للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه.
شاركوا القصه حتى تكبر عائلتنه ونستمتع وي الهَيْصَم مع بعض.
هَيْصَم
(الكاتبة زهراء احمد)
_____________
ويبقى داخل الروح شيء .
لا يترجمه حبر ولا يستوعبه ورق .
بعض الشعور لا بوح يكفيه .. ولا حرف يحكيه .
خلق ليسكن داخلنا دون أن نخبر به أحد
بالقلب شعور لا يحكي ولا يوصف بالقلب فقط.
ضَرْضَم: اهدأو خلي نعرف الموضوع بالكامل قبل منقرر شنو نسوي،
هَمَّاس من وين جبت الخبر؟
هَمَّاس: احد الأشخاص اتصل بيه وكلي.
ضَرْضَم: عرفته منو هو؟
هَمَّاس: ابحث عن الرقم دقائق ونعرف.
لائِث: اكيد واحد من عدهم هذا البربري اللي مسوي نفسه مديرنه الجديد اگص ايدي اذا مطلع أله ايد بعملية الأغتيال.
هَمْهَام: اهدئ خلي نفهم كل شي وارد ممكن اصلاً ميكون صار بيه شي وهاي كلها خطه من عنده لتستعجلون بأتهام الناس وانتوا اكثر الأشخاص تعرفون طبيعته بالعمل.
لائِث: لتخليني اطلع اخبالي بيك بعمره مسوه شي بدون علمنه هو دائما ينطينا خبر بكل خططه شنو الداعي حتى ميحجي شي هاي المره؟!
ضَرْضَم: كافي لائِث كلنه خايفين عليه مو بس انت مع هذا هاي العمليه مو سهله لازم نعرف كل الخيوط وشلون صار التخطيط وشلون عرفوا بيهم راح يطلعون الصبح بهيج وقت والمحير بالموضوع ليش هو طلع اصلاً؟
هَمَّاس: عرفته.
هَمْهَام: لتلعب بأعصابنه احجي منو؟
هَمَّاس: مابيه عنوان ولا اسم اعتقد مثل مگال لائِث اللي اتصل واحد من عدهم حب يخبرنه بموت قائد الفريق.
لائِث: قسماً بعز الله اذا گلت مات احفر گبرك وادفنك بصفه واسوي عزاء واحد.
ضَرْضَم: لائِثثث.
لائِث: شنو اتريد من خ***
ضَرْضَم: السانك انتبه.
لائِث: شنو اتسوي مثلاً تگطع راسي لو تعلقني فلقه؟
هَمَّاس: اهدأو ميصير هيج مثل الروضه خلونه نتأكد من السياره عن طريق جماعتنه.
ضَرْضَم: راح اتصل بيه البارحه بالليل هو التقي بيه وانطاه الخطه خلوني اشوف اذا يعرف شي لو لا:
الوو
نعم.
ضَرْضَم: الخبر صح؟
للأسف اي اني هم اتفاجأت من اللي سمعته متوقعت راح ينفذون الخطه بهاي السرعة مجان عدنه علم سبقونه بخطه ممتوقعه.
ضَرْضَم: لكن شلون صار كل هذا؟!
جانوا مراقبين البيت وتبعوا السياره بعد ساعه تقريباً هجموا عليه على الطريق السريع اللي يربط بصرة بغداد محد اقترب من عدها ونقذهم لأن جانت خطتهم محكمه سوو الهجوم بوقت جان بيه الطريق فارغ بعد فتره قصيرة احترگت وحتى أثر الهم ماكو.
ضَرْضَم: فريق بحث من المركز طلع حتى يتأكدون ابقى وياي على تواصل وخبرني بالمستجدات.
ما اوعدك مشددين علينه النطاق لهذا مراح اكون متاح بجميع الأوقات انتظر من عندي اتصال اذا عرفت شي تعرف خطورة الوضع اذا اكتشفوا أمري.
ضَرْضَم: الخبر أكيد شباب اكدلي الموضوع هَيْصَم...
قاطعه وهو يصرخ بصوت عالي.
لائِث: ياويلك اتكملها ممات لو اشوفه كدامي أمدد ما اصدگ وشوفوا اشلون راح يدخل من هذا الباب هسه ويعيد سوالفه ويانه ويطلب من عندي اكون شاهد على سوالفه الأستفزازيه.
هَمَّاس: محد گال مات وانما مفقود ماكو أحد يعرف هو وين اترحموله بكل الاحوال الرحمه على الحي والميت.
لائِث: والعباس راح اخلي كل اللي بالمركز يترحم على روحك قبله، تسكتوه لو اشلون لتخلوني اتخبل واسوي مصيبه.
