للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه مع اصدقائكم حتى نستمتع وي الهَيْصَم مع بعض.
هَيْصَم
(الكاتبة زهراء احمد)
_______
من عفتني..
تغير موعد النوم
بديت أسهر
وَأحن
وَأشتاگ
وَأبرد
وَأغار وترجف ايدي
وَأبجي
وَأحتار
وَأشوفك
وَأرتبك
وَأبنيك
وَأنهد.
هَيْصَم هو الأبن الأكبر لعائلة مكونه من ثمان أفراد الأب والأم اللي يكونون اساس البيت وأربع خوات النور اللي يضويه اما الأخ الأصغر فهو ابني اللي ربيته وتعبت عليه ومعصاني بيوم،
عشت كل عمري بسعادة مطلقه بداخل اجواء عائليه متفهمه وراقيه مجان الضرب هو اساس التربيه وانما الحُب والتفاهم والعطاء كبرت بحضن والدي وعلمني أدق التفاصيل جان ابوي ينتمي للسلك العسكري وحب ايشوفني اخدم الوطن من بعده و لذلك دربني على السلاح وتمرنت على أيدة من الطفوله جان يهتم بتصرفاتي وينتبه على اسلوبي بين الناس وعنده طريقه مجان ينصحني على شي يگلي اخطأ حتى تتعلم ومثل ما عشت اني تگدر تعيش جان كل همه اذا صار بيه شي يوماً ما وفقدته اكون بكامل استعدادي حتى اتحمل مسؤولية خواتي واهلي من بعده لذلك حرص على تعليمي وتأهيلي لمستقبل حس بيه من وقت مرت الأيام وكبرت وصرت الأقرب اله يطلعني وياه وين مراح يخليني اگعد بالديوان واحجي بالنيابه عنه اشوف بعينه الفخر يرفع راسه بوجودي حتى من اتعرض لموقف محرج او أنسأل سؤال ماعرف جوابه مجان يساعدني ابد ومن اعاتبه بعدين يضحك بوجهي ويگلي اتعلم باجر متلگيني موجود يمك لتعتمد عليه بكل شي،
مرت الأيام وصار عمي 18 دخلت السادس اعدادي وعكس بقيت الطلاب حيل فرحان راح احقق حلم ابوي وارفع راسه واصير احسن ضابط ينشد على اجتافي النجوم و البقيه ياخذولي التحيه بكل اعتقادي هيج الموضوع بسيط لائِث وياي من الطفوله درسنه وتعبنه سوه وعشنا كل حياتنه وحنه سند بعض،
خلصت السنه وصار موعد الأمتحانات واني على نفس فرحتي بالعكس زادت اكثر مبقى شي ويتحقق الحلم واصير ضابط امتحنه وخلصت الأمتحانات واني ولائِث ميتين انريد نعرف النتائج شنو جنت طالب علمي والمعدلات تختلف وبيوم النتائج غيرت ملابسي وطلعت من الصبح رحت لبيت لائِث وطلعنه بسرعة للمدرسه أبالنه احلام وطموحات شباب مراهقين منعرف شنو حزن تربينه على الدلال واللي نريدة ناخذه وماكو احد يگللنه لا،
نجحنه بمعدلات عاليه امي بوقتها سوت حفله وطشت چكليت بالمنطقه ابني نجح جانت ناذره زيارة لأبو فاضل عليه السلام اذا نجحت،
