للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
دموع وبكاء
وقلب تمزق من العناء
وروح بائت القضاء
وجرح ليس لهُ شفاء
فراق من بعد لقاء
ونهاية قصة تكللت بالشقاء
وحب كتب عليه لا البقاء
فهل سيداوي العشق مرة آخرى قلبهُ؟
أم ،سيحكم علية الماضي بالاكتفاء
الخاطره بقلمي
زهراء احمد
: فتحت الدفتر بنية القراءة نصدمت واني اشوف صورة موجوده بالنص، شكلها قديمه مع هذا ركزت بيها، رجال ومرأه بالزيارة وحاضنها من كتفها صفنت شويه بوجهه واني اريد الكي دليل واحد حتى او اختلاف ملامح بسيط يثبتلي هذا مو هَيْصَم بس كل شي يكول العكس،
يعني مجان حب عابر وإنما زوجته هيج واضح درت الصوره جان مكتوب بيها التاريخ(1/1/2009) الفرحه باينه بعيونهم نزلت دموعي صحيح هو ماضيه ومو حقي ادخل بس جان لازم يكلي هو متزوج من قبل ميصير يضم عني هيج موضوع بالوقت اللي اني حجيتله كل حياتي، نقهرت حيل وحسيت لحد الأن يحبها من اذكر لمعة عيونه من يسولف بالماضي لو بأول لقائنا من يكلي لتحبيني كلها ادل على شي واحد انو لحد الان بكلبه الها مكان وين مجانت وحبي مستحيل يمحي ذكرياته، على رغم ما أللي حق لكن يكولون المرة تحر لو بالكبر، قررت اسكت وما أبين اي شي اله وخليه هو يحجي حتى ميصير الحق عليه، انتظرته لليل،
رجعت الدفتر وتعمدت اخليه جزء من عنده ظاهر حتى يعرف اني شفته وحتى لو تعارك ويايه مو مشكله على الاقل اعرف شنو السر المايقبل يحجيلي عنه وما ابقى محتاره هيج والأفكار تلعب بعقلي، خلص اليوم واني منتظره صارت الساعة عشرة بالليل واني على نفس الفكرة والقلق، الفضول يموت خاصتا لو يخص انسان غالي عليك، نعست وسيطر النوم على عقلي وأغلق اجفاني فزيت وماعرف شكد نايمه على حركه بالغرفه بالعادة نومي مو هيج خفيف لكن بما انو منتظرته فعقلي كعدني، مستغربت من شفته لازم الدفتر وفاتحه اعرفه نبه حيل على أقل شي واكيد وصلتله فكره اني شفته وعرفت بالموضوع، عدلت كعدتي حس عليه والتفتت مصغر عيونه أجيت احجي تركني وطلع تبعته صدك نقهرت يعني ليش مكلي هو متزوج من قبل!!
شنو الداعي يضم عني هيج سيرة ومع هذا هو اللي ضاج، صحيح اني رجعت الدفتر بس بقت الصورة يمي لزمتها بأيدي وتبعته للمطبخ لكيت يشرب مي مديت ايدي وخليت الصورة على الميز صار صوت بسرعة التفت عقد حاجبه وكال بنبرة استفهام.
هَيْصَم: بيج شي اليوم لَّباءَة؟
فيروز: شنو هاي الصورة ليش ماعندي علم انك متزوج قبل هَيْصَم؟
عيونه صارن حمر جان لازم اكلاص بأيده ضربه على الحايط اطشر الكزاز على الكاع وصابتني خوفه بس اتظاهرت بأن الوضع طبيعي مجنت ناويه اسأل بس ماعرف ليش هيج سويت ورد فعله خلاني ساكته خاصتا من صرخ بوجهي بعصبيه على غير العادة.
هَيْصَم: كم مره كلت مااااضيي لتدخلينننن بيه ما ألج علاقه شغله ما اسولف بيها بيني وبين نفسي، ذكريااااات ما أريد ارجعلهااااا ليش كل مره اكول نسيت ترجعين تعيدين نفس السيرررررة شنوووو ترردين بس اريد افهمممم، سواء تزوجت او لااا، حبيت قبل أو محبيت هذا جزء من ماضيي مووو من حقج تسألين عليه خاصتا مضارج بشي.
حسيت لازم احجي وما ابقى ساكته حتى ميخلي الحق عليه.
