للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي الهَيْصَم مع بعض..
هَيْصَم
الكاتبة زهراء احمد
_____________
ماذا لَو إنَنا نَلتقيَّ بَعيداً عَن هذا العالم، أقبلُ عَينيكَ
واعانِقكَ وَ ليمسَحُ كُل مِنا حُزن الاخر .
هَيْصَم: خليني وحدي.
: حركت رجليه واني ابتعد بهدوء من كدامه اتوقفت بعد ماگال.
هَيْصَم: الصورة.
مديت أيدي منطيتها اله وطالعه من يمه، دخلت غرفتي وغميت نفسي على فضولي المابيه فايدة، رجعت تذكرت الصورة، عقلي سرح شويه، ممكن زوجته لو اخته او وحده جان يعرفها من أقاربه، حجيت وي نفسي اسكتها: ما الج اي علاقة بيه وبحياته فيروز، انتِ وجودج هنا مؤقت وان شاء الله عن قريب اتخلص من عنده.
طلعت من الغرفه ورحت للمطبخ حتى احضر غدة شويت سمج بالفرن وحضرت الصلصه مالته وطبخت تمن احمر ماعرف اذا هو ياكل هيج او لا سويت اللي يعجبني حضرت الزلاطه والطرشي، طفيت الطباخ وطلعت حتى اصلي كملت ورحت لغرفته طرقت على الباب اكثر من مره بعدين سمعت جوابه، صحتله، يجي حتى ياكل ورحت للمطبخ بسرعة حضرت الأكل على السفرة اني رتبت المقبلات قبل ما اصلي هسه بس صبيت التمن والسمج، طول وما اجه اجيت اطلع اصيحه، فتحت الباب وصار بوجهي أشرتله بأيدي على السفره وحجيت بهمس: الأكل جاهز اتحب تاكل؟
جاوبني وهو يمشي.
هَيْصَم: وليش ما أكُل ممتعارك وي معدتي.
كمل اكله وقبل ميكوم گال.
هَيْصَم: شكراً على الغدة صار فتره طويله مأكلت هيج اكل.
ابتسمت ديمدحني لو اني غلطانه؟!
اكتشفت نفسي غلطانه من كمل كلامه.
هَيْصَم: محبيت احرجج لكن اني بالعادة ما اكل هذا الأكل لذلك تگدرين فقط تطبخين هيج اكلات اذا حبيتي تاكليهم.
رفعت راسي و ابتسمت بوجهه: اني اعرف متاكل هيج لاحظت هذا الشي من اول يومين اجيت بيهم لهنا لكن مگدرت اسألك شنو تحب تاكل اليوم لذلك طبخت اللي خطر على بالي.
هَيْصَم: ميحتاج تبررين البيت بيتج سوي اللي يعجبج واطبخي اللي تحبيه اني اذا حبيت شي معين اسوي بأيدي، مرة ثانية شكراً على تعبج ويايه هذا اليوم وترتيبج للغرفة، لكن مثل مكتلج سابقاً انتِ اهنا مثل الضيفه اول متأكد من سلامتج ترجعين لحياتج الطبيعية، مامجبورة تسوين اي شي سواء اليه او بالبيت ياريت تكونين فهمتي قصدي لَّباءَة.
فيروز: فهمت اكيد واسفه لأن دخلت لغرفتك لكن صدگني كل شي بدون قصد صار.
هَيْصَم: مصار شي بالعكس اني اللي كلش اشكرج على تنظيفج للبيت وطبخج هم.
فيروز: مسويت شي ميحتاج تشكرني، شغلات بسيطة.
نظفت المطبخ ورحت لغرفتي اخذت دوش سريع ونمت بعد الف فكرة خطرت بعقلي.
حوري: باجر الصبح نسر ياخذني لبيت خالتي بأربيل حضرت جنطتي وكملت كل اشيائي من وقت، نزلت يم ماما تحضر عشا، اني قليل انزل خاصتاً هاي السنة لأن مرحله اخيره وتحديد مصير لذلك بقيت اكثر وقتي اقرأ لكن الأن وبعد مخلص العام الدراسي قررت اشوف شنو محتاجه أو اساعدها بتحضير السفره وهي انطلقت ويايه بالحديث.
ناهده: سمعت بعد شهر أرفد يسوي العمليه لريفان انتِ قبل ذلك الوقت لازم ترجعين بنتي.
