يگول: أياد وصل راح اخليلك المغذي بأيدك و انتظر حتى يخلص بعدين اسحبه نفس الشي مع بطل الدم، طلعت للباب وفتحته اخذت الأشياء اللي جابهم أياد ودخلت خليت بأيد المغذي والأيد الثانيه بطل الدم وعلكتهم بتاج الجربايه وبقيت سهران يمه وهو غفى.
: فتحت عيوني على صوت طرقات خفيفه على الباب كمت من فراشي واني احجي بنعاس: تمام بس دقيقه.
عدلت نفسي كدام المرايه وطلعتله اول مشافني گال.
أرفد: صباح الخير، لازم يتغذه بشكل جيد اشويله كبد على سبيل المثال وكثري خضروات وخاصة الكرفس لأن مهمه جداً حتى يرجع الدم اللي فقده ويتحسن بشكل اسرع قللي كربوهيدرات بالأضافة بعدي عنه الكافيين ولتخلي ياكل مصاص او حامض حلو يعني الحلويات بالكامل.
فيروز: شنو السبب ليش مياكلهن؟
أرفد: هو شبه طلع من العمليه لازم يعتني بصحته بشكل جيد حتى ترجع عافيته بالكامل والحلويات مضرة بالصحه بشكل كبير لذلك لازم يبتعد عنها.
ابتسمت واني متأكدة كلامه مستحيل اگدر انفذه: دكتور بأعتقادك اگدر اسوي هيج اني؟ ليش هو اصلاً راح يسمع من عندي وينفذ بصمت!!
أرفد: راح ينفذ بصمت وفي حال مستمع الج استخدمي طرق ثانية انتن النساء ماكرات تعرفن شلون تسيطرن على الرجال مينخاف عليج سهله ان شاء الله.
: كمل كلامه وابتعد عني بعدين اتوقف والتفت إليه كايل.
أرفد: تركت العلاج بصفه مكتوب عليه المواعيد بالأضافة ممكن ترتفع درجة حرارته بالليل انطي خافض حرارة، دعواتي الج ب الموفقيه والثبات على العقل السليم وكليله أرفد يگول هاي ثاني مره بسببك اشتغل بغير اختصاصي خلي يحاول تكون الأخيرة.
: كمل طريقة وتركني بدون ميسمع جواب، رحت للمطبخ وغسلت وجهي اتوضيت ورجعت صليت الصبح قضاء الساعه سته والشمس بدت تشرق الجو لطيف كملت ورحت للمطبخ فتحت الثلاجه وصفنت هذا الدكتور مكال شنو لازم اسوي ريوك، طلعت اربع بيضات سلگتهم وقطعت خيارة وطماطه وخليت بصحن جبن وطلعت الصمون وحضرت كاسة عصير برتقال طبيعي ملگيت حليب جهزت السفرة ورحت لغرفته طرقت كذا مره مسمعت صوت قربت أيدي افتح الباب فتحه وصار بوجهي مغير ملابسه لقميص ابيض ردان طويله ممبين من عدها الجرح وبنطلون نيلي طالع صاك ابن الحلوه فزيت من صفنتي على كلامه.
هَيْصَم: بشر اني مو لوحه.
جاوبته بأبتسامه: هاا.
أشرلي براسه بمعنى وخري، وخرت عنه عبرني وهو يگول.
هَيْصَم: صباح الخير.
غميت نفسي شبيه نثولت ومصبحت بوجهه هسه يكول نعجبت بيه، جاوبته واني امشي وراه: صباح النور، شنو حاس اليوم؟
هَيْصَم: احسن من البارحه شكراً لسؤالج.
الفضول يقره مليار هذا الشي اللي ميسمحلي اسكت لازم اسأل: لتعتبره تدخل بس ليش نصابيت برصاصه؟
هَيْصَم: اني واصدقائي ندرب ونصبت بيها عن طريق الخطأ.
فيروز: زين ليش مرحت للمستشفى؟
هَيْصَم: ماعندي ثقه بالأطباء.