الأيام تمشي بسرعة خلصت العطله وصار موعد التقديم و بالبيت كلها تصيحني سيادة الضابط بس مو كل شي بالحياة يصير مثل منريد ومو كل الأمنيات تتحقق قدمت اني ولائِث ويوم القبولات بقيت يم ابو المكتبه انتظر يطلع قبولي واعرفه وين والصدمه اني ولائِث انقبلنه كلية قانون بوقتها نقهرت حيل بس هم شكرت رب العالمين وقررت بما انو حلمي متحقق راح استغل مهنتي بالدفاع عن المظلومين خلصت ايام الكليه بسرعه محسيت بيها الا واني متخرج "المحامي هَيْصَم" والدي هداني مكتب وبلشت اخذ قضايه بس كل اللي وصلتني لو وحده متعاركه وي زوجها وتريد تنفصل لو ورث معجبني الوضع وردت اخذ قضايه اكبر فاجأتني اول قضيه بالأجرام شخص متهم بالمخدرات انطاني الأدلة التثبت برائته وانو القضيه ملفقه عليه حتى يورطوه لأن مقبل يساعدهم جنت متحمس حيل قبلت بيها وسويت كل الاجرائات المطلوبه وصارت اول جلسه قدمت بيها كل الأدلة اللي اعرفها وحصلت عليها من عنده واني شخص متكلم گدرت اكسب القاضي لصالحي بس طلعت مشكله فجأة وتأجلت الجلسه لغير يوم بعد يومين من هاي الجلسه الأولى اجاني اتصال تهديد اذا متركت القضيه راح يقتلون واحد من عائلتي مراح اسوي نفسي سوبرمان واگول ماخفت بالعكس تماماً بس من خبرت والدي أيدني وگال مياخذ الروح غير صاحبها ماطول تمشي بطريق الحق لتهتم بشي ولتخاف رب العالمين هو اللي يحمي،
كلماته انطتني حافز وشجعتني اكمل بهذا الطريق وتوالت عليه الأتصالات والتهديدات بس ممهتم مشيت بالقضيه بدون ما افكر بالعواقب ويمكن هذا الشي الوحيد اللي اندم عليه بكل حياتي،
جانت آخر جلسه قبل ما اوصل للمحكمه وصلتني رسالة من رقم غريب فتحتها ونصدمت بالمكتوب،
" والدك يمنه اذا خطيت خطوة للداخل حضر للفاتحه"
صح خفت بأولها بس بعد فتره گلت لا اكيد هو مبي شي وهاي طريقتهم حتى يخلوني اخضع لطلباتهم مستعجلت وتصلت بيه حتى اتأكد يبقون ناس انذال وكل شي من عدهم متوقع ممكن يغدرون بأي لحظه،
ماكو جواب مره مرتين ثلاثه الجهاز مغلق او خارج نطاق التغطيه اتصلت بأمي گلتلي ماكو اي خبر عنه بقيت اكل بنفسي بسببي صار بيه هيج رجعت من وين مأجيت وتركت القضيه شنو مصار يبقى والدي اعز ومستحيل افرط بحياته بسهوله،
اتصلت بلائِث مطول نص ساعة واجه يمي شرحتله الموضوع وهو عاط بيه بصوت،
لائِث: طايح الحظ شوكت مقرر تحجي من ايموت ونشيعه؟!
هَيْصَم: متصلت بيك حتى اسمع من عندك هذا الكلام اريد حل لازم اعرف مكان والدي وين قبل ميصير بيه شي.
لائِث: وشايفني جلب بوليسي حتى اشم ريحته واعرفه وين؟!
هَيْصَم: لائِث بطل سخافه الوضع ميتحمل تصرفات زعاطيط.
لائِث: تعال نشتكي للمركز.
هَيْصَم: واذا سووله شي من يعرفون؟
لائِث: هم محجوا شي يعني نگدر نقدم بلاغ.
هَيْصَم: اي ليش واگف ما تمشي؟!
لائِث: خلي يطلع عمي من هاي المصيبه واذا مطيحت حظك شاربي مو عليه.
هَيْصَم: راح اسكت لأن ما ألي خلگ سوالفك التعبانه.
لائِث: شربها حليب من الصبح ويصير بيها حيل.
مشينه سوه وصلنه مركز الشرطه دخلنه وقدمنه بلاغ بس رفضوا يمشون بالأجرائات القانونيه حتى تمر اربع و عشرين ساعة قانون ميحترم حياة الأنسان ابداً لائِث مسكت وسوه مصيبه بوقتها وصلت يُعتقل لو ما اسكته.