فيروز: غلطانه صح مو من حقي ادخل بس اعتقد من واجب كل زوج يكول لزوجته اذا متزوج قبل أو لا مو اذا جنت تحب هذا ماضيك وانت حر لكن الزواج شي مختلف على سبيل المثال لو جنت اني متزوجه وضمت هيج موضوع وكتشفته بيوم زواجنا شنو تكون ردة فعلك؟
لتكلي انت رجال واني مرة ونختلف، هيج أمور من حق الشريك يعرف بيها بس اذا انت معتبرني مو مهمه للدرجه اللي تخليك تشاركني ماضيك وتفتح كلبك اليه اهنا يكون الحديث مختلف، على كل حال مجان قصدي اتجسس او ابحث عن ماضيك ابداً لكن كل شي صار من باب الصدفه لا أكثر إذا تحب تحجي راح اسمعك واذا متريد براحتك مراح اجبرك على شي ولا اطالبك بشرح ماضي حياتك إليه عرفت شنو قيمتي عندك من نبرتك الواضح ماضيك اهم من انو تجاوب على سؤالي.
تركته وطلعت نزلت دموعي ميعصب عليه هيج بالعادة ونبرته تكون دائماً هادئة بس سيرة الماضي تغيرة 180درجة، حتى مرات افكر هو عايش لحد الأن بذلك العالم وميقبل ينسه دخلت للغرفه وكعدت على الجربايه حضنت رجليه لصدري وبقيت ابجي بهدوء محبيت اللي صار ابد والحمد لله خالتي مموجودة اليوم ومشافت عصبيته، أنبني ضميري لان حجيت لو باقيه ساكته افضل بنفس الوقت شجعت نفسي بأنو مو من حقه يتعامل ويايه بهذا الأسلوب فقط لأن سألته سؤال طبيعي، ليش هو يدخل بماضيي عادي واني ادخل بماضيه لاا؟!
سمعت الباب ينفتح بقيت على وضعي ومهتميت لكن بقت اذني يم خطوات رجليه اتقرب من عندي وكعد بصفي على الجربايه سحب أيدي وحضني منطيت اي رد فعل ودموعي مقبلت تبطل تنزل، لحظات قليله قاطع هاي الأجواء صوته وهو يكول بهدوء ونبرة حزن جبيرة.
هَيْصَم: مردت اضم عنج الموضوع لان بعدني عايش بالماضي، بس ذكريات ذلك الزمن توجع كلبي لنفسي ماحب اذكرها مطلقاً، عشت كل هاي السنين واني اكرة كلمة حُب لو احد يجيب سيرة الزواج يمي لان اللي صار ويايه ميتحمله انسان ويبقى بكامل عقله.
: رفعت راسي عن صدره وباوعت بعيونه اللي صايرين حمر، نبرته حزينه حيل يحجي بغصه حسيتها تطلع من اعماقه على مدا فضولي اللي يقره مليار حتى اعرف ماضيه بس من شفت حالته هيج بطلت وردت ميكمل بس جان اله رأي آخر وبدأ يسرد قصته.
هَيْصَم: خلي اكملج قصتي وتعرفين شنو صار ويايه من اعترفتلها، بقيت اراقبها من بعيد لمدة أسبوع وجنت أضرب اخر محاضره حتى أوصل على وقت طلعتها من المدراس، بوقتها جنت مراهق طايش وتبعت كلبي اللي تعلق بيها حد الجنون من شافتني هيج متعلق دزت اليه طفل اقترب من عندي وهو مبتسم وكال، هاي البنيه تكول موافقه، أشر عليها وحجه حسيت الدنيا ماواسعتني من الفرحه ردت اطير من صدك بس ثكلت ورجعت للبيت وبسرعه حاجيت والدي وامي حتى نخطب ولأن احنه جوارين وبيناتنا صداقه قويه مصارت عوارض خطبتها وجانت اسعد إيام حياتي حتى من افز بالليل اضحك للهوه لو يشوفني واحد يكول هذا تخبل بس جان هذا شعوري اول مره اعيش الحب ويصير من نصيبي بنفس الوقت الدنيا والقدر وكل شي يضحكلي، متواصلت وياها كل فترة الخطوبة وحتى مطولنه هوايه نخطبنا شهرين وتزوجنا بعطلة نص السنه، راحه نفسيه، سعادة، وحب، وتفاهم، جانت مكتمله والكمال لله مبيها نقص دائما ابتسامتها بوجهه وكلمت حبيبي متنزل من شفايفها اذا جنت احبها قبل صرت اعشقها وصرت اتعمد اضرب الدوام حتى ابقى بالبيت واشوفها وهي على رغم شكد اصريت تكمل دراستها بس رفضت تكول ما أكدر اتحمل مسؤوليتين انت موجود يمي ما أريد دراسة،
اغرمت بتفاصيلها وذبت بيها بالكامل حلمي الوحيد انو رب العالمين يتمم فرحتي وياها بطفل يحمل اسمنه لكن مجان كاتب، استمر زواجنا ثلاث سنوات والحزن باين عليها لان مصارت ام كلما ارجع للبيت الكاها تبجي متحملت اشوفها هيج وبدينه مرحله علاجيه للمره الالف عسى ولعل، اني شخصيا مجان يهمني اصير أب مثل ميهمني سعادتها وابتسامتها.
