للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه مع اصدقائكم حتى نستمتع وي الهَيْصَم مع بعض.
هَيْصَم
(الكاتبة زهراء احمد)
_______
ڪيفَ لامرأةً بهَذا الحُسن أن تبقَى وَحيدَه ؟
وهي مبتدأ الأغَاني
وهي خاتمةُ القَصيدَه .
قطع هاي الأجواء صوت الموبايل وهو يرن فتحه وخلا على أذنه بقيت صافنه بحركاته ، عقد حاجبه وأيدة هدأت عن الحركه بقى يهمهم ويستمع بهدوء ثواني وجحظ اعيونه وباوعلي بنظرة مليانه قهر خلتني اصنع افكار شيطانيه ياترى شنو صار هاي المره وبشنو تورطت؟!
نزل نظرة وقطع الأتصال سألته والفضول يقره مليون،
فيروز: هَيْصَم شنو الموضوع؟؟
رفع نظرة اعيونه حمر جاوبني بطريقة غريبه.
هَيْصَم: احنه ليش نخلقنه لَّباءَة؟؟
فيروز: شنو هذا السؤال الغريب؟!
هَيْصَم: رب العالمين ليش خلقنه بهاي الحياة؟
فيروز: حتى نعيش ونعمل ونعبده وبعدين نموت،
لحظه الموت منو مات هَيْصَم؟
لتگولها خالتي مو؟؟
هَيْصَم: اهدأي محجيت شي انت اخترعتي اجابه من وحدج.
فيروز: مو اني اسلوبك واضح جداً مال شخص يريد يحضر لمصيبه.
هَيْصَم: فرضاً اعتقادج صح شنو يصير؟!
فيروز: لتلعب بأعصابي هيج احجي من الأخير شنو صاير؟
نهض من مكانه اقترب من عندي نزل راسه لمستواي وحضن وجناتي بين أديه يحجي بنبرة حنينه ممزوجه بحزن.
هَيْصَم: اموت وما اتركج اضحي بكل شي حتى قضيتي اللي شتغلت عليها اسنين مقابل متنزل دمعة من اعيونج، ابيع عمري حتى اشوف ضحكتج، اصيرلج أم واب واخ وصديق اعوضج عن كل حزن مريتي بيه اشافي جروحج بجروحي ألملم حزني وافرحج انسى ماضيي وافتح وياج صفحه جديدة متفقين لَّباءَة الهَيْصَم؟
خليت ايدي على أيدة وعقدت حاجبي بتساؤل من كلامه الفاجأني حيل ونبرته الغريبه،
فيروز: شنو صاير هَيْصَم ليش تحجي بهاي الطريقة؟!
هَيْصَم: انتِ واعيه و جبيرة وفاهمه وانسانه تعرفين الدين والحق صح؟
فيروز: الحمد الله.
هَيْصَم: مؤمنه الأنسان مصيره يموت مو؟
فيروز: اي طبعاً بس شنو داعي هذا الكلام؟!
هَيْصَم: البقاء لله لَّباءَة خط الموت على ابن آدم كما خطت القلادة على جيد الفتاة.
فيروز: اي بس منو مات؟!
هَيْصَم: لَّباءَة.
فيروز: مستحيل ما اصدگ لتحجي هيج متسويها،
لحظة صدمه مگدرت اعبر عن مشاعري بالكلام مصدگت او مردت اصدگ اللي صار خالتي ماتت كل شي بهاي الفترة والتراكمات اللي تعرضتلها طلعت على شكل صمت غريب صابني معبرت بحرف بقيت اباوع بوجهه بغباء صافنه مثل الشخص الفاقد الذاكره كل شي مبهم بدأً من مشاعري وصول للمكان اللي اني بيه هسه وهذا الأمامي منو؟!
وشنو اسوي اني اهنا!!
ومنو خالتي؟!
هَيْصَم: لَّباءَة تسمعيني انتِ وياي يروحي؟!
ليش متحجين؟؟
وللك لاااائِث.
دقايق ودخل بسرعة.
لائِث: سيدي.
هَيْصَم: روح للمستشفى***** البنجف كمل كل الأجرائات اللازمه وتكفل بكل الأمور.
لائِث: لحظة بس فهمني شنو الموضوع؟!
هَيْصَم: خالتها تعرضت لحادث سياره الصبح وتوفت وهسه هي بالطب العدلي.
لائِث: ان لله وانا اليه راجعون، وانت شنو راح تسوي گلتلها؟
هَيْصَم: اي.
لائِث: صدگ شو ماكو صوت؟!
هَيْصَم: مؤدبه قابل مثلك سرسري.
لائِث: بلا شقه والله مسمعت صرخه لطمه غير خالتها؟!
هَيْصَم: واني هم اسأل نفس السؤال ليش متحجي وبس صافنه اذا عندك جواب گلي.
لائِث: اويلي عليك هَيْصَم.
هَيْصَم: شكو؟!
لائِث: انصدمت البت.
هَيْصَم: شنو يعني؟!
لائِث: شنو الفلم ماتعرف شنو يعني مصدومه؟!
