للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه.
شاركوا القصه حتى تكبر عائلتنه ونستمتع وي الهَيْصَم مع بعض.
هَيْصَم
( الكاتبة زهراء احمد )
___________
نحنُ الواقفون سهوًا في منتصف الطريق خلف الأبواب المُغلقة، العالقون عند المنعطفات، المنتظرون لما لا يأتِ، المُعلقون بحبالٍ من خيال.
اقتربوا من عنده وهو بقى ثابت بمكانه وصلوا يمه وبقوا يحجون بصوت ناصي الى درجه اني اللي جنت واگفه بصفه مسمعت شي بس همس، دقائق قليله سحبني من أيدي وأخذني يم السياره صعدني وقفل الباب ورجع لنفس المكان بقيت أراقب بيهم، أحد الأشخاص الموجودين يمه طلع ماعرف شنو من جيب بنطلونه وقدمه اله استمروا فتره طويله يحجون بدون مينزعون اللثام وكأن خايفين ينكشف أمرهم للحظه فكرت متواعد وياهم يلتقون هنا لكن لغيت هاي الفكرة من اتذكرت انو هو كلي ماعنده شغل الليله، وإذا جان عنده مستحيل يخليني اعرفه.
فتره من الوقت مرت رجعوا لسياراتهم وأنتظرهم حتى يصعدون ورجعلي فتح الباب على بالي نرجع بعد كل هذا لكن خابت توقعاتي من گال.
هَيْصَم: مكتمل التدريب لازم تنزلين ويايه حتى نكمل يلا.
فيروز: مو تأخر الوقت شنو رأيك نأجلها لبعدين؟
هَيْصَم: لاتؤجل عمل اليوم الى الغد لتتقاعسين عن العمل لَّباءَة.
فيروز: اموت واعرف ليش كل هذا الأصرار على تدريبي اللي يشوفك بكل هذا الجهد اللي تبذله علمودي ايفكرك اتريد تخليني ضمن فريقكك.
جاوبني وعلى شفايفه ابتسامة.
هَيْصَم: أو ممكن اني هيج أريد.
فيروز: أي لا مستحيل.
هَيْصَم: لتكوني واثقه ممكن بأي لحظه افكر بخطه تخليج ويايه.
فيروز: على شنو ناوي هَيْصَم؟
هَيْصَم: على تدريبج لدرجه اخليج محترفه حتى اضمن سلامتج بأي زمان ومكان ما اكون متواجد بيه.
فيروز: علمود شنو كل هذا؟
هَيْصَم: الوعد اللي قطعته هو حمل على عاتقي ما ارتاح حتى اوفي بيه انتِ وحيدة بهذا البلد وحتى لو رجعتي لخالتج ماكو رجال عدها حسب كلام ابوج ،اريدج انتِ تحمين نفسج وتثبتين بغياب الأسد انتِ اللبوة اللي تحمي العرين.
فيروز: على هذا لطفك المفروض اشكرك هوايه واني مسويه العكس مخلصتها بس عركات.
هَيْصَم: ميحتاج تشكريني فائدتنا متبادله.
فيروز: لتنغر مجان قصدي اللي فهمته يبقى هذا واجبك سيد افندي.
هَيْصَم: نرجسية.
فيروز: ثقه عاليه بالنفس لتربط كل التصرفات البشريه بمرض نفسي.
هَيْصَم: اضطراب شخصيه وكما يقول اطباء النفس مو الجميع يمتلكون هاي الصفه وعلى رغم تصرفاتهم أدمر الأعصاب بس مجذبه بشكل ملفت.
فيروز: شنو المجذب بشخص متكبر؟
هَيْصَم: مو متكبرين هم لطفاء وقلوبهم طاهره لكن الناس متعرف تتعامل وياهم.
فيروز: احنه النساء نعرف نتعامل مع الجميع الخلل بيكم انتوا.
هَيْصَم: اني مع النساء دائماً لكن في بعض الأحيان الجنس اللطيف ميعرف شنو يريد الرجال وهاي النقطه المهمه تسبب شرخ بالعلاقات ميگدر يمليه غير الأنفصال.
فيروز: تحجي بثقه وكأنك عايش هذا الشعور من قبل، صدك اريد اعرف ليش انت غامض لهاي الدرجه؟
هَيْصَم: راح ازعجج بماضي سيء غير مناسب لجو لطيف مثل اليوم.
فيروز: كلامك صحيح شهر آب حلو بوقت الليل.
هَيْصَم: بما انو الجو حلو خلينه نكمل تدريب يلا راويني شجاعتج وذكائج بحفظ المعلومه.
فيروز: مستعد تندهش بمدا براعتي؟
هَيْصَم: ادهشيني كد متكدرين لَّباءَة.
ابتسمت مكمله.