لائِث: هذا شغلكم لو اني غلطان شلون يعني مدورن عليه فنى عمره لخدمه هذا البلد وانتوا متگدرون تسوون شي واحد علموده دمائنا لهاي الدرجه بدون قيمه عدكم؟!
والله هذا الموجود معاجبك اطلع بره محد گلك تجي لهنا اذا متمر اربع و عشرين ساعه منسوي اي شي هذا العندي.
لائِث: طاح حظك هو هذا القسم اللي قسمته احمي المواطنين واساعدهم؟؟
هَيْصَم: خلص لائِث امشي نطلع ماكو فائدة من الكلام وياه خلي نشوف غير طريقه بلكي اكو واحد شريف يگدر يساعدنه.
قبل منطلع سمعت صوت وراي التفتت شفته واگف قيافه وأتزان ضربوله تحيه الرائد والمدير مالت المركز اول مشافني سأل بعقدت حاجب.
ضَيْثَم: شنو صاير اهنا؟
طفر بسرعه وجاوبه.
لائِث: جنودك ميقبلون يبحثون عن شرطي افنى حياته لخدمه هذا البلد.
ضَيْثَم: خطف؟
هَيْصَم: نعم سيادتك.
ضَيْثَم: شنو يقربكم؟
اجيت اجاوب سبقني.
لائِث: ابونه.
ضَيْثَم: تعالوا وياي وخبروني بكل الموضوع من البدايه حتى هاي اللحظه.
انسان شريف بمعنى الكلمه حجيتله كل شي صار من اول يوم استلمت بيه القضيه لهذا اليوم والتهديد اللي وصلني أمر دوريه تطلع بحث وبقى ويانه بكل خطوة اهملت عائلتي ومتصلت بيهم ابداً واهملت اخبارهم كل تركيزي شلون صحته هسه؟؟
عذبوا؟
ياكل يشرب شلون خلص كل هذا الوقت بعيد عن البيت وهو رجال جبير؟!
يوم يتبع يوم الى أن خلص اسبوع كامل وأي خبر ماكو عنه نجنيت حرفياً ونگلب وضعي قررت ارجع للبصرة لأن القضيه اللي جنت مستلمها ببغداد فكرت انو ما اترك عائلتي وحدها فرجعت وبقى لائِث يدور عليه وي الشرطه اني الصراحه فقدت الأمل انو نلگيه الواضح هم عصابه قويه وحسيت انو راح اسمع خبر سيء عن قريب حضرت نفسي لهيج صدمه فعلياً،
جان يوم خميس الدنيا باردة بدايه شهر الواحد اتذكر اليوم عدل 10/1/2009 امي جانت بالمستشفى مرتفع ضغطها،
سكت واني اراقب حركاته دار وجهه عني حتى ما اشوفه بس اني منتبه عليه دقائق ورجع كمل بس الغصه والحزن واضحات من نبرته.
طلعت من الغرفه اصيح الدكتور يشوف حالتها حتى نطلع للبيت رجليه اخذتني لمكان مجتمعين بيه كومه ناس اباب المستشفى.
فيروز: هَيْصَم ممجبور تكمل ما اريد اعرف شي عن ماضيك لتواسيني بهاي الطريقة.
هَيْصَم: خليني افضفض يمكن اگدر اخلص من هاي الغصه اللي تموتني بكل يوم.
