للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
هَيْصَم:
كلشي بيج يذوب سكته
يشبه اخيوط الفجر
هيج احس يطلع كلامج
طلسم يبطل السحر
الله لاينطي العليج يباوع
بنظرة حسد
محصنج بآية الكرسي
وقل هو الله أحد
: فزيت من النوم على لمساته لوجهي ابتسمت واني مغمضه يالله شكد كلبي يحبه، فتحت عيوني على كيف تقابلت وي عيونه، ابتسم بوجهي وكال بنبره هادئة.
هَيْصَم: احبج ياعوض ربي واجمل هديه الاهيه الله يرزقني بيها، صحيح انتِ مو الحب الاول لكن تبقين ماخذه قطعه من كلب الهَيْصم ياخيوط كلبه انتِ.
فيروز: دائما تكول هاي الجمله على رغم الكلب مابيه خيوط شلون رهمتها؟!
هَيْصَم: انتِ مو وجه غزل مع هذا راح اشرحها، الكلب بيه شرايين فمن باب التغير غيرت اسم شريان وكلت خيوط احب اتغزل بطريقه مختلفه احب التميز مو بأيدي.
فيروز: تفيض تميز انت.
هَيْصَم: والدليل انتِ.
فيروز: اني شنو؟
هَيْصَم: إثبات على انو اني مميز باختياراتي لَّباءَة الهَيْصَم.
فيروز: شكد تحبني هَيْصَم؟
هَيْصَم: بكد جروحي اللي تعافن اول ملمحت عيونج.
فيروز: وشوكت لمحت عيوني؟
هَيْصَم: في يوما ما قرر القدر يستجيب دعاء امي وخلاج بطريقي وصرتي حبيبة كلب الهَيْصَم وزوجته.
فيروز: بعقلك الفكره من زمان صحيح؟
هَيْصَم: من اول مشفتج بس انتِ وحده غبية متفهمين كلامي.
فيروز: لتكول غبيه تصرفاتك مجانت ادل على حب ابد.
هَيْصَم: يعني برأيج ليش اهتم بسلامتج اذا متعنيلي.
فيروز: اني اكبر من كوني وصية الوالد مو؟
هَيْصَم: زوجج جوعان وحاب اكل شي من ادينج الحلوه ممكن؟
فيروز: عيوني الك تدلل.
هَيْصَم: عيونج اللي اكيد لان اشوف بيهم انعكاس صورتي مرايتي الحلوه اخ كلبي شكد يحبج.
فيروز: واني هم احبك اضعاف حبك إليه صدكني.
هَيْصَم: احبج لدرجه اخاف عليج من تمشين ليطخ اصبع رجلج الصغيرون بالباب وتتأذين واني مموجود يمج، لو يحترك اصبع ايدج وانت تطبخين وممنتبها، احبج بجنون لدرجه اريد احتفظ بيج بقفصي الصدري واخليج يم الكلب وهناك تسمعين كلمات غزليه وألحان خيالي يدل على مقدار جنون الهَيْصَم بالَّباءَتة، لو ابقى احجي لبعد سنه مستحيل أكدر اوصلج مقدار بسيط من حبي الج ياوردة حياة الهَيْصَم وكلبه انتِ، علعلتي كلبي شنو من عيون عندج حبيبي؟
فيروز: عيون وكعن ملك الغابه المفروض تقدملهن مكافأة مو صح؟
هَيْصَم: قبله تكفي؟
فيروز: وحده بس؟
هَيْصَم: صايره طماعه لَّبوة!!
فيروز: ردت اغير جو مو صوجك، كمت من مكاني سحبني من أيدي ورجعني لصدرة ابتسمت حبه إليه واضح بعيونه يوصلي من نظرتهن، يحجي بهمس قريب أذني خله بدني كله يقشعر.
هَيْصَم: ثنين مينجعمن سوا تعرفين منو هن؟
أشرتله براسي بمعنى لا، رفع راسي بأيدة وكال بنبرة هادئة خلت خدودي تصير حمر خجل ماعرف حب.
هَيْصَم: انتِ والخجل.
اول مكمل الجمله عقدت حاجبي وضربته على صدرة وحجيت بغضب مصطنع.