فيروز: بس انت وثقت بهذا الدكتور.
هَيْصَم: لأن هو موثوق.
فيروز: صحيح كلي انو اكلك هاي ثاني مره يشتغل بغير اختصاصه حاول اتكون الأخيرة.
هَيْصَم: في حال الثعالب مهجمت على الأسد.
فيروز: شنو قصدك مفهمت.
هَيْصَم: مو كل شي بالحياة اله شرح لَّباءَة.
فيروز: ماعندك نيه تغير اسمي تره محبيته ابد؟
هَيْصَم: لَّباءَة احد اسماء اللبوة لهُ من الهيبه ما يكفي، لازم تكونين فخورة بأختياري الج هيج اسم.
فيروز: ليش محسسني منطيني جائزة الأوسكار هو مجرد اسم بعدين اسمي على اسم عندليب الصباح السيدة فيروز العظيمه ميبدي اليوم بشكل جميل بدون سماع اغانيها.
هَيْصَم: العظمة فقط لرب العالمين مو لغير أحد، وما اعتقد هي الشمس حتى اليوم ميبدي بدونها.
فيروز: مستفز حتى وانت مريض.
هَيْصَم: مريض او سليم اني الهَيْصَم متغير شي من حقيقتي.
فيروز: كمل اكله وقبل ميكوم گال.
هَيْصَم: تعبتج ويايه بسبب حالتي الصحية، شكراً الج.
فيروز: لتشكرني مسويت شي واجبي هذا، انت همات ساعدتني من جنت مريضه.
هَيْصَم: ان شاء الله بعد يومين نفتح الخياط حاولي متسوين حركات شجاعه مثل البارحه من شلتي الگدر بعدج متحسنتي بالكامل لتصيرين جون سينا.
سألت بأبتسامه حبيت الطف جو.
فيروز: تعرفه؟
هَيْصَم: لعبت وياه مصارعه قبل سنتين.
ضحكت وهو عافني وطلع اتذكرت عمليته رحت وراه بسرعة وقفته واني احجي سريع: انتظر لحظة بس.
التفتلي وعقد حاجبه وگال.
هَيْصَم: شنو الموضوع ؟
فيروز: لتطلع جرحك بعده جديد ارتاح اليوم وباجر تگدر ترجع لشغلك.
هَيْصَم: لتخافين ميصير بيه شي هاي مو اول مره اتعرض بيها للأصابات متعود.
فيروز: بس ميصير والله خليك بس اليوم وعد مراح اطلب من عندك شي ثاني علمود صحتك مو لشي معين.
هَيْصَم: عندي كم قضيه اخلصهم وارجع لتفكرين ورجعي نامي.
عافني وراح واني سويت مثل ما كال رجعت نمت.
حوري: صافنه وافكر بكلامه معقوله حبني لهاي الدرجة وبسرعه همات وبدون اي كلام دار بينه اكو هيج حب لو يضحك عليه؟
فرضاً يضحك شنو غايته مثلاً واني بنت عمه عرضه يعني، الأفكار شلت مخي شل ومگدرت اتخذ القرار الصح فززني من صفنتي صوت أشعار اجه على موبايلي فتحته قريته شعر غزل.
محمد:
معنى احبج . .
يعني اهد الناس كلها
وبيج الطش ما اهدج
معنى احبج . .
يعني اخاف عليج مو بس
مني لا بل حتى منج
ومعنى احبج . .
يعني لو بس باقي يوم
بعمري احطنه اعله عمرج
اول مخلصتها اتصل بيه ارتبكت ومعرفت شنو اسوي بقيت صافنه برقمه طبعاً اتصل بيه قبل مرة و مفتحت خط بعدين دز رسالة كاتبلي بيها اسمه لذلك سجلته بأسم صديقتي حتى اذا شافه احد ميعرفه، انفصل ورجع اتصل مره ثانيه اخذته بأيدي اللي ترجف و فتحته وخليته على أذني سمعته وهو يحجي بصوت ناصي مليان حنيه.