هَمْهَام: اني مراح ارتاح اذا مرحت لمكان الحادث تجون وياي؟
لائِث: اي اصلاً ليش اني موجود اهنا كلنه خلي انروح ونتأكد.
طلعنه من المركز ورحنه لمكان الحادث تقريباً ثلاث ساعات أو وصلنه لنفس المكان الفريق البحثي موجود وانضمينه الهم،
الحرارة انتشرت بكل جسمي واحس النار تطلع من اعيوني شعور داخلي يحفزني اروح وأحرگ كل الموجودين بالمركز أو اولهم اللي مسمي نفسه مدير واني اشوف السياره مالته مباقي بيها شي، اقترب من عدنه واحد من اللي يبحثون بيها.
ماكو أثر لأي شخص موجود بالسياره.
هَمَّاس: يعني ممبين اذا جانوا ميتين او لا؟
لائِث: غير يترك سيرة الموت يا أخي ليش تحسسني قاطعين رزق عزرائيل وتريد ترزقه بهَيْصَم؟!
هَمْاس: شبيك غير نعرف شنو صار بيهم او وين هم هسه.
ضَرْضَم: كافي انتوا الثنين، وانت كللنه اشلون نعرف هو وين هسه؟
ماعرف بس اللي اعرفه مموجود احد بالسياره لاميت ولاعايش.
هَمْهَام: ممكن بسبب الأحتراق معاد ألهم أثر؟؟
ما اعتقد لو موجودين باقي الهم أثر لكن هم مموجودين اصلاً ماكو ولا دليل يثبت انهم ماتوا
ضَرْضَم: اكو كاميرات مراقبه بهاي المنطقه؟
هَمَّاس: ماخذين احتياطهم من هاي الناحيه ماكو اي تسجيل لوقت الحادث ولا بعده.
لائِث: والله بس يصير بأيدي أخ شنو اسوي بيه.
هَمْهَام: خلونه نرجع للمركز وجودنه اهنا بدون فائدة.
لائِث: مستحيل ما أرجع، راح ادور بالمستشفيات وبكل مكان اعرفه يروح عليه.
هَمَّاس: اذا هاي خطه لازم يتصل بينه و المستشفى اتصلت بيهن كلهن ماكو اي وحدة استقبلت هيج حاله اليوم خلونه نرجع وبعدين نفكر شنو نسوي.
لائِث: مستحيل متنتهي بهاي الطريقة السيئة شخص مثله ميموت بسهوله اني اعرف.
ضَرْضَم: كلنه مثلك مصدومين بس شنو بأيدنه نسوي؟
رجعنه اول منزلنه من السيارة صار بوجهنه وهو يحجي بسرعة ونبرة حزن جبيره.
أرفد: صحيح اللي سمعته؟
لائِث: لا نشاقه وياك حضرة الدكتور نلعب وياك ختيلان بس حتى انشوف مقدار حبك أله.
ضَرْضَم: للأسف أي كل شي صار فجأة حتى احنه ممستوعبين هيج خبر.
أرفد: خالتي عرفت؟
هَمَّاس: حاولنه قدر الأمكان منوصل الخبر الهم لكن منعرف اذا سمعت من جهه اخباريه.
هَمْهَام: شلون نعرف هسه هو وين؟!
ضَرْضَم: ممكن انخطف؟
هَمَّاس: احتمال وارد.
لائِث: اتركوا الأحتمالات مالكم وفكروا وياي شلون نگدر نعرف هو وين هسه؟
أرفد: اتصلوا بمدير المركز الأساسي هو اكيد عنده علم لابد يعرف شي.
ضَرْضَم: ماكو احد يعرف شي عنه للوقت الحالي فص ملح وذاب.
هَمْهَام: والحل اكيد منبقى مكتفين ادينه وبأنتظار نسمع خبر وفاته.
لائِث: اني ما لعب نفسي وكرهني بحياتي غير سيرة الموت اللي على السانهم ليش تفاولون عليه بس اريد افهم؟!
هَمَّاس: الموت حق بعدين كل الأحتمالات واردة حتى جماعتنه هيج ظنهم.
لائِث: طز بالكل هَيْصَم حي يرزق لحد يقنعني بغير شي فاهمين.
أرفد: اني مو من حقي ادخل بهيج موضوع يخص عملكم لكن اذا صار شي ياريت تنطوني خبر ماشي.
ضَرْضَم: تدلل دكتور.
هَمْهَام: خلص ماخذ الممر رايح راجع مثل واحد ينتظر زوجته بصالة الولادة.
لائِث: اسكت عني لتخليني اتجاوز.
ضَرْضَم: على اساس انت مؤدب حتى متگدر تتجاوز هسه؟!
لائِث: يا أخي لتدخلون بيه عوفوني بحالي،
هاك استلم جانت عايزة التمت.
