رواية هَيْصَم الفصل السابع 7 - بقلم Zahraa_Ahmed

للتواصل انستا zahraaahmedn99

اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه.

شاركوا القصه حتى تكبر عائلتنه ونستمتع وي الهَيْصَم مع بعض.

هَيْصَم
الكاتبة زهراء احمد
____________
تعتقد أن جروحك التئمت، لكن نصًا واحدًا فقط كُتب بطريق صحيحة يجعلك تكتشف مدى عُمق الجروح الغائرة فيك.

فزيت من النوم على طرقات قويه على الباب
كمت من مكاني بسرعة و فتحته انصدمت بالمنظر الكدامي هاي ثاني مره اشوفه والدم مالي كتفه سألته بسرعة والقلق ماليني: شنو صار وياك ليش هيج حالتك؟
جاوبني وهو يحجي بصعوبه.

هَيْصَم: جيبيلي الأسعافات الأوليه حتى اغير الضماد.
ركضت بسرعة لغرفته فتحت المجر وطلعت الأسعافات ورجعت لگيته گاعد على الجربايه اتقدمت ناحيته اجيت اساعده و اغير الضماد مالته سحبه من عندي وهو يمنعني.

هَيْصَم: ماكو داعي تعبين نفسج اني اسويه.

زعجني بكلامه اعرف هو ميحب احد يلمسه اصلاً اني مكاتله نفسي عليه بس حالته متسمح يغير للجرح وحده رجعت سحبتهم من عنده واني اگول: ميحتاج لهاي الحركات مراح المسك اول مره اشوف رجال ميحب مره تلمسه مو العكس!!

هَيْصَم: ليش تردين اكون قليل ادب مثل البقيه واتحرش بيج مثلاً؟

فيروز: لتفكر ابداً وجودي اهنا وطلب مساعدتي الك معناها اني كاتله نفسي على لمسك، ميحتاج لهذا الكلام كل اللي اريده اضمد جرحك وراح البس كفوف اني هم محابه يكون بيناتنا تلامس انت مو ذوقي بالرجال احفظ هاي الجمله.

هَيْصَم: صحيح انتِ تحبين المايعين شنو تسوين بواحد مثلي.

فيروز: هَيْصَم خليني اضمد جرحك وبطل سوالف مراهقين.

قرب راسه من عندي ورفع نظره اليه عيونه واضح بيها ألم وتعب، همس قريب من عندي.

هَيْصَم: تحبيه؟

رفعت حاجبي وجاوبته بنفس النبرة: منو هو؟

هَيْصَم: اسمي.

جاوبت بسرعة وبدون مقدمات: وليش حتى احب اسمك يعني شنو المميز بيه مثلاً حتى احبه!!

هَيْصَم: لأن اسمي رائع مثلي تماماً بعدين ليش اني مو بعينج افيض تميز شنو تردين اكثر من هيج؟!

فيروز: انت اضخم حتى تشيلك عيني خليك بمكانك افضل.

هَيْصَم: لَّباءَتي عدها حس فكاهه جميل.

فيروز: لتستهزء بعدين شنو هاي لَّباءَتي؟

هَيْصَم: اذا تبقين تجادلين بهاي الطريقة اموت بسبب النزف وانتِ محاسه.

فيروز: شنو قصدك مفهمت بالأضافه مجاوبت على سؤالي؟

هَيْصَم: الجرح ضمديه واذا متعرفين تگدرين تتفضلين اني اسويه وحفظيها مو كل شي بالحياة اله جواب هاي قاعده.

فيروز: خطأ كل سر اله لغز وكل سؤال اله جواب هاي قاعده احفظها، و جرحك هسه اضمده، فتحت البلاستر بصعوبه بعد ملبست كفوف هاي اول مره اشوف هيج منظر صارت اديه ترجف واني اعاين على الجرح وشلون مخيط الحمد الله الخيط ممفتوح جان احتاج عمليه مرة ثانية، نظفت الدم بقطن وديتول بحذر جبير حتى ميتأذة بس ماعرف شلون طخيت الجرح رفعت راسي حتى اعتذر شفته عاقد حاجبه بألم: أذيتك؟
گال ونبرته واضح عليها الوجع.

هَيْصَم: لَّباءَة لتعبيني أكثر.

فيروز: اسفه والله مو قصدي أأذيك راح انتبه اكثر.

هَيْصَم: لتتوترين وكأن انتِ المجروحه مو اني، رخي ماكو داعي لكل هذا الخوف هو مجرد جرح بسيط يطيب مع الأيام.