فيروز: لازم تذكر هذا الأسم وي كل حديث ممكن اعرف السبب؟
هَيْصَم: احب اشوفج منزعجة من عنده المقولة اتگول " اذا لم تستطع اسعاد نفسك عكر مزاج الأخرين ".
فيروز: غير مقوله غريبه،
عافني ومشى كدامي واني صفنت صدگ هاي الأيام صايره احب اسمع من عنده هذا الأسم بكثره وماعاد يزعجني مثل أول،
نفضت الأفكار ونزلت من السياره ورحت يمه أخذت المسدس من أيدة ولزمته عقدت حاجبي بتذمر وحجيت:
حتى مسدسك ضخم مثلك شنو المشكله؟!
هَيْصَم: بعد متعتادين عليه يصير خفيف مثل الروج تماماً هيج سهل الأستخدام.
فيروز: يضيف هيبه للي يلزمه.
التفتلي وكال بغمزة.
هَيْصَم: احنه من الله خلقنه معدلين.
ابتسمت مكمله الشعر.
فيروز: وصيتنه بشويه اعلى من صيت النجم.
ابتسم وكمل كلامه.
هَيْصَم: ميحتاج مسدس حتى نثبت شجاعتنه العراقيين ينضرب بيهم المثل بالقوة والبسالة من آلاف السنين.
فيروز: سؤال يلعب بعقلي اريد اعرف جوابه.
هَيْصَم: الزلم الشفتيهم، منو ومن وين وليش اجو بهيج وقت وشلون عرفوا مكانه وهل جان عندي علم بالموضوع صح؟
فيروز: عفيه اشلون عرفت هذا اللي فكرت بيه؟!
هَيْصَم: مو عبثاً خلص عمري بالجيش و الشرطه هاي اقل ميزة بهذا الشغل، او اصلاً هو سؤالج مبين ميحتاج ذكاء خارق حتى اعرفه.
فيروز: كل البسلك هيج اذكياء ويلكفوها على الطاير؟
هَيْصَم: انخلقت البشريه مختلفه وهذا ايضاً يشمل ابناء
السلك.
فيروز: شنو تخصصك بالضبط؟
هَيْصَم: وشنو تستفادين بمعرفه هذا الجواب؟
فيروز: حتى اعرف الى أي قسم ينتمي الهَيْصَم.
هَيْصَم: اني مدير المركز.
فيروز: يعني انت اللي تنطي أوامر للبقيه؟
هَيْصَم: نعم.
فيروز: وانت تتبع منو؟؟
هَيْصَم: الأعلى والأعلى من عندي يتبع الأعلى من عنده وهكذا يعني مثل السلسلة متواصله حتى تنتهي بالمسؤول عن الجيش و الشرطه العراقي.
فيروز: في وضعك انت على منو دور يعني منو اللي تلقي القبض عليهم ومسؤول عن اعتقالهم؟
هَيْصَم: لكل مهمه فريق مختص ولكل فريق مسؤول واني عندي معرفه بجميع الفرق وهذا يكفي حتى أروي فضولج أما الأن طبقي التعاليم اللي علمتها الج.
فيروز: من شنو نبدي؟
هَيْصَم: الهدف لازم تركزين عليه اتخيلي اكو غزالة لونها ابيض ناصع واگفه كدامج على بعد مترين وانتِ لازم تصوبين عليها اريد تصويبج يكون دقيق.
فيروز: مستحيل ماسويها، شايفني مجرمه حتى اصوب غزالة بريئة؟!
غمض اعيونه بقلة صبر واني ابتسمت على ردة فعله بعدين فتحهم وگال بنبرة أمر ونظرة تخوف.
هَيْصَم: في حال منفذتي التعليمات العقوبه منتظرتج واضح.
نعمت نبرتي وحجيت برقه.
فيروز: هاي شبيك غير اشاقه وياك أيدك والعقوبه.
هَيْصَم: لأن متجين الا بالعين الحمره.
فيروز: ياعين حمره هو باب وتقفله لو تكلبج أيدي، تعودت صارن ميخوفني عقوباتك.
اقترب من عندي وقرب راسه من وجهي حيل وكال بهمس ونبرة ماكره.
هَيْصَم: او نتبع طريقه ثانيه للعقوبه التجديد حلو شنو رأيج؟
رجعت راسي ليوره وعقدت حاجبي واني اكول.
فيروز: اتعلمني لو تنتقم من عندي!!
هَيْصَم: بالمدرسه ميتعلم الطالب بدون اسلوب الترهيب والترغيب اللي يتبعه الأهل والأساتذة واني احب اتبع هاي الطريقه بالتدريب اللي مينفذ يتعاقب وكل مره بشيء مختلف لدرجه محد يخطر على باله طريقتي الجديده بالعقوبات.