عاصم: ليش معصب قابل بس هو مات انت هم تلحگه يوماً ما ايجوز يكون قريب بعد محد يعرف شنو يصير باجر دنيا غريبه.
لائِث: ممكن الله كاتب اموت باجر بس صدگني اذا مراويتني ظهرك اخليك تلتقي بعزرائيل شخصياً واليوم مثل ميگول سيد هَيْصَم.
عاصم: قصدك المرحوم شو نسيتها؟!
هجم عليه ولكمه بوكس بنص وجهه وحجه بعصبيه.
لائِث: اذا مات فريقه عايش ويطيح حظك لتفكر ايموت الأسد تصير الغابه بأيد الكلاب الكرسي ميلوگ لغير اصحابه اما انت حضيرة الحيوانات متليق بيك.
نهض بألم ويحجي بتوعد.
عاصم: اليوم اتنام بالزنزانه مثل المساجين واني اشوفك الكلاب شنو تگدر تسوي.
لائِث: اوي داده رجفت ذيلي.
عاصم: استهزء براحتك دقايق ويجيك الأمر.
لائِث: مو زلمه اللي يخلف بوعده شوفني شنو تسوي يلا.
ضَرْضَم: عاصم لتسوي مشكله تعرف الوضع اللي احنه بيه لتسبب مشاكل اكثر من هيج.
عاصم: اكيد ادافع عن كلب هَيْصَم شنو اتوقع من عندك؟
لائِث: كلب عند هَيْصَم ولا فاره يم الأرعن مالتك،
اسمعوا الغبي ايفكر ازعل اذا لقبني هيج حقك تغار من مدا ثقته وحبه النه على عكسك تماماً حتى تحقيق منعك من عنده غاثكم لدرجه صرتوا تحلمون تاخذون مكانه لو يوم واحد،
مو عادتي انصح واحد فاسق بس هاي لخاطرك ابقى واگف على الباب وترقب بأي لحظه يصدمك بطلته البهيه وهيبته اللي ترجفكم.
هَمْهَام: عاصم شوف شغلك خلي كل واحد بينه يكمل عمله كما لو هو موجود ونشوف بعدين شنو يصير.
عاصم: انتظر العقوبه.
لائِث: هذا من عقله يحجي!!
هَمَّاس: تعرف بيسار ايميل اله ويحبه ومستحيل يقبل عليه شوف شنو راح يصير وياك بسببه.
لائِث: قصدك بسطال.
هَمْهَام: ليش السانك اليوم فالت شنو الفلم؟!
لائِث: انطيني درنفيس واضبه.
هَمْهَام: مو وقت سخافتك ابداً.
لائِث: كول لنفسك هاي الجمله قائدنة ما معروف عنه شي وهذا الغبي ايريدني الزم الساني اني اصلاً لازم ايدي غصب حتى ما أروح واضرب بسطالنه الجديد.
هَمْهَام: ليش والقديم؟
لائِث: ذلك تاج راسك لتحجي عليه.
هَمْهَام: انت اللي گلت بسطال جديد معناها اكو قديم.
ضَرْضَم: تسكتون لو اشلون؟!
لائِث: اتفضل مكتفه من كسر خشمه ايريد اكسر شي ثاني بجسمه حتى يتوب وميندگ بيه يا اخي ليش متقبل تفهم منطيق وجهك ليش كل دقيقه گامز يمنه مثل القرد؟!
هَمَّاس: السانه يولد.
عاصم: السجن راح يأدبه السيد بيسار يطالب مثولك يمه حالاً.
لائِث: بسرعة شكيتي لزوجج متحملتي ابد تسكتين.
عاصم: احترم نفسك لتحجي وياي بهذا الأسلوب لتعرف شلون اتصرف وياك.
لائِث: اللهي ليش مخليني وي مخابيل بشنو علت وتبليني بهيج ناس؟!
ضَرْضَم: مجرد سوء فهم ليش سويت هيج عاصم وانت تعرف الوضع اللي نعيشه هسه؟!
عاصم: انتوا ضايجين على نقيبكم اني شنو دخلي؟
لائِث: مو مشكله ماعندي شي يدلل رجلج يحلوه انشوف شنو يريد.
هَمْهَام: والكافل راح يبهذل نفسه على هذا الأسلوب الأعوج.
لائِث: سمعتك.
هَمْهَام: خوفتني.
ضَرْضَم: انتوا شو ماتحترمون صدگ لو گال المثل اذا ذهب القط العب يا فأر.
هَمَّاس: لائِث روح واحجي وياه خلي نعرف شنو العقوبه.
