رواية هَيْصَم الفصل الخامس وأربعون 45 - بقلم Zahraa_Ahmed

للتواصل انستا zahraaahmedn99

علقوا بين الفقرات+ صوتوا للبارت+ تابعوا حسابي عيناي انتوا.

شاركوا القصه حتى نستمتع وي الهَيْصَم مع بعض

هَيْصَم
(الكاتبة زهراء احمد)
_______
إنسيةٌ في مثال الجنّ تحسبُها
شمساً بدت بين تشريقٍ وتغميمِ
شقّت لها الشمسُ ثوباً من محاسنها
فالوجهُ للشمسِ والعينان للرِّيمِ

: طرقات خفيفه متكررة على الميز مالتي، كدامي الصورة وذاكرتي رجعت للزمن البعيد.

نجاة: عليك الله خلي نروح للزيارة والله مشتاقه كلش وصار فترة طويله مطالعه من البيت.

هَيْصَم: الجو بارد وتتمرضين انتِ وحيدره اجليها.

نجاة: خلي يم خالتي الله يوفقك لتكول لا.

هَيْصَم: ليش اني أكدر اكول لا؟

نجاة: حبيبي عسى ربي ميحرمني من عندك.

هَيْصَم: ولا من عندج يروحي.

صحيت على صوت الباب مالت المكتب: فوت.
لائِث: صدك والله صار ساعه ادك الباب ليش متحجي عقلك وين؟!

بشنو صافن اكو شي على الميز؟

هَيْصَم: البارحه جان ذكرى آخر مرة نزور بيها سوا كذاب اللي يكول الوقت يشفي الجروح راح يصير 11 سنه وجرحهم بعده يلجمني وكأنه البارحه.

لائِث: شنو ذكرك؟!

هَيْصَم: ليش اني نسيت؟!

لائِث: جروحك منو جددهن هَيْصَم؟

هَيْصَم: تدري لو عايش حيدر جان هسه دخل متوسطة، كل الحبيتهم أخذهم الله من عندي، آمنت بيه وكلت قضاء وقدر بس ليش لحد الأن مماخذ بحقي من عدهم؟
اللي قتلوهم بدم بارد عايشين ويشمون الهوه ليش نكتب بس على هَيْصَم العذاب؟!

لائِث: العراقين كلهم هيج مو بس انت هَيْصَم، اغلب العوائل فاقده وميكدرون يسوون شي على الاقل انت تكدر تعتقلهم بالقانون ويتنفذ بيهم حكم.

هَيْصَم: صار عشر سنين شبعوا موت تغيرت وتغير الوقت وهم نفسهم متغيروا بقوا حقراء ونذلين ويوميه مرتكبين جريمه شكل ومحد يحاسبهم.

لائِث: راح يتحاسبون صدكني ونشهد هذا اليوم اني وانت.

هَيْصَم: تدري شنو تذكرت البارحه؟

لائِث: شنو؟

هَيْصَم: ضربتني كف من جنه بالمستشفى وقتها لحد الآن مناسي تره خليها ابالك.

لائِث: لو يرجع الوقت كسرت راسك مو بس كف اشكر ربك مسويتها جان هسه ماكو هَيْصَم بالوجود.

هَيْصَم: شكرا لوكفتك وياي طول هذا الوقت انت الروح الثانيه للهَيْصَم.

لائِث: اخويه انت وصديق العمر ميحتاج تشكرني زوجني اختك واكون ممنون.

هَيْصَم: انت متجي تتقدم تريد ادزها لبيتك دلفري؟!

لائِث: ليش انت مخليني احك شعري اربع وعشرين ساعة بس مهمات ومراقبة لعبت نفسي يا أخي.

هَيْصَم: نهايه هذا الأسبوع نور انت والعائلة بيتنا المتواضع وميكون خاطرك إلا طيب وها اني من البدايه كتلك اختي مصغر من الهَيْصَم نفس التركيبه مو تزوجتها وجبتها زعلانه لو ماذيها وقتها العن يومك فاهم.

لائِث: لو مو تهدد لو تنصب سيطره يم بيتي اني مصر اصير نسيبك ياحلو.