نجاة: حبيبي أريد اطلب من عندك شغله وياريت متكول لا.
هَيْصَم: عيوني الج نجاتي.
نجاة: اذا مصار عدنه أطفال والدكتورة كالت نفس الكلام مثل كل مره اتزوج وشوف حياتك، من حقك تشوف أبنائك هَيْصَم لتحرم نفسك وأهلك بسببي.
هَيْصَم: رجعنا على نفس السيرة كم مره كتلج اني مكتفي بيج وممحتاج الأطفال اذا مو من عندج بطلي تعيدين هذا الموضوع لان تحركين كلبي بيه.
نجاة: اسم الله على كلبك والله مو قصدي اضوجك ولايهون عليه تروح لوحده ثانية غيري بس ماكو حل لازم تشوف أولادك ميصير تبقى منتظرني.
هَيْصَم: نجاتي ليش مصره تخليني اعصب!!
غيري ملابسج خلي نروح على الموعد وشنو مكالت سيرة الزواج انسيها مستحيل واضح؟
نجاة: تمام مثل متريد المهم متزعل من عندي، انت روحي هَيْصَم متعرف شنو يصير بيه اذا صار بيناتنا خلاف بسيط شلون زعلك انت.
هَيْصَم: حتى متزعليني من عندج ولتفكرين أكدر اعيفج لأي سبب كان، انتِ فرحت عمري وحبي الأول وروحي من الدنيا.
نجاة: عسى ربي ميحرمني من عندك.
هَيْصَم: ولا من عندج يعمري.
: اخذتها ورحنه للدكتورة، جنت متوقع يصير نفس كل مره وتطلع تبجي لان ماكو شي جديد صدك حساسي لكن دموعها جانوا فرح ضحكت بوجهي وحجت من بين دموعها.
نجاة: حامل صار شهرين حبيبي.
: معرفت شنو اسوي من الصدمه بقيت ساكت ومنطيت اي رد فعل رجعنا للبيت شويه شويه ستوعبت انو راح اصير أب بعد ثلاث سنوات انتظار حضنتها من الفرح صرت مثل الطفل اللي جايبيله اللعابه اليحبها عبرت عن سعادتي بكل الطرق مرت الايام والاشهر بسرعة وصار موعد الولادة لزمت كلبي بأيدي خفت يصير بيها شي خوفي وقلقي عليها نساني الطفل وفرحتي بقدومه، بقيت انتظر يطلع احد من المستشفى ويطمني عنها حتى نسيت سلامة الطفل والدي بصفي واكف ويهدي بيه بقيت ثلاث ساعات جان شتا والدنيا باردة حيل طلعت امي تضحك وبشرتنه بحيدر وصار نفر جديد للعائلة،
يكولون الايام الحلوه تخلص بسرعه وهذا فعلاً اللي صار مرت سنتين ابنه حيدر كبر وصار يمشي وفرحتي بيهم ما أكدر اعبر عنها بالكلمات، بنفس الوقت اني صرت محامي والزم قضايا وهذا هو اللي دمر حياتي وسرق سعادتي، كبدايه حبيت اثبت نفسي واخذ قضايا خطره وادافع عن الأبرياء دخلت بقضية مخدرات ولزمتها جانت لشخص بريئ مهدديه ابنته لو تبيع مخدرات لو ناخذ بنتك نبيعها، ناس حقراء بشكل واني كلبي مسمحلي ابقى ساكت على هيج مهزله هو يعرفهم بالأسماء الحركية لان متواصل وياهم كذا مره وهذا جان عامل مساعد اليه حتى تصير القضيه اقوة من ناحيتي وصلني تهديد اكثر من مره ومهتميت بعدها بفتره كلش قليله طلبت من عندي تروح لأهلها رايحين للزيارة وباقي بس امها بالبيت وتريد تعتني بيها، هم سكنوا غير منطقة بعد زواجنا، مكلت لا وهذا اكبر خطأ ارتكبته كل حياتي انو ما منعتها تروح بقت اهناك يومين اني وياها على تواصل مثل كل مره، اتصلت بيه الساعة تسعه الصبح جان صوتها غريب وبيه خوف مو طبيعي نبرتها نبرة مودع خفت حيل يصير بيها شي خاصتا من تعمقت بحجيها.