فيروز: اقسى عقوبه نفذتها شنو جانت؟
هَيْصَم: ماكو شي قاسي على الجنود في ساحة التدريب لأن ابطالنه يدربون بشكل قاسي جداً لذلك اعاقبهم بشي ميخطر على البال على سبيل المثال ما اخلي أحد يتواصل وياه حتى لو جان بوسط مجموعة.
فيروز: شنو هاي ماعندك كلب.
هَيْصَم: هذا ابسط شي ممكن اعاقب بيه المتهاون وخلي بالج اخليج تكرهين حياتج اذا متبعتي التعليمات.
فيروز: على اساس اني اللي عايشه بوسط ألف شخص هو بس انت!!
هَيْصَم: العقوبه تختلف من شخص لأخر ومن جنس لأخر، اني اعرف عدل نعومة الفتيات متتقارن مع ضخامه الرجال لذلك اختارلج شي مناسب يليق بحضرتج.
فيروز: اويلي على استفزازك وطريقتك بالمراوغه الله ليسلطك على أحد الاهي.
هَيْصَم: دعاء غير مستجاب ربج هوايه سلطني على ناس وراح يسلطني مستقبلاً.
فيروز: جميعهم طلعوا مصابين بمرض نفسي صح؟
هَيْصَم: او اعاقه دائمة حسب كل شخص وقوة تحمله.
فيروز: نبدي؟
هَيْصَم: يلا.
رفعت المسدس ورجعت نزلته واني اباوعله بنظرة بريئة حجيت:
والله ثگيل شنو اسوي؟
هَيْصَم: حابه نعيد المشهد لَّباءَة؟
فيروز: اي مشهد مفهمت؟
وكف ورايه ورجع سحبني لصدره، ولزم أيدي بأيده ورفعها لفوك وبده يشرح وهو يحرك أيدي.
هَيْصَم: ترفعين أيدج بهاي الطريقه، اعيونج مثبته على الهدف بدقه، المسألة حياة أو موت مو لعبه، فتحي مخج أذنج واعيونج وانفج جميع حواسج خليهم يم الفريسة انتِ لبوة وبأنتظار تصتادين وجبه لأبنائج بهاي الأهميه الموضوع واضح؟!
حركت راسي بمعنى أي وهو رجع كمل كلامه وخله أيدة الشمال على أيدي الثانيه وقربهم من الأقسام مالت المسدس حتى سحبه سويت مثل ميگول واتبعت الخطوات اللي انطاني اياهم.
هَيْصَم: الخطأ غير مسموح لأن أي حركه ممدروسه اما تخلي الفريسه تهرب أو تهجم عليج كوني حذرة ودقيقه بتركيزج على الهدف وهسه اتخيلي الغزالة كدامج صوبي عليها ورمي.
اتخيلتها و مجرد وجود هيج منظر بمخيتلي خله گلبي ينكسر حجيت بتذمر بسبب أصرارة على قتل هيج حيوان أليف حتى لو مجرد خيال:
هسه بشنو عايله وياك الغزاله ميصير شي لو غيرتها لخنزير هو صح اثنينهم حيوانات لكن ماعرف يا اخي لطيفه ما اگدر اقتلها.
سمعت قهقهته قريب أذني وايدة اللي ماسك بيها أيدي تتحرك نتيجه الضحك اني هم ابتسمت لا أرادي وماعرف شنو اللي بداخلي جبرني التفت حتى اشوف معاني وجهه شلون تصير من يضحك،
انفاسه تضرب بوجهي، وشفايفه قريب شفايفي حيل، حركه وحده بالخطأ تصير بوسه بدون قصد، هذا القرب خله مشاعر ملخبطه اتولدت داخلي ما اگدر اوصفها ارتباك على توتر، خوف وأمان، لهفه مجنونه ورغبة ماكدر اكبحها، گلبي يخفق بطريقه عنيفه وكأن واگفه على مرتفع عالي و رجليه بعيدة عن الكاع، مردت هذا الشي ينتهي بنفس الوقت مردته يستمر تناقض عجيب صار عندي بهاي اللحظات القليله،
حجيت كلمات مجنت ناويه احجيها بس طلعت من لساني غصب، هيج مواقف تفقدني السيطرة وماكدر اتحكم بنفسي وهذا اكثر شي اكرهه بشخصيتي وهو التعبير عن شعوري بدون ماحسب حساب لأي شي ثاني خاصه لو جنت متوترة:
هاي الوضعيه هَيْصَم ،
جاوبني بدون ميحرك ساكن واعيونه عبثت بملامحي بطريقه وقحه جداً.
هَيْصَم: شنو بيها وضعيتنه لَّباءَة؟!
فيروز: خربطتني،
كلمة وحدة نطقتها خلته يبتعد مسافه عني شفته يمسح جبهته بأيدة واني لعنت نفسي على مدا غبائي طلعت من دون أرادة بس اشلون أگدر ابرر موقفي وهو ماشاء الله مثل الرادار ميفوته شي ابد.