فيروز: شنو شايف بيه وتكول ماعندي خجل؟!
هَيْصَم: احب الجرأة اللي عندج ومتخجلين من تحجين اللي بكلبج العلاقه الناجحه تكون هيج لهذا السبب الحديث وياج ممتع وما امل من عنده.
: هاي المرة صدك خجلت وحسيت خدودي صاروا حمر، رفعت عيني اله لكيته صافن بوجهي ومبتسم وكأن شخص لكه المضيعه، شجعت نفسي وتقربت من عنده على رغم اول مره اسويها بس شعور داخلي جبرني اخطوا هاي الخطوة بكل الأحوال هي مو شي غلط، قبلته على شفايفه بسرعه وبتعدت من الصدمه حتى ما انطه اي رد فعل ابتسمت ودخلت للحمام خلصت الروتين وطلعت لكيته مموجود باوعت على الغرفه زين ملكيته ضجت معقوله راح للدوام حتى بدون ميتريك حتى بالسبعة مصارت، لشوكت راح يبقى هيج يطلع بدون اكل واني الغبيه ماعرف ليش من انام على صدرة انسى نفسي وما اكعد لو تنفجر يمي قنبله، طلعت من الغرفه هم ملكيته تاكدت صدك راح،
انتابني احساس بالجوع رحت للمطبخ احضر الريوك خالتي لان تبقى سهرانه بالليل علمود ادعيتها متكعد هيج وقت او واني ما اكعدها اصلا تكسر خاطري، فتحت الثلاجه وطلعت بيض وطماطه احب هاي الاكله كلش بديت اقطع حسيت على أيد حاوطت حصري وقطرات مي نزلت على ركبتي ابتسمت بعده مراح، التفتت اله وقبلته على وجنته بسرعه ورجعت اكمل شغلي، همس قريب أذني بصوت هادئ.
هَيْصَم: زوجتي العزيزة شنو تسوي؟
فيروز: بيض وطماطه.
هَيْصَم: ومنو كلج اني اعمى؟!
فيروز: لعد شنو جنت تقصد بسؤالك؟
هَيْصَم: مو شفت فجأة القمر نازل يمي بالمطبخ فدا اسأل شلون ترك المجره وعجبه بيتي؟
فيروز: لان لكه يمك الأمان والراحه والهدوء والحب لذلك فضل يترك الوحدة ويستقر وياك.
هَيْصَم: وشنو اريد من الله اكثر انو القمر استوطن بيتي وبين احضاني طول اليوم.
فيروز: اليوم انت رومانسي زيادة عن اللزوم هَيْصَم.
هَيْصَم: وليش متفاجئه اني دائماً رومانسي.
فيروز: اي صح بس اليوم مختلف حاسه حيصير شي مو زين اذا عندك علم كلي لتصدمني هَيْصَم بعدين.
هَيْصَم: لتتوهمين ماكو شي مجرد اتغزل بمرتي ليش كل هذا الخوف؟!
فيروز: اذا انت ملاحظ كل مره نعيش بيها أجواء سعيدة لازم تنكلب ضدنا وتصير مشكله وندخل بجو كئيب.
هَيْصَم: هاي المرة عكس، ماكو حزن ولا قهر ولا مصايب، الأعداء هم اللي راح يتعاقبون على كل شي صار، جهزيلي نفسج نهاية الاسبوع لائِث يخطب ريهاف يعني راح ننتقل لذلك البيت لفتره من الوقت.
فيروز: مو مشكله اني اروح لآخر الدنيا اذا انت موجود ويايه.
هَيْصَم: ممكن ما اكون موجود عندي شغل ضروري اجي بس يوم الخطبه.
فيروز: اذا هيج ليش اغير مكاني؟
هَيْصَم: لان امي راح تروح وانتِ لازم تكونين وياها.
فيروز: تمام مثل متريد.
هَيْصَم: احب تفهمج.
فيروز: ميحتاج اتجادل او اعترض اكيد هذا من خوفك على سلامتي.
هَيْصَم: علمودج ممكن ارتكب جريمة المهم تبقين بخير.