حتى ميدمر تعبي كله مشيت بخطوات واثقه وكفت كدام الباب مجبر احترم هيج شخص ميستحق الأحترام ابداً بس الظروف اقوة من عندي طرقت الباب وسمعت صوته يسمحلي ادخل نيران مستعرة داخلي ما اگدر اعبر عنها بكلمات من شفته گاعد على كرسيه صار ثلاث أيام من اخذ هذا المنصب غير بيهن هوايه اشياء اهمهن فكك فريق الهَيْصَم لمتابعه هاي القضيه وأستعان بفريق أقل خبره جان شخص حاقد عليه من سنين وما زال لذلك يكره كل شخص معَ هَيْصَم واحنه نبادله نفس الشعور،
حجيت بهدوء قاتل عكس البركان اللي يثور داخلي:
طلبتني؟
بيسار: تعرف العقوبه صح؟
لائِث: الجميع يعرفها واني واحد من عدهم لكن قبل متصدر حكم العقوبه لازم تعرف هو اتجاوز عليه قبل ما أضربه.
بيسار: عندك دليل على صحه كلامك؟
لائِث: اصدقائي شهود.
بيسار: مديرك السابق مجان يعترف بالشهود عنده الدليل أقوه وعليه لكون انت احد افضل الأشخاص بالقسم اخولك أمر تسجن نفسك وتمتثل للعقوبه.
لائِث: ضابط بهيبتي ونجماتي اهان بهاي الطريقة علمود واحد أرعن بس هين اليوم الله سلطك عليه باجر يسلطني عليك و انشوف من أدور الدنيا،
رجعت بخطواتي للخلف يلوموني بتعلقي وحبي واحترامي للنقيب هَيْصَم لكن هو بعمره متجاوز علينه جميعاً يعامل بالمثل من اول يوم تعرفت بيه عليه مجان يقلل احترام مع أحد حتى المتهمين ومن اسأله ليش يجاوبني بالطريقه المعتادة،
هَيْصَم: المتهمين بشر مثلنه حتى نعرف الأسباب اكو طرق هوايه غير العنف اكسب محبتهم مثلاً راح يعترفون بدون تعب بس اتذكر مو الجميع يستحق نفس المعامله مع مرور الأيام تعرف معنى كلامي.
هسه عرفت معنى كلامه صحيح مو الجميع يستحق نفس المعامله الأشخاص اللي جان يعتني بيهم ويساعدهم سابقاً ولا واحد بيهم مهتم ولا كأن رأيسهم مختفي وميعرفون عنه شي اول مره جانت خطه من عنده بس هاي المره گدروا يصيدوه بالغدر،
الحادث خلانه ننصدم لذلك ماكو فائدة من الأستمراريه وعليه اعلنه اللي صار قبل هو خطه لهذا اهل المركز يعرفون انو اللي جان بالمستشفى مو هَيْصَم وانما هو بالبصره لكن محد يعرف غير الفريق المقرب من عنده انو مجان وحده بهاي الرحله.
قبل ما اطلع من الغرفه انطرق الباب بقوة سمحلهم يدخلون ومنصدمت من شفتهم سانديني بطولهم ويدافعون عني.
ضَرْضَم: سيدي احنه نعترف اللي صار خطأ والقانون يفرض عليه عقوبه مع ذلك ارجوا تسامحه انت تعرف اللي صار اليوم مو قليل والسيد هَيْصَم لحد الأن منعرف عنه شي لذلك صارت عنده ردة فعل غير مقصودة والا الجميع يشهد بمدا حبه لأخونه عاصم.
لائِث: حجيت بصوت ناصي حتى محد يسمعني غيره:
طاح حظك اي والله على هاي الجمله لو ساجني سنه ومحاجيها.
ضَرْضَم: مو وقت تفاهه خلينه نطلع من هاي المشكله على خير.
بيسار: القانون ما اگدر اخالفه اني هم ما احب اسجنه بس اذا عاصم قدم شكوى للآمر مالتي اروح بيها وانتوا متقبلون بأذيتي.
لائِث: منو ضاحك عليك اصلاً أرگص اذا صار بيك شي مو زين واطش چكليت بصحن ابو فاضل ربي تسمع؟
ضَرْضَم: لائِث لتخبلني شوف اشلون يباوعلك، هسه يسجنه كلنه مو بس انت.
هَمَّاس: سيدي احنه مستعدين نعتذر جميعاً من عاصم المهم الموضوع ميوصل للسجن.
بيسار: صيحولي عاصم.
لائِث: بعد هذا الأتصال دقائق وتواجد عاصم يمنه منظر خشمه وهو ملفوف خلاني اضحك غصب هم يعيلون ويردوني اسكت والله بأحلامهم.
بيسار: عاصم زميلك واخوك يريد يعتذر من عندك وتحلوها وديه على رغم هاي مخالفه بحقي بس احتراماً لخسارتهم الكبيرة وحزنهم على فقيدهم نعذره شنو رأيك؟
عاصم: مو مشكله لكن خلي ايكون اعتذارة صادق ومن گلبه.