محمد: شلونج يبعد حيلي؟
حجيت بتوتر اداري خجلي من عنده: الحمد الله، انت شلونك؟
محمد: اني بخير من سمعت صوتج يبعد طوايف محمد وعشيرته.
خجلت وحسيت الحراره طلعت من وجهي حجيت بسرعة: لتحجي هيج عفيه تره اغلق الخط.
محمد: يمه فدوة، حتى تهديدج عسل مثلج سرگي گلبي انتِ.
ابتسمت: شنو هذا غزل جديد؟
محمد: مخصص فقط لحوريتي حصري جداً بس الها.
تحمحمت وگلت بتساؤل: محمد عندي سؤال.
محمد: الف مره فكرت اغير بيها اسمي بس من سمعته بصوتج هسه مستحيل اسويها لو ينطوني مليارات الدنيا يربي اذا حتى اسمي يصير بقلاوة من تلفظة شسوي بنفسي هسه؟
حوري: لتغير الموضوع محمد دا احجي جديات والله.
محمد: اسألي ضي عين محمد وحورية حياته.
حوري: اعرف اكو حب من النظره الأولى لكن ماكو غرام من نفس النظرة، انت تحبني صدگ لو تريد تستغلني؟
محمد: لا لا ازعل من عندج هيج، معقوله اضحك على بنت عمي يعني عرضي سمعتج من سمعتي ويهمني امرج حيل، كتلج من قبل ورجع اكولها اذا ضطريت طول العمر اكررها، جذبتيني من اول نظرة وبعمري كله مفكرت استغل هذا الشي بعدين انتِ بنت عمي معقوله اضرج بشي سيء؟!
حوري: لتزعل لكن كلامك واعترافك حالياً خلاني اشك وين اكو شخص يحب من صدگ يعترف بهاي الطريقه الرومانسيه من اول مره!!
محمد: صدگي اني اسويها، بعمري كله محسيت بلي حسيته وياج انتِ غير عن باقي البنات اللي عرفتهن بهوايه.
قاطعته قبل ميكمل: ليش عندي جناحات مثلاً لو ذيل سمجه؟
سمعت صوت ضحكته سكت لحظة بعدين گال.
محمد: ياويل قلبي تحشش حوريتي.
حوري: مدا اضحك محمد ليش تاخذ الموضوع بمسخره؟
محمد: بالعكس تماماً اني جدي جداً بخصوص ارتباطنا لدرجة حتى فكرة سفري خارج العراق علمود الدراسة لغيتها وركزت فقط على تقوية علاقتي بيج انتِ ليش مو واثقه بيه؟
حوري: وليش حتى اثق بيك انطيني سبب مقنع غير انك ابن عمي ومتريد مضرتي؟
محمد: حبي الج، مشاعري الصادقه، اشتياقي لعيونج طول اليوم، احلامي المليانه بيج، كلهم ادلة اقدمها لحضرتج وهسه اريد اعرف بعدج مواثقه؟
حوري: ماعرف ما اگدر اسلمك ثقتي بهاي السهولة اتمنى تفهمني.
محمد: اكيد هذا من حقج حتى جلسات الأستماع تحتاج كم جلسه يلا يحكم القاضي، بقضية الحب نحتاج نثبت حبنه دائماً للطرف المقابل.
حوري: بعد يومين راح اروح لبيت خالتي وابقى اهناك فتره ان شاء الله وخلال هذا الوقت افكر ياريت متتصل بيه وتتركني على راحتي.
محمد: تمام براحتج يراحتي انتِ.