نجاة: اذا متت ابريني الذمه وزور كبري كلما يصير عندك مجال اريد اسمع صوتك وانت تسولف ويايه واول ليله وصيتي لتعيفني وحدي لان وحشه واخاف، ابنه امانه بركبتك لتجيب مرت اب تعذبه وتضربه ما اسامحك اذا سويتها، لتنسى ايامنه وحتفظ بيها بكلبك يمكن تمر الأيام وتكمل حياتك بس لتسمح انمحي من عقلك جسمي راح يصير جوه التراب بس روحي راح تبقى وياك طول العمر ترافقك وين ما انت، حبيتك من كل كلبي وتمنيت اموت بحضنك وانت تدفني وجان دعائي الدائم ما البس عليك اسود ولا تنزل من عندي دمعه حزن على روحك ورب العالمين مقصر ويايه واستجاب دعائي امانه ابقى تذكرني واقرالي الفاتحه وكلما يصير عندك وقت زورني لتخليني اشتاق لصوتك وسولف لابنه عني وكله شكد احبه وتمنيت يكبر وازفه بأيدي بس الله ميريد هيج، مردت ننتهي بهاي الطريقه بعد هوايه اشياء ردت نعيشها مع بعض خلي ابالك حبيتك من اول يوم شفتك بيه وتمنيت ننجمع أبيت واحد واسمي ينكتب بظهر جنسيتك صار خمس سنوات على زواجنا معشت مثلهن بكل حياتي ولو خيروني يرجع بيه الزمن ونفس النهايه اذا قبلت اعيش وياك صدكني راح اختارك مره ثانيه وثالثه والف، هوايه حجي والوقت قصير راح انام جوه التراب بالوقت اللي لازم اكون نايمه بحضنك الحياة مو عادله كتبت هيج نهايه لقصتنا ردت اعيش وياك الشيب بس القدر عارضني واختار اروح اهناك،
بعد عمر طويل اذا متت خلي يدفنوك بصف كبري اريد احس انت قريب عليه حتى بعد وفاتك، لتنساني هَيْصَم واحتفظ بذكرياتنا بكلبك قصتنا انتهت بهذا اليوم بس راح تعيش طول ما انت تشم الهوه انتبه لنفسك ولتسوي شي خطر ياذيك لان توجعني واني بكبري، امي تصيحني قبل ما أسد الموبايل اريد اسمع من عندك كلمه اخيره.
هَيْصَم: احبج بكل لحظه عشناها سوا، بكد المي والهوى وبكد لحظات حياتي الراحت والاجت، ردت اموت وتبجين عليه وما اريد يصير العكس لتسوين بيه هيج نجاتي وانتِ تعرفين وجودج هو راحتي الوحيده بكل المصايب اللي اعيشها بهاي الفترة، لتوصيني وتحسسيني هاي النهايه بعد هوايه إيام منتظرتنه نعيشها ونربي ابنه مع بعض، اوعديني تبقين بصحتج حتى ارجع وشوفج حبيبتي.
: وصلني صوتها وهي تبجي.
نجاة: ما أكدر حاسه الموت قريب من عندي حيل لازم اشكر ربي لان انطاني فرصه اودعك بيها، مع السلامة ياحبيبي وروحي وكل حياتي وسعادتي الأبديه فرقتنا الدنيا وراح تجمعنا الاخره ان شاء الله، لتنساني هَيْصَم هاي ثالث مره اعيد والأخيرة انتبه على نفسك حبيبي روحي وياك وين متروح راح ابقى ادعيلك حتى واني اهناك.
هَيْصَم: تعيفيني بهاي السهوله ومفكرتي بيه اذا شتاقيت شلون؟!
نجاة: اجيك بالحلم بين فتره والثانية.
هَيْصَم: مصره تموتين يهون عليج تعوفيني وحدي وانتِ الوطن والناس غربه؟
نجاة: ادعيلي بصلاتك وابريني الذمه اذا اذيتك فد يوم صار لازم اروح وي امي تريد تروح للسوك.
هَيْصَم: لترحين زوجج اني وامنعج لطلعين من البيت شويه واجي ارجعج لبيتنا.
نجاة: هو مجرد احساس لتخاف عليه هيج يمكن يكون غلط مع هذا لازم اطلع وي امي ما أكدر اعيفها وحدها تروح.