لائِث: رضاك مو غايتي عزيزي لكن احتراماً للسيد بيسار اعتذر من عندك او وعد مره ثانيه راح انتبه على تسديداتي لدرجه اخلي النتيجه النهائيه اتكون صادمه مثل فوز برشلونه على مدريد محد يتوقعها.
عاصم: تعتذر لو تهدد حضرتك؟!
لائِث: افهم اللي يعجبك.
هَمْهَام: اذا منسعفه يروح بيها الأخ.
ضَرْضَم: نعتذر من عندك جميعاً نتمنى تنغلق بوجود هاي الوجوه الكريمه.
لائِث: تره مگاعد بديوان.
هَمْهَام: اسكت انت خلي نطلع اختنگت.
هَمَّاس: وجودي اهنا يضيق نفسي استعجلوا قبل ما انسجن مكان لائِث.
عاصم: اعتذارك مقبول لكن اكتب تعهد متطخني مره ثانيه.
لائِث: لهاي الدرجه اني اخوف؟!
عاصم: على راحتك اذا متقبل.
ضَرْضَم: هو توقيع مو مشكله لتكبر الموضوع لائِث.
لائِث: وقعتها وطلعت ايفكر تگدر ورقه تمنعني انو اكسر اعظامه اذا اتجاوز واحد غبي.
ضَرْضَم: من الأول كتلك سيطر على اعصابك ماكو داعي للأنفعال انت تعرف العقوبه ليش تخالف القانون؟!
لائِث: وانت مقصرت باقي بس تبوس رجله حتى يتنازل؟
ضَرْضَم: انجب.
لائِث: شو صاير ماتحترم؟!
ضَرْضَم: ليش انت خليت بيها احترام؟
هَمَّاس: وتالي وياكم شوكت نخلص من هذا اليوم المشؤوم؟
هَمْهَام: لائِث ضايج مستحيل تخلص.
لائِث: طالع عندي مكالمه ضروريه.
حوري: اني بالمطبخ وي ريهاف دنحضر كيك وسمعت صوت صرخة قوية من الصاله ركضنه اثنينه واني اشوف خالتي متربعه على الأرض وتلطم على وجهه حيل وتبجي بألم وتصيح بصوت عالي.
كلاثم: راح من أيدي اخوجن مخلاني أشبع من طوله الحلو واسمع صوته عافني بدون ميودعني اويلي يمممه راح ابني.
حوري: ركضت يمها ريهاف وتبعنها آمندا و آريا اللي نزلن على الدرج ركض اني عيني راحت على الأخبار
" تعرض النقيب هَيْصَم للأغتيال اثناء قدومه على الطريق بصرة بغداد ومازال البحث عنه قائم كون لم يتم العثور الى الأن على جسده"
رحت بسرعة يمها وحجيت مُطمأنه.
خالتي ممات والله هياتها الأخبار يگولون يبحثون عليه يعني بس سيارته متعرضه للحادث ادعي ان شاء الله مبيه شي ويطلع مجرد حادث طبيعي.
ريهاف: صحيح كلامها خلينه نتأكد اتصلي بيه وشوفي.
كلاثم: جيبي الموبايل خلي اشوفه ماكو غيره واحد يريح گلبي،
السلام عليكم ابني طمن گلبي فدوة لگلبك وكلي وين هَيْصَم صار بيه شي وشنو هذا الخبر اللي سمعته بالأخبار؟
لائِث: وعليكم السلام خاله بعدنه منعرف شي عنه لكن اطمأني البحث عليه قائم وان شاء الله ابشرج برجعته للمركز سالم انتِ بس ريحيلي نفسج ليصعد عندج الضغط وانتم مايمكم أحد.
كلاثم: اشلون اتريدني اطمأن واني ماعرف شنو صاير بيه هسه، الله عليك احلفك بحليب أمك احجي الصدك شنو بيه هَيْصَم؟؟
لائِث: وغلاتج خاله ماكو أي خبر صحيح السياره مباقي من عدها شي بس ماكو اله أثر انشگت الگاع وبلعته.
كلاثم: وهسه اشلون لعد؟؟
لائِث: اذا سمعت شي انطيج خبر صدگيني بس انتِ لتحرگين اعصابج اتعرفين ابنج أكثر من عندي عنيد وراسه يابس ميستسلم للموت بسهوله.
كلاثم: الله يحرسكم بحراسته محفوظين ابني ولتنسه أي خبر تسمعه اتصل بيه فوراً لأن هو مستحيل ايسويها.