هَيْصَم: اعذرني بالفواتح اللي حضرتها صوت النسوان يوصل لغير محافظه من وين اعرف بنات بغداد ينصدمن اذا مات واحد من عدهم؟!
لائِث: ليش هي كل النساء مثل بعض؟
هَيْصَم: انت شوف شغلك واني راح اخذها للبيت حتى ترتاح.
لائِث: گلتلها سقطت القضيه عنها؟
هَيْصَم: اني بيا حال.
لائِث: والدفان يغمزلي.
هَيْصَم: امشي وخر عني.
لائِث: يدلل هَيْصَم الورد.
هَيْصَم: لَّباءَة يلا تعالي ويايه خلي نطلع للبيت صرتي حره ومراح تبقين بعد بالسجن راح نرجع لبيتنه ومطلعين من عنده مره ثانيه لأي مكان متبقين بعيدة عن عيني وما انجبر اشتاقلج واتعذب أبُعد المسافات.
مثل الروبوت فصلت تماماً عن العالم الخارجي عقلي ميستوعب انو اني خلص بقيت وحدي مره ثانيه مصدگت ومردت اصدگ انو خسرت أمي للمره الثانيه وهاي المره ماكو احتمال يطلع احد يعرفني،
راح انجبر ارجع اعيش وحدي ماكو احد يبتسم بوجهي الصبح ولا اسمع كلمه يمه من حلگ احد يخلص يومي واني وحيدة شنو الفائدة من وجودي اذاً؟
مردت استوعب وحبيت اعيش بالوهم واقنع نفسي بالعكس صحيت من افكاري واني بالسياره صفنت شويه اني شلون وصلت اهنا؟!
التفتت شفته يسوق ويحجي وي شخص على الموبايل انتظرته يكمل وحجيت،
فيروز: رجعني للنجف اريد اشوف خالتي هسه هي اكيد خايفه عليه.
نظرلي بأسى وگال بنبرة حنينه حيل.
هَيْصَم: خلي نرجع للبيت تغدي وغيري ملابسج ونروح للنجف سوه.
جاوبته بعصبيه وغضب مگدرت اسيطر عليه،
فيروز: ما الك علاقه سواء تغديت او لا لتسوي نفسك متفهم فاهمم ورجعني للبيت اللي اخذتني من عنده گتلك خالتي منتظرتني.
هَيْصَم: اهدأي لَّباءَة لتصيحين مو زين.
فيروز: ما اهدأ شنو تسوي تعاقبني مثلاً؟
تعاقبني عاقب وياريت العقاب هو الموت خلصني من حياتي لأن اذا مسويتها اني اسويها.
هَيْصَم: بنيتي موت شنو هذا اسم الله يومي قبل يومج ليش تحجين هيج؟!
فيروز: لأن انتم خونه كلكم نفس الشي بدأ من امي اللي اختارت تموت وتخليني يتيمه وما استمتع بحبها وحنيتها ولا حضنها الدافي، جنت اتمنى اشوفها تنتظرني اباب المدرسه مثل باقي البنات أو تجي بأجتماع الأمهات وتسأل عن مستواي لو تحضرلي جنطتي قبل الدوام او من ارجع الگيها تطبخلي وتبتسم بوجهي وتگلي شلون جان يومج ، انحرمت من لزمت أيدها لشعري لو من امرض تشربني العلاج وتنام يمي جانت حسره بگلبي اصيح ماما ومازالت هاي الحسرة تموتني كل يوم،
ما اسامحها وما ابريها الذمه لأن هي وحده انانيه اختارت راحتها مقابل عذابي،
لو والدي اللي اختار الوطن وعاف بنته بنص الحقراء جان واعدني ميعيفني وحدي بس سوه العكس،
وخالتي هسه سوت مثلهم وعافتني وحدي ثالث مره اتعرض للخيانه،
لذلك ما اسامحهم كلهم اكرهممم تسمممع.
وقف السيارة وسحبني لحضنه بدون ميحجي شي حاولت ابعده بس هو مثبتني راسي على صدرة ضربته بأيدي وبقيت احجي بنفس البنبرة،
فيروز: ايدك وخر عني ورجعني للبيت لتحاول تسوي هيج انت ايضاً مثلهم وراح تعيفني بأقرب فرصه.
هَيْصَم: اششش مراح اعيفج واذا اريد اموت اترك شبل الهَيْصَم هو يحميج.
منتبهت شنو گال وقتها عقلي مو يمي بس سكنت فجأة وهو تركني أرجع لمكاني ومثل اي احد يگعد يم الجامه نظري يراقب السيارات والشوارع استغربت نفسي مبجيت مع كل عصبيتي وانفعالي بس اكو شي داخلي فارغ ماكو فائدة من الحياة هذا الصوت يتردد بعقلي ويگلي فيروز مبقى عندج احد ليش لسه عايشه؟!
اكتآب أو صدمه ماعرف لكن الوضع اللي اني بيه لايحسد عليه ابداً،
توقفت السيارة امام نفس البيت اللي فكرت مراح ارجعله مره ثانيه راد ينزل وقفته،
فيروز: هذا مو بيتي رجعني لبيتي هَيْصَم.