حوري: تمام، اني ماعندي علاقه قويه وي بنات عمي صحيح ريفان جانت دائماً تجي يمنه للبيت ونلعب سوه لكن أرفد هوايه ايخاف عليها بسبب مرضها فجان الجميع ياخذ حذرة بالتعامل وياها اما أيفلين فهي شبه منعزله لذلك بعد مكبرت انعزلت اني هم وخلصت اغلب وقتي بالدراسه اثناء الدوام اما فترة العطله اخلص جزء جبير من عدها ابيت خالتي، اني متعلقه بيهم حيل وحتى اني ونسر هوايه نشبهم بالشكل، كملنه عشا غسلت المواعين ورتبت المطبخ وصعدت حتى انام اول مدخلت بمراحل النوم سمعت صوت موبايلي يرن سحبته بأنزعاج فتحته وخليته على اذني بدون ما اشوف اسم المتصل اجاني صوته الواضح امبين عليه التعب من كلامه.
محمد: احبج والله، ليش متحسين بيه؟ بس اخوج الحقير هو السبب لو مو هو اللي واگف بطريقنا گدرت اخطبج وتزوجنه مثل الأوادم بس لا، راسه والف سيف رافض وكأن اني مجرم خطير وراح ادمر حياتج، برأيج يروحي اخوج ليش يكرهني لهاي الدرجه؟
حوري: هذا السؤال المفروض اني اسأله ليش اخواني يكرهوك لهاي الدرجه!!
محمد: حوريتي لتصيرين مثلهم انانيه، گلبي متعلق بيج مثل طفل متعلق بريحة امه معقوله تذلين الأنسان اللي يتنفس هواج؟
حوري: انت لو تترك هذا الغزل الغريب اني بألف خير واذا تحب تعرف ليش اخواني يكرهوك اتصل بيهم واسألهم اني اريد انام نعسانه.
محمد: الساعه ثمانية قفل مشاعري وسرگيها نوم شنو هذا؟!
حوري: باجر لازم اگعد من الصبح لهذا انام من وقت بعدين انت شنو دخلك بأوقات نومي؟
محمد: ميصير تنامين بدون ما اسمح اني، معقوله تغفين واني گاعد اتحسر على صوتج ينطيج گلبج اتسوين هيج بيه؟
حوري: محمد لتحجي ويايه بهاي الطريقة الواضح انت نسيت من كتلك عوفني افكر بالموضوع على راحتي بعدين ارجعلك جواب ليش تزعجني بهذا الشكل؟
محمد: تمام اخليج على راحتج وماضوجج، بس خليني انبهج على شغله تونسي كد متكدرين لأن هاي آخر مره ترحين بيها لبيت خالتج.
: للحظه شكيت بيه مو بوعيه بسرعة قاطعته وگلت.
حوري: انت تخبلت زوجه شنو وتمنعني اروح لبيت خالتي شنو!!
منو مفكر نفسك وتحجي ويايه بهذا الأسلوب وكأن انت ولي أمري، احفظها زين وخليها بعقلك اني لا مُلك لأحد ولا أقبل بيك لازوج ولاحبيب ولا حتى صديق، وخر عن طريقي ليصير الموضوع بحلك اخوتي ومحد يكدر يخلصني، وبعدين انت محامي والك اسمك مثل متكول شنو تصرفات المراهقين مال اختنك وانتِ النفس مالتي!!
ارتقي شويه ولتسوي حركات تعبانه ويلا مع السلامة راح انام.
محمد: بحكم اني ابن عمج اكيد معروف شنو نهايتها، اخوانج الثنين اتزوجوا خواتي ومهتموا ومسئلوا عني اصلاً وهذا الشي راح يصير مو فقط نسر وأرفد اللي يحبون بشكل مجنون ابن عمج ايضاً راح يكسر القيود ويسوي المگدروا يسوي حتى اخوتج.
حوري: تهدد حضرتك؟
محمد: مستحيل اسمح تزوجين واحد ثاني غيري واني اعرف عدل مخططات اخوج ورغبته بتزويجج من ابن الخاله لكن بأحلامه انتِ انكتبتي بأسم محمد وما اتنازل عنج ابداً تحت اي ظرف كان.
حوري: انت مو بعقلك ابد، الواضح التعب امبين عليك، الأفضل تنام ومن تگعد الصبح اتمنى تذكر كل كلامك اللي حجيته وتفرزنه وتعرف نفسك شخربطت ويايه.