هَيْصَم: حيدر وين تخليه؟
نجاة: ويايه ما أكدر اعيفه وحده.
هَيْصَم: مقابل اطلعين من البيت ومع هذا راح تعاندين وطلعين انتبهي على نفسج ومن ترجعين اتصلي بيه حتى اجي ارجعج.
نجاة: صدك تذكرت شغله مهمه.
هَيْصَم: شنو هي؟
نجاة: غسلني انت لتخلي وحده تغسلني تعرفني استحي من الناس حتى لو مرة.
هَيْصَم: مٌصره ترفعين ضغطي وتحركين كلبي اليوم!!
نجاة: اسم الله عليك حبيبي بيه ولابيك كل مرض ومصيبه.
هَيْصَم: انجبي لتحجين هيج اني اتحمل يصير بيه اي شي بس انتِ لا ما اقبل يمسج سوء واني عايش.
نجاة: احبك هَيْصَمي انت اول حب والأخير وهنيال اللي راح تاخذ مكاني من بعدي اني باريتك الذمه تتزوج وتعيش حياتك بشرط تنتبه على حيدر ومتاذيه والا اعاتبك من تجيني هاي آمانتي الوحيدة، كل شي املكه ألك محلل وموهوب ومبري الذمه، محامله بكلبي عليك اي حقد او ضغينه موجود بداخلي بس حب ألك، مع السلامه وهاي المره من صدك.
هَيْصَم: غلقت الخط وبقى كلبي وعقلي وياها خفت يصير وياها شي وبقيت ادعي داخلي ربي يحرسها ويحميها اليه، مرت ساعتين تقريباً ورن موبايلي شفته رقمها فرحت انو مبيها شي بس من فتحت الخط وسمعت صوت رجال غريب اهنا ايقنت انو ماكو خير راح يصير ويايه بعد هذا اليوم، مسويه حادث هي وامها وحيدوري رحت بسرعه للمستشفى اللي هي بيها دخلت اركض واسأل بأنفعال عن مكانها كالوا بغرفه العمليات رحت وبقيت انتظر بالباب نسيت نفسي والعالم وبجيت من كلبي عزيزتي هاي شلون اذا صار بيها شي وين اروح وانطي وجهي؟
خلصت ثلاث ساعات واني كاعد على نار وكلبي ممرتاح ابد انفتح الباب وطلع الدكتور نظرته حجتلي اللي ما أريد اسمعه بعدين نطق الجمله الهزت كل كياني وحطمت انسانيتي بالكامل وخلتني اصير شخص حاقد مبغض عديم رحمه أسد جريح.
: البقيه بحياتك زوجتك صار عدها نزيف داخلي براسها وفطر بالجمجمه وكسر ضلعين بجسمها حاولنا كل اللي نكدر عليه لكن للأسف مكدرنا ننقذها.
دفعته ودخلت لكيتها نايمه بسلام وجهه ذبلان مو حبيبتي هاي ليش مبدليها؟!
اجه يمها الممرض حتى يسحبها لزمته من ياخته حيل ودفعته واحجي بقهر: مو زوجتي هاي ليش تضحكون عليه هاي مو نفسها وينهااا ليش مبدليها زوجتي وين؟
: استاذ والله ماعرف اني مجرد ممرض مسؤول عن نقل الجثث للثلاجه ماعندي علم بهيج أمور.
هَيْصَم: يا ثلاجه؟
الدنيا باردة تريد تموتهاا اطلععع بره خليني يمهاا وحدي هي متريد واحد غيري.
دفعته وقفلت الباب من جوه أتقدمت يمها وحضنت وجهه بأيدي، باردة اللي جانت ادفيني وجناتها مو موردة مثل قبل منظرها كسرني حيل وتربع بنص كلبي عاش ويايه لهاي اللحظة ومستحيل أكدر انساه بيوم من الايام، حاجيتها ودموعي مابطلت تنزل: كومي لتنامين بعده وقت لليل اني أجيت وأريد ارجعج للبيت وياي لتعانديني يلاا بعمرج مسويتيها لتسويها اليوم هم،
كومي يلاا، مراح تكومين؟ ناويه فركه من صدك وبعد ماشوفج ولا اشوف ضحكتج ولا اغرك بتفاصيل وجهج ونظرة عيونج؟ ضايع اني بدونج وين عفتيني وانتِ كل اهلي اشوفهم بيج؟ نجاتي كومي وياي تسمعيني حبيبي لتبقين نايمه هيج هسه حيدر يبجي عليج شنو اكله؟
محسيت الا واحد يسحبني من عدها ويضربني كف.