فيروز: احبك بكل اللغات انت اهم واحلى شي صار بحياتي.
هَيْصَم: على هذا الكلام شبعت ميحتاج اكل شي بعد.
فيروز: لتطلع بدون اكل وترك سوالفك اللي تعيدها كل مره.
هَيْصَم: رجُل صحي اني ماحب الدهون بالأكل وحتى السكريات بس المرض يجبرني اكلهن.
فيروز: ماكو علاج اله؟
هَيْصَم: لا مزمن.
فيروز: ليش هيج صار وياك؟
هَيْصَم: من توفت عائلتي ودخلت تدريب عسكري حتى اصير ملازم الحاله النفسيه والعذاب الجسدي وقسوة التدريب كل هذا طلع على شكل مرض تعذبت بيه وبقى مستمر لهذا اليوم.
فيروز: حياتي انت.
هَيْصَم: عدت واصلا شي حلو الحامض حلو مو مزعج اليه.
فيروز: بس أني سامعه ميقبلون المريض بالسلك شلون قبلوك؟
هَيْصَم: مرض سري محد يعرف بيه بس لائِث بالأضافة مجان بوقت الدورة وإنما بعدها واذا وقت فحص اكل سكريات حتى يبين طبيعي، التعب اللي شفته والعذاب خلاني اتحمل كل العواقب المهم اوصل لهدفي ورب العالمين متركني دزلي ناس تساعدني من كل مكان.
فيروز: وان شاء الله تحصل اللي تريده وتكدر تاخذ حقك وتحقق الانتصار ودم عائلتك ميضيع.
هَيْصَم: ان شاءالله، عوفيني من الماضي وخلينا بالكمر اليمي تدرين مشتاق؟
فيروز: مشتاق لشنو هياني يمك؟!
هَيْصَم: اربع وعشرين ساعة اني مشتاق حتى لو انتِ يمي.
فيروز: لهاي الدرجة تحبني هَيْصَم؟
هَيْصَم: حبج الذنب الوحيد اللي ما أريد اتوب من عنده هو غلط واني اشوفه رب الصح برأيج هذا اسمه حب لو خبال؟
فيروز: شعوري مبادل وعيونك الحلوه اللي اخذني لعالم ثاني من صاروا بعيوني، عرفت بوقتها انو وكعت وماكو حل بقيت متمسكه بأمل تصير بأسمي وملكي يوماً ما ومن اجيت فجأة وكلت راح اخطب حوري ادمرت حرفياً وقررت خلص راح اطلع من حياتك على رغم هذا القرار هو الموت بالنسبه إليه بس كلت اجازف واخطي هيج خطوة احسن ما اشوفك تروح من أيدي واني ما أكدر اسوي شي.
هَيْصَم: ليش معترفتي بمشاعرج حتى لو بوقتها جنت مقرر اتزوجها صدكيني اكنسل كل شي واختارج لو اعرف الطريق وياج مليان سيوف ورماح، ليش سكتي؟
فيروز: بمجتمعنا وعاداتنا الرجال هو اللي يعترف للمرة، من غير القانوني والأخلاقي اعترفلك بحبي بالوقت نفسه انت تكلي لتحبيني.
هَيْصَم: لضلميني جنت دائما انبهج بس انتِ بالج فاصل، يعني برأيج منو ياخذ وحده غريبة لبيت خطيبته ويلبسها ابيض نفس الشي؟!
فيروز: مخطر على بالي انو هو يوم العقد، سيد افندي انت تسويها وطلعني غلطانه وين لكيتها هاي!!
هَيْصَم: شوكت كلت انتِ غلطانه؟ بس يحلوه انتِ عديمه تركيز.
فيروز: طلعني غبية فد مره ليش تلف ودور؟!
هَيْصَم: كم مره كلت انتِ أنثى الأسد ولَّباءَة الهَيْصَم، يمج أأمن على بيتي وعائلتي لان اعرف انتِ شنو ومنو بنفس الوقت، كم مره كلتها؟
فيروز: دائماً.
هَيْصَم: اذا هيج شوكت صارت حوري هي أنثى الأسد؟
ضربته على صدره وحجيت بحده.