فيروز: تمام راح اركز حتى متتأذة، كملت التعقيم بعدين لفيت عليه بلاستر نظيف نزعت الكفوف وحجيت بتساؤل: طلعت مبيك شي رجعت جرحك نازف شنو الموضوع؟

هَيْصَم: ثعلب هجم على غابتي لذلك انطيته درس حتى ميكررها.

فيروز: ثعلب منو ويا غابه اللي هجم عليها وشنو ربطها وي جرحك؟!

هَيْصَم: لَّباءَة تعبان تگدرين تطلعين، راح انام اليوم بغرفتج وأجلي اسألتج لباجر.

فيروز: تمام نام بس اني ابقى اهنا ممكن ترتفع حرارتك وانت نايم على الأقل اگدر اساعدك.

همهم وخله راسه على المخده واني رحت رجعت الأسعافات لمكانها ورميت اللي تلوث بدمه، غسلت اديه ورجعت للغرفة خليت الكرسي قريب من الجربايه رجعت راسي عليه وصفنت، حياتي الحاليه تشبه المسلسلات تماماً انقتل والدي بجريمه مبهمه وخطفي و المجرم اللي يريدني كلهم غريبين لكن اغربهم هو هَيْصَم، شنو غايته من مساعدتي وليش خلاني بهذا المكان المبين عليه خاص جداً وحتى ممسكون كل شي بيه مرتب وعلى أخر حبايه حتى التصميم و اللون المستخدم بالأثاث، من تشوفه يخطر على بالك هذا المكان اله قصة وكأن انبنى بكُل حُب، وجودي بيه غريب، اكيد اكو سبب وسر مختلف تماماً عن اللي گاله حاسه بهذا الشي ما معقولة اكو شخص عاقل يعرض حياته للخطر ويلعب هيج لعبه خطره مع المجرمين الا اذا عنده خطه او مشروع انتقام، حسيت نفسي ثقيت بيه بسرعة بالوقت اللي لازم اخذ حذري منه أكثر، صحيح تصرفاته واسلوبه ممبين عليه انسان مو زين ويريد مضرتي بس هذا هم مايعني يريد مصلحتي، منو الشخص اللي يخاطر بحياته هيج وينقذ وحدة يردون موتها، والشي اللي مامعقول اكثر ومخليني دايخه بابا جان رجال فقير ومن اهل الله كل عمره خلص من الشغل للبيت و العكس منو هذا اللي قتله بهاي الصورة البشعه وهذا التكتيك، معقولة ايكون متورط وياهم لهذا السبب تخلصوا منه؟

ضربت جبيني عشت حالة اكشن خلتني اشك حتى بأقرب شخص اليه و الوحيد اللي حتى لو اشوفه كدام عيني ما اصدگ يسويها، جان يعلمني على الأخلاق و الصح من الخطأ معقوله يصافح مجرمين ويلطخ اديه بعمليات غير قانونيه، مستحيل اله ايده وي المجرمين، اسئلة كثيرة بعقلي ما الها راس خيط أكدر الزمه واعرف الجواب، انقطعت هاي السلسله المتواصله اللي ادور بمخي على صوت أنين صادر من عنده كمت من مكاني او وكفت قريبه عليه حيل، يهمس بكلمات غير مفهومه مو واضح شنو يحجي نزلت راسي وخليت اذني قريب اشفايفه سمعته يردد هاي الكلمات.

هَيْصَم: لترحين ،لتعوفيني، ارجعي.

رفعت راسي وقربت ايدي من جبينه حرارته مرتفعه، طلعت من الغرفه بسرعه ورحت للمطبخ طلعت علاج خافض حرارة تركه الدكتور اهنا اخذت من عنده حبايه وكوب مي ورجعت يمه اقتربت من عنده وگعدته:

هَيْصَم... هَيْصَم تسمعني افتح عيونك حتى تشرب علاج يلا.

همهم ورجع نام مرة ثانية هسه هذا شلون اگعده هو ميحب احد يلمسه وليگعد من اصيح اسمه شنو الحل؟
تركت كوب المي على الميز اليمه ونزلت راسي  وحجيت قريب اذنه: هَيْصَم، هَيْاصَم، هَيْصَوم، هَصَمصَم، افتح عيونك يلا لتشلع گلبي.

رفعت راسي واني اضحك على نفسي لو يسمعني شنو لقبته يشمرني من الشباك، اجت عيني بعينه يفتحهم ويسدهم بتعب، بيهم احمرار نعاس ومرض هم، صفنت بيهم شويه ورجع سدهم بسرعة صحت اسمه حتى يصحصح وميغفى: هَيْصَممم.

فتح عيونه وأشرلي براسه بمعنى شكو: مرتفعه حرارتك اشرب الحبايه حتى تصير احسن.

عدل گعدته انطيته الحبايه شربها هي والمي ورجع لمكانه ويحجي ويايه بصوت ناصي.