الله يلعنج لَّباءَة على هذا التفكير،
لحظه بس لَّباءَة منو اسمج فيروز واضح فيروز ياويلج تخربطين، حذاري يميل گلبج لشخص راح يعوفج ويمشي وطريقج وياه معروفه نهايته، من قبل ماحبيتي وهسه نفس الشي تسوين.
هدأ عقلي بعد العاصفه الصارت بيه من شويه من شفته يمشي بإتجاهي بلعت ريكي واني اشوف نظراته مثل اول يوم التقيت بيه، عيونه فارغين وبدون حياة أجيت اقرأ على نفسي الفاتحه بس أجلتها من گال كاسر هذا الصمت المريب اللي صار بيناتنا.
هَيْصَم: خلي نرجع للبيت تأخر الوقت نعاود التدريب باجر ان شاء الله.
حبيت اصحح اللي صار قبل مياخذ عليه نظرة، ماحب احد يعرف من اتوتر ماحسب حساب الكلمه التطلع مني وبنفس والوقت ماريده يشوفني بطريقه ثانبه وخاصه هو مخلصها لتحبيني ولتحبيني، حجيت واني كلي ثقه:
ممكن فهمت كلامي غير شي بس اني بالعادة بهيج مواقف يخوني التعبير.
جان جوابه صادم نوعاً ما بس انطاني الأحساس بالراحه من سوا نفسه ممنتبه.
هَيْصَم: ليش اني شنو فهمت؟!
فيروز: مفهمت شي خلينه نرجع اني حيل تعبت.
مشيت كدامه سابقته وقفتني أيدة الزمت أيدي، سحبني عليه طخيت بصدرة نزلت راسي حتى ميصير اي تواصل بصري بيناتنا هو مجرد الشعور اللي انتابني من هذا القرب عذبني اذا شفت عيونه شنو يصير بيه،
لكن منجحت بهاي الحرب العقليه القلبيه بعد مخله اصبعين من أيدة الثانيه على فكي ورفع راسي بيهم يحجي بنبرة لطيفه ذوبت كل حصون القوة والثبات البانيتها.
هَيْصَم: لتسمحين لمجرد كم موقف صار بدون تفكير مسبق ايخليج تقعين بدوامة ما ألها مخرج لأن اني شخص ما أؤمن بالحب ولا بسوالف العشاق گلبي مغلق تماماً ومستحيل ينفتح كدام اي وحدة فلتعذبين نفسج لأن بهاي الحرب الخسران الوحيد هو انتِ،
وجودي بحياتج كمنقذ شي جيد لكن إذا صار حب بهاي الحاله اصير اني الخطر عليج.
غرغرت عيوني بالدموع بس مسمحت تنزل منهم قطرة رجع كمل كلامه بعد جولة نظرات مباحه من عنده على ملامحي وكأني ملكه الخاص.
هَيْصَم: اعتذر اذا سببتلج تصرفاتي اي فكره غلط البداخلي ولا ذرة حب ولا حتى بصيص أمل أنو احب وعلى رغم اني ما اقدم تبريرات لأحد لكن حسيت تستحقين اكلج قبل فوات الأوان وتمشين بطريق مابيه رجعه،
وشغله مهمه لتنسيها لَّباءَة، راسج مينزل سواء جنتي الى جنب الأسد ام بعيدة عنه اريدج تكونين هيبتي بكل مكان تتواجدين بيه وهسه خلينه نرجع للسيارة.
قبل ميمشي وقفته واني الزمه من أيدة حجيت بنبرة غضب طفيفه وعصبيه حاولت اكبحها بسبب كلامه المحسسني كاتله نفسي عليه واني ماعندي علم.
فيروز: تبوس وتحضن وتلزم وحده متربطك بيها اي علاقه لا زواج ولا حب هاي اسمها قلة أدب سيد متدين، ولتفكر انت انسان حلو وهيبه واسمك معروف معناها احبك، احاله، حتى لو كلبي دك غصب عني اشمره للكلاب وما اسأل عليه المهم ميدك خاصه ألك.
ابتسم وهو يكول.
هَيْصَم: اعرف انتِ قوية مراح تحبيني ومتحبين اي واحد ثاني همات.
رفعتله حاجبي وحجيت بقوة.
فيروز: تصحيح، ماحبك اي بس هذا مايمنع احب واحد ثاني غيرك.
قرب راسه يم أذني وهمس بمكر.
هَيْصَم: بس مراح تنسين اول بوسة الج اني أخذتها.
باوعتله بحقد وحجيت بعصبيه من استفزازة المستمر حتى واحنه بهيج وضع:
اكرهك سيد افندي.
جاوبني برود.