طلعت يمهم وبقيت اباوع على المكان اللي نظرهم عليه دخلت سديه يحركوها ثنين ممرضين مغطين الوجه مالتها گلبي فز وكأن عرف انو النايم عليها عرف عشنا سوه واكلنه سوه مجان ينام اذا ميتأكد رجعت للبيت على رغم اني ابنه بس بعمره كله معله صوته وصاح بيه يحترمني حيل ومكبر راسي ودائماً يگول ابني هَيْصَم من بعدي هو اللي يحمي امه وخواته اخوي صغير مجان يدلله مثل ممدللني يگلي اعتمادي عليك انت وريثي،
ريحة اعزاز السديه اللي نايم عليها رجليه اخذتني لا والله گلبي وقفتهم ترددت افتح الغطا عن وجهه واشوفه بس تشجعت ردت اقنع گلبي لا مو هو أيدي اخذتني بتردد ورتباك مثل شخص داخل الامتحان وهو مقاري الدرس ويعرف هذا الأمتحان مصيري يحدد مستقبله،
رفعت وياريت مارفعته جسمه ازرگ وسواد تحت اعيونه شفايفه مفطره مثل التربه اليابسه لو حيوان يحن گلبج عليه،
بقيت لا اخذ ولا انطي عيني عليه وگلبي يريد يطلع من مكانه يحضنه عقلي يگلي لامو هو جان هيبه وجسم صار أمدد على السديه ميحرك لا أيد ولا رجل ما منعتني رجولتي انو اصرخ ولا الطم سويت عزه بالمستشفى مثل النساء بالضبط واكثر هم لدرجه ارتفع ضغطي أو فقدت الوعي ومن صحيت رجعت نفس الحاله تهسترت واني اذكر منظره البلا دين ممخلين بي شي مخاذين اعضاءة بالكامل حتى گلبه ممخلين بي شي صاحي على جسمه أثار تعذيب بالكهرباء والسوط هو رجال ستيني شنو يتحمل ودعني وسلم أمانته أو فاته بقت غصه ونار متهدء بگلب الهَيْصَم متنخمد ابد،
سويتله عزاء حلف اهل البصرة كلهم بيه واللي جنت اعزيهم اجو لبيتي يعزوني،
اصعب فراق هو فراق الأب اني رجال ومتحملته لذلك ردت اشاركج بحزني حتى تعرفين مو انت بس اللي فقدتي عزيز اني هم فقدت اعزاز ودفنتهم بالمقبره مراح يرجعون يوماً ما وتركوا أثر بگلب الهَيْصَم ميندمل ابد.
هذا جزء من قصتي وماضي الأسود وماخفي كان اعظم.
نزلت ادموعي وبحركه لا أرادية حضنته خليت راسي على صدرة وصرت اشهگ بصوت عالي مجنت متخيله ابد عنده هيج قصه حزينه من اتلمحه تشوف هيبه وثبات رجال بمعنى الكلمه يخوف ويرعد الناس من عنده واني على رغم حزني على خالتي والوضع اللي اني بيه حالياً بس حسيته انسان مظلوم هوايه واذا جان هذا جزء بسيط من ماضيه وعذابه المخفي شلون؟!
بعدني عن حضنه ومسح ادموعي بكف أيدة ابتسم بوجهي وگال بحنيه.
هَيْصَم: لأي سبب كان ما احب تنزل دمعتج،
الماضي مات وي اصحابه لتحاولين تحييه من جديد.
فيروز: الجرح اذا طاب يبقى الأثر واني اقرأ هذا الشي بعيونك من اول يوم شفتك بيه عرفت انو حياتك ضلمه وعندك سر خطير.
هَيْصَم: افيض اسرار اني من جميع الأتجاهات.
انسي وكملي حياتج خليهم يعيشون بسلام بوادي السلام كافي انغص عليهم راحتهم.
فيروز: وعدل برأيك هذا هم مرتاحين واحنه لا؟!
هَيْصَم: يجي يوم وأولادنه يسوون نفس الشي هم يبجون علينه ويگعدون هاي الگعده واحنه نشوفهم من بعيد ونجي نطبطب على ظهرهم ونشاركهم حزنهم ونبجي وياهم.
بقيت صافنه بوجهه مثل الثوله بعدين انتبهت شنو گال اولادنه اخدودي صاروا حمر من الخجل وگمت اگح بصوت عالي نهض بسرعة وضرب على ظهري خفيف ونطاني گلاص مي شربته كله اخذه من عندي واني احاول ما اباوع بوجهه احس نفسي متفشله بدون سبب يعني هو اللي اطرق لهيج موضوع يصعد عندي هرمون الخجل ليش؟!
رجعني من صفنتي صوته.
هَيْصَم: وين صافن الحلو؟
رفعت نظري وسويت نفسي شجاعه وحجيت بثقه.