لائِث: صار ساعتين كاعد اهناا لازم ندفنهااا اصحه على نفسك هَيْصَم لتسوي هيج الله يرحمهم ويصبرك اعرف صعب خسارتهم بس لازم تقويلي نفسك حتى تكدر تكمل بدونهم.
هَيْصَم: منو همَ؟!
اكو احد مات غير نجاتي؟
لائِث: متدري؟!
هَيْصَم: لتشلع كلبي كول منو مات؟!
لائِث: ابنك حيدر، وامها طلعت سالمه السيارة دعمتهم بس هم الثنين.
هَيْصَم: يعني ابني ومرتي ثنينهم نايمين هسه؟
لائِث: راحوا يم رب كريم خلي ندفنهم وابجي عليهم مثل متريد ملازم يبقون اهنا.
هَيْصَم: حيدر وين؟
لائِث: أخذته وكاعد نباشر بإجراء شهادة الوفاة.
هَيْصَم: نايمين هم لتبقى تمسلت مو ميتين.
لائِث: ميخالف اعرف نايمين ولازم ناخذهم لفراشهم حتى يرتاحون ميصير يبقون اهنا.
هَيْصَم: ماشي راح اكعدها تكوم وياي واني اجيب حيدر حتى نطلع ونرجع للبيت.
اجيت امشي سحبني.
لائِث: لتخبلنننني استوعب مررررررتك ماتتتت واضح وابنك هممم لتبقى صافن بوجهيييي لازم ندفنهااا جثتهاا بدت تتحلل صار اكثر من ثلاث ساعات ميته افهمممم.
هَيَصْم: ليش تصيح هسه تكعدهااا نصي صوتك.
لائِث: ولك لتخبلني انت الرجال الوحيد اللي بالعائلة الجبير والفاهم، ابوك مات، امك بس هي وخواتك بالبيت ميصير تبقى ضعيف لازم تقوي نفسك علمودهم انت للكل هَيْصَم اصححححه.
: بقى شبه فاقد على رغم كلامي وياه اخذناهم ودفناهم ومقبل احد يغسلهم غيره او يدفنهم بس مع هذا يمشي بدون وعي على اي لحظه حسيته راح يوكع بقيت يمه ومتركته ابد، راحوا كل الناس بقى بس هو كاعد بصف الكبر واحد مكتوب بيه نجاة والثاني حيدر بجيت على حالته شنو لازم يتحمل بعد الحياة لشوكت تبقى تصفع بيه؟
لائِث: خلي نرجع للبيت لازم نسوي الفاتحه وانت تحضرها ميصير تبقى اهنا.
هَيْصَم: روحي اهنا مدفونه شنو عندي هناك؟
لائِث: اهلك هَيْصَم، امك خواتك واخوك انت قوة العائلة لازم تقتنع بهاي الحقيقه.
هَيْصَم: خليني يمها اهنا، تخاف هي من الظلمه وحشه عليها المكان وهي اذا تغير مكانها متنام.
لائِث: هسه يلبسك جني، الدنيا نص ليل صارت كوم وياي خويه لتسوي بنفسك هيج، هي يم رب رحيم روحها لتنسى هذا الجسد فاني الله انطاها جسد برزخي جديد يعني كعدتك اهناا بدون فايدة لاتشلع كلبي كوم وياي.
هَيْصَم: وخر عنها هي تستحي من الغربه تريدني بس اني وحدي لتزعجني خليني يمها متونس لتقطع راحتي.
: بقيت واكف على جهه قريبه من عنده وأقرأ قرآن حتى ميجي الجن أعوذ بالله، لأبيه اتركه ولا بيه اعوفه اهنا حيرني جرح الأسد ماعرف شلون ينراف؟
هَيْصَم: مرتاحه؟
مخايفه موو؟
ابنه شلونه، يمج هو هسه صح؟
هن وحده من الثنين لو تكومين وياي نرجع للبصرة لو تخليني اجي يمج، بعد والدي وانتِ وحيدره الحياة ما الها طعم الموت افضل بالف مره.
: نام على القبر واني صافن عليه شلون حاضنه شكد متكون قوي وميهزك شي مستحيل تتحمل منظره والحاله الوصللها جرحهم صابه بالصميم وسبب ندب مستحيل يندمل يوماً ما، صار الصبح أجيت يمه وكومته غصب اذا ابقى وراه ميرجع ابد عاجبته نومة المكابر: كوم وياي هسه يطلعلنا جني ويخلينا نتكامز مثل القرود وقتها خلي تفيدك الوصيه.