هَيْصَم: ولتحبيني أني حذرتج.
بعد هذا الكلام رجعنه للسياره صعدنه واني اريد انفجر بيه بسبب اسلوبه بس سكتت مالي خلك اتجادل وياه، وبعد فتره جان بيه الصمت سيد الموقف وصلنه البيت نزلت وهو ورايه اول مفتح الباب دخلت وبوجهي لغرفتي غلقت الباب وشمرت نفسي على الجربايه بدون ما اغير ملابسي صفنت بوضعي وياه،
ليش من اكون قريبه من عنده افقد التحكم بنضبات گلبي شعور اللي يتولد داخلي من اشوف عيونه مينشرح وما أگدر اعبر عنه معقوله هاي علامات....؟!
مستحيل ماممكن اني اعرف من البدايه الغايه اللي خلاني بيها قريبه من عنده مراح اكون غبيه لدرجه اسلم مشاعري لشخص اعرف مراح يجمعني بيه شي غير هاي المهمه وياريتها تخلص من وقت وارجع لحياتي السابقه جنت مرتاحه و بعمري مفكرت يجي شخص يسلب من عندي حريه التفكير واتخاذ القرار الصح وحتى ميخليني اتحكم بضربات گلبي من يكون موجود.
ليش هيج صار ونقلبت حياتي رأساً على عقب فجأة؟ اتنفست بعمق وكمت غيرت ملابسي ورجعت لفراشي مگدرت انام وخلصتها بس اتگلب، گعدت منزعجه ورحت يم الشباك فتحته وبقيت اباوع للمنطقه ، الحديقه مو صغيره اگدر اشوف الشارع بوضوح تسائلات عصفت بمخي فجأة واني اشوفه يتمشى بالحديقه كدامي ،
عنده اطفال؟
متزوج اكيد ممعقولة رجال بهذا العمر باقي أعزب،
تزوجها عن حب لو تقليدي؟
همات يسمعها كلام رومانسي هسه؟
اكيد هو ديتصل بيها وي منو يحجي بهذا الوقت المتأخر اذا مو هي.
معقوله كللها عليه وشنو قدملها عذر؟!
ايحبها؟!
قبلها مثل مسوه ويايه؟
محظوظه هي تگدر تتمتع بحضنه وقت متريد هنيالها هسه تسمع صوته وهو يحجي وياها بأريحيه زوجته وكل شي بيه ملكها وخاص بيها.
اطردي هاي الأفكار من عقلج ولتصيرين خبله وكافي تتجسسين على الرجال شوفي اشلون دياكلج بعيونه هسه شنو من نظرة اخذها عليج؟
عقلي يحجي ويايه من رفع راسه وباوعلي بسرعة سديت الشباك ورجعت لمكاني ودگات گلبي تقرة الف نفضت كل اوهامي وضربت جبيني على اسألتي التافهه وقنعت نفسي انو هو عايش حياته و مرتاح وي عائلته ملازم اعلق نفسي بشيء مستحيل يصير وهو أكدلي هذا الشي الف مره مو مره وحده،
محبيته، فيروز مستحيل اتحب اصلاً هي متؤمن بهيج موضوع اني اللي اضحك على كل وحده تذكر اسم حب وحبيب تاليها اوگع هيج وگعه اكيد لا هذا مجرد وهم زرعه عقلي لا أكثر ارجعي للواقع وانسي اللي صار وادعي تخلص مهمته على خير حتى اگدر ارجع لبيتي ولحياتي السابقه ومن بين افكاري و كلامي وي نفسي حتى اروضها اتذكرت المره اللي گال عليها خالتي باجر ان شاء الله اسأله عليها واشوف شنو التطورات الصارت لكاها لو بعده، على رغم اكو هوايه غموض بهذا الموضوع يعني بعد كل هذا العمر تطلع عندي خاله زين ليش بابا محجالي شي عنها اصلاً مجان يفتح ويايه مواضيع تخص أقاربنه ودائماً يتهرب من اسأله، اندفن وندفنت اسراره وياه وتركني وحيدة بدون سند أوووف شگد مشتاقتله ومشتاقه لحضنه الدافي ولكلمة بنيتي من يدخل للبيت، اريد واحد يربت على كتفي ويگلي تهون يجي يوم و تگدرين تتجاوزين هذا الألم ک العادة،
راح تعيشين فيروز وتكملين حياتج ويبقى اشتياقج لوالدج نار ملتهبه ميطفيها غير الموت اللي هو الحقيقه الوحيده بحياة مليئة بالأكاذيب،
غمضت عيوني واني ادعوا النعاس لسهره خاصه في عالم الأحلام.
هَمَّاس: سويت مثل متگول وهسه احنه نتعقب اجهزتهم بالكامل.
هَيْصَم: منو دفع الكفاله؟
هَمَّاس: أحد جماعتهم شخص من عدهم منو غيره برأيك.