فيروز: املاحظ نفسك مصختها؟
عقد حاجبه وجاوبني بتساؤل وهو يأشر بأصبعه على صدرة بحركة أني.
هَيْصَم: اني!!
ليش شنو مسوي؟!
فيروز: البارحه تگلي شبل الأسد اتركه يحميج واليوم تگلي اولادنه اتزوجني فد مره وفضها ليش هاي التلميحات الغريبه مالتك؟!
انتبهت على نفسي شنو جفصت عضيت الساني المطيح حظي ومسببلي مشاكل دائماً،
ضحك بصوت عالي وبانت غمازته ومن الثول بقيت صافنه عليه ومكرشه على ملامحه يا اخي يجذب والنبي اريد اعضه من خدودة شعوري ناحيته مثل الأم اللي صار عدها طفل بعد عقم سنين طويله متعلقه بيه حيل وللأمانه هو يستحق واحد يتعلق بيه هيبه ورتابه ورزانه وشجاعة وطيبه عنده فضيعه،
التفتلي وهو لساته على ضحكته مسح اعيونه بكف أيدة وگال.
هَيْصَم: خرب يومج متعرفين اذا متجفصين ابد.
ردت اطلع نفسي من هذا الموقف المحرج سويت نفسي جديه وگلت.
فيروز: اطلع بره انت مو مال واحد يشاقه وياك ابد.
هَيْصَم: هسه هذا شقه؟!
فيروز: لعد شنو مثلاً؟!
هَيْصَم: حسيتج خطبتيني يول بربج گوليها لتعلين گلبي.
فيروز: اتخبلت انت شنو اگول؟!
هَيْصَم: اتحبيني.
يحجي ومصغر اعيونه وعينه على شفايفي ضحكت مستهزءه حتى ميحس على شي وضربت على رجلي حتى يخف التوتر ورجعت خليت عيني بعينه وگلت.
فيروز: لتتوهم سيد افندي گلب لَّباءَة ميحب احد.
بقيت اباوعله بثقه شفته مرر السانه على شفايفه وبعدين عض شفته السفليه وگال بنبرة تلاعب.
هَيْصَم: صحيح كلامج لَّباءَة الهَيْصَم بشرفج مو اسم حلو الله يرحم عمي وين لگه ذلك الأسم لو مسميج هيج من البدايه مو احله؟
من الفشله اجيت ابجي راد يكحلها عماها من گد مو عشعش بمخي اسم لَّباءَة صدگت هو اسمي الحقيقي،
يايوم الفشلات الميخلص،
رجعت وجهي حزين ونگلبت ملامحي واني اتذكر خالتي مصارلها اسبوع من اتوفت واني اضحك اهنا شگد حقيرة اني لعد،
نزلت ادموعي وقررت ارجع لمود الكآبه ليش اضحك اني اصلاً هسه شنو الشي اللي بحياتي يضحك ويخليني فرحانه؟!
فززني صوته وهو يگول.
هَيْصَم: اويلي على الهرمونات شتلعب لعب بعباد الله.
خليت أيدي على فخذي وحجيت بعتب،
فيروز: ليش شنو بيهم الهرمونات ومعاجبيك؟!
هَيْصَم: ليش اني اگدر ما انعجب بالهرمونات وصاحبتهم؟!
التفتت وعيني رجعت للحايط حجيت بحزن،
فيروز: ميحتاج تواسيني بهاي الطريقة هَيْصَم لتبقى مخلص وقتك يمي وتارك شغلك بعدين تنزل بيك عقوبه بسببي.
هَيْصَم: كم مره گلت بطلي سوالف الهنود؟
فيروز: ليش هسه اني شنو حجيت ومعجبك؟!
هَيْصَم: منو يگدر يعاقب الهَيْصَم؟!
فيروز: لهاي الدرجه انت تخوف ومحد يگدر يقترب من عندك؟
هَيْصَم: ليش مو بعينج ولج؟
فيروز: كم مره گلت انت جبير عيني متكفيك؟
هَيْصَم: جذابه.