: غلقت الخط ورجعت راسي على الجربايه فكرت انطيه فرصه واشوف شنو يصير لكن هاي مشاعر مو لعبه ممكن اذا سلمته گلبي يرجعلي اياه مدمر غير قابل للتصليح، يكسره مثلاً او يحطمه، الحب هو اصعب شعور يحس بيه الأنسان لأن بيه تضحية، فداء، تحمل، والأهم شجاعه اذا مجنت شجاع كفايه لتحب ولتعلق أحد بيك ابداً لأن الحب يحتاج رجال مثل (النبي محمد صل الله عليه واله والسيدة خديجه عليها السلام او الأمام علي عليه السلام والسيدة فاطمه الزهراء عليها السلام) مو شباب هاي الأيام ينطي وعود لكن بدون وفاء، يمسك حبل نجاتك ومن يتأكد من وصولك لمنطقه الأمان يكون هو اول شخص يترك الحبل، وسقوطك مؤذي الى درجه يكون النهوض بعده مستحيل، لذلك صعب اتخذ قرار مصيري مثل هذا لشخص لاسيما اعلن كرهه وبغضه لعائلتي، قبولي بعرضه هو التخلي عن الجميع بالمعنى الحرفي، تركت كل شي للقدر وقررت اقضي ايام حياتي بسعادة خلال هاي الفتره بدون اي تفكير ببيت خالتي.
لائِث: سيدي شلون صرت هسه ؟
هَيْصَم: افضل من البارحه لتفكر بيه.
ضَرْضَم: الحمد الله على السلامة سيدي.
هَيْصَم: الله يسلمك، وين المعتقل؟
لائِث: موجود بالسجن الأنفرادي تحب ناخذة لغرفة التحقيق ؟
هَيْصَم: ميحتاج بكل الاحوال هو راح يطلع.
ضَرْضَم: بعد كل هذا التعب والجهد اللي بذلنا يُطلق سراحه بهاي البساطه؟!
هَيْصَم: الأنسان بالعادة اول ميرجع من السفر بمنو يلتقي؟
لائِث: بأكثر شخص مشتاقله.
هَيْصَم: وفي حال جان هذا الشخص مهدد بالخطر بمنو يلتقي؟
لائِث: بالشخص اللي ينقذ حياته، قصدك هو؟
هَيْصَم: عفيه عليك نفس تفكيري، احنه فقط نبقى بنفس المكان والأخبار الحلوه توصل لعدنه.
ضَرْضَم: دائماً عندك خطه بديله لذلك اني اثق بقراراتك سيادتك.
هَيْصَم: اكو شي ثاني غير هذا الموضوع حتى نتناقش بيه؟
هَمَّاس: سيدي المحامي محمد يريد يقدم كفاله حتى يطلق سراح السجين المعتقل البارحه.
هَيْصَم: حياه الله خلي يتفضل.
دخل وهو مبتسم.
محمد: دخلنا لعرين الأسد حتى نتوسط يمه يطلع غزالتنه ياترى شنو رد الأسد؟
هَيْصَم: غزالتك طعمها مو طيم مراقت لي لذلك اخذها وبدون كفاله، سقطت عنه جميع التهم اشتبهنه بيه وعليه الهَيْصَم شخصياً حاب ايقدم اعتذار شنو رأيك لائِث؟
لائِث: لازم يكون سعيد بهذا الشرف سيدي.
هَيْصَم: خلي يجي يمي حتى يسمع اعتذاري وانت ضَرْضَم.
ضَرْضَم: نعم سيدي.
هَيْصَم: اخذ محامينه العزيز خلي يتعرف على باقي السجناء ممكن يريد يدافع عن واحد من عدهم.
ضَرْضَم: تأمر سيدي، اتفضل حضرة المحامي من هذا الطريق.
: وكف كدام الباب مالت الزنزانة فتحتها اله ودخلنا ثنينه سوه، ذلك من عيونه شرار يطاير، كره وبغض النا، و هَيْصَم مبتسم ويستفز بيه أكثر واني كاتم ضحكتي من سوالفه.
هَيْصَم: سمعت الجداحه عطلانه والطباخ ميگدر يطبخ اليوم شنو رأيك نستعين بنظراته اللي يطير من عدها شرار لائِث.
لائِث: بس شلون نستخدمها؟ عندي فكره نقلع عيونه حتى يصير استخدامهم سهل.