هَيْصَم: روحي نامي لتبقين سهرانه يمي لَّباءَة.
رجعت للكرسي واني احجي بهمس حتى ميسمع: حتى وهو مريض مينسى هذا الأسم الغريب ترك كل الأسماء الحلوه بالعالم وسماني لَّباءَة.

ماعرف شلون غفيت واني على الكرسي فزيت على صوت الموبايل رحت يمه حتى اشوف منو المتصل شفت فقط صورة نجمة ماكو اسم اقتربت من عنده حتى اگعدة اجت عيني على ملامحه ارموشه كثيفه نوعاً ما حواجبه محددهم بطريقة كلش مرتبه انفه طويل بس مو حيل يعني مناسب تماماً وي وجهه، اسمر ونهاية وجه حادة، ماعندة لحيه الواضح يحلقها كل يوم لأن ممبين من عدها شي، واكثر شي مميز بوجهه هي شواربه تشبه تماماً اشوارب ابو اشهاب اباب الحارة لكن هو مرتبهم اكثر، واني صافنه عليه فتح عيونه بعيوني من الصدمه رجعت بسرعة ليوره وسويت نفسي اگح شربت مي من الگلاص اللي خليته اهنا البارحه وهو يحاول يكوم سألته: شنو تحس هسه صرت احسن؟

صفن شويه بوجهي ورفع حاجبه وگال بنظرة تفاجئ.
هَيْصَم: انتِ ليش اهنا؟

فيروز: لأن اتمرضت وبقيت يمك حتى اي شي يصير اساعدك بس مو اكثر.

رفع راسه اليه وگال بتساؤل.
هَيْصَم: شنو حجيت البارحه؟

حسيت لازم اكون صادقه واگوله شنو گال: لترحين، لتعوفيني، ارجعي، ردتتهم اكثر من مره لكن بعد مشربت الحبايه نمت ومسمعتك، انت جنت مريض و بالعادة الأنسان اللي يمرض يحجي اي شي يحلم بيه مو مشكله.
هَيْصَم: شكراً، تعبتي ويايه وبقيتي سهرانه علمود سلامتي تگدرين تنامين اني راح اطلع.
فيروز: لتشكرني اللي قدمته اليه لايقاس بلي سويته ابداً وقبل متطلع لازم تاكل وتشرب علاج حتى تتحسن بالكامل.

جاوبني وهو واكف يم الباب.
هَيْصَم: كل شي يزيد عن حده ينقلب ضده لَّباءَة انتبهي.

فيروز: شنو قصدك مفهمت؟

هَيْصَم: بالعادة اني شخص احذر قبل ما اتخذ اي اجراء اول مره تحذير ثاني مره متعرفين شلون تكون عقوبه الهَيْصَم وبأي طريقة لتلعبين ويايه لَّباءَة ولتفكرين ابداً من السهل تعبرين حصوني لأن اني صنعت من نفسي احجيه كلما اقتربتي من حلها زادت تعقيد.

فيروز: اذا انت مواثق من عندي ليش مخليني بيتك!! تگدر ترجعني لبيتي و لتفكر ابداً ولا للحظه اللي اسويه هو بحجه اقترب من عندك، آخر همي عملك واهدافك واللي تريد تسويه، كل الأريده ارجع لحياتي ولعملي السابق بلا حياة غصب عني ومذلوله بيها.

هَيْصَم: اوف اوف معقولة لهاي الدرجه حامله بگلبج عليه لو هاي ردة فعل لكلامي قبل قليل؟

فيروز: انت شنو برأيك؟

هَيْصَم: لَّباءَة معصبه جداً والسبب هي مفهمت قصدي اطلاقاً من اللي گلته، ركزي ويايه هاي آخر مره اوضح كلامي بالعادة اني احجي واليفهم والميفهم مشكلته، وجودج بهذا البيت هو لسلامتج ومعرفه السبب اللي يخلي مجرم يلاحقج مثل المجنون من تنتهي هاي العملية كل واحد بيناتنا يرجع لحياته الطبيعية واضح؟
في حال سمعتي الكلمه ومحاولتي تلعبين وره ظهري وقتها مراح تتأذين لكن في حال فضولج ثار وردتي ترضيه وبحثتي بأشياء من حياتي وماضيي او سويتي اي شي آخر بوقتها لتلوميني ابداً على تصرفاتي، احترم وجودج بهذا البيت وكونج ضيفتي وانتِ تعرفين للضيوف حدود، ياريت تكون وصلت الفكره وفهمتي المقصد.

فيروز: مو عادتي اتدخل بأشياء متعنيني بذات الوقت ياريت انت هم تستعجل بمهمتك حتى ارجع لبيتي ولحياتي.