التفتلي و جاوبني بأبتسامه موت خالتي أثر عليه وخلا حنين حيل.
هَيْصَم: اخذي دوش سريع وتغدي واخذج وعد من عندي وتعرفين وعد الهَيْصَم لَّباءَة.
فيروز: ماعندي ثقه بيك رجعني لبيتي هسه والا اخذ تكسي من الشارع وأرواح وحدي.
هَيْصَم: متگدرين المضاهرات عالگه و صعب ترحين وحدج واصلاً مستحيل اسمح بهذا الشي وعليه صيري مطيعه ونزلي وياي حتى نگدر نوصل للنجف قبل المغرب.
نزلنه ودخلنه جوه هو راح لغرفته واني بقيت منتظرة بالصاله ماعرف عقلي شنو بيه فجأة فقدت السيطره عليه وصرت منفعله على اتفه الأشياء وبدون سبب،
بقى دقايق وطلع لابس بنطلون وقميص اسود رفع حاجبه وحجه بتساؤل.
هَيْصَم: ليش واگفه؟!
فيروز: ارگص مثلاً؟!
هَيْصَم: ما اعارض بس الوقت غير مناسب أجليها غير مره.
فيروز: رجعني للبيت.
هَيْصَم: اخذي حمام بالأول وتغدي يلا هذا شرطي والا ماكو روحه للنجف.
فيروز: بكيفك يعني؟!
هَيْصَم: اي بكيفي عندج اعتراض؟؟
تربعت وگعدت على الأرض بعناد وضربت على فخذي بغضب،
ما ادخل حمام ولا اكُل وشنو تريد تسوي سوي.
هَيْصَم: عاندي براحتج ونشوف تاليها شنو يصير.
دخل للغرفه مالته ماعرف شنو جان يسوي دقايق وطلع مره ثانيه اني بقيت نفس وضعي متحركت ابد فتح اعيونه بوجهي ورجع صغرهم اقترب من عندي وبحركه من عنده صارت أيدة اليمين تحت خصري واليسار تحت رجليه حملني من الأرض بقيت احرك بنفسي حتى ينزلني بس ولا كأن صرخت بأذنه حتى يعيفني،
فيروز: هَيْصَمممم.
هَيْصَم: حياته.
فيروز: نزلني.
هَيْصَم: يدلل الحلو.
فتح باب الغرفه برجله ودخلني للحمام جان مالي البانيو مي نزلني بيه ودار وجهه حتى ميشوفني گال قبل ميطلع.
هَيْصَم: اكو برنص اهنا تگدرين تلبسيه واكو ملابس راح اخليهم على الجربايه من تخلصين البسيهم ما راح ادخل كملي وطلعي تلگيني بالمطبخ.
طلع واني بقيت بالبانيو بدون حركه صافنه على السگف وراسي مرجعته وره غمضت اعيوني وحاولت ابجي اريد اعبر عن حزني وقهري جنت على ابسط الأشياء تنزل دمعتي ک موت البطل بمسلسل متابعته او نهاية الأفلام كارتون اللي حبيتها نزلت ادموعي على مواقف تافهه حيل وهسه عندي حزن فضيع وفقدان شخص عزيز عليه مع هذا مگدرت ابجي ابداً وعجزي هذا خلاني اكره نفسي وازيد من العصبيه،
سبحت على السريع لبست البرنص وطلعت لگيته مخلي ملابسي اللي جنت ألبسهم واني اهنا ،جففت شعري ولبستهم ولبست حجابي عجبني ابقى بالغرفه وما اطلع من عدها اريد اختلي وما اشوف احد بس ذكرياتي وياها منعتني اريد اشوفها لذلك لازم اطلع على الأقل اودعها قبل ميحضن جسمها التراب،
ردت افتح الباب لگيته مقفول طرقت عليه بقوة سمعت صوته وهو يگول.
هَيْصَم: المفتاح على الأرض نزلي راسج وانت تشوفيه.
انتبهت علية شفته قريب الباب اخذته بأيدي وفتحته رحت يمه للمطبخ سمع حركتي وفتحت الباب التفتلي و ابتسم رفعت حاجبي ومقابله على تصرفاته وحجيت بنبرة استهزاء كل هدفي اغيضه ماعرف شنو السبب بس حاسه جيتي لبغداد و علاقتي بيه هي السبب بوفاة خالتي على رغم لحد الأن ماعرف سبب وفاتها وليش لسه مسألته،
فيروز: سيد افندي اليوم يوزع ابتسامات عرس عندك واني ماعندي علم؟!
اذا اكو نكته ضحكني على الواهس عيب بس انت تضحك.
هَيْصَم: لخاطرج اتحمل.
صرخت بوجهه،
فيروز: ومنوو انت حتى تتحملني واني اهلي متحملوننني؟!
هَيْصَم: هَيْصَم وانتِ اخيوط گلبه اذا متحملت اسوادينج منو يتحملج؟!
كمل الأكل وخلا صحن امامي تمن ومرگه فاصوليا وقطعة لحم وصحن سلطه وكوب عصير شوكت حضرهن ماعرف رفعت اعيوني اله بتساؤل فهمني وجاوبني بدون ما احجي.