فيروز: لتذكر اسمها وبصفه أنثى الأسد حتى تضرب مثل.
هَيْصَم: تغارين خيوط كلبي؟
فيروز: ليش ما غار غير زوجي انت!!
هَيْصَم: منو كال؟
فيروز: شنو منو كال اذا مو زوجي منو انت لعد؟
هَيْصَم: عاشق، مغروم، هايم، تايه وضايع بعيونج لَّباءَة الهَيْصَم.
فيروز: احبك.
هَيْصَم: اعشقج.
: صباح من أجمل الصباحات اللي اعيشها وياه احس نفسي مثل الطير الحر يحلق بكل حب من يكون موجود، انتهى وقت السعادة وطلع للشغل جانت الساعة ثمانيه رجعت نمت لان كلش نعسانه.
لائِث: ليش وجهك يلطم؟
هَمْهَام: ابوها رفض ابن عمها ناهي عليها ويكول هي اليه ما انطيها يردوني اسوي شي ميعجبهم واخذها وانهزم لمكان بعيد يحلمون بيه يشوفها بعد.
هَمْاس: خليك عاقل بدون سوالف مزعطه، مو رجال اللي ينهزم وي مرة ويدمر حياتها ويبهذل اهلها وينزل رأسهم، فكر بأهلك لا الله يبليك بيهم بنفس الطريقه.
هَمْهَام: والحل اخليها تروح من أيدي واني صافن عليها بدون ما اسوي شي؟
هَمْاس: كلبك يتعود ولتكول لا انت مو اول واحد عافته حبيبته، اعرف صعب تنسى بس ماكو حل لتنزل سمعت أهلها بسبب نزوة بأجر اذا صار عدكم أطفال منو الهم؟
ضَرْضَم: كلام هَمْاس صحيح لتسوي شي تندم عليه بعدين وربك يعوض خير ان شاء الله.
لائِث: الصافي واني ما متحمله يجي الاضرب من عنده، اخوان اذا انتوا متحبون فخليكم على صفحه بدون نصايح ماصخه، وليهمك وعلي نسوي مداهمه هي الك يعني ألك اطمأن.
ضَرْضَم: شلون بله؟!
لائِث: اطلع من عدها يمي.
هَيْصَم: وعليكم السلام والرحمة.
ضَرْضَم: احترامي سيدي.
لائِث: ليش دخلت بهدوء محسينه بيك سيادتك؟
هَيْصَم: مره ثانية أحاول ما ازعجك سيد لائِث اعذريني ركبتي سداده.
لائِث: سداده مال مي؟
هَيْصَم: سمعتك لتهمس خليك عاقل والا تعرف شنو يصير نسيبي المستقبلي.
لائِث: حبيت هذا اللقب حيل ابقى دائما تعيده.
هَيْصَم: ليش جنتوا تحجون بصوت عالي؟
لائِث: هَمْهَام حبيبته ناهي عليها ابن عمها.
هَيْصَم: اي وانتوا تخططون شلون ترجعوها مو؟
لائِث: وانت اللي راح تنفذ الخطه.
هَيْصَم: اعتقل ابن عمها لو اهدده؟
لتنسون عملنه بالقانون والدولة صحيح متفهم وضعك وحبك الها وحزنك لان راح تروح من ايدك وهم الخسرانين صدكني انت شاب متتعوض ولو اني بمكانهم ما اتردد لحظه وانطيك بنتي لكن شنو منريد يبقى رب العالمين كاتب اللي يصير لذلك لا اعتراض على أمر الله خليك صبور لابد يجي يوم ورب العالمين يعوضك والدليل حي يرزق واكف كدامك هسه ربك يمهمل ولا يهمل وممكن يكون العوض افضل بهوايه من اللي خسرته.
هَمْهَام: ان شاءالله سيدي شكرا الك.
لائِث: هاي هي!!
هَيْصَم: الهَيْصَم ميستخدم رتبته حتى يهدد احد او يضغط على احد هذا الشي مستحيل، علاقتي بيكم شي واحترامي لمهنتي وقسمي اللي اديته شي ثاني مختلف تماماً لذلك اذا تزعل من عندي لان مراح أكدر اساعدك اعذرني وتفهم وضعي مدخلنه لهذا المكان حتى ندمر حياة الناس بالوقت اللي احنه مسؤولين بيه عن سعادتهم.