لائِث: ايخاف عليكم لو مو حبه الكم مجان خلاكم بمنطقه بعيدة عن عينه ادعي نسمع عنه خبر ويكون مبيه شي.
كلاثم: الله يسمع من عندك شنو أريد غير هيج أني،
روح شوف شغلك يمه أخرتك بسوالفي محفوظ اوليدي بعيون اللي متنام.
ريهاف: شنو گال؟
كلاثم: ميعرفون عنه شي بعدهم يدورون، گايمه اني اصلي وادعي بلكي يطلع سالم منها ومبيه شي.
حوري: الأجواء متوتره وكل وحده اخذت جزء من الصاله يبجن صار اليوم شبيه بيوم عزاء اتمنيت انو يطلع من عدها مبيه شي لخاطر عائلتة بقى الكل ملتزم بوضعيته مرت فتره طويله ونطرق الباب بعنف طلعت ريهاف فتحته ودخلت تصرخ بصوت عالي.
نيجار: هَيْصَم خوويه اويلي عليج يمه اشفت من حياتك وهيج صار وياك ملحگت اشبع من عندك ولج يووم راح هَيْصَم عاف خواته وحدهن بدون سند يحميهن.
گعدت على الأرض وتبجي وتضرب على خدودها انفعلت الى درجه فقدت الوعي وصحنها بالمي ورجعت نفس الحاله طلعت خالتي من غرفتها وگعدت مقابيلها وثنينهن يلطمن حسسني انو هو مات صدگ مو محد يعرف عنه شي او يمكن تكون خطه عسكريه كل شي وارد حسب موصفنه خواته على شخصيته الغريبه والغامضه احساس داخلي قوي حيل مستبعد انو صاير بيه شي بس هن ميصدگن او ميردن يصدگن انو هو بخير وحي يرزق،
اول مره بكل حياتي اشوف هيج مشهد صحيح اخوي ضابط، ولفتره معينه صار مدير المركز بس مجان يتعرض لهيج اشياء او يتعرض لكن أرفد وهو يحلوها بدون متوصل ألنه، بعد كل اللي صار خلاني متكتره وماعرف شنو اتصرف غير ماخذه زاويه وصافنه على ردت فعلهن القوية الجميع يبجي ومنفعل لكن اكثر وحدة من بعد أمه هي نيجار الأخت البعده طلعت فوگ وتركتهن بعد مشفتها صعدت دخلت بعدها للغرفه جانت لازمه بأيدها صورة تمسح بيها وتبجي اقتربت من عدها وحضنتها وخرت عني بعد فتره وتحجي بغصه مليانه دموع وقهر.
آمندا: جان دائماً من يجي يزورنه يودعنه قبل ميطلع ويوصي كل وحده بينه ويأمنه على أمي و البيت ومن استلم هاي المهمه لسه مشايفيه من ثلاث أشهر وحتى ميتصل خفت حيل ليصير بيه شي واني مشايفته كل هاي المده وابقى بحسرتي عليه بالماضي من جنت اگله لتروح وتعيفنه واذا علمود الفلوس دور عن اي شغله ثانيه نگدر نعيش بيها بدون متعرض حياتك للخطر من يسمع من عندي هيج كلام يزعل وميحجي ويايه ولأن اني ما اتحمل اروح اصالحه فوراً وهو يجاوبني ک العادة.
هَيْصَم: ما ازعل من اسمع هذا الكلام من الجميع بس من تحجين انتِ بيه بدون متحسين بلي داخلي حيل انقهر مختاريت هذا العمل علمود الفلوس ولا لمنصب ولا حتى يحترمني الناس ويخافون من عندي اني مو بحاجة النجمات حتى اثبت منو هَيْصَم وانت تعرفين عدل شجاعة اخوج وسمعته بالمنطقه هدفي واضح هو الأنتقام و تحقيق العدل بما انو قادر عليه اريد اسلم القضاء كل متهم دمر حياة الشباب وأهاليهم وكل واحد كان سبب بدمعة أم او زوجه وحتى يتيم.
آمندا: وهسه اتسببوا بدموع أمه شفتي اشلون الحياة مو منصفه ابداً ليش الموت يلاحق الناس الزينه ويترك العارات؟!
حوري: لتحجين هيج اني متأكدة مبيه شي وانت سمعتي شنو كللها صديقه لساتهم ميعرفون عليه شي.
آمندا: بلكي مات او صار بيه أعاقه دائميه وقتها شنو فائدة تضحياته؟؟
حوري: اسم الله لتفاولين عليه وأدعيله وان شاء الله نسمع خبر عنه.
آمندا: اتذكرت نسر مو وياهم اتصلي حتى نتأكد اني ما اثق بكلام لائِث تلگيه من خوفه على أمي محجه شي.