هَيْصَم: طلبته من المطعم بس السلطه صنع أيدي.
فيروز: بقيت صافنه على الصحن بأيدي الخاشوگه بس ما اگدر اكل اتخيلها يمي صوتها بأذني وكلمتها تتردد بمسامعي،
باجر راح اروح للأمام علي وادعيلج ابو الحسنين ميرجعني خايبه،
بس لاا؟!
رفعت راسي بسرعة وحجيت،
فيروز: شلون ماتت؟؟
رفع نظرله أليه وگال بهدوء ورجع ياكل.
هَيْصَم: اكلي وبعدين نحجي بهذا الموضوع.
اعرف انو اللي يسويه هو لخاطري وحتى ميقهرني اكثر ويحاول يخفف عني بس الوضع اللي اني بيه مخلاني افهم واركز ابداً صرخت بيه بصوت عالي وضربت الصحون كلها على الأرض صوت صرختي والتكسير صار واحد ،
فيروز: موووو من حقككك تسوووي وياااي هيج انت منووووو وتمنعني اعرف شلون ماتتت امي هاي الثانيه تفهمممم شنووو يعني امي بس لا انت متفهم مخسرت امك من قبل اكيد مراح تحس بشعوري هسه،
بقى ثابت بمكانه اعيونه تتمعن بيه وبحركاتي يريد يشوف شنو راح اسوي اكثر منطق ولا حرف الصمت عم بأرجاء المطبخ ضجت من تصرفي وأنبني ضميري مو لأن صرخت عليه وهو ما أله علاقه وانما لأن رميت نعمة الله على الأرض،
نزلت ومديت أيدي حتى المها شفت ظل قريب من عندي رفعت راسي صارت عيني بعينه بلعت ريقي گلت لامحاله راح يضربني لأن سويت هيج وياه اتحركت حتى ابتعد لزم أيدي ومنعني دفعتها واجيت انهض واني كل تفكيري راح يسوي شي لأن قللت أدب وياه لكن فاجأني من سوه العكس،
ضهري على الحايط وأديه محاوطه خصري ومثبته عيني بعينه ابتسم بوجهي رفعت حاجبي وحجيت حتى اضوجه،
فيروز: صاير هوايه تخسر ابتسامات مو عوايدك!!
جاوبني بنبرة هادئة.
هَيْصَم: هاي وحده من القواعد اللي كسرتيها لَّباءَة.
فيروز: اجيت ابعد ايده عن ايدي حتى أوخر لأن هذا القرب مهلك لگلبي بشكل رهيب ويمه ما اگدر اسيطر على مشاعري ابداً ، ثبتني اكثر نزل راسه لمستواي انفاسه الدافيه تلفح بوجنتي أنفه يداعب أنفي يحجي بهمس قريب شفايفي.
هَيْصَم: ماكو داعي تخافين من عندي لأن انتِ الروح مالي اللي محد يعرف سرها وگدر يكشف لغزها،
انتِ روح الهَيْصَم لَّباءَة واقسى عقوبه ممكن افكر بيها هي هاي،
قرب شفايفه من شفايفي وقبلني نقلني لغير عالم حرفياً نسيت وتناسيت كل مشاكلي وهمومي بهاي اللحظة،
صحيت على نفسي اني وين وشنو گاعد يصير ضربته على صدرة حس على نفسه وخر مني نظرتله بغضب هاي ثاني مرة يسويها وياي اذا اسكت راح يتمادى اكثر والله اعلم شنو ممكن يسوي اكثر من هيج،
فيروز: انت واحد ماعندك اخلاق وماغلط اللي گال الرجال كلهم نفس بعض بس نسبة الحقاره تختلف من شخص للثاني وانت ثبتتلي هاي القاعدة هسه،
مسوه أي رد فعل جان صافن بحركاتي ومخلي أدية بجيوبه وكأن هو المسيطر بالموضوع درت وجهي حتى اطلع من الغرفه وعندي نيه اطلع من البيت بالكامل محسيت على واني الا انسحب بقوة مره ثانيه وانضرب على الحايط أنيت بألم جسمي لسه متعافى من الضرب اللي اكلته بالحبس وكملها هسه من دفعني،
لزم أيدي وطلعني خارج المطبخ واخذني للغرفه فتح الباب ودخلني تركني وراح لأحد المجرات بالميز طلع من عدها اسعافات اوليه وتقدم ناحيتي رجعت وره، هو يقترب واني ابتعد آخير شي توقف بمكانه وأشرلي اني اقترب من عنده لكن اني بقيت معنده أو وگفت بمكاني نظرتله بثقه وحجيت بتحدي،
فيروز: هذا مكاني أو لو تطلع براسك نخله ما اتحرك من عنده واللي يجي بأيدك لاتقصر.
رفع طرف شفته بأبتسامه وحجه ويايه بتلاعب.
هَيْصَم: تعرفين منو خلالج مرهم لجروحج؟
اكيد لا بس لتخافين اني راح اگلج منو عالجج.