هَيْصَم: يؤسفني اكلج مديرج فصلج من العمل، لتفكرين هوايه بموضوع الوظيفه وتصدعين راسج بلا فايدة.

فيروز: انطردت؟
بصعوبه يلا لگيت وظيفه وهسه انطردت شلون يا الله!!

هَيْصَم: كل همج الوظيفه فكري بحياتج المهدده يكون افضل برأيي.

فيروز: طبعاً انت شنو هامك موظف و مرتاح مثل الخريجين مثلنا يخلصون شبابهم وهم يبحثون عن وظيفه والحظ الحلو مالتي خلاني انفصل من عدها.

هَيْصَم: على شنو تحسديني اني اصارع وي الموت بكل ثانيه وين الراحه مثلاً؟!
بعدين ليش مطلعتي قسم مرغوب بيه بالسادس هذا الطالب الميجتهد هيج ايصير بيه بعدين.

فيروز: وعلى اساس انت شنو طلعت!!

هَيْصَم: احد حماة البلد في حال متت بوظيفتي شهادتي مضمونه ومن اهل الجنه اما بالحياة سمعتي وشخصيتي وافعالي هي اللي تعرف الهَيْصَم منو، برأيج هذا مو كافي؟

فيروز: وهيبتك وشخصيتك بشنو تفيدني اذا جعت؟
اقترب من عندي يحجي قريب وجهي بس مطخني.

هَيْصَم: معقولة اسمح تجوعين في حال ملگيتلج وظيفه اني اتكفل بكل مصروفج وأأمن الج راتب شهري.
حجيت بتوتر بسبب هذا القرب: من وين تخليلي راتب شهري؟!

هَيْصَم: راتب ابوج التقاعدي انقله الج، بعد وفاته انتِ وريثته الشرعيه وخاصتاً بعدج ممزوجه.

فيروز: وانت شلون عرفت ابوية عنده راتب تقاعدي اني محجيت بهذا الشي نهائياً؟!

ابتسم وگال.
هَيْصَم: يعني صح عنده.

فيروز: خليتني احجي من وحدي هذا مو عدل.

هَيْصَم: ابقي مصره على كلامج لتغيرين اقوالج تحت اي ظرف كان والا تخسرين وتعترفين بدون وعي، لكل شخص طريقة مختلفه حتى يسحب الكلام من المقابل لذلك كوني حذرة.

فيروز: حلو اگدر استخدم هاي الطريقه واسحب من عندك كلام.

قرب راسه يم أذني وهمس هذا القرب خله كل مشاعري تتخربط.

هَيْصَم: اللبوه خُلقت حتى تكون جنب الأسد مو ضده.
ابتعد مسافه وسرعان مرجعت لتركيزي انتبهت على شي بيه من يقترب من عندي يخلي اديه وره ظهره وميطخني ابداً تصرفاته تجذب غصب وتخليني اصفن بأسلوبه بالتعامل ، كل يوم اكتشف بيه شي جديد يجبرني اركز وياه اكثر ويغرقني بمتاهة الهَيْصَم.

قبل ميطلع التفتلي وگال.

هَيْصَم: من ارجع راح اخلي الدكتور يفتح الخياط مالتج تگدرين ترجعين تنامين هسه.

قبل ميروح حجيت بسرعة: متتريگ؟

هَيْصَم: لتفكرين بيه لَّباءَة بعدين تقعين بحب الهَيْصَم وهاي المشكله الوحيده اللي ماكدر أحلها.

تركني وطلع مفهمت شنو يقصد ضحكت على نفسي على اساس اني فاهمه من عنده شي قبل حتى افهمه اليوم، غموضه يثير الفضول بداخلي لكن الشي الوحيد اللي يردعني هو مسوالي شي سيء ليش حتى اورط نفسي وياه هو بس شكله يخوف وتهديده هم اذا شك بيه يشمرني من الشباك بدون ميسأل الأفضل ابتعد عن كل شي يخصه ونشوف شنو تاليها بعدين، خليت راسي على المخده وسرعان منمت بسبب التعب والسهر البارحه.

حوري: گعدت من النوم على صوت ماما تصحيني دخلت للحمام اخذت دوش سريع غيرت ملابسي ونزلت لگيت نسر ديتريگ اني ما اكل اذا عندي طلعه لأن اتمرض بالطريق بقيت منتظرته بالصاله فتحت موبايلي شفت اشعار ممنتبه عليه واصلني من نص ساعة من محمد فتحته جانت صوتيه خليتها على أذني وسمعت كلامه.