هَيْصَم: وين نروح؟
لائِث: نركص، يمعود فاتحه لازم تلزمها قوي نفسك واذكر قضية الحسين عليه السلام وشلون فقد ولده كلهم بنفس اليوم، السيدة زينب عليها السلام مرة وصبرت وتحملت ونسبت، انت ليش ضعيف ومهزوز هيج؟
هَيْصَم: اريد اموت الحياة مابيها طعم بدونها.
لائِث: اذن اسمع، مرتك ماخذين أعضائها وبايعيها الأطباء مستغلين وفاتها او وضعك النفسي واحد من الممرضين اعترف عليهم لان ممشاركينه بالعمليه ومنطيه فلوس وخبر ثاني يحلو موبايلك اللي ناسي بالمستشفى وصلتله رساله مضمونها اللي صار اليوم جان جريمه مدبره يعني زوجتك وابنك وابوك ماتوا انتقام من عندك بسبب القضايا اللي لازمها بعد تريد تموت وتنسى ثارهم لو تخلي ايدك بأيدي وننتقم سوا؟
هَيْصَم: متأكد من هذا الموضوع؟
لائِث: مثل ما اشوفك هسه يمي لتنسى مصادري موثوقه.
هَيْصَم: اذن خلينا نعاقبهم بطريقه الإِسود، مثل مربونا أهلنا هاي المعركه لازم تنتهي بانتصار الهَيْصَم ماكو مجال للخسارة.
: رجعنا للبيت واقمنا العزاء خلصت هاي الأيام وصار يوم الأربعين سبق العائلة بالكامل وراح اول واحد يزورها قبل ليله كعد يم القبر ونزلت دموعه يحجي بغصه محد يحس بيها غير الفاقد عزيز.
هَيْصَم: شلونج يا الاخذتي العافيه وياج من رحتي؟
اذا سالتي عني فاحب اكلج صار أربعين يوم من متت وندفنت وياج بهذا القبر، نسيت شنو يعني راحه وسعادة باليوم اللي فارقت بي عيونج، البصرة ظلمه من دونج نجاتي ماعندج نيه طلعين من الكبر وترجعين وياي؟
بما انو ما اسمع صوتج معناها رافضه لهذا السبب راح اكلج بقراري، وعدتج ما أعرض نفسي للخطر وراح اعيش بنصه، يمكن ما أكدر ازورج كل جمعة بس انتِ كل لحظه عايشه بداخلي الموت كذبه اللي يحب مستحيل حبيبه يموت داخله ويبقى عايش وياه طول العمر، راح ادخل دورة للعسكريه واصير ضابط أو وقتها اخذ ثارج وثار والدي وحيدره من عيونهم هذا وعد من الهَيْصَم او وعدي بصمه وشاهد نجاتي.
: مرت الايام والاشهر نقلت عائلتي لاربيل واني بقيت ادرب اهنا بغداد انتقلت لهوايه محافظات عشت انواع العذاب والتدريب بأنواعه كل شي صعب استسهلته علمود مهمتي تغيرت طيبتي وصارت مكر، ذكائي ساعدني هوايه بهذا المجال، لكيت اصدقاء أوفياء واللي هم فريق الهَيْصَم هسه، عشت اسوء إيام حياتي ونسيت طعم الراحه والنوم على مدار سنين غيابها، حبيتها وعشقتها وتركت داخلي جرح وأثر مستحيل ينسي، لهذا السبب مردت احجيلج لان اعرف راح تنقهرين وتنزل دموعج على ماضيي الهَيْصَم.
: مسح دموعي بكف ايده وابتسم بوجهي على رغم اعرف هيجت الألم والحزن بداخله حضنته مثل حضن الام لابنها وخليت راسه على صدري بجيت بصوت عالي وعلت شهكاتي اني وهو كل واحد عاش بينه حزن شكل، جنت دائما ألومه على بروده واسلوبه الاستفزازي اليوم يلا عرفت مرات الألم يصنع من الشخص انسان مختلف عن الأصلي يموت احساسه والحياة بعيونه وتصير أيامه عباره عن أرقام لا أكثر، المفروض أحزن على كميه الحب اللي يكنه الها لكن على العكس تماماً اني سعيدة جدا لان بقى وفي على مدار عشر سنوات ويمكن أكثر من هيج لمخلوقه شاركته حياتها وتركته بنص الطريق واللي كسر كلبي اكثر هو ابنه العمره سنتين كلما اريد اسكت ارجع ابجي من جديد وكأن نفتحت جروحي اني هم وتذكرت خالتي او والدي وامي اللي مشفتها كل حياتي، مازعلت منه بالعكس اللي عاشه صعب ومو اي احد يتحمله، العوض مرات يجي على شكل شخص يدزه رب العالمين رحمه العبادة واحنه دزنا عوض لبعض ننسه همومنا ونعيش بسعادة ونفتح صفحه جديدة مليانه حب وتفاؤل.