قضم شفته بأسنانه واقترب حيل مني وحاوطني بأديه خفت ليسوي شي بهاي اللحظة فقدت شجاعتي بالكامل حاولت ابعد من يمه بس هو مثبتني بقوة،
أيدة صارت على قميصي حسيت بيه يرفعه صرخت بيه،
فيروز: هَيْصَم الله يخليك لا لتكسرني بهاي الطريقة.
رفع وجهي بأديه ونظر لداخل عيوني بحزن بعدين حضن خدودي بأديه وحجه بنبرة قلق.
هَيْصَم: ليش متبجين؟!
فيروز: ماعرف.
هَيْصَم: لتخافين من عندي مراح اسويلج شي اجيت اجرب اذا تصرفاتي تگدر تخليج تبجين وتعبرين عن حزنج بالدموع اذا اعتبرتي هذا تحرش او قلة أدب الحق وياج واني اسف مطلع عندي غير هاي الطريقه الغبيه.
فيروز: اخذني للنجف اذا تريد اسامحك وانسى اللي صار اليوم.
هَيْصَم: حضري نفسج دقايق ونطلع.
صعدنه بالسياره وبقى كل الطريق ساكت منطق ولا حرف مشغل قصائد حزينه كلها باسم اللي اذا تسمعهم بالعيد تبقى تلطم مع هذا متأثرت ومنزلت ادموعي، احاسيسي ميته اكو فراغ داخلي فضيع مخليني ما اگدر ابجي أو اصرخ وحتى الطم وضعي اللي اني بيه حالياً بحد ذاته يبجي ومع هذا ما بجيت اسوء شعور بالكون من تحتاج تنزل دمعتك على عزيز بس متگدر حتى عيوني هاي المره خانوني،
اختنگت ولعبت نفسي حيل أشرتله انو بعد ما اگدر اتحمل وقف السياره ونزلت اتنفست بعمق هوه بارد دخل للرئه مالتي انتعشت للحظة ورجع الدم يمشي بعروقي حسيت بيه واگف ورايه التفتتله بدون مينطق حرف قدملي بطل مي اخذته من عنده وشربت اشويه ورجعت للسيارة ورجع الصمت هو القائد لهذا اليوم حتى وصلنه لحدود النجف قطعته بسؤال،
فيروز: شلون ماتت؟
هَيْصَم: حادث سيارة على طريق الأمام علي عليه السلام.
فيروز: اليوم؟
هَيْصَم: اي الصبح.
فيروز: شلون عرفت؟!
هَيْصَم: رقمي مخليته بالموبايل مالتها لذلك اللي اخذه اتصل بيه وخبرني.
فيروز: تمام.
هَيْصَم: بس هيج؟!
فيروز: شنو تريد اسوي مثلاً؟!
هَيْصَم: اصرخي أو الطمي ابجي على اقل تقدير عبري عن حزنج بأي طريقه ممكنه لتبقين هيج ساكته بعدين يتأذه گلبج اذا كتمتي القهر.
فيروز: ما الك علاقه يضربني الم لتسوي نفسك حنين عليه.
هَيْصَم: هو حظي اعرفه ميحتاج ابو مرايه.
فيروز: شنو بي حظك على شنو متحسف هسه؟!
هَيْصَم: رب العالمين اخذ خالتج هَيْصَم مبتلي اكو احله من هيج حظ؟
فيروز: كل اللي صار بسببك واني محملتك المسؤوليه وعليه اتحمل كل شي يجيك من ورايه.
هَيْصَم: اي صح اني انطيت أمر لعزرائيل ياخذ أمانتها بنص الشارع بدون ميكون يمها احد وبنتها بعيدة عنها ويغسلوها ويدفنوها الغربه وعزائها يصير بالجامع اني ردت خالتج تموت وحيدة بدون متنزل عليها دمعة شخص مُحب وحتى اخوانها ميعرفون عنها شي حتى يشاركون بوفاتها كل اللي صار بسبب الهَيْصَم، بس تدرين هاي فكرة حلوه اترك عملي وابقى أأمر بعزرائيل ياخذ ارواح الناس واصير مسبه للجميع شنو رأيج؟؟
فيروز: كلامك يحرگ گلبي بنفس الوقت ما اگدر ابجي لتأذيني اكثر من هذا هَيْصَم ،ولتعتقد الوضع اللي اني بيه هسه مخليني سعيدة خالتي هاي افهم جنت اشم بيها ريحة امي ردت افتح وياها صفحه جديدة بعد ما اطلع من السجن وجنت مقررة اصيحها ماما واعوض بيها النقص اللي جنت عايشته بس صار العكس ورب العالمين اخذ من عندي امي الثانيه ورجعت وحيدة من جديد كلما افكر افتح صفحه جديدة واعيش مثل البقيه القدر يقرر غير شي ويحكم عليه بالحزن مره ثانيه،
تفهم شعوري؟؟
هَيْصَم: ويمكن اني اكثر شخص متفهمج.
فيروز: الرجال مو مثل المرأه لو تخسر عائلتك بالكامل ماعندك مشكله لأن انت رجال تگدر تدبر أمورك بس هذا الشي صعب لوحده ضعيفه أو وحيدة مثلي.