هَمْهَام: بالعكس سيدي انت سعيت هوايه حتى اتزوجها بس ابن عمها هو اللي قافل على رغم هو يعرف عدل اني وهي بيناتنا علاقة حب.
هَيْصَم: الله يعوض خير بس ابقى واثق بيه.
هَمْهَام: والنعم بالله.
هَيْصَم: حضروا لتنفيذ العملية مبقى شي الها ان شاء الله، وانت لائِث تعال ويايه.
رحت وراه باوع بوجهي كايل: شبي وجهك؟
لائِث: متوقعت هيج تسوي هذا مو انت هَيْصَم.
هَيْصَم: حتى ميتعلق بفكره ممكن تصير وممكن لا.
لائِث: تريد تحجي وي ابن عمها؟
هَيْصَم: وانت تجي وياي.
: طلعنا من المركز ورحنه لبيتهم احنه نعرف المكان نزلنا اني وهو وطرقنا الباب شويه ونفتح استقبلنا الرجال الجبير لكن للأسف مموجود طالع للشغل رجعنا للسياره.
لائِث: راح ترجع؟
هَيْصَم: لا.
لائِث: ليش؟
هَيْصَم: هَمْهَام مثل اخوي الصغير ما أكدر ما اساعده.
لائِث: واذا ماقبل؟
هَيْصَم: وقتها ينتهي كل شي اهنا ومتنطيه علم.
لائِث: شلونك؟
هَيْصَم: الحمدلله.
لائِث: بوجهك سوالف كول اسمعك.
هَيْصَم: شلون يعني اكو سوالف بوجهي؟!
لائِث: نظرتك مو طبيعية اكو شي لو راح يصير شي من خطبت بنت خالتك نفس النظرة كول هاي المرة شنو من مصيبه منتظرتنه؟
هَيْصَم: ماكو مصيبه مجرد شغله لازم تصير خلال هاي الأيام ومضايقتني حيل.
لائِث: عندك خطه؟
هَيْصَم: كل شي بوقته حلو لا تستعجل على رزقك.
لائِث: اعرفك مراح تحجي بعدين تصدمنا كلنه ك العاده.
هَيْصَم: وهاي أجمل صفات الهَيْصَم يراقب الفريسه من بعيد وبعدين يقترب بهدوء ومن ثم يهجم اهنا محد يكدر يخلصها من ايده.
لائِث: حمستني.
هَيْصَم: اني هم متحمس لدرجه متتخيلها.
واحنه نسولف مر واحد علينه من شافه سأل: هو هذا مو؟
لائِث: يمكن، ماعرفه عدل شفته مرة وحدة بالخطبة.
هَيْصَم: خليك اهنا راح انزل احجي وياه، وقفته كايل: لحظة ممكن.
اكرم: نعم تفضل بشنو أكدر اساعدك؟
هَيْصَم: المكان مو مناسب حتى نحجي بموضوع مهم مثل هذا تعال ويايه للسياره ونورح لاقرب مكان نكعد بيه واذا اتحب ابيتك ايضاً مو مشكلة، اجيتك بالزي اكيد ما أريد أعرض سلامتك للخطر ولا اهددك فكون مطمأن.
اكرم: تفضل للبيت.
هَيْصَم: دقيقة بس.
لائِث: طردك ليش رجعت؟
هَيْصَم: مجبتك حتى تبقى بالسياره انزل ويايه يلا.
لائِث: اعرفك متعيش بدوني.
هَيْصَم: امشي لا انزل بيك عقوبه.
اكرم: حياكم الله.
هَيْصَم: الله يحي اصلك، اجينا اليوم حتى نحجي بموضوع مهم من أرجال لرجال واعي ومثقف وفاهم الحياة والتطور اللي يصير واني الله يشهد اعرف بيك وباصلك وشلون انتوا ناس محترمين وعلى الراس من فوك مكانكم.
اكرم: يسلم راسك سيدي اللي تريده كوله واني حاضر ركبتي ألك.