فيروز: آسفه.
حجيت واني دموعي تنزل رفع راسه وقرب ايده يمسح دموعي وكال بنبره حنينه.
هَيْصَم: اني اللي اسف صيحت عليج وخوفتج ،وياج حق جان لازم تعرفين بهذا الجزء من الماضي.
عقدت حاجبي وسألت باستفهام.
فيروز: هذا الجزء؟!
ليش اكو اشياء مخبايا أكثر هَيْصَم؟
هَيْصَم: تعرفين شنو معاناة اسمي؟
فيروز: لا شنو؟
هَيْصَم: الغليظ الشَّديدُ الصُّلبُ ،ضَربٌ من الحجارة أَملسُ تُتَّخذُ منه الحِقَاق، لكل حرف من اسمي سر جبير ولغز محد يكدر يحله، البعض سهل شرحه والبعض الآخر يصعب توضيحه لخطورته، اسمي يدل على شي واحد وهو الانتقام صحيح اهلي ماتوا على أيد الأسود وجماعته لكن انتقامي مو شخصي ابداً اني انتقم لكل عراقي ادمر بيته وصحته بسبب المخدرات وكل شخص ساهم بترويجها وبيعها لازم يتعاقب.
فيروز: سؤال هَيْصَم بما انك فتحت سيرة الماضي من شوكت تعرفني؟
هَيْصَم: يمكن اعرفج ويمكن لا شايفج من زمان ويمكن لا أفكر اذا يجي يوم اشاركج هذا السر لو لاا.
فيروز: تعرفني احبك مو؟
هَيْصَم: واني اموت على رب وردة الهَيْصَم وخيوط كلبه.
: حضنته ونمت على صدرة على رغم اعرف بعد متهيجت مشاعر الماضي مستحيل ينام والغريب بعد فتره قصيره حسيت بجسمه ثكل ابتسمت وأخيراً كدر ينفتح كلبه مره ثانيه للحب والحياة.
حوري: وخر أيدك لتقترب من عندي.
محمد: ليش يمه ابزز؟
حوري: اشمئز من عندك افهم يا أخي.
محمد: اخوانج نسر وأرفد شوكت صرت اني من ضمنهم؟!
حوري: من اليوم اللي تخليت بيه عني بذلك الوقت صار ما ألك اي حق بحياتي.
محمد: هذا الشي مو انت تقرريه لتنسين يحلوه انتِ زوجتي ومن الواجب تنطيني حقوقي.
حوري: ما ألك اي حقوق لتخليني اروح انام بغرفه ريفان وتحلم تشوف وجهي.
محمد: مره انتِ سويها.
: كمت من الجرباية وردت اطلع سحبني وكعت بحضنه ضربته على صدره بأيدي وحجيت بغضب.
حوري: شلون تسحبني هيج نسيت اني حامل؟!
محمد: قوي على ابو ميصير بيه شي لتخافين خافي على نفسج سركي كلبي.
حوري: خليك عاقل لتسوي شي.
محمد: والله بس المخبل اللي يترك هيج جمال وينام وحده.
حوري: سحبني ولفني بحضنه خله راسي على صدرة وقيدني باديه حتى ما اوخر من يمه، على رغم اكره هذا القرب لكن عطره عاجبني ماعرف ليش بس لاحظي يخليني اتوحم على عطره وبهاي الحاله اوكع ومحد يسمي عليه.
: فزيت من النوم رفعت راسي ملكيته موجود عرفته طلع للشغل سمعت دكات قويه على الباب وبشكل عنيف ردت اكوم من مكاني وصلني اشعار على الموبايل فتحته جانت رساله من رقم مجهول.
"حظري نفسج اقترب موعد لقائنا".
يتبع..
البارت اكثر من 3800 كلمه.
اقتربنا من النهايه وكشف الاسرار البارتات القادمه بيها هوايه سوالف ممكن اتأخر بتنزيلها لقوة الاحداث وحتى ما انسى شي مو شرط وإنما ممكن شمعاتي والموعد بإذن العليم مثل ماهو بين يوم ويوم قبل منتصف الليل.
محتاجه دعائكم لشي كلش مهم وضروري واعرف بيكم متقصرون حبايبي.
تصبحون على الف خير وعافيه شمعاتي.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!