هَيْصَم: ليش تگولين وحيدة اني وين رحت؟!
فيروز: وانت منووو؟!
شنو صفتك بحياتي؟!
اخوي؟ زوجي لو خطيبي؟!
هَيْصَم: ممكن وحده من عدهم بالقريب العاجل متعرفين الأيام شنو مخبيه.
فيروز: ايام سودة مصخمه مثل حياتي لاشيء جديد.
هَيْصَم: متعودت عليج هيج سلبيه.
فيروز: وطاقتك الأيجابية فاجأتني ليكون فرحان بوفاة خالتي حتى ابقى وياك بنفس البيت؟!
اذا هذا اللي تريدة فحلم أبليس بالمغفره مستحيل ابقى وياك بنفس البيت عندي بيت والدي اگدر اعيش بيه.
هَيْصَم: ماعندي مشكله بكل الاحوال راح تجين يمي عن قريب وبرضاتج هم.
فيروز: لوين تريد توصل بهذا كلامك؟!
هَيْصَم: للمقبرة لائِث والفريق ينتظرونه.
توقفت السيارة بعد مسافه طويله امام مقبرت وادي السلام هاي الأرض بيها رفات اشخاص فارقونه غصب يقال انو الموت واحد والأسباب متعددة أو هو الألم الوحيد اللي ما أله علاج ولايمكن الشفاء من عنده، صفنت على حالتي أول مره اجيت بيها للنجف قبل شهرين جانت حتى التقي بيها وهاي المره الثانيه اجيت علمودها بس الفرق انو ما التقي بيها داخل البيت ونگعد نسولف بالماضي ونضحك على ايام زمان ولعبهن هي وماما لو من جانت تروح للمدرسه وهي مقاريه الدرس وقبل ميعاقبها الأستاذ هي تبجي لو من متگدر تنام من وقت تخليهم يغفون وهي تبقى تلعب وحدها وبصوت ناصي حتى محد يسمع شنو اتذكر وشنو انسى شهرين بس اتعلقت بيها بشكل مو طبيعي وحسيت بيها امي من صدگ حبيتها حيل وجنت منتظره اطلع من السجن حتى اجي اشوفها وأشبع من حضنها واشكيلها على التعنيف اللي تعرضتله بهاي اليومين لكن صار العكس وجيتي هاي المره صارت للمقبرة ازورها وهي تحت التراب،
انفتحت العُقدة وطلعت من صمتي انهاريت بشكل فضيع واني اشوف قبرها لساته اتراب الواضح هسه يلا خلصوا من الدفن مشفت أحد و منتبهت لأحد عيني بقت بس على التراب اللي ضم جثمانها صرخت بصوت عالي لدرجه حسيت بلاعيمي نجرحت اريد اعبر عن حزني بكل الطرق ،حجيت وياها بغصه ودموعي تنزل،
فيروز: انت گلتي راح تنتظريني حتى اطلع برائه ونرجع ننجمع من جديد ليش منتظرتي على الأقل اشوفج أو اودعج ليش كلكم متفقين تعيفوني حتى بدون ما اسمع من عدكم كلمه محروسه بالله؟!
ليش متردوني يمكم من تسلمون الأمانه امي سوتها وبعدين بابا وهسه انتِ ليش تكرهوني لهاي الدرجه ومتردون تخلوني اشوفكم أو اودعكم براحتي؟؟
شنو اسوي هسه ولمنو اروح منو راح يحضني بعد وعلى صدر منو اشكي همي؟!
ليش خنتوني بهااااي الطرررريقه؟!
كلكم ما اسامحكم وما ابريكم الذمه عفتوني وحدي ورحتوا اهناك كلكم اجتمعتوا هسه واني اهناا ماعندي احد، ليش اني شنو سويت حتى اتعاقب هيج وبهاي الطريقه؟!
غواش صاب اعيوني تعب بكل جسمي وكأنما نضربت مهدأ اختل توازني سمعت صوته وهو يصيح بأسمي وأيد ثبتتني حتى ما اوگع على الأرض بعدها دخلت بظلام دامس.
لائِث: خبرنه جوارينها راح تصير فاتحتها بالجامع مثل مگلت.
هَيْصَم: تكفلت بالمصاريف؟
لائِث: اي.
ضَرْضَم: شنو راح تسوي وياها؟
لائِث: بيت ابوها موجود واحنه نبقى نحميها من بعيد.
هَمَّاس: معقوله ماعدها عمام؟!
هَيْصَم: عدها بس متبرين من ابوها من سنين طويله ما اعتقد يستقبلوها هسه واني ما اريد اخليها تعيش يمهم.
هَمْهَام: شنو السبب؟؟
هَيْصَم: مجتمع عشائري هم من الأشخاص اللي عدهم لبس البنطلون عيب للمرأة راح يحتقروها ويجبروها تتزوج واحد من عدهم ، الحب عدهم جريمة والحريه عدهم ذنب لايغتفر هم من الناس اللي ميستحقون النساء ابداً ما بالك لَّباءَة.
لائِث: وانت ليش ادافع عنها هيج؟!