هَيْصَم: على يوم اسجنه بأيدي محمد هوايه صاير يلعب بذيله لازم نلگيله حل لكن مو هسه هو ميعرف الفايدة اللي يقدمها النه بدون علم.
هَمَّاس: المكان صاير يخنك بدونك، ارجع قبل ميفوت الأوان اصدمهم برجعه الأسد قبل مينتهي الموعد المحدد.
هَيْصَم: اشوكت يصدر أمر النقل؟
هَمَّاس: بعد يومين.
هَيْصَم: أي مركز تم نقلي اله؟
هَمَّاس: موجود بالموصل.
هَيْصَم: ناوين على موتي بحجه الأرهاب، سهله معرفوا بمنو اندگوا ارجع أو اراويهم سليل الأسد شنو يگدر يسوي.
هَمَّاس: كلنه بأنتظارك سيدي لتنسه احنه وياك وين متروح منسمح فريقنه يتفكك ببساطه.
هَيْصَم: موعدنه نفس المكان جمع المعلومات حتى لقائنا.
هَمَّاس: أمرك سيدي.
هَيْصَم: شنو سويت بالي طلبته؟
هَمْهَام: الأسود ديخطط لقتلك عرف المكان اللي انت بيه و بأي لحظه ممكن يسوي عليك هجوم مستغل فرصه تواجدك بالمستشفى حتى ميخلي عليه اي اشتباه.
هَيْصَم: عندي علم بهذا الموضوع اريد شي جديد.
هَمْهَام: راح ادز قوة دعم في حال صار شي يگدرون ينقذوك.
هَيْصَم: هَمْهَام اريدها عايشه اذا صار بيها شي ما اگدر اضمن ردة فعلي لذلك لتدخلوها في حال صار هجوم.
هَمْهَام: كلنه نريد سلامتها ميحتاج توصي حريص سيدي.
لائِث: ليش دائماً اتصالاتك تصير بهيج وقت ليكون مفكرني صاحبتك واني ماعرف تره زوجي يغار لتسوي هيج.
هَيْصَم: عوف الشقه وركز، اريدك مزروع يمي الساعة سبعة الصبح.
لائِث: مو اني ام الروبه حتى اطلع من الفجر ابني بيك شي؟!
هَيْصَم: لائِث شغل مخك ويايه بدون استهبال الموضوع جدي باجر لازم تجي لهنا حتى ترجعها لبغداد.
لائِث: مستعد للهجوم انت؟
هَيْصَم: مو اول مره انغدر متعود على هجمات الجبناء.
لائِث: انتبه لنفسك هَيْصَم لتسمح يصير بيك شي قبل متاخذ انتقامك.
هَيْصَم: انتقامنه لائِث لتنسه.
لائِث: أنتقام لكل شهيد وجريح ولجميع ابناء البلد.
هَيْصَم: عاش العراق وسقطت جميع أيادي التخريب.
لائِث: اعذرني بس ذكرتني بالأبتدائية من يدخل الأستاذ ونكوم كلنه ونگول عاش العراق وهو يجاوب استريحوا احنه نرجع نگول شكراً استاذ بس لحد الأن اتسائل ليش نمط بيها ونسويها لحن ليش منحجيها بصوره طبيعيه والله شي محير؟!
هَيْصَم: شنو رأيك تنام ساعتين وتصحصح وتجي لهنا بلا هاي السوالف اللي متجيب نتيجه.
لائِث: تدلل تصبح على حب هَيْصَم الغالي.
هَيْصَم: تبقى مثل ما انت متتغير،
رفعت راسي شفتها واگفه يم الشباك وعينها عليه نظرتلها بأسى وگعت بمشكله ما الها اي داعي تورطت بمهمه متعرف عنها شي، شلون اگدر اطلعها من عدها بدون ميصيبها خدش؟
حمل ثگيل على اكتافي بعد مرور سنين طويله خلاني القدر بمواجهة نفس التحدي بس مستحيل اسمح تكون النهايه نفسها هي بريئة ملازم تتلوث بهيج حياة الموت هو الشي الوحيد المتيقن بيها.
: فتحت عيوني على صوتها وهي تصيح بأسمي رفعت راسي شفتها الساعه سبعه باوعتلها وحجيت بصوت ناعس:
خيرج من الصبح ذكرتيني بأيام السادس خليني انام اشويه وبعدين انسولف.
آمندا: والله ماكو نوم لازم تحجيلي كل شي ضامته عليه، يلا غردي يحلوه شنو اللي يربطج بمحمد؟
گعدت ومسحت وجهي بكف أيدي وحجيت بعصبيه بسبب النعاس:
ابن عمي شنو يربطني بيه مثلاً؟!