غلقت الموبايل وخليت راسي على المخده واني الأفكار موتتني معقوله محمد يريد ينتقم من أرفد ونسر و زواجهم بأخواته من عندي زين اني شنو اللي علاقه اصلاً بالثنين اني مجنت حاضره وسمعت بعقدهم مثل الغريبه بعدين يلا بعقد المحكمه والحفله يلا تواجددت وهسه لازم ادفع ثمن حب اخواني المجنون والتوأم، نفضت الأفكار عن عقلي وسمحت لنفسي ادخل بنوم عميق.
: حضرت عشا بس هو مأجه ياكل، بقى كل الوقت من الغده لحد الآن بالغرفة، رحت طرقت عليه الباب سمعت صوته يسمحلي بالدخول اول مفتحت الباب ودخلت انصدمت بالمنظر مثل اول لقاء النه بدون قميص والقلادة مزينه عنقه، درت وجهي من عنده وحجيت بأنزعاج: هاي ليش هيج؟
جاوبني وصوته غريب.
هَيْصَم: شنو موضوعج ليش منزعجه؟
فيروز: ليش بدون قميص؟
هَيْصَم: اعتقد هاي غرفتي.
فيروز: وليش كتلي ادخل وانت بهذا الوضع؟
هَيْصَم: ليش شنو بيه وضعي؟!
فيروز: هَيْصَم لتخبلني هاي وانت متدين وتتصرف بهاي الطريقة اذا جنت انسان فاسق شنو اتسوي؟!
هَيْصَم: منو كلج اني متدين؟
فيروز: انتَ.
هَيْصَم: شوكت؟
فيروز: البارحه من منعتني اساعدك مو گلت حرام اتلمسيني ومن هاي السوالف.
هَيْصَم: وعلى هذا الموقف حكمتي عليه بالدين!!
فيروز: ليش ملحد واني ماعرف؟
هَيْصَم: انتِ بدون حجاب كدامي اربع وعشرين ساعة هم حكمت عليج بالفسق؟
فيروز: ممكن بداخلك.
هَيْصَم: ماكو شي اسمه هذا انسان متدين او عديم دين اكو شي اسمه ايمان وهذا الشي مو اني ولا انتِ نحدده، اما على الصار البارحه مجان بيه حيل اناقش وياج لذلك اختصرت الموضوع بهاي الجمله كتلج سابقاً اكره لمس النساء بقصد او بدون قصد تگدرين اتگولين عندي مرض نفسي بهاي الشغله اكره التلامس وي الجنس اللطيف بالكامل.
فيروز: انت اول شخص يكره الجنس اللطيف.
هَيْصَم: مشكلتج اذا متعرفه بس على السرسريه.
فيروز: مو شرط تعاشر الناس علمود تعرفهم منظرك لتصرفاتهم يكفي.
هَيْصَم: غلطانه متكدرين تعرفين أحد بدون متعاشريه الأنسان يخفي اكثر مما يظهر.
فيروز: ممكن صح.
هَيْصَم: اكيد صح، هذا النقاش نساج شنو ردتي من عندي لَّباءَة.
فيروز: ليش متعشيت وانت مريض و بحاجه تغذية؟
هَيْصَم: بالعادة ما اتعشا اذا اكلت غدة دسم اما بالنسبه للعلاج اگدر اشربه بدون اكل.
فيروز: هاي معلومه جديدة مسامعه بيها من قبل.
هَيْصَم: اسوي اللي يعجبني بما انو الموضوع يخص صحتي ماكو داعي اسأل دكتور.
فيروز: اللي تشوفه صح سوية، طالعه اذا احتاجيت شي صيحني.
التفتت بنيتي افتح الباب وقفني وهو يكول.
هَيْصَم: سؤال بداخلي محيرني جداً وحاب اعرف جوابه من عندج اذا تگدرين طبعاً.
فيروز: حسب السؤال.
هَيْصَم: الواضح انتِ واثقه من عندي لدرجه ماخذه راحتج تماماً أو وجودي ممضايقج مثل قبل، ياترى هذا شنو اگدر اسميه ثقه لو....؟
فيروز: انت تكره اللمس لهذا السبب واثقه متگدر تلمس البنيه اللي تساعدها.