هَيْصَم: هي ممتعودة على هيج حياة من بغداد للجنوب تگدر تتحمل تنور طين وگعده من السته الصبح لو خطار وعزايم اربع وعشرين ساعه؟؟
لائِث: تتعود على الأقل متبقى وحدها ابنيه بنص مجتمع قذر متگدر تحمي نفسها لتخلي كبريائك يدمر حياتها هَيْصَم.
هَيْصَم: مستحيل لتلح.
لائِث: انطي مبرر قوي لهذا تصرفك.
هَيْصَم: لأن مكان اللبوة دائماً يم الأسد.
ضَرْضَم: سيدي انتبه الواضح راح تفقد الوعي.
جانوا واگفين بعيد عنها حتى تاخذ راحتها بالتعبير عن حزنها، التفت حتى يطمأن عليها شافها اختل توازنها وراح توگع ركض ناحيتها.
هَيْصَم: لَّباءَة تسمعيني؟
افتحي اعيونج يول لتعلين گلبي شنو صار بيج، لَّبوتي بنيتي افتحي اعيونج يلا،
لااااائِث.
لائِث: يامصيبه لائِث المتخلص.
ضَرْضَم: ليش واگف متتحرك؟!
لائِث: متشوف مشهد رومانسي البطله بأيد البطل اني شنو اسوي مثلاً؟!
هَمَّاس: تره البنيه فاقدة الوعي امشي بدون لغوه زايدة.
لائِث: متروح انت اني شكوو!!
هَمْهَام: صاحك مصاحنه.
هَيْصَم: مصيبتي لاااائِث.
لائِث: ايحبني والله مو بأيدة.
ضَرْضَم: اتحرك خلصني.
لائِث: سيدي.
هَيْصَم: بعد وقت ليش متأخرت ومره وحده نحفر گبر الها بصف خالتها.
لائِث: عمرها طويل وتخلفون كومه جهال ان شاء الله لتحجي هيج.
هَيْصَم: بطل مي اريد استعجل.
لائِث: اجيبلك حلاه وياي؟
هَيْصَم: عطر ليمون اي شي تلگيه جيبه وياك وستعجل لتصفن بوجهي.
لَّبوة تسمعيني يروحي؟
اذا تسمعيني حركي راسج خليني اعرف انتِ ويايه واعيه.
لائِث: فاقدة الوعي خلي ناخذها للمستشفى.
هَيْصَم: مستحيل ما اتصل بأرفد خليني احجي وياه.
لائِث: احنه بالنجف وهو بغداد شنو يسويلك؟!
هَيْصَم: اتصل بيه گلت.
لائِث: أمري لله.
أرفد: گول هَيْصَم بشنو اساعدك؟
هَيْصَم: فاقدة الوعي.
أرفد: واني ليمون؟!
هَيْصَم: اترك سخافتك واحجي شلون اصحيها؟!
أرفد: ليش فقدت الوعي من الأساس؟
هَيْصَم: خالتها توفت.
أرفد: شنو مبين بوجهه؟
هَيْصَم: اصفر صار.
أرفد: تنفسها؟
هَيْصَم: شويه يسرع وبعدين يقل.
أرفد: دگات گلبها؟
هَيْصَم: نفس التنفس.
أرفد: جسمها؟
هَيْصَم: بارد بس ماعرف اذا من الجو أو لا.
أرفد: هبوط ضغط صعدها بالسياره وارفع رجليها وخلي راسها ثابت على الكشن ولازم تاخذها مستشفى يخلولها مغذي.
هَيْصَم: ما اثق بالأطباء.
أرفد: اني اعرف دكتور شريف ميسوي شي بضمانتي المهم لازم تروح مستشفى حتى يچيكون الوضع.
هَيْصَم: افتح السيارة لائِث.
صعدها وصعد هو يسوق واني صعدت يمه بالصدر كل شويه وملتفت الها و المرايه عليها مخليها ومن سرعته تشاهدت عشر مرات اخير شي متحملت عطت بيه.
لائِث: يمعود خفف السرعه بعدني ممتزوج.
هَيْصَم: اسكت لا ابتلي بيك.
لائِث: افتهمنه خايف عليها بس اني خايف على نفسي ما اريد اموت اريد على الأقل اشوف ولي العهد.
هَيْصَم: امنحوتب اكرمني بسكوتك.
لائِث: اخناتون صار.
هَيْصَم: تره مالي خلگك.
لائِث: ميصير بيها شي لتخاف.
هَيْصَم: اكره هاي الكلمه.
لائِث: الماضي مو شرط يعيد نفسه هَيْصَم.
هَيْصَم: حظي وحظها زفت وعلى هاي قيس.
لائِث: السالب والسالب يصيرون موجب هيج درسنه بالرياضيات،
انتوا اثنينكم لايگين البعض افضل ثنائي عالجوا جروحكم سوه ولتخلون عقبات تعيق علاقتكم.
هَيْصَم: راح انزلك اذا مسكتت.