هَيْصَم: على شكلك الحلو وانصب سيطره هم امصدك نفسك.

لائِث: انت يوم واحد متكدر تعيش بدوني تدري لو لا؟

هَيْصَم: H²O واني ماعندي علم.

لائِث: هذا شنوو؟

هَيْصَم: حقك وين تعرف كيمياء انت خريج أدبي.

لائِث: على اساس انت خريج سايكس بيكو.

هَيْصَم: هاي اتفاقيه بالتاريخ ابد مو خوش طالب طلعت شلون نجحوك؟!

لائِث: نجحت وصرت محامي ينضرب باسمه المثل بس الحماس خلاني اترك المهنه واصير ضابط.

هَيْصَم: متركتها بسبب الحماس وإنما بسببي اسف لهذا الشي لان اعرف شكد تحب القانون والقضايا.

لائِث: تدري شنو احله شي بمهنتنا؟

هَيْصَم: حمايه المواطنين.

لائِث: هذا واجبنا اني كلت احله شي بمكان العمل تعرف شنو هو؟

هَيْصَم: شنو هو؟

لائِث: شوفتك.

هَيْصَم: صاير سرسري منو معلمك؟!

لائِث: من رافق القوم أربعين يوم صار مثلهم واني مرافقك من 33 سنه.

هَيْصَم: بدأ الكذب بوقتها جنت هسه طالع للدنيا شوكت عرفتني وسولفت وياي؟!

لائِث: خليني اعترفلك بشغله صغيرونه.

هَيْصَم: اسمع.

لائِث: انت احله شي صار بحياتي كلها من اليوم اللي نخلقت بيه لهذا اليوم اشكر ربي لان خلاك بطريقي وما اندم على صداقتنا ابد.

هَيْصَم: موافق شوكت العقد؟

لائِث: ياعقد بعدني مخطبت!!

هَيْصَم: وعترافك اللي صارله ساعه وأشكر الرب لان خلاك بحياتي؟!

لائِث: هذا جان بروفا للخطبه.

هَيْصَم: من اكول سرسري تزعل بعمري كله مشايف واحد منفلت مثلك.

لائِث: ضبني خويه لان الدرنفيس مالتي خربان ميساعد.

هَيْصَم: هسه من نطلع تفتيش راح تنضب من وحدك ميحتاج درنفيس.

لائِث: أصبحنا وأصبح الملك لله يارب خلص هذا البلد من كل المجرمين والفاسدين وزوج هَيْصَم والفريق يارب.

هَيْصَم: شنو من دعاء هذا؟!

لائِث: متريد تتزوج؟

هَيْصَم: مكتفي بأ أنثى الأسد عيني ممتليه بيها ليش اتزوج عليها؟!

لائِث: والله اني لاديج ولادجاجه خلصت عمري اشوف مكبلين ومتزوجين وتحسر.

هَيْصَم: مو كل متزوج مرتاح هاي قاعده غلط.

لائِث: على الأساس العزابي مرتاح!!

هَيْصَم: هسه شنو تريد؟

لائِث: بردان شهر الواحد ومظاهرات وحظر تجوال وبردان.

هَيْصَم: اكو تدفئه بالمركز من وين بردان؟!

لائِث: مو انت متزوج متحس بل برد اللي اقصده.

هَيْصَم: شايف هاي الهمر؟

لائِث: حلوه جديده وصلت قبل شهر للمركز.

هَيْصَم: اذا شمرتك عليها على بعد عشر مترات تموت مو؟

لائِث: اصير مخلمه.

هَيْصَم: وياها بيض جوعتني.

لائِث: مو خوش أنثى الأسد محبيت من عدها هذا التصرف شلون اطلعك بدون ريوك سودة عليه.

هَيْصَم: مو خدامه عندي هي.

لائِث: ليش اللي تسوي لزوجها ريوك خدامه؟
انت من تطبخ لنفسك تعتبر هاي خدمة؟

هَيْصَم: من اجبرها تعيف نومها وتكعد تسوي ريوك اليه اي بنظري اني قللت من احترامها وعتبرتها خدامه من حقها تنام وما ازعجها واذا عاجبني اسوي لنفسي ريوك لو اكل اهنا.