هَيْصَم: ومع ذلك انتِ واثقه انو اللي اسويه هو مساعده حتى مطلبتي دليل على صحة كلامي بقضيه خطفج وجيتج لهذا المكان هي للمحافظه على سلامتج لا اكثر.
فيروز: ماثق بيك بشكل جبير لكن بنفس الوقت التمست بيك الصدق، طول هاي الفترة اللي بقيت بيها بهذا البيت مشفت من عندك شي سيء وتعاملني بكل احترام ماعدا شي واحد.
رفع حاجبه وگال بتساؤل.
هَيْصَم: واللي هو؟
فيروز: قميصك هوايه تنزعه كدامي وماعندك احترام لوجدي وياك بهذا البيت.
هَيْصَم: اني متعود على السكن وحدي لهذا تشوفين بعض تصرفاتي غريبه مع مرور الوقت تعتادين لَّباءَة.
فيروز: افهم من كلامك مستحيل تغير عاداتك نهائياً.
هَيْصَم: هذا يعتمد على مدا قوة تأثيرج ب الهَيْصَم.
فيروز: بأعتقادك عندي قوة تأثير عليك؟
هَيْصَم: بعده مأجه الشخص اللي غير من عندي صفه وحده وعلى هذا المثال قيسي.
فيروز: لكن اني ماعندي نيه اغيرك، مقتنعه تماماً كل شخص من عدنه عنده شخصيته المستقله عن الثاني فهمها والتعايش وياها وتقبلها بسلبياتها وأيجابياتها افضل الف مره من محاولة تغييرها برأي هذا هاي افضل لِسُبل العيش الصحيح.
هَيْصَم: لكن اني حاب اغير بيج شي واحد فقط.
سويت نفس حركته ورفعت حاجبي وحجيت بتساؤل: شنو هو؟
هَيْصَم: الحجاب حاب اشوفج لابسته.
فيروز: شنو السبب؟
هَيْصَم: تعرفين ليش الإسلام خله الحجاب واجب على المرأة؟
فيروز: حتى تحافظ على نفسها من اصحاب القلوب الضعيفة، كوني ما البس حجاب ميعني ابداً ماعندي ثقافة دينية.
هَيْصَم: شنو فايدة الثقافة الدينية اذا مطبقيها على ارض الواقع؟
الكثير من البنات اليوم وحتى الشباب يعتقدون الحجاب أو بعض الأحكام الدينية الأخرى هي مجرد سجن للحريات والحقوق الإنسانية اللي فرضها الدين والدولة للمواطنين لكن هذا المعتقد خطأ والسبب الحريه والحقوق بعمرها مجانت بالملابس و الحجاب مجان تقيد اذا البنيه رادت تصير ناجحة وتحقق أهدافها، عقلياً ومنطقياً ماكو ربط ابداً بين قطعة القماش اللي تخليها على راسج واهدافج بالحياة والدليل السيدة زينب عليها السلام من خطبت بمجلس يزيد و سكتت جميع الحاضرين منعها حجابها؟
إمرأه محجبه واحده وملتزمه بقواعد الدين أحيت قضية الحُسين الى هذا اليوم وكانت السبب الرئيسي بأحياء عاشوراء وتخليدها.
الكثير ايفكر هذا جرم واستبداد من الأسلام بحق المرأه لكن هو محافظة على شرفها من اصحاب القلوب الضعيفة، وانتِ واني نعرف اغلب الشباب اليوم صايعين وماعدهم اي احترام للنساء اني شخصياً القيت القبض على هوايه اشخاص بتهمه التحرش بغض النظر عن العقوبة القانونية لكن في حال تم القاء القبض عليه هو والبنيه حتى لو جانت بريئة او شافهم اي احد ثاني تعرفين شنو يصير بيها؟ تدمر حياتها بالكامل وتصير عليها وعلى عشيرتها وصمة عار، لهذا السبب بالتحديد ولأن الشباب اغلبهم غير منضبطين الأسلام حرص على الحفاظ على المرأه بشكل كامل من الرأس حتى اخمص القدمين.