آمندا: وشنو المبهر بلي حجيتيه اعرفه ابن عمج اني اسأل شنو نوع العلاقه التربطكم سوا؟
حوري: ميربطنه شي بالوقت الحالي مجرد يريد يسأل عليه لا أكثر.
آمندا: وتردين اصدگ؟
حوري: والله هاي مشكلتج خليني ارجع انام احسن،
رجعت راسي على المخده سحبتني من ايدي وعدلت گعدتي زفرت بغضب واني عيوني تريد تفترسها:
وتالي وياج خليني انام.
آمندا: اللي تسويه غلط ابتعدي قبل متتندمين حوري، انتِ اكثر وحدة تعرف أرفد ونسر ميقلون غضب وغيره من هَيْصَم اذا مقتلوج يتبرون من عندج والله وميسمحون تزوجيه لو شنو يصير حافظي على نفسج ولتوگعين بمشكله الها اول ما الها آخر.
حوري: لتخوفيني واني ممسويه شي مجرد يريد يطمأن عليه وبس، بعدين الثنين عاشوا مثل ميردون ليش حتى يمنعوني اعيش حياتي ما افهم؟!
اني انسانة مثلهم اريد احب وانحب وين المشكله بكل هذا؟!
وللعلم هو ابن عمي مو شخص غريب مستحيل يسوي شي يضرني.
آمندا: انتِ مو نفس البنيه الترجف بس من ذكر اسم أرفد على رغم هو مدللج ويعتبرج بنته مو اخته شنو سوه هذا وخلاج تغيرين نظرتج عن اهلج لا وتحجين عليهم همات؟!
حوري: مسوه شي غير انو حبني من اعماقه هذا ميشفع عند خواني على رغم اللي سووه مينسي، أرفد اللي دخل مثل العصابه وتزوج اخته بدون حتى مياخذ أذنه ونسر اللي سجنه حتى ياخذ راحته بالعقد واخوها الوحيد ماعنده علم برأيج ميستحقون الكره من عنده على هاي عمايلهم؟!
آمندا: ارفد ينضرب المثل بحبه لريفان ونسر نفس الشي، بعدين هم خطبوهن من ابوهن هو شنو دوره اذا ولي امرهن قابل!!!
اني من وعيت للدنيا الكل يگول ريفان وأيفلين لنسر وارفد بعدين اللي سوته ريفان هو الخطأ ابن عمها ناهي عليها كدام اهلها وكللهم ممنوع تتزوج احد غيره بسبب مرضها راحت هي واخوها واستغلوا غيابه حتى تعقد اصلاً خلي تحمد ربها بهذا الوقت منو تلگي هيج انسان محب ومضحي مثله؟
حوري: لو اني بمكانهن هم قبلوا؟
آمندا: اخوها يعرف اخته متتحمل تخلف لو ميعرف؟
مع هذا قرر يضحي بأخته فقط لأن يكره ارفد برأيج اخوج وعلى رغم رزانته وحكمته او وعيه ليش سوه تصرف همجي كدام عائلتها وكدام الناس؟
مخاف على سمعته وفكر بسلامتها، اهلها كلهم يعرفون ميصير تتزوج حتى العلاقه الزوجيه تعتبر خطرة بدون عمليه وهم قدموها بطبق من ذهب لذلك الغبي اللي ماعرف اسمه برأيج اللي مبيه خير لأهله بي خير ألج؟
تركتني وطلعت وخلتني بحيرتي معقولة ايسوي هيج حتى ينتقم من اخواني بيه؟
نفضت افكاري من شفت رقمه ينور شاشة الموبايل فتحت الخط وخليته على اذني اجاني صوته اللي بيه بحت نوم.
محمد: صباحي صفاء عيونج حوريه.
حوري: صباح النور ليش متصل بهيج وقت حلمان بيه ليكون؟
محمد: جاوبتي على السؤال اللي سألتيه، هاي الأيام متغيبين حتى عن احلامي دائماً اشوفج وين ما اكون وعطرج وابتسامتج متفارقني واذا سألتيني عن السبب فجوابي واحد مراح يتغير،
كل خلية بمحمد واقعه حد النخاع لحوريته.
اتذكرت كلام آمندا وحجيت مقاطعه هذا الغزل:
اترك عدم استيعابي للحب المبكر اللي انت بيه هسه وجاوب على سؤال مهم.
محمد: اسمع.
حوري: شنو تريد من عندي؟
محمد: شنو هذا السؤال الغريب شنو اريد من عندج مثلاً؟
حوري: لتجاوب سؤالي بسؤال.