لائِث: الحياة الزوجيه مشاركه مبيها شي اذا تكعد وتسوي ريوك مو واجبها صح ولا تعتبر خدمه بالعكس اني اشوفها من باب الحب تهتم بيك ومتقبل تطلع جوعان من البيت.

هَيْصَم: ومنو كلك هي متسوي هيج؟

لائِث: وصار ساعه شنو تلغي!!

هَيْصَم: كتلك وجهة نظري بلي حجيته اذا هي كعدت وسوت ريوك كان بها واكون ممتن من عدها تركت نومها وراحتها علمودي بس اذا هي متعرف وقت طلعتي من البيت وأخذتها النومه مستحيل ازعجها حتى تسويلي ريوك.

لائِث: تفيض احترام للجنس اللطيف.

هَيْصَم: اتعلم من عندي حتى متعاني من مشاكل بعدين اساس كل علاقه هي الثقه والاحترام والاهتمام والحب عامل إضافي.

لائِث: الطالقاني سلام الله عليك ااااااالله.

هَيْصَم: لتأخذ غيبه الناس من الصبح ميجوز.

لائِث: ليش هو الحرام اله وقت معين؟!

هَيْصَم: راح تبقى تلغي هوايه واحنه تأخرنا حيل لازم نطلع تفتيش بسرعة، إلى جميع الدوريات تسمعني اجب؟

ضَرْضَم: نعم سيدي.

اسلام: نعم سيدي.

هَيْصَم: باشروا بالعمليه توكلنا على الحي الذي لايموت اقرأوا الفاتحه لام البنين تسهيل امر ونطقوا الشهاده واتحركوا.

ضَرْضَم، اسلام: بامرك سيدي.

لائِث: وياك اني.

هَيْصَم: اكيد بدون متحجي.

لائِث: موبايلك هَيْصَم صاير متسمع يحتاجلك طبيب إذن.

هَيْصَم: على هذا الصوت مالت السيارات واللاسلكي اللي يمي من وين اسمع؟

لائِث: ليش صفنت شنو الموضوع؟

هَيْصَم: هذااا الحقيررر شلون يتجرأ يسوي هيج؟

لائِث: شنو الموضوع صاير شي؟

هَيْصَم: داز رساله يكول بيها ( مبقى شي ويرجع الحق لاصحابه) السرسري يريدني ارجع اربيه من جديد واعلمه شلون يهددني فاض الاناء وصبري وصل حده صار لازم انفذ الخطه ونلقي القبض عليهم بالجرم المشهود، مستحيل اخلي الماضي يعيد نفسه تحت اي ظرف القصة هاي المرة تختلف اني اللي احدد النهايه مو همَ.

: كاعدة والتفكير موتني مره اكول اتصل بيه واحجيله عن الرسالة ومره اكول لا هسه ينشغل باله عليه واعطله عن شغله، بعدين قررت اتصل بيه واللي يصير خلي يصير على الاقل يكون عنده علم حتى ما اكعد أأنب نفسي اذا صاير شي الله لايقدر، فتحت الموبايل وتصلت بيه ميرد كلت اكيد مشغول بقيت منتظره ربع ساعه ورجعت اتصلت همات ميرد تحول تفكيري من الرساله والخوف اللي بداخلي اله، معقولة صار بيه شي وهسه هو بخطر؟
ليش ميرد هاي عاشر مكالمه الاهي صبرك راح انجنن.

لائِث: وتالي وياك هَيْصَم واكف اهنا وموبايلك بالسياره اي اعرف طفل ليش تتركه اهناك بلكي اهلك احتاجوك؟!

هَيْصَم: موجود يمي الموبايل.

لائِث: لعد هذا شنو!!

هَيْصَم: ليش بقى عندي عقل شويه وتخبلوني انتوا، هَمْاس تسمعني اجب.

هَمْاس: نعم سيدي.

هَيْصَم: شنو صار وياكم؟

هَمْاس: لكينا المتهم بيه سيادتك.

هَيْصَم: كهيال يمكم هسه؟

هَمْاس: اي نعم سيدي اعتقلنا.

هَيْصَم: احسنتم ارجعوا للمركز واني راح اتبعكم.