سكتت اعرف يسويها وصلنه للمستشفى ونزل فتح الباب الوراني وشالها بحضنه دخل وخلاها على سديه وصاح بأسم الدكتور دخلوها للغرفه واقترب من عدها يفحص الضغط اسئلة معتادة شلون وگعت وليش هيج صار وياها حتى يعرفون السبب الرئيسي لفقدان الوعي ويگدرون يتخذون الأجراء الصح والعرف اله دور خلي نكون واقعيين دللوها لأن هو عرف أرفد،
اقترب من عدها يشكللها مغذي صرخ بصوت عالي فززني من مكاني.
هَيْصَم: ممرضه ماعدكم؟!
ليش؟
هَيْصَم: هي تشكللها مغذي ميحتاج انتَ.
اجت ممرضه وشكلتلها مغذي ابتسمت وگالت معافايه وهذا مو على باله احد غيرها يدقق بملامحها وكأن هاي آخر مره يشوفها بيها ويريد يحفظها داخل عقله.
فتحت اعيوني بطأ دوخه فضيعه هاجمتني اجيت انهض وگعت سمعت صوته وهو يگول.
هَيْصَم: الله الله ، انتبهي على كيفج.
فيروز: شنو صار؟
هَيْصَم: هبوط ضغط.
فيروز: رجعني للبيت تعبانه.
هَيْصَم: يلا گومي وياي.
رجعنه وكل الطريق عيني على الشارع وصلنه للبيت نزلت من السياره دخلت وهو بقى منتظرني على الباب التفتت اله وعقدت حاجبي وحجيت بتساؤل.
فيروز: ليش واگف اهنا؟!
هَيْصَم: عزاء خالتج صار بالجامع وانت متگدرين تبقين وحدج اهنا ما اگدر أأمن عليج وحدج خلي نرجع لبغداد حتى ترتاحين اهناك.
فيروز: مبيه حيل اتحرك لو اسوي اي شي خليني اهنا وانت روح لشغلك وشكراً على اللي سويته.
هَيْصَم: مسويت شي استحق الشكر عليه بالأضافة مراح اعيد كلامي حضري نفسج حتى تجين وياي المضاهرات گاعد تقوه وتشوفين الموت صاير بالجمله على الأقل تكونين تحت نظري واگدر اطمأن عليج من اروح لشغلي.
فيروز: ما اگدر ليش متفهم.
هَيْصَم: اني اجمع ملابسج مو مشكله بس انت گليلي وين مكانهم.
فيروز: ميحتاج لتحرجني هَيْصَم.
مسمع من عندي لزم أيدي وطلعني من البيت صعدني بالسياره واني فعلياً مجان عندي طاقه حتى اجادله رجعت راسي على الكشن ونمت محسيت على نفسي الا واني على السرير مرت يومين كاملين على هذا وضعي ما اكل مجرد لگمتين بالكثير كل وجبه وبس صافنه على الحايط داخلي يريد ينفجر بس ما اگدر احجي وما اللي خلگ اصلاً حتى اسولف.
أرفد: خيرك هَيْصَم.
هَيْصَم: يومين وهي عازله نفسها برأيك شنو الحل؟
أرفد: اللي تعرضتله مو شي هين كل المشاكل اللي صارت وياها خلال هاي الفتره والصدمات المتكرره خلتها تصمت وتقرر تنعزل اخذها لدكتور نفسي يگدر يقيم حالتها.
هَيْصَم: وانت شنو؟
أرفد: اني دكتور قلوب يول شنو دخلني بعلم النفس؟!
هَيْصَم: اعرف داخل دورات هوايه بهذا الموضوع انطيني عصارة خبرتك.
أرفد: اكو حل وماعرف اذا ينجح او لا.
هَيْصَم: غرد اسمع.
أرفد: شاركها جزء من ماضيك بهاي الحاله راح تخليها تتعرف عليك اكثر وتگدر تثق بيك وتشاركك حزنها وتقوي علاقتكم.
هَيْصَم: مستحيل ما اگدر صعب هذا الشي وانت تعرف السبب أرفد.
أرفد: بالعكس تماماً هذا افضل شي ممكن تسوي شارك همك مع شخص يحس بنفس الشعور راح تفهمك اكثر ومتبتعد عنك بحجة الشفقه.
جنت گاعدة على الجربايه وصافنه على الحايط وافكر بوضعي الحالي سمعت طرقات على الباب جاوبته بهدوء ،
فيروز: تفضل.
اتقدم من عندي وگعد على طرف الجربايه صفن بوجهي بعدين گال.
هَيْصَم: متفهم جداً حزنج وقهرج لكن ميصير تبقين منعزله أرجعي لحياتج الطبيعيه واذا تردين تتعيين حتى طلعين من البيت وتغيرين جو أسعالج بهذا الموضوع وأدبرلج وظيفه.
فيروز: اعرف مدا خوفك وقلقك عليه بس رجاءً لتعاملني بهاي الطريقة اكره الشفقه هَيْصَم.
هَيْصَم: تعتبرين خوفي عليج شفقه؟!
الواضح انت لسه متعرفيني عدل لذلك تعالي اخذج برحله لجزء من ماضي هَيْصَم الأسود اللي ميعرفه غير القله القليله من الناس..
يتبع.
شاركوا القصه وتفاعلوا شمعاتي.
تصبحون على الف خير وعافيه.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!