حوري: تمام بس اهدأي،
فتحت الموبايل واتصلت عليه،
الو
نسر: هلا بنيتي شلونج محتاجه شي يروحي؟
حوري: تمام أني بس اريد اسألك تعرف شي عن هَيْصَم خواته كلهن يبجن وماكو احد يطمأنهن اذا سامع أي شي كلي وطلعنه من هذا القلق الله يوفقك.
نسر: منو موجود يمج؟
حوري: آمندا والباقي كلهم جوه ناصبين عزاء.
نسر: لسه ماكو أي خبر طلعت دوريه كامله للبحث عليه وراقبنه جميع الكاميرات بذيج المنطقه بس ماكو أله أثر اختفى فجأة ومحد يعرف حي او ميت.
حوري: شگد فات على اختفائه؟
نسر: تقريباً ساعه تسعه الصبح من اليوم يعني بحدود سبع ساعات.
حوري: اكو احتمال انو يكون لاسامح الله ميت؟
نسر: رب العالمين فقط عنده الجواب صلوا ودعوله واذا صار شي انطيج خبر، خلي بالج يمهن وخاصه خالتي.
حوري: تمام راح انتظرك انتبه على نفسك لتنسه.
نسر: وانتِ هم.
آمندا: شنو كال؟
حوري: مثل مگال لائِث ماكو أي خبر للأسف.
آمندا: اللهم صبرك.
ضَرْضَم: ماكو خبر حتى الأستخبارات ماعدها علم شلون راح نعرف وينه؟!
هَمَّاس: اعتقد شباب هاي خطه من عنده والا مو بسهوله يختفي بهذا الغموض الغريب.
هَمْهَام: او ممكن انخطف؟
لائِث: لو صح فيروز وين؟
حتى هي مختفيه وياه.
ضَرْضَم: لحظه هذا من فريق البحث يتصل،
الوو
سيدي لگينه موبايل نوكيا واگع تحت الكشن متضرر بالحريق بس السيم كارت مبيه شي راح ادزه وي واحد من الفريق.
ضَرْضَم: ملگيتوا شي ثاني؟
لا للأسف مثل مكتلك ماكو أي شي ايدل على وجود أحد بالسياره او موت أحد بس اكو شي مهم لازم تعرفه نسيت احجي بيه من جنتوا موجودين.
ضَرْضَم: اسمع.
باب السايق جان مفتوح قبل عمليه الحرق يعني اذا ردت تحللها بطريقه منطقيه فالصاعد بالسيارة جان يعرف بالمخطط مال محاولة الأغتيال فطلع من السياره قبل متحترك اذا مجان الحريق من فعله الشخصي.
ضَرْضَم: باب السايق بس هو مفتوح متأكد؟
أكيد ألف بالميه شخص واحد بس جان موجود بالسياره.
ضَرْضَم: تمام انتظرك بالمستجدات.
أكيد سيدي.
ضَرْضَم: الكلام اللي حجيته ما أريد احد يعرف بيه غيرنه خلي نشوف شنو المخطط مالته واضح؟
بأمرك.
لائِث: غرد.
ضَرْضَم: اللي بالسياره مو هَيْصَم هذا الخبر أكيد اما شلون ومنو وليش هذا السؤال ينطرح من يرجع.
ضرب على فخذه بأيدة بقوة وصرخ بصوت معبر عن فرحته بسلامة الهَيْصَم.
لائِث: مو گلت هَيْصَم مو بسهوله ايموت بس أخ محد صدگني.
هَمَّاس: خلونه نلتزم الصمت ولنبين شي كدامهم مسوه كل هذا بدون سبب.
هَمْهَام: متحمس حتى اشوف اللقاء الأسطوري بين بيسار و هَيْصَم.
لائِث: حتى لو كلامكم صح لازم انطمئن اهله اكيد امه هسه مرتفع ضغطها،
اتصلت على رقمها محد يجاوب مره مرتين بعدين انفتح وصلني صوتها.
ريهاف: الو.
لائِث: خالتي وين؟
ريهاف: ارتفع ضغطها وهسه هي بغرفتها.
لائِث: شلونج؟
ريهاف: مو زينه اللي صار اليوم خربط أوضاعنه كلنه طمأني ماكو خبر عنه مو والله راح يوگف گلبي.
لائِث: اسم الله.
دام صمت ثواني وقطعته،
مبيه شي اطمأنوا اول ميرجع اخليه يتصل بيكم كولي خالتي حتى متتعذب بالتفكير.
ريهاف: صدگ والله؟
لائِث: اي والله.
ريهاف: شكراً الك راح ابشرها هسه اكيد حتفرح.
لائِث: الفرح ميفارقكم انتبهي على الأهل.
ضَرْضَم: احم احم.
لائِث: انجب أهل مديرك.