هَمْاس: أمرك سيدي.

لائِث: شنو صار؟

هَيْصَم: كهيال بين أيدي الإِسود.

لائِث: والنعم من الإِسود والله.

هَيْصَم: عن طريقه راح نعرف مكان الأسود هاي المره ونكدر نلقي عليه القبض.

لائِث: ولّهيم؟

هَيْصَم: محضرله خطه مرتبه تخليه يجي لعريني بسهولة، إلى جميع الدوريات انتهت المهمه بنجاح عاشت ايدكم.

لائِث: موبايلك يتصل صار ساعة متفتح خط شلعت كلبي تره.

هَيْصَم: انت ليش مخلي اذنك يم موبايلي؟!

لائِث: لان اكو مشكله بأذنك اليوم رد بلكي صاير شي موزين ومحتاجيك.

: واخيراً فتح الخط حجيت بسرعه بدون مقدمات،
فيروز: صاير وياك شي هَيْصَم صار ساعه اتصل وانت ماكو قلقتني؟

هَيْصَم: لا حبيبي ماكو شي بس طالعين مداهمه وما اسمع صوت الموبايل، انتِ بيج شي صوتج مو طبيعي؟

فيروز: تكدر ترجع للبيت؟

هَيْصَم: هسه؟

فيروز: اي اذا تكدر تعال محتاجتك حيل محد يمي وخايفه وحدي.

هَيْصَم: راح اتصل بأمي تجي يمج اني احتمال ارجع بالليل لان هسه عندي تحقيق لازم اخلصه، كولي اذا صاير شي لتبقيني قلق.

فيروز: اليوم الصبح وصلتني رساله من رقم غريب يكلي راح نلتقي ماعرف شنو، كلش خايفه هَيْصَم لا يرجع الماضي يعيد نفسه واني ماعندي طاقه اتحمل هيج أمور ابد.

هَيْصَم: دزيلي الرقم راح ابحث عنه واذا صار شي اتصلي بيه بسرعه راح اخلي الموبايل يمي حتى لو جنت بنص الموت هم اجيج.

فيروز: اسم الله عليك حبيبي عمرك طويل ان شاءالله،
اكيد اخرتك عن شغلك محروس بالله حياتي وانتبه على نفسك لتنسى اني قوتي من عندك هَيْصَم.

هَيْصَم: احبج لَّباءَة الهَيْصَم احفظيها وخليها بعقلج دائماً اموت وما اعيفج انتِ علاج لجروحي وراحتي لَّبوة.

فيروز: اني هم احبك حبيبي.

هَيْصَم: صوتج بيه شي احس ممرتاحه اكو شي ثاني لَّباءَة؟

فيروز: لا ماكو شي بس لان نعسانه شويه.

هَيْصَم: ارجعي نامي امي شويه وتجي يمج واني بس اخلص شغلي اجيج ماشي حبيبي؟

فيروز: تمام انتظرك، سد الخط واني رجعت راسي على الجربايه تذكرت كلامه البارحه لو من الأساس مصار كل هذا، لا هَيْصَم استلم القضيه ونقتلت عائلته ولا أني والدي توفى بجريمه بشعه ياترى هم التقينا بشكل ثاني؟
ولو اتجمعنا عن طريق الصدفه اكيد ميكون بيناتنا قصه مثل هاي، سبحان اللي يجمع شخصين محطمين ويخليهم سند لبعض، يقهر الموضوع إلى درجة جبيرة،

صح من اشوف شلون مهتم بماضي صار اله عشر سنوات ولحد الان واضح جداً يحبها وماممكن ينساها يوما ما لكن مع هذا مضايجه من عنده شخصيا لان بعده يحبها بالعكس حبيت مشاعره لزوجته المرحومه وكبر بعيني اكثر من شفته شلون بقى وفي الها كل هاي السنين ومكدر ينسى جزء من ماضيهم، هوايه من قصص الحب الصادق تنتهي بطريقه مأساويه وتبقى مجرد ذكريات منحب نحجي بيها على كميه الألم والحزن التحملها.