محمد: اسف البارحه جنت حيل مقهور وصارت بوجهج مجان قصدي ازعلج ابداً بس الأنسان مو معصوم خلي گلبج جبير وغفري هذا الخطأ، اتحمل زعل الدنيا كلها بس الموضوع من يوصل يمج يختلف ماعرف شنو يصير بيه اذا حسيت بيج ضايجه من عندي، كل اللي اريده نعيش قصة حب مميزة تتوج بالزواج، خلي ايدج بأيدي حوريه، انطيني فرصه وحدة واخذي كل وقتج بالتفكير راح ابقى منتظرج طول عمري واذا متحبين حتى صوتي ما خليج تسمعيه اهم شي عندي بالكون كله هو راحتج يراحتي.

حوري: مسحت المراسله والرقم همات وقررت اريح راسي وما افكر اصلا بأي شي خلال هاي الفتره يكفي اللي شفته من السادس وخصوصاً اني اعرف تماماً رأي اهلي بمحمد اذا اخواني اثنينهم ميحبوه ليش حتى ادخل بعلاقة حب عقيمه اعرف شنو نهياتها لكن ما انكر اكو شي داخلي اله مع ذلك ميتعده حدود الأعجاب لا أكثر، طلعت بعد مسمعت صوته يصيحني حتى نروح صعدنه بالسياره اول مساق فتره قصيرة ونمت محسيت اله وهو يگعدني حتى ننزل وصل يم بيتهم بأربيل هو هم نزل ويايه سلم بالباب على خالتي وراح عنده شغل بالمركز مقبل يبقى، حضنت خالتي، احبها حيل بيها شبه جبير من امي حتى بحنيتها عدها بنات اربعه او ولد اثنين واحد من عدهم الجبير بالعائلة اما الثاني فهو آخر العنقود وثنينهم مموجودين بالبيت، الجبير من عدهم موظف بغير محافظه اما بزر الكعده يدرس خارج العراق فقط البنات اهنا اما زوج خالتي فهو متوفي من سنين طويلة، دخلنه للمطبخ شفتهن ديحضرن بالغدة طبعاً البنت الكبيرة متزوجه والموجودات بس ثلاث بنات تقدمت من عندي أكبر وحده بيهن.

ريهاف: الحمد الله على سلامتج حوريه ليش نسر مدخل وياج على الأقل نسلم على ابن خالتنه.

حوري: الله يسلمج حياتي، والله كتله بس مقبل گال عنده شغل مهم و ميگدر يتأخر.

آمندا: اي راح تبقين بس يم رهوف واحنه ماعدنه حصه بيج؟

ركضت الها وحضنتها من بين كل بنات خالتي هاي اكثر وحده مرحه وبشوشه مليانه طاقه أيجابيه وفرح: حياتي مشتاقتلج موت متصدگين شگد تحمست اخلص
الأمتحانات حتى اشوفج.

آريا: صحيح مو احنه بنات البطه السودة تشتاقين بس لصديقتج واحنه المنسيين، رهوف خلينا نطلع حتى ياخذن راحتهن يمكن زعجناهن.

حوري: شنو هذا الكلام ازعل من عندج والله اصلاً اني اجي لهنا حتى اشوفكم كلكم واغير وياكم جو.

ريهاف: لتهتمين بكلامها حبيبتي تحب تشاقه مو أكثر.

حوري: عادي مو مشكله، فجأة دخلت خالتي اللي ماعرف وين راحت.

كلاثم: رهوف اتصلي بنيجار شوفيها ليش مأجت، اليوم موعد زيارتها النه.

ريهاف: اتصلت بيها زوجها مريض وأجلتها لغير يوم.

كلاثم: الله يشافيه خطيه.

آمندا: الله ليشافيه متشوفين شنو مسوي بيها ليش تدعين اله؟

كلاثم: زوج اختج هذا عيب بنتي هيج تحجين عليه.

آمندا: لو منو مكان اني مع الحق هو مطيح حظها وهي غبيه بسرعة تسامحه وتنسى شوفي شنو راح يسوي بيها غبائها الزايد.

ريهاف: خلص آمندا بلا كلام على الناس ما النه دخل هي جبيره او واعيه وتعرف شنو تقرر بعدين لتنسين عدها اطفال اذا تركته شلون تعيشهم؟

آمندا: هو هذا التفكير اللي مدمر المرأه اني استغرب جداً من النساء اللي ميدعمن بعضهن بهاي الحاله شلون نريد الرجال يحترمونه واحنه اصلاً منحترم حالنه الوحيد بهاي الحياة اللي اعرفه يحترم النساء هو بس هَيْصَم واني دعواتي الدائمة يارب هَيِصَم رجلي المستقبلي حتى ما اطلگه لا والله اخلعه.

آريا: هو خلي يجيج أول بعدين اخلعيه.