هَمْهَام: سمع نفسك هذا الكلام يولد بشرفكم منو سامع لائِث يحجي بهذا الأسلوب من قبل؟
لائِث: ليش عزيزي انت شنو سمعت؟
هَمَّاس: لتفكر بكلامهم يردون يسحبون من عندك حجي لأن مسمعوا شي.
ضَرْضَم: نرجع لقضيتنه هَيْصَم وين؟
حوري: دخلت ريهاف للغرفه مالت خالتي بعد مرتفع ضغطها وبقينه يمها حتى نتأكد من سلامتها علامات الفرح باديه على ملامحها.
ريهاف: ابشركم هَيْصَم بعده عايش ومبيه شي.
حوري: بعد هاي الجمله گعدت خالتي بسرعة من على فراشها وحجت بفرح.
كلاثم: صدگ الله عليج ومنو كلج؟
ريهاف: لائث اتصل بيج ولأن انتِ نايمه اني فتحت الخط وهو گال طمنيهن انو هو بصحه وعافيه بس يجي يمهم يخليه يتصل بينه.
كلاثم: الحمد الله ربي.
آمندا: راح اصلي ركعتين شكر.
آريا: اني اروح وياج همات.
حوري: بلحظة تغير الحزن لفرحه والدمعه اتبدلت لضحكة زينت وجنات الجميع غير رب العالمين الحال فجأة وهاي هي الحياة للي يفهم معناها الصحيح.
لائِث: كلما ابتسم واحس نفسي منعنش تطلع هاي البومه بوجهي وتعكر مزاجي.
عاصم: شباب اريد ملفات التحقيق الجمعتوها بالفتره السابقه المدير يريد يدقق بيهم علمود المهمه.
لائِث: ضَرْضَم شوف شنو يريد قبل ما اكسر شي ثاني بوجهه.
ضَرْضَم: تدلل اخونه الغالي لكن اكو مشكله ماعرف اذا نگدر انحلها او لا.
عاصم: شاركني بيها ممكن نلگي حل.
ضَرْضَم: الملفات كلها موجوده مع المدير هَيْصَم احنه مجرد اعضاء بالفريق ميحق ألنه التدخل بهاي الشؤون.
عاصم: انتوا فريق واحد اكيد عندكم علم متگدر تضحك عليه بهذا الجواب المو مقنع.
هَمْهَام: كلامك صح لكن نسيت شغله مهمه النقيب هَيْصَم هو مو بس مدير المركز وانما هو مسؤول عن جميع الفرق الموجوده بيه، المعلومات كلها يمه وعليه ايها الضابط المحترم اللي تريده مموجود عدنه.
لائِث: انزع رتبتي اذا هذا محترم.
مر الوقت بدون اتصال أو خبر عن الهَيْصَم انقضى الليل الحالك والمليئ بالسواد على قلوبهم اللي تريد تسمع ولو مكالمه بسيطه تطمأنهم انو هو بخير وممتعرض لشيء ما، صحيح مجان موجود بالسياره وقت الحادث لكن هذا ميمنع احتماليه تعرضه لأصابه معينه،
اشرقت الشمس وبثت أملها في قلوب من البشر اما قلوب آخرى جان الظلام والحقد مخيم عليها.
توقفت سيارته كدام المركز فتح الباب ونزل من عدها لابس نظارات سود والنجمات مزينه كتفه، ساعته الفضيه بأيدة الشمال ونظراته الحادة خلف النظارة توقف ثواني وهو يعدل ياخة قميصه بعدين اتحرك بخطوات رزنه و الجميع يضربله تحيه، البعض احترام والبعض حقد وغيره مخبأة تحت نظراتهم المكشوفه امام عينه جاوبهم بأبتسامه على ثغره يثبت بيها هو الأسد وهذا المكان عرينه توقف امام الباب المكتوب عليه،
المدير بيسار.
ابتسمت ودخلت بدون ماطرق الباب مجان أحد موجود لسه او يمكن طالع ، اتقدمت للكرسي وسحبته وگعدت عليه نزع نظارتي وتركتها على الميز وبديت أقرأ بالملفات وتحقق من كل شي صار خلال فتره غيابي، سمعت حركه قريبه من الباب خليت رجل على رجل فوگ المكتب ورجعت ظهري على الكرسي رفعت حاجبه للي دخل وعلامات تفاجئ على ملامحه اكتفيت بقول كلمه وحدة وعلى العادة لازم يظهر بيها جانبي الأستفزازي،
سبرايز..
يتبع..
تفاعلكم اللي يسوي واهس وتعليقاتكم بين الفقرات وتصويتكم للبارت يحلوين
اليوم حجاوب على كل الأسئله بخصوص القصص مالتي للي تحب تتفضل يمي على الأنستا شمعاتي.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!