حوري: شفت الموبايل مالته على الميز وهو داخل بالحمام دفعني الفضول اعرف شنو بيه فتحته لان اعرف الرمز مخليه عيد ميلادي بوقتها شرطت عليه يغير رمز موبايله مثلي ويمكن ناسي يغيره ابتسمت بنفس الوقت ضجت ميستاهل المسامحة بعد اللي سوا، الفضول يموت جميع العلاقات خاصتاً اذا بدأ البحث والتحري عن الشخص المقابل لان يتحول بشكل عجيب إلى الشك والشك هو محطم لأي علاقه مهما كانت قوتها وهذا اللي صار ويايه خاصتا من شفت صورتها بالصور المفضله منو هاي وليش موجودة بموبايله واني ماعندي علم معقوله يخوني؟
لو هذا ماضي من حياته؟

اذا ماضي اكيد زوجته لان هو ميتامن ابداً لامحاله مسويها واذا حاضر فهي أيضا زوجته بهاي الحاله اني زوجه رقم شنو؟

بجيت وضربت الموبايل بالحايط ومفكرت بالعواقب ابد جان ألم كلبي اكبر من كل شي بالدنيا اخذت موبايلي وبدون ما اسمع من عنده اتصلت بأرفد اول مفتح خط حجيت بدون مقدمات.

حوري: تعال اخذني لبيتنه اذا بعدك على وعدك مستحيل اعيش وي محمد دقيقه أكثر.

أرفد: تمام اجي بس كولي شنو سوالج؟

حوري: تعال وانت تعرف بس استعجل الله يخليك.
أرفد: دقايق واني يمج بس لتبجين يابنتي وتخرب عيونج الحلوه.

حوري: مراح ابجي وداعتك بس لتتاخر حباب.

أرفد: مسافه الطريق واني يمج لتخافين بنيتي.

: سديت الموبايل لكيته واكف ومكتف ايده لصدره ويباوعلي بترقب، نظري راح لشعره اللي ينقط مي خطر على بالي بسرعه اروح احضنه متناسيه كل اللي صار قبل دقيقه، رجليه الحقيره مشتني غصب عطره وشكله كزكزت عليه والهرمونات بدأ مفعولها، حسيت نفسي صحيت وكفت رجليه قريب منه بمسافة من كال.

محمد: بأي حق تردين ترحين لبيت اهلج؟
اخذتي أذني؟ وافقت؟ صايره فد مره متحترميني ولا كأن اني زوجج ومن حقي عليج الاحترام والتقدير لو ناسيه مدام حوري؟

حوري: متكدر تمنعني من اهلي هذا مو من حقك.

محمد: مصار فتره طويلة من تزوجنا هي كلها على بعضها شهر من هسه تردين نبدي مشاكل وخلافات؟!

حوري: اني ممعترفه بهذا الزواج نهائياً لتنسى صار غصب عنه احنه الثنين.

محمد: اقبل بيك حبيبي وزوجي طول العمر احبك محمد ويبقى كلبي ينبض بأسمك طول ما اني عايشه، هذا كلام منو يحلوه؟

:شفت نبرته استفزاز جاوبته بنفس الطريقه واني اكتم غضبي حتى ما اصرخ بوجهه ويضيع حقي.

حوري: جنت مراهقه طايشه وقتها بس هسه تغير الوضع، وبمكان الحب صرت اكرهك، زوجي العزيز.

: اتقرب من عندي ونظرته معرفت افسرها لزم أيدي ويحجي بطريقه كرهته بيها أكثر.

محمد: مضربتج على ايدج وكتلج سلميني نفسج سركي كلبي كل شي صار بسببج بموافقتج الكامله ورضاج لتفكرين ابد تكدرين تخلين الحق عليه وحدي وتتملصين من الواقع، انتِ وافقتي بكامل وعيج بدون اكراه لذلك مو ذنبي وحدي بلي صار.

سحبت أيدي من عنده وحجيت بثقه.
حوري: وهسه اني وعيت على نفسي وراح اصحح غلطي ومستحيل ابقى وياك لحظه وحده.

محمد: سلميلي على خواتي وحاولي تشبعين من عدهم شكد متكدرين لان بعدها تحلمين تسمعين صوتهم بعد.