محمد: احبج واموت عليج واتنفسج هم، شنو تردين اكثر من هيج حتى تقتنعين انو ما اريد انتقم بيج من اخوانج ماكو ربط بالموضوع اني اكرهم وهاي منتهين من عدها ومشاعري ناحيتهم مستحيل تتغيير يوماً ما بس انتِ تختلفين، حبيتج من اول مره شفتج بيها بكل مساوئي، گلبي اختارج بشنو احلف حتى تصدگين؟
حوري: مع هذا اخواني مراح يوافقون على علاقتنه وانت تعرف السبب ميحتاج اشرح كل مره.
محمد: خلي حبنه يتحده الظروف وينتصر عليها انتِ بس وافقي وشوفي شلون احارب الدنيا علمودج.
حوري: تمام اوعدك هاي المره راح افكر من صدگ لكن رجاءً لتشوش عقلي بأتصالك عليه حتى ارجع للبيت.
محمد: موافق مو مشكله صبرت كل هاي الفتره ما اصبر كم يوم؟
غلقت الخط وانفتح الباب بقوة دخلت وهي كلها اعصاب.
آمندا: يلا كومي حتى نتريگ سوه.
حوري: وليش تعيطين عليه؟
آمندا: ماعرف بس اني معصبه من عندج حيل اليوم لتلوميني على تصرفاتي.
حوري: من خوفج عليه اعرف، اني اعتبرج اختي وعليه اتقبل كل مزاجيتج المتقلبه.
آمندا: لتسوين شي تندمين عليه بعدين عائلتج متستاهل اللي ناوي عليه محمد.
حوري: ليش تفكرين بسلبيه ممكن يحبني صدگ ونيته مو سيئة شنو اخسر اذا انطيته فرصه؟!
آمندا: بكل الاحوال ميقبلون اخوتج وتعرفيهم اكثر من عندي عداوتهم توصلنه من امج شوفي الى أي درجه يكرهوه لعد؟
حوري: امشي ننزل اذا ابقى بهذا التفكير راح اموت اليوم لامحاله.
فتحت عيوني على طرقات خفيفه على الباب كمت من مكاني و فتحته صار بوجهي لابس قميص اسود وبنطلون اسود كاف ردن القميص ومزين أيدة الشمال ساعة فضيه واكيد حضرته ميستغني عن فتح اول دگمتين من قميصه واضح من عدهم السلسله و ثغره بيه حامض حلو ابتسمت على مضهره مجذب بشكل ساحر للعين رفع حاجبه وهو مخلي أدية بجيوب البنطلون وينظرلي بعمق بقيت صافنه بيه شويه وصحتني اصابعه من فرقعهم كدامي وهو يگول.
هَيْصَم: أجلي الصفنه لغير وقت لازم نطلع هسه، غيري ملابسج و انزلي منتظرج بالصاله.
نزل قبل ميسمع جوابي تبعته ورحت للحمام سويت الروتين المعتاد ودخلت للغرفه صليت بسرعة وغيرت ملابسي وجمعت البقيه بعلاكه ونزلت شفته ديتصل ومشغول التفتلي وأشرلي اتبعه سويت مثل ميگول وطلعنه صعدنه بالسياره ونطلق و الموبايل منزل من أيدة أخير مره بعد وقت طويل انفتح الخط وقبل ميسمع جوابه عاط بيه.
هَيْصَم: شنو هذا الأستهتار صار ساعه واني اتصل بيكم حتى لو جنت كلب ينبح هم جان احترمتوني وجاوبتوا شفتوني ابتعدت اخذتوا راحتكم على الآخر.
لائِث: حقك تعصب سيدي شنو بأيدنه نسوي اجت الأوامر اليوم نسوي هجوم على بيت مشتبه بيه اني والفريق بالكامل مگدرنه نجي واعتقد هاي خطه حتى يوكعوك كون حذر راح اتواصل وياك بعد متخلص العملية.
عصب وشمر الموبايل من ايدة وضرب الستيرن بغضب.
هَيْصَم: ابناء الملاعين يردون يوكعوني بنص النار بس هين اذا معرفتهم منو هَيْصَم ما اطلع ابن ابوي.
لائِث: هَمَّاس اشبيك صافن ذكرتني بأبو صابر صاير شي ضلع؟
هَمَّاس: حادث على طريق البصره بغداد السياره مالته لائِث، هَيْصَم...
لائِث: لتگولها ميسويها الأسد ميعيف العرين مالته مستحيل ما اصدگ.
هَمْهَام: لازم نطلع حتى نروح للمستشفى بسرعه اخوان استعجلوا.
لائِث: ولكممممم لااااا ميموت هَيْصَم مستحيل يخلف بوعده.
ضَرْضَم: الجميع دخل مرحله من العصبيه والغضب منو بينه يصدگ ممكن أسد مثله ينغدر بسهوله..
يتبع..
تفاعلكم اللي يسوي واهس وتعليقاتكم بين الفقرات وتصويتكم للبارت يحلوين
تصبحون على الف خير.
حسابي الأنستا نسولف بيه عن القصص شمعاتي.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!