آمندا: تستهزئين حضرتج؟

ريهاف: خلص انتن الثنين وتعالن نحضر غدة يلا.
سحبت آمندا وهمست بأذنها: هَيْصَم بعده مجاي لهنا صح؟

آمندا: والله يروحي اني بقى شهر او شهرين بالأكثر وانسى شكله صار فتره طويلة مشفته بيها تقريباً ثلاث اشهر هيج شي.

حوري: ليش ميجي لعد؟

آمندا: ماعرف هو ميحجي شي عن شغله يتصل
بالمناسبات بأمي يطمأنها عليه ويسده، مرات اني انسى عندي أخ جبير.

نزلت دموعها وهي تحجي عنه: خلص لتبجين اكيد اذا صار عنده وقت فراغ يجي يشوفكم لتسوين بنفسج هيج.

آمندا: ميفكر بينه، لو عنده شويه حساس ميخلي خواته وحدهن وميسأل عنهن برأيج كل الأخوة هيج لو بس هو؟

حوري: أرفد ونسر نفس الشي همات ما اشوفهم دائماً، لازم تخلين عذر لغيابهم ماكو اخ يكره اخته بس الظروف تحكم.

آمندا: احبه ومشتاقتله هو الوحيد اللي من اشوفه اطمأن واحس بأمان مو طبيعي.

حوري: هو هم مشتاقلكم وان شاء الله عن قريب تشوفيه وتقر عينج بطوله.

آمندا: ان شاء الله.

آريا: خلصتن سوالف شنو رأيجن تجن نكمل الغده لأن اشويه وأموت جوع.

كملنه الغده واني ساعدتهم بعدين كل وحده صعدت لغرفتها واني بقيت يم آمندا سولفنه اشويه واني نمت لأن جنت تعبانه حيل من الطريق.

هَيْصَم: لائِث شنو هذا الصوت العالي؟

لائِث: حادث سيارة سبب موت شخص الولد اعترف وهسه هو بالتحقيق لكن عائلة المتوفي عشائرية وهسه هجموا علينه يردونه.

هَيْصَم: أعد شنو سمعت هسه؟

لائِث: هجموا على المركز سيدي.

هَيْصَم: بلد تايه بيد الصغار، صيحلي ضَرْضَم و هَمَّاس و هَمْهَام خلينه نشوف شلون يدگون مكان الدولة.

لائِث: هَيْصَم بطبيعته ميعصب بسهوله اذا جان الموضوع يخص العمل ياخذ احتياطاته ويحسب احساب كل خطوة يخطيها ويدقق بتصرفاته كون موقعه حساس ميگدر يخاطر بسمعته وهو يعرف احنه جميعاً معتمدين عليه، طلع لگاهم كلهم شباب وميسكتون، خلوا المركز روضه جاب صافره وبقى يصفر بيها واحنه سكتناهم اتقرب من شخص جان واگف مقابيلهم الواضح عليه هو الأساس بالمشكله حجه وياه بكل رزانه وأدب، طريقة مميزة ثانيه بيه ابداً ميضرب الا في حالات الضرورة يعني الا يكون الشخص هو اللي يعتدي عليه او يستاهل ينضرب عنده مبدأ خاص بالتعامل مع الناس و طريقه بالتحقيق يسحب الكلام من المقابل بدون تعب.

هَيْصَم: اقدملك عزائي والبقيه بحياتك متفهم جداً لتعصيبك وغضبك لكن لازم تفهم هم هذا مو مكان عادي الموجودين اهنا بشر حالهم حالك متگدر تجي وتهجم علينه بعدين تخوفنا وبهاي الحاله راح يضهر الأسد المضموم جواتنه ويسوي بيكم هيج.

لائِث: صاح بصوت عالي اني فزيت من عنده.

هَيْصَم: ضَرْضَممممم.

ضَرْضَم: سيدي.

لائِث: حجه وياه بطريقته المعتادة اسلوبه هذا ايخليني اضحك غصب حتى لو جنت بقمة ضوجتي.

هَيْصَم: اللي يجي يمنه خطار شنو نسويله؟

ضَرْضَم: نقدمله ضيافه سيدي.

هَيْصَم: أريدك تقدمله ضيافة مرتبه تناسب هاي الوجوه الحلوه ويبقون يتذكرون دائماً كرمنه واخلاقنا العاليه وفي حال احد طلبهم وراد يطلعون ضيفه وياهم لتقصر ابني اريد اسمع أصوات المديح بغرفتي.

ضَرْضَم: تأمر سيدي.

هَيْصَم: بالعادة اني انسان احذر قبل ما اسوي اي شي لكن راح استثنيك من القاعدة ، هذا مركز شرطه اللي يدخله لازم يحترم حماة الوطن الساهرين لسلامتكم، في حال تهدد هذا المكان من قبل اي شخص اني يحقلي اتخذ اي اجراء اخليك متعرف راسك من رجليك واعتبر هذا تحذيري مرة ثانية اذا لمحت ضلك أقره على نفسك السلام وعتبره تهديد مني.