حوري: تهدد حضرتك؟

محمد: اكلج شنو راح يصير سركي كلبي.

تركني وراح يغير ملابسه سمعت صوت الموبايل عرفته ارفد لبست فستان اسود وشالي وحجيت بصوت عالي حتى يسمع: ما اقبل بيك زوج بعد اليوم خلينه ننهي كل شي مثل مبدينا افضل للثنين على الاقل كون رجال مرة وحده بحياتك.

أجيت اطلع سمعت صوته يجاوبني.

محمد: اليوم احد يوم الخميس ينعاد زواجنا وهاي المرة شئتي ام ابيتي.

: نزلت ممهتمه سلمت على عمتي وطلعت رجع اتصل بيه منتظرني بالباب، فكرت انو هاي النهايه لكن التوقعات مو دائماً تصيب.

هَيْصَم: اي غرد أسمعك.

كهيال: ماعندي شي احجيه للأسف.

هَيْصَم: المكان يرحب بيك اذن، من هنا متطلع بدون منعرف مكان الأسود لو تصير شاطر وتحجي من وحدك لو نتبع وياك غير اسلوب وانت تعرف اني رجال كلش اكره العنف.

كهيال: ماعندك دليل اني مسوي شي.

هَيْصَم: كهيال لو شاهر شنو تحب نسميك؟

كهيال: اسمي كهيال شاهر ماعرف منو هذا.

هَيْصَم: بديت تعجبني تمشي صح خليك هيج بس خايف متستمر بهاي الثقه لان سندس مالتك يمنه.

كهيال: شنو تقصد؟

هَيْصَم: ألين، لو نكدر نكول البنيه اللي تكون عشيقه كهيال وزوجته بالسر، المساعدة ألك بتجارة النساء واللي تبيعهن وهي المساعدة السريه للست بديعه اللي ابشرك هم معتقله اهنا يمنا.

كهيال: مستحيل ما اصدك لتكذب عليه.

هَيْصَم: استغفر الله احنه ناس صادقين منكذب ابد، الا في حالة وحده انو متصل اليوم بيها الساعة سبعة الصبح قبل منعتقلك بساعتين.

كهيال: من حقي التزم الصمت وما اجاوب بدون محامي.

هَيْصَم: انت مجرم ميحتاج محامي قضيتك راح تنرفع للمحكمة لكن حبيت اقدم ألك معروف وهو تخفيف عقوبتك مقابل اعترافك عن الأسود.

كهيال: ماعرف شي عنه مجرد معلومات حتى انت تعرفها.

هَيْصَم: مكانه وين؟

كهيال: مكان ماعرف لكن اعرف بشي اهم تكدر تلقي عليه القبض مباشرة.

هَيْصَم: ليش اثق بيك؟

كهيال: راح احجي كل شي اعرفه مقابل شرط واحد.

هَيْصَم: اسمع.

كهيال: ألين ما الها علاقه بكل شي صار هي زوجتي بالسر صحيح لكن هي متشتغل ويانه ابداً.

هَيْصَم: هي باعتك ليش ادافع عنها هيج؟

كهيال: هي مريضه ما اريدها تموت بالسجن.

هَيْصَم: ليش ستغليتها؟

كهيال: لان احبها متخيلت اعيش بدونها، مرات الانسان يرتكب جرائم باسم الحب واني واحد من عدهم.

هَيْصَم: اقبل شرطك لكن بعد نجاح العمليه وإلقاء القبض على الأسود وفي حال مصار مثل ما أريد وقتها الأمر بيد الخالق ما ألي علاقه.

لائِث: تمت؟

هَيْصَم: عشر سنوات مختصره بشهر يا اما ننجح هاي المره لو مننجح ابد.

لائِث: ننجح اني متأكد.

هَيْصَم: أريد ازورهم واني ازف بشرى الانتصار لارواحهم الساكنه وادي السلام ومتركت السلام بكلبي ابد.

لائِث: اني متأكد راح يجي هذا اليوم اتفائل.