فيروز: كلامك صحيح لكن لو احنه عدنه قانون يفرض على المتحرش عقوبة قوية وصل حالنه الى ما آل اليه اليوم، واللي نشوفه بالمجتمع من تفاخر بين الشباب وتحرشهم العلني بدون رادع وحتى مرات اتكون البنيه وي اهلها ومع ذلك ميحترموها، اني شخصياً شهدت على قضيه تحرش كدامي زوجه يتغزلون بيها كدام زوجها بدون خجل، اذاً انت اردع بقانون يسكتهم ويخليهم يحترمون النساء بذلك الوقت مراح تسمع بقضايه تحرش ابداً.
هَيْصَم: منو اللي يقدم بلاغ في حال صدر هذا القانون؟ اغلب البنات وحتى النساء الكبار تخاف اليوم من انو تعترف كدام اهلها اذا تعرضت للتحرش وتسعى دائماً ماتسمع أحد شي ومتخلي يحس، احنه مجتمع عشائري اذا هو حتى في حالات القتل يتغاضى عن الجريمة في حال اتنازل اهل المقتول او دفعوا الديه الشرعية اذا كان القتل غير متعمد او قتل بقضية شرف على رغم الشرع يحرم هذا النوع من القتل ايضاً، لذلك القانون وحده ميقدم شي اذا مو المواطن يساعدنه حتى نلقي القبض على المتحرش، الأيد وحدها متصفگ صعب جدا، اتركي كلام نزار قباني وكاظم الساهر وخلي ابالج انتِ تعيشين بالعراق العظيم حيث المجتمع الذكوري متگدرين كلهم تخليهم هَيْصَم كارهين للمس.
فيروز: اذا هيج اني ما مجبورة اغير نفسي حتى ارضي المقابل مثل ما الأسلام فرض عليه الحجاب بذات الوقت فرض عليكم غظ البصر.
هَيْصَم: اضربلج مثل الجكليته اللي بيها غلاف واللي مبيها لو ميحتاج؟
فيروز: الجوعان ياكل كل شي لتخاف من هاي الناحيه.
هَيْصَم: عندج إصرار على رغم بداخلج تعرفين تصرفج غلط هاي الثقه اريد اعرف مصدرها شنو؟
فيروز: مو كل شي بالحياة اله تفسير بعض الأمور اتصير بدون أرادة الأنسان و اعتبر ثقتي وحده من عدهم.
هَيْصَم: حاب اتعرف عن لَّباءَة عائلتها والسبب اللي يدفع واحد مجرم يتعلق بيها ياترى منو انتِ؟
فيروز: معقولة تدخل بيتك وحده متعرفها!!
هَيْصَم: جلسه تعارف ما الضير اذا مجنت حابه تحجين مو مشكلة.
فيروز: اسأل شنو حاب تعرف بالمقابل اني همات اسألك.
هَيْصَم: في حال كان السؤال مناسب للطرفين ايتم الأجابه عليه.
فيروز: متفقين.
كعدت على الكرسي وهو على الجرباية وانطلق بكلامه.
هَيْصَم: لهذا اليوم ولا واحد سأل عنج ليش؟
فيروز: لأن اني وحيدة اهلي، والدتي اتوفت بالولادة او والدي لحقها من ثلاث اشهر.
هَيْصَم: انا لله وانا اليه راجعون، اعرف مو بمحله لكن اقربائج شنو جانت ردة فعلهم بوفاة والدج؟
فيروز: للأسف الشديد ابوية مذكرلي اي سيرة عن أهله ولا أهل امي ولا اني سألت، اصعب ايام حياتنا عشناها وحدنا حتى لو موجودين شنو فايدة وجودهم.
هَيْصَم: ابنيه وحدها في عالم مليئ بناس قذرة، اشلون گدرتي تستمرين بدون وجود احد بحياتج؟
فيروز: مو كل شي بالحياة يتمحور حول الرجل، هوايه نساء بنن نفسهن وحدهن وين المشكلة؟!
هَيْصَم: مخفتي؟
فيروز: منو بينه ميخاف؟
ليالي طويله مگدرت انام بيها واني ارتعد اذا سمعت صوت الهوه يضرب بالباب شنو مجانت شجاعة الأنسان لابد اكو موقف معين ايحس بيه بالضعف، وحتاجيت وقت طويل يلا گدرت اتأقلم واعرف شنو هي الوحده، عرفت انو اليتم الحقيقي اذا فقدنه وجود الأب لأن هو مثل الخيمه بضياعه تتفكك الأسرة وتدمر العائلة بالكامل، مخسرت فقط انسان عادي انما خسرت وطني بأكمله، خسرت أماني ودفو ليلي، بالوقت اللي غمضت عينه متت وصارت حياتي بدون طعم ولا فايدة، جان صديقي واخوي وامي واختي، مينام اذا ميجي يقبل جبيني ويغطيني ويتأكد مرتاحه ومابيه شي، مياكل اذا مأكلت، يزعل على زعلي وتنزل دموعه اذا نخدشت، بعد وفاته عشت الويلات اللي بقى من عنده هو فقط الذكريات والصور والشخص اللي جان اليه كل الناس تركني بوسطهم وحيدة وغادر، هنت عليه لدرجة مودعني.