فيروز: ليش جذابه؟!
هَيْصَم: لأن اني اشوف شكلي بيهم بالكامل يعني عينج مكفيتني.
فيروز: اريد انام نعسانه.
هَيْصَم: صار يومين بس نايمه واني مخليتني وحدي بالبيت مثل الجني لذلك اليوم ماكو نوم گومي ويايه نحضر شي ناكله جوعان.
فيروز: اكل وحدك مو جوعانه اني.
هَيْصَم: ماخذت رأيج گلت گومي ويايه يلا قبل ما اخذج بطريقتي.
فيروز: وين تاخذني؟!
هَيْصَم: للمطبخ ليش وين راح عقلج؟!
فيروز: مراح لمكان بس اني نعسانه و تعبانه واريد انام خليها لباجر الله يوفقك هسه مابيه حيل.
هَيْصَم: انت عاقله يول؟!
فيروز: شايفني نازعه ملابسي وأرگص بالشارع؟
هَيْصَم: حتى اذبحج على قبلة الصبه تريد ترگص بالشارع ونازعه ملابسها فوگاها.
فيروز: هَيْصَم والله ما ألي خلگ لتلح عليه خليني على راحتي فدوة لگلبك.
هَيْصَم: مراح يرجعون اذا بقيتي تتصرفين هيج الحي افضل من الميت لتعاقبين نفسج بهاي الطريقة السيئة.
فيروز: كلش تعبانه اني هَيْصَم،
اقترب من عندي وحضني لصدره صرت ابجي واشهگ بصوت عالي نطلقت فعلياً هم ونزاح عن صدري عبرت عن حزني بكل الطرق صرخت وبجيت وفضفضت لدرجه حسيت راسي راح ينفجر من الألم بعدت عنه ومسحت دموعي،
صغر اعيونه وبقه صافن بوجهي رفعت حاجبي بتساؤل وگلت،
فيروز: شكو؟
مجاوبني لزم أيدي وگومني اخذني للمطبخ ردت اطلع لأن من صدگ مو جوعانه و تعبانه بنفس الوقت بس هو غافلني وقفل الباب وضم المفتاح بجيب البنطلون وگال بثقه.
هَيْصَم: راويني شلون طلعين هسه؟
فيروز: ليش تسوي هيج؟!
هَيْصَم: صار يومين متاكلين عدل وبسببج مخلي نفسي جوعان وعليه لازم هسه تعوضيني و تگعدين تاكلين وياي.
فيروز: وانت شنو دخلك ليش متاكل؟!
جاوبني وهو يأشر على گلبه.
هَيْصَم: من اشوفج ضايجه ومنعزله هذا ماعرف شنو يصير بيه.
فيروز: شنو يصير بيه؟
اقترب من عندي حيل ظهري صار على الحايط وهو مقابيلي قيدني بأدية وگال بهمس قريب أذني.
هَيْصَم: اسأليه اني هم اريد اعرف، ليش يدگ سريع من يشوفج؟
واذا ضجتي ومشفت ضحكتج ليش الدنيا تصير ظلمة بعيني؟
وجودي قريب من عندج ينطيني احساس الأمان والراحه.
انا ضايع ولگيت نفسي بعيونج لَّباءَة الهَيْصَم.
خليت عيني بعينه وحجيت.
فيروز: وره هذا الكلام راح تگلي ما احبج حفظت اسلوبك عدل لتوصلني للنهر وتگلي لتشربين ممجبور تسوي هيج ويايه وحرام عليك اصلاً تعلقني بوهم ما منه فائدة.
هَيْصَم: ليش كل المشاعر لازم ترتبط بالحب الأطمأنان والأمان برأيج هذا مو كافي؟؟
فيروز: لا مو كافي احس بالأمان بوجودك يختلف تماماً عن إني احبك واريد اخلص عمري وياك لتخلط بين الثنين.
هَيْصَم: خليني احبج اذاً.
فيروز: المثل يگول "ما أريد رجل السحورة ولا أبن النذورة" اذا الحب مأجه من وحده ما أريدة اني هَيْصَم.