:راح اخليك تندم على هذا تعاملك واني اشوفك وين منو لعبت.

هَيْصَم: لائِث.

لائِث: سيدي.

هَيْصَم: سمعت اللي سمعته؟

لائِث: اعذرني سيدي ما افهم لغة الحمير.

هَيْصَم: اكره التهديد لأن يبين مدا ضعفك صير رجُل بمعنى الكلمه وشوفني شنو تگدر اتسوي.

لائِث: اعتقلناهم بيهم عشرين شخص واتكفل البقيه بتقديم الضيافة الهم نص ساعه تقريباً وصلت السيارات مالت اهلهم نزل من وحده بيهن رجال جبير بس الهيبه واضحه عليه مبين عليه شيخ دخل صرت مقابيله: اتفضل بشنو أگدر اساعدك؟

معتز: اريد اشوف المسؤول اذا تگدر ابني.

لائِث: اتفضل ويايه بس وحدك.

معتز: اكيد طبعاً.

طرقت الباب سمعت صوته فتحته ودخلت: سيدي.

هَيْصَم: خيرك لائِث هاي المره شنو صار؟

لائِث: جبيرهم اهنا يريد يشوفك.

هَيْصَم: خليه يدخل او لحظة اني اروحله بالنهاية احترام الجبير واجب.

لائِث: بشنو تفكر؟

هَيْصَم: الأفضل اتشوف بنفسك.

لائِث: طلعله اول مشافه رحب بيه وذمني كدامه جحظت عيوني هذا عاقل اني شنو دخلني غير هاي الأوامر مالته!!

هَيْصَم: معقوله لائِث اتخلي هاي الشيبه المحترمه واگفه اهنا بدون مدخله؟!

لائِث: سيدي.

هَيْصَم: اقبل اعتذاري وأرجوا ان تتفضل وتحجيلي مشكلتك وان شاء الله محلوله.

معتز: الله يوفقك ابني ما اريد من عندك شي غير تحترم جيتي لهنا وطلع ولدي من الحبس وتغفر ردة فعلهم القويه بس تعرف اخوهم اتوفى قبل ميفرح بتخرجه لذلك سوو هيج.

هَيْصَم: 1700 شهيد واكثر بسبايكر، القوات المسلحة العراقية قدمت شهداء بعدد 34 الف اما الجيش العراقي قدم 26 الف شهيد والحشد الشعبي قدم 8 الاف شهيد هاي غير المدنين 29 الف شهيد واكثر بالأضافه للجرحى ولامرة شفت واحد من عوائلهم سوه هيج اوتهجم على المركز بحجه هو فاقد عزيز ولازم نتحمل ردة فعله ليش حتى اتفهم ردة فعل ابنائك اللي هجموا وهددوا أمن هذا المكان اللي هو يعتبر من اهم الأماكن بالبلد؟

معتز: متفهم كلامك ابني بس على الأقل لخاطر شيباتي وجيتي لهنا طلعهم.

هَيْصَم: احترمك جداً، وعلى عيني وراسي جيتك وتعبك لكن ميصير يطلعون بسهوله راح يكونون بضيافتي اليوم لتخاف ارجع لبيتك ورتاح أو وكللهم محامي يمشي بقضيتهم واني راح اطرح عليك اسم بضمانتي هو افضل محامي مدافع عن السيئين يمكن يطلعون بغضون اسبوع في حال منحالوا للمحكمه.

معتز: يعني ماكو احترام لجيتي؟

هَيْصَم: هذا القانون ما اگدر اخالفه، ابنائك بيدهم اسلاح من هجموا يعني العقوبة زادت في حال سامحتهم بقية السجناء راح يعترضون واني ما احب ازعل احد من المعقتلين مو هيج لائِث؟

لائِث: اكيد سيدي انت مثال حسن عن العداله والمساواة بالمركز.

هَيْصَم: ارجع لبيتك ونام قرير العين بما انو هم يمي اكيد راح يبقون بخير كون مطمأن.

معتز: ايصير خير ان شاء الله.

هَيْصَم: اكيد كل الخير بما إني موجود.

لائِث: طلع خائب جان مفكر يگدر يبتز الهَيْصَم بسهوله.

هَيْصَم: راح اسوي لائحه جبيرة واخليها على باب المركز مكتوب عليها هذا المكان مخصص فقط لمعاقبه المجرمين وليس مركز عبادة لقبول التوبة وتحرير العبد من ذنوبه، ماعرف الناس شنو مفكرتني كل شويه اجاني واحد يطلب مغفرتي اني متأكد ميطلبون من ربهم يغفر ذنوبهم مثل ميطلبون من عندي، هسه الساعة أربعة اني راح اطلع عندي شغل شنو يصير وياك انطيني علم.