: فزيت من النوم عطشانه حيل كمت من مكاني ورحت للمطبخ اشرب مي لكيت خالتي كاعده تقرأ قرآن اجيت يمها وخليت راسي على رجليها صوتها حنين يجبرك تبجي واني اهنا ضايجه كلش ومخنوكه أطلقت العنان لدموعي بدون توقف، ايدها خلتها على راسي وتمسد بشعري متوقفت قرآءة واني مستمتعه حاسه رب العالمين قريب من عندي ويسمعني بديت اناجي وادعي أجواء روحانيه تحسسك بالإيمان، شويه وصدقت مسحت على راسي بحنيه وكالت.

كلاثم: اليوم معاجبتني صاير شي وياج؟

فيروز: شلون جان عايش الهَيْصَم كل هاي السنين؟

كلاثم: الواضح سولف الج صح؟

فيروز: اي حجالي.

كلاثم: مجان عايش، ترك كل شي وراح بقى يجي كل كم شهر مره يبقى أسبوع ويرجع، حتى اتصال ميتصل اعتزل الكل اتغير هوايه وصار قاسي، جان جرحه جديد بوفاة ابوة وبعد فتره كلش قليله لحكته مرته وابنه مبقى عنده كلب الهَيْصم مات بذلك اليوم مجنت متخيله يرجع يضحك واشوف وجه منور مثل هسه بس رب العرش عوضه بيج لَّباءَة الهَيْصَم مثل ميكول هو مفتخر بيج حيل وحابج وان شاء الله يسعدكم سوا وينسيكم حزنكم ويداوي جرح كلوبكم ويرزقكم السعادة يارب.

فيروز: الله يسمع من عندج يوم.

كلاثم: شحلات اليوم من حلكج حبيبتي، كومي لغرفتج نامي واذا اذن اجي اكعدج.

فيروز: تصبحين على خير.

كلاثم: وانتِ من اهل الخير يا أمي.

دخلت للغرفه مجايني نوم ابد فتحت الشباك وبقيت اعاين على الحديقه الخلفيه رفعت راسي للسماء ودعيت من اعماقي يحفظه اليه وميصيبه شي، سمعت صوت الباب انفتح التفتت شفته اعتاديت كلما اشوفه الكيه مبتسم بادلته ورحت يمه حضنته احس نفسي مشتاقتله وحتى هو موجود يمي.

فيروز: اليوم مكتلك احبك.

هَيْصَم: واني هم احبج لَّباءَة الهَيْصَم.

فيروز: ميجي يوم وتعيفني وحدي مو؟

هَيْصَم: من اموت بس بهاي الحاله او وقتها اعذريني لان مو بأيدي اتحكم بالقدر.

فيروز: اسم الله لتحجي هيج.

هَيْصَم: اريد احجي وياج بموضوع مهم ولازم تستوعبين كلامي بالحرف هاي المره اريد من صدك اشوف أنثى الأسد على أرض الواقع مو مجرد واقع.

فيروز: اني وياك بلي تريده شنو مكان.

هَيْصَم: الحب رزق مرات والله بيج رزقني لَّباءَة اشكر الصدفه الجمعتني بيج، جنت ضايع وبيج لكيت نفسي.

فيروز: احبك لدرجه متكدر تتخيلها.

هَيْصَم: اذا صار يوم وافترقنا بسبب الظروف راح تكرهيني؟

فيروز: ليش تحجي بهاي الطريقه ماكو ظروف تكدر تبعدني عنك حياتي.

هَيْصَم: ماعرف الحياة شنو ضامه النا، مو كل حياتنا سعيدة او ورديه اقتنعي بهذا الشي.

فيروز: يا إيام ورديه هَيْصَم!! الايام اللي علينا اكثر من الالنا.

هَيْصَم: لتحجين هيج، أقدار مكتوبة وامتحان الاهي هذا.
فيروز: صاير شي وضعك غريب اليوم حبيبي؟

هَيْصَم: ماكو شي بس تعبان حيل من الشغل راح اخذ دوش وأنام.

طلع واني حجيت بداخلي: الواضح منتظرنا إيام سودة الراحه منخلقت للهَيْصَم ولَّباءَته.

يتبع.

البارت اقل بشويه من3800 كلمه.

تصبحون على الف خير وعافيه شمعاتي.

حسابي الأنستا.