هَيْصَم: شلون يعني مودعج؟
فيروز: لأن مات مقتول.
هَيْصَم: منو اللي قتله وليش مقدمتي بلاغ؟
فيروز: جنت راجعه من الدوام هو بالعادة يكون موجود بالبيت هيج وقت، طرقت على الباب مسمعت صوت احد فتحته وفتت صحت بأسمه كذا مره مسمعت جواب، خفت حيل وانتابني شعور سيء اتوقعت صاير شي فتحت باب غرفته ملگيت احد دورت بكل البيت مشفت احد، بيتنه مبيه طابق ثاني ومنصعد احنه فوگ اصلاً بس سمعت صوت الهوه وهو يضرب بالباب مال البيتونه صعدت واني متأمله اشوفه وصحيح شفته لكن منظرة يصعب على الكافر، جسمه كله ازرگ اقتربت من عنده وبعدني اني لليوم ممقتنعه هو تركني خلص وراح، فكرة مراح اگدر احجي وياه ابداً ما احضنه ولا اضحك على نكاته ماكو احد راح يغطيني اذا نمت او يواسيني بوفاة امي ويگعد ساعات يحجي بطولاته وشلون جان رجال حلو بشبابه ماتغادرني، گعدت قريب عليه وقربت أيدي من عنده حركته وتمنيت يطلع نايم بس خانتني الظنون وملگيت أستجابه رجعت مره ثانية حركته هم ماكو ردة فعل، لاحظت اكو خط ازرگ برگبته عرفت هو مخنوگ بس مو انتحار لأن ماكو اي آثر على محاولته قتل نفسه حضنته لصدري وبقيت ابجي واصرخ على صوتي اجوي الجوارين واخذوه من حضني غصب ركضت وراهم واني اتمنى يطلع مبيه شي مجرد وهم اصحه من عنده عن قريب، لكن بائت كل امنياتي بالفشل مرة ثانية من طلع الدكتور وشخص حالته وكلي هو انتقل للرفيق الأعلى من ساعتين بسبب انقطاع الأوكسجين عن الرئه، رجعت للبيت وحيدة، الجوارين هم اللي تكفلوا بدفنه و الفاتحه ولأول مره انام وحدي بعد سنين حياتي كلها، صحيح جانت كم مره اجبيره يمي بس كلهم مبيهم ريحته ودفو حضنه، الدموع ملت عيني واني اذكر أيامنا وسعاتنا اللي صارت ماضي ومستحيل ترجع تنعاد، لملمت نفسي بنفسي ومابيت ضعفي لأحد، ماكدر الوم احد خاصة من تكون الخسارة بيد القدر ولسبب مجهول خارج عن أرادتنه، انقتل وماعرف ليش وشنو السبب هو مجرد مواطن بائس مثل آلاف المواطنين بهذا البلد انتهت حياتهم بدون ذنب.
هَيْصَم: عزائي الج لكن مجاوبتي على سؤالي ليش مقدمتي بلاغ؟
فيروز: منو گلك مقدمت؟
هَيْصَم: وشنو صار؟
فيروز: انغلقت القضيه قبل متوصل للمحكمة وگالوا ماكو دليل و اللي قتله مجهول وبعدين شنو اليثبت مات قتل لذلك سديت الموضوع وعرفت مستحيل ينوخذ حقه بسهوله، وک وحدانيه قررت اسكت واكمل حياتي افضل ما انقتل اني همات.
هَيْصَم: متخيلت تكونين ضعيفة لهاي الدرجة، راح اندم لأن اختاريت اسميج لَّباءَة، دماء والدج ملازم اتكون نقطة ضعف بالعكس تماماً لازم اتصير قوة تنطلقين من عدها وتعرفين منو الحقير اللي سلب من عندج حضنج الدافي وأمانج وخله حياتج معرضه للخطر، الأنسان ايموت مره وحده والروح بيد صاحبها منو شنو تخافين بعد؟!