لائِث: تأمر سيدي.

فتحت الموبايل واتصلت بيه: الو.

أرفد: عندي عملية بعد ساعتين مراح اسوي اي عمليه اذا تريد شي تعال للمستشفى.

هَيْصَم: نص ساعه وانت يمي بالبيت لازم تفتح الخياط مالتها اي عذر او تأخير ما اقبل.

أرفد: سد الخط بدون مايسمع جوابي، اللي يسمعه يفكر اخذت شهادة الطب حتى اخدمه بس هو، طلعت من المستشفى بسرعة ورحت يمه نص ساعه وصلت يم البيت طرقت على الباب وطلعلي: بسرعه وين هي؟

هَيْصَم: وعليكم السلام تفضل.

أرفد: ماعندي وقت اضيعه بهاي السوالف مستعجل تره.
هَيْصَم: كمل شغلك واطلع ماعندي لاصق بالبيت.

أرفد: هه متضحك.

هَيْصَم: هه مو هدفي اضحكك.

جنت بالمطبخ احضر لنفسي لفه مبيه حيل اطبخ فجأة دخل ويحجي سريع.

هَيْصَم: حضري نفسج دقايق والدكتور اهنا حتى يفتح الخياط.

طلع واني كملت لفتي وغسلت اسناني ورحت للغرفة، اني البس اتراكات عريضه صحيح اني غير محجبه بس مع ذلك ارتاح بهاي الملابس رحت لغرفتي وبقيت منتظرة اكو ألم صحيح بسبب العملية بس اني ما احب ابقى بالفراش فتره طويلة.

شويه وطرق الباب سمحتله حتى يدخل فات هو والدكتور اللي اول مشافني حجه بستعجال.

أرفد: بسرعة نامي حتى افتح الخياط واطلع ماعندي وقت.

هَيْصَم: اهدئ اشوي ابني ليش مستعجل وياها؟

أرفد: لأن اكو شخص منتظرني افتح گلبه واعالجه ماكو سبب ثاني.

هَيْصَم: قابل انت الوحيد دكتور الف واحد ثاني غيرك.

أرفد: هَيْصَممم.

هَيْصَم: لتصرخ كمل شغلك واطلع اني هم مشغول.

نمت على الجربايه وهو تقدم الخوف يقره الف لبس كفوف وطلع المعقم غمضت عيوني بأيدي وهو ماعرف شنو سوه يمكن خله مخدر حسيت بألم بس مو كلش قوي اتفاجأت مو هيج سامعه عن فتح الخياط لو لأن الدكتور يختلف كمل وطلع ماعرف شنو حجه وي هَيْصَم اللي الأخير اتقدم من عندي وگال.

هَيْصَم: الحمد الله على السلامه، حتى يختفي الأثر مالت الخياط ادهني بهذا المرهم وان شاء الله معافايه، اني راح اطلع عندي شغل في حال احتاجيتي شي اتصلي بيه.

عافني وراح طبعاً الموبايل اللي تركه هو نوكيا معروف عدنه اسمه صرصور وماعرف من وين اجت هاي التسميه لأن هو ميشبه الصرصر ابد، مگدرت انام وقررت اكوم ارتب البيت حتى لو هو منعني لكن ميصير ابقى بدون شغل بديت بغرفتي رتبتها ما انظف بسرعة على راحتي حتى ما اتأذة او اتعب كملتها ورحت لغرفته اول مفتحت الباب شميت العطر اللي يستخدمه يشبه المسك ممزوج بريحه الورد ماعرف شلون اوصفه بس هادئ ولطيف ومريح للأعصاب بنفس الوقت، مبيها شي ممرتب هو انسان نظيف جداً ميترك وراه شي ابد اجيت اطلع ولفت نظري دفتر غلافه اسود جلد وبيه خيط ذهبي موجود على الميز مالت المرايه اقتربت من عنده و الفضول يقره ترليون اخذته بأيدي وفتحته صارت بوجهي صفحه مكتوب عليها بحبر اسود وخط عريض.

"هَيْصَم".

جذبني اقره شنو مكتوب جوه السطر الأول بمنتصف الدفتر بقلم حبر اسود مكتوب: اليوم الثالث في الساعه الثانيه عشر بعد منتصف الليل..

يتبع..

تفاعلكم اللي يسوي واهس وتعليقاتكم بين الفقرات وتصويتكم للبارت يحلوين

تصبحون على الف خير شمعاتي..

لأي شي يخص القصه تعالوا يمي انستا..