هَيْصَم: او تگدر تجرب طريقه ثانيه مثلاً نرمي عليه نفط بعدين هو يحترق بسبب الشرار اللي عنده ونطبخ عليه بهاي الطريقة مراح توصخ اديك بلمس عيون هيج شخص.
لائِث: انت فقط أأمر وراح تشوف شنو اسوي سيدي.
هَيْصَم: ميحتاج ابداً لتعب نفسك وي واحد ورقته محروگه بكل الاحوال راح تجينه اخباريه بمقتل شخص مجهول الهويه مشوه الوجه واعضاءة تم متاجرتها او يمكن مقطع لدرجه اهله ميتعرفون عليه، يلا لائث تعبنا هوايه وهو واگف افتح اديه خلي يطلع انزعجت واني اشوف هيج منظر تعب نظري حيل.
: رن موبايلي فتحت الخط وخليته على اذني اجاني صوته وهو يصيح.
أرفد: قسماً بذات العزيز راح اتخبلني تصرفاتك، يا اخي ليش مموجود بالبيت شنو حجيت اني؟!
يوم واحد بس او مو يوم مره وحده اسمع بيها كلمتي ولتعاند جرحك بعده اخضر ليش متفهم؟!
هَيْصَم: خلصت؟
أرفد: هذا اللي گدرت عليه؟
هَيْصَم: شنو اتريد اگول مثلاً اني رجال معايش لنفسي فقط، حياة الناس بهاي المنطقه مسؤوليتي شلون تريد اغفل عنهم بس لأني متصاوب بكتفي هذا مو عذر يخليني اترك عملي، ابوي مرباني حتى انام و الوطن بخطر.
أرفد: ومكلك تغفل صحتك ومتهتم بيها، مثل ما الوطن يحتاج اللي يحميه احنه بحاجه للي يحميلنه وطنه لتعاند وارجع للبيت يلا.
هَيْصَم: اصلاً راح ارجع بعد ميخلص شغلي بس انت شعرفك اني مو بالبيت؟
أرفد: نسيت كم شغله واجيت اخذهم وطلعتلي نفس البنيه سألتها عنك و اتفاجأت من شفتك مداوم.
هَيْصَم: لَّباءَة.
أرفد: اي مثل مگلت.
هَيْصَم: اسمها مو صعب لهاي الدرجه حتى متگدر تلفضه.
أرفد: مو صعب بس خاص احس هو لقب مال عشاق هيج يعني.
هَيْصَم: اسده قبل متبدي أرفد اشوفك بعدين.
أرفد: تمام لكن ياريت متكون عمليه هاي المرة.
هَيْصَم: احاول مو وعد.
: دخلت لغرفته حتى انظفها رتبت كم شغله ودخلت للحمام لگيته مخلي الملابس بسله اخذتها وطلعت، الغرفة اللي بصف غرفتي بيها غساله وسلة ومشر ملابس، خليتهم بالغساله ورجعت للغرفه فتحت البرادي والشباك حتى يتغير الهوه ورتبت المخاد، غرفته من اجيت لحد الآن مرتبه بس هسه تركها هيج لأن مصاب يمكن، نزلت راسي حتى اشوف شنو اكو تحت الجربايه هيج مجرد فضول دفعني اسوي هاي الحركه لگيت صورة لبنيه لابسه فستان زفاف ابيض الواضح بصفها عريس بس مگصوص من عدها هذا الجزء فقط ايدة اللي ماسكه ايدها واضحه بلعت ريگي واني اشوف خيال على راسي رفعت وجهي وتصنمت من شفته، عيونه حمر وجاحظة لكدام، وصافن على أيدي اللي بيها الورقة بسرعة كلت: آسفة بالغلط شفتها واني ارتب بالغرفة.
رفع نظره لعيوني كايل..
يتبع..
تفاعلكم اللي يسوي واهس وتعليقاتكم بين الفقرات وتصويتكم للبارت يحلوين
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!