فيروز: كلامك صح بس القضيه انغلقت شنو اگدر اسوي؟
هَيْصَم: نرجع نفتحها من جديد مو مشكلة انتِ بس اتعاوني وياي وتركي الباقي عليه.
فيروز: ماعرف شنو اگول.
هَيْصَم: فكري هوايه، اني موجود وراح اساعدج وادعمج بقرارج شنو ماكان.
صفنت واني افكر بكلامه قاطعني من گال.
هَيْصَم: كوني مطمأنه الهَيْصَم عند وعده، مستحيل اخلي شي ايصيبج، مادام بالرئة هوه لَّباءَة حتى الموت ميطخها.
فيروز: واثقه بوعدك لذلك موافقه ارجع اقدم بلاغ مره ثانيه وهاي المره انت تكون مسؤول عن قضية مقتل بابا.
هَيْصَم: ان شاء الله راح ابدي تحقيق من هاي اللحظة وان شاء الله نلقي القبض عليه وتكونين شاهد على اعدامه هذا ايضاً وعد من الهَيْصَم.
فيروز: ثقتي بيك قويه هَيْصَم، صفن بوجهي شويه وهاي اول مره اشوف ابتسامته بادلته، مدامت هاي الصفنه فترة طويله كام من مكانه وهو يگول.
هَيْصَم: تخافين تبقين وحدج؟
فيروز: اعتاديت مو مشكله.
هَيْصَم: تارك انثى الأسد ابيتي، اني اخاف على الناس من عندج ما اخاف عليج، انتبهي على نفسج وروحي نامي، ان شاء الله اشوفج بعدين.
مفهمت شنو قصدة لكن قبل ميطلع وقفته: هَيْصَم.
التفت اليه وگال.
هَيْصَم: نعم.
فيروز: انتبه على نفسك لتسوق سريع وارجع باجر للبيت.
هَيْصَم: ان شاءالله.
طلع واني رحت للغرفة غيرت ملابسي وخليت راسي على المخده ورجعت بيه الذكريات لأيام زمان، اتمنيت لو يرجع يوم واحد من الماضي و اگدر اشوفه واشبع من عنده، جان ماخليته يبقى بالبيت لو اني اصلاً مرحت للدوام گدرت اودعه ليش مات وحيد، هم خطرت على باله بآخر لحظة، من لفظ آخر نفس يم منو أمني؟ جان شبعان، عطشان لو لا؟ زين هسه هو يم أمي؟ شنو يحجون؟ هم سولفلها شلون رباني وحده وخسر كل عمره وهو يخاف عليه ومگدر يعيش حياته مثل البقيه؟
جريت نفس بصعوبه ونزلت دموعي، مرت ثلاث اشهر، شتاقيتله، ياريت لو الگبر ضمني ولا ضمه، الحزن اللي بداخلي لايوصف ولياليي تحضنها الذكريات، للأسف العمر يخلص بهاي الطريقة واعز الناس اللي تعتبرهم سندك وقوتك بالحياة يصيرون مجرد صور تشوفها فقط من تغمض عينك، الندم والحسرة كلهن بدون معنى، غمضت عيني واني اطلب النوم يزور اجفاني وبعد عدة محاولات گدرت استسلم لعالم الأحلام.
هَيْصَم: لائِث اريدك تجي لهذا العنوان بعد نص ساعة لتتأخر.
: نص ساعة مثل ماكتله أو وصل، تعجبني ب لائِث هوايه صفات اهمها التزامه بالموعد لذلك اخليه قريب من عندي دائماً هو من الأشخاص الموثوقين لدرجه حتى لو تهدد بالسلاح مستحيل ينطي بأصدقاءة.
لائِث: سيدي.
هَيْصَم: خارج المركز احنه لائِث رخي.
لائِث: متعرف اشگد اتعب من اخذ دور المحترم الك يا اخي اصعب مهمه بالحياة والله.
هَيْصَم: ليكون متريد تحترمني يعني!!
لائِث: استغفر الله سيدي معقولة ما احترمك وانت الضلع؟!
هَيْصَم: عوف هاي السوالف بعدين اريدك بشي مهم هسه.
لائِث: اسمع.