هَيْصَم: تسلم متقصر اعرفك، لكن احنه نيتنا اليوم الصلح ابنا هاوي بنتكم ويريد يتقرب من عائلتكم بأمر الله ورسوله الزواج هو مؤسسه بين عائلتين تقوي الروابط وتصلح الأسر واللي ميطيع ربه ونبيه مابيه خير لأهله وناسه واني اشهد انكم ناس اجاويد او اوادم وتعرفون الدين حق ومتظلمون احد، واحنه داخلين بيتكم وبالعادة العرب ميردون ظيفهم ودايس ابساطهم خايب عن طلبه فشنو كلت؟
اكرم: كبع واخذ ادلل.
هَيْصَم: بنت عمك اخويه وابني رايدها والعارض انت، سمعت ناهي عليها وكاسر ركبتها وانت تدري الزواج يكون فاشل اذا مو حب متبادل بين الطرفين جسمها يمك وعقلها وفكرها يم واحد ثاني متعيش حياتك مرتاح وانت تشوفها وي كل صفنه تحن لأيام ماضيها.
اكرم: من وين الك هذا الحجي بنت عمي العيب ميلفيها.
هَيْصَم: اعرف انت تعرف واحنه بيناتنا تنسد السالفة وبهذا الديوان، البنيه مو ألك لا كلب ولا روح ليش تورط نفسك بزيجه باطله يكولون؟ العقد اذا مقابله عليه تعتبر علاقه غير شرعيه حتى ولدكم يكونون غير شرعيين وحرامات تضيع عمرك واخرتك بسبب كلب دك لوحده.
اكرم: بنت عمي اني أوله بيها من الغريب.
لائِث: راح اكوم بعد ما اتحمل.
هَيْصَم: انجب وكعد.
لائِث: اروح للحمام شبيك.
هَيْصَم: طاح حظك اي والله.
لائِث: اشاقه وياك.
هَيْصَم: والله راح تنزل بيك عقوبه.
لائِث: خويه هذا المشهد الهندي شوكت ينتهي؟
اكرم: يامشهد؟
لائِث: صار ساعه صافن بوجهنه كول شنو تريد احنه مستعدين انفذ طلبك اذا تركتها اكيد هي مو ملكه جمال حتى كلكم متخبلين عليها.
اكرم: احترم نفسك كاعد ابيتي وتهين عرضي.
لائِث: عرضك متحبك كلبها مو الك انت رجال لو ماعندك احساس افهم!! اجيناك بالحسنى ميفيد نجيك من باب ثاني شنو تريد مقابل تعيفهم يزوجون؟
اكرم: ممحتاج شي الحمد لله والشكر ناقصني بس هي.
لائِث: شلون يريد افلش راسه هسه.
هَيْصَم: اسكت منو حجاك؟
والله اذا خربت انت السبب فاهم.
لائِث: والعباس متخرب باوع لوجهه يريد يسوي اتفاقيه ويانه.
هَيْصَم: احنه نترخص لازم نروح.
اكرم: اقبل بس بشرط.
لائِث: اعتبره تم، شبيك ضايج من صعدنا لحد الأن؟
هَيْصَم: شرطه مقنعني.
لائِث: شاك بشي؟
هَيْصَم: ليش طلب هيج مبلغ؟
لائِث: ممكن مطلوب.
هَيْصَم: وممكن متورط لازم نراقبه اصلا اهنا تكون شغلتنا اسهل اذا طلع شكي بمحله.
فيروز: مرت الايام مثل العسل وبعد يومين خطوبه ريهاف حضرت ملابسي راح يجي هَيْصَم ياخذني يمهم خالتي راحت من الصبح شوية وسمعت حركه بالبيت بنفس اللحظه وصلتني رساله على موبايلي.
: التفت عيونه ادور عليها عقد ملامحه بغضب وهو يسمع صوت الثاني وهو يحجي باستفزاز ونبرة انتصار عظيمه.
حياك الله بعريني لّهيم.
يتبع..
البارت اقل بشويه من 3800 كلمه.
تصبحون على الف خير وعافيه شمعاتي.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!