هَيْصَم: بُعدج جحيم لگلبي وقربج جنه شنو اسمي هذا لَّبوتي؟؟
فيروز: هذا السؤال لازم انت تجاوب عليه مو اني.
هَيْصَم: مراح تفهمين احساسي ابد وعليه خلي نقطع هذا الحديث اهنا ونسوي عشا.
ابتعد عني وراح يم الثلاجه طلع طماطه وفلفل والبيض وبدأ يقطع اشويه واجاه اتصال أشرلي بعيونه على جيب البنطلون رفعت حاجبي من كل عقله هذا غلست وسويت نفسي منتبهت عليه حتى صاحني.
هَيْصَم: ليش واگفه هيج تعالي اتصال مهم هذا.
فيروز: اي متجاوب لازمتك اني؟!
هَيْصَم: أيدي مو نظيفه اتحركي راح ينسد.
هو فعلاً انسد ورجع اتصل من جديد رحت وگفت يمه ومديت أيدي طلعت الموبايل الموضوع طبيعي بس اني متت خجل ،أشرلي افتحه واخلي على أذنه سويت مثل ميگول ، صرت بالنص حاضني ويحجي وياه وهو يقطع، راسه على كتفي وأنفه يممره على رگبتي حسيت بيه طبع بوسه خفيفه قريب أذني بسرعة خليت الموبايل يمه ودفعته وخرت صاير كلش ادبسز سيد افندي.
هَيْصَم: ليش زاعجني بهيج وقت؟
لائِث: مشتاق انت ممشتاق؟
هَيْصَم: منو يشتاقلك انت؟!
لائِث: يلا يجي يوم ام الجهال تشتاقلي متعطل عليك.
هَيْصَم: متصل بيه حتى تحجي هيج؟
لائِث: اجتنه اخباريه اليوم راح تعبر سيارة بيها مخدرات حدود بغداد.
هَيْصَم: عندي علم.
لائِث: ليش منطيت أمر؟!
هَيْصَم: خليها تعبر اريد اشوف منو يستلمها.
لائِث: عندك خطه؟
هَيْصَم: مرر الأمر بمراقبتها من تعبر حتى توصل للمكان المطلوب ساعه واني يمكم.
لائِث: ادلل.
هَيْصَم: شنو صار بالموضوع اللي گتلك بيه؟
لائِث: داگه رجل الا تشوفك قنعت بيها حتى عجز الساني بس ولا يفيد.
هَيْصَم: أمنعها بأي طريقه ما أريدها تجي لهنا راح تسببلي مشكله اذا شافت لَّباءَة.
لائِث: وانت من شوكت متخاف على مشاعرها؟!
هَيْصَم: من اليوم عندك مانع؟!
لائِث: وكم مره گتلك اني مو ابو صيدليه؟
هَيْصَم: اترك سخافتك وروح عندي شغل.
لائِث: اسمع صوت فرم ولك بس لاتطبخلها؟؟
هَيْصَم: ليكون معاجبك؟
لائِث: ضاع الولد من أيدي يمه الحگيلي يبووو.
هَيْصَم: بطل سخافة وشوف شغلك.
لائِث: جنت اتوسل بيك تطبخلي من اتمرض تشتري وتخسر فلوس ومتسويها هسه تطبخ للغريبه واني صديقك عِشرة عمر مضايگ شي من ايدك صحيح لو گالوا الزمن تغير مو نفسه ذلك الزمن الأولي.
هَيْصَم: ناقصك ملايه على هاي النعاوي.
لائِث: روح زعلت ومراح احجي وياك بعد.
كمل وصب الأكل اكلت لگمتين وهو هم اشويه واجاه اتصال فتح الخط ثواني ونهض بسرعة من الكرسي وصاح بصوت فززني من مكاني.
يتبع
قبل متحجون اني اعرف البارت قصير لكن لأن مريضه مگدرت اكتب اكثر من هيج ان شاء الله اعوضكم بالبارت القادم حبايبي.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!