هَيْصَم: جريمة قتل تم اغلاقها اريد تنفتح مره ثانية ويتم التحقيق بيها من جديد.
لائِث: منو المقتول؟
هَيْصَم: أبوها.
لائِث: عد اي مركز قدمت بلاغ؟
هَيْصَم: مو مهم لكن احنه الراح نلزم القضيه.
لائِث: اكو دليل على صحة كلامها؟
هَيْصَم: ادموعها، نبرة صوتها.
لائِث: مصخن هَيْصَم؟
هَيْصَم: المس جبيني وتأكد.
لائِث: من شوكت تثق بالدموع ونبرة الصوت؟!
لتميل زايد حبيبي بعدين توگع بفخها لحد الأن منعرف اذا جانت محل ثقه او لا احتمال جبير اتكون ضمن العصابه او متفقه وياهم اخذ حذرك كل شي ايصير حتى لو جان شعارك احترام الجنس اللطيف يبقى كيد النساء شي عظيم.
هَيْصَم: هَيْصَم اني لائِث مو أي احد، معقولة اخلي ابيتي وحده ما اعرفها؟!
لائِث: اعرفك ميحتاج تعرفني عليك مع ذلك الحذر واجب.
هَيْصَم: متوقعتك غبي لهاي الدرجة اني لو ماعندي دليل يثبت صحة كلامها مجنت قررت افتح القضيه من جديد بس انت صاير اثول هاي الأيام ومتلكفها.
لائِث: شعرفني بيك تشاقه عبالي تحجي صدك، بس دليلك وينه؟
هَيْصَم: حتى تضم شي مهم ويكون وجوده بمثابة حياة وموت وين اول مكان يخطر على بالك؟
لائِث: مكان آمن وقريب على گلبي ومستحيل احد يگدر يوصله.
هَيْصَم: اذاً ماكو أأمن من بيتهم و بمكان مميز بس هو يعرف بيه.
لائِث: شوكت تحب نبدي بحث؟
هَيْصَم: الأن صعب حتى فتح القضيه راح يؤجل لبعدين، اي خطوة في هذا الموضوع مو بصالحنه هم ينتظرون من عدنه الزله حتى يعرفون مكانها بعدهم مقتنعين هي عندي وفتح القضيه بهيج وقت اشاره خضره الهم مع ذلك لازم نبحث ونجمع أدلة.
لائِث: اني وياك بشنو تسوي.
هَيْصَم: اعترف لو مو وقته؟
لائِث: ادري بيك تحبني ماكو داعي تعترفلي ضلع.
هَيْصَم: واثق جداً!!
لائِث: ليكون مو بيعنك يعني؟
هَيْصَم: والله بعمري مشفتك انجلينا جولي حتى تجذبني واحبك.
لائِث: على اساس اتحب النساء انت حتى تحب الرجال.
هَيْصَم: الحب يحتاج شجاعه وتقبل للخسارة واني ماعندي طاقه اتحمل بيها خسارة احد خليني وحيد افضل، ما اريد اكون مرتبط بشخص يعكر مزاجي ويخربط مشاعري ويبعدني عن هدفي.
لائِث: ما اعتقد راح تستمر حالتك فتره طويلة على يوم تجيني وتبجي بسبب حبها وگول لائِث گال.
هَيْصَم: سد الموضوع وخلينا نروح للمركز.
لائِث: اتصلت بيه اليوم وكلتلي مشتاقتلك هوايه وتريدك اتروح حتى تشوفها تعرفها متتحمل فراقك فتره طويلة ليش تعذبها لهاي الدرجة هَيْصَم؟
هَيْصَم: ليش اتصلت؟
لائِث: هذا سؤال واحد عاقل يعني شنو تريد من عندك مثلاً طلبت شوفتك لتصير بخيل وتقسي عليها.
هَيْصَم: الله كريم افكر واذا اتصلت مرة ثانية كللها لتتصل اللي عندي كافي واضح.
لائِث:انشوف شنو نهياتها وياك هَيْصَم افندي.
هَيْصَم: كل خير ان شاء الله.
: فزيت من النوم على طرقات قويه على الباب كمت من مكاني بسرعة و فتحته..
يتبع
تفاعلكم اللي يسوي واهس وتعليقاتكم بين الفقرات وتصويتكم للبارت يحلوين
تصبحون على الف خير وعافيه شمعاتي..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!